17 января.

Канон преподобномученику Онуфрию Болгарскому, Габровскому, пострадавшему в острове Хиосе в лето 1818-е.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Тече́нием сле́з, удруче́нием поста́, непреста́нною моли́твою и коленопреклоне́нием, Ону́фрие всечу́дне, и всено́щными стоя́ньми, о́гнь невеще́ственный Госпо́дния любве́ в се́рдце твое́м, преподо́бне, возжже́ся, и за Христа́ безбоя́зненно на сме́рть поте́кл еси́, те́мже и Христо́с к ли́ку му́чеников и преподо́бных тя́ сопричте́. Его́же моли́ спасти́ся душа́м на́шим.

Велича́ние:

Ублажа́ем тя́, преподобному́чениче Ону́фрие, и чте́м святу́ю па́мять твою́, наста́вниче мона́хов и собесе́дниче Ангелов.

Стихи́ра, гла́с 1:

Отве́ргся ми́ра и предочи́стився в по́стничестве от вся́кия скве́рны пло́ти и ду́ха, всечу́дне Ону́фрие, ве́сь боже́ствен бы́л еси́, живя́ я́ко Ангел в телеси́, приложи́в же к по́стничеству е́же о ве́ре страда́льчество, сугу́б вене́ц прия́л еси́ от Христа́, с преподо́бными и му́ченики прославля́емь; моли́ся о душа́х на́ших.

Кано́н свята́го. Гла́с 1.

Пе́снь 1.

Ирмос: Христо́с ражда́ется — сла́вите! Христо́с с небе́с — сря́щите! Христо́с на земли́ — возноси́теся! По́йте Го́сподеви, вся́ земля́, и весе́лием воспо́йте, лю́дие, я́ко просла́вися.

Припев: Преподобномучениче Онуфрие, моли Бога о нас.

Воспева́ющему любо́вию па́мять твою́ боже́ственную и светоно́сную, Ону́фрие, просвети́тельную Ду́ха благода́ть дарова́тися проси́ ны́не, име́яй дерзнове́ние ко Христу́, богоблаже́нне, я́ко преподобнострада́лец.

Припев: Преподобномучениче Онуфрие, моли Бога о нас.

Возненави́дев ми́р, Ону́фрие, обре́л еси́ Христа́, ве́дя добре́йше, я́ко вся́кое мирско́е наслажде́ние вражду́ бы́ти Бо́гу, Его́же предпоче́л еси́ все́х, насле́дник и́стинно Его́ быва́емь.

Припев: Преподобномучениче Онуфрие, моли Бога о нас.

Хра́м бы́л еси́ богоприя́тен Бо́гу велеле́пный страда́льчеством, тве́рдый страда́льче Ону́фрие, ра́достно соверша́ем светоно́сную твою́ па́мять, согреше́ний очище́ние восприе́млюще.

Сла́ва Отцу́ и Сы́ну и Свято́му Ду́ху:

Преподо́бных Афо́нских удобре́ние и но́вых страда́льцев честносло́вие показа́лся еси́, му́дре Ону́фрие, те́мже тя́ благохва́лим я́ко победи́теля, взыва́юще согла́сно: чту́щия тя́ ны́не спаси́ моли́твами твои́ми.

И ны́не и при́сно и во ве́ки веко́в. Ами́нь.

Богородичен: Се́ Де́ва зача́т безсе́менно Влады́ку тва́ри, я́коже рече́ Иса́ия, роди́ же нетле́нно Бо́га пло́тию, Его́же и нарица́ется ны́не и́мя — вели́каго сове́та Ангел.

Пе́снь 3.

Ирмос: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, Свя́т еси́, Го́споди.

Припев: Преподобномучениче Онуфрие, моли Бога о нас.

Дне́сь в пе́снех да почти́тся многострада́льный Ону́фрий, Бо́га бо поче́тший доброде́тельным житие́м и вене́ц сугу́б от Него́ прия́вый я́ко преподобному́ченик Христо́в. О, сугу́баго дарова́ния!

Припев: Преподобномучениче Онуфрие, моли Бога о нас.

Труба́ небе́сная показа́ся богогла́сный тво́й язы́к, пропове́дающий посреде́ собо́рища беззако́нных Христа́ Бо́га, Ону́фрие, и пре́лесть нечести́вых я́сно, му́чениче, облича́ющий.

