2 января.

Канон святителю Даниилу, архиепископу Сербскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Чу́до яви́ся извеще́ния, дела́ми доброде́телей Бо́жиих возсия́л еси́, мона́шествующих ли́ки упа́сл еси́, архиере́йская седа́лища утверди́л еси́, ерети́ческаго нападе́ния не усумне́вся, Це́рковию Христо́вою управля́я, преподо́бне о́тче, Дании́ле прему́дре, усну́в, я́ко спя́, те́ло же твое́ це́ло и нетле́нно соблюде́но бы́сть, и подае́т цельбы́ боля́щим от разли́чных неду́гов, и де́моны прогоня́ет. Сего́ ра́ди мо́лим тя́: моли́ спасти́ся душа́м на́шим.

Стихи́ра, гла́с 6:

Егда́ преставле́ние честна́го твоего́ те́ла, о́тче, приспе́, тогда́ мно́жество ве́рных, обступи́вше о́др тво́й, уми́льно провожда́ху тя́, и, зря́ще тя́ благословя́ща, лю́ди удивля́хуся. Ца́рь же Душа́н со слеза́ми вопия́ше: о влады́ко, что́ ти́ возда́м за богове́дение, е́же на́м дарова́л еси́, прие́мь благода́ть от Бо́га? Те́мже, святи́телю Дании́ле, моли́ся приле́жно Христу́ Бо́гу и Пресвяте́й Богоро́дице, да призира́ет на на́с неотсту́пно пречи́стым Свои́м чудотво́рным о́бразом, и́мже ты́ хра́м украси́л еси́, оте́честву и ста́ду своему́ непоколеби́мый сто́лп оставля́я. Твои́ми моли́твами да спасе́мся.

Кано́н свято́му Дании́лу, гла́с 1.

Пе́снь 1.

Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Святителю отче Данииле, моли Бога о нас.

Отче богому́дре, святи́телю Дании́ле, отве́рзи моя́ недосто́йная уста́ воспева́ти тя́ и приими́, я́ко благово́нное кади́ло, от убо́жества моего́, е́же тебе́ принесо́х недосто́йный а́з. [Дважды.]

Припев: Святителю отче Данииле, моли Бога о нас.

Воспои́м вси́ вели́каго святи́теля Дании́ла, почти́м засту́пника и утвержде́ние земли́ Се́рбския, его́же дарова́ Госпо́дь оби́тели собо́рной храни́теля бо́дра.

Припев: Святителю отче Данииле, моли Бога о нас.

Спаси́тельным Христо́вым за́поведем после́довал еси́, прему́дре святи́телю Дании́ле, вдо́в и сиро́т бы́л еси́ предста́тель и земли́ Се́рбстей вели́кое защище́ние.

Припев: Святителю отче Данииле, моли Бога о нас.

Вели́кий ны́не Дании́л, па́стырь Це́ркве собо́рныя, па́стыри вку́пе и пасо́мыя и всю́ Це́рковь в па́мять свою́ призыва́ет. Те́мже, собра́вшеся, торжеству́им све́тло в де́нь па́мяти его́.

Припев: Святителю отче Данииле, моли Бога о нас.

Благода́ть Ду́ха прие́м, о́тче, во свое́ се́рдце, Христо́в святи́телю, уясни́ язы́к и се́рдце просвети́ твои́х певце́в, е́же святу́ю твою́ па́мять воспе́ти све́тло, Дании́ле преподо́бне.

Сла́ва Отцу́ и Сы́ну и Свято́му Ду́ху:

Аще и побежда́ют твоя́ исправле́ния словеса́ на́ша и помышле́ния, о́тче Дании́ле, оба́че душе́вное на́ше предложе́ние, по си́ле прино́симое тебе́, приими́ с любо́вию, досточу́дне, е́же бо по досто́инству пе́сни тебе́ соплести́ невозмо́жно е́сть на́м.

И ны́не и при́сно и во ве́ки веко́в. Ами́нь.

Богородичен: Пречи́стая Богоро́дице, Соде́теля и Спа́са ро́ждши, спаси́ от бе́д гра́д тво́й, непреста́нно моля́щи Сы́на Твоего́ и Бо́га на́шего за ны́.

