24 января.

Канон преподобному Феодосию Великому, общих житий начальнику.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто́ трудо́в уплодоноси́л еси́, и бы́л еси́ свети́льник вселе́нней, сия́я чудесы́, Феодо́сие о́тче на́ш, моли́ Христа́ Бо́га спасти́ся душа́м на́шим.

Стихи́ра, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х, те́м на небесе́х обре́л еси́ мзду́ трудо́в твои́х, де́монския погуби́л еси́ полки́ и Ангельския дости́гл еси́ чи́ны, и́хже житию́ безпоро́чно поревнова́л еси́. Дерзнове́ние име́я ко Христу́ Бо́гу, ми́р испроси́ душа́м на́шим.

Кано́н свята́го. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподобне отче Феодосие, моли Бога о нас.

Яко му́др чинонача́льник на́ш, о́тче Феодо́сие, боголе́пно пе́снь предначни́ прише́дшему во всеми́рное спасе́ние Христу́ Бо́гу и всесвяту́ю па́мять твою́ с Собо́ю просла́вльшему.

Припев: Преподобне отче Феодосие, моли Бога о нас.

Из пусты́ни Предте́ча Христо́в, от Ааро́новы Елисаве́ти прозябы́й, прии́де; в купе́ли же Феодо́сий роди́вся Ду́хом, пустыннограждани́н бы́сть, Иису́су после́дствуя.

Припев: Преподобне отче Феодосие, моли Бога о нас.

Кре́щшуся в струя́х Христу́, изра́ильтескаго собо́рища потреби́ся шата́ние, в Це́ркви же равноа́нгельно жи́тельство насади́ся, е́же неукло́нно соверши́л еси́, всеблаже́нне Феодо́сие.

Сла́ва Отцу́ и Сы́ну и Свято́му Ду́ху:

Общник стра́сти бы́в, о́тче, поще́нием на́с ра́ди на Кресте́ Пригвожде́нному, досто́йно сообра́зен бы́л еси́ Того́ воскресе́ния и снасле́дник бы́л еси́ сла́вы, Феодо́сие.

И ны́не и при́сно и во ве́ки веко́в. Ами́нь.

Богородичен: Отрокови́ц боже́ственный ли́к боже́ственнейше в Тя́ до́брую имену́ют, Богоро́дице Влады́чице, добро́тами укра́шенную Божества́: добротвори́тельное бо Сло́во па́че сло́ва родила́ еси́.

Пе́снь 3.

Ирмос: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Преподобне отче Феодосие, моли Бога о нас.

Вода́ми покрыва́я превы́спренняя, Госпо́дь теле́сно оде́яшеся в струи́ Иорда́нския, в Не́мже утверди́ся се́рдце мое́.

Припев: Преподобне отче Феодосие, моли Бога о нас.

Све́т во Иорда́не Боже́ственный возсия́вый, прозябе́ние су́щим на земли́ богода́нное, благослове́ния и произволе́ния блага́го проявля́ет тя́, Феодо́сие.

Припев: Преподобне отче Феодосие, моли Бога о нас.

Оста́вил еси́ ми́р и я́же в ми́ре, преподо́бне, бы́вшему обнаже́нию Влады́чню подо́бяся на Иорда́не, Феодо́сие.

Сла́ва Отцу́ и Сы́ну и Свято́му Ду́ху:

Кре́ст Спа́сов на ра́мена взе́м, поте́кл еси́ на гро́б Его́, я́коже еле́нь на исто́чники водны́я спаси́тельныя, всеблаже́нне Феодо́сие.

И ны́не и при́сно и во ве́ки веко́в. Ами́нь.

Богородичен: Чи́ны ужасо́шася Ангельстии, Всечи́стая, и челове́ческая устраши́шася сердца́ о рождестве́ Твое́м. Те́м Тя́, Богоро́дице, ве́рою почита́ем.

Седа́лен свята́го, гла́с 8.

Воздержа́нием, и боле́зньми, и моли́твами ду́шу твою́ украси́в боголе́пно, бы́л еси́ соприча́стник му́чеником, блаже́нне, и чуде́с вои́стинну да́ры прия́л еси́, е́же исцеля́ти неду́ги ве́рою чту́щих тя́. Те́мже и де́монов отгоня́я мно́жества, подае́ши исцеле́ния челове́ком благода́тию, богоно́се Феодо́сие, моли́ Христа́ Бо́га грехо́в оставле́ние пода́ти пра́зднующим ве́рою па́мять твою́.

