17 января.
Канон Собору святых седмидесяти апостолов.
![Собору святых седмидесяти апостолов Собору святых седмидесяти апостолов](img_i/041.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 3:
Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.
Стихи́ра, гла́с 3:
Во всю́ зе́млю пропове́дников веща́ние изы́де боже́ственное, уча́щее правосла́вно о Еди́ном Существе́, Еди́но Естество́ почита́ти Святы́я Тро́ицы, и еди́но вои́стинну госпо́дство, и еди́но Ца́рство во вся́ ве́ки.
Пе́рвый кано́н апо́столов, гла́с 4.
Пе́снь 1.
Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Святи́и апо́столи, моли́те Бо́га о на́с.
Христо́вы ученицы́ бы́вше, на́с ра́ди ве́щию теле́сною Явльшагося, всехва́льнии, просвети́сте ми́р ве́сь заре́ю благоче́стия, тму́ разори́вше безбо́жия.
Святи́и апо́столи, моли́те Бо́га о на́с.
Тле́нных оста́вльше оскверне́нное и нестоя́нное, Христу́ после́доваша Кри́сп, и Про́хор, и Андрони́к, Фадде́й и Никано́р, свети́льницы бы́вше богови́днейшии.
Святи́и апо́столи, моли́те Бо́га о на́с.
Кре́пость губи́теля победи́сте, сла́внии, кре́постию Ду́ха, неи́стовством же безбо́жия коне́чне осла́бленныя кре́пости испо́лнисте и боже́ственнаго разуме́ния.
Святи́и апо́столи, моли́те Бо́га о на́с.
Пло́тию я́вльшагося Го́спода Ампли́й пропове́да, Стахи́й и Фили́пп, я́ко апо́столи, я́ко боже́ственнии иера́рси, я́ко вои́стинну служи́телие су́щих па́че ума́.
Пресвята́я Богоро́дице, спаси́ на́с.
Богородичен: Боже́ственную Пала́ту Царе́ву почти́м, в Ню́же всели́ся, я́коже восхоте́, Неискусому́жную и еди́ну Богоро́дицу, Ея́же ра́ди обожи́хомся, воспесносло́вим.
Вторы́й кано́н апо́столом.
Святы́й апо́столе Ага́ве, моли́ Бо́га о на́с.
Яви́лся еси́ иногда́, прозна́менуя Па́влу наве́ты, и у́зы, и озлобле́ния, апо́столе и проро́че Ага́ве, егда́ ру́ки твоя́ о́наго по́ясом связа́л еси́.
Святы́й апо́столе Аки́ло, моли́ Бо́га о на́с.
Тя́, ученика́ Па́влу, уве́девше, Аки́ло, ми́рови же свети́льника неле́стна и свяще́ннаго му́ченика, потреби́теля и́долов и ра́зума Бо́жия вводи́теля, благоче́стною мы́слию, богому́дре, ублажа́ем.
Святы́й апо́столе Ампли́е, моли́ Бо́га о на́с.
Кре́постию Боже́ственнаго укрепля́емь Ду́ха, живу́щия во тме́ сы́ны све́та показа́л еси́, Ампли́е апо́столе, соверша́я чуде́с дела́ пресла́вная и упражня́я де́монов полки́.
Святы́й апо́столе Ана́ние, моли́ Бо́га о на́с.
Дама́ск, апо́столе, ны́не о тебе́ хва́лится, ему́же упространи́л еси́ кре́пость муче́нием, Ана́ние, учи́тель бы́в Христа́ гоня́щему, я́ко учени́к наро́чит Христа́ гони́маго, к Нему́ же о на́с моли́ся.
Святы́й апо́столе Андрони́че, моли́ Бо́га о на́с.
Тя́, я́ко сро́дника, целу́ет Па́вел, пред ве́рными боже́ственныя твоея́ похвалы́ пропове́дая, Андрони́че богоглаго́ливе, световоди́телю восхваля́ющим тя́.
Святы́й апо́столе Апе́ллие, моли́ Бо́га о на́с.
Якоже многоце́нен ка́мень, имя́ше тя́ Иракли́йская честна́я Це́рковь, укрепля́юща, Апе́ллие блаже́нне, сию́ сло́вом Истины. Те́м досто́йно почита́ем тя́.
Святы́й апо́столе Аполло́се, моли́ Бо́га о на́с.
Еллинстии мудрецы́, твои́ми побежде́ны му́дрыми догма́ты, испове́дати покори́шася, прему́дре Аполло́се, Христа́ Соде́теля, Отца́ Безнача́льнаго Му́дрость и Си́лу.
Святы́й апо́столе Ариста́рше, моли́ Бо́га о на́с.
Прему́дрый и чу́дный Ариста́рх, я́ко учени́к Сло́ва и свяще́нный Па́влу спу́тник, свяще́нными пе́сньми да восхва́лится.
Святы́й апо́столе Аристову́ле, моли́ Бо́га о на́с.
Поте́кл еси́, я́коже звезда́ от восто́ка, устреми́вся, и Вретани́йския гра́ды дости́гл еси́, Христо́во пропове́дуя Ева́нгелие и просвеща́я благода́тию, блаже́нне Аристову́ле, ве́рно прие́млющия сло́во твое́.