Пе́снь 3.

Ирмос: Ка́мень, его́же небрего́ша зи́ждущии, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́с, ю́же от язы́к искупи́.

Припев: Святителю отче Данииле, моли Бога о нас.

Ты́ прояви́л еси́, Влады́ко, в после́днем ро́де на́шем святи́теля вели́каго Са́вву, и́же просвети́ свое́ оте́чество со святи́тели и архиере́и, ему́же после́дует Дании́л, цве́т пречу́дный. [Дважды.]

Припев: Святителю отче Данииле, моли Бога о нас.

Тебе́ прикосну́выйся, свя́те, су́щему в честне́м гро́бе твое́м, исцеле́ние получи́ти сподо́бися: рука́м бо того́, к пе́рсем согбе́нным, Бо́жиею благода́тию дае́ши простира́тися.

Припев: Святителю отче Данииле, моли Бога о нас.

Сокруши́ ага́ряны и вся́ сопоста́ты безбо́жныя, преподо́бне Дании́ле, моле́нием твои́м к Творцу́ и Бо́гу на́шему, и си́лу и́х, борю́щую на ны́, не́мощну покажи́, и покори́ и́х благове́рному кня́зю на́шему.

Припев: Святителю отче Данииле, моли Бога о нас.

Смире́н яви́лся еси́, кро́ток же и ти́х, Дании́ле, отону́дуже Ду́ха благода́ть, оби́льне излия́вшися на тя́, вели́ка показа́ тя́, чуде́с луча́ми зе́млю на́шу осиява́юща. [Дважды.]

Сла́ва Отцу́ и Сы́ну и Свято́му Ду́ху:

Жезло́м воздержа́ния страсте́й мо́ре раздели́в, блаже́нне, я́ко Моисе́й, на безстра́стия го́ру возше́л еси́ и, прие́м мы́сленныя скрижа́ли, па́ству твою́ научи́л еси́ зако́ну Христо́ву.

И ны́не и при́сно и во ве́ки веко́в. Ами́нь.

Богородичен: Бу́ди ми́, Де́во, прибе́жище и приста́нище, стена́ необори́мая и засту́пница, Бо́га пло́тию ро́ждшая, Пречи́стая, Изба́вителя Всеще́драго и Спа́са пою́щих Тя́, Богоневе́стная.

Седа́лен свято́му, гла́с 4:

Свети́льник светосия́нен яви́лся еси́ земли́ Се́рбстей, просвеща́яй блиста́ньми боже́ственных твои́х слове́с ве́рных помышле́ния, святи́телю о́тче Дании́ле. Те́м вси́ свяще́нную твою́ и боже́ственную па́мять дне́сь ра́достно соверша́ем.

Пе́снь 4.

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том — позна́ешися, внегда́ приити́ вре́мени — пока́жешися. Сла́ва си́ле Твое́й, Го́споди.

Припев: Святителю отче Данииле, моли Бога о нас.

Благода́тию Ду́ха пома́зался еси́, архиере́е всеизря́дне Дании́ле, во Христа́ бо оде́яся жития́ ра́ди чи́стаго, те́м научи́л еси́ сла́вити в Тро́ице Еди́наго Бо́га.

Припев: Святителю отче Данииле, моли Бога о нас.

Изба́ви твое́ ста́до от бу́рь греха́, преподо́бне святи́телю Дании́ле, бе́д же и скорбе́й, приводя́ ны в приста́нища ти́хая Боже́ственныя во́ли Христо́вы.

Припев: Святителю отче Данииле, моли Бога о нас.

Христо́в яви́лся еси́ уго́дник, о́тче преподо́бне Дании́ле, преосвяще́нне архиере́е. Те́м моля́ся непреста́й ко Го́споду от напа́стей, бе́д и скорбе́й изба́вити ста́до твое́ от искуше́ний.

Припев: Святителю отче Данииле, моли Бога о нас.

Умертви́ мудрова́ние, прему́дре, пло́ти моея́ неисце́льное и к боже́ственным стезя́м наста́ви ны́, я́ко кре́пок и си́лен, зако́ном же благи́м повини́ мя, блаже́нне, и раба́ покажи́ мя Христо́ва, порабоще́нна лю́тыми страстьми́.

