22 января.

Канон святому мученику Полиевкту.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченик Тво́й, Го́споди, Полие́вкт, во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н свята́го. Гла́с 8.

Пе́снь 1.

Ирмос: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.

Припев: Святый мучениче Полиевкте, моли Бога о нас.

Многоже́ланныя пи́щи насыща́емь, и блаже́нныя зари́, сла́вне, исполня́емь, и Ангельскаго ли́ка удостоя́емь, тво́й благохва́лящия пра́здник, Полие́вкте, спаса́й, Го́споду пою́щия: сла́вно бо просла́вися.

Припев: Святый мучениче Полиевкте, моли Бога о нас.

Светоно́сная и благознамени́тая па́мять твоя́, све́та Боже́ственнейшаго полна́, возсия́, просвеща́ющая све́тло ве́рою воспева́ющия тя́, до́блий во́ине Христо́в Полие́вкте всеблаже́нне, Го́споду пою́щия: сла́вно бо просла́вися.

Сла́ва Отцу́ и Сы́ну и Свято́му Ду́ху:

Вжиля́емь кре́постию Ду́ха и Боже́ственною си́лою, блаже́нне, оде́явся, изше́л еси́ тве́рдо к боре́нию го́рдаго и, сего́ кре́пко низложи́в, усе́рдно взыва́л еси́: Го́споду воспои́м, сла́вно бо просла́вися.

И ны́не и при́сно и во ве́ки веко́в. Ами́нь.

Богородичен: Воплоще́ннаго, пе́рвее Безпло́тнаго, Де́во Богоро́дице, родила́ еси́, Всенепоро́чная и Всечи́стая, я́ве Де́ва пребы́вши, бога́тством благоутро́бия на́с ра́ди обнища́вшаго и спа́сшаго Тому́ зову́щия: сла́вно бо просла́вися.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Святый мучениче Полиевкте, моли Бога о нас.

Измени́л еси́ мудрова́ние к благоче́стию, свы́ше сподо́бився боже́ственнаго зре́ния Спа́сова, Полие́вкте.

Припев: Святый мучениче Полиевкте, моли Бога о нас.

Побе́ды жела́яй, вся́ оплева́л еси́, сла́вне, я́же на земли́, и небе́снаго насле́дия сподо́бился еси́.

Сла́ва Отцу́ и Сы́ну и Свято́му Ду́ху:

Сла́вы жела́я, я́же па́че ума́, устреми́лся еси́ терпели́вно и и́дольское безсла́вие низложи́л еси́.

И ны́не и при́сно и во ве́ки веко́в. Ами́нь.

Богородичен: Напра́ви моя́, Влады́чице, стопы́, да к Твоему́ Сы́ну похва́льным жи́тельством пойду́.

Седа́лен, гла́с 5.

Яко до́бр во́ин Христа́, все́х Бо́га, благода́тию Сего́ укрепля́емь, всего́ преложи́л еси́ себе́ в любо́вь Его́ Неа́рхом, ве́рным во́ином, и́же с тобо́ю, му́дре. Те́мже, зако́нно пострада́в, досто́йно венча́лся еси́ от Го́спода, му́чениче Полие́вкте.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святый мучениче Полиевкте, моли Бога о нас.

Благочести́вым испове́данием, всеизря́дне, Влады́це са́м себе́ приве́л еси́, е́же за Того́, сла́вне, заколе́ние любо́вию прие́м и поро́ка вся́каго свобо́ден бы́в. Отсю́ду Спа́су взыва́еши: си́ле Твое́й сла́ва, Человеколю́бче.

Припев: Святый мучениче Полиевкте, моли Бога о нас.

Сла́дость благоче́стия услади́ся тебе́, впери́лся еси́ Боже́ственною любо́вию, чи́стым и све́тлым жела́нием уя́звен и любо́вию распала́емь вы́шняго Ца́рствия, песнопое́ши Влады́це: си́ле Твое́й сла́ва, Человеколю́бче.

Припев: Святый мучениче Полиевкте, моли Бога о нас.

Преесте́ственным единому́дрием связа́вся Неа́рху, сего́ же глаго́лы огласи́вся ко благочести́вей ве́ре Тро́ичестей, богому́дре му́чениче Полие́вкте, вои́стинну многожела́нныя и любе́зныя сподо́бился еси́ му́чеников све́тлости.

Сла́ва Отцу́ и Сы́ну и Свято́му Ду́ху:

Му́ченическим сочи́слився во́инством, Ца́рство прия́л еси́ недви́жимое, новозакла́вся, в сие́ вше́л еси́, еще́ кро́вем ка́плющим. Взя́лся же еси́, прему́дре, в ра́дость непреме́нную, и Све́т невече́рний, и вели́кия сла́вы получи́в.

