29 января.

Канон праведному Максиму, Христа ради юродивому, Тотемскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Непоро́чным свяще́нством Бо́гови послужи́в, посреде́ мирска́го мяте́жа юро́дство избра́л еси́, взе́м бо кре́ст, после́довал еси́ Христу́ невозвра́тным по́мыслом и, с любо́вию к Нему́ доброде́тельми приближа́яся, земна́я оста́вив, небе́сная восприя́л еси́, блаже́нне Макси́ме, о́тче на́ш, моли́ Христа́ Бо́га сохрани́тися гра́ду То́тьме невреди́му и спасти́ся душа́м на́шим.

Сла́ва, и ны́не, Богородичен:

Еже от ве́ка утае́нное, и Ангелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Кано́н, гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, еди́ному Влады́це.

Иису́су: Приими́ моле́ние, Христе́ мо́й, мене́, недосто́йнаго, и отве́рзи ми́ недоуме́нный у́м и язы́к, да возмогу́ Твоего́ уго́дника Макси́ма воспе́ти прославле́ние.

Припев: Святый праведный Максиме, моли Бога о нас.

В вы́шних предстоя́ престо́лу Вседержи́теля, блаже́нне Макси́ме, испроси́ соверша́ющим свяще́нное твое́ торжество́ грехо́в оставле́ние, да воспое́м пе́снь еди́ному Влады́це.

Сла́ва Отцу́ и Сы́ну и Свято́му Ду́ху:

Предстоя́ще дне́сь на ме́сте погребе́ния твоего́, про́сим, Макси́ме, о́тче на́ш, получи́ти твои́ми моли́твами от злы́х избавле́ние и неду́гов исцеле́ние.

И ны́не и при́сно и во ве́ки веко́в. Ами́нь.

Богородичен: Влады́чице Пречи́стая, ро́ждшая Спа́са все́х Го́спода, утоли́ страсте́й на́ших лю́тое смуще́ние и тишину́ пода́ждь невозмути́мую, да Тебе́, Богоро́дице, непреста́нно велича́ем.

Пе́снь 3.

Ирмос: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющим.

Припев: Святый праведный Максиме, моли Бога о нас.

От ю́ности твоея́, о́тче на́ш, име́я нача́ло прему́дрости — стра́х Бо́жий, да́же и до кончи́ны соблю́л еси́, Бо́га Помо́щника себе́ призыва́я.

Припев: Святый праведный Максиме, моли Бога о нас.

На земли́ предстоя́л еси́ престо́лу Бо́жию во стра́се и смире́нии, Безкро́вныя Же́ртвы принося́ Бо́гу, блаже́нне Макси́ме, и ми́лостива Того́ на́м соде́ловая.

Сла́ва Отцу́ и Сы́ну и Свято́му Ду́ху:

С ве́рою и любо́вию тебе́ призыва́ем в моли́тву, пра́ведный Макси́ме, умоли́ Всеблага́го Бо́га, да изба́вит на́с от вся́кия напа́сти и гее́нскаго муче́ния.

И ны́не и при́сно и во ве́ки веко́в. Ами́нь.

Богородичен: Сни́де во утро́бу Твою́ Влады́ка и Госпо́дь воплоща́емь, Влады́чице Всепе́тая, да изба́вит от пре́лести ро́д челове́ческий и Ца́рствия Своего́ сподо́бит на́с.

Ин конда́к, гла́с 4:

Боже́ственный ева́нгельский гла́с услы́шав, ра́достною душе́ю тому́ после́дуя, прише́л еси́ в ти́хое приста́нище безстра́стия, ча́стыми моли́твами, и посто́м, и сле́зными струя́ми ду́шу с те́лом омыва́я, возду́шною тя́гостию пло́ть умерщвля́я, руга́нием людски́м помышле́ния смиря́я, о напа́дствующих моли́лся еси́, — Го́споди, не поста́ви и́м греха́, — те́м и по сме́рти чудесы́ тя́ Бо́г прославля́ет и все́х зва́ти тебе́ науча́ет: ра́дуйся, богому́дре Макси́ме, о́тче на́ш.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святый праведный Максиме, моли Бога о нас.

В чи́стом се́рдца стремле́нии о лю́дех принося́ моли́твы, свя́те Макси́ме, благопотре́бная испроси́л еси́ от Бо́га, прославля́я Того́ вели́чие.

Припев: Святый праведный Максиме, моли Бога о нас.

Апо́стольский гла́с, Макси́ме, уразуме́в, я́ко отре́бие ми́ру есмы́, Христа́ ра́ди са́м себе́ все́м в попра́ние вмени́л еси́.

Сла́ва Отцу́ и Сы́ну и Свято́му Ду́ху:

Притека́юще дне́сь к тебе́, вопие́м ти́: блаже́нне Макси́ме, испроси́ на́м грехо́в оставле́ние.

И ны́не и при́сно и во ве́ки веко́в. Ами́нь.

Богородичен: Недоуме́ние предлежи́т от обыше́дших на́м зо́л, Пречи́стая Влады́чице, но изба́ви от си́х ско́ро, к Тебе́ бо еди́ней прибега́ем.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Святый праведный Максиме, моли Бога о нас.

