31 января.

Канон святителям и архиепископам Александрийским Афанасию и Кириллу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Или́ се́й тропа́рь, гла́с 3:

Де́лы возсия́вше правосла́вия, все́ погаси́вше злосла́вие, победи́телие, победоно́сцы бы́сте, благоче́стием вся́ обогати́вше, Це́рковь вельми́ украси́вше, досто́йно обрето́сте Христа́ Бо́га, да́рующаго на́м ве́лию ми́лость.

Кано́н свята́го Афана́сия, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святители отцы Афанасие и Кирилле, молите Бога о нас.

Афана́сию принося́ похвалу́, я́ко доброде́тель благохваля́, к Бо́гу приношу́ па́че похвале́ние, от Него́же челове́ком даде́ся достохва́льно дарова́ние доброде́тели, ея́же бы́сть одушевле́н о́браз и печа́ть.

Припев: Святители отцы Афанасие и Кирилле, молите Бога о нас.

Богому́дрия бы́л еси́ испо́лнен и, па́че со́лнца Ангельским, блаже́нне, житие́м облиста́в ны́не, преподо́бне, превозше́л еси́ похва́л зако́ны, я́же от на́с, но приими́, о́тче, а́ще и не по досто́инству похваля́емый.

Припев: Святители отцы Афанасие и Кирилле, молите Бога о нас.

Достодо́лжно у́бо пе́снь плете́м в сла́вней твое́й па́мяти, но, лиша́ющеся велича́йших, Афана́сие, по досто́инству пе́сней твои́х, про́сим проще́ние на́м да́ти и оби́льную благода́ть тобо́ю Ду́ха.

Припев: Святители отцы Афанасие и Кирилле, молите Бога о нас.

Юношски плотски́х страсте́й игра́ние умертви́л еси́, в ю́ности твое́й стяжа́в му́дрость ста́рческую и благостоя́нную, Афана́сие блаже́нне: прему́дрости бо жела́нием вся́ чу́вства упра́вил еси́.

Припев: Пресвятая Богородице, спаси нас.

Богородичен: Пресла́вная возглаго́лашася о Тебе́ в ро́дех родо́в, Бо́га Сло́ва во чре́ве вмести́вшая, чиста́ же пребы́вши, Богоро́дице Мари́е. Те́мже Тя́ вси́ почита́ем, по Бо́зе предста́тельство на́ше.

Ин кано́н свята́го Кири́лла, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святители отцы Афанасие и Кирилле, молите Бога о нас.

От Бо́га светода́тельную благода́ть, Кири́лле, прие́м и све́тел свети́льник яви́вся, слове́сныя облиста́л еси́ на́м лучи́ па́мятию твое́ю, я́ко да досто́йно тя́ воспои́м.

Припев: Святители отцы Афанасие и Кирилле, молите Бога о нас.

Испо́лнился еси́ светоявле́ния, Кири́лле му́дре, Ду́ха, я́ко за́поведей Христо́вых храни́тель, страсте́й очище́н, Пребоже́ственныя бы́л еси́ вои́стинну Тро́ицы жили́ще.

Сла́ва Отцу́ и Сы́ну и Свято́му Ду́ху:

Яко ре́вности и дерзнове́ния испо́лнен, Кири́лле сла́вне, богобо́рцы вся́ нелжи́во языкобо́лия обличи́л еси́ злочести́вых ересе́й, Правосла́вие защища́я.

И ны́не и при́сно и во ве́ки веко́в. Ами́нь.

Богородичен: Тро́ицы Пребоже́ственныя, Всечи́стая, Еди́наго родила́ еси́, из Тебе́ пло́тию я́вльшася по на́м благоволе́нием Роди́теля и соде́йствием Ду́ха Всесвята́го, Богоневе́сто.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Святители отцы Афанасие и Кирилле, молите Бога о нас.

Очи́стив от вся́кия скве́рны ду́шу же и те́ло, Афана́сие, хра́м показа́лся еси́ досто́йно боже́ствен. Те́мже Тро́ицы исполне́ние почи́ в тебе́, священнотаи́нниче всеблаже́нне.

Припев: Святители отцы Афанасие и Кирилле, молите Бога о нас.

