21 января.
Канон преподобному Григорию, чудотворцу Печерскому.
![Преподобному Григорию, чудотворцу Печерскому Преподобному Григорию, чудотворцу Печерскому](img_i/053.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 3:
Вели́ких дарова́ний прие́мниче и вели́ких чуде́с си́лою Бо́жиею твори́телю, пречу́дне о́тче Григо́рие, я́ко ве́лие дерзнове́ние име́я ко Христу́ Бо́гу, непреста́нно о на́с моли́ся Ему́, да грехо́в оставле́ние пода́ст душа́м на́шим.
Стихи́ра, гла́с 8:
Мона́хов мно́жества, святоле́пное твое́ житие́ чту́ще, удивля́емся и прославля́ем Просла́вльшаго тя́ Бо́га, я́ко дарова́ тебе́ мно́го чудотворе́ние, и́мже бе́сы от челове́к прогна́л еси́ и согреша́ющих во исправле́ние приводи́л еси́. Его́же и на́м, де́нь честна́го успе́ния твоего́ почита́ющим, умоли́ дарова́ти ми́лость в де́нь су́дный.
Кано́н преподо́бнаго, гла́с 2.
Пе́снь 1.
Ирмос: Глубины́ откры́л е́сть дно́ и су́шею Своя́ влече́т, в не́й покры́в проти́вныя, кре́пкий во бране́х Госпо́дь, я́ко просла́вися .
Припев: Преподобне отче Григорие, моли Бога о нас.
Све́том благода́ти Твоея́, Христе́, пра́ведники Своя́ просвети́вый и дея́ний и́х луча́ми ми́ра концы́ озари́вый, омраче́нный мо́й у́м неве́дением просвети́, да чи́сте в па́мяти уго́дника Твоего́ воспою́ Ти пе́снь: я́ко просла́вися.
Припев: Преподобне отче Григорие, моли Бога о нас.
Огне́м любве́ воспали́л еси́ преподо́бного Твоего́ се́рдце, е́же во сле́д Тебе́ тещи́, и, обре́т, Его́же жела́ше, ны́не ра́достно пое́т: я́ко просла́вися.
Припев: Преподобне отче Григорие, моли Бога о нас.
Вели́ких оте́ц житию́ подража́ти хотя́, прише́л еси́, Григо́рие, во оби́тель Бо́жия Ма́тере, иде́же Ангельский о́браз на ся́ восприе́мь, вообрази́л еси́ в себе́ доброде́тельныя ви́ды, и бы́сть твоя́ душа́ кра́сная неве́ста Безсме́ртному Жениху́, я́вльшемуся ны́не на Иорда́не.
Сла́ва Отцу́ и Сы́ну и Свято́му Ду́ху:
Мно́гих ра́ди по́двигов и трудо́в, тобо́ю сотворе́нных, а́ще не число́м вре́мени нечита́емых, прия́л еси́ вла́сть от Бо́га на бе́сы, преподо́бне, я́коже и вопия́ху: непристу́пен еси́ на́м, Григо́рие, огражде́н моли́твою и ору́жием кре́стным.
И ны́не и при́сно и во ве́ки веко́в. Ами́нь.
Богородичен: Моли́тв ра́ди уго́дника Твоего́, огради́ мя́ си́лою Твое́ю, Чи́стая Де́во, и непристу́пна враго́м покажи́, я́ко Непристу́пнаго Бо́га родила́ еси́, Иже во челове́честем естестве́ мене́ ра́ди ны́не на́г стои́т на Иорда́не.
Пе́снь 3.
Ирмос: Кре́пость дая́й царе́м на́шим Госпо́дь, и ро́г пома́занных Свои́х вознося́й, от Де́вы ражда́ется, гряде́т же ко Креще́нию. Тому́, ве́рнии, возопие́м: не́сть свя́т, я́ко Бо́г на́ш.
Припев: Преподобне отче Григорие, моли Бога о нас.
Кре́пость моли́твы твоея́ ви́дяще, ду́хове зло́бы поднебе́снии го́рце вопия́ху на тя́ и помышля́ху, ка́ко бы тебе́ па́кость сотвори́ти? Ты́ же, о́тче, стра́ха и́х не убоя́лся еси́, но ко Укрепля́ющему тя́ взыва́л еси́: кре́пость моя́ — Госпо́дь е́сть мне́ во спасе́ние.
Припев: Преподобне отче Григорие, моли Бога о нас.
