26 января.

Канон святым отцам, в Синаи и Раифе избиенных.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н преподо́бных. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святи́и преподобному́ченицы, моли́те Бо́га о на́с.

Воздержа́нием светови́дни бы́вше, блаже́ннейшии, богови́дни яви́стеся я́ве истоще́нием кро́ве. Те́мже сра́дуетеся по́стником Христо́вым и му́чеником.

Припев: Святи́и преподобному́ченицы, моли́те Бо́га о на́с.

Мо́рем сле́з пе́рвее удави́сте фарао́на, му́дрии, мы́сленнаго, кро́вными по́слежде тече́ньми погуби́сте и безве́стию препосла́сте.

Сла́ва Отцу́ и Сы́ну и Свято́му Ду́ху:

Просвеща́я Светода́вец Госпо́дь ва́ше поще́ние терпе́нием, уго́дницы Христо́вы, светоза́рно соде́ла и я́вственно страда́ние, па́че зари́ со́лнечныя сия́ющее.

И ны́не и при́сно и во ве́ки веко́в. Ами́нь.

Богородичен: Сы́й по естеству́ Госпо́дь, все́м невмести́мь, в Тебе́ вмеща́ется, Влады́чице, Челове́к благоутро́бием бы́в, да челове́ки за неизрече́нное человеколю́бие спасе́т.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Припев: Святи́и преподобному́ченицы, моли́те Бо́га о на́с.

Сокруше́нною мы́слию Бо́гу угоди́вше, сокруши́сте вра́жие велехвале́ние, блаже́ннии, мече́м сокруша́еми и умерщвля́еми.

Припев: Святи́и преподобному́ченицы, моли́те Бо́га о на́с.

Смотря́юще пребыва́ющих, му́дрии, присносу́щное, нестоя́нных и тле́нных до́лу влеку́що отри́нусте, те́мже ублажа́етеся, преподобному́ченицы.

Сла́ва Отцу́ и Сы́ну и Свято́му Ду́ху:

Зако́ну Боже́ственному благопоко́рною мы́слию повину́вшеся, плотски́я сла́сти воздержа́нием погуби́сте и, ны́не пострада́вше, сла́ву улучи́сте.

И ны́не и при́сно и во ве́ки веко́в. Ами́нь.

Богородичен: Пресвята́я, Пресвято́е Сло́во ро́ждшая, освяти́ на́ша и ду́ши и телеса́, блажа́щих Тя́, Всенепоро́чную.

Седален, глас 4

Я́ко пресе́льницы явля́еми и прише́льцы на земли́, ку́щи водрузи́вше в пусты́нях, я́ве пости́стеся, преподо́бнии, нагото́ю украси́вшеся, доброде́телей оде́ждею, сообра́зни бы́вше Христо́вых страсте́й, те́мже и претерпе́сте ва́рварское заколе́ние.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святи́и преподобному́ченицы, моли́те Бо́га о на́с.

Не страстьми́ теле́сными победи́вшеся, врага́ победи́ли есте́ и, умертви́вшеся мече́м, всеблаже́ннии, к жи́зни небе́сней, ра́дующеся, ку́пно преста́вистеся.

Припев: Святи́и преподобному́ченицы, моли́те Бо́га о на́с.

Утучни́стеся, я́ко а́гнцы, воздержа́нием, и, я́ко овни́ назнамени́тии, рука́ми кровопи́йц волко́в убие́ни бы́сте, и соверше́нна заколе́ния, преподо́бнии, Христу́ приведо́стеся.

Сла́ва Отцу́ и Сы́ну и Свято́му Ду́ху:

Свяще́нницы же, и ста́рцы, и ю́ноши, и́же в Раи́фе и Сина́и горе́ живу́щии, му́ченицы бы́ша, преподо́бно жи́вше и ну́жно уме́рше.

И ны́не и при́сно и во ве́ки веко́в. Ами́нь.

Богородичен: Новоде́лает челове́чество но́в Младе́нец, Преве́чный Госпо́дь, яви́вся от Де́вы и Челове́к бы́в. Тому́ воспои́м: сла́ва си́ле Твое́й, Го́споди.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святи́и преподобному́ченицы, моли́те Бо́га о на́с.

Ра́й сла́дости, жи́зни дре́во, Го́спода, яви́стеся, посреди́ име́яй, ва́шу я́ко же́ртву кро́вь прии́мшаго.

Припев: Святи́и преподобному́ченицы, моли́те Бо́га о на́с.

Крове́й то́ки со сле́зными смеси́вше струя́ми, богоно́сцы, многообра́знаго зми́я в си́х погрузи́сте.

Сла́ва Отцу́ и Сы́ну и Свято́му Ду́ху:

Красоту́ Бо́жию зре́ти сподо́бистеся, ве́чное весе́лие вме́сто трудо́в и боле́зней, блаже́ннии, прия́сте.

И ны́не и при́сно и во ве́ки веко́в. Ами́нь.

Богородичен: Родила́ еси́ Бо́га па́че сло́ва и мы́сли, и пребыла́ еси́ по рождестве́, я́ко пре́жде рождества́, Де́ва, Чи́стая Богора́дованная.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святи́и преподобному́ченицы, моли́те Бо́га о на́с.

Отве́ргше пристра́стия у́зы по́стничеством, ну́жнейшею сме́ртию у́з теле́сных разреши́стеся и нереши́мою любо́вию связа́стеся Зижди́теля.

Припев: Святи́и преподобному́ченицы, моли́те Бо́га о на́с.

Я́ко го́ры высо́кия, жи́тельством я́вльшеся, объя́ти го́ры и созда́ние все́ претя́щаго, си́лою Христо́вою под но́ги покори́сте.

