29 января.

Канон преподобному Ромилу Раваничкому, Синаиту.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 8:

Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто́ трудо́в уплодоноси́л еси́, и бы́л еси́ свети́льник вселе́нней, сия́я чудесы́, Роми́ле о́тче на́ш, моли́ Христа́ Бо́га спасти́ся душа́м на́шим.

Велича́ние:

Ублажа́ем тя́, преподо́бне о́тче Роми́ле, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 6:

Преподо́бне о́тче Роми́ле, во всю́ зе́млю изы́де веща́ние исправле́ний твои́х. Те́м на небесе́х обре́л еси́ мзду́ трудо́в твои́х, де́монския погуби́л еси́ полки́ и Ангельския дости́гл еси́ чи́ны, и́хже житию́ без поро́ка поревнова́л еси́, дерзнове́ние име́я ко Христу́ Бо́гу, ми́р испроси́ душа́м на́шим.

Кано́н преподо́бнаго, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподобне отче Ромиле, моли Бога о нас.

Бо́жий Сло́ве, всеси́льную да́руй ми́ и све́тлую Ду́ха благода́ть ко отверзе́нию у́ст мои́х, я́ко да по́двиги Твоего́ уго́дника воспою́ и боле́зненная страда́ния, и́миже на земли́ Тя́ просла́ви.

Припев: Преподобне отче Ромиле, моли Бога о нас.

Отче блаже́нне, ты́ Кре́ст Христо́в на ра́мо взе́м, и земна́го вся́каго пристра́стия вне́ бы́в, Христу́ после́довал еси́, взыва́я: всле́д Тебе́ теко́х в воню́ мѵ́ра, Влады́ко.

Сла́ва Отцу́ и Сы́ну и Свято́му Ду́ху:

Жела́я получи́ти, и́хже ны́не наслажда́ешися преизря́дно, и того́ ра́ди еще́ в жи́зни се́й па́че челове́ка подвиза́лся еси́, я́же получи́ти и на́м, моли́ Христа́, почита́ющим честну́ю па́мять твою́, досточу́дне.

И ны́не и при́сно и во ве́ки веко́в. Ами́нь.

Богородичен: Иису́с преднарече́нный, Бо́жие Сло́во, с небесе́ сни́де, я́ко да от го́рькаго мучи́тельства на́с изба́вит, и пло́тию оде́яся от Пречи́стыя Де́вы, Юже соблюде́ нетле́нну по рождестве́ и непоро́чну.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Преподобне отче Ромиле, моли Бога о нас.

Еще́ на земли́ пребыва́я, Бо́га просла́вил еси́, о́тче, чудесы́ вся́кими и разли́чными си́лами, Иже тя́ светле́йше возвели́чи ны́не на небесе́х.

Припев: Преподобне отче Ромиле, моли Бога о нас.

Самуи́ла Освяти́вый пре́жде рождества́, и тя́ освяти́, преподо́бне Роми́ле, и показа́ тя́ во иере́ех, я́коже Моисе́я и Ааро́на, призыва́ющих Его́ Боже́ственное и́мя.

Сла́ва Отцу́ и Сы́ну и Свято́му Ду́ху:

Ты́, я́ко да приобря́щеши боже́ственный и многоце́нный би́сер — Христа́, ополчи́лся еси́ к нача́лом и ко власте́м, к духово́м лука́вствия поднебе́сным.

И ны́не и при́сно и во ве́ки веко́в. Ами́нь.

Богородичен: О, кто́ от земноро́дных изрече́т, Богоро́дице Мари́е, или́ ки́й язы́к послужи́ти возмо́жет е́же в Тебе́ та́инству? Стра́шно е́сть вои́стинну, Всепе́тая Де́во, Яже пре́жде ве́к Су́щаго под ле́ты родила́ еси́.

Седа́лен, гла́с 8:

Зако́ну Госпо́дню ты́ научи́вся, я́ко фи́никс процве́л еси́, о́тче преподо́бне, ве́рных ду́ши ра́дости неизрече́нныя исполня́я и ли́ца и́х уясня́я. Те́мже, соше́дшеся дне́сь, воспева́ем тя́ и ве́рою мо́лимся: богоно́се Роми́ле, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Сла́ва, и ны́не, богоро́дичен, гла́с то́йже:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Всечи́стая, моли́ся приле́жно из Тебе́ Воплоще́нному безсе́менно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти, воспева́ющим досто́йно сла́ву Твою́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподобне отче Ромиле, моли Бога о нас.

