2 января.

Канон праведному Иоанну Кронштадтскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Со апо́столы изы́де веща́ние твое́ в концы́ вселе́нныя, с испове́дники страда́ния за Христа́ претерпе́л еси́, святи́телем уподо́бился еси́ сло́ва пропове́данием, с преподо́бными во благода́ти Бо́жией просия́л еси́. Сего́ ра́ди вознесе́ Госпо́дь бе́здну смире́ния твоего́ превы́ше небе́с, и дарова́ на́м и́мя твое́ во исто́чник преди́вных чуде́с. Те́мже во Христе́ во ве́ки живы́й, чудотво́рче, любо́вию ми́луяй су́щия в беда́х, слы́ши ча́да твоя́, ве́рою тя призыва́ющия, Иоа́нне пра́ведне, возлю́бленный па́стырю на́ш.

Велича́ние:

Велича́ем тя́, святы́й пра́ведный о́тче Иоа́нне, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Стихи́ра, гла́с 6:

Ангеле земны́й, дру́же челове́ков, орга́не Уте́шителя Ду́ха, носи́телю любве́ Христо́вы, печа́льниче о все́м ми́ре и уста́ все́х ве́рных, утеше́ние печа́льных и скорбя́щих, засту́пниче гони́мых, врачу́ ду́ш и теле́с, о́тче и моли́твенниче, святы́й пра́ведный Иоа́нне, прииди́ и ста́ни с на́ми, да вознесе́м вку́пе с тобо́ю хвалу́ и благодаре́ние Спаси́телю Бо́гу, сла́вное соверша́я сие́ торжество́.

Кано́н свята́го. Глас 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л е́сть.

Припев: Святый праведный отче Иоанне, моли Бога о нас.

Моя́ чу́вства и у́м утверди́, Спаси́телю мо́й, да возмогу́ досто́йне воспе́ти моли́твы и по́двиги возлю́бльшаго Тя́ и Тобо́ю возлю́бленнаго служи́теля Твоего́, отца́ на́шего Иоа́нна.

Припев: Святый праведный отче Иоанне, моли Бога о нас.

От ю́ности Первозва́нному Апо́столу во святе́м хра́ме его́ пе́ти предъизбра́нный, све́тлостию Креста́ озаря́емь, грехо́вныя мглы́ избе́гл еси́, Спаси́телю Бо́гу моли́твы и пе́ние вознося́ непреста́нно, блаже́нне.

Сла́ва Отцу́ и Сы́ну и Свято́му Ду́ху:

Я́коже Илия́ колесни́цею о́гненною, та́ко и ты́ колесни́цею доброде́телей на не́бо возше́л еси́, отону́дуже низпосла́ти и на́м жития́ исправле́ние Го́спода умоли́.

И ны́не и при́сно и во ве́ки веко́в. Ами́нь.

Богородичен: Жи́знь ве́чную Тобо́ю, Богоро́дице Де́во, прия́хом, и́же жи́зни ра́йския не́когда лиши́вшиися, зане́ родила́ еси́ еди́наго Безнача́льнаго и вся́ Оживотворя́ющаго.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище и утвержде́ние.

Припев: Святый праведный отче Иоанне, моли Бога о нас.

И нра́вом прича́стник и житие́м подража́тель апо́столом бы́в, богодухнове́нне, сло́во и́стины до конца́ испра́вил еси́.

Припев: Святый праведный отче Иоанне, моли Бога о нас.

Зри́тельно Ца́рствия небе́снаго бе́ душе́вное о́ко твое́, поне́же чи́сто бы́сть, сего́ ра́ди житие́ све́тле упра́вил еси́, е́же чту́ще о Бо́зе, тя́ прославля́ем.

Сла́ва Отцу́ и Сы́ну и Свято́му Ду́ху:

Не трудя́йся да не я́ст, — словеса́ апо́стола бра́тии твое́й веща́л еси́, те́мже и до́м трудолю́бия убо́гих ра́ди воздви́гл еси́, в не́мже ни́щии и немощни́и возмо́гут удовле́ни бы́ти, пита́ющеся от де́л ру́к свои́х.