Сла́ва, и ны́не, гла́с то́йже:

Иорда́н струя́ми слу́жит, и Иоа́нн простира́ет ру́ку тле́нную, я́вльшуся Тебе́, Неви́диме, пло́тию ко креще́нию. Но о́в у́бо возвраща́шеся вспя́ть стра́хом, о́в же а́бие держа́ше с тре́петом Тя́, Нетле́ннаго. Вои́стинну Агнец Бо́жий, Исто́чник присноживо́тный, исто́чники же, и моря́, и челове́ки освяти́в: Тро́ица бо просия́, свы́ше Сы́на Тя́ имену́ет Роди́тель, и Святы́й Ду́х снизхо́дит.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Преподобне отче Феодосие, моли Бога о нас.

В вода́х главы́ змие́в сокруши́л еси́, и Ду́хом, Сло́ве Бо́жий, обнови́л еси́ всего́ мя, челове́ка. Те́м вопию́ Ти: сла́ва си́ле Твое́й, Го́споди.

Припев: Преподобне отче Феодосие, моли Бога о нас.

Прекло́ньшему главу́ Предте́чи, уподо́бився Христу́ покоре́нием и изря́дным смире́нием, о́тче Феодо́сие, на доброде́тели возше́л еси́ сто́лп непоколеби́мый.

Припев: Преподобне отче Феодосие, моли Бога о нас.

Де́ве и Ма́тери послужи́в Христа́ Бо́га, непобори́му благода́ть прия́л еси́ Ду́ха, о́тче Феодо́сие, и враги́ неви́димыя низложи́л еси́.

Припев: Преподобне отче Феодосие, моли Бога о нас.

Волхво́в тя́ сла́вный верте́п прие́мый, дароно́сца показа́ на́с ра́ди кре́щшемуся Христу́, ве́ру, Феодо́сие, и с наде́ждею любо́вь принося́ща.

Сла́ва Отцу́ и Сы́ну и Свято́му Ду́ху:

Страстьми́ Влады́ки Христа́ укрепля́емь, со́вестию любе́зною претерпе́л еси́ муче́ние, о́тче Феодо́сие, с те́мным боря́ся мироде́ржцем.

И ны́не и при́сно и во ве́ки веко́в. Ами́нь.

Богородичен: Зачала́ еси́ во утро́бе Твое́й безсе́менно Го́спода и Сего́ родила́ еси́, воплоще́нна, спаса́ющаго ми́р моли́твами Твои́ми. Те́мже Ти́ зове́м: ра́дуйся, Присноде́во Влады́чице.

Пе́снь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Припев: Преподобне отче Феодосие, моли Бога о нас.

Возже́г у́м, Иже на́с в вода́х Обнови́вшаго, му́дре утверди́л еси́, низве́рженный поще́нием, пове́шеньми те́ло, всеблаже́нне Феодо́сие.

Припев: Преподобне отче Феодосие, моли Бога о нас.

Житие́ при́сно сме́рти положи́в поуче́ние, отыти́ же тща́вся к Явльшемуся на́с ра́ди пло́тию, себе́ сотвори́л еси́ гро́б, Феодо́сие.

Сла́ва Отцу́ и Сы́ну и Свято́му Ду́ху:

Сме́рть Христо́ву во́льную тво́й учени́к сла́вный Васи́лий, о́тче Феодо́сие, подража́я, но́вый обновля́ет гро́б, ра́дуяся.

И ны́не и при́сно и во ве́ки веко́в. Ами́нь.

Богородичен: Се́ во утро́бе, Богоро́дице Всечи́стая, Христа́ Бо́га па́че сло́ва име́ла еси́, я́коже Иса́ия прорече́, па́че естества́ же Сего́, Богороди́тельнице, родила́ еси́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Преподобне отче Феодосие, моли Бога о нас.

Нетле́ние на́м дарова́л еси́, Христе́, в воскресе́нии Твое́м, те́мже Васи́лий, сла́вный уго́дник Тво́й, и у́мер, я́коже жи́в, явля́ется.

Припев: Преподобне отче Феодосие, моли Бога о нас.

Очища́яй ми́р креща́ется, мене́ ра́ди Бо́г челове́к по мне́ бы́в, Его́же во дву́х естества́х, Феодо́сие блаже́нне, пропове́дал еси́.