Припев: Святителю отче Данииле, моли Бога о нас.

Сна́ очесе́м твои́м и дрема́ния ве́ждома не да́л еси, до́ндеже обре́те ме́сто поко́йно се́рдце твое́, о́тче. Те́м, очи́стившеся досто́йне, узре́ жили́ще сла́вы все́х Соде́теля, Царя́ и Бо́га ве́чнаго. [Дважды.]

Сла́ва Отцу́ и Сы́ну и Свято́му Ду́ху:

Ве́сь у́бо у́м впери́в к высоте́ и земна́я ни во что́же вмени́в, смире́нием, достоблаже́нне Дании́ле, высо́кая прия́л еси́.

И ны́не и при́сно и во ве́ки веко́в. Ами́нь.

Богородичен: Ка́я Сия́, я́ко вои́стинну бли́з Бо́га, я́ко превозше́дшая вся́ Ангельския чи́ны, Еди́на, добро́тою де́вства сия́ющи, я́ко Ма́ти Вседержи́теля?

Пе́снь 5

Ирмос: Тво́й ми́р да́ждь на́м, Сы́не Бо́жий, ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Припев: Святителю отче Данииле, моли Бога о нас.

Окрест стоя́ще ра́ки твоея́, святи́телю преподо́бне Дании́ле, име́ем тя́ хода́тая к Бо́гу и заступле́ние земли́ Се́рбстей, утвержде́ние же незы́блемое.

Припев: Святителю отче Данииле, моли Бога о нас.

Ми́лостив бы́в убо́гим, ми́лость душе́вную испроси́, прехва́льне, ми́лостынею бо стяжа́л еси́, о́тче Дании́ле, свещу́ и ту́ю све́тло украси́л еси́.

Припев: Святителю отче Данииле, моли Бога о нас.

Жили́ще бы́л еси́ Свята́го Ду́ха вои́стинну, блаже́нне Дании́ле, и того́ явле́ньми разбогате́л еси́ до́бре Боже́ственными дарми́.

Припев: Святителю отче Данииле, моли Бога о нас.

Кро́ток яви́лся еси́ ку́пно и смире́н де́лом и сло́вом и си́м вся́ к себе́ привле́кл еси́, любо́вию же и до́брыми делми́ вся́ укроти́л еси́ и сердца́ возвесели́л еси́ твои́ми чудеса́ми. [Дважды.]

Припев: Святителю отче Данииле, моли Бога о нас.

Вели́кий Па́стырь все́х Христо́с ове́ц Свои́х па́стыря тя́, блаже́нне, показа́ и учи́теля слове́сных. Те́мже заблужда́ющаго мя́ на гора́х поги́бели, я́ко па́стырь, твоего́ овча́те взыщи́.

Сла́ва Отцу́ и Сы́ну и Свято́му Ду́ху:

Яко вели́кое бога́тство твои́х щедро́т яви́ся в земли́ на́шей безчи́сленное проли́тие ми́лости твоея́, слуго́ Христо́в: ты́ бо прося́щим су́щая подае́ши и ты́я насы́тити тщи́шися твои́м предложе́нием, блаже́нне.

И ны́не и при́сно и во ве́ки веко́в. Ами́нь.

Богородичен: Мѵ́ро Тя́ имену́ем, Пречи́стая, я́ко ро́ждшую Бо́га пло́тию и благода́тное мѵ́ро точа́щую все́м, притека́ющим под кро́в Тво́й.

Пе́снь 6.

Ирмос: Проро́ка Ио́ну подража́я, вопию́: живо́т мо́й, Бла́же, свободи́ из тли́ и спаси́ мя, Спа́се ми́ра, зову́ща: сла́ва Тебе́.

Припев: Святителю отче Данииле, моли Бога о нас.

Житие́ твое́ целому́дренно соверши́л еси́, священноявле́нне, пра́вдою украси́вся и му́жеством смы́сла доброде́тели сочета́в себе́, преблаже́нне святи́телю Дании́ле.

Припев: Святителю отче Данииле, моли Бога о нас.