Сла́ва Отцу́ и Сы́ну и Свято́му Ду́ху:

Прия́л еси́ благода́ть вся́к неду́г цели́ти, Ону́фрие, прибега́ющих к тебе́ ве́рою и лобыза́ющих честны́й тво́й о́браз, те́мже, молю́ся, исцели́ души́ моея́ и телесе́ лю́тыя стра́сти па́губныя.

И ны́не и при́сно и во ве́ки веко́в. Ами́нь.

Богородичен: Ма́ти и Де́ва была́ еси́ еди́на, Богоневе́сто, я́коже бо пребы́сть неизме́нен по воплоще́нии па́ки Бо́г, Иже от Тебе́ оболки́й мя́, си́це и по рождестве́ Тя́ соблюда́ет па́ки Присноде́ву.

Седа́лен, гла́с 8.

Анти́христову пре́лесть в де́тском во́зрасте прия́в, Христа́ отве́рглся еси́ Спаси́теля твоего́. — Увы́, лю́таго твоего́ прегреше́ния! — В не́м же па́л еси́ преле́стию зми́я началозло́бнаго, но а́бие ма́нием Боже́ственным воста́л еси́ в ве́ру Правосла́вную, умилостивля́я Бо́га прия́ти грехо́в свои́х проще́ние боже́ственными де́лы, всеблаже́нне, Его́же и страда́льчеством твои́м сла́вно просла́вил еси́.

Пе́снь 4.

Ирмос: Же́зл из ко́рене Иессе́ева и цве́т от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щся от Неискусому́жныя, Невеще́ственный и Бо́же, сла́ва си́ле Твое́й, Го́споди.

Припев: Преподобномучениче Онуфрие, моли Бога о нас.

Привре́менную сла́ву и че́сть оста́вил еси́, Ону́фрие, и сраспя́лся еси́ Зижди́телю твоему́, мучи́телем тве́рдо противостоя́, и усе́чен бы́в во свяще́нную главу́, я́ко же́ртва Бо́гу соверше́нна и благоуго́дна прине́слся еси́.

Припев: Преподобномучениче Онуфрие, моли Бога о нас.

Скве́рную пучи́ну страсте́й, Ону́фрие, изсуши́л еси́ поще́нием и моли́твою, и взя́лся еси́ к небе́сным, ра́нами му́ченичества я́ко в сла́ве украша́емь; моли́ приле́жно о чту́щих тя́, свя́те.

Сла́ва Отцу́ и Сы́ну и Свято́му Ду́ху:

Вси́ ве́рнии ра́достно пое́м тя́, Ону́фрие, я́ко посрами́вша вражде́бную де́рзость супоста́т, небоя́зненною благода́тию Христа́, Влады́ки все́х, Его́же моли́ при́сно о соверша́ющих па́мять твою́.

И ны́не и при́сно и во ве́ки веко́в. Ами́нь.

Богородичен: Блаже́н язы́к, Препе́тая Чи́стая, и́же сподо́бися чести́ Рождество́ Твое́ ве́рно, Правосла́вием, и уче́нием, и де́лы, и́стинне явля́я вся́ о́бразы воплоще́ния Сы́на Твоего́.

Пе́снь 5

Ирмос: Бо́г Сы́й ми́ра, Оте́ц щедро́т, вели́каго Сове́та Твоего́ Ангела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.

Припев: Преподобномучениче Онуфрие, моли Бога о нас.

Преподо́бно име́я жела́ние к Бо́гу, на горе́ Афо́нстей, му́дре, навы́кл еси́, Ону́фрие, посту́ и моли́твам, та́же поте́кл к по́двигом му́ченичества, богому́дре, страда́льчествовал еси́ Влады́ки ра́ди твоего́, досточу́дне.

Припев: Преподобномучениче Онуфрие, моли Бога о нас.

Вси́ тя́ предста́теля бога́та име́ем, му́дре, ко Христу́, Его́же моли́, Ону́фрие, дарова́тися на́м согреше́ний проще́ние, и все́х бе́дствий разреше́ние и спасе́ние, я́ко да любо́вию, сла́вне, почита́ем боже́ственную твою́ па́мять.