Сла́ва, и ны́не, Богородичен: Яже апо́столов ра́дость, Богороди́тельнице Всенепоро́чная Влады́чице, я́ко Ма́ти бы́вши в те́х боголе́пно глаго́лавшему, с ни́миже моли́ся огня́ гее́нскаго изба́вити на́с.
Пе́снь 3.
Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.
Святи́и апо́столи, моли́те Бо́га о на́с.
Якоже ре́ки, ва́с Сло́во посла́ во всю́ зе́млю, наполня́ющия сию́, всему́дрии, напое́нии Боже́ственнаго Ду́ха и пла́мень отъе́млющия безбо́жия благода́тию.
Святи́и апо́столи, моли́те Бо́га о на́с.
Воспои́м Ти́мона боже́ственнаго, Си́лу же и Силуа́на и ве́рою восхва́лим Епене́та сла́внаго, и Урва́на, и Ага́ва, и́стинныя христопропове́дники.
Святи́и апо́столи, моли́те Бо́га о на́с.
Блаже́ни уже́ бы́вше, я́ко и́стинно блаже́ннаго Бо́га Учи́теля стяжа́вше, и́же пе́рвее окая́нныя, всему́дрии, прича́стники показа́сте Боже́ственнаго блаже́нства.
Пресвята́я Богоро́дице, спаси́ на́с.
Богородичен: Чиста́ пре́жде рождества́, и в рождестве́, и по рождестве́ вои́стинну Де́ва, Ма́ти, была́ еси́: Бо́га бо породила́ еси́, Его́же апо́столов сосло́вие пресве́тло пропове́да.
Ин кано́н.
Святы́й апо́столе Арте́мо, моли́ Бо́га о на́с.
Не́бо яви́лся еси́, все́м веща́я сла́ву спаси́тельную тебе́ просла́вльшаго и ученико́м сочета́вшаго седмодеся́тным, Арте́мо всебога́те.
Святы́й апо́столе Архи́ппе, моли́ Бо́га о на́с.
Па́влов учени́к бы́в, богоно́се, просвети́л еси́ лю́ди воспева́ти Тро́ицу, хра́мы же разори́л еси́ па́губныя благода́тию, пострада́в же терпели́вно, венцы́, ра́дуяся, прия́л еси́, о на́с моля́ся, блаже́нне Архи́ппе.
Святы́й апо́столе Асинкри́те, моли́ Бо́га о на́с.
Обре́те тя́, Асинкри́те, реку́, во́д испо́лнену Ирка́ния Ду́ха и, честны́ми напое́нии твои́ми напои́вшися, принесе́ Влады́це красне́йшая прозябе́ния.
Святы́й апо́столе Аха́ике, моли́ Бо́га о на́с.
Свяще́нныя соста́вим вси́ ли́ки, свяще́нно блажа́ще Аха́ика, вели́каго Христо́ва апо́стола, с ли́ки безпло́тными всегда́ веселя́щася.
Святы́й апо́столе Варна́во, моли́ Бо́га о на́с.
Апо́столе Спа́сов, Варна́во прехва́льне, прия́телище ве́ры, сы́не утеше́ния, тишино́ обурева́емых, непреста́нно в па́мяти твое́й дерзнове́ние име́я, моли́ в ми́ре сохрани́тися душа́м на́шим.
Святы́й апо́столе Га́ие, моли́ Бо́га о на́с.
Твоя́ похвалы́ Лука́ богогла́сный вои́стинну написа́, свяще́ннаго бо Па́вла учени́к и боже́ствен странново́дец бы́в, боже́ственным я́ве наказу́я, всече́стне Га́ие.
Святы́й апо́столе Ево́де, моли́ Бо́га о на́с.
Да сла́вит тя́, ученика́ Бо́жия, Ево́де, и иера́рха ве́рна, и свиде́теля Боже́ственных страда́ний, возглаша́ющи, честна́я Це́рковь Христо́ва: сла́ва си́ле Твое́й, Го́споди.
Святы́й апо́столе Епафра́се, моли́ Бо́га о на́с.
Яко верхо́внаго апо́столов бы́в учени́к, Па́вла му́драго благоглаго́ливаго, с те́м ра́дуешися, ве́чнующее насле́дуеши наслажде́ние, всеблаже́нне Епафра́се, Колосса́ев удобре́ние.
Святы́й апо́столе Епафроди́те, моли́ Бо́га о на́с.
С Па́влом, свети́льником вселе́нныя, пу́ть ше́ствуя мно́жицею, пути́ веду́щия, Епафроди́те, показа́л еси́ лю́дем ко благоче́стию.
Сла́ва, и ны́не, Богородичен: Апо́столов похвала́, страда́льцев удобре́ние Ты́ еси́, Пречи́стая Де́во, и ми́ра спасе́ние.
Седа́лен апо́столов, гла́с 3.
Столпи́ непоколеби́мии Це́ркве, основа́ния благоче́стия бы́вше, ученицы́ Бо́га на́шего, соблюди́те сию́ невре́дну, отгоня́юще льсти́ваго собла́зны и моля́ще Христа́ Бо́га всегда́ дарова́ти на́м ве́лию ми́лость.