Храни́ гра́д тво́й, святи́телю Дании́ле преблаже́нне, от безбо́жных и чужеве́рных нахожде́ний и от междоусо́бныя бра́ни. Моли́ся же непреста́нно Влады́це Христу́ и Пресвяте́й Богоро́дице, е́же ми́р дарова́ти па́стве свое́й.

Припев: Святителю отче Данииле, моли Бога о нас.

Ты́ у́бо и по сме́рти сла́вимь, я́ко жи́в, чудоде́йствуеши. Немощны́м бо сляче́нным дае́ши исцеле́ние Боже́ственною благода́тию, зане́ глаго́лет Госпо́дь: прославля́ющаго Мя́ просла́влю.

Припев: Святителю отче Данииле, моли Бога о нас.

Испо́лнился еси́ светоявле́ния, Дании́ле му́дре, я́ко храни́тель за́поведей Христо́вых, очище́н же от страсте́й, бы́л еси́ вои́стинну жили́ще Пребоже́ственныя Тро́ицы.

Припев: Святителю отче Данииле, моли Бога о нас.

Му́жие свяще́ннии ра́достно с наро́дом дне́сь твою́, о́тче, па́мять пра́зднующе, торжеству́ют, и́мже согла́сно и́стиннии безмо́лвницы и про́стии вси́ о́бще тя́ воспева́ют, предста́теля вку́пе и учи́теля. [Дважды.]

Сла́ва Отцу́ и Сы́ну и Свято́му Ду́ху:

Ти́ну страсте́й от души́ оттря́сл еси́, Дании́ле, низложи́в вся́кое по́мыслов возноше́ние, на Христа́ превознося́щееся.

И ны́не и при́сно и во ве́ки веко́в. Ами́нь.

Богородичен: Сове́та преве́чнаго хра́м воздви́гл еси́, святи́телю, архистрати́га Гаврии́ла ра́достное провеща́ние Богоро́дице вседне́вно воспева́я: ра́дуйся, Неве́сто неневе́стная.

Конда́к, гла́с 8:

Возбра́нному и ди́вному на́шея земли́ свети́льнику дне́сь любо́вию притека́ем и пе́снь тебе́, богоно́се, плете́м, я́ко иму́щему дерзнове́ние ко Го́споду: изба́ви на́с от многообра́зных обстоя́ний, да зове́м ти́: ра́дуйся, утвержде́ние оте́честву на́шему и вели́кий покрови́телю оби́тели своея́.

Икос:

Вели́кий свети́льник яви́лся еси́ ро́ду се́рбскому, струя́ми слове́с твои́х ве́рныя просвеща́я и всеусе́рдно приходя́щим к тебе́ исцеле́ния подава́я. Христо́вы бо лю́ди, богоно́се, неви́димо посеща́еши и те́м зе́млю на́шу просвеща́еши, сего́ ра́ди согла́сно зове́м ти́ си́це: ра́дуйся, све́та безстра́стнаго до́ме; ра́дуйся, страсте́й те́мных прогони́телю; ра́дуйся, де́монския разруши́вый ко́зни; ра́дуйся, Ангельския возвесели́вый чи́ны; ра́дуйся, высото́ боговиде́ния чи́стаго; ра́дуйся, глубино́ смире́ния, боле́зни омыва́ющая; ра́дуйся, я́ко бы́л еси́ зри́тель неви́димых; ра́дуйся, я́ко сообщи́лся еси́ ли́ку святи́телей; ра́дуйся, земли́ Се́рбския па́стырю и учи́телю; ра́дуйся, святи́телем изря́дная похвало́; ра́дуйся, я́ко тебе́ ра́ди посла́ Бо́г в оби́тель твою́ чудотво́рный о́браз Ма́тере Своея́; ра́дуйся, я́ко тебе́ ра́ди пресвята́я чудотво́рная ико́на Ма́тере Бо́жия сла́вится; ра́дуйся, я́ко украша́еши престо́л первосвяти́телей се́рбских; ра́дуйся, утвержде́ние ро́ду се́рбскому.

Пе́снь 7.

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Припев: Святителю отче Данииле, моли Бога о нас.