Сла́ва Отцу́ и Сы́ну и Свято́му Ду́ху:

Сла́дость весе́лия Христу́ Бо́гу, мироно́сиц сле́зы обра́щшему в ра́дость, Феодо́сие, то́ки сле́з твои́х иска́паша.

И ны́не и при́сно и во ве́ки веко́в. Ами́нь.

Богородичен: Милосе́рдия Твоего́ сподо́би мя́, Яже Ми́лостивейшаго Сло́ва Ро́ждшая, Свое́ю кро́вию от тли́ челове́ки Изба́вльшаго.

Конда́к, гла́с 8.

Насажде́н во дво́рех Го́спода твоего́, преподо́бными твои́ми доброде́тельми красно́ процве́л еси́ и умно́жил еси́ ча́да твоя́ в пусты́ни, сле́з твои́х ту́чами напая́емая, стадонача́льниче Бо́жий Боже́ственных дворо́в. Те́мже зове́м: ра́дуйся, о́тче Феодо́сие.

Икос:

Челове́к у́бо естество́м бы́л еси́, о́тче, но яви́лся еси́ сограждани́н Ангелов: я́ко бо безпло́тен, на земли́ пожи́в, му́дре, плотско́е все́ промышле́ние отве́ргл еси́. Те́мже и от на́с слы́шиши: ра́дуйся, отца́ благочести́ваго о́трасле; ра́дуйся, ма́тере благогове́йныя ве́твь; ра́дуйся, пусты́нный граждани́не всекра́сный; ра́дуйся, вселе́нныя свети́льниче многосве́тлый; ра́дуйся, я́ко от ю́ности после́довал еси́ Христу́; ра́дуйся, я́ко увяди́л еси́ плотски́я сла́сти; ра́дуйся, мона́шествующих хода́тай спасе́ния; ра́дуйся, уныва́ющих о́браз утеше́ния; ра́дуйся, мно́гия от ле́сти изба́вивый; ра́дуйся, то́ки чуде́с да́руя; ра́дуйся, о ни́щих попече́ние сотвори́вый; ра́дуйся, на́ш предста́телю и изба́вителю. Ра́дуйся, о́тче Феодо́сие.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Преподобне отче Феодосие, моли Бога о нас.

Струю́, попаля́ющую гре́х, и пла́мень, ороша́ющь челове́ческий ро́д, Го́споди, во Твое́м креще́нии совокупи́в, Сло́ве Бо́жий, превозноси́мый Бо́же, благослове́н еси́ и препросла́влен.

Припев: Преподобне отче Феодосие, моли Бога о нас.

Пе́щь Сотво́ршему Иорда́н, тебе́ сама́го, я́ко кади́ло, всесоже́гл еси́, преподо́бне, и пла́мень небе́сный, нело́жен о́браз Боже́ственнаго манове́ния прие́м, хра́м водрузи́л еси́, ду́ш спаси́тельный.

Припев: Преподобне отче Феодосие, моли Бога о нас.

Твои́ми воево́дствы Моисе́ева повину́ются, благода́ти я́вльшейся, преподо́бне: враги́ бо неви́димыя низложи́в, гра́д небе́сный насле́дуют твои́ лю́дие, всехва́льне.

Припев: Преподобне отче Феодосие, моли Бога о нас.

Струя́ми Погре́бшему гре́х тебе́ сама́го обита́лище сотвори́л еси́, Феодо́сие, богоуго́дное, хра́м созда́в, приноси́ти непреста́нную пе́снь законоположи́л еси́ многоязы́чными гла́сы.

Сла́ва Отцу́ и Сы́ну и Свято́му Ду́ху:

Отроко́в подража́я дерзнове́ние, мучи́теля огнедохнове́нное преще́ние укори́л еси́, му́дре предста́тельствуя по Це́ркви Христо́ве, о́тче Феодо́сие, ея́же ра́ди во́льно яви́ся пло́тию распина́емый.

И ны́не и при́сно и во ве́ки веко́в. Ами́нь.

Богородичен: Всечи́стое зача́тие, нетле́нное рождество́ Ты́ Еди́на показа́ла еси́, Де́ва пребы́вши: Бо́га бо зачала́ еси́, над все́ми Су́щаго, Чи́стая, Челове́ка бы́вша ве́рных на спасе́ние и избавле́ние.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Припев: Преподобне отче Феодосие, моли Бога о нас.