Тмы́ нача́льницы и гее́нны сы́нове на тя́, све́том Боже́ственным озаря́емаго, зубы́ скрежета́ху и разли́чныя нога́м твои́м препина́ху се́ти, во е́же бы поне́ ма́ло оскорби́ти тя́, но не возмого́ша, непреста́нно бо взыва́л еси́: не́сть свя́т, я́коже Бо́г на́ш.
Припев: Преподобне отче Григорие, моли Бога о нас.
Та́тским о́бразом напа́дающии на рабы́ Бо́жия лю́тии бе́сове наусти́ша злы́я челове́ки, во е́же окра́сти тя́, блаже́нне, но что́ име́яху взя́ти в тебе́, ничто́же иму́ща, ра́зве кни́г, к похвале́нию Бо́жию храни́мых.
Сла́ва Отцу́ и Сы́ну и Свято́му Ду́ху:
Тмо́ю злодея́ния омраче́ннии та́тие, в нощи́ прише́дше к ке́ллии твое́й, свя́те, жда́ху, до́ндеже изы́деши ты́ на у́треннее пе́ние в це́рковь, да тогда́ твоя́ во́зьмут; и́хже ты́ прихо́д ощути́в, помоли́лся еси́, и бы́ша сно́м отягоще́нни пя́ть дне́й и пя́ть ноще́й.
И ны́не и при́сно и во ве́ки веко́в. Ами́нь.
Богородичен: Мра́к души́ моея́, и́мже мя́ бе́сове омрача́ют, отжени́, Богоро́дице: родила́ бо еси́ Светода́вца, Иже вся́каго челове́ка, гряду́ща в ми́р, све́тлостию лица́ Своего́ просвеща́ет.
Та́же, седа́лен преподо́бному, гла́с 1:
Све́т Боже́ственный, вы́ну тебе́ облиста́ющ, простира́ше лучи́ своя́ и прогоня́ше во мра́це ходя́щих, не даю́щи к тебе́ приступи́ти: вся́к бо иму́щий дела́ зла́я, не приступа́ет к све́ту, да не обличе́н бу́дет. Но, бега́я сего́, вра́г паде́ся и бы́сть в попра́ние вы́ну, от него́же на́м сохрани́тися, Христа́ Бо́га моли́, о́тче преподо́бне.
Пе́снь 4.
Ирмос: Услы́шах, Го́споди, гла́с Тво́й, его́же ре́кл еси́, гла́с вопию́щаго в пусты́ни, я́ко возгреме́л еси́ над вода́ми мно́гими, Твоему́ свиде́тельствуяй Сы́ну, ве́сь бы́в соше́дшаго Ду́ха, возопи́: Ты́ еси́ Христо́с, Бо́жия му́дрость и си́ла.
Припев: Преподобне отче Григорие, моли Бога о нас.
Услы́шан бы́л еси́, о́тче, от Бо́га, я́ко моли́тва твоего́ смире́ния о́блаки про́йде. Те́мже моли́твы твоя́ Вы́шний прие́мля, сохрани́л тебе́ от вся́каго зла́: испове́дал бо еси́ еди́ну бы́ти Бо́жию си́лу и му́дрость.
Припев: Преподобне отче Григорие, моли Бога о нас.
Усну́ша сно́м свои́м и не возмого́ша ничто́же пе́рвии та́тие восхи́тити от запреще́ния твоего́, блаже́нне, и́хже ты́ по пяти́ дне́х и пяти́ но́щех возбуди́л еси́, глаго́ля: доко́ле стра́ждете, отыди́те, но не возмого́ша, держи́ми Бо́жиею си́лою неви́димою.
Припев: Преподобне отче Григорие, моли Бога о нас.
Та́тей, гла́дом погиба́ющих душе́вным и теле́сным, ви́дев, свя́те, не возда́л еси́ зла́ за зло́, но, пи́санное исполня́я, ухлеби́л еси́ враги́ а́лчущия и отпусти́л я́ в до́мы своя́, да поне́ та́ко уцелому́дрятся и испове́дят я́сно, я́ко вои́стинну в тебе́ де́йствует Бо́жия му́дрость и си́ла.
