30 января.

Канон преподобному Антонию, Дымскому обители начальнику.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Доброде́телей ревни́телю, пусты́нный жи́тель, подви́жник ве́ры Христа́ Бо́га на́шего, ноше́нием и труды́ умертви́вый плотска́я вожделе́ния, тезоимени́те вели́кому Анто́нию, его́же житию́ поревнова́л еси́ и во его́же и́мя Боже́ственный хра́м воздви́гл еси́, ку́пно с ни́м, преподо́бне Анто́ние, моли́ Спаси́теля все́х, да и на́с сотвори́т победи́тели плотски́х по́хотей и хра́мы Ду́ха Свята́го, по вели́цей Его́ ми́лости.

Стихи́ра, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х, те́мже на небесе́х обре́л еси́ мзду́ трудо́в твои́х, де́монския разори́л еси́ полки́ и Ангельския дости́гл еси́ чи́ны, и́хже житию́ непоро́чно поревнова́л еси́, с ни́ми же дерзнове́ние име́я ко Христу́ Бо́гу, ми́р испроси́ душа́м на́шим.

Кано́н преподо́бнаго. Гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподобне отче Антоние, моли Бога о нас.

Зело́ че́стни на́м дру́зи Твои́, Ди́вне во святы́х Го́споди, те́мже Тебе́ воспева́юще и пою́ще в сердца́х свои́х, и и́х в пе́снех моле́бных восхваля́ем, Тя́ сла́вяще, просла́вляющаго святы́х Свои́х.

Припев: Преподобне отче Антоние, моли Бога о нас.

Пе́ние моле́бное усе́рдно приношу́ тебе́, о́тче богому́дре Анто́ние, моли́твами твои́ми помози́ ми досто́йно воспе́ти твоя́ по́двиги.

Сла́ва Отцу́ и Сы́ну и Свято́му Ду́ху:

Всегда́шним к Бо́гу раче́нием и отверже́нием пло́ти и ми́ра, о́тче Анто́ние, Го́споду ве́рно послужи́л еси́, те́мже и досто́ин яви́лся еси́ услы́шати возжеле́нный гла́с Его́: благи́й ра́бе и ве́рный, вни́ди в ра́дость Го́спода твоего́.

И ны́не и при́сно и во ве́ки веко́в. Ами́нь.

Богородичен: Мои́х прегреше́ний, Влады́чице, плени́цы разто́ргни и томя́щий мя́ гре́х, Присноде́во, низложи́, я́ко да воспева́ю Тя́ всегда́, Всенепоро́чная, Тобо́ю спаса́емь.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Преподобне отче Антоние, моли Бога о нас.

Просвети́ся све́т тво́й, преблаже́нне, пред челове́ки, те́мже, почита́юще до́брое житие́ твое́, сла́вим Отца́ на́шего, Иже на небесе́х, и тя́ по до́лгу велича́ем.

Припев: Преподобне отче Антоние, моли Бога о нас.

Плотска́го жела́ния, преподо́бне, отве́ргся и земны́я сла́вы и вражде́бныя Бо́гу дру́жбы с ми́ром оша́явся, и все́х во́лею отщети́лся еси́, и Христа́, Еди́наго все́х Спаси́теля, приобре́л еси́.

Сла́ва Отцу́ и Сы́ну и Свято́му Ду́ху:

Прозре́в бу́дущая воздая́ния, зде́ маловре́менная, я́ко су́етная, о́тче, оста́вил еси́, сего́ ра́ди сугу́бая воздая́ния восприя́л еси́ во дво́рех небе́сных.

И ны́не и при́сно и во ве́ки веко́в. Ами́нь.

Богородичен: Благоутро́бием Твои́м, Богороди́тельнице, вся́каго мя́ изми́ осужде́ния, к Тебе́ прибега́ющаго, и Тебе́ припа́дающа, и призыва́юща Твою́ по́мощь.

Седа́лен, гла́с 4:

Гряду́щаго гра́да взыску́я, ми́ра красоту́ и я́же в не́м тле́нная ни во что́же вмени́л еси́, блаже́нне, в пусты́ню безмо́лвия всели́вся, те́мже ны́не гра́да небе́снаго показа́лся еси́ граждани́н, в не́мже помяни́ и на́с, недосто́йных, ве́рно почита́ющих тя́.