Все́ мо́ре иногда́ потреби́ти хваля́йся сатана́ вселука́вый, твои́ми нога́ми сокруше́н бы́ти паде́нием зри́тся. На тве́рдом бо ка́мени Христа́ ты́ утверди́вся, богоглаго́ливе, куми́ры Вавило́нския сокруши́л еси́.

Припев: Преподобне отче Ромиле, моли Бога о нас.

Еди́нственному Существу́ Пресу́щественному и Трисве́тлому преда́лся еси́ раче́нием, превзя́вся от земны́х Боже́ственным жела́нием, и све́т вторы́й показа́лся еси́, пожи́в па́че естества́ и су́щих в ми́ре про[с]веща́я.

Сла́ва Отцу́ и Сы́ну и Свято́му Ду́ху:

Ны́не вои́стинну не в гада́нии, но чи́сте лице́м к Лицу́ богосия́нно зри́ши сла́ву Трисо́лнечнаго Божества́, Его́же ми́лостива на́м сотвори́ в де́нь су́дный, небрего́мо житие́ ижди́вшим.

И ны́не и при́сно и во ве́ки веко́в. Ами́нь.

Богородичен: С небесе́ сни́де на зе́млю Зижди́тель мо́й и пло́ть мою́ восприя́ кроме́ греха́, и поноше́ния вся́кия, и коне́чно сме́рть претерпе́ мене́ ра́ди, Его́же благопреме́нна сотвори́ ми́, Влады́чице.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобне отче Ромиле, моли Бога о нас.

Но́вый Моисе́й показа́лся еси́, досточу́дне, Еги́пта уязви́вый, мо́ре лю́таго мяте́жа земна́го раздели́вый, и лю́ди от ка́ла плинфотворе́ния исто́ргнувый, и к Боже́ственному весе́лию возведы́й.

Припев: Преподобне отче Ромиле, моли Бога о нас.

Апо́столов двоенадеся́тице счи́слился еси́, богоблаже́нне, а́ще и ле́ты отстои́ши по́слежде, но не и житие́м изря́дным, и богому́дрием, и ре́вностию, я́же по ве́ре.

Сла́ва Отцу́ и Сы́ну и Свято́му Ду́ху:

Гро́б тво́й, я́ко исто́чник приснотеку́щий, источа́ет исцеле́ния, прему́дре, и неду́г вся́ческих свобо́дни бы́вшии, с ра́достию песносло́вят си́це просла́вльшаго тя́ Го́спода.

И ны́не и при́сно и во ве́ки веко́в. Ами́нь.

Богородичен: Спасе́ние, и покро́в, и приста́нище ти́хое ве́мы Тя́, Пречи́стая, и призыва́ем Твое́ ско́рое заступле́ние. Те́мже предста́ни ми́, и во вре́мя исхо́да моего́ возду́шных мя́ духо́в исхити́ лука́вствия.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Ромиле, моли Бога о нас.

Острото́ю по́мысла и до́блестию ума́ от Бо́га прия́л еси́ тезоиме́нно, преподо́бне о́тче, зле́йшим бесо́м сплести́ся, и до конца́ си́х победи́ти.

Припев: Преподобне отче Ромиле, моли Бога о нас.

Просте́ртием ру́к, я́коже Амали́ка Моисе́й, неви́димыя враги́ ты́ победи́в до конца́, я́коже и́н Иису́с Нави́н, лю́ди наста́вил еси́ к вы́шнему насле́дию, прему́дре.

Сла́ва Отцу́ и Сы́ну и Свято́му Ду́ху:

Отче богому́дре Роми́ле, ты́ вои́стинну блаже́н показа́лся еси́, ника́коже на пути́ гре́шных ста́в, но в зако́не Го́спода твоего́ поуча́лся еси́ де́нь и но́щь.

И ны́не и при́сно и во ве́ки веко́в. Ами́нь.

Богородичен: Агнице Пречи́стая, рождество́ безсе́менное никто́же ви́де от ве́ка когда́, деви́цу доя́щую никто́же слы́ша нигде́же, на Тебе́ же обоя́ узре́шася. О, стра́ннаго чудесе́!

Конда́к, гла́с 3.