И ны́не и при́сно и во ве́ки веко́в. Ами́нь.

Богородичен: Вся́ све́т еси́, Влады́чице, вся́ святы́ня, вся́ бла́гость, вся́ прему́дрость, вся́ мо́жеши, я́ко Ма́ти Всемогу́щаго, еди́на и та́ же всесоверше́нна, я́ко Ма́ти всесоверше́ннаго Царя́ сла́вы.

Седа́лен, гла́с 8.

Пла́чь мно́зех о гресе́х к Престо́лу вы́шнему вознося́, Небе́с приклоне́ние во святе́й Литурги́и ду́хом созерца́я, дея́ние и пропове́дание наразры́вны имы́й, твои́ми де́лы и чудесы́ вели́ких отце́в насле́дник досто́йный яви́лся еси́, Иоа́нне блаже́нне, ми́ру Кро́нштадтский свети́льниче, моли́ся о душа́х на́ших.

Сла́ва, и ны́не, богоро́дичен, гла́с то́йже.

Недви́жимое утвержде́ние ве́ры и Боже́ственное дарова́ние душа́м на́шим — Ты́ еси́, Пречи́стая, те́м к Тебе́ припа́дающе, ку́пно с арха́нгелом вопие́м Ти́: ра́дуйся, роди́вшая Спа́са на́шего, ра́дуйся Засту́пнице и Хода́таице ро́да христиа́нскаго.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́юще: сла́ва си́ле Твое́й, Го́споди.

Припев: Святый праведный отче Иоанне, моли Бога о нас.

Основа́ние тве́рдо — Христа́ име́я, во страннолю́бии Авраа́му дре́внему уподо́бился еси́, от все́х стра́н к тебе́ приходя́щия прие́мля, и ко Го́споду те́х приводя́, и та́ко уго́дная Бо́гу твори́л еси́.

Припев: Святый праведный отче Иоанне, моли Бога о нас.

Хра́м Бо́гу се́рдце твое́ хотя́ устро́ити, в дому́ Бо́жием непреста́нно служи́ти возжеле́л еси́, украша́я ду́шу твою́ небе́сными добро́тами.

Сла́ва Отцу́ и Сы́ну и Свято́му Ду́ху:

Росо́ю по́двигов твои́х вся́ стра́сти теле́сныя угаси́в, возже́гл еси́ просвеще́ние безстра́стия, те́мже и сы́н ве́чнаго дне́ яви́лся еси́, о́тче блаже́нне.

И ны́не и при́сно и во ве́ки веко́в. Ами́нь.

Богородичен: Иезеки́иль боже́ственный, Пречи́стая, Врата́ заключе́нна пронарече́ Тя́, и́миже про́йде нерастворе́нно, еди́ный Преве́чный, ми́р Сво́й да́в на́м.

Пе́снь 5

Ирмос: Ты́ Го́споди мо́й, Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святый праведный отче Иоанне, моли Бога о нас.

Сподо́бился еси́ вы́шних дарова́ний, о́тче, Го́споду твоему́ непреста́нно служа́ и апо́стольския труды́ при́сно подража́я.

Припев: Святый праведный отче Иоанне, моли Бога о нас.

Тле́нныя твоея́ пло́ти сладостра́стие умертви́в, ду́шу нетле́нную благоче́стием оживи́л eси́, и сию́ до́м Ду́ха Боже́ственнаго сотвори́л еси́.

Сла́ва Отцу́ и Сы́ну и Свято́му Ду́ху:

Ева́нгелие Христо́во все́м усе́рдно пропове́дуя, трапе́зы Госпо́дней прича́стник повседне́вный бы́л еси́, са́м себе́ и па́ству твою́, я́ко же́ртву жи́ву, и свя́ту Бо́гови устроя́я.

И ны́не и при́сно и во ве́ки веко́в. Ами́нь.

