3 января.

Канон благоверной княгине Иулиании Новоторжской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

Благоче́стно в зако́не пожи́вши и благи́ми де́лы украси́вшися, я́ко кре́пкий адама́нт, яви́ся, целому́дренная свята́я благове́рная княги́ня Иулиани́я, тле́нную сла́ву и добро́тство теле́сное презре́вши, злоко́зненнаго врага́ победи́ла еси́, целому́дрия ра́ди му́ченическую сме́рть прия́ла еси́. Сего́ ра́ди от Христа́ Бо́га нетле́нным и ве́чным венце́м венча́вшися, ны́не с ли́ки му́ченик лику́еши и на́м ве́лия чудеса́, приходя́щим ко гро́бу твоему́, оби́льно источа́еши. Те́мже ти́ вопие́м: моли́ся Христу́ Бо́гу о все́х на́с, ве́рою и любо́вию страда́ния твоя́ почита́ющих.

Велича́ние:

Велича́ем тя́, свята́я благове́рная княги́ня Иулиани́е, и чте́м честна́я страда́ния твоя́, я́же за Христа́ претерпе́ла еси́.

Кано́н благове́рней княги́не Иулиани́и, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святая благоверная Иулиание, моли Бога о нас.

Лику́ющи, му́ченица, о Бо́зе и луча́ми исполня́ема от Него́, зарю́ мне́ пода́ждь светоно́сну твои́ми моли́твами, да пою́ твоя́ чудеса́.

Припев: Святая благоверная Иулиание, моли Бога о нас.

Яко голуби́ца целому́дренная, на высоту́ доброде́телей возшла́ еси́, криле́ свяще́нне посре́брене иму́щи, и́миже возлете́вши, в ра́йстей оби́тели вогнезди́лася еси́, сла́вная Иулиани́я.

Сла́ва Отцу́ и Сы́ну и Свято́му Ду́ху:

На земли́ подвиза́вшися целому́дрия ра́ди, всебога́тая, и вре́менную сме́рть претерпе́вши, на небесе́х ны́не воздая́ния от Влады́ки прие́млеши, му́ченица непобеди́мая, во ве́ки безконе́чныя.

И ны́не и при́сно и во ве́ки веко́в. Ами́нь.

Богородичен: Де́во Всенепоро́чная, Христа́ ро́ждшая, и Сего́ в ложесна́х понесла́ еси́, Неискусому́жная, разреши́ мра́к души́ моея́ и просвети́ мя́, да пою́ Тя́.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Святая благоверная Иулиание, моли Бога о нас.

Целому́дрия жела́нием одержа́ся, соблюла́ еси́ души́ и телесе́ чистоту́, была́ еси́ прия́тна же́ртва Христу́, вопию́щи: свя́т еси́, Го́споди, спаса́яй ду́ши на́ша.

Припев: Святая благоверная Иулиание, моли Бога о нас.

Оскверни́тися страстьми́ добро́те кра́сней, душе́вней и богови́дней не стерпе́ла еси́, всему́драя, добро́ту несказа́нную честна́го Жениха́ твоего́ уразуме́вши, всесла́вная.

Сла́ва Отцу́ и Сы́ну и Свято́му Ду́ху:

Боже́ственный вои́стину слави́й, и́же ве́сну небе́сную дости́гши, чи́стая ла́стовица, кра́сная го́рлица, голуби́ца удобре́нная, лю́тых обстоя́ний на́с спаси́, Бо́жия сла́вы улучи́ти сподо́би.

И ны́не и при́сно и во ве́ки веко́в. Ами́нь.

Богородичен: Засту́пница скорбя́щим, спасе́ние и упова́ние ненаде́емым, Богоро́дице Всепе́тая, моли́ Христа́ Бо́га изба́витися на́м от бе́д.

Седа́лен, гла́с 5.

Доброде́тели све́тлостию просвеща́ема и муче́ния по́двигом украша́ема, па́че со́лнца, прему́драя, сия́еши тве́рде и просвеща́еши вои́стинну творя́щих ве́рно па́мять твою́ светоно́сную, пресла́вная страстоте́рпица Иулиани́я, вели́кая княги́ня, покланя́ющихся моще́м твои́м спаса́й.

