16 января.
Канон мученику Гордию Каппадокийскому.
![Святому мученику Гордию Каппадокийскому Святому мученику Гордию Каппадокийскому](img_i/039.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь му́ченика, гла́с 4:
Му́ченик Тво́й, Го́споди, Горди́й, во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.
Кано́н му́ченика. Гла́с 8.
Пе́снь 1.
Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.
Припев: Святый мучениче Гордие, моли Бога о нас.
Свиде́тель и́стины, Горди́е всеблаже́нне, познава́емь, светоно́сную мне́ благода́ть с небесе́ пода́ждь моли́твами твои́ми.
Припев: Святый мучениче Гордие, моли Бога о нас.
Пои́м Го́сподеви, страстоте́рпца укре́пльшему на противобо́рныя и венце́м побе́ды украси́вшему.
Сла́ва Отцу́ и Сы́ну и Свято́му Ду́ху:
Си́лою и всеору́жием все́х Царя́ укрепля́емь, мучи́телей низложи́л еси́ вражду́, всесла́вный Горди́е.
И ны́не и при́сно и во ве́ки веко́в. Ами́нь.
Богородичен: Воды́, теку́щия в безсме́ртие, яви́лася еси́ селе́ние, источа́ющаго все́м челове́ком жи́знь, Богоневе́сто.
Пе́снь 3.
Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че, Тебе́, Го́споди.
Припев: Святый мучениче Гордие, моли Бога о нас.
Теку́щих нестоя́тельное помышля́я и пребыва́ющих состоя́ние, му́чениче сла́вне, воспомина́я, блаже́нне, без стра́ха в суди́лище вше́л еси́ страда́ния.
Припев: Святый мучениче Гордие, моли Бога о нас.
Отступи́л еси́ привре́меннаго су́етства, и приложи́лся еси́, всебога́тне, при́сно пребыва́ющим, и, бе́гая от челове́к, Ангелом единокро́вник, богому́дре, бы́л еси́.
Сла́ва Отцу́ и Сы́ну и Свято́му Ду́ху:
Земна́я мудрова́ния оста́вив, жи́тельство небе́сное, му́чениче, обре́л еси́, зре́ти бо не терпя́ пре́лести шата́ния, в пусты́ню удали́лся еси́.
И ны́не и при́сно и во ве́ки веко́в. Ами́нь.
Богородичен: Не́сть непоро́чны, я́коже Ты́, Влады́чице, и не́сть пречи́сты, па́че Тебе́, Всенепоро́чная: во утро́бе бо Зижди́теля все́х вмести́ла еси́, Еди́наго Многоми́лостиваго.
Седа́лен гла́с 8.
Разже́гся любо́вию Иису́совою, самово́льным хоте́нием, му́чениче му́дре, усе́рдно на сме́рть себе́ преда́л еси́ и посреди́ суди́ща самозва́н ста́л еси́, вопия́ мучи́телем: се́ а́з приидо́х. Те́мже и ле́сть дерзнове́нием обличи́в, мече́м во главу́ усе́чен еси́, сла́вне, и к жи́зни безконе́чней преста́вился еси́, всехва́льне. Моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.
Пе́снь 4.
Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.
Припев: Святый мучениче Гордие, моли Бога о нас.
Рече́ния Христо́ва, всеблаже́нне, услы́шав, ра́дуяся, тле́нное оста́вил еси́ во́инство и Царю́ вво́инился еси́ Небе́сному, венцено́сче му́чениче Горди́е.
Припев: Святый мучениче Гордие, моли Бога о нас.
Сокруши́шася, му́чениче, го́ры мучи́телей, раста́яшася же хо́лми и́дольстии терпели́вным твои́м страда́нием, и со дерзнове́нием, венцено́сче, прибли́жившася.
Припев: Святый мучениче Гордие, моли Бога о нас.
Укрепи́лся еси́ креста́ Боже́ственною си́лою, собо́ру злочести́вому вопи́ти велегла́сно: не и́щущим обрето́хся, не вопроша́ющим, ны́не упова́в, явля́юся.
Сла́ва Отцу́ и Сы́ну и Свято́му Ду́ху:
Ве́сь на тя́, богому́дре, мучи́теля воздви́гл еси́ неудержи́мый гне́в, уди́вльшася, всеблаже́нне, умышле́нию и души́ твоея́ воста́нию.
И ны́не и при́сно и во ве́ки веко́в. Ами́нь.
Богородичен: Неве́сто Бо́жия, Мари́е Богоро́дице, изба́ви мя́ лю́тых прегреше́ний и бе́д и к ти́хому приста́нищу и спаси́тельному Твои́ми моли́твами наста́ви.
Пе́снь 5
Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.
Припев: Святый мучениче Гордие, моли Бога о нас.
Вше́д без стра́ха и до́блественне, я́ко ле́в, в позо́рище, я́коже ка́мение безду́шное, блаже́нне, вмени́л еси́ безу́мныя.
Припев: Святый мучениче Гордие, моли Бога о нас.
Нака́зан, му́чениче, богодохнове́ннаго писа́ния уче́нием, вся́ ко спасе́нию обре́л еси́ веду́щая, Горди́е.
Сла́ва Отцу́ и Сы́ну и Свято́му Ду́ху:
Разуме́в, богому́дре, тве́рдое твое́ мучи́тель противле́ние, я́коже о ка́мень волна́, твое́ю разсе́деся тве́рдостию.
И ны́не и при́сно и во ве́ки веко́в. Ами́нь.