Отве́рзи ми́ две́ри покая́ния, преблаже́нне архиере́е Дании́ле, да омы́ю скве́рну окая́нныя моея́ души́, мое́ те́ло, и вся́ чу́вства, и со́весть, во е́же пе́ти Бо́гу: отце́в Бо́же, благослове́н еси́.

Припев: Святителю отче Данииле, моли Бога о нас.

Имамы тя́ засту́пника те́пла, твои́ раби́, и сте́ну необори́му Це́ркве твоея́, и утвержде́ние ро́ду се́рбскому, не бои́мся враго́в и супоста́тов, но побежда́ем ты́я си́лою чудотво́рныя ико́ны, пою́ще: Христе́, Богоро́дицею благослове́н еси́.

Припев: Святителю отче Данииле, моли Бога о нас.

Уста́вы оте́ческия утверди́л еси́, му́дре, и це́рковь Пресвяты́я Бо́жия Ма́тере чудотво́рным о́бразом украси́л еси́, и свяще́нства ле́потою прекра́сну устро́ил еси́, уче́ньми же твои́ми лю́ди наказа́л еси́ пе́ти: Бо́же, Богоро́дицею благослове́н еси́. [Дважды.]

Припев: Святителю отче Данииле, моли Бога о нас.

Земля́ на́ша и страна́ согла́сно, о́тче, поуче́ния твоя́ возвеща́ет, науче́нна тобо́ю пе́ти всю́ду Христа́: отце́в на́ших Бо́же, благослове́н еси́.

Припев: Святителю отче Данииле, моли Бога о нас.

Жени́х, красе́н добро́тою па́че все́х сыно́в челове́ческих, я́коже пи́сано е́сть, неве́сте, блаже́нне, Свое́й Це́ркви, красне́йша тя́ показа́ жениха́, Того́ нося́ща о́браз и подо́бие.

Сла́ва Отцу́ и Сы́ну и Свято́му Ду́ху:

Украси́в свое́ житие́ ми́лостынею и кро́тостию, любо́вию же и и́стиною, подража́тель показа́лся еси́ изря́дный Па́стыря до́браго, избра́в Того́ доброде́тели до́бре.

И ны́не и при́сно и во ве́ки веко́в. Ами́нь.

Богородичен: Прихо́дит Влады́ка во верте́п роди́тися, я́ко Челове́к. Предусря́щим, ве́рнии, Де́ву Чи́стую, воспева́юще Ей ра́достно: ра́дуйся, ми́ру ра́досте; ра́дуйся, Де́во, Ма́ти Христо́ва.

Пе́снь 8.

Ирмос: Его́же ужаса́ются Ангели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Припев: Святителю отче Данииле, моли Бога о нас.

Побежде́н бы́в от врага́ прегреше́ньми мно́гими и от мо́лв жите́йских, прихожду́ с ве́рою и, я́ко Манасси́я, в покая́нии вопию́ Ти, Христе́: Го́спода по́йте, дела́, и превозноси́те Его́ во ве́ки.

Припев: Святителю отче Данииле, моли Бога о нас.

Моли́твы, преблаже́нне, и моле́ния твори́ приле́жно к Бо́гу при́сно за рабы́ твоя́, в печа́лех засту́пника бо и побо́рника тя́ иму́ще, спаса́емся от бе́д, Го́спода пою́ще и превознося́ще во вся́ ве́ки. [Дважды.]

Припев: Святителю отче Данииле, моли Бога о нас.

Вооружа́ются на лю́ди твоя́ смире́нныя, святи́телю пречестны́й о́тче Дании́ле, сы́нове ага́рянстии; сокруши́ и́х неви́димою си́лою моли́тв твои́х ко Влады́це и Богоро́дице на́с ра́ди, Го́спода пою́щих и превознося́щих во вся́ ве́ки.

Припев: Святителю отче Данииле, моли Бога о нас.

Окорми́ моли́твою твое́ю па́ству сию́ многочелове́чную твою́ и уста́ви бу́рю ветро́в проти́вных, чу́вственных и мы́сленных, моли́твами твои́ми, изба́ви же вся́ких искуше́ний и смуще́ний и да́же до конца́ неврежде́нну сохрани́.

Припев: Святителю отче Данииле, моли Бога о нас.