Пе́снь 4.
Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.
Святи́и апо́столи, моли́те Бо́га о на́с.
Мо́ре возмути́ша язы́ческое, в сие́ вше́дше, всему́дрии, я́коже ко́ни, Спа́совы ученицы́ и ве́рныя спасо́ша водо́ю свято́ю и Ду́хом.
Святи́и апо́столи, моли́те Бо́га о на́с.
Облиста́ша, я́ко со́лнце на земли́, Пу́д, Апе́ллий и Филоло́г, и Ру́ф же и Патро́в и ве́рныя просвети́ша, от тмы́ неве́дения изба́вльше.
Святи́и апо́столи, моли́те Бо́га о на́с.
Напря́г, посла́ стре́лы вы́ я́ко изощре́нны Благоутро́бный, стре́лы, сокруша́юща вра́жия и лю́те уя́звленныя, сла́внии, благода́тию Бо́жиею исцеля́юща.
Святи́и апо́столи, моли́те Бо́га о на́с.
Хвалу́ принесе́м Изба́вителю, песносло́вяще Родио́на богоглаго́ливаго, и Ерми́я сла́внаго, и му́драго Асинкри́та, Ли́на же боже́ственнаго и Га́ия.
Пресвята́я Богоро́дице, спаси́ на́с.
Богородичен: Тя́ блаже́ннейший дре́вле ли́к проро́чествующих Ду́хом богоглаго́лании свяще́нными боголе́пно имену́ет, Всечи́стая, две́рь же и го́ру приосене́нную.
Ин кано́н.
Святы́й апо́столе Епене́те, моли́ Бо́га о на́с.
Похва́лим Епене́та сла́внаго, Карфаге́ном похвалу́ боже́ственну бы́вшу, и Сло́ва ученика́, и исцеле́ний исто́чника, и вели́ка пропове́дника су́щим па́че ума́, и ве́ры утвержде́ние.
Святы́й апо́столе Ера́сте, моли́ Бо́га о на́с.
Тя́, свяще́нна иконо́ма, Ера́сте, Це́ркве Христо́вы, су́щия во Иерусали́ме, пиша́, пропове́даше Па́вел апо́стол, с ни́миже тя́ почита́ем.
Святы́й апо́столе Ерме, моли́ Бо́га о на́с.
Яко звезда́, возсия́л еси́ вселе́нней, све́том просия́в со́лнца, блаже́нне Ерме, всесве́тлаго Па́вла, ми́ра просве́щшаго концы́, сего́ ра́ди почита́ем тя́.
Святы́й апо́столе Ерми́е, моли́ Бо́га о на́с.
Ерми́й пресла́вный Далма́тии бы́сть всея́ наста́вник и просвеще́ние: на сию́ бо, я́ко со́лнце многосве́тло, на́йде, творя́ ди́вная и просвеща́я сердца́, неви́дящая пе́рвее.
Святы́й апо́столе Зи́но, моли́ Бо́га о на́с.
Зако́на но́ваго яви́лся еси́, Зи́но, возвести́тель, ве́тхаго беззако́ния отводя́ чуждему́дренныя и к возновле́нию жи́зни преводя́ зову́щия: сла́ва си́ле Твое́й, Го́споди.
Святы́й апо́столе Иродио́не, моли́ Бо́га о на́с.
Гра́д Па́трский граждани́ном тобо́ю вели́ким обогати́ся, блаже́нне Иродио́не, вои́стинну, к Сио́ну вы́шнему приводя́ща си́й в пра́вду, те́мже почита́ем тя́ боже́ственными песнопе́ньми.
Святы́й апо́столе Иа́кове, моли́ Бо́га о на́с.
Началопа́стыря Христа́ бра́т бы́л еси́ и прее́мник и во апо́столех знамени́т, е́же за Того́ умре́ти возлюби́л еси́ и муче́ния не устыде́лся еси́, Иа́кове сла́вне, Того́ моли́ непреста́нно спасти́ ду́ши на́ша.
Святы́й апо́столе Иоа́нне, моли́ Бо́га о на́с.
Всеблаже́нне Иоа́нне-Ма́рко, самови́дец бы́в Христа́ Спа́са и дея́ния Того́ я́ве пропове́дал еси́ лю́дем, во тме́ седя́щим, Его́же с ю́жиком твои́м, сла́вным апо́столом Варна́вою, моли́ спасти́ся душа́м на́шим.
Святы́й апо́столе Иа́соне, моли́ Бо́га о на́с.
Иа́сон, богодухнове́нный апо́стол, ле́ствица бы́сть, до небе́с дося́жущая, ве́рныя возводя́щая уче́нием к небе́сней жи́зни, живе́т же по кончи́не и предстои́т, ра́дуяся, Тро́ице сла́вней, того́ моли́твами, Го́споди, все́м пода́ждь ве́лию ми́лость.
Сла́ва, и ны́не, Богородичен: Де́ва Пречи́стая, Де́ва Непоро́чная, со апо́столы о на́с моли́тву сотвори́, я́ко да изба́вимся от лю́тых искуше́ний и бе́д.
Пе́снь 5
Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.
Святи́и апо́столи, моли́те Бо́га о на́с.