Богородичен: Иже из Твоея́ утро́бы пресу́щественно, Де́во, Воплоща́яйся ми́р богоразу́мия заре́ю просвети́, Пречи́стая.
Пе́снь 6.
Ирмос: Якоже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся.
Припев: Святый мучениче Гордие, моли Бога о нас.
Священноде́йствуется же́ртва, и прия́тно приноше́ние Тебе́ прино́сится, иска́пая кро́вию, Горди́й, Влады́ко, во́льней стра́сти Твое́й подо́бяся.
Припев: Святый мучениче Гордие, моли Бога о нас.
Несмы́сленный умо́м тебе́ тле́нную обещава́ет сла́вицу, сла́вою нетле́нною, Горди́е, обога́щшемуся и безсме́ртное бога́тство сокры́вшему.
Сла́ва Отцу́ и Сы́ну и Свято́му Ду́ху:
Напра́влена упова́ния к Бо́гу име́я, прете́кл еси́ жития́ нестоя́тельное и, мече́м посека́емь, к простра́нней широте́ преше́л еси́.
И ны́не и при́сно и во ве́ки веко́в. Ами́нь.
Богородичен: Умерщвле́нный у́м мо́й страсте́й треволне́ньми возста́ви, Жи́знь Ве́чную, Христа́, Ро́ждшая, подаю́щаго все́м исцеле́ния.
Конда́к му́ченика, гла́с 8.
Твоя́ по́ты, пресла́вне, всю́ зе́млю напои́ша, и честны́ми кровьми́, Горди́е, ми́р ве́сь возвесели́л еси́. Моли́твами твои́ми, богому́дре, спаса́й вся́, ве́рою тя́ воспева́ющия и ублажа́ющия, вопию́щия пе́снь досто́йную, всехва́льне, я́ко многострада́лен.
Пе́снь 7.
Ирмос: Отроки ороси́вый в пещи́ и Де́ву сохрани́вый, ро́ждшую Тя́, по рождестве́, благослове́н еси́, Бо́же оте́ц на́ших.
Припев: Святый мучениче Гордие, моли Бога о нас.
Муче́ния сла́ву стяжа́в, со Ангелы лику́еши, венцено́сче, Христу́ взыва́я: благослове́н еси́, Го́споди Бо́же оте́ц на́ших.
Припев: Святый мучениче Гордие, моли Бога о нас.
Благочести́вое дерзнове́ние име́я, злочести́выя облича́еши, воспева́я велегла́сно: благослове́н еси́, Го́споди Бо́же оте́ц на́ших.
Сла́ва Отцу́ и Сы́ну и Свято́му Ду́ху:
Изба́витися прегреше́ний ны́не моли́ ве́рою чту́щим твою́ честну́ю па́мять и пою́щим велегла́сно: благослове́н Бо́г оте́ц на́ших.
И ны́не и при́сно и во ве́ки веко́в. Ами́нь.
Богородичен: Ядоме́тное те́рние греха́ исцеле́ний одожде́нием Твои́х отмыва́еши, Богороди́тельнице Благослове́нная Всечи́стая, Бо́га безсе́менно ро́ждшая.
Пе́снь 8.
Ирмос: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.
Припев: Святый мучениче Гордие, моли Бога о нас.
Возсле́дующая тебе́ благода́ть, неви́димо просве́щши, му́чениче, до́блести испо́лни, — благослови́те, — вопию́ща, — вся́ дела́ Госпо́дня, Го́спода.
Припев: Святый мучениче Гордие, моли Бога о нас.
Тече́нием ско́рым гоня́, страда́льче, к жела́емому концу́, Ца́рствия дости́гл еси́, зовы́й: благослови́те, дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху:
В непроходи́мыя ве́ки пребыва́ет му́чеников Твои́х сла́ва и безсме́ртное благохвале́ние: благослови́м Тя́, вся́ дела́, я́ко Го́спода.
И ны́не и при́сно и во ве́ки веко́в. Ами́нь.
Богородичен: Воплоще́нно Сло́во заче́нши, пе́рвее безпло́тное, Евину кля́тву дре́внюю отврати́ла еси́, Благослове́ние, Де́во, ми́ру ро́ждши.
Песнь 9
Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.
Припев: Святый мучениче Гордие, моли Бога о нас.
Ми́лостива бы́ти моли́ Влады́ку ве́рою тя́ чту́щим и тво́й светоно́сный и честны́й пра́здник соверша́ющим, Горди́е, му́чеников украше́ние.
Припев: Святый мучениче Гордие, моли Бога о нас.
Ны́не нетле́нныя пи́щи и боговиде́ния насыща́яся, Горди́е, и Све́та Невече́рняго, в жили́щах ве́чных прие́млеши припло́дия по́двигов твои́х.
Сла́ва Отцу́ и Сы́ну и Свято́му Ду́ху:
Сла́ву мимотеку́щую, и тле́нную, и попира́емую презре́в, богому́дре му́чениче, присносу́щныя ны́не сла́вы и ра́дости вои́стинну наслажда́ешися, престо́лу Влады́чнему предстоя́.
И ны́не и при́сно и во ве́ки веко́в. Ами́нь.
Богородичен: Яко спа́сшеся, Де́во, пе́рвыя кля́твы Твои́м Боже́ственным Рождество́м, досто́йно пою́ще, гла́сы немо́лчными вопие́м: ра́дуйся, Богоро́дице, наде́жда на́ша.
Молитва
О святы́й уго́дниче Бо́жий, му́чениче Гордие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому мученику Гордию Каппадокийскому Святому мученику Гордию Каппадокийскому](img_b/039.jpg)