Твою́ ду́шу, я́коже жела́ше, Уте́шителева благода́ть, от страсте́й очище́ну, обре́тши, я́ве в не́й де́йствия показу́ет и пресве́тло свети́ло, о́тче, ми́ру тя́ полага́ет.

Припев: Святители отцы Афанасие и Кирилле, молите Бога о нас.

Святи́тельства у́бо пра́вило святи́телем показа́лся еси́, де́тельнаго же подписа́ние жития́, сло́во же твое́ я́сно, виде́ния о́браз, прему́дре, богосло́вия же твоего́ преде́л уче́ния яви́ся.

Припев: Пресвятая Богородице, спаси нас.

Богородичен: Херуви́мов и серафи́мов превы́шши показа́лася еси́, Богоро́дице, Ты́ бо еди́на прия́ла еси́ Невмести́маго Бо́га во Твое́м чре́ве, Нескве́рная. Те́мже, ве́рнии, Тя́ вси́ пе́сньми, Чи́стая, ублажа́ем.

Ин.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святители отцы Афанасие и Кирилле, молите Бога о нас.

Укрепля́емь о Христе́, ко́зни лука́ваго зми́я тве́рдым умо́м, Кири́лле, я́ко тка́ние паучи́нное, расто́ргнул еси́.

Припев: Святители отцы Афанасие и Кирилле, молите Бога о нас.

Ти́ну страсте́й от души́ оттря́сл еси́, Кири́лле, низложи́в вся́кое помысло́в возноше́ние, на Христа́ превознося́щееся.

Сла́ва Отцу́ и Сы́ну и Свято́му Ду́ху:

Яко благополу́чен страда́лец, о́тче, уклони́лся еси́ тве́рдо вся́каго плотска́го сладостра́стия, я́ко тще́тнаго и наве́тнаго.

И ны́не и при́сно и во ве́ки веко́в. Ами́нь.

Богородичен: Сло́во Отчее, предочи́стившися, о Чи́стая, Ду́хом, слове́снаго естества́ на благодея́ния родила́ еси́.

Конда́к, гла́с 4.

Священнонача́льницы велича́йшии благоче́стия и до́блии побо́рницы Це́ркве Христо́вы, вся́ соблюди́те, пою́щия: спаси́, Ще́дре, ве́рою чту́щия Тя́.

Седа́лен Афана́сия, гла́с 3.

Якоже предопредели́ Предвоззва́вый тя́, безсме́ртия ты́ предображе́ние бы́л еси́, я́ко умертви́в благоче́стно Ариева мудрова́ния, невреди́мь бо бы́л еси́, и́стины побо́рник, о́тче Афана́сие, правосла́вных похвало́. Те́мже тя́ по до́лгу пою́ще, соверша́ем боже́ственную па́мять твою́.

Сла́ва, Кири́лла.

Ересе́й ле́сть обличи́л еси́ и Правосла́вную ве́ру уясни́л еси́, я́ко богоглаго́лив и благочести́в, пропове́дал еси́ в ми́ре Еди́но Божество́ в Тро́ице сла́вити, естество́м Единосу́щное и Ли́цы неслия́нное. Те́мже и, соше́дшеся, всесла́вне Кири́лле, почита́ем па́мять твою́.

И ны́не, Богородичен:

Недомы́сленно и непостижи́мо е́сть, Влады́чице Богора́дованная, е́же соде́ланное о Тебе́ стра́шное Бо́жие та́инство, и́бо Необыме́ннаго, заче́нши, родила́ еси́, пло́тию обложе́на от пречи́стых крове́й Твои́х, Его́же всегда́, Чи́стая, я́ко Сы́на Твоего́, моли́ спасти́ся душа́м на́шим.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святители отцы Афанасие и Кирилле, молите Бога о нас.

Все́ тебе́ вдохну́ живоно́сное дыха́ние с высоты́, пе́рвее прише́дшее боголе́пно Ду́ха Христо́ва в го́рнице и ученики́ насы́щшее, апо́стола тя́ показа́ тринадеся́таго, о́тче, Правосла́вную ве́ру пропове́дающаго.

Припев: Святители отцы Афанасие и Кирилле, молите Бога о нас.

Ты́, Боже́ственною ре́вностию зело́ распаля́емь, в собо́ре спосо́бствуя, и пре́жде, е́же соверши́тися тебе́ председа́телю, в Нике́и пропове́дуеши Единосу́щное, те́мже Це́ркве Христо́с пастыренача́льника и учи́теля тя́ поставля́ет.