Вяза́ти же, всехва́льнии, и реши́ти я́ко апо́столи прии́мше вы́ вла́сть, свя́занныя злове́рия у́зами разреши́сте, те́мже ва́шу па́мять пра́зднуем, ве́рно лику́юще.
Святи́и апо́столи, моли́те Бо́га о на́с.
Боже́ственными Ариста́рх да почти́тся песнопе́ньми, Те́ртий, Иа́ссон и Сосфе́н, и Ма́рк, Лука́, Сосипа́тр, Куа́рт и боже́ственный Апе́ллий, Кли́м и Епафроди́т и всему́дрый Ера́ст.
Святи́и апо́столи, моли́те Бо́га о на́с.
Ва́с, я́ко двана́десять, посла́ Госпо́дь, все́ искореня́ющия безбо́жие, все́м челове́ком насажда́ющия зна́ние Боже́ственное све́тло, сла́внии апо́столи, моли́твенницы о душа́х на́ших.
Пресвята́я Богоро́дице, спаси́ на́с.
Богородичен: Очи просвети́, Де́во, се́рдца моего́, осия́й ми́ зарю́ покая́ния, тмы́ мя́ изба́ви ве́чнующия, две́ре Све́та, христиа́н все́х Прибе́жище, ве́рно воспева́ющих Тя́.
Ин кано́н.
Святы́й апо́столе Иу́до, моли́ Бо́га о на́с.
Таи́нниче небе́сных, Иу́до всему́дре, учениче́ Спа́сов и о́бщниче и́стинныя жи́зни, язы́к мо́й подви́гни и сло́во упра́ви на пе́ние твое́, всеблаже́нне.
Святы́й апо́столе Иу́сте, моли́ Бо́га о на́с.
Ви́дев со сла́вою Бо́га восходя́ща с пло́тию в вы́шняя, седми́десятим, Иу́сте, ученико́м соприче́лся еси́, изше́л еси́ вку́пе с ни́ми, пропове́дник боже́ствен явля́яся.
Святы́й апо́столе Ка́рпе, моли́ Бо́га о на́с.
Освяти́л еси́, Ка́рпе, ше́ствуя, зе́млю, и свято́е пропове́дал еси́ Ева́нгелие ве́рою, и ду́ши живода́тельному Сло́ву приве́л еси́. Те́мже тебе́ да́рует насле́дие небе́сное.
Святы́й апо́столе Клео́по, моли́ Бо́га о на́с.
Путеше́ствовав ты́ по воста́нии, Клео́по всесвяще́нне, с Луко́ю про́чее во Еммау́с, вопроше́ние творя́щу ти́, предста́ Госпо́дь, о́бразом прикрове́н, а́бие же прие́м хле́ба пода́ние, позна́л еси́ Спа́са, Его́же моли́ дарова́ти на́м ве́лию ми́лость.
Святы́й апо́столе Кли́менте, моли́ Бо́га о на́с.
Други́й Моисе́й, Кли́менте му́дре, бы́л еси́, зако́ны Боже́ственныя все́м излага́я и свяще́нная пиша́ уче́ния, и церко́вное все́ вчиня́еши исполне́ние, отсю́ду законополо́жника тя́ и учи́теля вси́ иму́ще, ве́рою чти́м.
Святы́й апо́столе Кодра́те, моли́ Бо́га о на́с.
Укра́шен ра́зумом, кра́сному Влады́це предстои́ши, светле́йш при́сно, я́ко иера́рх богоприя́тен, я́ко апо́стол боже́ствен, со все́ми апо́столы и́стинно ми́р ми́ру, Кодра́те, испроша́я.
Святы́й апо́столе Кри́скенте, моли́ Бо́га о на́с.
Вжили́в тво́й Христо́с по́мысл, Кри́скенте прему́дре, пома́занием ра́дования, Халкидо́на первопа́стыря, я́ко сего́ ученика́, благоче́стно показа́, заблужде́нным стезю́ показу́ющаго.
Святы́й апо́столе Кри́спе, моли́ Бо́га о на́с.
Пе́т бу́ди, Кри́сп, пе́сньми боже́ственными, сокрове́нныя пути́ Христо́вы показа́вый, и осуди́вый пло́тию свое́ю осужде́нный гре́х, и мно́ги неосужде́нны показа́вый.
Сла́ва, и ны́не, Богородичен: Све́том Твои́м озари́ мя, во тме́ лежа́ща, Све́та жили́ще, и со апо́столы моли́ся, Пренепоро́чная, от вся́кия ну́жды изба́вити мя́ Твои́ми моли́твами.
Пе́снь 6.
Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Святи́и апо́столи, моли́те Бо́га о на́с.
В ве́сь ми́р кропите́ во́ду жи́зни спаси́тельную, о́блацы одушевле́ннии я́вльшеся, апо́столи, и ве́рных сердца́ ороси́сте.
Святи́и апо́столи, моли́те Бо́га о на́с.
Глаго́л Боже́ственных си́ла ва́ша ри́торов победи́ мно́гую лю́тость и нему́дрыя умудри́, объюроде́вшия ра́зумом пре́лести, всему́дрии.
Святи́и апо́столи, моли́те Бо́га о на́с.
