Шрифт

2 января.

Канон священномученику Игнатию Богоносцу.

Святому священномученику Игнатию Богоносцу
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

И нра́вом прича́стник, и престо́лом наме́стник апо́столом бы́в, дея́ние обре́л еси́, богодухнове́нне, и виде́ния восхо́д: сего́ ра́ди, сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Игна́тие, моли́ Христа́ Бо́га спасти́ся душа́м на́шим.

Кано́н свята́го Игна́тия. Гла́с 1.

Пе́снь 1.

Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Священномучениче Игнатие, моли Бога о нас.

Све́тло пра́зднующе, да учреди́мся, му́ченик Игна́тий свяще́нно созыва́ет Це́рковь Христо́ву на страда́ние его́ многопе́тое.

Припев: Священномучениче Игнатие, моли Бога о нас.

Свети́льник пресве́тлейший Це́ркве сы́й, Игна́тие, просвеща́еши вся́ земны́я концы́ и за́падная озаря́еши, от восто́ка прише́д.

Припев: Священномучениче Игнатие, моли Бога о нас.

Па́вловым подо́бяся по ме́стом беда́м, Игна́тие, и сы́й ю́зник, не стужи́л еси́, утвержда́я писа́ньми ча́стыми Це́ркви Христо́вы.

Припев: Священномучениче Игнатие, моли Бога о нас.

Сла́вную па́мять твою́ вси́ пое́м, всеблаже́нне Игна́тие, и пе́сньми почита́ем Венча́вшаго тво́й всечестны́й ве́рх, богоблаже́нне.

Сла́ва Отцу́ и Сы́ну и Свято́му Ду́ху:

Да стру́жется пло́ть моя́, кро́вь да лие́тся, жела́нием тщу́ся, ко звере́м гото́в, к сомле́нию укра́шен, ко огню́, к мечу́, к снеде́нию, — му́ченик вопия́ше.

И ны́не и при́сно и во ве́ки веко́в. Ами́нь.

Богородичен: Еде́ме, украси́ся, Евфра́фа бо Созда́телю угото́вася, роди́тися хотя́щу от Де́вы Ма́тере в верте́пе Вифлее́мстем за благоутро́бие мно́гое.

Пе́снь 3.

Ирмос: Ка́мень, его́же небрего́ша зи́ждущии, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́с, ю́же от язы́к искупи́.

Припев: Священномучениче Игнатие, моли Бога о нас.

Образ свяще́ннаго страда́ния показа́лся еси́, о́тче, сто́лп терпе́ния, и пра́вило му́жества, и сто́лп Це́ркве, и ве́ры утвержде́ние, и доброде́тели подписа́ние, страда́ньми честны́ми венча́вся во Христе́.

Припев: Священномучениче Игнатие, моли Бога о нас.

Вои́стинну тезоиме́нно наре́клся еси́ Богоно́сец, о́тче: младе́нец бо еще́ во́зрастом сы́й, на рука́х носи́мь Го́спода поста́вился еси́, возглаша́ющаго к на́м: бу́дите Мне́, я́ко отроча́ сие́.

Припев: Священномучениче Игнатие, моли Бога о нас.

Пшени́ца чиста́ Бо́жия е́смь, — вопия́л еси́, о́тче, — тщу́ся от звере́й ди́виих смоло́тися, да сокруши́тся мое́ те́ло, да снедя́тся удеса́ моя́, и сне́дь да бу́ду звере́м, да Бо́гу чи́ст хле́б явлю́ся.

Припев: Священномучениче Игнатие, моли Бога о нас.

Стра́нное муче́ния три́знище терпели́вне соверши́л еси́, чу́дно па́че все́х предпострада́вших му́жество показа́л еси́, любо́вию разжига́емь неосла́бнаго раче́ния, я́коже бо о́гнь твою́ возжже́ ду́шу.