От младе́нчества просвети́вся душе́ю, в мяте́жех благооти́шное житие́ стяжа́ти потща́лся еси́, воспева́я еди́наго Человеколю́бца.

Припев: Святый праведный Максиме, моли Бога о нас.

Нагото́ю теле́сного, я́коже багряни́цею, мня́ше себе́ оде́яна бы́ти, в зиме́, я́коже в ле́те, пребыва́я, вопия́л еси́, пра́ведный Макси́ме: благодарю́ Тя́, Человеколю́бче.

Сла́ва Отцу́ и Сы́ну и Свято́му Ду́ху:

Добро́тою духо́вною сия́я, обнаже́нных на́с вся́каго де́ла блага́го покры́й предста́тельством твои́м, всеблаже́нне Макси́ме.

И ны́не и при́сно и во ве́ки веко́в. Ами́нь.

Богородичен: Умерщвле́нную мою́ ду́шу страстьми́ скве́рными оживи́, Всенепоро́чная, Живота́, Спа́са, ро́ждшая, и к стези́ спаси́тельней и блаже́нному житию́ напра́ви.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Святый праведный Максиме, моли Бога о нас.

Якоже Ио́на от ки́та, та́ко и ты́, о́тче, от мирски́х мяте́жей бу́яя восприя́л еси́ и в по́двизе юро́дства к небе́сным пресели́лся еси́.

Припев: Святый праведный Максиме, моли Бога о нас.

Безстра́стием украша́яся, Макси́ме, я́ко безпло́тен, на земли́ пожи́л еси́, поруга́ния и досажде́ния претерпева́я, о досажда́ющих моли́лся еси́: Го́споди, не поста́ви и́м греха́ неве́дения.

Сла́ва Отцу́ и Сы́ну и Свято́му Ду́ху:

Яко восприя́л еси́ благода́ть, о́тче, моли́тися ко Го́споду о лю́дех и гра́де твое́м То́тьме, да сохрани́т его́ невреди́ма и изба́вит на́с от искуше́ний и бе́д, да вси́ ра́достно пра́зднуем свято́е твое́ преставле́ние.

И ны́не и при́сно и во ве́ки веко́в. Ами́нь.

Богородичен: Пое́м Тя́, ве́рнии, Богоблагода́тная Влады́чице, Преве́чнаго Бо́га пло́тию ро́ждшая, Его́же умоли́, Пречи́стая, гра́ду и лю́дем Твои́м в ми́ре спасти́ся.

Конда́к, гла́с 4:

Боже́ственному гла́су после́дуя, возревнова́л еси́ наставля́ти па́ству свою́ не му́дростию сло́ва, но бу́йством жития́ безмяте́жнаго, непреста́нными моли́твами и сле́зными струя́ми ду́шу и те́ло омыва́я, возду́шными стихи́ями пло́ть изнуря́я, те́мже и по сме́рти чудесы́ тя́ Госпо́дь просла́ви, да с ве́рою зове́м к тебе́: ра́дуйся, богому́дре о́тче на́ш Макси́ме.

Икос:

Ка́ко возмо́жем восхвали́ти равноа́нгельское житие́ твое́, и испове́дати мно́гое твое́ терпе́ние, и смире́ние, и те́плыя ко Христу́ моли́твы? Но я́ко благосе́рдному и незло́бивому па́стырю и богому́дрому отцу́ прино́сим похвалы́ сицева́я: ра́дуйся, пресве́тлая звездо́, на се́вере доброде́тельми возсия́вшая и полу́нощныя стра́ны озари́вшая; ра́дуйся, возненави́девый су́етный ми́р, Христа́ же еди́наго все́м се́рдцем возлюби́вый и Тому́ неукло́нно после́довавый; ра́дуйся, я́ко бу́йственное и юро́дственное, по апо́столу, жи́тельство избра́вый; ра́дуйся, премени́вый тле́нная и скоропреходя́щая наде́ждою бу́дущих ве́чных бла́г; ра́дуйся, пра́ведному Иову уподо́бивыйся терпе́нием; ра́дуйся, подви́жниче Христо́в непобеди́мый, но побежда́яй ко́зни диа́вола свои́м смире́нием; ра́дуйся, я́коже дре́вний Ла́зарь убо́гий, ны́не почива́еши на ло́не Авраа́мли; ра́дуйся, и по отше́ствии твое́м от ми́ра су́щим в беда́х гото́в засту́пник обрета́ешися; ра́дуйся, всегда́ в моли́твах усе́рдно тя́ призыва́ющим ско́рый помо́щник явля́ешися; ра́дуйся, богому́дре Макси́ме, о́тче на́ш.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святый праведный Максиме, моли Бога о нас.

Нескве́рну добро́ту душе́вную соблю́л еси́ ума́ чистото́ю, бу́йство ми́ра избра́в, да Бо́гу прему́др яви́шися, вопия́: благослове́н еси́, Го́споди Бо́же, во ве́ки.

Припев: Святый праведный Максиме, моли Бога о нас.