Боже́ственный Пу́д и Трофи́м, Филимо́н сла́вный и Ариста́рх, Ониси́фор же и Тихи́к всеизря́днейший, я́ко ученицы́ Сло́ва да возвели́чатся.
Пресвята́я Богоро́дице, спаси́ на́с.
Богородичен: Пою́ Тя́, еди́на Всепе́тая, сла́влю Тя́, при́сно Богосла́вная, и блажу́ Тя, Юже ро́ди блажа́т родо́в, Де́во Богоблаже́нная.
Ин кано́н апо́столов.
Святы́й апо́столе Ли́не, моли́ Бо́га о на́с.
От Петра́ боже́ственнаго, апо́столов верхо́внаго, научи́вся и от него́ навы́к боже́ственное зна́ние, апо́столе Ли́не, и́дольскую ле́сть обличи́л еси́.
Святы́й апо́столе и евангели́сте Луко́, моли́ Бо́га о на́с.
Христо́ва ученика́, Ева́нгелия списа́теля мудре́йша, сосу́да избра́нна кра́сна, о́браз одушевле́н, ве́рнии, его́же во все́х Це́рквах похвала́, Луку́ апо́стола в пе́снех почти́м: то́й бо пропове́да Бо́жия пресла́вная чудеса́, просвети́в я́же на земли́, богосло́вия луча́ми, бла́гости ра́ди.
Святы́й апо́столе Луки́е, моли́ Бо́га о на́с.
Па́влу спу́тник избра́вся, Луки́й всеблаже́нный, язы́ки улови́л еси́ мре́жею, богоглаго́льниче, догма́тов твои́х.
Святы́й апо́столе и евангели́сте Ма́рко, моли́ Бо́га о на́с.
Богогла́сных слове́с написа́теля, ве́рнии, и Еги́пта вели́каго наста́вника, досто́йно воспое́м, вопию́ще: Ма́рко му́дре, уче́нии и моли́твами твои́ми к невла́емому житию́ наставля́ти все́х на́с не преста́й, Христо́в учениче́ и евангели́сте.
Святы́й апо́столе Матфи́е, моли́ Бо́га о на́с.
Ученико́в двоенадеся́тых яви́лся еси́, исполня́я ли́к блаже́нный, из него́же преда́тель себе́ отве́рг, на Христа́ воздви́г пя́ту, тайновеща́телю Матфи́е чу́дне.
Святы́й апо́столе Нарки́ссе, моли́ Бо́га о на́с.
Ми́лости води́теля Бо́га пропове́дал еси́ и ле́сти свободи́л еси́, боже́ственный Нарки́ссе, ду́ши благочести́вых, вели́ких бы́в Афи́нян председа́тель и насади́тель садо́в кра́сных, богоблаже́нне.
Святы́й апо́столе Никано́ре, моли́ Бо́га о на́с.
Че́сть боже́ственну насле́довал еси́, Никано́ре блаже́нне, заколе́н бы́в, я́ко овча́, со двема́ ты́сящами, на Христа́ упова́ющими, в о́ньже сконча́ся де́нь Стефа́н первострада́лец.
Святы́й апо́столе Оли́мпе, моли́ Бо́га о на́с.
Да похва́лится боже́ственный Оли́мп песнопе́ньми и Родио́н с ни́м да возвели́чится благоче́стно, тече́ние соверши́вше муче́ния с Петро́м богопропове́дником в Ри́ме, глава́ми отсека́еми.
Святы́й апо́столе Они́симе, моли́ Бо́га о на́с.
Вре́менныя, Они́симе, отреши́вся рабо́ты, бы́л еси́ ра́б Христа́ Бо́га и сосу́д благопотре́бен. Те́мже порабоще́нныя враго́м свобо́дны показа́л еси́ боже́ственным сло́вом и небе́сныя гра́жданы сотвори́в, с ни́миже свяще́нную твою́ па́мять ве́рно сла́вим.
Сла́ва, и ны́не, Богородичен: Не осуди́ мене́ и не отве́ржи мя́ от лица́ Твоего́, Многоми́лостиве, мо́лит Тя́ чи́сто Ро́ждшая со святы́ми апо́столами.
Конда́к апо́столов, гла́с 2.
Христо́вых ученико́в ли́к се́дмьдесят боже́ственно, ве́рнии, в пе́снех восхва́лим, те́ми бо вси́ навыко́хом Тро́ицу почита́ти Неразде́льную, и пребыва́ют свети́льницы боже́ственныя ве́ры.
Икос:
Се́дмьдесяти апо́столов ли́к согла́сно, ве́рнии, свяще́нными песнопе́ньми да восхва́лим: Стефа́на, Про́хора же, и Си́лу, и Никано́ра, Ти́мона, и Ампли́я, и Парме́на, Апе́ллия же, Иа́кова, Фили́ппа, Ариста́рха, и Ма́рка, и Матфи́я, и Иродио́на, Кри́скента и Фле́гонта, Варна́ву, Ли́на и Оли́мпа, Ана́нию, Луку́ и Асинкри́та и про́чия, пребыва́ют бо свети́льницы боже́ственныя ве́ры.
Пе́снь 7.
Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.
Святи́и апо́столи, моли́те Бо́га о на́с.
