1 января.

Канон святому мученику Вонифатию

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь мученику Вонифатию Тарсийскому, глас 4

К сосло́вию по́слан му́чеников,/ му́ченик был еси́ и́стинен,/ пострада́в за Христа́ крепча́йше, всехва́льне,/ мощми́ же возврати́лся еси́ ве́рою посла́вшей тя, Вонифа́тие блаже́нне,// моли́ Христа́ Бо́га прия́ти нам грехо́в проще́ние.

Канон свята́го. Гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святый мучениче Вонифатие, моли Бога о нас.

Усе́рдным по́мыслом подвиго́м ревнова́в до́блих страда́льцев, пострада́л еси́ кре́пко и зми́я умертви́л еси́ страда́нии твои́ми живоно́сными, страда́льче Вонифа́тие, святы́х Ангелов собесе́дниче.

Припев: Святый мучениче Вонифатие, моли Бога о нас.

Ви́дев на земли́ вра́жию ле́сть, излия́нну лю́те, до́блий страда́льче, ду́шу распали́в жела́нием боже́ственнейшим, вше́л еси́ в три́знище небоя́зненным, треблаже́нне, мудрова́нием.

Сла́ва Отцу́ и Сы́ну и Свято́му Ду́ху:

Му́дростию Боже́ственною просвеща́емый, блаже́нне, нему́дрыя враги́ объюро́дил еси́, Христа́ возвеща́я, дебельство́м пло́ти уподо́бльшася, и́мже яви́тися восхоте́, Вонифа́тие, му́чениче многострада́льне.

И ны́не и при́сно и во ве́ки веко́в. Ами́нь.

Богородичен: Го́ру Бо́жию, ю́же прови́де Дании́л, ски́нию мы́сленную, Мари́ю Чи́стую, сла́вы свяще́ние, трапе́зу, Боже́ственный хле́б вме́щшую, вси́ ве́рнии, единому́дренно воспои́м.

Пе́снь 3.

Ирмос: Яко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди.

Припев: Святый мучениче Вонифатие, моли Бога о нас.

Якоже возжеле́л еси́, сла́вне, свобо́ду вы́шнюю, от и́га рабо́ты избавля́ешися, страсте́м честны́м поревнова́в, сла́вне, Иже за милосе́рдие раба́ Бы́вшаго.

Припев: Святый мучениче Вонифатие, моли Бога о нас.

Плотски́х вы́шший я́влься мудрова́ний измене́нием боже́ственным, внеза́пу вся́к прило́г лю́тых претерпе́л еси́, ра́дуяся, му́чениче Вонифа́тие.

Сла́ва Отцу́ и Сы́ну и Свято́му Ду́ху:

Тебе́ сама́го отве́рглся еси́, и к подвиго́м и боре́нием врага́ изше́л еси́, Креста́ ору́жием укрепи́вся, и, победи́тель бы́в, просла́вился еси́, му́чениче Вонифа́тие.

И ны́не и при́сно и во ве́ки веко́в. Ами́нь.

Богородичен: Себе́ Сама́го истощи́, Оте́ческих не истощи́в во чре́ве Твое́м не́др, пресу́щный Бо́г и Тво́й Сы́н бы́сть, Всенепоро́чная, спаса́я челове́чество.

Седа́лен, гла́с 4.

К сосло́вию по́слан му́чеников, му́ченик бы́л еси́ и́стинен, пострада́в за Христа́ крепча́йше, всехва́льне, бре́мя же, блаже́нне, отда́лся еси́ ве́рою посла́вшей тя́, Вонифа́тие блаже́нне. Но приле́жно моли́ прия́ти все́м согреше́ний соверше́нное проще́ние.

Сла́ва, и ны́не, Богородичен:

Грехолюби́в сы́й, молю́ Тя, безгре́шнаго Бо́га ро́ждшую, взе́млющаго грехи́ ми́ра, Пречи́стая, многогре́шную ду́шу мою́ уще́дрити и грехи́ моя́ мно́гия очи́стити: гре́шным бо Ты́ еси́ очище́ние, и спасе́ние ве́рным, и заступле́ние.

