25 января
Канон иной преподобным Симеону новому мироточцу, и святителю Савве чудотворцу, учителем Сербским.
![Преподобным и богоносным Симеону новому мироточцу, и святителю Савве чудотворцу Преподобным и богоносным Симеону новому мироточцу, и святителю Савве чудотворцу](img_i/068.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь преподобным Симеону Мироточивому и сыну его, святителю Савве I, архиепископу Сербскому, глас 1
Оби́тели Хиланда́рския свяще́нных строи́телей/ и Афо́на свети́льники, Се́рбии похвалу́,/ Симео́на велича́йшаго, преподо́бных ле́поту,/ и род его́ чу́дный, святи́теля,– глаго́лю,– Са́вву,/ прииди́те согла́сно почти́м, глаго́ля:/ моли́те Христа́ Бо́га/ о па́стве ва́шей, блаже́ннии,// и о е́же Це́ркви свобо́дней бы́ти от обстоя́ний.
Кано́н о́бщий преподо́бному Симео́ну и святи́телю Са́вве. Гла́с 2.
Пе́снь 1.
Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.
Припев: Преподобне Симеоне и святителю отче Савво, молите Бога о нас.
Гряди́те, ве́рнии, духо́вне веселя́щеся, восхва́лим до́брыя засту́пники на́ша, разгна́вшии мра́к преле́стный, и просве́щше си лю́ди, я́же прия́ша от руки́ Христа́ Бо́га, я́ко спаси́тели.
Припев: Преподобне Симеоне и святителю отче Савво, молите Бога о нас.
Умнаго свети́льника, Симео́на, незаблу́дна вожда́ иму́ще, после́дуим вопию́щу: прииди́те, ча́да, послу́шайте мене́. Стра́хом Госпо́дним и любо́вию содержа́щеся, прии́мете оставле́ние согреше́ний, и́хже соде́ясте.
Сла́ва: Са́вву, вели́каго архиере́я, не нае́мника, но и́стиннаго па́стыря, поло́жшаго ду́шу о овца́х, и те́х ра́ди мно́гия ско́рби претерпе́вша, воспева́юще мо́лим, глаго́люще: и на́с во огра́де твое́й невреди́мы соблюди́, и спасе́нны предста́ви Пастыренача́льнику Христу́.
И ны́не, богоро́дичен: Помо́щницу ве́рных и наде́жду отча́янным, Тебе́ мо́лим, Влады́чице, Бо́га ро́ждшую: разреше́ние пода́ждь злы́х, одержа́щих на́с, и та́мо не осужде́нно предста́ви, Сы́на Твоего́ и Бо́га, стра́шному суди́щу Христо́ву.
Пе́снь 3.
Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.
Припев: Преподобне Симеоне и святителю отче Савво, молите Бога о нас.
Утвержде́ние церко́вное, и забра́ло ве́рным, Са́вву архиере́я, о́браз смире́ния и́ночествующим, преподо́бнаго Симео́на, гла́сы пе́сней духо́вных венча́им, я́ко фи́никсы, псало́мски процве́тшия, во дво́рех благода́ти Отца́ Небе́снаго.
Припев: Преподобне Симеоне и святителю отче Савво, молите Бога о нас.
До́бляго во бра́нех чу́вственных и кре́пльша во смире́нии Симео́на я́вльшася, неви́димых вра́г горды́ню кре́стною си́лою побе́ждшаго, моля́ще припа́даем, глаго́люще: ста́до твое́, о́тче, нера́туемо и во еди́нстве соблюди́.
Сла́ва: Иже на́с ра́ди Христа́ смири́вшагося, усе́рдно кре́ст взе́м, Са́вво, после́довал еси́, оста́вив ми́ру погреба́ти своя́ мертвецы́. Те́мже вели́кия сла́вы Того́ и благода́ти сподо́би тя́, святи́теля, посыла́ет своеплеме́нным лю́дем, Ца́рствие Бо́жие возвеща́юща.
