17 января.

Канон на Повечерии предпразднству Богоявления на 17 января.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Гото́вися, Завуло́не,/ и красу́йся, Неффали́ме,/ Иорда́не реко́, ста́ни,/ подыми́, взыгра́я, крести́тися гряду́ща Влады́ку./ Весели́ся, Ада́ме с прама́терию,/ не кры́йта себе́, я́коже в раи́ пре́жде,/ и́бо, на́ги ви́дев вы, яви́ся,/ да облече́т в пе́рвую оде́жду:/ Христо́с яви́ся, всю тварь хотя́ обнови́ти.

Кано́н. Гла́с 6.

Пе́снь 1.

Ирмос: Се́ченое сече́тся мо́ре Чермно́е,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма и всеору́жным гроб./ Песнь же Богокра́сная воспева́шеся:/ сла́вно просла́вися Христо́с, Бог наш.

Припев: Слава Тебе, Боже наш, слава Тебе.

Всевино́вная и пода́тельная жи́зни, безме́рная му́дрость Бо́жия/ созда́ храм себе́ из Чи́стыя Неискусому́жныя Ма́тере,/ ко Иорда́нским же ны́не струя́м гряде́т,/ обогаща́я Божество́м земны́х на обновле́ние.

Припев: Слава Тебе, Боже наш, слава Тебе.

Всевино́вная и пода́тельная жи́зни, безме́рная му́дрость Бо́жия/ созда́ храм себе́ из Чи́стыя Неискусому́жныя Ма́тере,/ ко Иорда́нским же ны́не струя́м гряде́т,/ обогаща́я Божество́м земны́х на обновле́ние.

Сла́ва Отцу́ и Сы́ну и Свято́му Ду́ху:

Таи́ново́дствующи, вся созыва́ет, су́щия от язы́к, Бо́жия му́дрость к Све́ту,/ во тьме пре́жде неве́дения несве́тлой лежа́щия,/ в позна́ние Истины возводя́щи, к Све́ту Креще́нием,/ сердца́ очища́ющим и созида́ющим Ду́хом.

И ны́не и при́сно и во ве́ки веко́в. Ами́нь.

Богородичен: Да послу́шаем ны́не проро́ческих, соверша́емых Ду́хом гла́сов:/ креща́яй бо в Ду́се и Огни́, и́дет Христо́с ко Иорда́ну./ Прииди́те к Нему́ и просвети́теся, ваша бо ли́ца не постыдя́тся.

Пе́снь 3.

Ирмос: Госпо́дь Сый всех и Зижди́тель Бог,/ созда́нное Безстра́стный, обнища́в, Себе́ соедини́л еси́/ и струя́ми, и́миже хотел еси́ приити́,/ Сам Сый лю́дем провозглаша́л еси́:/во́ду Жи́зни почерпи́те/ и ве́рою утверди́теся.

Припев: Слава Тебе, Боже наш, слава Тебе.

Реши́тельную душ и теле́с ку́пно Креще́ния благода́ть, Спа́се, гряде́ши дарова́ти,/ сего́ ра́ди подава́еши ны́не нам и благода́ть вме́сто благода́ти, зовый:/ во́ду Жи́зни почерпи́те и ве́рою утверди́теся.

Припев: Слава Тебе, Боже наш, слава Тебе.

Реши́тельную душ и теле́с ку́пно Креще́ния благода́ть, Спа́се, гряде́ши дарова́ти,/ сего́ ра́ди подава́еши ны́не нам и благода́ть вме́сто благода́ти, зовый:/ во́ду Жи́зни почерпи́те и ве́рою утверди́теся.

Сла́ва Отцу́ и Сы́ну и Свято́му Ду́ху:

Безу́мен муж, неве́дый Бо́га, растлева́ется,/ и́бо безме́стными начина́ньми лиша́ется от вся́каго бла́га и вся́каго отпада́ет спасе́ния,/ его́же ча́сти вси, Христа́ ве́дящии, да изба́вимся.

И ны́не и при́сно и во ве́ки веко́в. Ами́нь.

Богородичен: Безу́мен муж, неве́дый Бо́га, растлева́ется,/ и́бо безме́стными начина́ньми лиша́ется от вся́каго бла́га и вся́каго отпада́ет спасе́ния,/ его́же ча́сти вси, Христа́ ве́дящии, да изба́вимся.

Пе́снь 4.

Ирмос: Прови́дя проро́к/ та́йны Твоея́ неизрече́нное, Христе́, провозгласи́:/ положи́л еси́ кре́пкую Креще́ния благода́ть/ ве́рою сие́ прие́млющим всем/ во избавле́ние грехо́в на́ших.

Припев: Слава Тебе, Боже наш, слава Тебе.

На Креще́ние тща́ся, сме́ртным источа́ющее оставле́ние,/ обремене́нныя вся прегреше́ньми зове́ши, зле в нечистоте́ пожи́вшия,/ душе́вный поко́й тем, я́ко Щедр, пода́ти обещава́я.

Припев: Слава Тебе, Боже наш, слава Тебе.

