Шрифт

25 января

Канон преподобным и богоносным Симеону новому мироточцу, и святителю Савве чудотворцу, учителем Сербским.

Преподобным и богоносным Симеону новому мироточцу, и святителю Савве чудотворцу
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь преподобным Симеону Мироточивому и сыну его, святителю Савве I, архиепископу Сербскому, глас 1

Оби́тели Хиланда́рския свяще́нных строи́телей/ и Афо́на свети́льники, Се́рбии похвалу́,/ Симео́на велича́йшаго, преподо́бных ле́поту,/ и род его́ чу́дный, святи́теля,– глаго́лю,– Са́вву,/ прииди́те согла́сно почти́м, глаго́ля:/ моли́те Христа́ Бо́га/ о па́стве ва́шей, блаже́ннии,// и о е́же Це́ркви свобо́дней бы́ти от обстоя́ний.

Кано́н о́бщий преподо́бному Симео́ну и святи́телю Са́вве. Гла́с 1.

Пе́снь 1.

Ирмос: Преукраше́нная Боже́ственною сла́вою, свяще́нная и сла́вная, Де́во, па́мять Твоя́, вся́ собра́ к весе́лию ве́рныя, начина́ющей Мариа́ме, с ли́ки и тимпа́ны, Твоему́ пою́ще Единоро́дному: сла́вно я́ко просла́вися.

Припев: Святии Савво и Симеоне, молите Бога о нас.

Преукраше́нны Боже́ственною благода́тию, Симео́н преподо́бием и Са́вва священнонача́льствием, все́х созыва́ют к доброде́тели ве́рных. Начина́юще дея́ньми и восходя́ще виде́ньми, с ли́ки и похвала́ми, пою́ще Еди́ному Бо́гу на́шему: сла́вно бо просла́вися.

Припев: Святии Савво и Симеоне, молите Бога о нас.

Преукраше́н смиренному́дрием, и́ночествующих мно́жества, богоно́се Симео́не преподо́бне, собра́л еси́ к весе́лию духо́вному, показу́я те́м пу́ть доброде́телей в труде́х и по́двизех, тебе́ Просла́вльшему, пою́ще Бо́гу на́шему: сла́вно бо просла́вися.

Сла́ва: Преукраше́н свяще́нства оде́ждею, всю́ све́тлу и боголе́пну, Са́вво, це́рковь твою́ показа́л еси́, испо́лненну совокупле́ньми ве́рных, утвержде́нну уче́нии твои́ми, с ве́рою и пе́сньми духо́вными пою́ще Еди́ному Бо́гу на́шему: сла́вно бо просла́вися.

И ны́не, богоро́дичен: Преукраше́нна Боже́ственною сла́вою и, я́ко Цари́ца, Де́во, предстоя́щи одесну́ю Царя́ и Бо́га, не преста́й моля́щи сохрани́ти невреди́мо ста́до Сы́на Твоего́, е́же собра́ Симео́н и Са́вва о и́мени Твое́м, Богоро́дице.

Пе́снь 3.

Ирмос: Соде́тельная и содержи́тельная все́х, Бо́жия Му́дросте и Си́ло, непрекло́нну, недви́жиму Це́рковь утверди́, Христе́, еди́н бо еси́ Свя́т, во святы́х почива́яй.

Припев: Святии Савво и Симеоне, молите Бога о нас.

Соде́тель и Содержи́тель вся́ческих недви́жимо и неразори́мо подаде́ утвержде́ние Це́ркви Свое́й Христо́с: Симео́на преподо́бнаго, и Са́вву святи́теля, Иже еди́н Свя́т и прославля́яй святы́х Свои́х.

Припев: Святии Савво и Симеоне, молите Бога о нас.

Соде́телю и Творцу́ вся́ческих, престо́лу предстоя́ Бо́га, о́тче Симео́не, моли́ утверди́тися на́м недви́жимым прило́ги вра́жиими, да в тишине́ сла́вим еди́наго Свята́го и во святы́х Почива́ющаго.