Неизрече́нное твое́ чадолю́бие, о́тче, превосходя́щее оте́ческую любо́вь, посеща́ет на́с всегда́ твои́ми моли́твами, испроша́я на́м спасе́ние и подава́я на́м с ти́хостию, Дании́ле, ра́доватися.

Сла́ва Отцу́ и Сы́ну и Свято́му Ду́ху:

Возду́х у́бо освяти́ся благово́нием моще́й твои́х, Дании́ле, прему́дре Христо́в святи́телю, Це́рковь же, веселя́щися, вопие́т: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Звезда́ возсия́ — Христо́с от Иа́кова, и волсви́ стека́ются во гра́д Вифлее́м пе́ти, че́ствовати и поклони́тися Ему́, рожде́нному из ложе́сн Чи́стыя Богоро́дицы.

Песнь 9

Ирмос: Живоприе́мный исто́чник приснотеку́щий, светоно́сный свети́льник благода́ти, хра́м одушевле́нный, се́нь пречи́стую, небесе́ и земли́ простра́ннейшую, Богоро́дицу, ве́рнии, велича́ем.

Припев: Святителю отче Данииле, моли Бога о нас.

Яко блудни́ца, и разбо́йник, и мыта́рь вопию́ Ти от се́рдца, Христе́: согреши́х, прости́ мне́, Влады́ко, мно́гая моя́ согреше́ния и изба́ви мя́ от вся́каго гне́ва, Твоего́ святи́теля моли́твами, я́ко да Тя́ непреста́нно велича́ю.

Припев: Святителю отче Данииле, моли Бога о нас.

Прииди́те, собери́теся, вси́ се́рби, ко блаже́ннаго святи́теля Дании́ла гро́бу и со слеза́ми возопи́йте к Бо́гу: изба́ви, Го́споди, от бе́д лю́ди Твоя́, да Тя́ велича́ем во ве́ки.

Припев: Святителю отче Данииле, моли Бога о нас.

Вельми́ ра́дуется о тебе́, пречестны́й о́тче, святи́телю Дании́ле, ро́д тво́й, помо́щника и засту́пника тя́ име́я, и ны́не, влады́ко, не отходи́ ду́хом от на́с, моли́тву творя́ за ны́ ко Го́споду Бо́гу и Пресвяте́й Богоро́дице, я́ко да изба́вит на́с от наси́лия безбо́жных ага́рянов, враго́в на́ших, да тя́ всегда́ велича́ем.

Припев: Святителю отче Данииле, моли Бога о нас.

Сла́ву твою́ воспе́ти по досто́инству невозмо́жно, чудеса́ бо премно́га и исцеле́ния оби́льно подае́ши с те́плою ве́рою приходя́щим к тебе́, Дании́ле святи́телю, похвало́ земли́ на́шея.

Припев: Святителю отче Данииле, моли Бога о нас.

Положи́ тебе́ Це́ркве Своея́ основа́ние Христо́с и столпа́, кре́пка и незы́блема во ве́к, соблюда́юща оби́тель твою́ до конца́ от враго́в. [Дважды.]

Сла́ва Отцу́ и Сы́ну и Свято́му Ду́ху:

Святи́телие у́бо, ца́рие и кня́зи, сано́вницы и вси́ лю́дие, му́жие и же́ны, ста́рцы с младе́нцами, и вся́к во́зраст, и вся́кое досто́инство, святи́теля на́шего па́мять све́тло да пра́зднуим.

И ны́не и при́сно и во ве́ки веко́в. Ами́нь.

Богородичен: Украси́ся, Вифлее́ме, гото́вися, Евфра́фо: без ма́тере бо от Отца́ и без отца́ Ма́терию чревоно́сится и ражда́ется, спаса́я на́с.

Свети́лен свято́му:

Ду́х Святы́й пома́за тя́, святи́телю Дании́ле блаже́нне, Христо́ву па́ству пасти́ на па́житех спаси́тельных. Те́м и потща́лся еси́ наставля́ти лю́ди пра́выми стезя́ми, того́ ра́ди ны́не сугу́быя венцы́ от Венцеда́вца прия́л еси́.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Данииле, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.