Припев: Святители отцы Афанасие и Кирилле, молите Бога о нас.

Вруче́на име́я церко́вная корми́ла от промышле́ния Боже́ственнаго, Афана́сие, еретико́в душевре́дная вся́ языкобо́лия, я́коже не́кая секи́ра, посе́кл еси́, искореня́я, я́коже те́рние, и се́мя сло́ва напая́я, му́дре возде́лал еси́.

Припев: Святители отцы Афанасие и Кирилле, молите Бога о нас.

От твоего́ язы́ка о́гненнаго сожже́ся Ариево сро́дное разделе́ние, и слия́ние Саве́ллиево, я́же от безме́рия зла́ и к нече́стию единоче́стна, и вся́кое с ни́ми хуле́ние ерети́ческое, о Афана́сие!

Припев: Пресвятая Богородице, спаси нас.

Богородичен: Ты́ ве́рных похвала́ еси́, Безневе́стная, Ты́ Предста́тельница, Ты́ и прибе́жище христиа́н, стена́ и приста́нище: к Сы́ну бо Твоему́ мольбы́ но́сиши, Всенепоро́чная, и спаса́еши от бе́д ве́рою и любо́вию Богоро́дицу Чи́стую Тя́ зна́ющия.

Ин.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святители отцы Афанасие и Кирилле, молите Бога о нас.

Победи́вши стра́сти душетле́нныя и по́мыслом удержа́вша пло́ти, богоно́сне Кири́лле, ви́дев, Христо́с боже́ственныя тя́ Це́ркве председа́теля, о́тче, поста́вил е́сть.

Припев: Святители отцы Афанасие и Кирилле, молите Бога о нас.

Насле́довав, я́ко сы́н возлю́блен, оте́ческую Ма́ркову доброде́тель, и престо́ла бы́л еси́ прее́мник, боже́ственнаго стопа́м евангели́ста после́дуя.

Сла́ва Отцу́ и Сы́ну и Свято́му Ду́ху:

От Христа́ у́бо, я́ко овча́, упа́слся еси́, я́коже па́стырь упа́сл еси́ ста́до, о́тче, словесы́ душепита́тельными твои́ми, я́ко трава́ми и цветы́, оби́льно напитава́я благода́ти.

И ны́не и при́сно и во ве́ки веко́в. Ами́нь.

Богородичен: Из не су́щих вся́ Боже́ственною си́лою Соде́лавый ражда́ется из Тебе́, Богома́ти, ми́р озаря́я све́тлыми заря́ми Божества́ и богозна́ния све́тлостию.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святители отцы Афанасие и Кирилле, молите Бога о нас.

Христа́ име́я, глаго́люща, о́тче, во орга́не доброгла́снем язы́ка твоего́, посрами́л еси́ у́бо и́долов напи́санно е́ресь, заблужде́нныя наставля́я и обраща́я ко и́стинному Бо́гу, Афана́сие.

Припев: Святители отцы Афанасие и Кирилле, молите Бога о нас.

Губи́тельный е́реси вся́, о́тче, изобличи́л еси́ словесы́ и писа́ньми, разли́чную ле́сть изгоня́я му́дрыми показа́ньми из вселе́нныя, уясня́я невоспротивосло́вне Правосла́вную ве́ру, блаже́нне.

Припев: Святители отцы Афанасие и Кирилле, молите Бога о нас.

Тя́, учи́теля вои́стинну вели́ка учи́телей му́дрых, Афана́сие, неле́стно сказу́ет и со апо́столы причте́ Це́рковь Христо́ва, о́тче, изъявля́юща непоро́чное сло́во ве́ры.

Припев: Пресвятая Богородице, спаси нас.

Богородичен: Ма́тернее дерзнове́ние к Сы́ну Твоему́ стяжа́вши, Всечи́стая, сро́днаго промышле́ния на́шего не пре́зри, мо́лимся, я́ко Тя́ и еди́но, христиа́не, ко Влады́це очище́ние ми́лостивно предлага́ем.

Ин.

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святители отцы Афанасие и Кирилле, молите Бога о нас.

Ны́не лице́ Христо́во созерца́яй, ты́ лице́м к лицу́, о Кири́лле, зерца́лом, вои́стинну разре́шшимся, соедини́лся еси́ твои́м жела́нием.