Сла́ва Отцу́ и Сы́ну и Свято́му Ду́ху:

Бро́вь вели́кую нечести́вых низложи́л еси́ глаго́лами, му́чениче му́дре: простото́ю бо слове́с твои́х пропове́дал еси́ Христа́, еди́наго Бо́га все́х, того́ ра́ди и усе́чен бы́в во главу́, и вене́ц нетле́нный прия́л еси́, Ону́фрие.

И ны́не и при́сно и во ве́ки веко́в. Ами́нь.

Богородичен: Иму́щи я́ко Ма́ти дерзнове́ние ко Христу́ Бо́гу, Чи́стая, от ага́рянских ча́д изба́витися на́м моли́ при́сно, и от вся́каго вре́да и всегда́ благода́рно сла́вити Его́, утверди́, Пренепоро́чная Де́во.

Пе́снь 6.

Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.

Припев: Преподобномучениче Онуфрие, моли Бога о нас.

Ме́чь разлучи́ главу́ твою́ от те́ла твоего́, му́дре, и ны́не возлете́л еси́ в небе́сная селе́ния, лику́я с ли́ки му́ченик предстои́ши престо́лу Христо́ву, Ону́фрие, Его́же моли́ оставле́ние прегреше́ний на́м дарова́ти.

Припев: Преподобномучениче Онуфрие, моли Бога о нас.

Вверга́ется во глубину́ морску́ю те́ло твое́ по усекнове́нии, тве́рдый Ону́фрие, ду́х же тво́й взы́де к небеси́ в селе́ниих святы́х, с ни́ми же ра́дуяся, му́дре, моли́ о благохва́лящих тя́, дарова́тися душе́вное спасе́ние.

Сла́ва Отцу́ и Сы́ну и Свято́му Ду́ху:

Ми́лостива на́м бы́ти Еди́наго Человеколю́бца Бо́га честны́ми твои́ми мольба́ми соде́лай, о преподобнострада́льче Ону́фрие! Бо́лгарская о́трасль и Афо́нский благоуха́нный ши́пче, я́ко да любо́вию соверша́ем по́двиг тво́й, му́дре, его́же Христо́с просла́ви, я́ко за Него́ страда́льчествовавша тверде́йше.

И ны́не и при́сно и во ве́ки веко́в. Ами́нь.

Богородичен: Мари́е, Бо́жие жили́ще, мене́, жили́ще бы́вша лука́вых бесо́в де́лы скве́рными, и си́х исполня́ющаго во́лю безу́мно, покая́нием мя́ яви́ Бо́гу жили́ще.

Конда́к, гла́с 3.

Све́тлое твое́ страда́льчество и боже́ственное усекнове́ние, сошло́ е́сть со свяще́нным Рождество́м Христо́вым, узре́ся же и с Боже́ственным Богоявле́ним, име́ющее, преподобному́чениче, сла́ву обою́ду све́тлу, сла́вне Ону́фрие, страда́льче Христо́в.

Икос:

В по́стничестве пе́рвее и последи́ в страда́льчестве украси́вшагося Ону́фрия боже́ственнаго, прииди́те, о христолю́бцы и мучениколю́бцы, восхва́лим, дивя́щеся боже́ственным его́ исправле́нием: отрече́нием от ми́ра и повинове́нием Христу́, отсече́нием своея́ во́ли, присноте́чными слеза́ми, продолжи́тельными во дне́х и но́щех поще́ниями, протя́жными моли́твами и всено́щным стоя́нием, сокруше́нием серде́чным, несравне́нным умиле́нием и смире́нием, Христа́ па́ки приобре́те, и́хже ра́ди и испроси́ у Него́, е́же сконча́тися кро́вию, си́м, глаго́лю, чудя́щеся и, воскли́кнувше, возопие́м ему́: Ону́фрие блаже́нне, сла́во и похвало́ всея́ Болга́рии, не преста́й моли́ти о на́с, восхваля́ющих тя́ ве́рно и чту́щих па́мять твою́, страда́льче Христо́в.

Пе́снь 7.

Ирмос: Отроцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреди́ пла́мене стоя́ще, поя́ху: отце́в Бо́же, благослове́н еси́.

Припев: Преподобномучениче Онуфрие, моли Бога о нас.

Ты́, му́чениче Ону́фрие, неле́стными уче́нии лю́тую пре́лесть оста́вив, Боже́ственным украше́нием нетле́ния украси́лся еси́, и Христо́вым страда́льцем сочи́слился еси́, вопия́: отце́в Бо́же, благослове́н еси́.