Улови́вше сло́вом, извлеко́сте из глубины́ безбо́жия язы́ки многоразсе́янныя, зна́меньми и чудесы́ утверди́вше мудрова́ния си́х, му́дрии апо́столи, путевожди́ заблу́ждших.
Святи́и апо́столи, моли́те Бо́га о на́с.
Вше́дше в приста́нище тиша́йшее, волну́ющимся в мо́ри лю́тых спаси́телие яви́стеся и прави́телие му́дрии, воспева́юще: отце́в Госпо́дь и Бо́г, благослове́н еси́.
Святи́и апо́столи, моли́те Бо́га о на́с.
Вси́ Ево́да и Ка́рпа ублажи́м, и Тихи́ка, и Иу́ста и Арте́му, Зи́ну же сла́внаго, я́ко Христо́вы ученики́, воспева́юще: отце́в Госпо́дь и Бо́г, благослове́н еси́.
Святи́и апо́столи, моли́те Бо́га о на́с.
Молниезра́чнии Ду́хом бы́вше, Христо́вы апо́столи, одержи́мыя но́щию неве́дения изба́висте и к Све́ту жи́зни наста́висте, вопию́щия всегда́: Бо́же, благослове́н еси́.
Пресвята́я Богоро́дице, спаси́ на́с.
Богородичен: Очисти́лище, Всенепоро́чная, была́ еси́ греша́щих при́сно, ро́ждши преесте́ственно ми́ра взе́млющаго гре́х Христа́, Ему́же зове́м: отце́в Госпо́дь и Бо́г, благослове́н еси́.
Ин кано́н апо́столов.
Святы́й апо́столе Ониси́форе, моли́ Бо́га о на́с.
Па́вел, похвала́ми свяще́нными похваля́я тя́, Ониси́форе сла́вне, свои́на тя́, свя́те, написа́, соверши́теля Боже́ственных дея́ний, служа́ща ему́ и ве́рою пою́ща: благослови́те, вся́ дела́ Госпо́дня, Го́спода.
Святы́й апо́столе Парме́не, моли́ Бо́га о на́с.
Вели́кий Парме́на пред очи́ма апо́столов у́спе, соверши́в со тща́нием те́плым боже́ственное служе́ние.
Святы́й апо́столе Патро́ве, моли́ Бо́га о на́с.
Тво́й апо́стол Патро́в, Бла́же, плотско́е Твое́ к челове́ком прише́ствие пропове́да, заблу́ждшия к позна́нию наставля́я и просвеща́я заре́ю ве́ры.
Святы́й апо́столе Про́хоре, моли́ Бо́га о на́с.
Служа́й по благода́ти Ева́нгелию, Никомиди́и бы́л еси́, Про́хоре преблаже́нне, изря́ден учи́тель и боже́ственный первопресто́льник, ста́ду Христо́ву предста́тельствуя.
Святы́й апо́столе Пу́де, моли́ Бо́га о на́с.
Свяще́ннейший Пу́д и сла́вный, му́дрый Ариста́рх с Трофи́мом, я́ко зве́зды светоза́рныя, возсия́ша на земли́, пре́лести омраче́ние отгоня́ще.
Святы́й апо́столе Ру́фе, моли́ Бо́га о на́с.
Сло́вом твои́м боже́ственным обнови́в, Ру́фе му́дре, сердца́, насе́яв спаси́тельная уче́ния, и многопло́ден кла́с спа́сшихся пожа́л еси́ спасе́ние.
Святы́й апо́столе Си́ло, моли́ Бо́га о на́с.
Ве́лиими благода́тьми украша́емь, ше́ствовал еси́ от восто́ка до за́пада, я́коже заря́, с Па́влом, Си́ло прему́дре, светоза́рная со́лнцу су́щи, язы́ков сердца́ просвети́сте.
Святы́й апо́столе Силуа́не, моли́ Бо́га о на́с.
Проза́рнаго и пресве́тлаго сосу́да Уте́шителева, заблу́ждших наставле́ние, Селу́ня пресла́вную похвалу́, апо́столов удобре́ние, ны́не Силуа́на му́драго восхва́лим.
Святы́й апо́столе Симео́не, моли́ Бо́га о на́с.
Си́монъ-Симео́н, сугу́бо зва́ние име́л еси́, сугу́бо естество́м су́щее сло́во пред безбо́жными богосло́вив и кресту́ прибли́жився. Те́мже тя́ вси́, соше́дшеся, ублажа́ем.
Святы́й апо́столе Сосипа́тре, моли́ Бо́га о на́с.
Дне́сь весели́тся вся́ Христо́ва Це́рковь, пра́зднственную ра́дость духо́вно соста́вльши в па́мяти твое́й, ю́же непоколебле́ну спаси́ твои́ми к Спа́су и Бо́гу благоприя́тными моли́твами, Сосипа́тре свяще́ннейше.
Сла́ва, и ны́не, Богородичен: Ми́лостивая Богоро́дице, апо́столов похвало́, и страстоте́рпцев сла́ва, и ве́рных утвержде́ние, разори́, молю́ся, наве́ты лука́ваго и изба́ви мя́ ве́чнаго осужде́ния.
Пе́снь 8.
Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.
Святи́и апо́столи, моли́те Бо́га о на́с.
Обно́вльше ра́зумы олядене́вшия ра́лом Сло́ва, всесла́внии, и в ни́х спаси́тельная се́мена насе́ясте, и благоче́стия кла́с стори́чный пожа́сте — спа́сшихся мно́жество, Госпо́дни апо́столи всему́дрии.
Святи́и апо́столи, моли́те Бо́га о на́с.
Похвала́ми Иа́кова боже́ственными, Клео́пу, Варна́ву же и Стефа́на, Нарки́сса всему́драго, Ма́рка, Аристову́ла и Апе́ллия почти́м, апо́столы Христо́вы, вопию́ще: Го́спода по́йте, дела́, и превозноси́те во вся́ ве́ки.
Святи́и апо́столи, моли́те Бо́га о на́с.
Кре́ст вме́сто броня́ нося́ще, ко все́м му́жески ополчи́стеся полко́м зми́я, всему́дрии апо́столи, и, ты́я погуби́вше, я́же плени́ челове́ки, улови́сте ве́рою, и Жизнода́вцу приведо́сте Влады́це.
Пресвята́я Богоро́дице, спаси́ на́с.
Богородичен: О, чу́до вы́шше чуде́с! Ка́ко ражда́еши и пребыва́еши де́вствующи, Всечи́стая Богоневе́сто? Сло́во бо родила́ еси́, Отцу́ Собезнача́льное, Ему́же вси́ пое́м: Го́спода по́йте, дела́, и превозноси́те во вся́ ве́ки.
Ин кано́н апо́столов.
Святы́й апо́столе Сосфе́не, моли́ Бо́га о на́с.
Учени́к бы́в Па́влу, прему́дрому священнопропове́днику, подо́бник же Христу́, сла́вне Сосфе́не, Того́ повину́яся Боже́ственным манове́нием.
Святы́й апо́столе, первому́чениче и архидиа́конеСтефа́не, моли́ Бо́га о на́с.
Яко пе́рвый в диа́конех, пе́рвый и в му́ченицех показа́лся еси́, всесвяты́й Стефа́не, пу́ть бо бы́л еси́ и мно́ги Го́споду приве́л еси́. Те́м не́бо тебе́ отве́рзеся, и Бо́г тебе́ яви́ся, Того́ моли́ спасти́ся душа́м на́шим.
Святы́й апо́столе Те́ртие, моли́ Бо́га о на́с.
Священноде́йствуя свяще́нное Ева́нгелие, сия́нии Ду́ха ду́ши просвети́л еси́, изба́вив от тмы́ идолонеи́стовства, Те́ртие апо́столе.
Святы́й апо́столе Ти́моне, моли́ Бо́га о на́с.
Ти́мон свяще́нный, па́стырь Во́стряном бы́в, прия́т муче́ния блаже́нную кончи́ну, огне́м сожига́емь.
Святы́й апо́столе Тимофе́е, моли́ Бо́га о на́с.
Боже́ственными дарова́нии укра́шен, удобри́л еси́, сла́вне, Ефе́сскую све́тлую митропо́лию, апо́столе Тимофе́е, пропове́дник бо показа́лся еси́ с Па́влом боже́ственным все́м, провозвести́л еси́ спаси́тельное сло́во. Те́мже торжеству́ем ве́рою па́мять твою́.
Святы́й апо́столе Ти́те, моли́ Бо́га о на́с.
Па́влов яви́ся собесе́дник, апо́столе, с ни́м на́м сло́во предвозвести́л еси́ Боже́ственныя благода́ти, тайноглаго́льниче Ти́те приснопа́мятне. Сего́ ра́ди вопие́м ти́: не преста́й моля́ся о все́х на́с.
Святы́й апо́столе Тихи́ке, моли́ Бо́га о на́с.
Па́влу, му́дрому наста́внику, в посла́ниях служа́ боже́ственных, апо́стол Тихи́к спаси́тельная уче́ния все́м раздаде́ спаса́емым.
Святы́й апо́столе Трофи́ме, моли́ Бо́га о на́с.
Су́ще с Па́влом сла́вным, Трофи́ме прему́дре, с ни́м ве́сь ми́р, я́ко звезда́ с со́лнцем, проидо́сте, све́том пропове́дания свяще́ннаго неве́дения тму́ отгоня́ще.
Сла́ва, и ны́не, Богородичен: Со святы́ми Ангелы, с боже́ственными апо́столы, с сла́вными му́ченики Твоего́ моли́ Сы́на и Бо́га, Богороди́тельнице Пречи́стая, от бе́д изба́вити ду́ши на́ша.
Песнь 9
Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.
Святи́и апо́столи, моли́те Бо́га о на́с.
Исцели́ на́ша, Христе́, сокруше́ния серде́чная моли́твами возлюби́вших Тя́ и пропове́давших во все́х язы́цех Бо́га ку́пно и Го́спода, Соде́теля все́х, и и́дольское все́ омраче́ние отгна́вших све́том пропове́дания.
Святи́и апо́столи, моли́те Бо́га о на́с.