Сла́ва Отцу́ и Сы́ну и Свято́му Ду́ху:

Горя́й при́сно ду́хом, священному́ченик взыва́ше с любо́вию посреде́ бе́д: Христа́ гоню́, ра́дуяся, Христу́ сраспина́юся; живу́ же не ктому́ у́бо а́з, живе́т же, — глаго́лет, — во мне́ еди́н Христо́с.

И ны́не и при́сно и во ве́ки веко́в. Ами́нь.

Богородичен: Гряди́, Иса́ие, возопи́й: се́ Де́ва и́мать во чре́ве Изба́вителя ми́ра и роди́т в верте́пе, и бу́дет и́мя ражда́емаго Иису́с, Бо́г с на́ми, Емману́ил Савао́ф.

Седа́лен, гла́с 3.

Рукополага́емь от Христа́ Бо́га, просвети́л еси́ свяще́нную твою́ оде́жду, свиде́тельство и́стинно получи́в, богоно́се: зве́ри бо раздражи́л еси́ от ми́ра отлучи́ти тя́, Па́влу подо́бяся, чу́дному апо́столу. Те́мже и в Ри́ме сконча́л еси́, о́тче, досто́йне муче́ние.

Сла́ва И ны́не , гла́с 8.

От восто́ка возсия́в, я́коже звезда́, и луча́ми слове́с озаря́я, ми́р просвети́л еси́, и тму́ отгна́л еси́, и, я́ко Па́вел, тече́ние до́блественне соверши́л еси́, претерпе́в беды́ в язы́цех же и граде́х. Отону́дуже и, я́ко пшени́ца, звере́й зубы́ сомле́лся еси́, блаже́нне, приноше́ние Го́споду твоему́, богоно́се Игна́тие. Моли́ся Христу́ Бо́гу прегреше́ний разреше́ние дарова́ти чту́щим любо́вию святу́ю па́мять твою́.

Пе́снь 4.

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том — позна́ешися, внегда́ приити́ вре́мени — пока́жешися. Сла́ва си́ле Твое́й, Го́споди.

Припев: Священномучениче Игнатие, моли Бога о нас.

Уясни́л еси́ заре́ю страда́ний твои́х зе́млю, свяще́нне Игна́тие, у́зник яви́вся: обте́к бо, я́ко со́лнце, луча́ми муче́ния, ве́чер от восто́ка, ве́сь уясня́я, просвети́л еси́.

Припев: Священномучениче Игнатие, моли Бога о нас.

Якоже Па́вел, свя́зан зверьми́ слове́сными, в Ри́м те́кл еси́, Игна́тие му́дре, но не преста́л еси́ и свя́зан сы́й, утвержда́я Це́ркви, посыла́я по вся́ гра́ды все́м Христо́вым иера́рхом дерза́ти.

Припев: Священномучениче Игнатие, моли Бога о нас.

Христо́в тщу́ся бы́ти, Христа́ еди́наго жела́ю, ве́сь бо Христо́в е́смь, — вопия́л еси́, страда́льче. — Того́ гоню́, Того́ иду́ дости́гнути, и сего́ ра́ди о́гнь, и ме́чь, и зве́ри — вся́ терплю́, да получу́, е́же жи́ти.

Припев: Священномучениче Игнатие, моли Бога о нас.

Сладка́ мне́ ско́рбь, любе́зны у́зы за Жела́емаго, — вопия́л еси́, страда́льче, — гоне́ния ми́ сла́ждшая оте́чества, и сомле́ния моя́ па́че вся́каго весе́лия, боле́зни па́че вся́каго здра́вия теле́снаго.

Сла́ва Отцу́ и Сы́ну и Свято́му Ду́ху:

Звере́й мне́ да бу́дут уста́ закла́ние и чре́ва гро́бы, — вопия́л еси́, страда́льче. — Никто́же да стужа́ет, никто́же ми́ сокруша́ет кре́пость: а́з бо тщу́ся сомле́тися, я́коже пшени́ца, и хле́б обрести́ся Бо́гу чи́ст.

