28 января.

Канон преподобному Иоанну Кущнику.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н Иоа́нна. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподобне отче Иоанне, моли Бога о нас.

Обогати́вся Боже́ственными доброде́тельми, бога́тство преоби́дел еси́ земно́е и небе́сное получи́л еси́. Те́мже мя́, обнища́вша, Боже́ственнаго ра́зума обогати́ благода́тию, я́ко да твое́ воспою́, о́тче, жи́тельство равноа́нгельное.

Припев: Преподобне отче Иоанне, моли Бога о нас.

Яре́м Госпо́день благи́й, блаже́нне, от ю́ности ты́ подъе́м, по́стническими боре́нии врага́ смири́л еси́, смире́нием Христо́вым воору́жся, и́мже возвы́сился еси́ на высоту́, Иоа́нне, к небеси́.

Сла́ва Отцу́ и Сы́ну и Свято́му Ду́ху:

Яко ше́ствовав стезе́ю те́сною, скорбьми́, и слеза́ми, и стена́ньми, и озлобле́нии, преподо́бне, к простра́ннейшей широте́ дости́гл еси́, обре́т оби́тель досто́йну боле́зней, о́тче Иоа́нне досточу́дне.

И ны́не и при́сно и во ве́ки веко́в. Ами́нь.

Богородичен: Лю́тыми страсте́й наве́ты, Отрокови́це, обурева́емь и прило́ги грехо́вными преклоне́н, ко Твоему́ неусы́пному и непобеди́мому предста́тельству, Всепе́тая, любо́вию прибега́ю, уще́дри мя́ и спаси́, Присноде́во.

Пе́снь 3.

Ирмос: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Преподобне отче Иоанне, моли Бога о нас.

Кади́ло благово́нно Всеви́дцу, преподо́бне, твоя́ моли́твы прине́сл еси́, я́же обоня́в и прие́м, по́стническим лико́м причте́ тя.

Припев: Преподобне отче Иоанне, моли Бога о нас.

Яви́лся еси́ чу́до велича́йше, сердца́, преподо́бне, благочести́вых ужаса́я: ка́ко пред враты́ претерпе́л еси́ роди́телей, нище́тствуя и оскорбля́емь.

Сла́ва Отцу́ и Сы́ну и Свято́му Ду́ху:

Зако́нно в моли́твах и поще́ниих, преподо́бне, претерпева́я, в безстра́стие обле́клся еси́, пло́ти мудрова́ние смири́в кре́постию Боже́ственнаго Ду́ха.

И ны́не и при́сно и во ве́ки веко́в. Ами́нь.

Богородичен: Яко мироуха́нен ши́пок от удо́лий, Пречи́стая, Чи́стый Тя́ обре́те и посреде́ Тебе́ всели́ся, благово́ния испо́лнив челове́чество.

Седа́лен Иоа́нна, гла́с 3.

Бога́тство тле́нное и сла́ву мимотеку́щую оста́вив, небе́сное бога́тство восприя́л еси́ и сла́ву, о́тче, и́стинно ве́чнующую, блаже́нне. Те́мже блажи́м свято́е твое́ успе́ние и, торжеству́юще в не́м, вопие́м тебе́: помяни́ на́с ко Го́споду, я́ко име́я, Иоа́нне, дерзнове́ние.

Слава И ны́не, Богородичен:

Яко невозде́ланная, Де́во, лоза́, красне́йший Гро́зд прозябла́ еси́, источа́ющь на́м вино́ спаси́тельное, все́х веселя́щее ду́ши и телеса́. Те́мже, я́ко вину́ Тя́ до́брых блажа́ще при́сно, со Ангелом вопие́м Тебе́: ра́дуйся, Благода́тная.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Преподобне отче Иоанне, моли Бога о нас.

В ру́бищах убо́гих сокро́вище сокрове́но яви́лся еси́, богодохнове́нне: Боже́ственную бо оде́жду возлюби́л еси́ и, оде́явся, в черто́г вы́шний вше́л еси́.

Припев: Преподобне отче Иоанне, моли Бога о нас.

Прие́м небе́сное се́мя, богодохнове́нне, се́рдца браздо́ю кла́с красе́н возде́лал еси́, умы́ препитава́ющь преподо́бно па́мять твою́ чту́щим.

Сла́ва Отцу́ и Сы́ну и Свято́му Ду́ху:

Претерпе́л еси́ в те́снейшей ку́щи, чу́дне, ни́щь, я́коже други́й Ла́зарь, во́лею бы́в. Те́мже почи́л еси́ Авраа́ма ны́не в не́дрех, о́тче преподо́бне.

