29 января.

Канон на поклонение честным веригам святого и всехвальнаго апостола Петра.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Ри́ма не оста́вль, к на́м прише́л еси́ честны́ми вери́гами, я́же носи́л еси́, апо́столов первопресто́льне. Имже ве́рою покланя́ющеся, мо́лимся: твои́ми к Бо́гу моли́твами да́руй на́м ве́лию ми́лость.

Кано́н апо́стола. Гла́с 4.

Пе́снь 1.

Ирмос: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися.

Припев: Святый апостоле Петре, моли Бога о нас.

Торжеству́ет, лику́ющи, вся́ Христо́ва Це́рковь ду́хом, благохва́лящи тя́ ве́рою и твоя́, апо́столе первопресто́льне, облобыза́ющи вери́ги честны́я от любве́, я́же носи́л еси́ свя́зан, связу́я мучи́теля.

Припев: Святый апостоле Петре, моли Бога о нас.

Из глубины́ пре́лести ловя́, Пе́тре, челове́ки, я́ко ры́бы, приве́л еси́ тебе́ Избра́вшему от ры́барей и́стинно в верхо́внаго все́х ученико́в. Сего́ ра́ди вери́ги, я́же носи́л еси́, облобыза́ем.

Сла́ва Отцу́ и Сы́ну и Свято́му Ду́ху:

Основа́нием ве́ры все́х ду́ши ве́рных назда́л еси́ и, хра́мы пре́лести, Пе́тре, низложи́в, созда́л еси́ Це́ркви, тя́ велегла́сно чту́щия всегда́ и вери́ги, я́же носи́л еси́.

И ны́не и при́сно и во ве́ки веко́в. Ами́нь.

Богородичен: Ору́жия вся́ льсти́ваго врага́, Пречи́стая Де́во, соверше́нно оскуде́ша, отне́леже копие́м уязви́ся в Твою́ утро́бу нескве́рную всели́вшееся Сло́во. Его́же сладча́йшим ны́не уязви́тися жела́нием се́рдцу моему́, молю́ Тя.

Пе́снь 3.

Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.

Припев: Святый апостоле Петре, моли Бога о нас.

Ве́сь Све́ту соединя́яся чисте́йшему, Того́ Боже́ственными причаще́нии, све́т яви́лся еси́ вторы́й, Пе́тре, озаря́ющий ду́ши на́ша.

Припев: Святый апостоле Петре, моли Бога о нас.

Зако́ны Христо́вы утверди́л еси́ и пребеззако́ннующия благозако́нию научи́л еси́, я́ко апо́столов верхо́вный, я́ко догма́тов основа́ние недви́жимо.

Сла́ва Отцу́ и Сы́ну и Свято́му Ду́ху:

Язы́ком свяще́нным пропове́дал еси́ Бо́га, пострада́вшаго и на Кресте́ распе́ншагося. Сего́ ра́ди, Пе́тре, почита́ем связа́вшия тя́ вери́ги.

И ны́не и при́сно и во ве́ки веко́в. Ами́нь.

Богородичен: Стоя́ше да́же до Тебе́ сме́рть неодержи́маго стремле́ния: Ты́ бо родила́ еси́ Исто́чник безсме́ртия, Богоро́дице Ма́ти Де́во.

Конда́к, гла́с 2.

Ка́мень Христо́с ка́меня ве́ры прославля́ет све́тло, ученико́в первопресто́льника: созыва́ет бо вся́ пра́здновати, Пе́тре, чудеси́ твоея́ честны́я вери́ги и подае́т согреше́ний проще́ние.

Седа́лен, гла́с 4.

Яко верхо́внаго му́дрых апо́столов и я́ко ключаря́ небе́снаго Ца́рствия восхваля́ем ве́рою тя́, апо́столе, и облобыза́ем чи́стою со́вестию, Пе́тре, я́же носи́л еси́, я́ко злоде́й, вери́ги, злоде́йства разруша́я вра́жия, от ни́хже изба́витися на́м помоли́ся.

Сла́ва, и ны́не, Богородичен:

Херуви́мов и серафи́мов превы́шши, небесе́ же и земли́ простра́ннейши и ви́димыя тва́ри и неви́димыя яви́лася еси́ преиму́щи неразсу́дным разсужде́нием: Его́же бо простра́нствия небеса́ не вмеща́ют, во Твое́й утро́бе вмести́ла еси́, Чи́стая, Его́же моли́ спасти́ся рабо́м Твои́м.

Пе́снь 4.

Ирмос: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Святый апостоле Петре, моли Бога о нас.