И ны́не, богоро́дичен: Под Твое́ кре́пкое заступле́ние прибега́юще, наде́жды на́шея да не отпаде́м, Богоро́дице Пречи́стая, но да прии́мем облегче́ние страсте́й, востаю́щих на ны́, Ты́ бо все́м еси́ спасе́ние, хва́лящим Тя́.
Пе́снь 4.
Ирмос: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.
Припев: Преподобне Симеоне и святителю отче Савво, молите Бога о нас.
Ра́дуйся, ко́рене благочести́вый Симео́не, израсти́вый ве́твь доброцвету́щую, Са́вву архиере́я, насыща́юща плодо́м уче́ний правосла́вных сердца́, ве́рнаго ста́да ва́шего, и соверша́юща во́зраст духо́внаго обновле́ния.
Припев: Преподобне Симеоне и святителю отче Савво, молите Бога о нас.
Умири́ во еди́нстве духо́внаго совокупле́ния на́ша разстоя́ния, Симео́не о́тче богоно́се, я́ко со дерзнове́нием предстоя́ Миротво́рцу Христу́, Иже и вожда́ на́м Тебе́ да́вшему, смотри́тельне вся́ де́йствующа на спасе́ние на́ше и обновле́ние.
Сла́ва: Священнонача́льников удобре́ние, ве́ре утвержде́ние, до́брый па́стырю и вождю́, Са́вво о́тче на́ш, не оста́ви воста́ти на ны́ волко́м, ста́да не щадя́щим, ниже́ в на́с обрести́ся стро́потная творя́щих или́ глаго́лющих. Да в тишине́ сла́вим Го́спода, спа́сшаго на́с и обно́вльшаго.
И ны́не, богоро́дичен: Взыва́ем Тебе́ в нощи́ и во дни́, неключи́мии раби́ Твои́, Бо́га ро́ждшей: соблюди́ от прило́г вра́жиих, Влады́чице, оби́тель, ю́же Са́вва и Симео́н соста́виша, Твои́ служи́тели, и на Тебе́ прело́жше, все́х Спаси́тельницу и Обновле́ние.
Пе́снь 5
Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.
Припев: Преподобне Симеоне и святителю отче Савво, молите Бога о нас.
Яко доброде́телей сокро́вища и о́браз богоуго́днаго жития́, Симео́на и Са́вву достодо́лжно похва́лим, просвети́ша бо во тме́ лежа́щих и спасо́ша заблу́ждших, и к ни́м притека́юще, страсте́й на́ших облегче́ние прие́млем.
Припев: Преподобне Симеоне и святителю отче Савво, молите Бога о нас.
Щедро́там пучи́ну, Симео́на, и изсуша́ющу ре́ки прегреше́ний, и смире́ния глубину́, возводя́щую на высоту́ небе́сную, в себе́ стяжа́вша, досто́йно ублажа́ем; си́ма бо крыло́ма впери́вся Ду́хом Святы́м, возлете́в, почи́л е́сть у Христа́, прося́ на́м прегреше́ний избавле́ния.
Сла́ва: Ааро́ну подо́бнаго, Са́вву святи́теля восхва́лим, уста́ бы́вшаго, безмо́лвием входя́щему в виде́ние благоразу́мия, кро́ткому отцу́ своему́, и людска́я стремле́ния носи́вша и разсуди́вшаго, не тельца́ же подо́бие, но Жива́го Бо́га о́браз те́м показа́вшаго.
И ны́не, богоро́дичен: Еди́на во тме́ неве́дения су́щим Воззва́ние, и Просвеще́ние, и незаблу́дная Води́тельница, Ты́ мя́ просвети́ омраче́ннаго и наведи́ на стезю́ спасе́ния, и тмы́ несве́тлыя, и че́рвия неусыпа́ющаго, Богоро́дице, исхи́ти: кроме́ бо Тебе́, ину́ю Помо́щницу не и́мам.
Пе́снь 6.
Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.
Припев: Преподобне Симеоне и святителю отче Савво, молите Бога о нас.
