28 января.

Канон преподобному Гавриилу Лесновскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 8:

Возлюби́в Христа́ усе́рдно па́че все́х, и украси́вся кро́тостию, смире́нием и терпе́нием, все́ житие́ свое́ на земли́ предложи́л еси́ Ему́. Те́м бо небе́сныя оби́тели насле́довав, пра́ведных ча́сти сподо́бился еси́, с ни́ми же моли́ся спасти́ся душа́м на́шим.

Велича́ние:

Ублажа́ем тя́, преподо́бне о́тче Гаврии́ле, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 6:

Преподо́бне о́тче Гаврии́ле, во всю́ зе́млю изы́де веща́ние исправле́ний твои́х. Те́м на небесе́х обре́л еси́ мзду́ трудо́в твои́х, де́монския погуби́л еси́ полки́ и Ангельския дости́гл еси́ чи́ны, и́хже житию́ без поро́ка поревнова́л еси́. Дерзнове́ние име́я ко Христу́ Бо́гу, ми́р испроси́ душа́м на́шим.

Кано́н преподо́бнаго, гла́с 3.

Пе́снь 1.

Ирмос: Ди́вно, сла́вно творя́й чудеса́ Ты́ еси́, Бо́же, бе́здну оземлени́вый, и колесни́цы потопи́вый, и лю́ди спасы́й, пою́щия Тебе́, я́ко Царю́ на́шему и Бо́гу.

Припев: Преподобне отче Гаврииле, моли Бога о нас.

Го́спода усе́рдно возлюби́вый и подвиза́яся жела́тельно дости́гнути Ца́рства небе́снаго, просвети́лся еси́ Боже́ственною благода́тию, озари́ ми́ у́м воспе́ти житие́ твое́.

Припев: Преподобне отче Гаврииле, моли Бога о нас.

Никто́же мо́жет изчести́ по́двиги и труды́ твоя́, всено́щная бде́ния и к си́м ины́х мно́жества доброде́телей, и́мже возме́здие от Бо́га прия́л еси́.

Сла́ва Отцу́ и Сы́ну и Свято́му Ду́ху:

Ди́вное на земли́ житие́ пожи́л еси́, бдя́, моля́ся и тружда́яся, сего́ ра́ди всели́лся еси́ во оби́тели небе́сныя.

И ны́не и при́сно и во ве́ки веко́в. Ами́нь.

Богородичен: Изба́ви ду́шу мою́ от се́ти диа́воли, Пречи́стая Богоро́дице, Ты́ бо еси́ все́х земны́х кре́пкое поможе́ние и те́плое заступле́ние.

Пе́снь 3.

Ирмос: Утверди́, Го́споди, сердца́ на́ша и просвети́ к Твоему́ песнопе́нию, е́же сла́вити Тя́, Спа́се, во ве́к ве́ка.

Припев: Преподобне отче Гаврииле, моли Бога о нас.

Благода́тию Бо́жия про́мысла озари́вся, стра́нен яви́лся еси́ от все́х сро́дник и зна́емых, прилепи́вся к сро́дству небе́сному, и ны́не живе́ши жи́знь безконе́чную.

Припев: Преподобне отче Гаврииле, моли Бога о нас.

Уме́тие вмени́л еси́ вся́ кра́сная ми́ра сего́, ничто́же бо па́че Христо́вы любве́ изво́лил еси́, жела́я насы́титися Сего́ сла́вы и весе́лия присносу́щнаго, в ня́же и Ангели жела́ют прини́кнути.

Сла́ва Отцу́ и Сы́ну и Свято́му Ду́ху:

Име́я в души́ ве́ру неоску́дну, да́нный тебе́ тала́нт трудолю́бно возде́лал еси́ и прия́л еси́ вла́сть на ду́сех нечи́стых: не забу́ди на́с, творя́щих святу́ю па́мять твою́.

И ны́не и при́сно и во ве́ки веко́в. Ами́нь.

Богородичен: Влады́чице, Ма́ти Бо́жия, Благослове́нная и Пренепоро́чная, души́ моея́ стру́пы исцели́ и стра́сти плотски́я умертви́, у́м мо́й от вся́каго вре́да вра́жия и напа́стей изми́, молю́ Тя́.

Седа́лен, гла́с 2:

Смире́нием и жесто́ким подвиза́нием сы́н све́та показа́лся еси́, и ны́не в Ца́рствии небе́снем я́сно зри́ши Святу́ю Тро́ицу, преблаже́нне Гаврии́ле, Юже моли́ согреше́ний оставле́ние дарова́ти, пра́зднующим любо́вию святу́ю па́мять твою́.