Припев: Святители отцы Афанасие и Кирилле, молите Бога о нас.

Тече́нию, вои́стинну зе́льному, наводня́ющему ре́ки, твое́, о Кири́лле, уподо́бися сло́во, злосла́вных отвраща́я ухищре́ния.

Припев: Святители отцы Афанасие и Кирилле, молите Бога о нас.

Ра́вне ме́рзское Ариево разделе́ние, о Кири́лле, скве́рное же Саве́ллиево слия́ние из глубины́ изве́ргл еси́.

Сла́ва Отцу́ и Сы́ну и Свято́му Ду́ху:

Словеса́ богатотво́рная, я́ко зла́то, оста́вил еси́, о Кири́лле, сокро́вища же, я́коже ка́мения честна́я, твоя́ Це́ркви Христо́ве.

И ны́не и при́сно и во ве́ки веко́в. Ами́нь.

Богородичен: Тя́ ору́жие непобеди́мое на враги́ предлага́ем: Тя́ утвержде́ние и наде́жду на́шего спасе́ния, Богоневе́сто, стяжа́хом.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святители отцы Афанасие и Кирилле, молите Бога о нас.

Чужда́го се́мене се́ятель яви́вся Аполлина́рий, земна́го словесе́ и ума́ Христо́во вочелове́чение, кре́пко изобличи́ся от тебе́, всеблаже́нне, я́коже несмы́слен и умовре́ден.

Припев: Святители отцы Афанасие и Кирилле, молите Бога о нас.

Тече́ний слове́сных, излия́нных из усте́н твои́х, я́ко из исто́чника приснотеку́щаго благода́ти, преподо́бне, сладча́йшия ме́да, я́ко от окри́на, во́ды, ве́рнии, почерпа́ем.

Припев: Святители отцы Афанасие и Кирилле, молите Бога о нас.

Диви́тся вся́к твои́м, о́тче, вле́поту списа́нием му́дрым, любезновмеща́я, хотя́щия прозяба́ти е́реси прови́дя, отвраща́емыя от тебе́ проро́чески.

Припев: Пресвятая Богородице, спаси нас.

Богородичен: Да изба́вимся от лю́тых прегреше́ний мольба́ми Твои́ми, Богоро́дительнице Чи́стая, и да получи́м, Всечи́стая, Боже́ственное осия́ния из Тебе́ неизрече́нно воплоще́ннаго Сы́на Бо́жия.

Ин.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святители отцы Афанасие и Кирилле, молите Бога о нас.

Клеща́ми серафи́м проро́ку у́гль, Це́ркви же Христо́ве твои́ми рука́ми подае́ши, священнотаи́нниче, е́же Боже́ственнаго огня́ у́глие очище́ния.

Припев: Святители отцы Афанасие и Кирилле, молите Бога о нас.

Единопреде́льныя, я́ко Сампсо́н, иноплеме́нники не потреби́л еси́, иноро́дныя же вся́ иносла́вных уче́ния низложи́л еси́ и держа́ву правосла́вным да́л еси́, Кири́лле.

Сла́ва Отцу́ и Сы́ну и Свято́му Ду́ху:

Собо́ру богоизбра́нному я́ве предводи́тельствовав, злоче́стие Несто́риево, христобо́рную де́рзость, о́тче, низложи́л еси́, ре́вностию дыха́я по и́стинней Богома́тери.

И ны́не и при́сно и во ве́ки веко́в. Ами́нь.

Богородичен: О, чу́до, все́х чуде́с нове́йшее! Яко Де́ва во утро́бе вся́ческая Содержа́щаго, неискусому́жно заче́нши, не тесновмести́.

Конда́к, гла́с 2.

Правосла́вия насади́в уче́ния, злосла́вия те́рние изсе́кл еси́, умно́жив се́мя ве́ры одожде́нием Ду́ха, преподо́бне, те́мже тя́ пое́м, Афана́сие.

Икос:

Афана́сия же и Кири́лла всепра́зднственную па́мять пе́сньми, ве́рнии, восхва́лим дне́сь: си́и бо Ария льсти́ваго и Евно́мия вку́пе с Саве́ллием во глубину́ те́х поги́бели вложи́ша, огню́ ве́чному преда́вше ты́я сгоре́ти, я́ко поху́лившия непра́ведно на Спа́сово воплоще́ние, те́мже тя́ пое́м, Афана́сие.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Святители отцы Афанасие и Кирилле, молите Бога о нас.

