25 января.
Канон третий преподобному Мартиниану Белозерскому
![Канон третий преподобному Мартиниану Белозерскому Канон третий преподобному Мартиниану Белозерскому](img_i/094.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 7:
От ю́ности, о́тче, избра́н и возлю́блен был еси́ Го́сподом Бо́гом,/ И́же, прови́дя до́брое твое́ произволе́ние,/ научи́ тя приити́ к преподо́бному уго́днику Своему́, Кири́ллу всеблаже́нному,/ от него́же наста́влен быв на путь спасе́ния,/ в стра́се Бо́жии и чистоте́ душе́вней,/ в благогове́нии же и непреста́нных к Бо́гу моли́твах/ житие́ твое́ непоро́чно преше́л еси́,/ и ны́не, со дерзнове́нием предстоя́ на Небесе́х Престо́лу Христо́ву,/ о́тче Мартиниа́не всеблаже́нне,/ не преста́й моля́ Христа́ Бо́га спасти́ и поми́ловати ду́ши на́ша.
Канон третий. Глас 2
Пе́снь 1.
Ирмос: Во глубине́ постла́ иногда́/ фараони́тское всево́инство преоруже́нная сила́,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися.
Припев: Преподобне отче Мартиниане, моли Бога о нас.
От Све́та Свет, Христе́ мой, от Отца́ пре́жде век рожде́йся,/ И́же искони́ со Отце́м и Ду́хом,/ согреше́ния мрак души́ моея́ отгна́в, озари́ ум мой, молю́ся,/ да возмогу́ пе́ти Мартиниа́на, Твоего́ уго́дника.
Припев: Преподобне отче Мартиниане, моли Бога о нас.
От ко́рене блага́го блаже́ннейша о́трасль прозя́бл еси́,/ земны́х и маловре́менных жития́, избе́гл еси́,/ тем ны́не чистоте́ вене́ц прие́мля,/ со А́нгелы Христу́ воспева́еши, я́ко просла́вися.
Сла́ва: Земна́я и мимотеку́щая, я́ко уме́ты, нивочто́же вмени́л еси́/ и Христа́ Еди́наго приобре́л еси́,/ Его́же сою́зом любве́ уязви́в ду́шу,/ и Того́ потща́лся еси́ обрести́ ненасыща́емыя доброты́.
И ны́не, богоро́дичен: Услы́шав Е́ва прама́ти: в печа́лех роди́ши ча́да./ Ты же, Де́во Чи́стая, услы́ша: Госпо́дь с Тобо́ю, ра́дуйся, -/ и ра́дованным гла́сом, Богоневе́сто, печа́ль прама́тери потре́блыпи.
Пе́снь 3.
Ирмос: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.
Припев: Преподобне отче Мартиниане, моли Бога о нас.
По апо́столу, о́тче, вы́шняя ища́ и мудрова́ние име́я, еже́ к Бо́гу,/ вся, я́же на земли́, оста́вил еси́/ и пачеесте́ственныя добро́ты сподо́бися.
Припев: Преподобне отче Мартиниане, моли Бога о нас.
Све́том Боже́ственным осия́емь,/ о не́м путь, е́же к жи́зни веду́щ, позна́л еси́, о́тче Мартиниа́не,/ и равноа́нгельнаго жития́ чудотво́рец исцеле́нием нарече́ся.
Сла́ва: Зако́ны пита́яся всех Творца́ и Влады́ки,/ тем невече́рний облиста́в Свет и неле́стное со́лнце яви́лся еси́,/ прему́дрости сокро́вище, мир обогаща́я.
И ны́не, богоро́дичен: Во ины́х жена́х ма́ти, до́ндеже де́ва, не позна́ся, ни ма́ти по рождестве́ де́вства сподо́бися,/ на Тебе́ же, Де́во Ма́ти, обоя́ сбы́стся,/ тем весе́лием души́ воспева́юще:/ несть непоро́чны, па́че Тебе́, Влады́чице.
Седа́лен, гла́с 4:
Столп и утвержде́ние Це́ркви Христо́ве я́влься,/ пребога́те и преблаже́нне о́тче наш Мартиниа́не,/ о́браз и надписа́ние быв ве́ре благоче́стия,/ и́нокующим яви́ся Богоприя́тен же наказа́тель/ и Живонача́льный Тро́ицы и́стый служи́тель,/ святы́м оби́телем непреле́стен побо́рник, Це́рковь Богома́тере украси́в святы́м пе́нием,/ Тою́ умоли́, свя́те,/ спасти́ и́же ве́рою и любо́вию благоче́стно поклоня́ющихся Че́стному Рождеству́ Ея́.