Вити́йствуя Влады́ки вели́чия, непокори́вых евре́ев сердца́ к ве́ре обрати́л еси́ боже́ственней, я́ко основа́ние ве́ры.

Припев: Святый апостоле Петре, моли Бога о нас.

Ше́ствия твоя́ позна́на бы́ша на вода́х преоби́льною любо́вию Ходи́вшаго верху́ си́х, Пе́тре, и стези́ тебе́ боже́ственныя Сказа́вшаго.

Сла́ва Отцу́ и Сы́ну и Свято́му Ду́ху:

Врачевство́ иму́ще неду́гов всеразли́чных, боже́ственныя вери́ги твоя́, блаже́нне, сия́ облобыза́ем ве́рою, тя́ почита́юще.

И ны́не и при́сно и во ве́ки веко́в. Ами́нь.

Богородичен: Яко в пала́ту простра́нную, все́лься Ца́рь все́х во святу́ю Твою́ утро́бу, яви́ся воплоща́емь, Всецепоро́чная Влады́чице.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Припев: Святый апостоле Петре, моли Бога о нас.

Отцу́ Собезнача́льнаго пропове́дал еси́ Сы́на открове́нием, всехва́льне, Боже́ственным и блаже́нства сподо́бился еси́ блаже́ннаго из у́ст.

Припев: Святый апостоле Петре, моли Бога о нас.

Егда́ све́т узре́л еси́, возсия́вший на Фаво́ре, со́лнечныя покрыва́ющий лучи́, све́том су́щим от Све́та озари́лся еси́, Пе́тре, и ве́рныя просвети́л еси́.

Сла́ва Отцу́ и Сы́ну и Свято́му Ду́ху:

Ме́ртва тридне́вновавша пропове́дал еси́ Христа́, Его́же ра́ди вери́ги носи́л еси́, Пе́тре. Имже поклони́тися сподо́бившеся, благоче́стно тя́ чти́м.

И ны́не и при́сно и во ве́ки веко́в. Ами́нь.

Богородичен: Отягоще́ннаго, Пречи́стая, бре́менем мно́гих грехо́в, облегчи́ мя́ ны́не носи́ти и́го, укрепля́ющи, Христо́во легча́йшее.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святый апостоле Петре, моли Бога о нас.

Стремгла́вное пресла́вно претерпе́л еси́ распя́тие, угото́вил еси́ к небе́сней стези́ но́ги твоя́, е́юже на́с ходи́ти, учениче́ Христо́в, укрепи́.

Припев: Святый апостоле Петре, моли Бога о нас.

Всели́лся еси́ в жи́знь живу́щих и, вя́жемь ея́ ра́ди, у́зы велиа́ра сокруши́л еси́, связа́вшаго тя́. Сего́ ра́ди чти́м твоя́ вери́ги.

Сла́ва Отцу́ и Сы́ну и Свято́му Ду́ху:

Моли́ Влады́ку, всеблаже́нне, тва́ри, низпосла́ти очище́ние, и ми́р, и ми́лость сла́вящим тя́, я́ко Того́ учени́к и́скреннейший.

И ны́не и при́сно и во ве́ки веко́в. Ами́нь.

Богородичен: Умерщвле́ния ко́жных ри́з совлече́ся пра́отец: Зижди́тель бо в того́ облачи́тся от Твои́х крове́й, воплоти́вся па́че сло́ва, Всенепоро́чная.

Конда́к, гла́с 2.

Верхо́внаго и пе́рваго апо́столов, Истины боже́ственнаго ученика́, Петра́ вели́каго восхва́лим и того́ ве́рою целу́ем вери́ги, прегреше́ний разреше́ние прие́млюще.

Икос:

Сла́внаго и вели́каго Госпо́дня ученика́ досто́йно ки́й язы́к челове́ков похвали́ти возмо́жет? Его́же бо благосло́вне Боже́ственное Сло́во ублажи́, ки́й у́м восхва́лит? Оба́че, е́же кто́ по си́ле стя́жет, до́лжно е́сть Бо́гу приноси́ти, сие́ же и сотвори́ти покуша́юся. Но, о празднолю́бцы, благоче́стно первопресто́льнаго пе́сньми увенча́им, прегреше́ний разреше́ние прие́млюще.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Святый апостоле Петре, моли Бога о нас.

Три́жды отве́рглся еси́ Христа́, те́мже вопроше́нием трикра́тным исцеля́ет твое́ согреше́ние, Пе́тре пресла́вне, и утвержде́ние показу́ет мно́гих коле́блющихся.