Богородичен: Еди́наго от Тро́ицы родила́ еси́, Пречи́стая, милосе́рдия ра́ди на земли́ Явльшагося во двою́ естеству́, Его́же непреста́нно моли́ спасти́ ду́ши на́ша.

Пе́снь 6.

Ирмос: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Припев: Святый праведный отче Иоанне, моли Бога о нас.

Ма́слина плодови́та в дому́ Го́спода твоего́ бы́л еси́, Иоа́нне богоявле́нне, зане́ ве́дение Боже́ственное Госпо́дь дарова́ ти и в де́лании апо́стольстем укрепи́ тя.

Припев: Святый праведный отче Иоанне, моли Бога о нас.

Уди те́ла Христо́ва есте́ вы́, — та́ко со апо́столом пропове́дал еси́ и Христа́ еди́наго люби́ти учи́л еси́, да вси́ еди́но бу́дут.

Сла́ва Отцу́ и Сы́ну и Свято́му Ду́ху:

Житие́ твое́ свя́то, сло́во твое́, богому́дре, благода́ти Бо́жия испо́лнено, се́рдце твое́ моли́твы благода́тныя сосу́д бы́сть, сего́ ра́ди ве́рою и любо́вию тя́ почита́ем.

И ны́не и при́сно и во ве́ки веко́в. Ами́нь.

Богородичен: Естество́ Ангельское удиви́ся е́же в Тебе́ чу́ду неизрече́нному, Пресвята́я Де́во, ка́ко у́бо пло́ть восприя́т от Тебе́, Иже безпло́тен Сы́й и вся́ Содержа́й.

Конда́к, гла́с 4:

От младе́нства Бо́гом избра́нный, и во о́трочестве да́р уче́ния чуде́сно от Него́ прие́мый, и к пресви́терству в со́нном виде́нии пресла́вно призва́н бы́в, па́стырь ди́вный Це́ркве Христо́вы яви́лся еси́, о́тче Иоа́нне, благода́ти тезоимени́те; моли́ Христа́ Бо́га все́м на́м с тобо́ю в Ца́рствии Бо́жием бы́ти.

Икос.

Ду́х Святы́й во проро́цех глаго́лавый и апо́столы всю́ вселе́нную просвети́вый, му́чеником кре́пость дарова́вый и чре́з святи́тели ве́ру правосла́вную уясни́вый, благода́ть Свою́ излия́ оби́льно на тя́, о́тче Иоа́нне, ве́ру бо Христо́ву сло́вом, де́лы и все́м житие́м твои́м возвеща́л еси́. Те́мже в селе́ния Своя́ призва́ тя Госпо́дь, и ны́не у Престо́ла сла́вы Его́ предстоя́, моли́ся, все́м чту́щим тя́ с тобо́ю в Ца́рствии Бо́жием бы́ти.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми взыва́ху: благослове́н еси́ в хра́ме сла́вы Твоея́, Го́споди.

Припев: Святый праведный отче Иоанне, моли Бога о нас.

Про́мыслом Бо́жиим све́т благоче́стия среди́ тя́жкия тьмы́ безбо́жия и неве́рия ты́ яви́лся еси́, о́тче, вся́ призыва́я зва́ти: благослове́н еси́ в це́ркви сла́вы Твоея́, Го́споди.

Припев: Святый праведный отче Иоанне, моли Бога о нас.

Образ Бо́жий челове́к е́сть, ты́ же, о́тче Иоа́нне, зерца́ло любве́ Бо́жией пресве́тло бы́л еси́ и до́м Святы́я Тро́ицы, Юже и мы́ гре́шнии прославля́ем.

Сла́ва Отцу́ и Сы́ну и Свято́му Ду́ху:

Юже от Го́спода благода́ть прия́л еси́, во е́же неду́ги и стра́сти исцеля́ти челове́ком, то́ю и на́с при́сно посеща́й, да вси́ с тобо́ю единому́дренно пое́м: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Влады́чице, спаси́ ро́д Тво́й, спаси́ единокро́вныя Твоя́. Спаси́ ны, Ма́ти Живота́ и всего́ ро́да челове́ча, а́ще и недосто́йни есмы́ Тя́ Ма́терь себе́ нарещи́, освяти́, утверди́ и спаси́ на́с моли́твами Твои́ми.