Пе́щь иногда́ в Вавило́не струи́ Иорда́нския изобрази́, Боже́ственным Креще́нием проти́вныя опаля́ющи, ве́рныя же ороша́ющи, пою́щия: благослови́те, вся́ дела́ Госпо́дня, Го́спода.

Припев: Преподобне отче Феодосие, моли Бога о нас.

Теле́сных страсте́й предызше́д пре́жде отше́ствия, Феодо́сие, от не́др земны́х во́д изыма́я, ю́ноши явля́ешися, зову́щу: благослови́те, вся́ дела́ Госпо́дня, Го́спода.

Припев: Преподобне отче Феодосие, моли Бога о нас.

Бы́сть твои́х ру́к благослове́ние, во струя́х креща́ющагося Христа́ Боже́ственнейшее повеле́ние, невла́жней земли́ ро́днейшая вода́ и гре́ющее со́лнце: зерно́ бо во многопло́ден кла́с пшени́цы безсе́менно пита́шеся.

Припев: Преподобне отче Феодосие, моли Бога о нас.

Во мра́к мы́сленный Све́та Боже́ственнейшаго ты́ вше́д, Феодо́сие, и скрижа́ли пе́рстом Бо́жиим написа́в се́рдцу твоему́, благоче́стия уче́ния прине́сл еси́ ученико́м твои́м, кни́гу жи́зни, всеблаже́нне.

Припев: Преподобне отче Феодосие, моли Бога о нас.

Ве́ру тве́рду кровоточи́выя, о́тче, подража́вши жена́, ру́бищу косну́вшися, я́коже тма́, су́щим в тебе́ просвеще́нием неду́г отгна́ся, бы́л бо еси́ избра́ния сосу́д я́вльшемуся Христу́.

Сла́ва Отцу́ и Сы́ну и Свято́му Ду́ху:

Тро́ичен: Тя́, из Бо́га Бо́га ви́девше, теле́сне я́вльшагося Христа́ неизглаго́ланно, позна́хом у́бо Неви́димаго Отца́ Твоего́ и Ду́ха Твоего́ Свята́го, зову́ще: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Ты́ Отцу́ Неразлу́чнаго, во утро́бе богому́жно Жи́тельствовавшаго, безсе́менно зачала́ еси́ и несказа́нно родила́ еси́. Те́м Тя́ спасе́ние все́х на́с ве́мы.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Преподобне отче Феодосие, моли Бога о нас.

Собо́ры пропове́дал еси́, богому́дре Феодо́сие, честны́х равночи́сленны Ева́нгелий Христо́вых, произволе́нием кро́вь му́ченическу прие́м ре́вностию, и му́ченик без кро́ве благоче́стия яви́лся еси́.

Припев: Преподобне отче Феодосие, моли Бога о нас.

Су́д непра́веднаго пра́ведно осуди́, за твое́ изгна́ние прогна́вш и ху́льными устна́ми нечести́вую ду́шу изъе́мш, жи́зни же лиши́вш жи́зни врага́, преподо́бне.

Припев: Преподобне отче Феодосие, моли Бога о нас.

Твоя́ помина́юще уче́ния, Феодо́сие, во двою́ существу́ Христа́ пропове́даем, две́ во́ли ве́дуще, есте́ственны, и де́йственны, и самовла́стны, в Бо́зе, кре́щшемся пло́тию.

Припев: Преподобне отче Феодосие, моли Бога о нас.

Тезоиме́нно дая́ние бла́го от Отца́ све́тов, ду́ш и теле́с вра́чь бы́л еси́, сне́дь оби́льна и питие́, и́же во гла́де та́ющих и жа́жди, и наги́х одея́ние, и па́дающих исправле́ние.

Припев: Преподобне отче Феодосие, моли Бога о нас.

Не преста́й ста́до твое́ назира́я, о́тче преподо́бне, и, твое́ помина́я обеща́ние, е́же я́ко наде́жди ко́твы непрело́мны привяза́хом ка́меню, ко Христу́ хода́тая тя́ иму́ще, Феодо́сие.

Сла́ва Отцу́ и Сы́ну и Свято́му Ду́ху:

Тро́ичен: Еди́ницу Тричи́сленную, Тро́ицу Единосу́щную правосла́вно пою́ще, ве́рнии, просла́вим, несеко́мо Пребоже́ственное Естество́ Трисия́нное, невече́рнюю Зарю́, еди́ну нетле́нную, Све́т на́м возсия́вшую.

И ны́не и при́сно и во ве́ки веко́в. Ами́нь.

