21 января.

Канон священномученику Исидору и иже с ним седмидесяти и двум мученикам, во Юрьеве, граде Ливонстем, за Православие пострадавшим.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

Страстоте́рпцы Госпо́дни блаже́ннии, Правосла́вную ве́ру Христо́ву со дерзнове́нием пропове́дасте и на суди́щи уче́ния враго́в непра́вая обличи́сте, того́ ра́ди и вве́ржени бы́сте, святи́и, во глубину́ ре́чную, ду́ши же ва́ша всели́шася в небе́сныя кро́вы, иде́же со святы́ми предстоя́ще престо́лу Царя́ все́х Бо́га, моли́теся Ему́ за вся́ правосла́вныя лю́ди, по́двиги ва́ша че́стно почита́ющия.

Стихи́ра, гла́с 2:

Прииди́те, возра́дуемся Го́сподеви в па́мять страстоте́рпец, о празднолю́бцы! Прииди́те, воспои́м я́сно, восхваля́юще страда́льцы Христо́вы, лжи́вая мудрова́ния и вра́жескую ле́сть отве́ргшия и пра́вую ве́ру Христо́ву посреде́ суди́ща небоя́зненно пропове́давшия. Те́мже, о всеблаже́ннии и многострада́льнии, непре́станно моли́теся о душа́х на́ших.

Кано́н святы́м му́чеником, гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святии мученицы, молите Бога о нас.

Безпеча́льную жи́знь насле́довасте, святи́и му́ченицы Христо́вы, се́дмьдесяте со треми́, и ра́дости духо́вныя исполня́еми при́сно, вся́ку печа́ль, молю́ся, отжени́те от души́ моея́, я́ко да, ра́дуяся, сла́влю свяще́нное ва́ше страда́ние.

Припев: Святии мученицы, молите Бога о нас.

Новоявле́нныя зве́зды бы́сте, му́ченицы Христо́вы, предводи́мыя достосла́вным, кре́пким во уче́нии и терпе́нии, свяще́нным Иси́дором, те́мже мо́лим вы́: тму́ грехо́вную отжени́те от серде́ц на́ших, добропобе́днии му́ченицы Христо́вы.

Припев: Святии мученицы, молите Бога о нас.

Разжже́ннии Боже́ственными у́гльми Свята́го Ду́ха, страда́льцы, до́блестным страда́нием просия́сте, святи́и, и стре́лы сокруши́сте вся́ дре́вняго зми́я, льсти́ваго борца́.

Сла́ва Отцу́ и Сы́ну и Свято́му Ду́ху:

Тро́ичен: Тро́ице Единосу́щная, Отче, Сло́ве и Ду́ше Святы́й, Тя́ ве́рно сла́вим, я́ко Творца́ все́х, и Тебе́ вопие́м благоче́стно: Тро́ице Свята́я, спаси́ ны, Бо́же, моли́твами Твои́х страда́лец.

И ны́не и при́сно и во ве́ки веко́в. Ами́нь.

Богородичен: Две́рь Боже́ственныя сла́вы — Ты́ еси́, Пречи́стая Госпоже́, покая́ния ми́ две́ри отве́рзи, Влады́чице, от вра́т а́довых исхити́, молю́ся, смире́нную мою́ ду́шу, я́ко да по до́лгу сла́влю Тя́, те́плую Засту́пницу мою́.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святии мученицы, молите Бога о нас.

Двиза́ше всю́ зло́бу льсти́вый вра́г, со святы́ми боря́ся, и побежда́шеся от ни́х, зря́ те́х непобежда́емых, поне́же Бо́жия си́ла помога́ше и́м, те́мже Боже́ственныя све́тлости яви́шася о́бщницы, богоблаже́ннии.

Припев: Святии мученицы, молите Бога о нас.

Злому́дренный би́скуп ва́с восхоте́, святи́и, отто́ргнути от пра́выя ве́ры и ко своему́ лжемудрова́нию присоедини́ти и опресно́чному служе́нию, вы́ же противуста́сте ему́, святи́и, я́ко до́блии во́ини, и си́лою Христо́вою побе́ду взя́сте на́нь.