Сла́ва, и ны́не, Богородичен:

Мно́жества скве́рных помышле́ний, смуща́ющих у́м мо́й, и вожделе́ний стра́стных, вою́ющих на мою́ ду́шу, кто́ исчи́слити мо́жет, Пренепоро́чная? возста́ния же и озлобле́ния неви́димых враго́в мои́х кто́ испове́сть? Но Твои́ми моли́твами, Блага́я, от все́х си́х заступи́ мя и избавле́ние да́руй.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Преподобне отче Антоние, моли Бога о нас.

Ты́ с чудотво́рцем Варлаа́мом, ны́не предстоя́ престо́лу Бо́жию, умоля́еши Бо́га о святе́й оби́тели, утвержде́нной рука́ми твои́ми, не отступа́я от на́с ду́хом свои́м, но при́сно огражда́я на́с моли́твами твои́ми.

Припев: Преподобне отче Антоние, моли Бога о нас.

Благо́е послуша́ние яви́л еси́ блаже́нному Варлаа́му, наста́внику твоему́, на́м оста́вль о́браз и́стиннаго мона́шескаго жития́, в не́мже утвержда́й на́с моли́твами твои́ми.

Сла́ва Отцу́ и Сы́ну и Свято́му Ду́ху:

Зи́му и ва́р терпе́нием твои́м победи́л еси́, блаже́нне, и теплоту́ бо ве́ры и любве́ стяжа́л еси́, ея́же и на́м испроси́ у Го́спода моли́твами твои́ми.

И ны́не и при́сно и во ве́ки веко́в. Ами́нь.

Богородичен: Поми́луй, еди́на Богома́ти, поми́луй и сохрани́ ду́шу мою́ окая́нную, потопля́емую от бесо́в лука́выми де́лы и страстьми́, и пре́жде исхо́да моего́ сию́ очи́стити помози́.

Пе́снь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику, Отцу́ Твоему́, от но́щи неве́дения приведе́ние и́мамы.

Припев: Преподобне отче Антоние, моли Бога о нас.

Не устраши́ тебе́, преподо́бне, долгота́ жесто́каго пути́, в о́нь же поше́л еси́, посыла́емь от преподо́бнаго Варлаа́ма, ниже́ уклони́лся еси́ от те́снаго пути́, вводя́ща в живо́т, в о́нь же вступи́л еси́, призыва́емь от Бо́га, те́мже досто́йно вше́л еси́ во дворы́ Госпо́дни послуша́нием и терпе́нием.

Припев: Преподобне отче Антоние, моли Бога о нас.

Кра́йнею не́навистию возненави́дел еси́, о́тче, тщесла́вия и мирски́я молвы́, пу́ть пра́вый позна́в, его́же вожделе́л еси́ уедине́ния ра́ди и безмо́лвия, и дости́гл еси́ духо́вныя ра́дости и ве́чнаго весе́лия.

Сла́ва Отцу́ и Сы́ну и Свято́му Ду́ху:

Упова́нием бу́дущих бла́г, блаже́нне, укрепля́емь, плотско́е стремле́ние обузда́л еси́, своея́ пло́ти, о́тче, вра́г неми́лостив бы́л еси́, нетле́ние е́й хода́тайствуя.

И ны́не и при́сно и во ве́ки веко́в. Ами́нь.

Богородичен: Упова́ние мое́ Ты́ еси́, Пречи́стая, спасе́ние и похвала́, те́мже прибега́ю к покро́ву Твоему́, не гнуша́йся мене́, грехи́ мно́гими и скорбьми́ ны́не поглоще́ннаго, но, предвари́в, спаси́ мя́.

Пе́снь 6.

Ирмос: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: еди́н бо еси́ на́шего спасе́ния вино́вен.

Припев: Преподобне отче Антоние, моли Бога о нас.

Но́щию, я́ко дне́м, бде́л еси́ и в житии́ свое́м не да́л еси́ сна́ очи́ма твои́ма, ни ве́ждома дрема́ния, до́ндеже сподо́бился еси́ ви́дети пра́ведных селе́ния, я́же угото́ва Бо́г лю́бящим Его́.

Припев: Преподобне отче Антоние, моли Бога о нас.

От младе́нчества возлюби́в Бо́га, младе́нческое незло́бие и чистоту́ стяжа́л еси́, и сего́ ра́ди позна́л еси́ та́йны Бо́жия, открыва́емыя младе́нцем, и угото́ванное и́м Ца́рство небе́сное насле́довал еси́.

Сла́ва Отцу́ и Сы́ну и Свято́му Ду́ху:

Ра́ди безмо́лвия удали́лся еси́, преподо́бне, в пусты́ню, ча́я Бо́га, спаса́ющаго тя́ от малоду́шия и от бу́ри, и отту́ду ко гра́ду небе́сному преше́л еси́, иде́же е́сть благоугоди́вших Бо́гу жили́ще.