Пе́снь 8.

Ирмос: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троци, взыва́юще: благослови́те, вся́ дела́ Госпо́дня, Го́спода.

Припев: Святый праведный отче Иоанне, моли Бога о нас.

Очи́сти сердца́ и мы́сли на́ша моли́твами твои́ми, и я́ко зе́млю плодоно́сну, покажи́ ны́, да доброде́телию препоя́савшеся, зове́м: благослови́те вся́ дела́ Госпо́дня Го́спода.

Припев: Святый праведный отче Иоанне, моли Бога о нас.

Венце́м благода́тных даро́в венча́лся еси́, прему́дрость вы́сшую созерца́я и при́сно зовы́й: благослови́те вся́ дела́ Госпо́дня Го́спода.

Сла́ва Отцу́ и Сы́ну и Свято́му Ду́ху:

Тро́ичен: Сла́ва Тебе́, Всесвяты́й животворя́щий Ду́ше, от Отца́ исходя́й и в Сы́не при́сно почива́яй; сла́ва Тебе́, Сы́не Бо́жий, Святы́м Ду́хом освяща́яй, укрепля́яй и умудря́яй на́с; сла́ва Тебе́, О́тче, благоволя́й о на́с при́сно Ду́хом Святы́м: неразде́льная Тро́ице Еди́нице, поми́луй на́с.

И ны́не и при́сно и во ве́ки веко́в. Ами́нь.

Богородичен: Я́же ми́ру ро́ждшая спасе́ние, ра́дуйся, Тобо́ю бо от земли́ на высоту́ взя́ти бы́хом; ра́дуйся, Благослове́нная, покро́ве и держа́во, стено́ и утвержде́ние, пою́щим: Го́спода воспева́йте дела́ и превозноси́те Его́ во ве́ки.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святый праведный отче Иоанне, моли Бога о нас.

Вои́стину све́т ми́ру бы́л еси́, о́тче святы́й, Боже́ственными бо де́тельми ду́шу удобри́в, па́стырь изря́ден правосла́вныя Це́ркве яви́лся еси́, все́м ве́рным о́браз бы́в сло́вом и житие́м, сего́ ра́ди тя́ ублажа́ем.

Припев: Святый праведный отче Иоанне, моли Бога о нас.

Еди́наго Соде́теля, Имже и о Не́мже вся́ческая во все́х, вы́ну предзря́ пред умо́м свои́м. Тому́ чи́стым се́рдцем и небла́зненною душе́ю все́м житие́м твои́м порабо́тал еси́, я́ко Го́споду своему́, рабо́тою маммо́не ника́коже прирази́вся.

Сла́ва Отцу́ и Сы́ну и Свято́му Ду́ху:

Кня́зи восхвали́ша и наро́д мно́г просла́ви тя́, ты́ же сла́ву земну́ю презре́в, в ве́чных оби́телех Бо́жиих возжела́л еси́ бы́ти и та́мо прославля́ти Го́спода во ве́ки.

И ны́не и при́сно и во ве́ки веко́в. Ами́нь.

Богородичен: Иже Преве́чен Сы́й сни́де во утро́бу Твою́, Пресвята́я Де́во, и неизрече́нно, па́че ума́ и сло́ва, роди́ся от Тебе́, да обнови́т дре́вняго Ада́ма, те́м Тя́, я́ко Вино́вницу на́шего обновле́ния, при́сно велича́ем.

Свети́лен:

В хра́ме Первозва́ннаго ученика́ Христо́ва священноде́йствуя, и того́ апо́стольское служе́ние ве́ры ре́вностно подража́я, де́латель до́брый са́да Христо́ва бы́л еси́, и я́ко пло́д мно́г ве́рныя ко Го́споду твоему́ приве́л еси́, чрез все́ житие́ вы́ну веща́я: моя́ жи́знь во Христе́ е́сть.