Сла́ва, и ны́не, богоро́дичен, гла́с то́йже:

Красоте́ Твое́й, Богора́дованная, арха́нгел Гаврии́л предстоя́ дивля́шеся, и вопия́ше Ти́: о, Неве́сто Неискусобра́чная, Отрокови́це Небла́зненная! Ка́ко Ти́ изреку́ пре́жде ве́к сокрове́нную та́йну? Ты́ бо еси́ небе́сным и земны́м соедине́ние. Ра́дуйся, Обра́дованная, Госпо́дь с Тобо́ю!

Пе́снь 4.

Ирмос: Стра́нна и неизрече́нна Рождества́ Твоего́ та́йна! Услы́шах слу́х Тво́й, и убоя́хся, и, веселя́ся, вопию́ Ти: си́ле Твое́й сла́ва, Человеколю́бче.

Припев: Преподобне отче Гаврииле, моли Бога о нас.

Бы́л еси́ сы́н послуша́ния, и страстны́я по́мыслы покори́в уму́-влады́це, вопия́л еси́ Христу́: си́ле Твое́й сла́ва, Человеколю́бче.

Припев: Преподобне отче Гаврииле, моли Бога о нас.

В пусты́ни живы́й, я́ко во гра́де, преподо́бне о́тче Гаврии́ле, ни от чего́же смуща́яся, но ра́ди трудо́в твои́х венча́лся еси́ от Христа́ Бо́га, Ему́же пое́ши немо́лчно: си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Грехо́вное омраче́ние возненави́дев и све́т Ангельския чистоты́ возлюби́в, возлете́л еси́ я́ко златы́ми крила́ми на небеса́, непреста́нно поя́: си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: Кро́в, и заступле́ние, и прибе́жище, бу́ди ми́, рабу́ Твоему́, Богоро́дице, и от безме́рных зо́л исцели́ мя́, да пою́ Ти́, Пречи́стая: сла́ва Рождеству́ Твоему́.

Пе́снь 5

Ирмос: Све́том Твои́м невече́рним, Христе́, озари́, Бо́же, смире́нную мою́ ду́шу и наста́ви на стра́х Тво́й, зане́ све́т — повеле́ния Твоя́.

Припев: Преподобне отче Гаврииле, моли Бога о нас.

На горе́ Ле́сновстей процве́л еси́ я́ко кипари́с, преподо́бне о́тче Гаврии́ле, и плоды́ ду́ха прине́сл еси́ во мно́зе терпе́нии: теле́сное удруче́ние, и от бесо́в и злы́х челове́к озлобле́ние, сего́ ра́ди прия́л еси́ ве́чное утеше́ние.

Припев: Преподобне отче Гаврииле, моли Бога о нас.

Не от челове́к бы́сть твое́ зва́ние, но от Бо́га, прему́дре Гаврии́ле, и, я́ко еле́нь жажда́я, на исто́чники воды́ живы́я поте́кл еси́, напитава́я ду́шу Христо́вою любо́вию. Укрепи́ бо тя́ на сие́ Ца́рь ми́ра.

Сла́ва Отцу́ и Сы́ну и Свято́му Ду́ху:

Просвеще́н бы́в Бо́жиею прему́дростию, веще́ственный о́гнь невеще́ственным угаси́л еси́, и чистото́ю жития́ твоего́ безтеле́снаго во́инства ли́ку сподо́бился еси́.

И ны́не и при́сно и во ве́ки веко́в. Ами́нь.

Богородичен: Источа́еши исцеле́ний струи́ боля́щим всю́ду. Тя́ бо показа́ ми́лости Госпо́дь, рожде́йся из Тебе́ па́че ума́, исто́чника милосе́рдия, Влады́чице.

Пе́снь 6.

Ирмос: Глубина́ страсте́й воста́ на мя́ и бу́ря проти́вных ве́тров, но́, предвари́в, мя Ты́ спаси́, Спа́се, и изба́ви от тли́, я́ко спа́сл еси́ от зве́ря проро́ка.

Припев: Преподобне отче Гаврииле, моли Бога о нас.

Ду́хом Бо́жиим наставля́емь, богоблаже́нне, соблю́л еси́ чистоту́ естества́ твоего́, ангелоподо́бное житие́ име́л еси́. Те́мже моли́ спасти́ся на́м от вра́г на́ших.

Припев: Преподобне отче Гаврииле, моли Бога о нас.

Ум сво́й всегда́ к Бо́гу име́в, ко все́м жите́йским бы́л еси́ нечу́вствен, вся́ же кова́рства лука́ваго, я́ко се́ть, расто́ргнул еси́, и ны́не мо́лишися непреста́нно о все́х на́с.