На Креще́ние тща́ся, сме́ртным источа́ющее оставле́ние,/ обремене́нныя вся прегреше́ньми зове́ши, зле в нечистоте́ пожи́вшия,/ душе́вный поко́й тем, я́ко Щедр, пода́ти обещава́я.

Сла́ва Отцу́ и Сы́ну и Свято́му Ду́ху:

Причаща́яйся пло́ти мое́й, да Твоего́ Божества́ пода́си ми;/ о́браз бо неизме́нен сый Твоего́ Отца́,/ вмеща́ешися под ру́ки Твоего́, Спа́се, созда́ния,/ кроме́ греха́ Челове́к я́влься, подо́бным очища́я, Сло́ве, подо́бное.

И ны́не и при́сно и во ве́ки веко́в. Ами́нь.

Богородичен: Питие́, и пома́зание, и Дух Твоея́ печа́ти, Спа́се, позна́ния,/ и та́йная дарова́ния, и даро́в Боже́ственных досторачи́тельная дела́,/ и́бо Единоро́днаго Тя очище́ние Оте́ц в мир посла́.

Пе́снь 5

Ирмос: Сою́зом боязни содержи́мь ны́не, Предтеча/ отрица́ется крести́ти,/ благогове́йно Христа́ ви́дев, на́га стоя́ща на воде́,/ водо́ю покрыва́ющаго превы́спренняя.

Припев: Слава Тебе, Боже наш, слава Тебе.

Неодержи́мую держа́щая и превы́спреннюю на возду́се во́ду, бе́здны обуздава́ющая/ и моря́ востязу́ющая, Бо́жия Му́дрость гряде́т ко Иорда́ну,/ Креще́ние прие́мля от руки́ раба́.

Припев: Слава Тебе, Боже наш, слава Тебе.

Неодержи́мую держа́щая и превы́спреннюю на возду́се во́ду, бе́здны обуздава́ющая/ и моря́ востязу́ющая, Бо́жия Му́дрость гряде́т ко Иорда́ну,/ Креще́ние прие́мля от руки́ раба́.

Сла́ва Отцу́ и Сы́ну и Свято́му Ду́ху:

Вообрази́в челове́ческое естество́, Креще́нием ны́не гряде́т очи́стити Христо́с,/ о́блаки Не́бо облага́я и одева́яйся све́том/ наг зри́тся во Иорда́нских струя́х, и руко́ю держи́тся вся нося́й.

И ны́не и при́сно и во ве́ки веко́в. Ами́нь.

Богородичен: Вообрази́в челове́ческое естество́, Креще́нием ны́не гряде́т очи́стити Христо́с,/ о́блаки Не́бо облага́я и одева́яйся све́том/ наг зри́тся во Иорда́нских струя́х, и руко́ю держи́тся вся нося́й.

Пе́снь 6.

Ирмос: Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на Влады́це, вопию́ Ти:/ от тли мя возведи́.

Припев: Слава Тебе, Боже наш, слава Тебе.

Го́спода Тя ве́дяще, Небеса́ пове́дают земли́ Твою́, Спа́се, сла́ву в Твое́м рождестве,/ ны́не же Оте́ц Тя пропове́дует, Сы́на возлю́бленна, креща́емаго.

Припев: Слава Тебе, Боже наш, слава Тебе.

Го́спода Тя ве́дяще, Небеса́ пове́дают земли́ Твою́, Спа́се, сла́ву в Твое́м рождестве,/ ны́не же Оте́ц Тя пропове́дует, Сы́на возлю́бленна, креща́емаго.

Сла́ва Отцу́ и Сы́ну и Свято́му Ду́ху:

Скве́рну всяк нося́й да омы́ет ю сле́зными ка́плями/ и Христу́ с тре́петом да присту́пит,/ огне́м и Ду́хом Боже́ственным очи́стити иду́щему естество́ на́ше.

И ны́не и при́сно и во ве́ки веко́в. Ами́нь.

Богородичен: Скве́рну всяк нося́й да омы́ет ю сле́зными ка́плями/ и Христу́ с тре́петом да присту́пит,/ огне́м и Ду́хом Боже́ственным очи́стити иду́щему естество́ на́ше.

Конда́к, гла́с 4.

Во струя́х днесь Иорда́нских быв, Госпо́дь/ Иоа́нну вопиет:/ не убо́йся крести́ти Мя,/ спасти́ бо приидо́х/ Ада́ма первозда́ннаго.

Пе́снь 7.

Ирмос: О́троцы в Вавило́не пе́щнаго пла́мене не убоя́шася,/но, посреде́ пла́мене вве́ржени, ороша́еми, поя́ху:/ благослове́н еси́, Го́споди, Бо́же оте́ц на́ших.

Припев: Слава Тебе, Боже наш, слава Тебе.

Помава́я главо́ю ко вражде́, никто́же ле́стно да дви́жет,/ и́скреннему зло возда́ти зле вме́сто зла поуча́яся,/ но в любви́ Го́спода я́вльшагося да почестви́м.

Припев: Слава Тебе, Боже наш, слава Тебе.