И ны́не и при́сно и во ве́ки веко́в. Ами́нь.

Богородичен: Красоту́ мя ви́дети сподо́би сла́вы Твоея́, егда́ от пло́ти моея́ и́мам разлучи́тися, я́ко утвержде́ние мое́ еси́, Влады́чице, сла́ва и весе́лие.

Конда́к, гла́с 6:

Све́рстник и подра́жатель преподо́бному Варлаа́му, послуша́ние к нему́ и́стинное стяжа́в, досто́ин яви́лся ему́ прее́мник, упа́сши до вре́мене ста́до его́, доброде́телем же его́ поревнова́в, в ту́южде ме́ру во́зраста дости́гл еси́, безмо́лвие пусты́нное возлюби́в, и уго́ден Го́сподеви показа́лся еси́, первонача́льник бы́в пусты́ни при е́зере Ды́мском, те́м ти́ вопие́м: с преподо́бным Варлаа́мом, о́тче Анто́ние, моли́ о на́с Бо́га, да да́ст на́м та́кожде угоди́ти Ему́, я́коже и ты́, о́бразе послуша́ния и безмо́лвия ти́хий рачи́телю.

Икос:

Ева́нгельскому словеси́ ра́достною душе́ю вня́л еси́, преподо́бне, душе́вный ра́зум впери́в к Истинному Све́ту, душетле́нныя стра́сти до конца́ потреби́л еси́, смире́нным и безмо́лвным житие́м преди́вен бы́вый; сего́ ра́ди и пусты́ни первонача́льник яви́лся еси́, о́тче, к высоте́ го́рней сию́ управля́я, и те́пл хода́тай к Бо́гу о на́с показа́лся еси́, Его́же моли́ дарова́ти все́м на́м досто́йно послужи́ти Ему́, подо́бно тебе́, о́бразе послуша́ния и безмо́лвия ти́хий рачи́телю.

Пе́снь 7.

Ирмос: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ Ангел: услы́шася уже́ у́ст ва́ших моли́тва.

Припев: Преподобне отче Антоние, моли Бога о нас.

Ни́щь ду́хом, по словеси́ Госпо́дню, бога́тство доброде́телей стяжа́л еси́, и́миже угоди́л еси́ Го́сподеви и Ца́рство небе́сное унасле́довал еси́.

Припев: Преподобне отче Антоние, моли Бога о нас.

Блаже́нства небе́снаго сподо́бился еси́, Анто́ние богому́дре, ти́х и пра́веден бы́в, кро́тости же ра́ди и сле́з неоску́днаго то́ка насле́дил еси́ зе́млю кро́тких и та́мо вкуша́еши ве́чнаго утеше́ния.

Сла́ва Отцу́ и Сы́ну и Свято́му Ду́ху:

Анто́ния Вели́каго предста́тельству себе́ и ста́до свое́ вручи́л еси́, созда́в хра́м во и́мя его́, и Ангельскому житию́ его́ поревнова́л еси́, те́мже и ча́сть его́ насле́довал еси́, ра́дуяся с ни́м в Ца́рствии небе́сном.

И ны́не и при́сно и во ве́ки веко́в. Ами́нь.

Богородичен: Яко разбо́йник, взыва́ю Ти́: помяни́ мя, Человеколю́бче; пла́чу, я́ко блудни́ца, и вопию́: ка́ющагося приими́ мя, отча́яннаго, Богоро́дицы ра́ди, Многоми́лостиве.

Пе́снь 8.

Ирмос: О подо́бии зла́те небре́гше, треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь и превозно́сит во вся́ ве́ки.

Припев: Преподобне отче Антоние, моли Бога о нас.

В безмо́лвии и кро́тости препроводи́л еси́ жи́знь свою́, о́тче, земна́я ра́ди небе́сных отве́ргнув, нетле́нная тле́нными искупи́в, те́м ны́не со все́ми, благоугоди́вшими Бо́гу, пое́ши и превозно́сиши Го́спода во вся́ ве́ки.

Припев: Преподобне отче Антоние, моли Бога о нас.

От страсте́й тиме́ния чи́ста тя́ обре́т, Всесвяты́й Ду́х всели́ся в тя́, те́мже и чуде́с дарова́ния тебе́ да́рует, Еди́н Сы́й ди́вный во святы́х Свои́х Бо́г на́ш, сла́вимый во ве́ки.