Пе́щь страсте́й и пла́мень искуше́ний росо́ю моли́тв твои́х погаси́в, о́тче Макси́ме, Ангельски на земли́ пожи́л еси́, вопия́: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Украси́ тебе́ Тро́ица, блаже́нне Макси́ме, венце́м пра́вды за труды́ и по́двиги твоя́, Ейже в весе́лии вопие́ши: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Яко престо́л огнезра́чен, Царя́ но́сиши тва́ри, Его́же умоли́, Де́во, со блаже́нным Макси́мом Ца́рствия небе́снаго сподо́бити на́с, песносло́вящих ве́рно предста́тельство Твое́.

Пе́снь 8.

Ирмос: Ангели и небеса́, на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки.

Припев: Святый праведный Максиме, моли Бога о нас.

Безпло́тных жи́тельству на земли́ подража́я и любо́вь к Бо́гу и бли́жнему нелицеме́рну име́я, вы́ну взыва́л еси́: благослови́те, по́йте Го́спода и превозноси́те во вся́ ве́ки.

Припев: Святый праведный Максиме, моли Бога о нас.

Небе́сныя красо́ты возлюби́в, земна́я пристра́стия отри́нул еси́ и, дости́гнув го́рняго черто́га, со святы́ми взыва́еши: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

В ра́йския селе́ния пресели́вся ны́не, у престо́ла сла́вы со безпло́тными ли́ки предстои́ши и с ни́ми хвале́бную пе́снь вопие́ши: да благослови́т вся́ка тва́рь Го́спода и превозно́сит во ве́ки.

И ны́не и при́сно и во ве́ки веко́в. Ами́нь.

Богородичен: По́мощи, е́же от Тебе́ тре́бующия, не пре́зри, Де́во, пою́щия и превознося́щия Тя́ во ве́ки.

Песнь 9

Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припев: Святый праведный Максиме, моли Бога о нас.

Благослове́н Госпо́дь Бо́г, просла́вивый на земли́ па́мять твою́, блаже́нне Макси́ме, и гра́д тво́й То́тьму просвети́вый житие́м твои́м, я́коже ле́ствицею, наставля́я к небе́сным добро́там.

Припев: Святый праведный Максиме, моли Бога о нас.

По́двигом до́брым подвиза́лся еси́ и пра́ведным сно́м почи́л еси́, да и по кончи́не свое́й поле́зная все́м подае́ши, с ве́рою к тебе́ притека́ющим и прося́щим ско́раго заступле́ния, блаже́нне Макси́ме.

Сла́ва Отцу́ и Сы́ну и Свято́му Ду́ху:

Припа́дающе, вси́ взыва́ем к тебе́, блаже́нне о́тче Макси́ме: испроси́ Це́рквам соедине́ния,христолюби́вым лю́дем на супоста́ты одоле́ние, ми́ру всему́ умире́ние и душа́м на́шим спасе́ние.

И ны́не и при́сно и во ве́ки веко́в. Ами́нь.

Богородичен: Влады́чице и Ма́ти Изба́вителя, приими́ моле́ние недосто́йных ра́б Твои́х, да хода́тайствуеши к Ро́ждшемуся от Тебе́. О, Влады́чице ми́ра, бу́ди Хода́таица.

Моли́тва.

О, преблаже́нне и досточу́дне уго́дниче Бо́жий, Макси́ме пра́ведный! Восприя́в благода́ть Свята́го Ду́ха, пе́рвее послужи́л еси́ непоро́чным свяще́нством Пресвяте́й Тро́ице, предстоя́ престо́лу Бо́жию и принося́ о лю́дех Безкро́вныя Же́ртвы. Егда́ же, ко Го́споду кра́йним жела́нием одержи́мь, юро́дивое житие́ Христа́ ра́ди избра́л еси́, мирски́я пре́лести отри́нул еси́, нагото́ю теле́сною, я́коже багряни́цею, оде́яся, со́лнечный зно́й и вели́кий мра́з с любо́вию претерпе́, подвиза́яся во гра́де То́тьме, и сего́ ра́ди насле́довал еси́ небе́сный черто́г в селе́ниих пра́ведных. Но, я́ко име́яй дерзнове́ние ко Христу́ Бо́гу, проле́й о на́с, о свя́тче Бо́жий, те́плыя моли́твы, да изба́вимся мы́ вся́кия ну́жды и вся́каго сопроти́внаго зла́. Не преста́й моли́ти Сло́ва, Христа́ Бо́га на́шего, о гра́де и лю́дех, сохрани́тися и́м неврежде́нным от гла́да и я́звы, огня́ и меча́ и от наше́ствия супоста́тов. Низпосли́ с небесе́, о свяще́нная главо́, преблаже́нне Макси́ме, на на́с, усе́рдно притека́ющих к тебе́ и с любо́вию лобыза́ющих святы́й о́браз тво́й, ми́р, благода́ть и спасе́ние душа́м на́шим, да и мы́ со все́ми святы́ми насле́дницы бу́дем небе́снаго Ца́рствия, воспева́юще ку́пно Святу́ю Тро́ицу, Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.