И ны́не и при́сно и во ве́ки веко́в. Ами́нь.

Богородичен: В верте́пе землене́м роди́тися на́с ра́ди Бо́г сы́й изво́лил еси́, обнища́в, Бла́же, на́шею нището́ю за милосе́рдие и из Де́вы проше́д, воплоще́н, пребы́в еди́н Сы́н из Отца́ и Ма́тере.

Пе́снь 5

Ирмос: Тво́й ми́р да́ждь на́м, Сы́не Бо́жий, ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Припев: Священномучениче Игнатие, моли Бога о нас.

Тако́в на́м подоба́ше му́др архиере́й, преподо́бен, ве́рен, нескве́рнен, незло́бив, — вопия́ Па́вел, преднаписа́ свяще́нный о́браз свяще́нных твои́х нра́вов.

Припев: Священномучениче Игнатие, моли Бога о нас.

Свя́зан, отводи́мь пострада́ти, архиере́й, у́зник Христо́в, Игна́тие, писа́л еси́ Це́рквам и градо́м, утвержда́я вся́ во испове́дании.

Припев: Священномучениче Игнатие, моли Бога о нас.

Па́вловым исправле́нием поревнова́в благочести́вно, вся́ его́ беды́ претерпе́л еси́, священному́чениче досточу́дне, восто́чная све́тлосте и вече́рняя звездо́.

Припев: Священномучениче Игнатие, моли Бога о нас.

Жела́нием ретя́ся Па́вловым, у́зы име́я на рука́х, ми́р обте́кл еси́, священному́чениче, да благоявле́н свяще́нными твои́ми страда́ньми яви́шися все́м.

Сла́ва Отцу́ и Сы́ну и Свято́му Ду́ху:

Пое́м по́двиги твоя́, честву́ем у́зы кажде́нии и псалмы́, пе́рсть честву́ем твои́х моще́й, я́ко арома́ты мирома́занную, му́чениче, свяще́нными твои́ми страда́ньми.

И ны́не и при́сно и во ве́ки веко́в. Ами́нь.

Богородичен: Бо́г челове́ком подобе́н бы́в из Тебе́, Младе́нец на́с ра́ди ражда́ется, Богоневе́сто, и пребыва́ет ве́сь неизме́нен, и во пло́ти ви́дится Бо́г вочелове́чивыйся.

Пе́снь 6.

Ирмос: Проро́ка Ио́ну подража́я, вопию́: живо́т мо́й, Бла́же, свободи́ из тли́ и спаси́ мя, Спа́се ми́ра, зову́ща: сла́ва Тебе́.

Припев: Священномучениче Игнатие, моли Бога о нас.

Яко вои́стинну Жела́теля возлюби́в неукло́нно и о́гнь и́же к Нему́ воспали́в разу́мне, Игна́тие, во́ду име́л еси́ в тебе́ живу́щую и глаго́лющую.

Припев: Священномучениче Игнатие, моли Бога о нас.

Свиде́тельство твоея́ со́вести исполня́я, не удово́лился еси́, зря́ звере́й стремле́ния, не устраши́лся еси́, я́коже пшени́ца хотя́ члено́вными сомле́тися.

Припев: Священномучениче Игнатие, моли Бога о нас.

До́лгая твоя́ гоне́ния и нереши́мыя у́зы, я́же в Ри́ме терза́ния и о́гнь гони́телей в ничто́же вменя́л еси́, священному́чениче, за твоего́ Рачи́теля.

Припев: Священномучениче Игнатие, моли Бога о нас.

Вельми́ горя́, страда́льче, любо́вию Христо́вою, ко огню́ искуше́ний я́ко на ро́су у́треннюю поте́кл еси́, Онаго пости́гнути су́що су́щаго Рачи́теля.