Сла́ва Отцу́ и Сы́ну и Свято́му Ду́ху:

Тро́ичен: Све́т Оте́ц, Све́т Сы́н, Све́т Ду́х Святы́й Уте́шительный, я́ко от Со́лнца бо Еди́наго Тро́ица сия́ющи, Боже́ственно озаря́ет и соблюда́ет ду́ши на́ша святы́х му́ченик мольба́ми.

И ны́не и при́сно и во ве́ки веко́в. Ами́нь.

Богородичен: Де́во Ма́ти Пречи́стая, я́же Бо́га вопло́щшая, гла́сы приими́ вопию́щих Ти́ всегда́ и на́с изба́ви от разли́чных искуше́ний вра́жиих.

Седа́лен, гла́с 5:

Сия́ет дне́сь па́мять страстоте́рпцев Твои́х, Го́споди, седми́десят со двема́ и со священнонача́льником и́х Иси́дором, я́ко зве́зды, просия́вших и мра́к заблужде́ния прогна́вших от ве́рных Бо́жиим посо́бием; и́мут бо дерзнове́ние ко Го́споду, Ему́же и предстоя́т, моля́щеся о все́х на́с, честна́я страда́ния и́х ве́рно почита́ющих.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святии мученицы, молите Бога о нас.

Страда́льцы святи́и, се́дмьдесяте со двема́, и, я́ко го́лубь чи́стый, Иси́доре, учи́телю и́стинныя ве́ры Христо́вы, ва́с поколеба́ти не возмо́же вселука́вый от боже́ственнаго стоя́ния, но са́м паде́ся злы́й.

Припев: Святии мученицы, молите Бога о нас.

Страстоте́рпцы сла́внии и страда́льче до́блий, Иси́доре блаже́нный, приведы́й Го́сподеви ли́к му́чеников, вы́ бо уме́ты вмени́сте вся́ кра́сная ми́ра, да обря́щете Христа́ Бо́га на́шего — и́стинную Красоту́ и некра́домое Бога́тство.

Сла́ва Отцу́ и Сы́ну и Свято́му Ду́ху:

Тро́ичен: Тро́ицу Ли́цы, Еди́ницу о́бразом, благоче́стно сла́вим, Бо́га и́стинна, Его́же пою́т Ангельская и арха́нгельская чинонача́лия, я́ко тва́ри Влады́ку, и челове́цы, ве́рно покланя́ющеся при́сно.

И ны́не и при́сно и во ве́ки веко́в. Ами́нь.

Богородичен: Воплоща́ется от чи́стых крове́й Твои́х Госпо́дь, покая́ние чту́щим Тя́ подава́я, Всепе́тая, Твои́м благи́м хода́тайством, я́ко Благоутро́бен и Еди́н Человеколю́бец.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святии мученицы, молите Бога о нас.

Во́д духо́вных испо́лнишася трие́ и се́дмьдесят, в во́ду вве́ржени бы́вше, святи́и, за все́х Живота́ — Христа́ Царя́, и Боже́ственным манове́нием изнесе́на бы́ша честна́я телеса́ и́х на су́шу, и пре́лести изсуши́ша му́тныя пото́ки си́лою Бо́жиею, и ве́рных сердца́ напои́ша.

Припев: Святии мученицы, молите Бога о нас.

Вельми́ подви́гшеся ре́вностию, боже́ственнии му́ченицы, и о Христе́ укрепля́еми, враго́в Правосла́вныя ве́ры посрами́сте и зако́н лати́нский и лжи́вая уче́ния попра́сте, святи́и, и ни во что́же вмени́сте. Му́ченик моле́нием, Сло́ве Бо́жий, вели́ких му́к изба́ви на́с, вседуше́вно свята́я муче́ния и́х ублажа́ющих.

Сла́ва Отцу́ и Сы́ну и Свято́му Ду́ху:

Тро́ичен: Пренача́льное и Присносу́щное Еди́но Божество́ славосло́вяще, поклони́мся в Трие́х Ли́цех естество́м Неразде́льному и сла́вою Равноче́стному, я́коже боже́ственнии му́ченицы пропове́даша.