И ны́не и при́сно и во ве́ки веко́в. Ами́нь.

Богородичен: Уподо́бився су́щим на земли́, Небе́сный небе́сныя сия́ соде́ла и, пострада́в естество́м стра́стным, Боже́ственнаго безстра́стия прича́стие дарова́. Сего́ у́бо Ро́ждшую, Неискусобра́чную Отрокови́цу Богоро́дицу ве́дуще, сла́вим.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святый мучениче Полиевкте, моли Бога о нас.

Да присносу́щное получи́ши наслажде́ние, блаже́ннейше, кра́сная жития́, и естества́ сво́йство, и сла́дость, и сла́ву, и жи́знь са́мую презре́л еси́ и наде́жды твоея́ не погреши́л еси́.

Припев: Святый мучениче Полиевкте, моли Бога о нас.

Тайнонауче́н бы́в Боже́ственнаго о́браза Боже́ственным та́йнам, тве́рдым умо́м к соверше́нным подвиго́м отлучи́лся еси́ и, победоно́сец я́влься, нетле́нных сподо́бился еси́ венце́в, Полие́вкте.

Сла́ва Отцу́ и Сы́ну и Свято́му Ду́ху:

Безбо́жнейшую че́сть, естество́м ненавистозло́бное име́я мудрова́ние, благоче́стно отри́нул еси́ и бо́ги су́етныя низве́ргл еси́, благоче́стия ре́вностию разже́гся и усе́рдия богодохнове́ннаго испо́лнився, пресла́вне.

И ны́не и при́сно и во ве́ки веко́в. Ами́нь.

Богородичен: Рече́нию Твои́х усте́н, Пречи́стая, после́дующе, Тя́ ублажа́ем: с Тобо́ю бо вои́стинну вели́чия сотвори́в, Госпо́дь возвели́чи Тя́ и и́стинную Бо́жию Ма́терь, ро́ждся из утро́бы Твоея́, показа́.

Пе́снь 6.

Ирмос: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Припев: Святый мучениче Полиевкте, моли Бога о нас.

Чи́на Ангельскаго удосто́ился еси́, досточу́дне му́чениче, Ангельскую ре́вность я́ве показа́в, с ни́ми у́бо приле́жно, блаже́нне, моли́, изба́витися от напа́стей воспева́ющим тя́.

Припев: Святый мучениче Полиевкте, моли Бога о нас.

Усну́л еси́ любе́зне, страда́льче, до́лжным сно́м, отсе́кшейся главе́ мече́м, многострада́льне, и ны́не на небесе́х жре́бий нетле́нен насле́довал еси́, с му́ченики водворя́яся.

Сла́ва Отцу́ и Сы́ну и Свято́му Ду́ху:

Сообра́зен и о́бщник страда́ний Спа́са бы́л еси́, на́с ра́ди стра́сть кре́стную подъе́мшаго, и ны́не, блаже́нне, с Ни́м, я́коже обеща́, ца́рствуеши во ве́к безконе́чный.

И ны́не и при́сно и во ве́ки веко́в. Ами́нь.

Богородичен: Иму́щи милосе́рдие, я́ко ро́ждши человеколю́бное Сло́во, спаси́ ны ну́жднаго и лю́таго обстоя́ния: Тя́ бо еди́ну, ве́рнии, Всечи́стая Влады́чице, Предста́тельницу непобеди́му стяжа́хом.

Конда́к, гла́с 4.

Спа́су прикло́ншу во Иорда́не главу́, сокруши́шася змие́в главы́. Полие́вктова же глава́ отсе́кшаяся льсти́ваго посрами́.

Икос:

Во Иорда́не реце́ Зижди́тель вся́ческих, главу́ преклони́в, креще́ние прие́млет и, змие́м главы́ неви́димо сокруши́в, си́лу подаде́ челове́ком на велему́дреннаго, пе́рвее в раи́ запе́ншаго Ада́му сне́дию дре́ва и сме́рть нане́сшего ему́ без наде́жды. Те́мже страда́лец ны́не Полие́вкт, ласка́ньми жены́ не преклони́вся, пострада́ тве́рдо, просте́р главу́, е́йже, отсе́кшейся, льсти́ваго посрами́.

Пе́снь 7.

Ирмос: Бо́жия снизхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Святый мучениче Полиевкте, моли Бога о нас.

Показа́л еси́, Влады́ко, Твоему́ рабу́ си́лу Твою́, сего́ ра́ди преусе́рдно к подвиго́м прии́де самозва́нен и, победоно́сец бы́в, поя́ше: благослове́н Бо́г оте́ц на́ших.

Припев: Святый мучениче Полиевкте, моли Бога о нас.

