3 января.

Канон мученице Иулиании Никомидийской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Агница Твоя́, Иису́се, Иулиани́я, зове́т ве́лиим гла́сом: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю; но, я́ко же́ртву непоро́чную, приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

Кано́н святой. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святая мученице Иулиание, моли Бога о нас.

Му́ченическою я́ве све́тлостию облиста́ющи, о Бо́зе лику́еши, свяще́нно обожа́ема, всехва́льная, и просвеще́ние моли́твами твои́ми подава́еши пою́щим тя́.

Припев: Святая мученице Иулиание, моли Бога о нас.

Уязви́лася еси́ сладча́йшим раче́нием Христо́вым, всехва́льная, и, плотски́я оста́вльши сла́сти и обру́чника тле́ннаго, обручи́лася еси́, непоро́чная чи́стая де́во, Сотво́ршему.

Сла́ва Отцу́ и Сы́ну и Свято́му Ду́ху:

Осия́в светлоявле́нными добро́тами твою́ мы́сль, Созда́тель все́х и Бо́г небе́сных тя́ черто́гов, де́вственно лику́ющую, му́ченице богому́драя, удосто́й.

И ны́не и при́сно и во ве́ки веко́в. Ами́нь.

Богородичен: Де́ва Созда́теля естества́ роди́ти и́дет в верте́пе, пло́ть из Нея́ по ипоста́си несказа́нно преесте́ственне поне́сшаго, я́ко да обожи́т челове́чество.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святая мученице Иулиание, моли Бога о нас.

Соверши́ла еси́ ду́шу хра́м Бо́жий пресвя́т, сла́вная, Боже́ственным храмо́м вы́ну пе́сньми и моли́твами приседя́щи.

Припев: Святая мученице Иулиание, моли Бога о нас.

Велича́йших улучи́ти жела́ющи дарова́ний, всечестна́я, боле́зни плотски́я терпе́ла еси́ я́ко в чужде́м телеси́.

Сла́ва Отцу́ и Сы́ну и Свято́му Ду́ху:

Крове́й твои́х ка́плями безбо́жия о́гнь погаси́ла еси́ и ве́рных напои́ла еси́, Иулиани́е, ра́зумы.

И ны́не и при́сно и во ве́ки веко́в. Ами́нь.

Богородичен: Избавля́яй челове́ки Изба́витель от Чи́стыя ражда́ется в Вифлее́ме, пелены́ я́коже Младе́нец прие́м.

Седа́лен, гла́с 4.

Жениха́ возлюби́вши Творца́ и Бо́га, жениха́ тле́ннаго оста́вила еси́, му́ченице честна́я, и, ра́дующися, претерпе́ла еси́ му́ки и терза́ния и о́гненное томле́ние. Те́мже, венцено́сица, к Боже́ственному черто́гу возшла́ еси́, испроша́ющи все́м прегреше́ний проще́ние.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святая мученице Иулиание, моли Бога о нас.

Просте́рту мы́сль стяжа́вши ко все́х Го́споду, пло́тию просте́рта и ураня́ема лю́то, ника́коже брегла́ еси́, Иулиани́е, до́брая де́во.

Припев: Святая мученице Иулиание, моли Бога о нас.

Превозмого́ша раче́ния Влады́чняя пло́ти, всехва́льная му́ченице, омрачи́ти, те́мже пренебрегла́ еси́ и бога́тство, и обру́чника, и многообра́зныя му́ки.

Сла́ва Отцу́ и Сы́ну и Свято́му Ду́ху:

Тя́, нескве́рную а́гницу, я́коже во́лцы, мучи́телие терза́юще, му́ченице, ра́нами, непоро́чное це́лое Бо́жие соверши́ша Боже́ственное овча́ и заколе́ние.

И ны́не и при́сно и во ве́ки веко́в. Ами́нь.

Богородичен: Де́вство по рождестве́ запеча́тано, Богоро́дице, ви́дящи, у́жасом одержи́ма бы́вши. Ча́до, взыва́ше, ка́ко ны́не повию́ Тя, песко́м повива́ющаго мо́ре?

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святая мученице Иулиание, моли Бога о нас.

Струю́, му́ченице, злочести́ваго безбо́жия изсуши́ла еси́ тече́ньми крове́й, непра́ведно пролива́емыми, и о́гнь пре́лести погаси́ла еси́.

Припев: Святая мученице Иулиание, моли Бога о нас.

Всеце́лу тебе́ саму́ю Бо́гу принесла́ еси́, че́рвлень де́вства багре́нии крове́й твои́х светле́йшу соверши́вши.

Сла́ва Отцу́ и Сы́ну и Свято́му Ду́ху:

Твое́ю добро́тою ду́шу уязви́вши, претече́, о Влады́ко, де́ва ви́димыя добро́ты, страда́нием сия́ющи.

И ны́не и при́сно и во ве́ки веко́в. Ами́нь.

Богородичен: Чу́до новоле́пно: Де́ва и́дет Пречи́стая в верте́п Вифлее́мский роди́ти Бо́га вочелове́чшася.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святая мученице Иулиание, моли Бога о нас.

Жела́нием уя́звлена бы́вши Боже́ственным, взыва́ла еси́: Христа́ иду́ дости́гнути кра́снаго добро́тою, те́мже му́ки терплю́, неукло́нным ра́дующися ра́зумом.

Припев: Святая мученице Иулиание, моли Бога о нас.