Сла́ва Отцу́ и Сы́ну и Свято́му Ду́ху:
На Бо́га положи́л еси́ су́д оскорби́вших тя́, Его́же отмще́ние не прости́ тате́й, но подаде́ властели́ну в слу́х, и́же е́мь и́х, му́кам преда́ти име́яше, ты́ же, немощно́е челове́ческое разсужда́я, кни́ги твоя́ во искупле́ние да́л еси́ судии́ и свободи́л я от му́к го́рьких.
И ны́не и при́сно и во ве́ки веко́в. Ами́нь.
Богородичен: Лю́т сопе́рник — тя́жущаяся со мно́ю о гресе́х со́весть, с не́юже не увеща́хся исправле́нием, егда́ бе́х на пути́ жития́, ны́не привлече́ мя́ к Судии́, да прииму́ су́д по дело́м и да не изы́ду от у́з, до́ндеже с после́дним разочту́ся. Увы́ мне́, кто́ мя́ от сего́ зла́ изба́вит! а́ще не Ты́, Чи́стая, пода́си ми по́мощь.
Пе́снь 5
Ирмос: Иису́с, живота́ Нача́льник, разреши́ти осужде́ние гряде́т Ада́ма первозда́ннаго, очище́ний же я́ко Бо́г не тре́буя, па́дшаго очища́ет во Иорда́не, в не́мже вражду́ уби́в, преиму́щ вся́к у́м ми́р да́рует.
Припев: Преподобне отче Григорие, моли Бога о нас.
Иису́с, живота́ Нача́льник, наставля́я гре́шныя на пу́ть пра́вый, даде́ тате́м ду́х пра́в, и́мже умили́вшеся, в покая́ние приидо́ша, и вда́вшеся на рабо́ту оби́тели Бо́жия Ма́тере, примири́шася Бо́гу, Иже лю́бящим Его́ зако́н, ми́р да́рует.
Припев: Преподобне отче Григорие, моли Бога о нас.
Иису́са еди́наго, живота́ Нача́льника, возлюби́в, сло́во Его́ де́лом испо́лнил еси́, о́тче, и́бо вся́, я́же име́л, прода́л еси́, да не па́ки си́х ра́ди, кто́ в беду́ впаде́т, це́ну же ту́ разда́л еси́ ни́щим и те́х рука́ми вне́сл еси́ в сокро́вище, иде́же та́ть не приближа́ется, но це́ло пребыва́ет.
Припев: Преподобне отче Григорие, моли Бога о нас.
Па́ки вра́г па́коствует тебе́, преподо́бне, татьми́ други́ми, и́же, вше́дше в вертогра́д тво́й, ово́щием влага́лища напо́лниша, но хотя́ху ити́ и не возмого́ша, неви́димою держи́ми ве́рвию, бре́мены же угнета́еми, пребы́ша, стоя́ще два́ дни́ и две́ но́щи.
Сла́ва Отцу́ и Сы́ну и Свято́му Ду́ху:
Иже ча́яху злодея́ние свое́ утаи́ти, се́ си́и, иму́ще коры́сть непра́вды во обличе́ние на плеща́х свои́х, возопи́ша, проще́ния прося́ще у тебе́, о́тче, обеща́ющеся про́чая ле́та в покая́нии провожда́ти.
И ны́не и при́сно и во ве́ки веко́в. Ами́нь.
Богородичен: Хоте́х утаи́тися Всеви́дца Бо́га злы́ми дея́нии мои́ми, но су́щее обличе́ние во вну́тренних, а́ки ве́лие бре́мя, сту́д мо́й открыва́ет. Неве́дый у́бо, что́ про́чее сотвори́ти, к Тебе́ вопию́: поми́луй мя́, Благоутро́бная Ма́ти, а́ще и покры́ срамота́ лице́ мое́.
Пе́снь 6.
Ирмос: Гла́с Словесе́, свети́льник Све́та, денни́ца Со́лнца, Предте́ча в пусты́ни, — пока́йтеся, — все́м вопие́т лю́дем, — и предочи́ститеся: се́ бо предстои́т Христо́с, от тли́ ми́р избавля́яй.
Припев: Преподобне отче Григорие, моли Бога о нас.
Гла́с слове́с твои́х, о́тче, смяте́ ко́сти кра́дущих, и исчеза́ше душа́ их от стра́ха: зане́ бы́ти и́м, а́ки ме́ху на сла́не, неподви́жимым на еди́ном ме́сте, и не бе́, кто́ от толи́каго зла́ их избавля́яй.
Припев: Преподобне отче Григорие, моли Бога о нас.