Свы́ше си́лу ты́ прие́мь, богоно́се, бесо́вская ополче́ния посрами́л еси́, восприе́мь же от Бо́га чуде́с благода́ть, подае́ши оби́льно притека́ющим к тебе́ ве́рою. Сего́ ра́ди почита́ем, Роми́ле блаже́нне, боже́ственную па́мять твою́.

Икос:

Отве́рзи устне́ мои́, треблаже́нне, боогоприя́тными твои́ми к Бо́гу моли́твами, я́ко да возмогу́ пе́ти боже́ственное твое́ житие́ и досто́йно возглаго́лати доброде́тели твоя́, я́же Христа́ ра́ди на земли́ соверши́л еси́. Сто́лп бо яви́лся еси́ и пра́вило и́ноков све́тлое, стяжа́в житие́ равноа́нгельное и в незаходи́мая вои́стинну всели́вся. Сего́ ра́ди почита́ем, Роми́ле блаже́нне, боже́ственную па́мять твою́.

Пе́снь 7.

Ирмос: Бо́жия снизхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Преподобне отче Ромиле, моли Бога о нас.

Юн сы́й еще́, у́м и помышле́ние к Боже́ственным возвы́сил еси́ и всегда́ вся́каго земна́го жела́ния вне́ бы́л еси́, вопия́ Зижди́телю твоему́: благослове́н еси́, Бо́же оте́ц на́ших.

Припев: Преподобне отче Ромиле, моли Бога о нас.

Ры́б лови́тве на вели́цей реце́ в ю́ности навы́к, ры́бами пита́л еси́ больны́х в вели́цем смире́нии и апо́столом уподо́бился еси́, вопия́ с ни́ми: благослове́н еси́, Бо́же оте́ц на́ших.

Припев: Преподобне отче Ромиле, моли Бога о нас.

Оте́ческими богоприя́тными моли́твами твои́ми, блаже́нне, тя́жкия приста́вники измени́тися к на́м вско́ре сотвори́, я́ко да, почита́юще борьбы́ твоя́ и до́блести, взыва́ем: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Му́дрое сло́во твое́ живо́тною со́лию растворе́нно бы́сть, ве́рных услажда́ющее, житие́ твое́ изря́дно и па́че естества́. Те́мже чу́до бы́сть земны́м, вопию́щим: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Фо́сфорнаго пла́мене бу́дущаго и осужде́ния изба́ви мя́, Влады́чице, мно́го согреши́вшаго, Благослове́нная, Пречи́стая и Богора́дованная.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Ромиле, моли Бога о нас.

Иже хра́м Бо́жий бы́в чисте́йший, чу́вственных превы́ше показа́лся еси́, и Боже́ственную Ду́ха зарю́ восприя́л еси́, и ны́не с ли́ки Ангельскими и проро́ческими собо́ры ликовству́еши све́тло пред Боже́ственным престо́лом.

Припев: Преподобне отче Ромиле, моли Бога о нас.

Ла́яния и страхова́ния, мечта́ния и преще́ния неви́димых враго́в, устраша́ющих души́ твоея́ тве́рдость поколеба́ти, я́ко стре́лы младе́нческия вмени́л еси́. На го́ру же возше́д высо́каго жития́, отту́ду восприя́л еси́ скрижа́ли богопи́санныя.

Припев: Преподобне отче Ромиле, моли Бога о нас.

Аще и бе́сы тя́ искуша́ху, но ты́ протяже́нным де́йством поста́ и моли́твы вещество́ страсте́й попали́л еси́ и восте́кл еси́ к боговиде́нию. Ны́не же ко Христу́ преше́д, Его́же возлюби́, мо́лишися непреста́нно о почита́ющих святу́ю па́мять твою́.

Сла́ва Отцу́ и Сы́ну и Свято́му Ду́ху:

Любе́зная и медото́чная словеса́ твоя́, Христа́ име́я глаго́люща во усте́х твои́х, все́х, я́коже желе́зо магни́т, привлеко́ша к тебе́, и́же мирски́х оста́вльше веще́й пристра́стие, Христу́ тобо́ю после́доваху, пре́лести изба́вльшеся.

И ны́не и при́сно и во ве́ки веко́в. Ами́нь.

Богородичен: Юже Бо́г избра́ в Неве́сту Себе́, Та́ яви́ся носи́ло Незаходи́маго Со́лнца, мирски́й соста́в от не су́щих, во е́же бы́ти, приве́дшаго. Того́ моли́, Пречи́стая, о и́же в дея́ния безме́стная и помышле́ния скве́рная впа́дших на́с.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Ромиле, моли Бога о нас.