Сла́ва: Соде́теля и Промы́сленника все́х не преста́й моля́ о ста́де твое́м, сохрани́ти сие́ от нападе́ний сопроти́вных и от вре́да ересе́й, и утверди́ти е́, Са́вво, в правосла́вных преда́ниих твои́х.

И ны́не, богоро́дичен: Соде́тельная и содержи́тельная вся́ческих Бо́жия Му́дрость и Си́ла, хра́м Себе́ созда́ от пречи́стых крове́й Твои́х. Его́же моли́, Богоро́дице, хра́мы показа́ти на́с Того́ благода́ти и напои́ти ча́шею весе́лия, растворе́нною Ду́хом Святы́м, и утверди́ти на столпе́х ве́ры святы́я во́ли Его́.

Пе́снь 4.

Ирмос: Ре́чи проро́ков и гада́ния, воплоще́ние прояви́ша от Де́вы Твое́, Христе́: сия́ние блиста́ния Твоего́ во све́т язы́ков изы́дет, и возгласи́т Тебе́ бе́здна с весе́лием: си́ле Твое́й сла́ва, Человеколю́бче.

Припев: Святии Савво и Симеоне, молите Бога о нас.

Глаго́ланьми святы́ми, уче́нии ва́шими все́х научи́ли есте́ покланя́тися Бо́гу, Творцу́ все́х, и Воплоще́нному, Иже от Де́вы, Сло́ву Отчу, и испове́дати Ду́ха Свята́го с весе́лием, си́лою и Божество́м Си́м не разлу́чна.

Припев: Святии Савво и Симеоне, молите Бога о нас.

Глаго́лом Спа́совым повину́яся, вся́, я́же на земли́, расточи́в, сокро́вище во све́те пребыва́ющем себе́ собра́л еси́, и, взе́м кре́ст, с весе́лием Тому́ после́довал еси́, вопия́: си́ле Твое́й сла́ва, Человеколю́бче.

Сла́ва: Глаго́лы твои́ проро́честии, изыдо́ша во всю́ зе́млю в сердца́ ве́рных, и в концы́ вселе́нныя во исправле́ние жития́, и в Тро́ице, Со́лнце пра́веднем, полага́ют селе́ние ве́ры своея́. От нача́тка бо небе́с, и до коне́ц земны́х, вся́ испо́лнь сла́вы Ея́, и вся́к ве́рный просвеща́ется держа́вою Ея́.

И ны́не, богоро́дичен: Глаго́лом проро́ческим после́дующе, две́рь небе́сную, и го́ру присе́нную, вои́стинну Богоро́дицу Тя́ имену́ем, и́бо зно́ем грехо́вным распала́емы, к Тебе́ прибега́юще, прохлажда́емся, и Тобо́ю вхо́дим во врата́ ра́йская, ору́жием пла́менным не ктому́ возбраня́еми.

Пе́снь 5

Ирмос: Бо́жию и неизрече́нную добро́ту, доброде́телей Твои́х, Христе́ испове́м: от Присносу́щныя бо Сла́вы, Соприсносу́щное и Ипоста́сное возсия́вый Сия́ние, из де́вственныя утро́бы, су́щим во тме́ и се́ни, вопло́щся, возсия́л еси́ Со́лнце.

Припев: Святии Савво и Симеоне, молите Бога о нас.

Боже́ственную и неувяда́ющую добро́ту доброде́телей ва́ших воздая́нием свиде́тельствуют: приснотеку́щее преподо́бнаго ми́ра излия́ние, и це́лость цвету́щая не разруше́нна телесе́, от Боже́ственныя благода́ти возсия́вшаго, су́щим во тме́ и се́ни, я́коже со́лнце, первосвяти́теля.

Припев: Святии Савво и Симеоне, молите Бога о нас.

Боже́ственную и пребыва́ющую добро́ту Ца́рствия Христо́ва, Симео́не, смотря́я, приснотеку́щий исто́чник сле́зный испуща́я, не преста́л еси́, от Боже́ственнаго же посеще́ния, все́льшися в тя́ благода́ть Ду́ха Уте́шителя, су́щим во тме́ неве́дения показа́ тя́ со́лнце.