Пе́снь 4.

Ирмос: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Святый мучениче Вонифатие, моли Бога о нас.

Ублажа́я стра́ждущих терпе́ние, подо́бием, му́чениче, честны́х страда́ний си́м уподо́бился еси́, богому́дре пребога́те.

Припев: Святый мучениче Вонифатие, моли Бога о нас.

Иды́й ве́рою к му́чеников боже́ственному сосло́вию, блаже́нне, тебе́ сама́го жела́ющи бре́мя досточу́дное, богому́дре, отда́л еси́.

Сла́ва Отцу́ и Сы́ну и Свято́му Ду́ху:

Очище́н, я́коже зла́то, му́чениче, я́зв горни́лом, чисте́йший яви́лся еси́, нося́ Зижди́теля страсте́й изображе́ние.

И ны́не и при́сно и во ве́ки веко́в. Ами́нь.

Богородичен: Де́вство по Рождестве́ запеча́тано познава́ющи, Отрокови́це, несказа́нно рожде́ннаго Сло́ва из боку́ Твое́ю ве́рно велича́ла еси́.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Припев: Святый мучениче Вонифатие, моли Бога о нас.

Яко светоза́рная возше́л еси́ звезда́ от за́пад, и заше́л еси́, му́чениче, страда́ньми терпели́вно, а́бие к за́падом возсия́л еси́, озаря́я концы́.

Припев: Святый мучениче Вонифатие, моли Бога о нас.

Му́ченически подвиза́лся еси́, ногте́й терза́ния, о́стрыми, му́чениче, тростьми́ сбода́емь, и лука́ваго жа́ла ве́рно притупля́я благода́тию.

Сла́ва Отцу́ и Сы́ну и Свято́му Ду́ху:

Вра́жия изнемого́ша, богому́дре, на тя́ кова́рствия, и́бо к Бо́гу воззре́нием неукло́нным плотски́я ра́ны, я́коже безпло́тен, терпе́л еси́.

И ны́не и при́сно и во ве́ки веко́в. Ами́нь.

Богородичен: Скве́рны вся́кия омы́й, Де́во, ду́шу мою́, вопию́ Ти, и спаси́ мя, Чи́стая, Яже и́стиннаго Бо́га Спа́са на земли́ вопло́щшая.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святый мучениче Вонифатие, моли Бога о нас.

Бие́мый, ра́нами плотски́ми уязви́л еси́ безбо́жныя, неисце́льно неду́гующия неве́дением, и боля́щим яви́лся еси́ вра́чь, страда́льче Вонифа́тие.

Припев: Святый мучениче Вонифатие, моли Бога о нас.

Возвыша́емь к Бо́гу, блаже́нне, прило́гом подвиго́в, враги́ неви́димыя разрази́л еси́ и низринове́нным помо́щник, страстоте́рпче, бы́л еси́.

Сла́ва Отцу́ и Сы́ну и Свято́му Ду́ху:

Влачи́мь по земли́, я́коже ка́мень многоце́нен, страда́льче, пре́лести низложи́л еси́ утвержде́ние, ве́рных же сердца́ наипа́че ве́рою утверди́л еси́.

И ны́не и при́сно и во ве́ки веко́в. Ами́нь.

Богородичен: Купина́ Тя́ прообража́ше, Всенепоро́чная, пе́рвее, горя́щи и ника́коже опаля́ема, Пречи́стая, и́бо, я́коже она́, не опали́лася еси́, Бо́га вопло́щши.

Конда́к, гла́с 4.

Свяще́ние непоро́чное самово́льне Тебе́ приве́л еси́, Иже от Де́вы тебе́ ра́ди роди́тися хотя́щему, свя́те венчено́сче, прему́дре Вонифа́тие.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Святый мучениче Вонифатие, моли Бога о нас.

Коле́н не преклони́в истука́нным, во искуше́ние ве́рглся еси́ велича́йшее, и́стинно, му́чениче, в пе́щь, в не́йже ороша́емый, благода́рствовал еси́ Христу́ во ве́ки.

Припев: Святый мучениче Вонифатие, моли Бога о нас.