Сла́ва Отцу́ и Сы́ну и Свято́му Ду́ху:

Мо́лим тя́, богоблаже́нне о́тче Гаврии́ле, моли́ Христа́ Бо́га на́шего за оте́чество на́ше правосла́вное, и все́м ве́рным испроси́ от гре́х свобожде́ние, и спасе́ние, и ми́р ми́рови.

И ны́не и при́сно и во ве́ки веко́в. Ами́нь.

Богородичен: Ру́ки Твоя́ пречи́стыя просте́рши, покры́й на Тя́ наде́ющияся, и Сы́ну Твоему́, Богоро́дице, зову́щия: пода́ждь, Христе́, все́м ми́лости Твоя́.

Конда́к, гла́с 6:

Ангельски на земли́ пожи́л еси́, житие́м же Ева́нгелие уясни́л еси́, у́м тво́й к небеси́ впери́л еси́, лю́ди же благоче́стию учи́л еси́, сего́ ра́ди ублажа́ем тя́: ра́дуйся, преподо́бне Гаврии́ле, Ле́сновская похвало́.

Икос:

Увы́ мне́, скве́рному и всегре́шному, я́ко дерзну́х пе́ти тебе́, чи́стому и свято́му, преподо́бне о́тче Гаврии́ле, но, наде́яся на милосе́рдие и по́мощь твою́, оба́че дерза́ю воспева́ти: ты́ бо земны́й Ангел и небе́сный челове́к бы́л еси́, Христу́ от души́ после́довал еси́, на земли́ бо о тле́нных небре́гл еси́, боле́зньми, и труды́, и зе́льным воздержа́нием, злострада́нием, и на земли́ лега́нием, посто́м, бде́нием и моли́твами о́браз бы́л еси́ твои́м ученико́м, хра́м же те́ла твоего́ непоро́чен соблю́л еси́, бы́в до́м Бо́жий и жили́ще Свята́го Ду́ха, сего́ ра́ди прише́д, всели́ся в тя́ Оте́ц и Сы́н и Святы́й Ду́х, и дарова́ тебе́ насле́дие небе́сное, те́м тя́ чти́м: ра́дуйся, преподо́бне Гаврии́ле, Ле́сновская похвало́.

Пе́снь 7.

Ирмос: В пещи́ пла́мень угаси́ша о́троцы и небе́сную ро́су прия́ша ве́рою: благослове́н еси́, Бо́же оте́ц на́ших.

Припев: Преподобне отче Гаврииле, моли Бога о нас.

Зря́ всегда́ пред очи́ма де́нь Госпо́день, послужи́л еси́ Влады́це твоему́ во мно́зе терпе́нии, воспева́я: благослове́н еси́, Бо́же оте́ц на́ших.

Припев: Преподобне отче Гаврииле, моли Бога о нас.

Ничто́же от кра́сных ми́ра сего́ разлучи́ тя́ от любве́ Христо́вы, и́бо па́че все́х возлюби́л еси́ Иису́са сла́дкаго, Ему́же и вопие́ши: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Безстра́стен пребыва́я, богоблаже́нне, показа́лся еси́ душе́ю тве́рдый адама́нт, и ны́не, предстоя́ Христу́, взыва́еши: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Смире́нныя моея́ души́ не пре́зри, Всечи́стая, но вско́ре уще́дри, и от мно́жества соде́янных мно́ю лю́тых спаси́ мя́ и, обно́вльши благода́ть Твою́, просвети́ мя́, Де́во Чи́стая.

Пе́снь 8.

Ирмос: На престо́ле херуви́мсте Носи́маго, свяще́нницы, по́йте, лю́дие, превозноси́те во вся́ ве́ки.

Припев: Преподобне отче Гаврииле, моли Бога о нас.

Просия́л еси́ на све́щнице Христо́ва сия́ния, и Госпо́дь Христо́с чуде́с да́ром обогати́ тя́, и яви́ тя́ вселе́нней зна́ема. И ны́не с тобо́ю вси́ вопию́т: благослови́те, вся́ дела́ Госпо́дня, Го́спода, и превозноси́те во вся́ ве́ки.

Припев: Преподобне отче Гаврииле, моли Бога о нас.

Изря́ден яви́лся еси́ мно́гими труды́ и по́двиги, и та́йными к Бо́гу моли́твами, а́ще челове́ком и неве́домы, но Бо́гом вся́ зри́мы и ве́домы, Ему́же вопие́ши: благослови́те, вся́ дела́ Госпо́дня, Го́спода, и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Земны́х ничто́же возлюби́л еси́, у́м сво́й во глубину́ смире́ния погрузи́л еси́, жела́я всели́тися в Ца́рство небе́сное, е́же и получи́в, вопие́ши: благослови́те, вся́ дела́ Госпо́дня, Го́спода, и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Благослови́те, вся́ дела́ Госпо́дня, Го́спода, ро́ждшагося от Де́вы Мари́и и возне́сшаго па́ки челове́чество на высоту́ небе́сную, Ему́же вопию́т вси́ Ангели: да благослови́т вся́ тва́рь Го́спода, и превозно́сит во вся́ ве́ки.