Сла́вный и всезнамени́тый пра́здник тво́й, му́чениче, возсия́, явле́ния бо твоего́ Влады́ки све́т прино́сит и озаря́ет ве́рою зову́щия: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Бога́тство некра́домо, пребыва́ющее обре́л еси́ досто́инство и неотпа́дающе, но во ве́ки пребыва́ющую прия́л еси́ сла́ву, поя́, чу́дне: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Безнача́льному Роди́телю Спребыва́ющаго при́сно Разумева́емаго заче́нши, Де́во, воплоще́нна Сы́на родила́ еси́, за е́же спасти́ ве́рою зову́щия: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святый мучениче Полиевкте, моли Бога о нас.

Священноде́йствуется дне́сь многомоле́бная па́мять твоя́, му́чениче страстоте́рпче Христо́в Полие́вкте: Христу́ бо благоуго́дна и прия́тна же́ртва бы́л еси́, закла́вшемуся тебе́ ра́ди и поже́ршуся. Его́же о́троцы благословя́т, свяще́нницы воспева́ют, лю́дие превозно́сят во вся́ ве́ки.

Припев: Святый мучениче Полиевкте, моли Бога о нас.

Страда́льческое сопротивле́ние, страстоте́рпче, да́же до кро́ве показа́в на земли́, Полие́вкте, в черто́г многосве́тлый на небесе́х всели́лся еси́, твои́х крове́й кре́щся ба́нею и поя́ Влады́це: свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Умерщвле́нную паде́ньми ду́шу мою́ возста́ви, му́ченическим твои́м дерзнове́нием объе́м, Боже́ственным повеле́нием причита́я, сла́вне, достоле́пно к доброде́тели обраща́я вопию́щую Влады́це: свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Ра́дуйся, Ея́же ра́ди обрето́хом ра́дость ве́чную; ра́дуйся, Евину печа́ль разреши́вшая, Ада́мово се́тование в све́тлость обрати́вши; ра́дуйся, Бо́га воплоще́нна ро́ждшая, Де́во Богоро́дице, ве́рных Предста́тельнице, Тя́ превознося́щих во вся́ ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Святый мучениче Полиевкте, моли Бога о нас.

Прииди́те, у́бо боговенча́ннаго, мучениколю́бцы, воспои́м му́ченика, его́же спросла́ви светоиме́нным Свои́м Вы́шний явле́нием, и честны́м дне́м почествова́, и венча́, и боже́ственными доброде́тельми украси́.

Припев: Святый мучениче Полиевкте, моли Бога о нас.

Струя́ми му́ченических излия́вшихся твои́х крове́й удави́л еси́ вражде́бнейшаго, зло́бу соде́лавшаго, Це́рковь же Христо́ву напая́я, уясни́л еси́, богоблаже́нне, ве́рою тя́ при́сно блажа́щую.

Сла́ва Отцу́ и Сы́ну и Свято́му Ду́ху:

Бу́ди ми́, му́чениче, помо́щник, от напа́стей мя́ разли́чных избавля́я и обстоя́ний, у́з же реша́ е́реси и лю́тыя свобожда́я темни́цы моли́твами твои́ми, воспева́ющаго тя́ мы́слию чи́стою, пресла́вне.

И ны́не и при́сно и во ве́ки веко́в. Ами́нь.

Богородичен: Зако́на же и проро́ков Главу́, Христа́, и полноту́, Всечи́стая, родила́ еси́, за благоутро́бие безме́рныя пучи́ны вочелове́читися на́с ра́ди из Тебе́ благоизво́лившаго и спа́сшаго ве́рою Тя́ при́сно велича́ющия.

Свети́лен свята́го.

Многожела́нное стяжа́в от души́ многожела́нныя бога́тство небе́сное, о Полие́вкте блаже́нне, и сла́ву, и све́тлость, в Бо́зе бы́в, и вене́ц Боже́ственный прия́л еси́ от руки́ Вы́шняго с му́ченическими ли́ки, я́ко му́ченик и́стинен.

Молитва мученику Полиевкту Мелитинскому

О, святы́й му́чениче Полие́вкте! Услы́ши ны́не нас, к тебе́ усе́рдно моля́щихся. Моли́ся о нас, рабе́х Бо́жиих (Имена), да изба́вимся от вся́ких скорбе́й, боле́зней, бед и обстоя́ний и благоче́стно поживе́м в настоя́щем житии́, ходя́ще в за́поведех и оправда́ниих Госпо́дних безпоро́чно. Испроси́ нам грехо́в проще́ние, телесе́м здра́вие, жития́ исправле́ние и ве́чное спасе́ние, я́ко да твои́м те́плым предста́тельством спаса́еми, сла́ву возсыла́ти сподо́бимся в Тро́ице сла́вимому Бо́гу на́шему, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.