18 января.

Канон предпразднству Богоявления на 18 января.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Возвраща́шеся иногда́ Иорда́н река́ ми́лотию Елиссе́евою,/ возне́сшуся Илии́,/ и разделя́хуся во́ды сю́ду и сю́ду/ и бысть ему́ сух путь, и́же мо́крый,/ во о́браз вои́стинну Креще́ния,/ и́мже мы теку́щее жития́ прехо́дим ше́ствие:/ Христо́с яви́ся во Иорда́не освяти́ти во́ды.

Кано́н. Гла́с 6.

Пе́снь 1.

Ирмос: Го́рькия рабо́ты избавлься, Изра́иль/ непроходи́мое про́йде, я́ко су́шу,/ врага́ зря потопля́ема,/ песнь я́ко Благоде́телю пое́т Бо́гу,/ чудоде́ющему мы́шцею высо́кою,/ я́ко прославися.

Припев: Слава Тебе, Боже наш, слава Тебе.

Христо́с гряде́т ко Креще́нию,/ Христо́с ко Иорда́ну прихо́дит,/ Христо́с на́ши в воде́ погреба́ет ны́не грехи́, я́ко Благ,/ с весе́лием воспои́м Ему́, я́ко просла́вися.

Припев: Слава Тебе, Боже наш, слава Тебе.

Да кропя́т, веселя́щеся, о́блацы весе́лие ве́чное:/ Христо́с Иису́с предгряде́т вода́ми Иорда́нскими пото́ки грехо́вныя потопи́ти,/ просвеще́ние всем да́руя.

Сла́ва Отцу́ и Сы́ну и Свято́му Ду́ху:

Се Свет явля́ется,/ се Очище́ние показу́ется,/ се Спас предстои́т просия́ти су́щим во тьме Бо́жественныя зари́./ Сего́ помышле́ньми чи́стыми ра́достно поды́мем.

И ны́не и при́сно и во ве́ки веко́в. Ами́нь.

Богородичен: Па́ству, ю́же стяжа́ла еси́, Богороди́тельнице,/ сию́ спаса́й от вся́кия ну́жды, моля́щи Спа́са и Бо́га на́шего.

Пе́снь 3.

Ирмос: Не му́дростию и бога́тством да хва́лится сме́ртный свои́м,/ но ве́рою Госпо́днею,/ правосла́вно взыва́я Христу́ Бо́гу/ и поя́ при́сно:/ на ка́мени Твои́х за́поведей утверди́ мя, Влады́ко.

Припев: Слава Тебе, Боже наш, слава Тебе.

Пре́жде веко́в седя́й со Отце́м и Ду́хом,/ ны́не в после́дняя из Де́вы воплоще́н, я́коже весть,/ Христо́с гряде́т ко Креще́нию,/ безсме́ртие Боже́ственною ба́нею всем подая.

Припев: Слава Тебе, Боже наш, слава Тебе.

Водо́ю погребсти́ на́ша грехи́ хотя́ во Иорда́нских струя́х/ за милосе́рдие ми́лости, Христо́с Бог предгряде́т/ и назида́ет истле́вшия ны Креще́нием.

Сла́ва Отцу́ и Сы́ну и Свято́му Ду́ху:

Обнаже́ние сту́дное покрыва́я Ада́ма пра́отца,/ обнажа́ешися во́льно и струя́ми Иорда́нскими Тебе́ Сама́го покрыва́еши,/ вода́ми превы́спренняя покрыва́я, Христе́, Еди́не Многоми́лостиве.

И ны́не и при́сно и во ве́ки веко́в. Ами́нь.

Богородичен: Роди́лся еси́ из Де́вы несказа́нно,/ яви́лся еси́, я́коже благоволи́л еси́, Человеколю́бче,/ и мир обнови́л еси́, Го́споди.

Седа́лен, гла́с 1.