Разори́ти кре́пость твоего́ испове́дания тща́ся, льстивому́дренный во вну́тренняя твоя́ клоко́чущее о́лово неми́лостивно влива́ет, но я́ве посрами́ся.

Сла́ва Отцу́ и Сы́ну и Свято́му Ду́ху:

Посе́чен бы́в усе́рдно в честну́ю твою́ главу́, врага́ льсти́ваго многоко́зненную главу́ отсе́кл еси́ твоего́ му́жества мече́м, му́чениче Христо́в богому́дре.

И ны́не и при́сно и во ве́ки веко́в. Ами́нь.

Богородичен: Да гла́сы подоба́ющими песносло́влю Тя́, Отрокови́це, страсте́й мя́ изба́ви моли́твами Твои́ми, бе́д же и скорбе́й и лука́вых челове́к, озло́бити мя́ и́щущих.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Святый мучениче Вонифатие, моли Бога о нас.

Поле́зно твое́ де́лая спасе́ние Христо́с, Вонифа́тие, взыска́юща моще́й добропобе́дных му́чеников, тя́ укрепля́ет, е́же ве́рно взыска́л еси́ са́м бы́ти.

Припев: Святый мучениче Вонифатие, моли Бога о нас.

Блаже́нней госпожи́ блаже́нно сокро́вище пода́лся еси́, блаже́нне, и́мже обогати́вшися, поя́ше весе́лым се́рдцем: вся́ дела́, благослови́те, по́йте Го́спода.

Припев: Святый мучениче Вонифатие, моли Бога о нас.

Со тща́нием сла́вная жена́, воздви́гши хра́м свяще́ннейший, тя́ в не́м положи́, су́щий Боже́ственныя Тро́ицы хра́м, страстоте́рпче Христо́в Вонифа́тие.

Сла́ва Отцу́ и Сы́ну и Свято́му Ду́ху:

Умертви́вся за любо́вь Зижди́теля, умерщвля́ющаго стра́сти тлетво́рныя, животворя́й моли́твою твое́ю я́сно вопию́щия: вся́ дела́, благослови́те, по́йте Го́спода.

И ны́не и при́сно и во ве́ки веко́в. Ами́нь.

Богородичен: На Тя́, Чи́стую, Пребоже́ственный, низше́д, я́коже ве́сть, воплоти́ся и челове́ки обожи́, песнопою́щия, Де́во: вся́ дела́, благослови́те, по́йте Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святый мучениче Вонифатие, моли Бога о нас.

Ви́девши тя́, бре́мя свяще́нное, ра́довашеся, вопию́щи, приснопо́мнимая: раба́ посла́х тя́, блаже́нне, господи́на и́стинна прие́млю, рабо́ты мя́ зо́л избавля́юща твои́ми благоприя́тными мольба́ми.

Припев: Святый мучениче Вонифатие, моли Бога о нас.

Яко кри́н, во удо́лиих мы́сленных процве́л еси́ му́чеников, Вонифа́тие, я́коже фи́никс, возвы́сился еси́, я́ко ке́др, позна́лся еси́ миродыха́нен, яви́лся еси́ избра́нный, я́ко кипари́с, благово́нствуя ду́ши на́ша.

Припев: Святый мучениче Вонифатие, моли Бога о нас.

Дне́сь па́мять твоя́ на́м возсия́, страстоте́рпче, я́коже со́лнце, сия́нием Боже́ственных дарова́ний, просвеща́ющи ду́ши пою́щих тя́, страсте́й же мглу́ отгоня́ющи, му́чениче богому́дре всеблаже́нне.

Сла́ва Отцу́ и Сы́ну и Свято́му Ду́ху:

Яко со́лнце от за́пад, возсия́л еси́ и восто́чнаго гра́да дости́гл еси́, иде́же пострада́в и сме́ртию заше́д, к жи́зни восте́кл еси́ и Ри́м све́тлый дости́гл еси́, сего́ огражда́я мольба́ми твои́ми.

И ны́не и при́сно и во ве́ки веко́в. Ами́нь.