Гла́с пропове́давша, к покая́нию призыва́ющ, та́тие я́ко услы́шаша, припа́даху к тебе́, блаже́нне, со слеза́ми отпуще́ния прося́ще, ты́ же, свя́те, умили́вся, кро́тким гла́сом ре́кл еси́: благослове́н Бо́г, укрепля́яяй ва́с на де́ло бла́го, и То́й да свободи́т ва́с, от тли́ все́х избавля́яй.
Припев: Преподобне отче Григорие, моли Бога о нас.
Христу́ я́вльшуся на Иорда́ни, мытари́ и вси́ гре́шницы гряду́т к Нему́ и прие́млют живота́ своего́ обновле́ние; и́мже и та́тие, твои́м, о́тче, наказа́нием поревнова́вше, в но́вости жи́зни покая́ние нача́ша и рабо́тою наверши́ша.
Сла́ва Отцу́ и Сы́ну и Свято́му Ду́ху:
Образ да́л еси́ Собо́ю, Христе́, рабо́м Твои́м, е́же не искуси́тися сатано́ю: те́мже уго́дник Тво́й, трети́цею искуша́емь злы́ми челове́ки, не искуси́ся, но, незло́бив сы́й, даде́, его́же тре́боваху, предви́дя па́губу еди́наго, от нея́же не бе́ избавля́ющаго.
И ны́не и при́сно и во ве́ки веко́в. Ами́нь.
Богородичен: Во́лею свое́ю привлече́н, падох́ся в ро́в поги́бели, и не́сть мне́ возведе́ния наде́жды. К Тебе́ простира́ю гла́с мо́й, Госпоже́, моли́ за мя́ Сы́на Твоего́, Иже дне́сь яви́ся на Иорда́не, не то́кмо мене́, но и ве́сь ми́р от тли́ избавля́я.
Конда́к, гла́с 7:
Запреща́я беззако́ннующим беззако́нновати, вве́ржен бы́л еси́ те́ми в струи́ ре́чныя, досточу́дне Григо́рие, иде́же блаже́нную восприе́мь кончи́ну, ны́не со Ангелы предстоя́ престо́лу Влады́чню, моли́ся о душа́х на́ших.
Пе́снь 7.
Ирмос: Юноши благочести́выя, пе́щи о́гненней приобщи́вшияся, шумя́щ ду́х ро́сный невреди́мы сохрани́ и Бо́жия Ангела снизхожде́ние. Те́мже, в пла́мени ороша́еми, благода́рственно воспева́ху: препе́тый оте́ц Го́споди и Бо́же, благослове́н еси́.
Припев: Преподобне отче Григорие, моли Бога о нас.
Юношам, иногда́ су́щим в пещи́, не поревнова́вше окая́ннии, и́же пла́мень му́жественно попра́ша и мучи́телю сопроти́вишася кре́пко, но врагу́ сове́тующу, пла́мени стра́стному себе́ вда́вше, мня́ху пред тобо́ю, о́тче, лжу́ свою́ утаи́ти, ему́же откры́л е́сть Бо́г Благослове́нный.
Припев: Преподобне отче Григорие, моли Бога о нас.
Ду́хом зря́ проро́чески вну́трь, су́щее в сердца́х тате́й, я́ко и́мать сбы́тися в пра́вду, прослези́лся еси́, блаже́нне, прови́дя окая́нство того́, его́же приспе́ де́нь поги́бели, и лжу́щему всу́е не даде́ ми́лости Бо́г Благослове́нный.
Припев: Преподобне отче Григорие, моли Бога о нас.
Ве́сть Ду́х Святы́й отве́рзти и нечи́стая уста́, да глаго́лют пра́вду на исправле́ние и́нем. Те́мже тебе́ вопроси́вшу, преподо́бне, ко́ею сме́ртию у́мрет сы́н поги́бельный, и неве́дуще та́тие прореко́ша, я́ко на дре́ве обве́шен и́мать бы́ти, е́же и сбы́стся во вре́мя свое́.
Сла́ва Отцу́ и Сы́ну и Свято́му Ду́ху:
Сме́рти жа́ло — гре́х, и́же убива́ет челове́ка, и не́сть сему́ искупле́ния, до́ндеже покая́нием живо́т снабди́тся: а́ще бо и да́л еси́, о́тче, во иску́п тате́м кни́ги своя́, но не искупи́ся поги́бели пови́нный, па́че же потреби́ся па́мять его́ от кни́г живо́тных.