Свети́льника вели́каго и́ночествующих, Симео́на воспое́м, во глубину́ смире́ния собо́ю пу́ть те́м показа́вшаго. Са́вву ублажи́м архиере́я, и́же в бе́здне грехо́вней су́щия лю́ди от бу́ри душетле́нныя к Бо́гу возве́дшаго.
Припев: Преподобне Симеоне и святителю отче Савво, молите Бога о нас.
Любве́ Боже́ственныя бе́здною содержи́мь, Симео́не, неизрече́нными Христо́вы благода́ти обогати́вся дарова́ньми, и на́с от пучи́ны вражды́ душегуби́тельныя в любо́вь Бо́жию соедини́в о Христе́, возведи́ моли́твами.
Сла́ва: Яко святи́теля, принося́ща Бо́гови же́ртвы безкро́вныя, мо́лим, Са́вво, раби́ твои́: уста́ви бра́ни на́ша чу́вственныя, и спасе́нны от глубины́ душевре́дныя, ко Го́споду возведи́ ны, моли́твами твои́ми.
И ны́не, богоро́дичен: Печа́льным уте́ха, обурева́емым приста́нище, волну́ющагося помышле́ний стра́стных в пучи́не, предвари́вши, окорми́ мя, Влады́чице Богороди́тельнице, и во приста́нище смире́ния возведи́ моли́твами Твои́ми.
Пе́снь 7.
Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.
Припев: Преподобне Симеоне и святителю отче Савво, молите Бога о нас.
Ца́рствие настоя́щее сопроти́вно бу́дущему вмени́вше, высо́к пла́мень ре́вности Боже́ственныя в се́рдце восприе́мше, сие́ оста́вльше и, кре́ст взе́мше, Го́сподеви после́довасте. Христо́с же, я́ко благопослу́шным Того́ ученико́м, простре́ ва́м дарова́ния духо́вная, Сы́й благослове́н и препросла́влен, Бо́г оте́ц на́ших.
Припев: Преподобне Симеоне и святителю отче Савво, молите Бога о нас.
Еже по о́бразу непоро́чне, Симео́не, соблю́л еси́, бла́г му́ж, в ми́ре расточа́я и дая́ убо́гим, показа́ся, и пра́вда твоя́ во ве́ки пребыва́ющи, свиде́тельствовася; взе́м же кре́ст и Христу́ после́довав, в по́двизех де́йствуя, в соверше́нное дости́гл еси́.
Припев: Преподобне Симеоне и святителю отче Савво, молите Бога о нас.
Тве́рдостию благочести́ваго ра́зума лу́чшее, па́че ху́ждшаго избра́в: любо́вь роди́тельскую, Са́вво, оста́вль, Христу́ после́довал еси́, те́мже тя́ и Боже́ственным Его́ та́йнам строи́теля, ро́ду же и роди́телем, я́ко апо́стола, на престо́ле святи́теля, сы́на и́х судию́ и учи́теля, те́м показу́ет.
Сла́ва: Иму́ще дерзнове́ние к Бо́гу, я́ко и́стиннии Того́ уго́дницы, сопроти́вных наше́ствия и междоусо́бныя бра́ни на́с изба́вити, и пла́мене душевре́дных страсте́й на́ших росо́ю духо́вною угаси́ти, Того́ умоли́те.
И ны́не, богоро́дичен: Ми́лостивно очище́ние и непосты́дная моли́твенница бу́ди на́м, рабо́м Твои́м, Богоро́дице, и лю́таго пла́мене муче́ния изба́ви на́с. Имаши бо Мило́стива, Тебе́ послу́шающа, Его́же родила́ еси́, Христа́, Иже росо́ю благода́ти Своея́ все́х прохлажда́юща.
Пе́снь 8.
Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.
Припев: Преподобне Симеоне и святителю отче Савво, молите Бога о нас.
Единомы́сленная дво́ице, Неразде́льней Тро́ице предстоя́ще, проще́ние на́шим согреше́ниям и стра́стным де́йствам умерщвле́ние испроси́те, да зло́бы у́бо отве́ргшеся, доброде́тели же восприе́мше, пое́м: благослови́те, вся́ дела́ Госпо́дня, Го́спода.