Песнь 9

Ирмос: Тебе́, Неопали́мую Купину́ и Святу́ю Де́ву, Ма́терь Све́та и Богоро́дицу, Наде́жду все́х на́с, велича́ем.

Припев: Преподобне отче Гаврииле, моли Бога о нас.

Бы́л еси́ сы́н и насле́дник Ца́рствия Бо́жия, е́же скры́л еси́ вну́трь себе́ доброде́тели, сего́ ра́ди ублажа́ем тя́, Христа́ велича́юще.

Припев: Преподобне отче Гаврииле, моли Бога о нас.

Вси́ собо́ри Се́рбстии, ю́ноши и де́вы, ста́рцы и ста́рицы, не́мощни и кре́пцы, покланя́ются честны́м моще́м твои́м и ублажа́ют тя́, Христа́ велича́юще.

Сла́ва Отцу́ и Сы́ну и Свято́му Ду́ху:

Па́мять твою́ светоно́сную похваля́юще, мо́лим тя́, преподо́бне о́тче, испо́лни и на́с ра́дости и весе́лия духо́внаго.

И ны́не и при́сно и во ве́ки веко́в. Ами́нь.

Богородичен: Возвели́чим Ма́терь Бо́га на́шего, Юже пою́т вся́ небе́сныя си́лы святы́х Ангел и арха́нгел, и вси́ ро́ди и коле́на покланя́ются и блажа́т, вопию́ще: ра́дуйся, Благода́тная, Госпо́дь с Тобо́ю.

Свети́лен.

Све́том Христо́вым просвети́вся, показа́лся еси́ свети́льник всему́ ро́ду на́шему, и́бо горя́ ду́хом по за́поведи Христо́ве, все́х просвеща́л еси́ Ева́нгелием, и ны́не, предстоя́ во све́те Святы́я Тро́ицы, моли́ о е́же спасти́ся на́м.

Сла́ва, и ны́не, Богородичен:

Све́т ро́ждши ду́ш на́ших, Богоро́дице, Христа́ от Отца́ возсия́вшаго, просвети́вшаго вся́ ве́рныя и отгна́вшаго тму́ идолобе́сия, на́м же дарова́вшаго благода́тию бы́ти ча́дом Бо́жиим, водворя́тися во све́те присносу́щнем, и Ду́хом Бо́жиим освяща́тися, Тя́ воспева́ющим.

Стихи́ры, гла́с 2.

На высоту́ доброде́телей / восте́кл еси́, / попра́в ко́зни вра́жия, / преподо́бне о́тче Гаврии́ле, / побе́ды вене́ц / восприя́л еси́.

Сти́х: Честна́ пред Го́сподем / сме́рть преподо́бных Его́.

Ца́рства ра́ди небе́снаго / подвиза́лся еси́ на земли́, / богоблаже́нне Гаврии́ле, / Христу́ после́довав, / дарова́ний Свята́го Ду́ха / сподо́бился еси́.

Сти́х: Блаже́н му́ж, боя́йся Го́спода, / в за́поведех Его́ восхо́щет зело́.

Име́я в души́ свое́й / сокрове́нно бога́тство, / до́м Ду́ха Свята́го бы́л еси́, / моли́ спасти́ся / душа́м на́шим.

Сла́ва, гла́с 6:

Прино́сим дне́сь похва́льную пе́снь в па́мяти твое́й, о́тче Гаврии́ле, приими́ и предвари́ к Бо́гу твои́ми моли́твами, и изба́ви на́с шу́ияго стоя́ния и сподо́би десна́го предстоя́ния, да тя́ вси́ я́ко те́пла засту́пника досто́йно ублажа́ем.

И ны́не, богоро́дичен, гла́с то́йже:

Творе́ц и Изба́витель мо́й, Пречи́стая, Христо́с Госпо́дь, из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́, Всечи́стая, я́ко Бо́жии Ма́тери же и Де́ве, вои́стинну вопие́м немо́лчно: ра́дуйся Ангельски, ра́дуйся, Влады́чице, предста́тельство, и покро́ве, и спасе́ние ду́ш на́ших.

Молитва

О свяще́нная главо́, преподо́бне о́тче, преблаже́нне а́вво Гаврииле, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.