Сла́ва Отцу́ и Сы́ну и Свято́му Ду́ху:

Аще и пи́л еси́ Христо́ву ча́шу жажда́, но пре́был еси́ при́сно е́же пострада́ти, па́че е́же жи́ти. И вопия́л еси́: ничто́же мне́ сия́, ко е́же получи́ти мне́ е́же жи́ти.

И ны́не и при́сно и во ве́ки веко́в. Ами́нь.

Богородичен: Украси́ся, Вифлее́ме, угото́вися, Евфра́фо: без ма́тере бо от Отца́ и без отца́ Ма́терию чревоно́сится и ражда́ется, спаса́я ны́.

Конда́к, гла́с 3.

Све́тлых по́двиг твои́х светоно́сный де́нь предпропове́дует все́м в верте́пе Рожде́ннаго: Сего́ бо жажда́я от любве́ наслади́тися, потща́лся еси́ от звере́й снеде́н бы́ти, сего́ ра́ди и Богоно́сец наре́клся еси́, Игна́тие всему́дре.

Икос:

Авраа́м у́бо иногда́ сы́на жря́ше, закла́ние предвообража́я вся́ Содержа́щаго и ны́не в верте́пе тща́щагося роди́тися, ты́ же, богому́дре, всего́ прине́сл еси́ тебе́ сама́го, я́коже заколе́ние, и, звере́й сне́дь бы́в, пшени́ца чиста́ яви́лся еси́ Зижди́телю твоему́, в жи́тницах небе́сных ве́чнуяй вои́стинну и твоего́ раче́ния наслажда́яся. Его́же ра́ди ве́сь ми́р оста́вив, Богоно́сец наре́клся еси́, Игна́тие всему́дре.

Пе́снь 7.

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Припев: Священномучениче Игнатие, моли Бога о нас.

Не име́л еси́ огня́ любове́щна в тебе́, Игна́тие, во́ду же живу́ю па́че и глаго́лющую, во́ду зову́щую: гряди́ ко Отцу́; во́ду теку́щую, от жи́зни в жи́знь преводя́щую на́с.

Припев: Священномучениче Игнатие, моли Бога о нас.

Звере́й зу́бы, — глаго́лет, — да бу́дут мне́ ме́чь, и ору́жия, и закла́ния; гро́б же мне́ льво́вы утро́бы да бу́дут, и о́гнь да поя́ст мя́ пре́жде тли́ ко́жныя оста́нки.

Припев: Священномучениче Игнатие, моли Бога о нас.

Мне́ сладка́ сме́рть, — глаго́лет, — сладка́ мне́ вся́ трудо́в боле́зненная, зве́рие ра́достни, о́гнь се́й роса́ мне́ е́сть, а́ще еже́ жи́ти воздержу́. Те́мже и тщу́ся умре́ти, да живу́ со Христо́м.

Сла́ва Отцу́ и Сы́ну и Свято́му Ду́ху:

Еже жи́ти мне́ не е́сть рачи́тельно в телеси́, ду́хом бо жи́ти жела́ю. Мне́ е́же жи́ти Христо́с, Боже́ственное рачи́тельство; к Нему́ иду́, Того́, — глаго́лет, — люблю́, Того́ получи́ти наде́юся.

И ны́не и при́сно и во ве́ки веко́в. Ами́нь.

Богородичен: Проро́ком дре́вле прорече́нный, приближа́ется мне́ Младе́нец, из Де́вы рожде́йся, ра́дуется Ада́м, и прама́ти Ева боле́зней разреши́ся, и сликовству́ет Дави́д, Ражда́ющия оте́ц.

Пе́снь 8.

Ирмос: Его́же ужаса́ются Ангели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Припев: Священномучениче Игнатие, моли Бога о нас.

Пе́т бу́ди Игна́тий, Боже́ственный иере́й, сугу́бо венча́емь, я́ко му́ченик и па́стырь: страда́в бо се́й за любо́вь Бо́жию, жела́я возжеле́н бы́ти, пострада́ти не отмета́шеся.