Пе́снь 4.
Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́ще́ся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Припев: Преподобне отче Мартиниане, моли Бога о нас.
Ду́ха Свята́го зарю́ прие́м,/ я́ко звезда́ пресве́тлая, просвеща́еши страну́ Ру́сскую благода́тию чуде́с твои́х,/ днесь у́бо, све́тло торжеству́я, весели́тся, име́я тебе́ в себе́ сокро́вище неистощи́мое.
Припев: Преподобне отче Мартиниане, моли Бога о нас.
Житие́ твое́, Богоно́се преблаже́нне Мартиниа́не,/ пра́вило изве́стно и́нокующим бысть и ны́не живу́щим,/ и́же твои́м после́дующим повеле́нием, о́тче, Боже́ственному уче́нию.
Сла́ва: А́ще у́бо, о́тче, боле́зненный и те́сный путь ше́ствовал еси́ в житии́,/ но от Бо́га нетле́нную жизнь восприя́л еси́,/ отоню́дными светлостьми́ бога́тно просвеща́яся, Богоблаже́нне Мартиниа́не.
И ны́не, богоро́дичен: Я́ко приста́нище спасе́нию и сте́ну недви́жиму,/ Богоро́дице Влады́чице, ве́рнии, стяжа́хом,/ Ты бо мольба́ми Свои́ми от бед избавля́еши ду́ши на́ша.
Пе́снь 5
Ирмос: Просвеще́ние во тьме́ лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.
Припев: Преподобне отче Мартиниане, моли Бога о нас.
Яре́м Госпо́день от ю́ности взем, прему́дре,/ после́довал еси́ Христу́ скорбьми́ и слеза́ми, преподо́бне, мы́сленно о́ко к Нему́ име́я,/ до́ндеже святы́х селе́ние дости́же, обре́те поко́ище Го́рняго гра́да.
Припев: Преподобне отче Мартиниане, моли Бога о нас.
Страсте́й отгна́в мглу я́ве заря́ми, о́тче, доброде́телей,/ просвеще́ние Ду́ха в се́рдцы прии́м, Мартиниа́не,/ и́мже попали́л еси́ вся бесо́вская ополче́ния, по́стническим лико́м сопричте́ся.
Сла́ва: Насажде́н во дворы́ Госпо́дни и в до́му Бо́га на́шего процве́л еси́,/ прии́м Небе́сное се́мя Богодухнове́нное серде́чною браздо́ю,/ клас стори́чествующий прине́сл еси́,/ те́мже обогати́ся ве́нцем чуде́с исцеле́ния.
И ны́не, богоро́дичен: Упра́ви ум мой, Влады́чице, тружда́ющся,/ в пучи́не скорбе́й потопля́емь наше́ствием тлетво́рных страсте́й,/ спаси́, Богоро́дице, к Тебе́ прибега́ющия, ино́й бо по́мощи, Чи́стая, ра́зве Тебе́, не зна́ем.
Пе́снь 6.
Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Припев: Преподобне отче Мартиниане, моли Бога о нас.
Мо́ря жите́йскаго любому́дрием испыта́в/ и разуме́в су́етна су́ща, я́ко вско́ре погиба́юща от враг,/ еди́ному прилепи́ся Христу́, Его́же ра́ди тяготу́ дневну́ю поне́сл еси́,/ от всех Тому́ восхожде́ния в се́рдцы свое́м полага́ше.
Припев: Преподобне отче Мартиниане, моли Бога о нас.
Ве́трилом окормля́емь воздержа́ния, отту́ду дости́же в приста́нище благоути́шно,/ поще́нием пита́я ду́шу свою́, преподо́бне, и све́тлу всех Творцу́ ту предста́ви./ Те́мже и Христо́с прия́т ю́, я́ко светоза́рную звезду́,/ и Свое́й сла́ве прича́стну соде́ла.
Сла́ва: А́нгельская во́инства и́же во пло́ти житию́ твоему́ удиви́шася, о́тче Мартиниа́не,/ бу́ри бо страсте́й отбе́г, скве́рнаго жития́,/ ве́трилом воздержа́ния дости́же в благоутишное приста́нище Христо́во.