Богородичен: Яко у́тро обрела́ся еси́ ра́ннее в жите́йстей но́щи, де́вства заря́ми облиста́ющи, Восто́к Со́лнца мы́сленнаго пра́вды на́м я́вльшая, Богома́ти Всечи́стая.

Свети́лен.

Очи́стихомся све́тло, Христе́ мо́й, очище́нием Твои́м и ны́не пра́здничною ра́достию, Феодо́сия честна́го па́мятию, обогати́хомся, те́мже мона́шествующих веселя́тся чи́ни.

Стихи́ры, гла́с 5.

До́м высо́ких доброде́телей предустро́ив тебе́ сама́го, Феодо́сие, в Боже́ственнем Богоро́дицы сподо́бился еси́ хра́ме обита́ти и се́й посеща́ти, Бо́жию бо све́тлость зре́ти возлюби́л еси́, и́стинныя же ны́не се́ни благоле́пие и неизрече́нную зри́ши красоту́, ю́же у́бо основа́ Вы́шний, преподо́бне, и вселя́ет преусе́рдно к Нему́ взира́ющия. Того́ моли́ низпосла́ти душа́м на́шим ве́лию ми́лость.

Боле́зньми по́стническими тебе́ сама́го очи́стив, подража́тель бы́л еси́, всеблаже́нне, твоего́ Влады́ки, и́бо кра́я ри́зы твоея́ прикосну́вшейся неду́г исцели́л еси́, гла́дом та́ющия в пусты́ни напита́л еси́, от неистощи́маго подая́ сокро́вища, я́ко тезоимени́т Бо́жия дая́ния бы́в, ве́ру же правосла́вную пропове́дал еси́, преподо́бне, мучи́теля неи́стовство в ничто́же вмени́в, Христа́ моля́, подаю́щаго ми́ру ве́лию ми́лость.

Пла́мень к Бо́гу неукло́нный, и разжже́нныя, и те́плыя любве́ вже́г, с небесе́ восприя́л еси́ сия́ние, благоволе́ние Боже́ственное тебе́ возвеща́ющее, хра́м святе́йший доброде́тели наказа́ние созда́ти и ду́ш попече́ние. Его́же наче́н, благоче́стно соверши́л еси́, иде́же и многострада́льное лежи́т те́ло твое́, положе́ньми чи́стыми, всеблаже́нне, преизя́щно почита́емо. Христа́ моли́ низпосла́ти душа́м на́шим ве́лию ми́лость.

Вои́стинну да́же до ски́нии чу́дныя, да́же до до́му Бо́жия, Феодо́сие, проше́л еси́ ра́дованием и весе́лием души́, иде́же гла́с, о́тче, пра́зднующих, кра́снаго слы́шати хотя́й и сла́дкаго пе́ния, и неизрече́нныя душесла́дости, и утеше́ния бы́в в прича́стии, блаже́нне, ея́же са́мыя жела́я, пло́ть умертви́л еси́, ю́же и получи́л еси́, Боже́ственною пра́вдою украша́емь, Христа́ моля́ душа́м на́шим да́ти ве́лию ми́лость.

Сла́ва, гла́с 2:

Доброде́телей ле́ствица, о́браз показа́ся на земли́ та́йно, сего́ восхва́лим, я́ко по́стников удобре́ние, пости́вся бо и́стинно, я́коже вели́кий Анто́ний, безме́рное смире́ние показа́в, и, упа́с лю́ди своя́ благоче́стно, во огра́ду святу́ю всели́, иде́же ли́к Ангельский пребыва́ет. Приле́жно вопие́м ти́: не забу́ди и ны́не ста́да твоего́, всеблаже́нне Феодо́сие, но моли́твами твои́ми ко Го́споду спаси́ на́с, мо́лимся.

И ны́не, гла́с то́йже:

Дне́сь Христо́с на Иорда́н прии́де крести́тися, дне́сь Иоа́нн каса́ется верху́ Влады́чню: си́лы небе́сныя ужасо́шася, пресла́вное ви́дяще та́инство, мо́ре ви́де и побеже́, Иорда́н, ви́дев, возврати́ся. Мы́ же, просве́щшеся, вопие́м: сла́ва яви́вшемуся Бо́гу, и на земли́ ви́денному, и просвети́вшему ми́р.

Молитва

О свяще́нная главо́, преподо́бне о́тче, преблаже́нне а́вво Феодо́сие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.