Сла́ва, и ны́не, Богородичен:

Ужа́сно чу́до зача́тия и несказа́нен о́браз рождества́ в Тебе́ позна́ся, Чи́стая Присноде́во, ужаса́ет мо́й у́м и удивля́ет по́мысл, сла́ва Твоя́, Богоро́дице, во вся́ концы́ вселе́нныя дости́же во спасе́ние ду́ш на́ших.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Святая благоверная Иулиание, моли Бога о нас.

Уязви́вши се́рдце твое́ любо́вию Жениха́ твоего́, вся́ку плотску́ю любо́вь отве́ргла еси́ тве́рдо, внегда́ убива́емей бы́ти, боле́зненне вопию́щи: не разлучи́т любве́ Твоея́, Христе́, му́к преще́ние.

Припев: Святая благоверная Иулиание, моли Бога о нас.

Была́ еси́ непоколеби́м и непреклони́м во вре́мя обстоя́ния сто́лп, всесла́вная, целому́дрия основа́ние, положено́ на ка́мени ве́ры, преблаже́нная.

Сла́ва Отцу́ и Сы́ну и Свято́му Ду́ху:

Претерпе́ла еси́ му́жески по́двиг, му́ченица многострада́льная. И пе́рвее умовре́дно вельми́ хва́лящагося с шу́мом погуби́ла еси́ кре́стною си́лою, о Иулиани́е всеблаже́нная.

И ны́не и при́сно и во ве́ки веко́в. Ами́нь.

Богородичен: Ви́ждь ми́лостивым о́ком Твои́м, и посети́ озлобле́ние, е́же и́мам, и лю́тых напа́стей, и вре́да, и бе́д, и искуше́ний мя́ изба́ви безме́рною ми́лостию Твое́ю, Богоро́дице Присноде́во.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Святая благоверная Иулиание, моли Бога о нас.

Жену́ тя по естеству́ нарица́ем, но па́че си́лы же́нския подви́глася еси́ о целому́дрии, да Христо́в зако́н испо́лнивши, за Него́ же му́жественно пострада́ла еси.

Припев: Святая благоверная Иулиание, моли Бога о нас.

О, безчелове́чнаго и немилосе́рдаго мучи́тельства суровства́! Ру́це бо и но́зе твои́ лю́те, страстоте́рпица, мече́м отсече́ и те́м главу́ не пощаде́, у́м утвержда́ющу Подвигополо́жнику Христу́.

Сла́ва Отцу́ и Сы́ну и Свято́му Ду́ху:

О, му́жества страстоте́рпицы! О, чистоты́ кре́пости! О, ра́зума непрекло́нна! Яко уязвля́ема вельми́ и разсека́ема неми́лостивно, яви́ся страстоно́сица велича́йшая.

И ны́не и при́сно и во ве́ки веко́в. Ами́нь.

Богородичен: Кре́посте моя́, Пречи́стая, прибе́жище, и необори́мая стено́, и к Бо́гу моли́твенница су́щая, ве́чнующаго пла́мени и гее́нны свободи́ мя.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Святая благоверная Иулиание, моли Бога о нас.

Руко́ю Влады́ки твоего́ окормля́ема, преплыла́ еси́ непостоя́нное мо́ре нече́стия, честна́я, и устреми́лася еси́ ко приста́нищу, Иулиани́я, вы́шния све́тлости, богоблаже́нная.

Припев: Святая благоверная Иулиание, моли Бога о нас.

Не дово́лен бы́в злочести́вый мучи́тель убие́нием благове́рныя княги́ни, но и те́ло твое́, разсече́нное на ча́сти, в реку́ вве́рже окая́нный, не устыди́вся благоро́дия твоего́, всечестна́я.

Сла́ва Отцу́ и Сы́ну и Свято́му Ду́ху:

Спасы́й от чре́ва ки́това содержи́маго в не́м проро́ка пресла́вно, от ре́чных во́д твоя́ спаса́ет победоно́сныя мо́щи по кончи́не, страстоте́рпице всехва́льная.