Вели́кий Дождь к ре́чным струя́м предгряде́т,/ пло́тию крести́тися восхоте́в./ К Нему́же Бо́жественный Предте́ча, ужаса́яся, глаго́лаше:/ ка́ко крещу́ Тя, скве́рны не иму́ща весьма́?/ Ка́ко простру́ мою́ десни́цу на главу́, ея́же трепе́щут вся́ческая?

Пе́снь 4.

Ирмос: Слы́ша дре́вле Авваку́м, Христе́, чу́дный Твой слух/ и стра́хом взыва́ше:/ от ю́га Бог прии́дет и Святы́й от горы́ приосене́нныя ча́щи/ спасти́ пома́занныя./ Сла́ва си́ле Твое́й, Го́споди.

Припев: Слава Тебе, Боже наш, слава Тебе.

Во́ду почерпи́те Жи́зни,/ се ны́не прии́де ми́ра Река́ и́стинно/ изсуши́ти му́тныя неве́рия во́ды и просвеще́ние источи́ти пою́щим Ему́:/ сла́ва си́ле Твое́й, Го́споди.

Припев: Слава Тебе, Боже наш, слава Тебе.

Весели́ся, пусты́ня, я́же пре́жде жа́ждущая,/ естество́ все челове́ческое:/ ны́не яви́ся Пото́к сла́дости, Иорда́нскими вода́ми реша́я зной греха́./ Ему́же пое́м ве́рно:/ сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Вопию́щаго глас проро́чески пусты́м возшуме́ помышле́нием:/ угото́вайте пути́ пра́выя Христу́ гряду́щему, глаго́лющ,/ я́ко да Креще́нием очи́стит обветша́вших ны,/ разреша́я пе́рвое осужде́ние.

И ны́не и при́сно и во ве́ки веко́в. Ами́нь.

Богородичен: Мати Чи́стая,/ Благослове́нная Свята́я Де́во,/ пою́щия Тя спаса́й от вся́каго обстоя́ния.

Пе́снь 5

Ирмос: Свет Твой незаходи́мый возсия́й, Христе́,/ в сердца́ ве́рно пою́щих Тя,/ мир подава́яй нам па́че ума́./ Тем от но́щи неве́дения ко дню све́том Твои́м теку́ще,/ славосло́вим Тя, Человеколю́бче.

Припев: Слава Тебе, Боже наш, слава Тебе.

Ми́ра, Христе́, сый Царь,/ вражды́ средосте́ние разори́л еси́,/ пло́ти подо́бием яви́вся су́щим на земли́./ Темже прише́ствие Твое́ ви́дев, Иоа́нн дивля́шеся со стра́хом,/ рукоположи́ти Тя повелева́емь.

Припев: Слава Тебе, Боже наш, слава Тебе.

Змие́в главы́ сокруши́ти Христо́с спеша́,/ ны́не гряде́т вода́ми и трепе́щущему вопие́т Крести́телю:/ простри́ твою́ ру́ку, и прикосни́ся верху́ Моему́,/ и у́жас оттряси́, соверша́я повеле́нное.

Сла́ва Отцу́ и Сы́ну и Свято́му Ду́ху:

Сказа́ше проро́к благода́ть иногда́ Креще́ния Боже́ственным Ду́хом,/ порази́в Иорда́нския струи́ ми́лотию, я́же раздели́шася,/ нам путетворя́щия возрожде́ние Боже́ственное в них я́вльшагося Христа́.

И ны́не и при́сно и во ве́ки веко́в. Ами́нь.

Богородичен: Всесвята́я Де́во Обра́дованная,/ ро́ждшая в ле́те Сло́во па́че сло́ва,/ моли́ Его́ спасти́ ду́ши на́ша.

Пе́снь 6.

Ирмос: Весь от страсте́й безме́рных содержу́ся/ и кито́м зол снизпадо́х,/но возведи́ из нетле́ния мя, Бо́же,/ я́коже пре́жде Ио́ну,/ и ве́рою безстра́стие ми да́руй,/ я́ко да во гла́се хвале́ния и спасе́ния ду́хом пожру́ Ти.

Припев: Слава Тебе, Боже наш, слава Тебе.