И ны́не и при́сно и во ве́ки веко́в. Ами́нь.

Богородичен: Де́во, в жена́х Благослове́нная, Твоя́ ми́лости пода́ждь лю́дем Твои́м, страстоте́рпцев Христо́вых моле́нием, Ми́лостиваго бо яви́лася еси́ Ма́ти.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святии мученицы, молите Бога о нас.

Что́ на́м мно́гая словеса́, я́же глаго́леши, би́скупе, непра́выя ве́ры побо́рниче, и обеща́емая, я́же предлага́еши? — свяще́нный Иси́дор со дружи́ною свое́ю глаго́лаше к мучи́телю, — сия́ вся́ на́м же́лчи горча́йша, но твори́, е́же хо́щеши, о суему́дренне.

Припев: Святии мученицы, молите Бога о нас.

Ва́с, честни́и страда́льцы Христо́вы, Ду́х Святы́й укрепи́, и всели́ся в ва́с бога́тно, и терпе́ние дарова́ ва́м проти́ву жестокосе́рдых враго́в, Его́же си́лою мно́гия томле́ния и му́ки претерпе́сте, святи́и, от неправове́рных. Те́мже и Христо́с ва́с венча́ десни́цею Свое́ю бога́тою, за Него́же и пострада́сте.

Сла́ва Отцу́ и Сы́ну и Свято́му Ду́ху:

Тро́ичен: Оте́ц, Сы́н и Ду́х Пра́вый, Триипоста́сная Еди́нице и Нераздели́мая Тро́ице, поми́луй покланя́ющияся Боже́ственней держа́ве Твое́й.

И ны́не и при́сно и во ве́ки веко́в. Ами́нь.

Богородичен: Вити́йствующая уста́ не возмо́гут пове́дати Твое́, Отрокови́це, та́инство: Несказа́ннаго бо ражда́еши и на руку́ Свое́ю но́сиши руко́ю Содержа́щаго вся́ческая.

Конда́к, гла́с 4:

Му́ченик Христо́вых ли́к пе́сньми почти́м, пострада́вших кре́пко Христо́вы ра́ди ве́ры и́стинныя и вра́жию горды́ню до конца́ низложи́вших. Озари́вшеся бо благода́тию Несозда́нныя Тро́ицы, сла́внии, со священному́чеником Иси́дором пострада́вшии, я́ко зве́зды, сия́ете во все́м ми́ре, и ны́не мо́литеся Христу́ непреста́нно, и на́с защища́ете от вражде́бных язы́к наше́ствия, неусы́пнии моли́твенницы о душа́х на́ших.

Икос:

Прему́дрый Зижди́тель, Влады́ка и Госпо́дь виногра́да мы́сленнаго, я́коже пресвяты́ми усты́ в при́тчи виногра́да глаго́лет, во единонадеся́тый ча́с де́лавшим да́рует бога́тую мзду́; и ны́не, де́лы извести́в в при́тчи кры́емое, священноучи́теля Иси́дора и и́же с ни́м по́лк страда́лец се́дмьдесят со двема́ показа́ све́тлы му́ченики и во́ины преизря́дны. Преда́ния бо и зако́ны лати́нския попра́вше, до́блии, и ненави́стников пра́выя ве́ры ужаси́вше кре́пким противле́нием свои́м и терпе́нием, подо́бни бы́сте пе́рвым страда́льцем, святи́и му́ченицы. Те́мже Христо́с ва́с венча́ нетле́нными венцы́ в кро́вех небе́сных, иде́же му́ченичестии ли́цы веселя́тся. Вы́ же защища́йте на́с от вражде́бных язы́к наше́ствия, неусы́пнии моли́твенницы о душа́х на́ших.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святии мученицы, молите Бога о нас.

Истиннии му́ченицы, и́стиннаго Христа́ Бо́га на́шего страда́льцы, трие́ и се́дмьдесят, взыва́ху к мучи́телем свои́м: бие́ние, и о́гнь, и ины́я му́ки гото́ви есмы́ сла́дце подъя́ти за пра́вую ве́ру Христо́ву. И ра́достно поя́ху: а́ще Бо́г по на́с, никто́же на ны́, благослове́н Бо́г оте́ц на́ших.