Якоже мо́лния, ми́р освети́ша Лука́ вку́пе и Ерм, Ма́рк и Ана́ния и с Матфи́ем свяще́нный Оли́мп и ве́рных исполне́ние я́ве просвети́ша, я́же ве́рою дне́сь почти́м свяще́нными и честны́ми песнопе́ньми.
Святи́и апо́столи, моли́те Бо́га о на́с.
Ста́нем благогове́йно в дому́ Бо́га на́шего и ублажи́м священнопропове́дники и учи́тели, и ангелому́дрыя, и богати́тели, спаси́тели же, и защи́тники, и предста́тели все́х су́щия, чту́щих и́х па́мяти.
Святи́и апо́столи, моли́те Бо́га о на́с.
Озари́шася све́том невеще́ственным Ду́ха Аки́ла, Аха́ик, Луки́й сла́вный и Фуртуна́т с шестию́десять и шестию́ Христо́выми уго́дники и свяще́нными ученики́ и сердца́ все́х озаря́ют светоно́сною и́х па́мятию дне́сь.
Пресвята́я Богоро́дице, спаси́ на́с.
Богородичен: Сия́ние блиста́ния Рождества́ Твоего́ просия́, и уясни́ всю́ подсо́лнечную, и предста́теля тмы́ погуби́, Богороди́тельнице Всечи́стая, Ангелов хвало́ и челове́ков все́х спасе́ние, непреста́нными гла́сы восхваля́ющих Тя́.
Ин кано́н апо́столов.
Святы́й апо́столе Урва́не, моли́ Бо́га о на́с.
Боже́ственный Урва́н, сло́во жизното́чное и благода́ть врачева́ний источи́в, привлече́ лю́ди к просвеще́нию боже́ственнаго ра́зума, я́ко подража́тель Воплоти́вшагося и ми́р Спа́сшаго.
Святы́й апо́столе Филимо́не, моли́ Бо́га о на́с.
Гра́д тя́ Га́зский почита́ет, све́т позна́ния, блаже́нне, тобо́ю узре́в. Колосса́е же, боже́ственное твое́ те́ло, я́коже бога́тство, иму́ще, объе́млют врачева́ния и источа́ющу благода́ть всегда́. Те́мже, соверша́ющии па́мять твою́, сохраня́емся от бе́д, Филимо́не сла́вне, моли́твами твои́ми.
Святы́й апо́столе Фили́ппе, моли́ Бо́га о на́с.
В Самари́и дре́вле живу́щии, Фили́ппе, благода́ти зарю́ от тебе́ прие́млют, ви́дяще мно́гая содева́юща тя́ чудеса́ си́лою Ду́ха, Исто́чника благода́тнаго.
Святы́й апо́столе Филоло́ге, моли́ Бо́га о на́с.
Яко учени́к Христо́в, я́ко апо́стол све́тел, я́ко Со́лнца пра́вды светови́дная, апо́столе святы́й, просвети́ и освяти́ соверша́ющия святу́ю па́мять твою́.
Святы́й апо́столе Фле́гонте, моли́ Бо́га о на́с.
Марафо́нстии жи́тели, предста́теля тя́ велича́йша, и учи́теля тя́ изря́дна, и свети́льника, и наста́вника иму́ще, Фле́гонте сла́вне, почита́ют тя́ непреста́нно.
Святы́й апо́столе Фуртуна́те, моли́ Бо́га о на́с.
Ве́рою па́мять твою́ соверша́юще, апо́столе, моли́твенника ко Влады́це тя́ предлага́ем, разреше́ние прося́ще согреше́ний, твои́м хода́тайством, Фуртуна́те всече́стне.
Святы́й апо́столе Фадде́е, моли́ Бо́га о на́с.
Влады́ки Боже́ственное нося́, блаже́нне Фадде́е, подо́бие, Еде́сскому кня́зю Авгарю боже́ственный вра́чь бы́л еси́.
Святи́и апо́столи, моли́те Бо́га о на́с.
Священнонача́льницы Диони́сий Ареопаги́т и ди́вный Иерофе́й да причту́тся к ли́ку Христо́вых апо́столов, с ни́миже да просла́вятся Мано́ил, дре́вний учени́к, Ни́рей, и Нимфа́н, и Нафана́ил, и Дими́трий, его́же похвала́ во Ева́нгелии.
Сла́ва, и ны́не, Богородичен: Со святы́ми Ангелы, с боже́ственными апо́столы и со сла́вными му́ченики Твоего́ моли́ Сы́на и Бо́га, Богороди́тельнице Пречи́стая, от бе́д изба́вити ду́ши на́ша.
Свети́лен апо́столов.
Апо́столи всехва́льнии Христа́ всеще́драго, и ученицы́, и богови́дцы, не премолчи́те, моля́ще о на́с, любо́вию ва́шу па́мять соверша́ющих, да прегреше́ний оставле́ние и Боже́ственную обря́щем благода́ть в де́нь Суда́.
Сла́ва И ны́не, гла́с 4:
Яви́ся апо́стольский честны́й се́й пра́здник, просвеща́я на́с и грехо́вную мглу́ прогоня́я, зову́щим: яви́ся Све́т, и прии́де избавле́ние.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Собору святых седмидесяти апостолов Собору святых седмидесяти апостолов](img_b/041.jpg)