И ны́не и при́сно и во ве́ки веко́в. Ами́нь.
Богородичен: Разу́мная су́щи кни́га, Мари́е Богоневе́сто, в не́йже пе́рстом Ду́ха Всесвята́го написа́ся Сло́во Отчее, в кни́ги живо́тныя написа́тися, о Благослове́нная, все́х на́с сподо́би.
Пе́снь 8.
Ирмос: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь восприя́ти Иорда́н и объя́ти пло́тию креща́ема Зижди́теля, Его́же благословя́т лю́дие и превозно́сят во вся́ ве́ки.
Припев: Преподобне отче Григорие, моли Бога о нас.
Та́йну се́рдца лука́ва прови́дяща тя́, о́тче, загради́ша та́тие в пеще́ре и отверзо́ша к злодея́нию мы́сль свою́, наче́ншим же и́м собира́ти чужды́х трудо́в плоды́, пости́же о́наго, о не́мже проре́кл еси́, су́д Бо́жий: да не бу́дет благослови́ти с живы́ми Го́спода во ве́ки.
Припев: Преподобне отче Григорие, моли Бога о нас.
Хотя́ твоя́, о́тче, труды́, а́ки ве́прь ди́вий, та́ть озоба́ти, простре́ ру́ку, вступи́в на дре́во, но не удержа́ся: ве́твь бо отломи́ся, и а́бие обве́шением изсуши́ живота́ своего́ дре́во, я́ко не ктому́ да́ти ему́ пло́д покая́ния во ве́ки.
Припев: Преподобне отче Григорие, моли Бога о нас.
Да не су́дит никто́же су́д непра́веден, ни да глаго́лет лжу́: Бо́г бо поруга́емь не быва́ет. Руга́ющеся, та́тие еди́наго, досто́йна пове́шения на дре́ве, осуди́ша, и рече́нное сбы́стся, ты́ же, преблаже́нне, превозно́сиши Го́спода во ве́ки.
Сла́ва Отцу́ и Сы́ну и Свято́му Ду́ху:
Ничто́же сокрове́нное от тебе́, о́тче, ви́девше, припа́дающе, проще́ния прося́ху, я́ко да не на́йдет и на и́х подо́бна поги́бель, ты́ же, свя́те, кра́дущих наказа́л еси́ не ктому́, кра́сти, но па́че рабо́тати на бра́тию и благослове́нный пло́д снеда́ти, а́ще хо́щут превозноси́ти Го́спода во ве́ки.
И ны́не и при́сно и во ве́ки веко́в. Ами́нь.
Богородичен: Косну́хся не благослове́ннаго ми́ плода́ и се́ умира́ю сме́ртию душе́вною. Ви́дя у́бо Тя́, Ма́терь Живота́, простира́ю гла́с мо́й: приложи́ мне́ пла́стырь живо́тный покая́ния, да, поне́ ма́ло прише́д в себе́, обря́щу живо́т и превозношу́ Тя́, Богоро́дице, во ве́ки.
Песнь 9
Ирмос: Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице: оба́че Блага́я су́щи, ве́ру приими́, и́бо любо́вь ве́си Боже́ственную на́шу, Ты́ бо христиа́н еси́ Предста́тельница, Тя́ велича́ем.
Припев: Преподобне отче Григорие, моли Бога о нас.
Недоумева́яся вра́г, ка́ко, о́тче, тя́ озло́бити, наведе́ безу́мныя рабы́ кня́зя, и́же тебе́, в реце́ во́ду че́рплющу, поруга́хуся, сра́мная глаго́лющи, но ты́, преподо́бне, ду́хом предзря́ си́х поги́бель, нака́зовал еси́, да не глаго́лют скве́рная, па́че же язы́ком Бо́га да велича́ют.
Припев: Преподобне отче Григорие, моли Бога о нас.
Му́жие велере́чивии не испра́вишася твои́м наказа́нием, свя́те, но па́че тебе́ руга́хуся, досажда́юще, те́мже па́ки благоутро́бне нака́зовал еси́ и́х, да па́че моли́твы тре́буют, я́ко ско́ро потопле́ни бу́дут с кня́зем свои́м Ростисла́вом.
Припев: Преподобне отче Григорие, моли Бога о нас.