Припев: Святии мученицы, молите Бога о нас.

Зубы́ скреже́щуще уби́йственнии лю́дие и, я́ко зве́рие, восхи́тивше богоявле́нники, в темни́цу вмета́ху и вода́м предая́ху, му́ченицы же ра́достно поя́ху: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Тро́ичен: Просла́вим Тро́ицу Неразде́льную, воспои́м Еди́но Божество́, со Отце́м Сло́во и Ду́ха Всесвята́го.

И ны́не и при́сно и во ве́ки веко́в. Ами́нь.

Богородичен: Благослове́н еси́, Бо́же, Иже во чре́ве Деви́чи всели́выйся и спасы́й челове́ка, препе́тый и превозноси́мый во ве́ки.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святии мученицы, молите Бога о нас.

Хва́лящеся я́звами Христо́выми, к ве́чным востеко́сте оби́телем, священному́чениче Иси́доре и и́же с тобо́ю собо́р му́ченический, во оде́жды оде́яни убеле́нныя, и све́тло Царе́ви си́л предстоите́, с му́ченики взыва́юще: благослови́те, вся́ дела́ Госпо́дня, Го́спода.

Припев: Святии мученицы, молите Бога о нас.

Страстоте́рпцы, му́ченицы Христо́вы, се́дмьдесяте со треми́, пла́мень вра́жеския зло́бы попра́сте Бо́жиим посо́бием, безчелове́чных мучи́телей посрами́сте и венцы́ нетле́нными от Христа́ венча́стеся, непобеди́мии, воспева́юще: благослови́те, вся́ дела́ Госпо́дня, Го́спода.

Припев: Святии мученицы, молите Бога о нас.

Яко земля́ жа́ждущая, му́ченицы блаже́ннии, прия́сте уче́ния от медото́чнаго язы́ка Иси́дора свяще́ннаго и вложи́сте в ду́ши своя́, я́коже не́кую сла́дость Боже́ственную, и от сего́ принесо́сте Подвигополо́жнику Христу́ кла́с стори́чествующь, пою́ще: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Тро́ичен: Да пое́тся Трисвяты́й, Оте́ц и Сы́н и Ду́х Святы́й, Неразде́льная Еди́ница, Еди́но Божество́, держа́щее дла́нию всю́ тва́рь во вся́ ве́ки и на́с назира́ющее ми́лостию Свое́ю бога́тою, пою́щих: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Из Тебе́ Бо́г возсия́, Всепе́тая Де́во, и богоразу́мием просвети́ омраче́нныя лю́ди, и на́с от истле́ния к жи́зни небе́сней возведе́, пою́щих: благослови́те, вся́ дела́ Госпо́дня, Го́спода.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святии мученицы, молите Бога о нас.

Пло́ть свою́ преда́вше ра́нам и го́рьким темни́цам за Всевы́шняго Царя́ и Го́спода, неуя́звленну спасли́ есте́ ду́шу, страстоте́рпцы Госпо́дни блаже́ннии со треми́ се́дмьдесяте, и Боже́ственныя сла́вы прича́стницы бы́ти сподо́бистеся, всечестни́и му́ченицы.

Припев: Святии мученицы, молите Бога о нас.

Невече́рняго Све́та — Христа́ — зве́зды на земли́ со пресве́тлым Иси́дором свяще́нным яви́стеся, блаже́ннии, и все́м челове́ком озаря́ете ду́ши, призыва́ющим ва́с с ве́рою и почита́ющим святу́ю па́мять ва́шу.

Припев: Святии мученицы, молите Бога о нас.

Па́мять светоза́рную ва́шу и честну́ю почита́юще и ра́дующеся ду́хом, мо́лимся: блаже́нный Иси́доре, до́блий учи́телю, с пострада́вшими с тобо́ю му́ченики, вся́ правосла́вныя лю́ди сохраня́йте невреди́мы, непобеди́мии му́ченицы Христо́вы.