И ны́не и при́сно и во ве́ки веко́в. Ами́нь.

Богородичен: Упра́ви моея́ души́ движе́ния, Всенепоро́чная, к Боже́ственным повеле́нием Возсия́вшаго из чре́ва Твоего́, бу́ри избавля́ющи мя́ жите́йских собла́знов хода́тайством Твои́м.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Преподобне отче Иоанне, моли Бога о нас.

Стра́нен земны́х сласте́й бы́л еси́, стра́нен свои́х, стра́нен роди́телей твои́м изволе́нием, и, воздержа́нием себе́ очи́стив, усво́ился еси́ Вседержи́телю, о́тче Иоа́нне, обнища́в ду́хом.

Припев: Преподобне отче Иоанне, моли Бога о нас.

Хра́м себе́ Святы́я Тро́ицы соверши́в, претерпе́л еси́, утесня́емь ку́щею, Боже́ственными поуче́нии ду́шу очища́я и добро́ту Бо́жию неизглаго́ланную, о́тче Иоа́нне, при́сно зря́.

Сла́ва Отцу́ и Сы́ну и Свято́му Ду́ху:

Зако́на Бо́жия испо́лнитель яви́лся еси́, ничто́же предсуди́в па́че Сего́ любве́, богому́дре о́тче, ни бра́тии бо, ни роди́телей тя́ любо́вь, ниже́ бога́тство, ниже́ досто́инство, ниже́ пло́ти сла́дость разсла́биша.

И ны́не и при́сно и во ве́ки веко́в. Ами́нь.

Богородичен: Емману́ила, все́х Влады́ку, ражда́еши нетле́нно, пребы́вши Де́ва и по рождестве́, Де́во Ма́ти. Его́же непреста́нно моли́ искуше́ний вра́жиих изба́вити под кро́в Тво́й прибега́ющия.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Преподобне отче Иоанне, моли Бога о нас.

Го́рдаго зми́я низложи́л еси́ смиреному́дрия ору́жии, всеблаже́нне, и, возвы́сився ду́хом, во оби́тели присножи́зненныя всели́лся еси́.

Припев: Преподобне отче Иоанне, моли Бога о нас.

Дарова́ний испо́лнился еси́ Ду́ха и лука́вствия покори́л еси́ ду́хи, я́ко смы́слен, и прему́др, и Бо́гу весьма́ возложе́н.

Сла́ва Отцу́ и Сы́ну и Свято́му Ду́ху:

Безстра́стия сия́я высота́ми, о́тче Иоа́нне, коли́бою утесня́емь и напа́стьми облага́емь, терпе́л еси́, Боже́ственне укрепля́емь.

И ны́не и при́сно и во ве́ки веко́в. Ами́нь.

Богородичен: Равноде́тельна Ро́ждшему и сопресто́льна Сло́ва из утро́бы Твоея́, Чи́стая, воплоти́ла еси́, за благоутро́бие неизрече́нное на́ше все́ поне́сшаго.

Конда́к, гла́с 2.

Возлюби́в, прему́дре, нищету́ неокра́дому, роди́телей твои́х бога́тство возненави́дел еси́ и, Ева́нгелие в рука́х твои́х держа́, после́довал еси́ Христу́ Бо́гу, Иоа́нне, моля́ся непреста́нно о все́х на́с.

Икос:

Кто́ дово́лен досто́йно воспе́ти твоя́ труды́, и боле́зни, и де́лания мно́гая, и сла́ву, и вели́чество? Но моли́твами твои́ми к Бо́гу благоприя́тными Ду́ха благода́ть мне́ ны́не пода́ждь, я́ко да твоя́ па́че естества́ по́двиги изреку́ ве́рно и воспою́, е́же па́че сло́ва, терпе́ние твое́ и со́вести пожда́ние, всеблаже́нне, льсти́ваго врага́ посрами́л еси́. Не преста́й моля́ся о все́х на́с.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Преподобне отче Иоанне, моли Бога о нас.

Те́сный предпоче́л еси́, не́жели простра́нный, пу́ть, достосла́вне, и, ра́дуяся, претерпе́л еси́ пред враты́ роди́телей твои́х, укоря́емь и удруча́емь мно́гими боле́зньми, богоблаже́нне.

Припев: Преподобне отче Иоанне, моли Бога о нас.

Тебе́ сама́го удобри́л еси́ красне́йшими, му́дре, восхожде́нии, пло́ти умертви́в мудрова́ние. Те́мже всели́лся еси́ в небе́сная, лико́м счисля́емь при́сно честны́х отце́в, досточу́дне.