Сла́ва Отцу́ и Сы́ну и Свято́му Ду́ху:

Вода́ми напои́вшеся сле́з, блаже́ннии, я́ко земля́ добра́ же и ту́чна, муче́ния кла́с плодоноси́сте, в жи́тницах ве́чных Христу́ соблюда́емый.

И ны́не и при́сно и во ве́ки веко́в. Ами́нь.

Богородичен: Успи́ страсте́й пло́ти моея́ во́лны неусы́пною Твое́ю, Де́во, моли́твою, молю́ся, и не да́ждь грехо́вным усну́ти мне́ сно́м тяжча́йшим.

Кондак, глас 2

От мирски́я молвы́ избего́сте и к ти́хому приста́нищу преста́вистеся, му́ченичества кровьми́ и по́стничества труда́ми венча́еми. Те́мже и показа́стеся му́чеников и преподо́бных единовсе́льницы.

Икос

Я́же на земли́ умертви́вше у́ды, жизноно́сною ме́ртвостию Христа́ и Бо́га стра́сть изобрази́сте, пе́рвее, в до́брем поще́нии, и второ́е, па́ки во страда́нии. Те́мже и Са́м сугу́бы венцы́ низпосла́ глава́м ва́шим, отцы́, угото́вив жили́ще небе́сное и ме́сто ве́чное, иде́же ны́не, ра́дующеся, яви́стеся му́чеников и преподо́бных единовсе́льницы.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святи́и преподобному́ченицы, моли́те Бо́га о на́с.

Просвеще́ни воздержа́ния светлостьми́ и страда́ньми свяще́нными, му́ченицы, явле́нно освяща́еми, преидо́сте к Све́ту незаходи́мому и дне́ сы́нове бы́сте.

Припев: Святи́и преподобному́ченицы, моли́те Бо́га о на́с.

Во́лею су́щих в ми́ре сла́дких устраня́ющеся, стра́нно челове́ком Я́вльшемуся пло́тию присво́истеся, пребыва́ющая и неистлева́ющая блага́я насле́довавше, преподо́бнии.

Сла́ва Отцу́ и Сы́ну и Свято́му Ду́ху:

Боже́ственный Па́вел, и Иоа́нн, и Феоду́л, Ни́л и вку́пе вси́, всесла́вно и уме́рше, и пожи́вше, да ублажа́тся по́стницы и сла́внии му́ченицы.

И ны́не и при́сно и во ве́ки веко́в. Ами́нь.

Богородичен: Тя́, ма́нну жи́зни во чре́ве Твое́м нося́щую, дре́вле манноприе́мная ста́мна я́ко вои́стинну прообража́ше явле́нно. Благослове́нна Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святи́и преподобному́ченицы, моли́те Бо́га о на́с.

Велича́йший ли́к, по́стническими доблестьми́ укра́шен, преподо́бных дне́сь вся́ лико́вники боже́ственныя показу́ет, восхваля́ющия у́бо того́, Христу́ же пою́щия: благослови́те, вся́ дела́ Госпо́дня, Го́спода.

Припев: Святи́и преподобному́ченицы, моли́те Бо́га о на́с.

Закла́ни бы́сте, я́коже а́гнцы, ва́рварскими мечи́ ссека́еми, и приведо́стеся соверше́нна закла́вшемуся Сло́ву заколе́ния и в ски́ниих перворо́дных всели́стеся, песнопою́ще: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

На́зи, вся́кия су́ще сла́дости пра́отцы обнажи́вшаго, отцы́ преподо́бнии, зле́йшаго врага́ обнажи́сте: оде́жду же свяще́нну, я́ко пострада́вше, прии́мше, сего́ в сту́д, му́дрии, облеко́сте.

И ны́не и при́сно и во ве́ки веко́в. Ами́нь.

Богородичен: Отверза́ется па́ки Тебе́ ра́ди дре́вний ра́й, и в о́нь вво́дится пре́жде осужде́нный челове́к и обожа́ется и́стиннейше, Богоблагода́тная Чи́стая, челове́ков на обновле́ние, вопию́щих: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святи́и преподобному́ченицы, моли́те Бо́га о на́с.

Священносло́вии преподо́бными, свяще́нныя, прииди́те, отцы́, в Раи́фе и в Сина́и пожи́вшия в преподо́бии и благоче́стно пострада́вшия, велегла́сно велича́ем.

Припев: Святи́и преподобному́ченицы, моли́те Бо́га о на́с.

Те́ло и ду́шу Го́споду освяти́сте преподо́бно, воздержа́ния по́ты освяти́вшеся и кро́вными тече́нии изсуши́вше ва́рварския зло́бы мо́ре.

Сла́ва Отцу́ и Сы́ну и Свято́му Ду́ху:

Богосия́нная ва́ша па́мять, восто́ками просвеща́ема, за Христа́ ва́ших боле́зней помышле́ния все́х, блаже́ннии, озаря́ет благода́тию Вседе́теля и Боже́ственнаго Ду́ха.

И ны́не и при́сно и во ве́ки веко́в. Ами́нь.

Богородичен: Трепе́щут херуви́ми, зря́ще на ни́х неизглаго́ланным сло́вом седя́щаго Сло́ва, Ма́терними рука́ми Младе́нца держи́ма Твои́ми, Пресвята́я Влады́чице, вы́шши вся́кия тва́ри.

Свети́лен.

Боле́зньми по́стничества злонача́льнаго зми́я до конца́ уби́сте, при кончи́не же вене́ц муче́ния прия́сте, отце́в похвало́ и му́чеников сла́ва, и́же в Раи́фе и Сина́и всесвяще́нное мно́жество чу́дных отце́в.

Молитва

Святи́и му́ченицы отцы́, в Раи́фе и в Сина́и пожи́вшия! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.