Сла́ва, и ны́не, Богородичен:

Иже от Тебе́ рожде́йся, Пресвята́я Де́во, и от Ду́ха Своего́ излия́вый на вся́ку пло́ть, освяти́, просла́ви и прия́т в селе́ния Своя́ ве́рнаго служи́теля Своего́, моли́твенника, пропове́дника, еще́ же и проро́ка, с ни́мже не преста́й моля́щи за чту́щия Тя́.

Стихи́ры, гла́с 8.

О, прера́достныя по́вести: / Бо́га мо́лит о́трок Иоа́нн, / Бо́жия про́сит ми́лости, / е́же просвети́ти ему́ смы́сл, / ни́ц просте́рся пред ико́ною, / ско́рбь души́ пред Бо́гом испове́дуя. / И се́ пелена́ от о́чию ума́ о́троча снима́ется, / и све́том Христо́вым о́трок озаря́ется, / да ве́лия сотвори́т и мно́ги научи́т.

О, чуде́с преизоби́лие! / О, любве́ живо́е облиста́ние! / Кто́ не подиви́тся твоему́ благотворе́нию / и е́же к убо́гим милосе́рдию? / Сла́вному Лики́йских Мѵ́р святи́телю / неисче́тностию чуде́с подо́бился еси́. / Те́мже гра́ды и ве́си земли́ Ру́сския, / Иоа́нне пра́ведне, / ви́деша тобо́ю све́т Христо́в.

Якоже све́т и теплота́ / со́лнцу неразлу́чни, / та́ко и тебе́ свя́тость и учи́тельство, / любы́ и милосе́рдие прису́щи бы́ша, / Иоа́нне свяще́ннейший, / лю́дем богодарова́нне. / Те́мже, о па́стырю, / бу́ди согрева́я и просвеща́я на́с, / бу́ди, я́коже со́лнце, душа́м на́шим.

Сла́ва, гла́с 7:

Покланя́яся святы́м ико́нам, сла́влю Христа́ Бо́га воплоще́нна, Образ сла́вы Отчия; испове́дую Отца́, безнача́льно Сы́на роди́вшаго; прославля́ю богоподо́бие челове́ков, и́же хра́мы Свята́го Ду́ха су́ть; зря́ же креста́ о́браз, в чу́встве и́мам си́лу Креста́ Животворя́щаго, — се́ е́сть богосло́вие твое́, о́тче святы́й, и́мже вели́ким учи́телем Це́ркве уподо́бился еси́, о́бразы иконопи́снии во сла́ву первообра́зных почита́я.

И ны́не, богоро́дичен, гла́с то́йже:

Роди́лся еси́ от Де́вы несказа́нно, Христе́, и просвети́л еси́ су́щия во тьме́, вопию́щия: Го́споди, сла́ва Тебе́.