Милосе́рдие щедро́т Христо́с показу́я,/ в ра́бии зра́це Непреме́нный прихо́дит к рабу́, прося́ Креще́ния,/ от рабо́ты восхища́я челове́чество,/ Его́же уди́влься прише́ствию, ужаса́ется и стра́хом одержи́м быва́ет.

Припев: Слава Тебе, Боже наш, слава Тебе.

Ка́ко Тя ре́чныя струи́ прии́мут, нестерпи́маго Огня́, ны́не иду́ща?/ Ка́ко обнаже́ние Небе́снии ви́дят А́нгели?/ Ка́ко ру́ку Иоа́нн простре́т на Тя,/ Сло́ве Бо́жий Пребезнача́льне,/ того́ от земли́ созда́вшаго?

Сла́ва Отцу́ и Сы́ну и Свято́му Ду́ху:

Мо́ре разделя́ется, бежа́ще, пока́за но́вым лю́дем Боже́ственное прехожде́ние,/ е́же соде́ла в реце́, пло́тию прише́д,/ И́же из ка́мене пресла́вно источи́в во́ду./ Сего́ я́ко Бо́га просла́вим, на́ше сокруше́ние назда́вшаго.

И ны́не и при́сно и во ве́ки веко́в. Ами́нь.

Богородичен: Его́же родила́ еси́, Богоро́дице, несказа́нно, Бо́га на́шего,/ моля́щи не преста́й изба́вите от бед пою́щия Тя, Чи́стая Присноде́во.

Конда́к, гла́с 4.

Во струя́х днесь Иорда́нских быв, Госпо́дь/ Иоа́нну вопиет:/ не убо́йся крести́ти Мя,/ спасти́ бо приидо́х/ Ада́ма первозда́ннаго.

И́кос:

Не истязу́ю тя, Крести́телю, преде́лы преходи́ти,/ не глаго́лю тебе́;/ рцы Ми, я́же глаго́леши беззако́нным и учи́ши гре́шники./ То́чию крести́ Мя молча́ и ча́я, я́же от Креще́ния:/ прии́меши бо сего́ ра́ди досто́инство, е́же не бысть А́нгелом,/ и́бо всех проро́ков бо́льша тя сотворю́./ От о́ных у́бо ни еди́н я́ве Мя ви́де,/но во о́бразех, и се́нех,и гада́ниих,/ ты же пред тобо́ю стояща́ ви́дел еси́,/ спасти́ бо приидо́х Ада́ма первозда́ннаго.

Пе́снь 7.

Ирмос: Проидо́ша, я́ко черто́г, пе́щный пла́мень нестерпи́мый/ и́же за благоче́стие иногда́ о́троцы святи́и, показа́вшееся я́ве,/ и, согла́сно воспева́юще, песнь поя́ху:/ отце́в Бо́же, благослове́н еси́.

Припев: Слава Тебе, Боже наш, слава Тебе.

Христо́с спасе́ние яви́ся, просвеще́ние да́руя./ Да ра́дуется Не́бо, о́блацы же да кропя́т и́стинно пра́вду взыва́ющим:/ отце́в Бо́же, благослове́н еси́.

Припев: Слава Тебе, Боже наш, слава Тебе.

Руно́, е́же прови́де Гедео́н, полна́ ча́ша воды́ иска́павший/ я́ве Твое́ Креще́ние ска́зоваше, Христе́, е́же подае́ши, крести́вся, воспева́ющим:/ отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Сла́ныя безча́дствующия Елиссе́й исцеля́я во́ды,/ благоча́дие честны́я купе́ли прообрази́, хотя́щее бы́ти та́инственно, воспева́ющим:/ отцев Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Спаса́й па́ству Твою́, Всесвята́я Чи́стая, от вся́каго обстоя́ния,/ я́ко еди́на Предста́тельница ро́да на́шего,/ Благослове́нная Богоро́дице Всепе́тая.

Пе́снь 8.