И ны́не и при́сно и во ве́ки веко́в. Ами́нь.

Богородичен: Ма́терь Де́ву Отрокови́цу Боже́ственным просвеща́еми Ду́хом, Пречи́стая, свяще́ннии проро́цы свяще́нными Тя́ гла́сы провозвести́ша, из Нея́же Бо́г Сло́во па́че вины́ же и сло́ва воплоти́ся за милосе́рдие безконе́чное.

Конда́к, гла́с 2:

Воспое́м дне́сь Благоде́теля все́х Бо́га, просла́вльшаго в Росси́и Иулиани́ю богому́друю, да моли́твами ея́ пода́ст душа́м на́шим грехо́в оставле́ние и ве́лию ми́лость.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Святая благоверная Иулиание, моли Бога о нас.

Красото́ю страда́ний уподо́билася еси́, му́драя, прекра́сному Жениху́, Христу́. Ему́же предстоя́щи, пое́ши, ра́дующися: препе́тый отце́в Госпо́дь и Бо́г, благослове́н еси́.

Припев: Святая благоверная Иулиание, моли Бога о нас.

Ка́пли твои́х крове́й, му́ченица, иска́пающи, багряни́цу многоце́нну и нетле́ннаго весе́лия ри́зу истка́ша, е́юже ны́не, богому́драя, на небесе́х оде́яна, у́мно Жениху́ предстои́ши.

Сла́ва Отцу́ и Сы́ну и Свято́му Ду́ху:

Жениха́ Безсме́ртнаго, Жизнода́вца жела́ющи, я́ко да́р страда́ние Сему́ принесла́ еси́ и восприя́ла еси́ небе́сное Ца́рство и вене́ц нетле́нен, му́ченице сла́вная.

И ны́не и при́сно и во ве́ки веко́в. Ами́нь.

Богородичен: Из деви́ческаго боку́ вопло́щся, яви́лся еси́ на спасе́ние на́ше. Те́м, Твою́ Ма́терь ве́дуще, Богоро́дицу, благода́рно взыва́ем: оте́ц на́ших Бо́же, благослове́н еси́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Святая благоверная Иулиание, моли Бога о нас.

Те́ла ме́ртвеннаго ты́ не пощаде́ла еси́, те́мже безсме́ртие пребыва́ющее насле́довала еси́: умертви́лася еси́ любве́ ра́ди, сла́вная, стра́сти Умертви́вшаго.

Припев: Святая благоверная Иулиание, моли Бога о нас.

Несумне́нну иму́щи ве́ру, еле́ем просве́щши крове́й твои́х, му́ченица, свещу́ твою́, вну́трь вошла́ еси́ черто́га, пою́щи в небе́сней ра́дости: Го́спода по́йте, дела́, и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Взя́тся у́м тво́й, блаже́нная Иулиани́я, к боже́ственней вои́стинну высоте́, высо́к бо ты́ стяжа́ла еси́ ра́зум и в черто́г све́тел всели́лася еси́, вопию́щи: Го́спода по́йте, дела́, и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Во сле́д Тебе́ теко́ша жены́, мѵ́ра благово́ннаго благоуха́ния духо́внаго наслажда́ющися, Всечестна́я Богоневе́сто, еди́на Неискусобра́чная, из утро́бы Твоея́ возсия́вшаго Единоро́днаго Сы́на Христа́ Бо́га, и с Тобо́ю ца́рствуют, и́стинно песносло́вяще Его́ во ве́ки.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Святая благоверная Иулиание, моли Бога о нас.

Су́щи испо́лнена даро́в духо́вных, неду́ги неисце́льныя цели́ти боля́щих, уставля́еши о́гненное опале́ние, ду́хи отгоня́еши лука́выя и все́м в печа́лех помога́еши, досточу́дная.

Припев: Святая благоверная Иулиание, моли Бога о нас.

Дне́сь па́мять твоя́ на́м возсия́, страстоте́рпица Иулиани́я, па́че со́лнца, все́х веселя́щи сердца́ ве́рных, мы́сли просвеща́ющи и тмы́ неду́гов отгоня́ющи, ю́же моле́бно пра́зднуем.