Не облича́й безу́мна, да не возненави́дит тебе́, — глаго́лет Писа́ние, е́же и сбы́стся на тебе́, преблаже́нне, и́бо кня́зь, от тебе́ прорече́нную себе́ сме́рть слы́шав, во укори́зну вменя́я, разгне́вася на тя́, и безстра́шием одержи́мь, повеле́ тя́ в воде́ утопи́ти.
Сла́ва Отцу́ и Сы́ну и Свято́му Ду́ху:
Ко Христу́, вода́ми ны́не облага́ющемуся, водо́ю преше́л еси́, о́тче, и посече́ сме́рть вре́менныя твоея́ жи́зни дре́во, е́же ны́не доброзра́чнее при исхо́дящих во́д живо́тных процвета́ет, и ли́ствие моли́тв твои́х Це́рковь увеселя́ет, те́м тя́, свя́те, велича́ем.
И ны́не и при́сно и во ве́ки веко́в. Ами́нь.
Богородичен: В хра́ме сла́вы Твоея́, гла́с Гаврии́лов Тебе́ принося́щих, Чи́стая Де́во, в ми́ре соблюди́ и ски́птры ца́рствия утверди́, подая́ те́м си́лу благода́ти Твоея́ во отгна́ние вся́ких тлетво́рных страсте́й, да Тя́ вси́ велича́ем.
Свети́лен:
Иже Ангелом в жи́зни се́й житие́м непоро́чным уподо́бивыйся, блаже́нне, те́х и по кончи́не не отлучи́лся еси́: повеле́ бо Вы́шний Ца́рь Ангелом Свои́м многострада́льное твое́ те́ло по трие́х дне́х из воды́ в ке́ллию принести́, ду́шу же твою́ святу́ю в ски́ниях святы́х всели́ти, иде́же ны́не живы́й, помяни́ на́с, чту́щих твою́ па́мять, о́тче свяще́ннейший.
Стихи́ры, гла́с 1.
Водо́ю и ка́менем, / к вы́и привя́занным, / сконча́в жи́знь свою́, блаже́нне, / отше́л еси́ к стоя́щему на вода́х Христу́, / су́щу Тому́ ка́мени краеуго́льну, / на не́мже основа́н Вы́шний Иерусали́м, / та́мо ны́не селе́ние твое́ со Ангелы име́я, / помина́й любо́вию почита́ющих / всечестну́ю па́мять твою́.
Зако́ну Бо́жию / в жи́зни се́й поучи́вся, преподо́бне, / зако́нно, я́коже бе́ досто́йно, пожи́л еси́, / и жи́знь настоя́щаго ве́ка му́ченически сконча́в, / преше́л еси́ к Законополо́жнику Христу́ и Венцеда́вцу, / от Него́же вене́ц нетле́нный прие́мь, / ра́дуешися ны́не со Ангельскими ли́ки, / вселе́ния у́бо с ни́ми / и весе́лия прича́стники и на́с бы́ти / сподо́би моли́твами твои́ми.
Свя́зан сы́й по руку́ и но́гу, / и в во́дныя струи́ вве́ржен, / разреши́лся еси́ от у́з плотски́х, / Госпо́дь у́бо, из темни́цы сея́ ду́шу твою́ изве́д, / в неизрече́нном све́те, / иде́же пра́ведных ду́си зре́ния Бо́жия наслажда́ются, / ны́не упокоя́ет, / е́же и мы́ улучи́ти мо́лимся / твои́м хода́тайством, / о́тче блаже́ннейший.
Сла́ва И ны́не, гла́с 8:
Да́р нело́жный проро́чествия име́я, преподо́бне, прови́дел еси́ па́губу твоего́ уби́йцы, и́же твои́ми словесы́ наказу́емь не испра́вися, ни восхоте́ благослове́ния твоего́ и моли́твы, во бра́нех посо́бствующия. Те́мже, я́ко фарао́н, погрязе́ в воде́ с во́и и обоего́ живота́ лиши́ся, прие́мь поноше́ние седмери́цею в не́дра своя́, и па́мять его́ поги́бе. Но ты́, о́тче, предстоя́ Бо́жию престо́лу, пода́ждь благослове́ние рабо́м твои́м и моли́тву, покланя́ющимся чудотво́рным моще́м твои́м и па́мять твою́ хвала́ми почита́ющим.
Молитва
О свяще́нная главо́, преподо́бне о́тче, преблаже́нне а́вво Григорие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному Григорию, чудотворцу Печерскому Преподобному Григорию, чудотворцу Печерскому](img_b/053.jpg)