Припев: Преподобномучениче Онуфрие, моли Бога о нас.

Напая́нием кро́ве твоея́, му́чениче, злочести́вых суровство́ удави́л еси, непобеди́вся от зе́льности зо́л, всесла́вне, но му́жественно терпя́, му́дре, взыва́л еси́: отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Зи́му нече́стия и мра́з неве́рия разруши́л еси́ в теплоту́ боже́ственныя твоея́ ре́вности, о Ону́фрие, и согре́ялся еси́ возжже́нием Боже́ственнаго Ду́ха, вопия́: Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Яко одушевле́н виногра́д, Де́во, прорасти́ла еси́ на́м Гро́зд зре́лый, источи́вший вино́ оставле́ния и изсуши́вший грехо́вное пия́нство.

Пе́снь 8.

Ирмос: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Припев: Преподобномучениче Онуфрие, моли Бога о нас.

Иночествующии ли́ки горы́ Афо́нския ра́дующеся пою́т честно́е твое́ страда́льчество, и́мже возше́л еси́ на небеси́ ра́дуяся, с ни́ми же и мы́ тя́ восхваля́юще, вопие́м: да благослови́т тва́рь вся́ Госпо́дня Го́спода и превозно́сит во вся́ ве́ки.

Припев: Преподобномучениче Онуфрие, моли Бога о нас.

Яко престо́л Бо́жий показа́лся еси́, страстоте́рпче, пропове́дуя Его́ всесвято́е и́мя, Ону́фрие, пред нечести́выми и христоненави́стными мучи́тельми мно́гим дерзнове́нием, те́мже и зако́нно соверши́в до́брый тво́й по́двиг, прия́л еси́ вене́ц пра́вды от руки́ Госпо́дни.

Сла́ва Отцу́ и Сы́ну и Свято́му Ду́ху:

Се́ светоза́рное торжество́ су́щаго преподобному́ченика возсия́, озаря́ющее концы́ вселе́нныя и веселя́щее сердца́ мона́шествующих, присту́пим у́бо усе́рдно, целу́юще его́ честно́е изображе́ние.

И ны́не и при́сно и во ве́ки веко́в. Ами́нь.

Богородичен: Дре́вле Тя́ прозя́бший Ааро́нов же́зл вообрази́, Де́во, Ты́ бо еди́на родила́ еси́ прозябе́ние без му́жа, небе́сный ны́не до́ждь прие́мши во чре́ве, те́м, веселя́щеся, Тя́ Богоро́дицу по до́лгу согла́сно вси́ пое́м и превозно́сим во вся́ ве́ки.

Песнь 9

Ирмос: Та́инство стра́нное ви́жу и пресла́вное: не́бо — верте́п; престо́л херуви́мский — Де́ву; я́сли — вмести́лище, в ни́хже возлеже́ Невмести́мый — Христо́с Бо́г, Его́же, воспева́юще, велича́ем.

Припев: Преподобномучениче Онуфрие, моли Бога о нас.

Горе́ Боже́ственныя све́тлости сподо́бился еси́, страда́льче Ону́фрие, и просвеща́еши ны́не свяще́нными светлостьми́ соверша́ющия благонаро́читую твою́ па́мять и любо́вию покланя́ющияся всечестно́му твоему́ изображе́нию.

Припев: Преподобномучениче Онуфрие, моли Бога о нас.

Сла́ва Афо́нских и́ноков и му́чеников показа́лся еси́, Ону́фрие, те́мже удали́ от на́с тму́ искуше́ний моли́твами твои́ми, свя́те, чту́щих честну́ю твою́ па́мять и любо́вию тя́ блажа́щих.

Припев: Преподобномучениче Онуфрие, моли Бога о нас.

Ты́ яви́лся еси́ сла́ва земли́ Бо́лгарския и похвала́ о́строва Хи́оса, я́ко в пе́рвей прозя́бл и воспита́лся еси́, в Хи́осе же страда́льчествовал еси́, те́мже ны́не по до́лгу и любви́, не преста́й закрыля́ти и избавля́ти и́х от вся́ких бе́д и искуше́ний, преподобному́чениче Ону́фрие.

Припев: Преподобномучениче Онуфрие, моли Бога о нас.