Сла́ва: Боже́ственную и нераздели́мую держа́ву Святы́я Тро́ицы лю́дем твои́м пове́дая, уве́рил еси́ покланя́тися Ипоста́сному и Соприсносу́щному Сло́ву Безнача́льнаго Отца́, от Отца́ же исходя́щему Ду́ху Свято́му, все́х просвеща́ющу, Трисия́нному Со́лнцу.

И ны́не, богоро́дичен: Боже́ственныя и неизрече́нныя добро́ты сла́вы Сы́на Твоего́, Богоро́дице, да не отпаде́м, но спо́доби мя́ тоя́ мольба́ми Твои́ми, правосла́вно испове́дающа Тя́, от де́вственныя утро́бы воплоще́нное, пра́ведное на́м возсия́вшую Со́лнце.

Пе́снь 6.

Ирмос: Морски́й пучиноро́дный ки́тов вну́тренний о́гнь — тридне́внаго Твоего́ погребе́ния проображе́ние, его́же Ио́на проро́к показа́ся. Спасе́н бо, я́ко и предпосла́ся, неврежде́н, вопия́ше: пожру́ Ти́ со гла́сом хвале́ния, Го́споди.

Припев: Святии Савво и Симеоне, молите Бога о нас.

Морски́х глубиноро́дных змие́в, многообра́зных ересе́й, главы́ сокруши́ли есте́, гнездя́щихся в вода́х, в сердца́х и́х, благоче́стия не навы́кших, и те́х бра́шно, си́х восхи́тивше, Возгреме́вшему над вода́ми мно́гими, обро́ки Бо́гови принесли́ есте́.

Припев: Святии Савво и Симеоне, молите Бога о нас.

Мо́ря жите́йскаго глубино́ю потопля́ющаго пре́лести, вну́трь, в се́рдце, воображе́нием тридне́внаго Влады́ки погребе́ния, о́тче Симео́не, изше́д, яви́ся неврежде́н и спасе́н непреткнове́нно в пусты́ни, поже́рлся еси́ со гла́сом хвале́ния Го́сподеви.

Сла́ва: Мо́ре, наводне́нное глубино́ю уче́ний правосла́вных, о́тче Са́вво, яви́лся еси́, и те́х напое́ньми спасе́нны показа́л еси́ о́вцы, тебе́ после́дующия, в ни́хже моли́ и на́с утверди́ти невреди́ми, во смире́нии благоче́стно рабо́тающе Го́сподеви.

И ны́не, богоро́дичен: Мо́ре грехороди́тельных страсте́й, вну́тренних помышле́ний на́ших, уста́ви, Богоро́дице, воображе́нием де́вственнаго и пречи́стаго Рождества́ Твоего́, и спасе́нны покажи́ на́с и те́ми невреди́мы, да пе́сньми благода́рными воспева́ем Тя́, Влады́чице.

Пе́снь 7.

Ирмос: Безсту́дней я́рости же и огню́ Боже́ственное жела́ние сопротивля́яся, о́гнь у́бо ороша́ше, я́рости же смея́шеся, богодохнове́нною слове́сною преподо́бных тривеща́нною цевни́цею, противовеща́я мусики́йским орга́ном посреди́ пла́мене: препросла́вленный отце́в и на́ш Бо́же, благослове́н еси́.

Припев: Святии Савво и Симеоне, молите Бога о нас.

Безсту́днаго нападе́ния же и я́рости безбо́жных и злове́рных язы́к, боже́ственными мольба́ми ва́шими на́с избавля́юще, я́рость у́бо укроти́те, наси́лование же победи́те, богодохнове́нная святы́х преподо́бная и свяще́нная дво́ице, и весе́лым гла́сом сподо́бите воспева́ти посреде́ хра́ма ва́шего: препросла́вленный отце́в на́ших Бо́же, благослове́н еси́.

Припев: Святии Савво и Симеоне, молите Бога о нас.