Молитва святому праведному Иоанну Кронштадтскому

О, вели́кий уго́дниче Христо́в, святы́й пра́ведный о́тче Иоа́нне Кроншта́дтский, па́стырю ди́вный, ско́рый помо́щниче и ми́лостивый предста́телю! Вознося́ славосло́вие Триеди́ному Бо́гу, ты моли́твенно взыва́л: Имя Тебе́ — Любо́вь: не отве́ргни меня́, заблужда́ющагося. Имя Тебе́ — Си́ла: укрепи́ меня́, изнемога́ющего и па́дающаго. Имя Тебе́ — Свет: просвяти́ ду́шу мою́, омраче́нную жите́йскими страстя́ми. Имя Тебе́ — Мир: умири́ мяту́щуюся ду́шу мою́. Ны́не благода́рная твоему́ предста́тельству всеросси́йская па́ства мо́лится тебе́: Христоимени́тый и пра́ведный уго́дниче Бо́жий! Любо́вию твое́ю озари́ нас, гре́шных и немощны́х, сподо́би нас принести́ досто́йные плоды́ покая́ния и не осужде́нно причаща́тися Христо́вых Та́ин. Си́лою твое́ю ве́ру в нас укрепи́, в моли́тве поддержи́, неду́ги и боле́зни исцели́, от напа́стей, враго́в, ви́димых и неви́димых, изба́ви. Све́том ли́ка твоего́ служи́телей и предстоя́телей Алтаря́ Христо́ва на святы́е по́двиги па́стырского де́лания подви́гни, младе́нцем воспита́ние да́руй, ю́ное наста́ви, ста́рость поддержи́, святы́ни хра́мов и святы́е оби́тели озари́! Умири́, чудотво́рче и прови́дче преизря́днейший, наро́ды страны́ на́шея, благода́тию и да́ром Свята́го Ду́ха изба́ви от междуусо́бныя бра́ни, расточе́нная собери́, прельще́нныя обрати́ и совокупи́ Святе́й Собо́рней и Апо́стольской Це́ркви. Ми́лостию твое́ю супру́жества в ми́ре и единомы́слии соблюди́, мона́шествующим в дела́х благи́х преуспея́ние и благослове́ние да́руй, малоду́шныя уте́ши, стра́ждущих от духо́в нечи́стых свободи́, в ну́ждах и обстоя́ниих су́щих поми́луй и нас на путь спасе́ния наста́ви. Во Христе́ живы́й, о́тче наш Иоа́нне, приведи́ нас к Невече́рнему Све́ту жи́зни ве́чныя, да сподо́бимся с тобо́ю ве́чнаго блаже́нства, хва́ляще и превознося́ще Бо́га во ве́ки веко́в. Ами́нь.

Молитва вторая святому праведному Иоанну Кронштадтскому

О, вели́кий чудотво́рче и преди́вный уго́дниче Бо́жий, богоно́сне о́тче Иоа́нне! При́зри на нас и внемли́ благосе́рдно моле́нию на́шему, я́ко вели́ких дарова́ний сподо́би тя Госпо́дь, да хода́таем и при́сным моли́твенником за нас бу́деши. Се бо страстьми́ грехо́вными обурева́еми и зло́бою снеда́еми, за́поведи Бо́жия пренебрего́хом, покая́ния серде́чнаго и слез воздыха́ния не принесо́хом, сего́ ра́ди мно́гим ско́рбем и печа́лем досто́йни яви́хомся. Ты же, о́тче пра́ведный, ве́лие дерзнове́ние ко Го́споду и сострада́ние к бли́жним свои́м име́я, умоли́ Всеще́драго Влады́ку ми́ра, да проба́вит ми́лость Свою́ на нас и потерпи́т непра́вдам на́шим, не погуби́т нас грех ра́ди на́ших, но вре́мя на покая́ние ми́лостивно нам да́рует. О, свя́тче Бо́жий, помози́ нам ве́ру правосла́вную непоро́чно соблюсти́ и за́поведи Бо́жии благоче́стно сохрани́ти, да не облада́ет на́ми вся́кое беззако́ние, ниже́ посра́мится Пра́вда Бо́жия в непра́вдах на́ших, но да сподо́бимся дости́гнути кончи́ны христиа́нския, безболе́зненныя, непосты́дныя, ми́рныя и Тайн Бо́жиих прича́стныя. Еще́ мо́лим тя, о́тче пра́ведне, о е́же Це́ркви на́шей Святе́й до сконча́ния ве́ка утвержде́нней бы́ти, Оте́честву же на́шему мир и пребыва́ние испроси́ и от всех зол сохрани́, да та́ко наро́ди на́ши, Бо́гом храни́ми, в единомы́слии ве́ры и во вся́ком благоче́стии и чистоте́, в ле́поте духо́внаго бра́тства, трезве́нии и согла́сии свиде́тельствуют: я́ко с на́ми Бог! В Нем же живе́м и дви́жемся, и есмы́, и прибу́дем во ве́ки. Ами́нь.