Ирмос: Чу́да преесте́ственнаго пока́за о́браз огнеро́сная пещь дре́вле:/ огнь бо не опали́ ю́ныя де́ти,/ Христо́во явля́я безсе́менное от Де́вы Бо́жественное Рождество́./ Тем, воспева́юще, воспои́м:/ да благослови́т тварь вся Го́спода и превозно́сит во вся ве́ки.

Припев: Слава Тебе, Боже наш, слава Тебе.

Хвалу́ велегла́сно Влады́це возсле́м:/ прии́де, яви́ся,/ восхо́дит на во́ды, и обнажа́ется, Не́бо о́блаки одева́яй,/ и креща́ется, очища́я ны, воспева́ющия:/ да благослови́т тварь вся Го́спода и превозно́сит во вся ве́ки.

Припев: Слава Тебе, Боже наш, слава Тебе.

Прииди́те мы́сленно, ко Иорда́ну и́дем,/ виде́ние ве́лие в не́м у́зрим,/ Иису́с бо, просвеще́ние, прихо́дит и раба́ преклоня́ется дла́ни, с тре́петом вопию́ща:/ да благослови́т тварь вся Го́спода и превозно́сит во вся ве́ки.

Сла́ва Отцу́ и Сы́ну и Свято́му Ду́ху:

Угль, Его́же прови́де Иса́ия,/ в вода́х Иорда́нских разгоре́вся,/ попали́ вещь всю грехо́в и подаде́ сокруше́нным назда́ние./ Те́мже, воспева́юще, воспое́м:/ да благослови́т тварь вся Го́спода и превозно́сит во вся ве́ки.

И ны́не и при́сно и во ве́ки веко́в. Ами́нь.

Богородичен: Еди́наго Благоутро́бнаго Преве́чнаго Сло́ва,/ из Де́вы в после́дняя ро́ждшагося и спа́сшаго челове́ческий род,/ по́йте, свяще́нницы, людие, превозноси́те Его́ во ве́ки.

Песнь 9

Ирмос: Неизглаго́ланное Де́вы та́инство:/ Не́бо бо Сия́, и Престо́л Херуви́мский,/ и светоно́сный Черто́г показа́ся/ Христа́ Бо́га Вседержи́теля,/ Сию́ благоче́стно я́ко Богоро́дицу велича́ем.

Припев: Слава Тебе, Боже наш, слава Тебе.

Та́инство стра́нное зрю и пресла́вное:/ Иису́с гряде́т во́лею к реце́ Иорда́ну, вопия́ Иоа́нну:/ твою́ десни́цу Ми, дру́же, взаи́мствуй,/ стра́шная соверша́ющему людем Мои́м в снабдение.

Припев: Слава Тебе, Боже наш, слава Тебе.

Пусты́нная Иорда́нская да процвету́т,/ и́же во тьме лежа́щий, вели́к яви́ся вам Свет./ Ви́девше, взыгра́йте:/ Христо́с, от Галиле́и приходя́й, пло́тию крести́тися от раба́ хо́щет.

Сла́ва Отцу́ и Сы́ну и Свято́му Ду́ху:

Возвесели́ся ны́не, Иорда́не, и лику́й,/ Иоа́нне, взыгра́й, вся вселе́нная, ра́дуйся:/ се яви́ся Христо́с, и обнажа́ется, и креща́ется,/ во оде́жду облача́я нетле́ния челове́чество.

И ны́не и при́сно и во ве́ки веко́в. Ами́нь.

Богородичен: Во чре́ве заче́ншая непостижи́мое Сло́во/ и Сие́ без се́мене нам ро́ждшая,/ моли́ приле́жно спасти́ся душа́м на́шим.

Свети́лен.

Я́ко ви́де Тя обнаже́на Иорда́н,/ с тре́петом к су́щему от непло́дове рече́:/ оста́ви, о Иоа́нне, крести́тися Го́спода,/ огне́м и Ду́хом очища́ющаго всю тварь,/ на сие́ бо прии́де, освяти́ти земны́я и во́дное естество́.

Молитва

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Божество́, Еди́на Си́ла, поми́луй мя, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в, ами́нь.