Безсту́дному злохи́трству бесо́вскому и огню́ распаля́ющу страсте́й пло́ти на́шея, боже́ственным покро́вом моли́тв твои́х укрепи́ на́с, о́тче Симео́не, проти́витися, трича́стное души́ очи́стивше, серде́чным просвеще́нным чу́вством воспева́ти: препросла́вленный оте́ц на́ших Бо́же, благослове́н еси́.

Сла́ва: Безсту́дною горды́нею на ста́до твое́ подви́гшемуся, благогове́нием противля́яся, чудоде́йствием я́рость укроти́л еси́. Сама́го же уве́рил еси́, богодохнове́нным, Са́вво, язы́ком веща́я, Тро́ицу правосла́вне почита́ти, во Отце́ и Сы́не и Ду́се Святе́м, неразде́льна Бо́га оте́ц на́ших.

И ны́не, богоро́дичен: Безсту́днаго оклевета́ния возду́шных лука́вых духо́в, и огня́ муче́ния, ожида́юща гре́шных, моли́твами Твои́ми, Де́во Богоро́дице, изба́ви на́с, сла́вящих Тя́, и́стинную Роди́тельницу, покланя́емому и сла́вимому со Отце́м и Ду́хом, Христу́, Бо́гу оте́ц на́ших.

Пе́снь 8.

Ирмос: Пла́мень, ороша́ющь преподо́бныя, злочести́выя же попаля́ющь, Ангел Бо́жий всемо́щный показа́ отроко́м, живонача́льный же исто́чник соде́ла Богоро́дицу, тлю́ сме́рти и живо́т точа́щу пою́щим: Соде́теля еди́наго пои́м, изба́вленнии, и превозно́сим во вся́ ве́ки.

Припев: Святии Савво и Симеоне, молите Бога о нас.

Пла́мень страсте́й на́ших погаси́ти слеза́ми умиле́ния сподо́бите, злочести́выя же и гре́шныя, паля́ща огня́ ве́чнующаго, моли́те, святи́и, изба́витися на́м, живо́тнаго же исто́чника во оби́телех ва́ших наслажда́тися, воспева́ющим: Соде́теля еди́наго пое́м, изба́вленнии, и превозно́сим во вся́ ве́ки.

Припев: Святии Савво и Симеоне, молите Бога о нас.

Пла́менем разже́гся любве́ Боже́ственныя, я́ростная движе́ния, преподо́бне Симео́не, до конца́ умертви́л еси́ воздыха́ньми умиле́ния, ангелоподо́бен ве́сь показа́лся на земли́. По тле́нии же сме́ртнем, исто́чник живы́й, ми́ро точа́щь благово́нно, яви́ся, возвеселя́я ча́да твоя́, пою́ща тебе́ просла́вльшаго Го́спода.

Сла́ва: Пла́мень любве́ роди́тельския дерзнове́нне, Са́вво, попра́л еси́, ми́ра и миродержи́теля усе́рдно избежа́в, разжиза́ния же ю́ностная посто́м увяди́в. Процве́л еси́, я́ко дре́во при исхо́дищих духо́вных, напая́емо вода́ми воздержа́ния, и во вре́мя пло́д подава́я, веселя́щь сердца́ воспева́ющих: Го́спода по́йте и превозноси́те во вся́ ве́ки.

И ны́не, богоро́дичен: Пла́мень страсте́й, разжига́ющь окая́нную пло́ть мою́, угаси́, Богоро́дице, те́плою по́мощию Твое́ю, и возжжи́ уга́сший свети́льник се́рдца моего́ всеси́льным Твои́м покро́вом, бо́дрствующа покажи́ мя, да не тле́ю грехо́вною сни́ду во а́д отча́яния и, ожи́вльши мя́ покая́нием, возста́ви взыва́юща: Го́спода пое́м, изба́вленнии, и превозно́сим во вся́ ве́ки.

Песнь 9

Ирмос: Побежда́ются естества́ уста́вы в Тебе́, Де́во Чи́стая: де́вствует бо рождество́ и живо́т предобруча́ет сме́рть; по рождестве́ Де́ва и по сме́рти жива́, спаса́еши при́сно, Богоро́дице, насле́дие Твое́.