И ны́не, богоро́дичен: Обетша́ны го́рьким дре́вле дре́ва вкуше́нием и па́дшаяся поползнове́нием/ Пречи́стая обнови́ла есть,/ Зижди́теля ро́ждши, Сло́во Соста́вное, Де́во Ма́ти Влады́чице.
Конда́к, глас 8:
От ю́наго во́зраста Боже́ственным жела́нием разже́гся,/ че́стному учи́телю в дан был еси́/ и в воздержа́нии мно́зе, о́тче, пребы́л еси́,/ ревну́я благо́му наказа́нию,/ плод многодоброде́телен Бо́гу прине́сл еси́,/ тем мо́лим тя, отче Мартиниа́не,/ моли́ Христа́ Бо́га спасти́ся душа́м на́шим.
И́кос:
Посети́вый, Го́споди, во Еги́пте Изра́иля возлю́бленными Ти воево́ды,/ сия́ зде сотвори́л еси́ чу́дным Твои́м и всеси́льным благоисполне́нием -/ прише́ствием уго́дника Твоего́ Мартиниа́на/ и его́же дарова́л еси́ нам ко́рмчия и прави́теля/ во спасе́ние и в снабде́ние и Це́ркве Твое́й украше́ние./ Тем и мо́лим Тя, Го́споди, Христе́ Бо́же наш,/ низпосли́ наро́ду на́шему и во́инству правосла́вному побе́ду и одоле́ние на вся враги́ на́ша,/ и на Стра́шнем Твое́м Суде́ отве́т благ получи́ти, и спасти́ся душа́м на́шим.
Пе́снь 7.
Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.
Припев: Преподобне отче Мартиниане, моли Бога о нас.
Зе́льным поще́нием, я́ко благово́нного пи́щею, пита́я ду́шу свою́, преподо́бне Мартиниа́не,/ те́мже Трисо́лнечному Божеству́ предстоя́ со А́нгелы, пое́ши:/ благослове́н Бог оте́ц на́ших.
Припев: Преподобне отче Мартиниане, моли Бога о нас.
Возсия́л еси́, я́коже невече́рнее со́лнце, всю зе́млю просвеща́я, преподо́бне Мартиниа́не,/ от тьмы изба́ви страсте́й, и́же на нас наве́ты разори́/ и не воева́ны нас соблюди́, пою́щия:/ благослове́н Бог оте́ц на́ших.
Сла́ва: Я́ко на Боже́ственную доброде́телей ле́ствицу воздержа́нием, о́тче, вшед,/ смотрели́выма очи́ма Христа́ Царя́ ви́дел еси́,/ незави́стною десни́цею по числу́ доброде́телей, Мартиниа́не,/ дарова́ния дару́я от души́ пою́щим:/ благослове́н Бог оте́ц на́ших.
И ны́не, богоро́дичен: Правосла́вную му́дрость ты стяжа́в,/ Еди́ницу Трисо́лнечную, Тро́ицу Единосу́щную, пребла́женне, пропове́дал еси́/ и Сло́ва стра́шное воплоще́ние научи́л еси́ пе́ти от Богоро́дицы Присноде́вы.
Пе́снь 8.
Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.
Припев: Преподобне отче Мартиниане, моли Бога о нас.
Дрема́ния отню́дь и сна очи́ма свои́ма не дал еси́,/ до́ндеже от Христа́ возме́здие трудо́м обре́те – Небе́снаго Ца́рствия наслажде́ния,/ и́же угото́ва Бог ве́рою пою́щим:/ благослове́н Бог оте́ц на́ших.
Припев: Преподобне отче Мартиниане, моли Бога о нас.
Слеза́ми свои́ми, о́тче Мартиниа́не, омыва́яся, житие́ проше́л еси́/ и те́ми мно́жество бесо́в потопи́л еси́, ве́рных же мы́сли возвесели́л еси́, пою́щих:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.
Сла́ва: Уязви́ся Боже́ственным жела́нием, всеблаже́нне,/ те́мже непоро́чное и пра́ведное житие́ проходя́,/ до́ндеже дости́же Ца́рскаго престо́ла,/ отню́дными светлостьми́ осия́ пою́щия:/ благослови́те, вся дела́ Госпо́дня, Го́спода и превозноси́те Его́ во ве́ки.
И ны́не, богоро́дичен: Распя́тие и погребе́ние, И́же от Тебе́ небра́чно, Де́во, произы́де,/ претерпе́в нас ра́ди муче́ния,/ Его́же страсте́м ревну́я,/ преподо́бный Мартиниа́н крестомуче́нием поще́ния Тому́ после́дова.