Сла́ва Отцу́ и Сы́ну и Свято́му Ду́ху:

Тро́ичен: Триипоста́сное Естество́ и Неразде́льную сла́ву, в Божестве́ Еди́нем пое́мую непреста́нно на небеси́ и на земли́, Тро́ицу Неразлу́чную просла́вим, с Сы́ном Отцу́ и Ду́ху покланя́ющеся благоче́стно, да изба́вимся муче́ния о́гненнаго предста́тельством страстоте́рпцев, пропове́давших Святу́ю Тро́ицу.

И ны́не и при́сно и во ве́ки веко́в. Ами́нь.

Богородичен: Благослове́нную Мари́ю, Госпожу́, и Бо́жию Ма́терь, и Де́ву, прииди́те, вси́ ве́рнии, любо́вию непреста́нно восхва́лим, Ея́же ра́ди обрето́хом ве́чное ра́дование.

Свети́лен.

Све́ту Невече́рнему — Христу́ — предстоя́ще с ли́ки му́ченическими, блаже́ннии страстоте́рпцы Госпо́дни, се́дмьдесят со треми́, воспева́ющих ва́с спаса́йте моли́твами свои́ми, святи́и.

Сла́ва, и ны́не, Богородичен:

Незаходи́маго Све́та носи́ла еси́, Присноде́во Ма́ти Мари́е, просвеща́ющаго седя́щих во тме́ неве́дения, Сы́на Твоего́ и Бо́га на́шего.

Стихи́ры святы́м, гла́с 4.

Многообра́зными преще́нии гне́вный мучи́тель угрожа́ше ка́знем злы́м преда́ти телеса́ ва́ша, богомы́сленнии му́ченицы, вы́ же не отверго́стеся Правосла́вныя Христо́вы ве́ры, но претерпе́ли есте́ темни́чная страда́ния и восприя́ли есте́ го́рькую сме́рть, ожида́юще бу́дущаго воздая́ния и безсме́ртныя сла́вы.

Сти́х: Воззва́ша пра́веднии, и Госпо́дь услы́ша и́х, [и от все́х скорбе́й и́х изба́ви и́х].

Чу́днии, боже́ственнии, прему́дрии страстоте́рпцы пе́сньми свяще́нными да почту́тся, Правосла́вие бо пред враги́ свяще́нно пропове́давше, нечести́вую угаси́ша ле́сть свои́ми страда́нии и сла́ву прия́ша неувяда́емую.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Мучи́теля беззако́нна, беззако́нно повелева́ющаго испове́дати непра́вую ве́ру, блаже́ннии му́дрии, посрами́сте, му́ченицы великоимени́тии, и, пострада́вше терпели́вно, венцы́ исплето́сте побе́дныя, о ми́ре моля́щеся.

Сла́ва, гла́с 4, самогла́сен:

Несы́тною ко Христу́ любо́вию ды́шуще, Правосла́вия не отверго́стеся, святи́и му́ченицы, се́дмьдесяте со двема́, и со учи́телем ва́шим, свяще́нным Иси́дором, и разли́чныя оби́ды и поноше́ния претерпе́сте, о Христе́ укрепля́еми, и мучи́телей де́рзость низложи́сте, святи́и, и, непрекло́нно ве́ру Христо́ву сохра́ньше, на небеса́ преста́вистеся ко все́х Творцу́, за Него́же и пострада́сте. Те́мже, дерзнове́ние иму́ще к Нему́, проси́те дарова́ти душа́м на́шим ми́р и ве́лию ми́лость.

И ны́не, гла́с 8.

Му́ченицы Христо́вы прехва́льнии, гони́телей стремле́ния и ну́ждную сме́рть ни во что́же вмени́сте, и, благоде́рзостно ополчи́вшеся, мужему́дренно к боре́нием победоно́сною сла́вою оде́ястеся, и причто́стеся все́м пра́ведным, с ни́миже ва́с, всегда́ хва́ляще, ублажа́ем.

Молитва

Святи́и му́ченицы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.