Единоче́стное, сопресто́льное Отцу́ Сло́во, Единоро́дна же Сы́на правосла́вно пропове́дав, безсме́ртия, о́тче тезоимени́те, а́бие науча́еши, Ду́ху Сопресто́льна, и Единосу́щна, и Соприсносу́щна.

Припев: Святители отцы Афанасие и Кирилле, молите Бога о нас.

Учи́теля тя́, пропове́дника священноявле́нна Трисо́лнечнаго Све́та, возвеща́юща ве́ру правосла́вия да́же до коне́ц земли́, нече́стия зря́ роди́тель, изгна́ния на тя́ воздвиза́ет.

Припев: Святители отцы Афанасие и Кирилле, молите Бога о нас.

Беды́ безме́рныя, я́же подъя́л еси́, блаже́нне, подвиза́яся по благоче́стии, венцы́ же, та́коже све́тлии, и́бо адама́нт бы́л еси́ бию́щим, к себе́ же, я́ко магни́т, привлача́л еси́ вся́.

Припев: Святители отцы Афанасие и Кирилле, молите Бога о нас.

Стра́нныя догма́ты, чу́ждия же Це́ркве Христо́вы, изгна́л еси́, Тро́ицу богосло́вив Ипоста́сьми, Божество́м же Еди́ницу, Юже пе́л еси́: благослове́н Бо́г оте́ц на́ших.

Припев: Пресвятая Богородице, спаси нас.

Богородичен: Ны́не вся́ испо́лнишася Све́та Боже́ственнаго Тобо́ю, Пречи́стая: Ты́ бо две́рь яви́лася еси́, е́юже ми́ру Бо́г бесе́дова, просвеща́я ве́рою зову́щия: благослове́н Бо́г оте́ц на́ших.

Ин.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святители отцы Афанасие и Кирилле, молите Бога о нас.

В Сина́йстей горе́ во мра́к дре́вле вше́д, зако́н прия́т, блаже́нне Кири́лле, Моисе́й, убива́ющий пи́сменем, ты́ же разгну́л еси́ сокрове́нную добро́ту Ду́ха.

Припев: Святители отцы Афанасие и Кирилле, молите Бога о нас.

Законоположе́ния гада́ньми, я́коже младе́нцем пе́рвее, о́тче, да́ннаго покрыва́лу покрове́ния, я́коже ши́пки, разуме́ния ты́ откры́л еси́, сказа́в о́бразы я́вственнейше.

Припев: Святители отцы Афанасие и Кирилле, молите Бога о нас.

Богопропове́дников и богоприя́тных неудобопости́жныя кни́ги проро́ков, благода́тию вдохнове́н, о́ныя насы́щшаго Ду́ха, Кири́лле, чи́сте на́м изъяви́л еси́.

Сла́ва Отцу́ и Сы́ну и Свято́му Ду́ху:

В несли́тном соедине́нии Боже́ственном и несеко́мом я́ве, о́тче, разделе́нии Три́ у́бо богосло́вствуяй Ипоста́си, ре́кл еси́, Кири́лле, непреме́нныя же в существе́ Еди́ном и Божестве́.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная Влады́чице.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святители отцы Афанасие и Кирилле, молите Бога о нас.

Святи́телей украше́ние благосла́вное, Афана́сие, сто́лпе све́та и Це́ркве утвержде́ние, Тро́ицы побо́рниче, богосло́вия трубо́ злата́я, жития́ же мона́шескаго изве́стный законописа́телю, с на́ми пра́зднуеши, иере́и соверша́я, лю́ди ве́рныя приводя́ Христу́ во ве́ки.

Припев: Святители отцы Афанасие и Кирилле, молите Бога о нас.

Безсме́ртия бы́л еси́ вои́стинну тезоимени́т, де́ятельныя бо сло́вом превозше́л еси́, иску́сныя же в сло́ве изве́стием жития́ побежда́я, во обои́х преше́л еси́ краи́. Те́мже, преизя́щною доброде́телию просия́в, безсме́ртную стяжа́л еси́ па́мять во ве́ки.