Сла́ва Отцу́ и Сы́ну и Свято́му Ду́ху:

Яко предстоя́щи Зижди́телю со дерзнове́нием Влады́це, му́ченица Иулиани́я, со все́ми от ве́ка святы́ми, проси́ согреше́ний проще́ния тя́ пою́щим.

И ны́не и при́сно и во ве́ки веко́в. Ами́нь.

Богородичен: Ра́дости испо́лни мя́ и весе́лия, Де́во, я́ко прии́мши Вину́ ра́дости: Ты́ бо источи́ла еси́ все́м ра́дование.

Свети́лен:

Чи́ста же́ртва принесла́ся еси́, и приноше́ние пресве́тло, и я́ко благово́нный фимиа́м, Иулиани́я богому́драя, Христу́ Бо́гу на́шему, Его́же моли́ спасти́ и просвети́ти ду́ши на́ша.

Сла́ва, и ны́не, Богородичен:

Тя́ заступле́ние вси́ и́мамы, гре́шнии, о Пречи́стая Де́во, Ты́ благоуве́тлива на́м сотвори́ Сы́на Твоего́ ма́терними Твои́ми моли́твами.

Моли́тва.

О, блаже́нная госпоже́, пресла́вная Христо́ва му́ченица, небе́сных Ангелов сожи́тельница, благове́рная княги́ня Иулиани́я, до́бре за чистоту́ подвиза́вшаяся, ея́ же ра́ди и Боже́ственными дара́ми обогати́вшаяся, во вре́менней жи́зни лю́те от злоко́зненнаго врага́ пострада́вшая, утеше́ние же неконча́емое от Христа́ Бо́га получи́вшая, благи́ми де́лы и кро́тостию украси́вшаяся и кро́тких зе́млю насле́довавшая, благоче́стно в зако́не пожи́вшая и вельми́ ны́не чудесы́ просия́вшая! Ты́, я́же чистоты́ ра́ди твоея́ серде́чныя, прия́ла в тя́ све́т Свята́го Ду́ха и была́ еси́ все́х благи́х де́л сокро́вище на земли́ и, сего́ ра́ди благи́й коне́ц му́ченичества улучи́вши, неизрече́ннаго све́та сподо́блена еси́ в ве́чных кро́вех небе́снаго селе́ния. Ты́, я́же со святы́ми собо́ры водворя́ешися и с му́ченик ли́ки весели́шися, помяни́ и на́с, доброде́тельное твое́ житие́ и страда́ния твоя́ му́ченическая похваля́ющих и с духо́вною ра́достию почита́ющих твою́ па́мять. При́зри на ны́, волна́ми жите́йскими обурева́емыя, да твои́ми моли́твами, до́бре пожи́вше, диа́вольских избежи́м сете́й и с тобо́ю ве́чных бла́г сподо́блены бу́дем. О, всеблаже́нная страстоте́рпице, все́х Влады́це и Бо́гу блага́я и ве́рная рабо́ яви́вшаяся! Дне́сь, со́браннии в хра́ме твое́м, к ра́це моще́й твои́х припа́дающе, умиле́нно вопие́м и мо́лим тя́: моли́ с на́ми и о на́с умоля́емаго от своего́ благоутро́бия Бо́га, да ми́лостивно услы́шит на́с, прося́щих Его́ благосты́ню, и пода́ст на́м вся́, я́же ко спасе́нию и житию́ ну́жная проше́ния, и все́м, на вся́ком ме́сте, во вся́кой ско́рби и обстоя́нии тре́бующим Его́ человеколю́бия и по́мощи, вели́кую Свою́ ми́лость. Да благода́тию Бо́жиею и твои́м те́плым хода́тайством здра́ви всегда́ душе́ю и те́лом пребыва́юще, сла́вим Ди́внаго во святы́х Свои́х Бо́га Изра́илева, не удаля́ющаго по́мощи Своея́ от на́с всегда́, ны́не, и при́сно, и во ве́ки веко́в, ами́нь.