Суди́щу беззако́нных предста́л еси́, страстоте́рпче, и небоя́зненным мудрова́нием пропове́дал еси́ Иису́сова Божества́, и усе́чен бы́в во главу́, Ону́фрие, венце́м нетле́нным украси́лся еси́, досточу́дне.

Сла́ва Отцу́ и Сы́ну и Свято́му Ду́ху:

В ти́хое приста́нище устреми́лся еси́, свободи́вся от треволне́ний и бу́ри нече́стия, Ону́фрие, и предста́л еси́ Влады́це Христу́, веселя́ся, Его́же моли́ при́сно о на́с, восхваля́ющих тя́, блаже́нне.

И ны́не и при́сно и во ве́ки веко́в. Ами́нь.

Богородичен: Воплоще́нна Сло́ва, но непрело́жна ве́м, те́мже воспева́ю Его́ ве́рно во двою́ у́бо существу́, ипоста́си же еди́ней, Его́же вои́стинну я́ко Богочелове́ка пропове́дая, пе́снь соверша́ю.

Свети́лен.

Страстоте́рпца дне́сь и преподо́бнаго па́мять, вси́ ве́рнии, почти́м, в пе́нии и пе́снех вопию́ще ему́ любо́вию: доблему́дренне Ону́фрие, моли́ Его́же возлюби́л и пропове́дал еси́, да́ти на́м согреше́ний оставле́ние, и изба́витися бу́дущаго муче́ния и улучи́ти Ца́рствия.

Сла́ва И ны́не.

Преподобному́чениче Госпо́день, Ону́фрие страстоно́сче, по́двиги твоя́ пое́м и благогове́йно соверша́ем присночти́мую па́мять све́тлаго твоего́ му́ченичества.

Стихи́ры свята́го глас 3.

Всехва́льный му́чениче Христо́в, страда́льче Ону́фрие, приими́ любо́вь Боже́ственную, усе́рдно тя́ сла́вящаго в пе́ниих и пе́снех уми́льных, и помина́й оте́чество твое́ со все́ми благохва́лящими тя́, и твои́ми к Бо́гу моли́твами изба́ви от вся́ких бе́д и скорбе́й.

Бо́гу предстоя́ ны́не, всесла́вне Ону́фрие, и Боже́ственныя сла́вы исполня́емь, с чи́нми преподо́бных и боже́ственных му́ченик счиня́емь, помина́й пою́щия твое́ боже́ственное страда́льчество, и покланя́ющияся ве́рою и любо́вию подо́бию зра́ка твоего́.

По отсече́нии твоея́ главы́, в мо́ре вве́ржеся суровство́м суде́й боже́ственное твое́ те́ло, страстоте́рпче, со все́ю окрова́вленною пе́рстию, не терпя́ще зре́ти бы́ти покланя́емо от ве́рных люде́й; но [мы́], зря́ще, целу́ем зра́ка твоего́ боже́ственное изображе́ние.

Стихи́ра, гла́с 2.

Ве́сь во у́жасе покланя́юся свяще́нному твоему́ и вожделе́нному начерта́нию, да́ждь ми́ у́бо исцеле́ние твои́ми к Бо́гу моли́твами души́ и телесе́, и упра́ви еще́ ве́сь живо́т мо́й к стезя́м доброде́телей, свя́те Ону́фрие, бли́жний Христа́ Бо́га моего́, и моея́ ско́рби утеше́ние.

Сла́ва И ны́не, гла́с 8:

Си́лою Боже́ственною от прича́стия Пречи́стых Та́инств обо́лкся, небоя́зненно предста́л еси́ беззако́нному суди́щу, и Христа́ име́я в себе́ глаго́люща, дерзнове́нно изобличи́л еси́ злоиме́нное нече́стие, в со́нмище мно́гих мучи́телей, от ни́хже а́бие во главу́ усе́чен бы́в, со Христо́м совокупи́лся еси́, Ону́фрие, и живе́ши с Ни́м ве́чно; сла́ва Его́ бла́гости. Но, о Бо́лгарская похвало́ и Афо́нское украше́ние, я́ко име́я к Нему́ дерзнове́ние, не преста́й моля́ся о ро́де твое́м и все́х восхваля́ющих тя́.

Молитва

О святы́й уго́дниче Бо́жий, му́чениче Ону́фрие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.