Припев: Святители отцы Афанасие и Кирилле, молите Бога о нас.

Ты́ светле́йшее показа́л еси́, тайнонебе́сниче богоприя́тне, святи́тельство до́блими страда́ньми твои́ми, пре́лесть изгна́л еси́ твои́ми изгна́нии ча́стыми за Тро́ицу, Юже пропове́дуя, вопия́л еси́: Отцу́ поклони́теся, Сы́на богосло́вите, Ду́ха воспо́йте во вся́ ве́ки.

Припев: Пресвятая Богородице, спаси нас.

Богородичен: Пло́тию Ро́ждшую Еди́наго от Тро́ицы Бо́га и по Рождестве́ па́ки це́лу пребы́вшую непреста́нно воспои́м, я́ко превы́шшую херуви́мов и серафи́мов честне́йшую, вопию́ще: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Ин.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святители отцы Афанасие и Кирилле, молите Бога о нас.

Яко волна́ морска́я вои́стинну, в тебе́ истече́ прему́дрости исто́чник, и́бо приснотеку́щия потеко́ша ре́ки из чре́ва твоего́, о́тче, уче́ний благочести́вых, я́коже прорече́ Христо́с: прехо́дят бо песка́ твоя́ словеса́ богоглаго́ливая.

Припев: Святители отцы Афанасие и Кирилле, молите Бога о нас.

Па́стырь и учи́тель му́др Це́ркви показа́вся, два́, Кири́лле, я́ве истолкова́л еси́, преподо́бне, заве́ты, я́ко бо анки́ру и оте́ческое насле́дие твоя́ иму́щи словеса́, вопие́т: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Сло́ва, Вопло́щшагося на́с ра́ди, Всехитреца́, ты́ неизрече́нному науча́еши соедине́нию, Кири́лле, неразде́льному, неслия́нному, по коему́ждо манове́нию ра́вне уклони́л еси́, вопия́: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Без ма́тере Сло́во из Отца́ Сы́й пе́рвее, без отца́ бы́сть из Тебе́ второ́е, Всечи́стая, вопло́щся пре́жде Безпло́тный за благоутро́бие, восхоте́в спасти́ пою́щия: благослови́те, вся́ дела́ Госпо́дня, Го́спода.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святители отцы Афанасие и Кирилле, молите Бога о нас.

Просия́ житие́, я́ко мо́лния, излия́ся же, о́тче, все́м веща́ние твое́, я́коже гро́м, я́же со́лнце назира́ет, с небесе́ бо име́л еси́ свы́ше вдохнове́ние и́стинно. Те́мже не угаси́ твоея́ па́мяти хода́тай забве́ния — гро́б, Афана́сие.

Припев: Святители отцы Афанасие и Кирилле, молите Бога о нас.

Све́том Трисо́лнечным и Трисия́нным ясне́йше ны́не осия́емь, певце́м твои́м осия́ние зареви́дно явля́еши, я́ко зерца́лом, свы́ше испуща́я со́лнечне, и тебе́ оставле́ния, блаже́нне, а́ще вели́ко и превосхо́дно па́че досто́инства проси́мое.

Припев: Святители отцы Афанасие и Кирилле, молите Бога о нас.

Пою́ще, мо́лим тя́ приле́жно: о Це́ркви моли́ся, Кресто́м побе́ды дарова́ти Импера́тору, правосла́вней же ве́ре кре́пость на е́реси враго́в, на́м же спасе́ние, ми́р же ми́ру, в твое́й па́мяти, Афана́сие.

Припев: Пресвятая Богородице, спаси нас.

Богородичен: Зачала́ еси́, Де́во, без се́мене вся́ческая созда́вшаго Сло́во Бо́жие кроме́ хоте́ний пло́ти, кроме́ тле́ния же родила́ еси́ и без боле́зней ма́терских. Те́м Тя́, Богоро́дицу, и язы́ком и се́рдцем испове́дающе, велича́ем.

Ин.

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святители отцы Афанасие и Кирилле, молите Бога о нас.

Возноше́ние на Христо́в взе́млющееся ра́зум и Сего́ Богома́терь, Кири́лле, вся́кое кре́пце низложи́л еси́ Несто́рия безбо́жное, сыно́в дво́ицу, та́кожде и слия́ние безгла́вных есте́ств.

Припев: Святители отцы Афанасие и Кирилле, молите Бога о нас.