Припев: Святый апостоле Петре, моли Бога о нас.

Яко у́зник Христо́в, сладча́йшим жела́нием у́зам разли́чным приобщи́лся еси́, те́мже и твои́м вери́гам, разреша́ющим стра́сти, Пе́тре, ве́рою покланя́емся.

Припев: Святый апостоле Петре, моли Бога о нас.

Но́щь глубо́кую лю́таго многобо́жия реши́ши, вселе́нную проходя́, я́коже велича́йшее со́лнце, Пе́тре, Христо́в самови́дче, апо́столов сла́ва.

Сла́ва Отцу́ и Сы́ну и Свято́му Ду́ху:

Сла́ва Христу́ бы́л еси́, Сего́ твои́ми удесы́ просла́вил еси́, Пе́тре пресла́вне. Те́мже тя́ сла́вим и связа́вшим тя́ вери́гам покланя́емся.

И ны́не и при́сно и во ве́ки веко́в. Ами́нь.

Богородичен: Соше́дый на зе́млю, я́ко до́ждь, Де́во, богоразу́мием всю́ напои́ зе́млю и показа́ Тя Ангелов все́х, Чи́стая, честне́йшую.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Святый апостоле Петре, моли Бога о нас.

Земледе́льствуя сердца́, Пе́тре, жесто́кая, благопло́днейшая сия́ соверши́л еси́ Де́лателю тва́ри, ключи́ тебе́ боже́ственныя преда́вшему вяза́ти же и реши́ти согреше́ния.

Припев: Святый апостоле Петре, моли Бога о нас.

Блажи́м тя́, Пе́тре, всегда́ и твоя́ целу́ем вери́ги, я́же, я́ко злоде́й, носи́л еси́, убива́я зло́бы нача́льника и связу́я у́зами твои́ми, апо́столе.

Припев: Святый апостоле Петре, моли Бога о нас.

Неукло́нным твои́м ка́менем, Пе́тре, ве́ры соблюда́я Це́ркве исполне́ние, от среды́ собла́зны отжени́, Пе́тре, и ми́рное испроси́ се́й, блаже́нне, устрое́ние.

Припев: Святый апостоле Петре, моли Бога о нас.

Узами и стра́стию пречи́стою Связа́вшаго а́д и сме́рть све́тло пропове́дал еси́, сего́ ра́ди, всеблаже́нне, вери́ги твоя́ целу́юще, освяща́емся.

Сла́ва Отцу́ и Сы́ну и Свято́му Ду́ху:

Тро́ичен: Якоже чи́ни го́рнии, возопии́м трисвяты́ми гла́сы, Всевино́внаго Отца́ ны́не сла́вяще, и Сы́на, и Ду́ха, еди́но Существо́, еди́ну Си́лу и еди́но Де́йство.

И ны́не и при́сно и во ве́ки веко́в. Ами́нь.

Богородичен: Мы́сленный Тя́ све́щник преднаписа́ проро́к, боже́ственную свещу́, Богороди́тельнице, нося́щий, просве́щшу пе́рвее омраче́нныя мно́гими зо́л омраче́ньми.

Песнь 9

Ирмос: Рождество́ Твое́ нетле́нно яви́ся: Бо́г из боку́ Твое́ю про́йде, я́ко Плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем.

Припев: Святый апостоле Петре, моли Бога о нас.

Ви́дети сподо́бился еси́ да́льная, ве́рно наде́емая тебе́, Пе́тре, и трудо́в по́чести от Бо́га Человеколю́бца, ра́дуяся, прие́млеши, Его́же пло́тию твое́ю стра́сть Боже́ственную изобрази́л еси́.

Припев: Святый апостоле Петре, моли Бога о нас.

Яко боже́ственный ключа́рь Ца́рствия, сего́ отве́рзи вхо́ды ве́рно тя́ чту́щим на земли́ и честны́я твоя́ целу́ющим вери́ги, Пе́тре, и́миже свя́зан, носи́л еси́.

Припев: Святый апостоле Петре, моли Бога о нас.

С Сы́ном сы́й на Фаво́ре, гла́са Оте́ческаго, Сего́ явля́юща, сподо́бился еси́ услы́шати: Боже́ственным бо Ду́хом, Пе́тре, твое́ се́рдце очища́емо пресла́вно озари́ся.

Сла́ва Отцу́ и Сы́ну и Свято́му Ду́ху:

На́м, любо́вию тя́ чту́щим и вери́ги твоя́ целу́ющим, и́миже, Пе́тре, связа́лся еси́, очище́ние, и долго́в испроси́ разреше́ние, и Ца́рствия небе́снаго наслажде́ние.