Богородичен: Све́том мя́ озари́ Твои́м, Всенепоро́чная, во тме́ содержи́маго грехо́вней, Богоро́дице, и пода́ждь во дне́ ходи́ти Боже́ственных повеле́ний, Богоневе́сто, я́ко да пою́ Тя, Всепе́тую.

Молитва святому мученику Вонифатию Тарсийскому

О, многострада́льный и всехва́льный му́чениче Вонифа́тие! Ко твоему́ заступле́нию ны́не прибега́ем, моле́ний нас, пою́щих тебе́, не отве́ржи, но ми́лостиво услы́ши нас. Виждь бра́тию и се́стры на́ша, тя́жким неду́гом пиа́нства одержи́мыя, виждь того́ ра́ди от ма́тере своея́, Це́ркве Христо́вой и ве́чнаго спасе́ния отпа́дающия. О, святы́й му́чениче Вонифа́тие, косни́ся се́рдцу их да́нной ти от Бо́га благода́тию, ско́ро возста́ви от паде́ний грехо́вных и ко спаси́тельному воздержа́нию приведи́ их. Умоли́ Го́спода Бо́га, Его́ же ра́ди страда́л еси́, да прости́в нам согреше́ния на́ша, не отврати́т ми́лости Своея́ от сыно́в Свои́х, но да укрепи́т в нас трезве́ние и целому́дрие, да помо́жет Свое́ю десни́цею трезвя́щимся спаси́тельный обе́т свой до конца́ сохрани́ти во дни и нощи́, о нем бо́дрствующе и о нем до́брый отве́т на Стра́шнем Суди́лище да́ти. Приими́, уго́дниче Бо́жий, моли́твы матере́й, о ча́дех свои́х сле́зы пролива́ющих; жен честны́х, о муже́х свои́х рыда́ющих, чад си́рых и убо́гих, от пиа́ниц оста́вленных, всех нас, ико́не твое́й припа́дающих, и да прии́дет сей вопль наш моли́твами твои́ми ко престо́лу Всевы́шняго дарова́ти всем по моли́твам их здра́вие и спасе́ние душ и теле́с, наипа́че же Ца́рство Небе́сное. Покры́й и соблюди́ нас от лука́ваго ловле́ния и всех ко́зней вра́жиих, в стра́шный час исхо́да на́шего помози́ прейти́ непреткнове́нно возду́шные мыта́рства и моли́твами твои́ми изба́ви ве́чнаго осужде́ния. Умоли́ же Го́спода дарова́ти нам к Оте́честву на́шему любо́вь нелицеме́рную и непоколеби́мую, пред врага́ми Це́ркве святы́я ви́димыми и неви́димыми си́лу непобеди́мую, да покры́ет нас ми́лость Бо́жия в несконча́емыя во ве́ки веко́в. Ами́нь.

Молитва вторая святому мученику Вонифатию Тарсийскому

О, святы́й страстоте́рпче Христо́в, во́ине Царя́ Небе́снаго, земна́я сладостра́стия презре́вый и к го́рнему Иерусали́му страда́нием возше́дый, му́чениче Вонифа́тие! Услы́ши мя гре́шнаго, принося́щаго от се́рдца моле́бная пе́ния, и умоли́ Го́спода на́шего Иису́са Христа́ прости́ти вся моя́ согреше́ния, в ве́дении и в неве́дении мно́ю соде́янная. Ей, му́чениче Христо́в, о́браз покая́ния собо́ю показа́вый гре́шным! Бу́ди ми на зла́го сопроти́вника диа́вола твои́ми моли́твами к Бо́гу помо́щник и засту́пник; мно́го бо порыва́хся избе́гнути сете́й его́ лука́вых, но у́дицею грехо́вною уловле́н и кре́пко влачи́м от него́, не мог изба́витися, а́ще не ты предста́неши ми, во обстоя́ниих го́рькая терпя́щему, и коли́ко покуша́хся пока́ятися, но ложь пред Бо́гом бых. Сего́ ра́ди к тебе́ прибега́ю и молю́ся: спаси́ мя, свя́тче Бо́жий, от всех зол твои́м предста́тельством, благода́тию же Всеси́льнаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.