Припев: Преподобне Симеоне и святителю отче Савво, молите Бога о нас.
Плодови́тая ма́слина, Симео́не, ве́ры пра́востию показа́ся: ми́лостив бы́в, ни́щих уще́дрил еси́, и во вре́мя благоча́дие Го́сподеви прине́с; ми́ра отрече́ся, стра́сти же умертви́в, до́м благода́ти бы́в, и от честны́х моще́й миро благово́ния источа́я, весели́ши ду́ши на́ша.
Сла́ва: Ра́сл богосожде́нная, тезоимени́тне нарече́ся: цве́т бо ю́ности, Са́вво, Бо́гови оста́вив, возше́л еси́ в духо́вный во́зраст доброде́телей дея́ньми. Те́рние же зло́бы искорени́в, лозу́ ве́ры насади́л еси́, и река́ми твои́х уче́ний напая́ема, до́м рая́ богоразу́мия простре́ся.
И ны́не, богоро́дичен: Умертви́ сла́сти пло́ти моея́, Влады́чице, и уста́ви стра́стная помышле́ния ума́ моего́, и во гро́бе забве́ния лежа́щую ду́шу мою́ воскреси́, твори́ти благоуго́дныя во́ли Сы́на Твоего́ и Бо́га. Тебе́ бо име́ю наде́жду, ожи́вльшую и испра́вльшую естество́ ро́да на́шего, Богоро́дице.
Песнь 9
Ирмос: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.
Припев: Преподобне Симеоне и святителю отче Савво, молите Бога о нас.
Служи́тели ва́ша свы́ше назира́юще, изба́вите неви́димых вра́г и лука́вых челове́к озлобле́ния: служи́телю та́йнам Христо́вым, Са́вво святи́телю; и́ноком удобре́ние, Симео́не богоно́се, да от бе́д изба́вльшеся, любо́вию ва́с возвели́чим.
Припев: Преподобне Симеоне и святителю отче Савво, молите Бога о нас.
Ве́ре утвержде́ние, Це́рквам соедине́ние, царе́м побе́ду на сопроти́вныя, и смире́ние пода́ти, моли́теся, богохрани́мому ста́ду ва́шему, о не́м же труди́стеся: ва́с бо в беда́х ско́рое избавле́ние и́мамы и те́плыя моли́твенники ко Христу́, Его́же велича́ем.
Припев: Преподобне Симеоне и святителю отче Савво, молите Бога о нас.
Ярости и преще́ния лю́таго, и во а́де муче́ния, рабо́м твои́м, тебе́ предста́теля иму́щим и хода́тая к Бо́гу, Симео́не о́тче на́ш, моли́ изба́витися, и жи́зни сподо́битися во оби́телех пра́ведных, иде́же и са́м весели́шися о Христе́, Его́же велича́ем.
Сла́ва: Тала́нт, его́же от Бо́га прие́мь, усугу́бил еси́, до́лг же, приобре́тение Влады́це дерзнове́нием, глаго́ля, прине́сл еси́: се́ а́з, и лю́дие Твои́, и́хже вручи́л ми́ еси́. Те́мже и небе́снаго гла́са сподо́бися, вводя́ща благи́я и ве́рныя рабы́ в ра́дость ве́чную, ея́же и на́м, о́тче Са́вво, моли́ сподо́битися.
И ны́не, богоро́дичен: Иже херуви́мом на ра́мех Седя́щаго, понесла́ еси́, Де́во, на пречи́стую руку́ Твое́ю, и́хже милосе́рдно к Нему́ просте́рши, Ма́терним дерзнове́нием умоли́, из руки́ изба́вити на́с, борю́щих ны́, и рукописа́ния гре́х на́ших расто́ргнути, Тебе́ велича́ющих.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобным и богоносным Симеону новому мироточцу, и святителю Савве чудотворцу Преподобным и богоносным Симеону новому мироточцу, и святителю Савве чудотворцу](img_b/068.jpg)