Припев: Священномучениче Игнатие, моли Бога о нас.

Тече́нии ве́ры, я́ко со́лнце, зе́млю до́блественне прете́кл еси́ от коне́ц небесе́ и, заше́д незаходи́мо от земли́ ко Христу́, облистава́еши ми́ру све́т нетле́ния.

Припев: Священномучениче Игнатие, моли Бога о нас.

Жажда́я ча́ши стра́сти Христо́вы, свя́зан, те́кл еси́, Игна́тие му́дре, и дости́г три́знища, не преста́л еси́, вопия́: жа́жду жажда́ти Христа́ во ве́ки.

Припев: Священномучениче Игнатие, моли Бога о нас.

О, любве́ и теплоты́ Боже́ственнаго раче́ния! Жела́нием распя́тся и да живе́т Рачи́телю; жа́ждет, е́же возжажда́тися, и лю́бит, е́же люби́тися, за е́же па́ки жи́ти, умре́ти произволя́я.

Сла́ва Отцу́ и Сы́ну и Свято́му Ду́ху:

Пе́рсть отложи́в, невеще́ственно к Су́щему у́м впери́л еси́, жела́я Рачи́теля: То́й бо е́сть при́сное жела́ние, и и́стинно му́дрость, и жи́знь бы́вших.

И ны́не и при́сно и во ве́ки веко́в. Ами́нь.

Богородичен: Звезда́ возсия́, Христо́с от Иа́кова, и волсви́ стека́ются во гра́д Вифлее́м пе́ти, чествова́ти и поклони́тися Ему́, рожде́нному из ложе́сн Чи́стыя Богоро́дицы.

Песнь 9

Ирмос: Живоприе́мный исто́чник приснотеку́щий, светоно́сный свети́льник благода́ти, хра́м одушевле́нный, се́нь пречи́стую, небесе́ и земли́ простра́ннейшую, Богоро́дицу, ве́рнии, велича́ем.

Припев: Священномучениче Игнатие, моли Бога о нас.

Презира́тель до́льних Игна́тий и служи́тель вы́шних та́ин, я́ко слу́жбу непоро́чну соверша́я, и, соверша́емь, священноде́йствует себе́ сама́го муче́нием, и к звере́м и огню́ гото́вится.

Припев: Священномучениче Игнатие, моли Бога о нас.

Еже по о́бразу любя́ оде́ятися, ве́тхия о́бразы измени́л еси́. Те́мже но́востию, а не ве́тхостию первообра́знаго зра́ка пе́рвую добро́ту восприе́м, Христо́ви соводворя́ешися.

Припев: Священномучениче Игнатие, моли Бога о нас.

Свяще́нную твою́ оде́жду, свяще́ннейше, свяще́ннейшу соде́лал еси́ страда́ньми твои́ми, те́мже и вене́ц сугу́б восприе́м, с му́ченики пое́ши и па́стыри, священному́чениче, Христа́ Бо́га на́шего.

Припев: Священномучениче Игнатие, моли Бога о нас.

Пшени́ца Бо́жия чиста́ е́смь, — глаго́лал еси́, — и зубы́ звере́й мелю́ся, да хле́б бу́ду священносоверша́емь, Рачи́телю и Бо́гу очище́н, Его́же и любя́, умре́ти не отрица́юся.

Сла́ва Отцу́ и Сы́ну и Свято́му Ду́ху:

Непристу́пным све́том осиява́емь и в вы́шних оби́телех водворя́яся, свяще́нне Игна́тие, Бо́гу и Зижди́телю твоему́ о ста́де твое́м се́м моля́ся неоску́дно не преста́й, мо́лимся.

И ны́не и при́сно и во ве́ки веко́в. Ами́нь.