Сла́ва Отцу́ и Сы́ну и Свято́му Ду́ху:

Не иски́й сла́вы челове́ческия, в пусты́ни скры́л еси́ до́блести твоя́, но не утаи́ся све́т доброде́телей твои́х, прославля́ющ Бо́га и ве́рных возбужда́ющ хвали́ти и превозноси́ти Его́, Хва́льнаго и Препросла́вленнаго, во вся́ ве́ки.

И ны́не и при́сно и во ве́ки веко́в. Ами́нь.

Богородичен: Наляцы́ и ца́рствуй, Иису́се, Царю́ ца́рствующих, Сы́не Бо́жий, правосла́вным царе́м на́шим спобо́рствуя и все́х окормля́я к Ца́рству безконе́чныя Твоея́ сла́вы моли́твами Ро́ждшия Тя́ неизрече́нно.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Преподобне отче Антоние, моли Бога о нас.

Оби́тель Пресвята́го Ду́ха, о Анто́ние, бы́л еси́, укра́шен разли́чными доброде́тельми, те́мже ны́не источа́еши ве́рным исцеле́ния, я́ко сосу́д благода́ти Бо́жия избра́нный.

Припев: Преподобне отче Антоние, моли Бога о нас.

Све́тлостию подвиго́в богоприя́тных просия́л еси́, о́тче, и восприя́л еси́ благода́ть моли́тися о на́с, вспомоществу́я ве́рным в по́двиге спасе́ния, я́ко сосу́д благода́ти Бо́жия избра́нный.

Сла́ва Отцу́ и Сы́ну и Свято́му Ду́ху:

О на́с моле́ние ко Влады́це Христу́, о́тче Анто́ние, не преста́й простира́ти, я́ко оте́ц чадолюби́вый, и помога́я на́м, прибега́ющим к тебе́ и чту́щим тя́, я́ко сосу́д благода́ти Бо́жия избра́нный.

И ны́не и при́сно и во ве́ки веко́в. Ами́нь.

Богородичен: Пощади́ мя́, Го́споди, пощади́, егда́ прии́деши суди́ти ми́ру, и не осуди́ мене́ по дело́м мои́м, но ми́лостию Твое́ю спаси́ мя моли́твами Пречи́стыя Богоро́дицы и все́х святы́х, от ве́ка Тебе́ благоугоди́вших.

Свети́лен.

Процве́л еси́, я́ко фи́никс Дави́дски, о́тче, и оби́тель яви́лся еси́ Ду́ха Пресвята́го, Иже сла́вна тя́ ве́рным показа́, Ему́же о на́с непреста́нно моли́ся, почита́ющих ве́рою пречестну́ю па́мять твою́, преподо́бне Анто́ние.

Сла́ва, и ны́не, Богородичен:

Тя́ пе́сньми немо́лчными ублажа́ем, Де́во, преподо́бных сла́во и утвержде́ние и все́х ве́рных упова́ние и похвало́.

Молитва преподобному Антонию Дымскому

О, па́стырю до́брый, учи́телю и наста́вниче наш, и святы́я оби́тели Ды́мския нача́льниче, преподо́бный о́тче Анто́ние! Мо́лим тя усе́рдно. Ты, я́ко име́я дерзнове́ние ко Влады́це Христу́ и ко Пречи́стей Его́ Ма́тери, бу́ди о нас недосто́йных, и́же с ве́рою притека́ющих к тебе́, хода́тай и моли́твенник те́плый, заступа́я нас от вся́ких бед и напа́стей, да твои́ми моли́твами и предста́тельством пребу́дем невреди́ми от враго́в на́ших ви́димых и неви́димых. Моли́ милосе́рдие Его́, е́же спасти́ нас от прегреше́ний на́ших, и́миже весть судьба́ми. Моли́ бла́гость Его́, е́же ми́лостив подава́ти нам и всему́ ми́ру потре́бная. Моли́ся Даю́щему всем мир: ниспосла́ти мир Це́рквам, собира́я расточе́нныя во еди́но, сохрани́ти страну́ на́шу в ми́ре и тишине́ и вся́кому ве́рному в до́ме и на пути́ и повсю́ду дни бла́ги и безмяте́жны дарова́ти, умири́ти жизнь на́шу, поми́ловати нас, предстоя́щих зде и за благосло́вною вино́ю отше́дших оте́ц и бра́тий на́ших, и весь мир, и спасти́ ду́ши на́ша, да вы́ну сла́вим, хва́лим, пое́м и велича́ем пречестно́е и великоле́пое и́мя Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.