Си́лою ра́зума и просвеще́нием благода́ти Тро́ицу Единосу́щную, Сы́на же, воплоще́ннаго Бо́га, богосло́вил еси́, блаже́нне, яви́вся же Богоро́дицы побо́рник, в вы́шних ны́не прославля́ешися.

Сла́ва Отцу́ и Сы́ну и Свято́му Ду́ху:

Свы́ше на́с, певцы́, приснопа́мятне, назира́еши, о́тче, ми́лостивно,  подая́ и возвыша́я моли́твами твои́ми ро́г правосла́вных, уясня́я же твою́ па́мять велича́ющия.

И ны́не и при́сно и во ве́ки веко́в. Ами́нь.

Богородичен: Непло́дствующее боже́ственных доброде́телей, Всечи́стая Богоро́дице, се́рдце мое́ покажи́, Де́во, плодоно́сно, из непло́дове ро́ждшаяся во́лею вся́ Претворя́ющаго ма́нием, да пою́ Тя, Всепе́тую.

Свети́лен святы́х:

Пребоже́ственныя Тро́ицы яви́стеся всему́дрии таи́нницы и побо́рницы, Афана́сие блаже́нне и Кири́лле богоявле́нне, Ария низложи́вше и с ни́м Саве́ллия, и Несто́рия а́бие злочести́ваго, и с ни́ми вся́кую ину́ю пре́лесть злочести́вых ересе́й, святи́телие Госпо́дни.

Молитва святителю Афанасию Великому, Александрийскому

О, всехва́льный и пресла́вный святи́телю Афана́сие Вели́кий, за ве́ру Правосла́вную ты был еси́ в до́лзех труде́х, мно́зех по́двизех, в пятикра́тных изгна́ниих и бе́гствех, претерпе́л еси́ мно́ги клеветы́ и оболга́ния, мно́гажды за ню хоте́ша врази́ твои́ уби́ти тя, и то́кмо Сам Бог чуде́сно сохрани́ тя от сме́рти. И все сие́ ты претерпе́л еси́ от нечести́вых еретико́в – ариа́н, с ни́ми же и боро́лся еси́, и и́хже, в пучи́не слове́с погрузи́в, терпе́нием твои́м препобеди́л еси́, и, злове́рие их от Це́ркве отгна́в и правосла́вное уче́ние насади́в, умно́жил еси́ се́мя ве́ры Христо́вой. Вои́стинну ты еси́ хра́брый во́ин Христо́в, я́ко во́ин бо, до конца́ дний твои́х сла́вно боро́лся еси́ за пра́вую ве́ру со еретики́. Вои́стинну ты еси́ столп ве́ры Правосла́вныя, и́бо ника́коже поколеба́ся ве́ра твоя́ Правосла́вная от сих гоне́ний ерети́ческих, но па́че утверди́ся и укрепи́ся, и не то́кмо у тя и у па́ствы твое́й, но и во всей Це́ркви Христо́вей. К тебе́ мо́лимся, уго́дниче Бо́жий, испроси́ у Христа́ Бо́га на́шего и нам име́ти ве́ру непоколеби́му и не уклони́тися от пра́ваго пути́ ея́, но до конца́ дний свои́х пребы́ти на нем, не боя́щеся ни ле́сти, ни преще́ния, ни да́же гоне́ния, и унасле́довати Ца́рство Небе́сное во сла́ве Бо́га Отца́ и Сы́на и Свята́го Ду́ха, иде́же ты и вси святи́и пребыва́ют. Ами́нь.

Молитва святителям Афанасию и Кириллу Александрийским

О, всесвяти́и отцы́ Афана́сие и Кири́лле, те́плии на́ши засту́пницы, ересе́й потреби́тели, благоче́стия защи́тители, неду́жным вра́чеве, в беда́х помо́щницы и все́м притека́ющым к ва́м те́плии предста́тели, помози́те на́м, гре́шным, в се́м житии́, и умоли́те Го́спода Бо́га дарова́ти на́м грехо́в оставле́ние и Ца́рствия Небе́снаго насле́дие, да всегда́ прославля́ем Отца́ и Сы́на и Свята́го Ду́ха, и ва́ше ми́лостивное предста́тельство, ны́не и при́сно и во ве́ки веко́в. Ами́нь.