Богородичен: Ра́дуйся, Чи́стая, Бо́жий гра́де одушевле́нный, в не́мже Бо́г вмести́тися благоволи́, не оста́вль бо го́рних, к Тебе́ сни́де, я́ко до́ждь на зе́млю, Богороди́тельнице, и во гра́де Вифлее́ме Младе́нец ражда́ется.

Свети́лен.

Сло́во Пребезнача́льное, Бо́жия Му́дрость, неизрече́нною бла́гостию земны́м приобщи́вся, уча́ дре́вле лю́ди, на рука́х держа́ше тя́, Игна́тие Богоно́се; в Бо́зе же жи́в, муче́ние проше́л еси́ страда́ния, радуяся.

Стихи́ра гла́с 6.

Приближа́ется Христо́с, / Вифлее́ме, предугото́вися, / уже́ язы́ков спасе́ние озаря́ет, / благоукраси́ я́сли, / па́стыри собери́, / призови́ волхвы́ от Перси́ды, / во́инства безпло́тных умо́в, воззови́те: / Ца́рь небе́с / на зе́млю прихо́дит.

Молитва священномученику Игнатию Богоносцу

О, вели́кий святи́телю Богоно́сный Игна́тие! К тебе́ припа́даем и мо́лим тя, при́зри на ны гре́шныя, прибега́ющия к твоему́ заступле́нию! Умоли́ Го́спода, да прости́т нам вся согреше́ния на́ша: ты му́ченически ду́шу твою́ за ве́ру положи́л еси́, да́руй и нам му́жество во всем подража́ти тебе́. Ничто́ в жи́зни не возмогло́ отлучи́ти тя от любве́ ко Го́споду, ни ле́стныя обеща́ния, ни преще́ния, ни угро́зы, ниже́ са́мыя му́ки: ты с ра́достию предста́л пред зверьми́ на смерть лю́тую и, я́ко а́нгел, возлете́л еси́ во оби́тели Отца́ на́шего Небе́снаго; и моли́тва твоя́ мно́го мо́жет пред Го́сподем. Бу́ди же, святы́й уго́дниче, предста́телем у Го́спода: за ны, недосто́йнии рабы́ твоя́; помога́й и всем правосла́вным христиа́ном святы́ми твои́ми моли́твами ко всемогу́щему Бо́гу, да изба́вит ны от гла́да, тру́са, гра́да, бездо́ждия и смертоно́сных боле́зней, и да да́рует нам здр́авие и спасе́ние. Бу́ди же нам помо́щник ско́рый во вся́кой ско́рби, наипа́че в час кончи́ны на́шея яви́ся нам све́тлым защи́тником и хода́таем и умоли́ Го́спода сподо́битися всем нам, тебе́ ны́не те́пле моля́щимся, получи́ти по христиа́нской кончи́не Небе́сное Ца́рствие, иде́же вси святи́и вку́пе с тобо́ю ве́чно сла́вят Отца́ и Сы́на и Свята́го Ду́ха. Ами́нь.

Молитва вторая священномученику Игнатию Богоносцу

О, велики́й уго́дниче Христо́в, священному́чениче Игна́тие! При́зри ми́лостивым твои́м о́ком и простри́ ко Го́споду те́плыя твоя́ моли́твы, и испроси́ душа́м на́шим оставле́ние прегреше́ний. Се бо мы, раби́ Бо́жии (Имена), се́рдцем сокруше́нным и ду́хом смире́нным тебе́, хода́тая ми́лостива ко Влады́це и моли́твенника за ны, гре́шныя, призыва́ем, тебе́ у́бо про́сим: не пре́зри нас недосто́йных, твоея́ по́мощи тре́бующих, и исхода́тайствуй нам вся ко спасе́нию поле́зная, я́ко да получи́вше благода́ть и ми́лость, просла́вим всех благи́х Исто́чника и Дарода́теля, Бо́га Еди́наго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святому священномученику Игнатию Богоносцу