Песнь 9
Ирмос: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.
Припев: Преподобне отче Мартиниане, моли Бога о нас.
Пожи́в на земли́ равноа́нгельно, те́мже и равноа́нгельную обре́те све́тлость,/ моли́ непреста́нно Изба́вителя, Мартини́ане,/ о творя́щих, блаже́нне, че́стно святу́ю па́мять твою́,/ улучи́ти оставле́ние грехо́м в День Су́дный.
Припев: Преподобне отче Мартиниане, моли Бога о нас.
У́зкий и приско́рбный путь ше́ствовав, о́тче Мартиниа́не,/ и теле́сне у́бо преста́вися, ду́хом же жив предстои́ши./ Но я́ко име́я дерзнове́ние, Ему́же в житии́ порабо́тав,/ моли́ спасти́ся душа́м на́шим.
Сла́ва: Исцеле́нием яви́ся струя́ незави́стная,/ многомяте́жнаго пла́мене страсте́й угаси́л еси́,/ ум бо свой некра́дом, преподо́бне, соблю́л еси́,/ я́ко кре́пок, о́тче Мартиниа́не, победи́л еси́ искуси́теля.
И ны́не, богоро́дичен: Еди́на иму́щая дерзнове́ние, Влады́чице, за весь мир Тому́ моли́ся,/ не помяни́ безчи́сленных на́ших грехо́в, закры́й лю́ди, вопию́щия Ти уми́льным гла́сом:/ спаси́, Чи́стая Богоро́дице, Тебе́ досто́йно велича́ющий.
Свети́лен
Чу́дная и двоюплете́нная Ду́хом златови́дная плени́ца оте́ц блаже́нных,/ наста́ всесвяще́нная ва́ша па́мять,/ усе́рдно с любо́вию вас почита́ем, Ду́ха Свята́го прославля́юще,/ И́же вас до́бре просла́вльшаго.
Моли́тва.
О Богоблаже́ннии и преподо́бнии отцы́ на́ши, Ферапо́нте и Мартиниа́не! Мо́лимся вам и от се́рдца с любо́вию вопие́м, да нас, непотре́бных, вразуми́те и просвети́те и свои́ми моли́твами укрепи́те не́кая похва́льная словеса́ принести́ в па́мять ва́шего преставле́ния не бо в му́дрости сло́ва дерза́ю глаго́лати, но со мно́гою ве́рою и любо́вию чадолюби́вым отца́м сия́ приношу́. Вы у́бо, преподо́бнии, са́ми на́ши недоста́тки напо́лните, без ва́шея бо по́мощи, блаже́ннии, ничто́же мо́жем бла́го сотвори́ти, но, пребыва́юще в до́му Пречи́стыя Богоро́дицы ва́шея огра́ды, наде́емся ва́ми, благи́ми предста́телями, свобо́дни пред Бо́гом яви́тися, необлада́нными бы́ти от враг ви́димых и неви́димых. О па́стырие до́брии, и́стиннии строи́тели виногра́да Христо́ва, отце́м сла́во, преподо́бным единонра́внии, пра́ведным единовсе́льницы, и́ноком наста́вницы и о́бщему жити́ю соверши́тели изря́днии. Ны́не на Небесе́х Святе́й Тро́ице предстои́те со все́ми угоди́вшими Ей. Ны́не у́бо, о Богоблаже́ннии и преподо́бнии отцы́, помяни́те ста́до свое́, е́же му́дре собра́сте, и соблюди́те Богодарова́нную ва́шу па́ству и, я́ко чадолюби́вии отцы́, посеща́йте и не пре́зрите нас, чту́щих ве́рою и любо́вию пречестну́ю и многора́достную ва́шу па́мять. Сохраня́йте нас и соблюда́йте от всех ви́димых и неви́димых враг, прииди́те посреде́ нас неви́димо и всех нас моле́ния, Бо́гови возсыла́емая, приими́те и принеси́те, сия́ хода́тайственне всех Творцу́ и Изба́вителю, И́же в Тро́ице Святе́й покланя́емому и́стинному Бо́гу на́шему, я́ко да согреше́нием на́шим оставле́ние полу́чим в День Су́дный благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва и Свято́му Ду́ху вку́пе, Трисия́нному Божеству́, ны́не, и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Канон третий преподобному Мартиниану Белозерскому Канон третий преподобному Мартиниану Белозерскому](img_b/094.jpg)