Протяза́ти неми́лостивно и же́злием сокруша́ти Госпо́дню а́гницу лука́вый гони́тель повелева́ше, просте́рту ко Христу́ мы́сль иму́щую.

Сла́ва Отцу́ и Сы́ну и Свято́му Ду́ху:

Утреневала еси́ ко Христу́, Невече́рнему Со́лнцу, и Того́ светлостьми́ ду́шу, богому́драя, и се́рдце озари́ла еси́ и к Све́ту преложи́лася еси́ присносу́щному.

И ны́не и при́сно и во ве́ки веко́в. Ами́нь.

Богородичен: Мо́ре пови́вый мгло́ю, во́лею ражда́ется Зижди́тель из Де́вы Отрокови́цы и пелены́ я́ко Младе́нец прие́млет, ми́р избавля́яй.

Конда́к святы́я, гла́с 3.

Де́вства добро́тами преочище́на, деви́це, и муче́ния венцы́, Иулиани́е, ны́не венча́вшися, дае́ши су́щим в ну́ждах и неду́зех исцеле́ние и спасе́ние, приступа́ющим к ра́це твое́й: Боже́ственную бо благода́ть Христо́с источа́ет и жи́знь ве́чную.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святая мученице Иулиание, моли Бога о нас.

Безу́мием в разжже́нный коно́б, му́ченице, судия́ тя́ вмета́ет неми́лостивно; Ангелом же Тя́ Госпо́дь невре́дну спасе́, Сего́ почита́ющу.

Припев: Святая мученице Иулиание, моли Бога о нас.

Не ужаса́ющися мужему́дренно, па́че же, всечестна́я му́ченице, ко огню́ гряде́ши, восхлажде́ние чу́вствующи и вопию́щи: благослове́н еси́ в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Ты́ Жениху́, я́коже ве́но, принесла́ еси́ наро́д и лю́ди, ве́ровавшии в Того́, и ле́сти омраче́ние светоно́сными твои́ми чудотворе́ньми отрази́ла еси́.

И ны́не и при́сно и во ве́ки веко́в. Ами́нь.

Богородичен: Ра́дуйся, село́ Невмести́маго, Ма́ти Де́во: Сего́ бо Плотоно́сца хотя́щи на́с ра́ди в верте́пе роди́ти, Пречи́стая, исправля́юща Свои́х ру́к созда́ние.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святая мученице Иулиание, моли Бога о нас.

Горе́ твое́ о́ко и у́м к могу́щему спасти́ иму́щи Бо́гу, коно́бная вре́ния благода́тию Боже́ственнаго Ду́ха угаси́ла еси́, воспева́ющи пе́снь о́троческую, му́ченице, ве́рою: благослови́те, вся́ дела́ Госпо́дня, Го́спода.

Припев: Святая мученице Иулиание, моли Бога о нас.

Глаго́лу мучи́теля злочести́ваго служа́ще, огня́ досто́йнии суему́дреннии жи́ву тя́, му́ченице, во о́гнь вложи́ша; но неопале́на была́ еси́ огне́м, Женихо́вою любо́вию, богоно́сная, ороша́ема, Сего́ почита́ющи.

Сла́ва Отцу́ и Сы́ну и Свято́му Ду́ху:

Стоя́ла еси́ пред суди́щем, Христа́ пропове́дающи, Бо́га Безсме́ртнаго, претерпе́вшаго распя́тие, и пре́лесть умертви́вшаго, и безсме́ртную жи́знь ве́рным подаю́щаго, вопию́щим: вся́ дела́, по́йте Го́спода.

И ны́не и при́сно и во ве́ки веко́в. Ами́нь.

Богородичен: Облаки восхожде́ние Свое́ полага́я, Госпо́дь о́блаком на́м Де́вою роди́тися гряде́т, я́ко да разори́т ду́ш на́ших греха́ мра́чный о́блак, вопию́щих Ему́: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святая мученице Иулиание, моли Бога о нас.

Иулиани́и богоно́сныя су́щим о ве́ре подвиго́м Ангели удиви́шася: ка́ко же́нским естество́м посрами́ тоя́ прама́терь в раи́ умори́вшаго.

Припев: Святая мученице Иулиание, моли Бога о нас.

Яко преудо́бренная страстоно́сица и преизря́дная де́ва, вене́ц восприя́ла еси́ зако́нно пра́вды, попра́вши с пло́тию безпло́тнаго и победоно́сица бы́вши.

Припев: Святая мученице Иулиание, моли Бога о нас.

Тя́, разу́мную ла́стовицу, и нерастле́нную го́рлицу, и голуби́цу, свиде́тельством позлаще́нна иму́щу кри́ла, и к Бо́гу полете́вшую, и почи́вшую, почита́ем.

Сла́ва Отцу́ и Сы́ну и Свято́му Ду́ху:

Процвела́ еси́ во удо́лех му́ченических, я́ко кри́н, страстоно́сице Иулиани́е, и, я́ко ши́пок благово́нен, де́вством была́ еси́, и кра́сному Жениху́ твоему́ Боже́ственное обоня́ние бы́вши.

И ны́не и при́сно и во ве́ки веко́в. Ами́нь.

Богородичен: Нося́щи Нося́щаго вся́, к Вифлее́му гряде́т Де́ва Того́ и роди́ти, и во я́слех восклони́ти я́ко Младе́нца, челове́ков воззва́ние изря́дно соде́ловающаго.

Молитва

О свята́я, мученице Иулиание. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.