Сла́ва Отцу́ и Сы́ну и Свято́му Ду́ху:

Пути́ ше́ствуя, вводя́щия к Боже́ственному поко́ю, уклони́лся еси́ про́пастей де́монских, блаже́нне, Боже́ственною покрыва́емь благода́тию, вопия́ше: Сы́й благослове́н и препросла́влен.

И ны́не и при́сно и во ве́ки веко́в. Ами́нь.

Богородичен: Пое́м Рождество́ Твое́, Благослове́нная, и́мже изба́вихомся дре́вняго осужде́ния, и Тя́ блажи́м, Богоблаже́нная, Еди́ну, Юже возлюби́, Сы́й благослове́н и препросла́влен.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Припев: Преподобне отче Иоанне, моли Бога о нас.

Неветша́емый себе́, Иоа́нне, доброде́тельми упещре́нне истка́ хито́н одея́нием нище́тным: в ви́де ни́щаго ты́ оде́ялся еси́, пред враты́ роди́телей претерпева́я.

Припев: Преподобне отче Иоанне, моли Бога о нас.

Непоро́чен, я́коже други́й Иов, пред враты́ злостра́ждеши, я́ко на гно́ищи, терпя́ уко́ры рабо́в твои́х, му́дре, гла́дом же и жа́ждею дручи́мь, те́мже насле́довал еси́ го́рнее Ца́рствие.

Сла́ва Отцу́ и Сы́ну и Свято́му Ду́ху:

После́довал еси́ я́ве, е́же прия́л еси́ рука́ми, Ева́нгелию, и обнища́л еси́, блаже́нне, се́туя во все́й жи́зни, и кро́ток бы́л еси́, и незло́бив, и Ца́рствия го́рняго насле́дник.

И ны́не и при́сно и во ве́ки веко́в. Ами́нь.

Богородичен: Струю́ приснотеку́щую на́м, притека́ющим к Тебе́, Чи́стая, то́чиши: ея́же оби́льную благода́ть почерпа́юще, Твое́ пое́м Рождество́, Пречи́стая, и превозно́сим во ве́ки.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Преподобне отче Иоанне, моли Бога о нас.

Кре́пость моя́ и пе́ние Госпо́дь, — взыва́л еси́, — предста́теля тмы́ в Се́м побежда́ю, мечта́нных ле́стей, я́же от него́, ника́коже бою́ся, еди́ну мечта́я добро́ту Боже́ственную и непристу́пную.

Припев: Преподобне отче Иоанне, моли Бога о нас.

Яко земля́ тучна́, преподо́бне, твое́ се́рдце прия́т небе́сное се́мя у́мными бразда́ми и стори́чествующий кла́с плодоно́сит, пита́ющи все́х, ве́рно чту́щих тя́, ду́ши, богоблаже́нне.

Сла́ва Отцу́ и Сы́ну и Свято́му Ду́ху:

Освяти́ Госпо́дь из ложе́сн тя́, блаже́нне, и к Себе́ ше́ствия твоя́ напра́ви. Те́мже счи́слился еси́ преподо́бным, благоче́стно пожи́вшим, с ни́миже обоже́ния наслажда́ешися, пресла́вне.

И ны́не и при́сно и во ве́ки веко́в. Ами́нь.

Богородичен: Све́та жили́ще утро́ба Твоя́ бы́ст, Имже све́т во тме́ седя́щии ви́деша. Те́мже Тя́ гла́сы немо́лчными, Ма́ти Бо́жия, при́сно воспева́ем и любо́вию почита́ем, я́ко наде́жду ду́ш на́ших.

Свети́лен.

Роди́телей пристра́стие оста́вив и бога́тство теку́щее, тво́й кре́ст взя́л еси́, о́тче, и Христу́, Иоа́нне, преусе́рдно после́довал еси́: по́стнически же умертви́л еси́ стра́сти, к безстра́стию восте́кл еси́ и мо́лишися о на́с, богоно́се.

Сла́ва, и ны́не, Богородичен:

Сове́та вели́каго Ангела Отча родила́ еси́, Христа́, Всепе́тая Отрокови́це, Царя́ сла́вы, Его́же Кре́ст преподо́бнии и по́стницы взе́мше, в сле́д Сего́ потеко́ша. С ни́миже непреста́нно моли́ о на́с, Богоро́дице.

Молитва преподобному Иоанну Кущнику

О, свяще́нная главо́, преподо́бне о́тче, преблаже́нне а́вво Иоа́нне! Не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными си́лами, у Престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.