Помава́я главо́ю ко вражде́, никто́же ле́стно да дви́жет,/ и́скреннему зло возда́ти зле вме́сто зла поуча́яся,/ но в любви́ Го́спода я́вльшагося да почестви́м.

Сла́ва Отцу́ и Сы́ну и Свято́му Ду́ху:

Вы, Христо́вы я́ко дру́зи, ма́ло спостражди́те вообра́жшемуся,/ и гряду́щему Креще́ние прия́ти, и я́вльшемуся по нам о́браза на очище́ние/ и прегреше́ний на избавле́ние.

И ны́не и при́сно и во ве́ки веко́в. Ами́нь.

Богородичен: Со Мно́ю а́ще кто сни́дет и спогребе́тся Креще́нием,/ со Мно́ю сла́вы наслади́тся и воскресе́ния, – Христо́с ны́не возвеща́ет,/ Его́же ве́рно да усря́щим.

Пе́снь 8.

Ирмос: За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки.

Припев: Слава Тебе, Боже наш, слава Тебе.

Гости́телие, Бо́жия пи́щи в Вифлее́ме му́дре напита́вшеся,/ со А́нгелы же просла́вльше, и па́стырьми, и волхвы́ Вопло́щшагося,/ ны́не же ко Иорда́ну та́инственно и́дем,/ ви́дяще та́инство ве́лие, е́же Христо́с Сам соверша́ет,/ Его́же превозно́сим во вся ве́ки.

Припев: Слава Тебе, Боже наш, слава Тебе.

Гости́телие, Бо́жия пи́щи в Вифлее́ме му́дре напита́вшеся,/ со А́нгелы же просла́вльше, и па́стырьми, и волхвы́ Вопло́щшагося,/ ны́не же ко Иорда́ну та́инственно и́дем,/ ви́дяще та́инство ве́лие, е́же Христо́с Сам соверша́ет,/ Его́же превозно́сим во вся ве́ки.

Сла́ва Отцу́ и Сы́ну и Свято́му Ду́ху:

Зако́на соблюда́юще глави́зну и проро́к, любо́вию утве́рждшеся,/ подо́бницы Христа́ бу́дем, за любо́вь кра́йнюю плоть прии́мшаго,/ и Креще́нием нас Отцу́ примири́вшаго, и научившаго пе́ти:/ Го́спода по́йте, дела́, и превозноси́те во вся ве́ки.

И ны́не и при́сно и во ве́ки веко́в. Ами́нь.

Богородичен: Приима́ше Гряду́щаго грехи́ ми́ра очи́стити водо́ю,/ но Сему́ возбраня́ше, сопряту́емь стра́хом:/ аз бо тре́бую крести́тися от Тебе́, – Жениху́ противорече́ друг,/ глас же Сло́ву и Со́лнцу свети́льник./ Тя превозно́сим во вся ве́ки.

Песнь 9

Ирмос: Стра́нствия Влады́чня/ и безсме́ртныя трапе́зы/ во убо́зем верте́пе пре́жде наслади́вшеся, ны́не на Иорда́н теце́м,/ та́йну зря́ще стра́нну,/ Го́рния све́тлости хода́тайственну.

Припев: Слава Тебе, Боже наш, слава Тебе.

Иди́те от Вифлее́ма, пито́мицы чуде́с, к стране́ Иорда́нстей/ и та́мо ви́дите дела́, та́инственно соверша́ема/ Креще́нием же Христа́, прише́дша Ада́ма обнови́ти, и́бо воплоти́ся.

Припев: Слава Тебе, Боже наш, слава Тебе.

Иди́те от Вифлее́ма, пито́мицы чуде́с, к стране́ Иорда́нстей/ и та́мо ви́дите дела́, та́инственно соверша́ема/ Креще́нием же Христа́, прише́дша Ада́ма обнови́ти, и́бо воплоти́ся.

Сла́ва Отцу́ и Сы́ну и Свято́му Ду́ху:

Соде́тель, ро́ждься из Отца́ пре́жде веко́в,/ роди́ся, напосле́док непрело́жно вопло́щся из Де́вы Чи́стыя Богоотрокови́цы,/ сугу́б, Бог и Челове́к пребыва́я,/ Ада́ма обнови́ти Креще́нием.

И ны́не и при́сно и во ве́ки веко́в. Ами́нь.

Богородичен: Я́ко Челове́к прише́л еси́ существо́м, не мечта́нием,/ я́ко Еди́н посреди́ всех, прося́й Креще́ния,/ Еди́н, естество́м непови́нный,/ погребсти́ бо вины́ прише́л еси́ челове́ческия, в вода́х крещаем.

Молитва

Влады́ко Бо́же О́тче Вседержи́телю, Го́споди Сы́не Единоро́дный Иису́се Христе́, и Святы́й Ду́ше, Еди́но Божество́, Еди́на Си́ла, поми́луй мя, гре́шнаго, и и́миже ве́си судьба́ми, спаси́ мя, недосто́йнаго раба́ Твоего́, я́ко благослове́н еси́ во ве́ки веко́в, ами́нь.