И ны́не и при́сно и во ве́ки веко́в. Ами́нь.

Богородичен: Све́та жили́ще была́ еси́, те́мже Све́том наста́ви мя́, Отрокови́це, омраче́на все́ми вра́жиими искуше́ньми, я́ко да ве́рою Тя́, Всечи́стая, велича́ю, Ма́ти Де́во.

Свети́лен.

Вери́гами свя́зана страсте́й мя́, окая́ннаго, разреши́, блаже́нне, я́коже иногда́ вери́ги разреши́ Ангел Бо́жий и от темни́цы изве́д пресла́вно заключе́на тя́ в не́й, апо́столов верхо́вниче, блаже́ннейше Пе́тре.

Богородичен: Де́во Всенепоро́чная, Ты́ позна́лася еси́ я́ко Ма́ти, я́ко Бо́га же и Челове́ка па́че естества́ ро́ждши, и спасе́ние бы́сть Рожде́ние Твое́ пою́щим любо́вию: сла́ва подоба́ет, и че́сть, и поклоне́ние Тро́ице Непристу́пней и Боже́ственней.

Молитва святому апостолу Петру

О, святы́й Пе́тре, вели́кий апо́столе, самови́дче и сотаи́нниче Бо́жий, всемо́щною десни́цею Учи́теля твоего́ прия́тый из вод волну́ющихся и кра́йняго потопле́ния свобо́ждшийся! Не забу́ди и нас убо́гих, в ти́не грехо́вней погря́зших и волна́ми жите́йскаго мо́ря обурева́емых: пода́ждь нам твою́ ру́ку кре́пкую, помози́ нам и удержи́ нас от потопле́ния во страсте́х, похоте́х, лжах и клевета́х. Сотвори́ и ты с на́ми ми́лость, тебе́ от Го́спода явле́нную, да не в сомне́нии и малове́рии изги́бнем. Научи́ нас, учи́телю наш, пролива́ти сле́зы покая́ния, да пла́чем го́рько о дея́ниих на́ших в ве́це сем. И а́ще твоя́ сле́зы, в покая́ние излия́нныя, ми́лостию Свое́ю покры́ Госпо́дь и Учи́тель твой, испроси́ и нам, со дерзнове́нием апо́стольским, проще́ния во гресе́ ежеча́снаго. Град сей, ко святы́м стопа́м твои́м пове́рженный, сохрани́ и от прилуча́ющихся ко́зней лука́вых врага́ спасе́ния на́шего огради́; воздви́гни твои́ преподо́бнии ру́це ко Го́споду за наро́д наш, да ти́хое и безмо́лвное житие́ поживе́м в ве́це сем до часа́, в о́ньже и́мать призва́ти нас Влады́ка Госпо́дь, наш Судия́ нелицеприя́тный. Ты же, о всехва́льный апо́столе, не отве́ржи во́пля на́шего и стена́ния к тебе́, но заступи́ нас пред Христо́м, твои́м Учи́телем, да непреста́нно сла́вим Его́ милосе́рдие к нам, со Отце́м и Святы́м Ду́хом, во ве́ки веко́в. Ами́нь.

Молитва первоверховным апостолам Петру и Павлу

О, пресла́внии апо́столи Пе́тре и Па́вле, ду́ши за Христа́ преда́вшии и кро́вию ва́шею па́жить Его́ удобри́вшии! Услы́шите чад ва́ших моли́твы и воздыха́ния, се́рдцем сокруше́нным ны́не приноси́мыя. Се бо беззако́ньми омрачи́хомся и того́ ра́ди беда́ми, я́коже ту́чами, обложи́хомся, елеа́ же до́браго жития́ обнища́хом зело́ и не возмо́жем проти́витися волко́м хи́щным, и́же расхища́ти насле́дие Бо́жие де́рзостно тща́тся. О си́льнии! Понеси́те не́мощи на́ша, не отлуча́йтеся ду́хом от нас, да не разлучи́мся в коне́ц от любве́ Бо́жия, но кре́пким заступле́нием ва́шим нас защити́те, да поми́лует Госпо́дь всех нас, моли́тв ва́ших ра́ди, да истреби́т же рукописа́ние безме́рных грехо́в на́ших и да сподо́бит со все́ми святы́ми блаже́ннаго Ца́рствия и бра́ка А́гнца Своего́, Ему́же честь и сла́ва, и благодаре́ние и поклоне́ние, во ве́ки веко́в. Ами́нь.