Безчи́сленныя ка́пли дожде́вныя и песо́к морски́й невозмо́жно изчести́. Ниже́ у́м челове́ческий твоя́, о́тче, исправле́ния возмо́жет изрещи́, я́же ты́, живы́й на земли́, соде́лал еси́. Те́мже приими́ пе́снь, ю́же любо́вию ти́ прино́сим.

Припев: Преподобне отче Ромиле, моли Бога о нас.

Отче богому́дре, от вся́ческих напа́стей и скорбе́й исхити́, и́же твою́ па́мять ра́достию соверша́ющих, и блаже́нства на́с сподо́би, его́же са́м при́сно наслажда́ешися, а́ще и проси́мое зело́ вели́ко е́сть.

Припев: Преподобне отче Ромиле, моли Бога о нас.

Всечу́дне о́тче, пе́снь принести́ твоему́ досто́инству, зело́ ску́дна е́сть си́ла души́ моея́. Но ты́ произволе́нию благода́ть воздава́й, грехо́в свобо́дну ми́ бы́ти, Христа́ умоли́, на земли́ тя́ возвели́чившаго.

Сла́ва Отцу́ и Сы́ну и Свято́му Ду́ху:

Тро́ичен: Истину испове́дую Боже́ственную в Трие́х Ли́цах: Отца́ и Сы́на и Свята́го Ду́ха, Тро́ицу Всемогу́щую, и Вседе́тельную, и Непристу́пную, Ея́же ми́лость да улучу́, Роми́ле преподо́бне, в де́нь су́дный моли́твами твои́ми.

И ны́не и при́сно и во ве́ки веко́в. Ами́нь.

Богородичен: Юнице Боже́ственная, на Тебе́ ве́лие и чу́дное соде́яся та́инство: Бо́га бо прия́ла еси́ во утро́бу Твою́, и Сего́ родила́ еси́, и по рождестве́ па́ки Де́ва пребыла́ еси́.

Свети́лен:

Якоже со́лнце, просвеща́ющее чуде́с заря́ми вселе́нную, показа́лся еси́, преподо́бне о́тче Роми́ле, те́мже души́ моея́ зе́ницы просвети́, молю́ся.

Сла́ва, и ны́не, Богородичен:

Херуви́мов вы́шшая и серафи́мов сла́внейшая яви́лася еси́, Де́во, я́ко Бо́га поро́ждши, те́мже вопию́ Ти́: уще́дри ду́шу мою́, Пречи́стая.

Стихи́ры, гла́с 4.

Ангелов соприча́стника и преподо́бных единокро́вника, Роми́ла, вси́ да восхва́лим, и́же в по́стницех просия́вшаго, и Ду́ха заря́ми все́х просвети́вшаго, и сокруши́вшаго врага́ до конца́ чуде́с струя́ми, и сего́ си́лу низложи́вшаго вы́шним посо́бием.

Яко звезда́ светле́йшая возсия́л еси́, преподо́бне, све́тлостию вся́ концы́ просвети́вшая, и тму́ неве́дения чудесы́ отгна́вшая, и все́х к ра́зуму и́стины приве́дшая. Но моли́ся Го́сподеви о все́х, соверша́ющих святу́ю па́мять твою́.

Авраа́мово боголю́бие, Ио́сифово благогове́инство, Иа́ковлю простоту́ име́л еси́, свя́те, и кро́тость Дави́дову, отону́дуже показа́лся еси́ селе́ние честно́е, и получи́л еси́ дарова́ние Ду́ха. Те́мже, соше́дшеся дне́сь, всепра́зднственную твою́ па́мять соверша́ем, здра́вие душа́м почерпа́юще.

Сла́ва, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х, те́м на небесе́х обре́л еси́ мзду́ трудо́в твои́х, де́монския погуби́л еси́ полки́ и Ангельския дости́гл еси́ чи́ны, и́хже житию́ непоро́чно поревнова́л еси́, дерзнове́ние име́я ко Христу́ Бо́гу, ми́р испроси́ душа́м на́шим.

И ны́не, богоро́дичен, гла́с то́йже:

Богоро́дице, Ты́ еси́ лоза́ и́стинная, возрасти́вшая на́м Пло́д живота́, Тебе́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

Молитва

О свяще́нная главо́, преподо́бне о́тче, преблаже́нне а́вво Ромиле, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.