Припев: Святии Савво и Симеоне, молите Бога о нас.

Победи́сте есте́ственная сво́йства непоро́чным святы́м житие́м ва́шим: во пло́ти бо живу́ще, ми́рови умертви́стеся. И, уме́рше, живота́ ве́чнующаго зна́мения на́м явля́ете: по сме́рти — чудоде́йствия, по погребе́нии же — ми́ра исто́чники. И спаса́ете при́сно, Симео́не и Са́вво, и́же ва́с почита́ющих.

Припев: Святии Савво и Симеоне, молите Бога о нас.

Пременя́ются естества́ уста́вы в тебе́, о́тче богоно́се, дерза́ет бо учи́ти во смире́нии ю́ность, и зло́бою младе́нствует в высоте́ богоразу́мия ста́рость: по пло́ти бо оте́ц седи́не му́дростней, ду́хом кро́тости сы́ну учени́к бы́л еси́, и моли́твами твои́ми спаса́еши, Симео́не, почита́ющих тя́.

Сла́ва: Претвори́шася ве́щем сво́йства тобо́ю, Са́вво священнонача́льниче, сла́ва бо небреже́ся и смире́ние вожделе́ся. За смире́ние на престо́ле высо́це учи́тель, и по сме́рти страсте́м цели́тель: спаса́еши на́с и к Бо́гу моли́твами твои́ми, при́сно восхваля́ющих тя́.

И ны́не, богоро́дичен: Побежде́нна мя́ страстьми́ мно́гими, ле́ностию и небреже́нием, объяде́нием и уны́нием, тщесла́вию же рабо́тающа, и продерза́нием, и я́ростию умерщвля́ема, испра́ви, Богоро́дице, к стезя́м покая́ния и, бу́дущаго муче́ния исхити́вши, спаси́ мя, Тебе́ велича́юща.

Молитва святителю Савве I, архиепископу Сербскому

О, свяще́нная главо́, пресла́вный чудотво́рче, святи́телю Христо́в Са́вво, Се́рбския земли́ первопресто́льниче, храни́телю и просвети́телю, всех же христиа́н благонаде́жный пред Го́сподем предста́телю, тебе́ припа́даем и мо́лимся: даждь нам бы́ти прича́стником любве́ твоея́ к Бо́гу и бли́жнему, е́юже при жи́зни свята́я душа́ твоя́ преиспо́лнена бысть. Озари́ нас и́стиною, просвети́ ум и се́рдце на́ше све́том Боже́ственнаго уче́ния, научи́ нас тебе́ подража́ти ве́рно, Бо́га и бли́жняго на́шего люби́ти и за́поведи Госпо́дни соверша́ти непогреши́тельно, да бу́дем и мы ча́да твоя́ не по и́мени то́кмо, но всем житие́м на́шим. Моли́ся, святы́й архиере́ю, о святе́й Правосла́вней Це́ркви и оте́честве твое́м земно́м, при́сно тя любо́вию чту́щем. При́зри благоутро́бно на вся́ку ду́шу ве́рных твои́х чти́телей, ми́лости и по́мощи твоея́ и́щущих, бу́ди всем нам в боле́знех цели́тель, в ско́рбех уте́шитель, в печа́лех посети́тель, в беда́х и ну́ждах помо́щник, в час же сме́ртный ми́лостивый покрови́тель и защи́титель, да, при по́мощи моли́тв твои́х святы́х, сподо́бимся и мы гре́шнии спасе́ние ве́рное получи́ти и ца́рствие Христо́во унасле́довати. Ей, свя́тче Бо́жий, не посрами́ упова́ния на́шего, е́же на тя кре́пко возлага́ем, но яви́ нам твое́ многомо́щное заступле́ние, да сла́вим и пое́м ди́внаго во святы́х Свои́х Бо́га Отца́ и Сы́на и Свята́го Ду́ха, всегда́, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобным и богоносным Симеону новому мироточцу, и святителю Савве чудотворцу