15 января.

Канон святителю Сильвестру, папе Римскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь Сильве́стра, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ я́же веще́й Истина. Сего́ ра́ди стяжа́л еси́ смире́нием высо́кая, нището́ю бога́тая, о́тче Сильве́стре, моли́ Христа́ Бо́га спасти́ся душа́м на́шим.

Кано́н свята́го. Гла́с 8.

Пе́снь 1.

Ирмос: Посе́ченный несеко́маго пресече́, и ви́де со́лнце зе́млю, ю́же не ви́де; лю́таго врага́ вода́ потопи́, и непроходи́мое про́йде Изра́иль; пе́снь же воспева́шеся: Го́сподеви пои́м, сла́вно бо просла́вися.

Припев: Свяителю отче Сильвестре, моли Бога о нас.

Сыноположи́вся благода́тию, Сильве́стре, Бо́гу Отцу́, чи́сто житие́ облобыза́в, и Боже́ственными блиста́нии душе́ю светови́ден бы́в, преше́л еси́ к Све́ту, зовы́й, невече́рнему: Го́споду воспои́м, сла́вно бо просла́вися.

Припев: Свяителю отче Сильвестре, моли Бога о нас.

Велему́дренно стра́сти удержа́л еси́, и пло́ть по́стным житие́м повину́л еси́ ду́ху, му́дре, и Боже́ственное жили́ще Тро́ицы бы́в све́тло, лука́вствия ду́хи, Го́споду поя́, смири́л еси́, сла́вно бо просла́вися.

Припев: Свяителю отче Сильвестре, моли Бога о нас.

Зако́ну Боже́ственному Боже́ственне повину́яся, и Богодухнове́ннаго Писа́ния ра́зумом укра́шен, е́ллинския мудрецы́ и́стине наказа́л еси́ Христа́ испове́дати со Отце́м и Ду́хом, вопию́щия: Го́споду воспои́м, сла́вно бо просла́вися.

Сла́ва Отцу́ и Сы́ну и Свято́му Ду́ху:

Во Ипоста́си Еди́ней познава́ема, вопло́щшагося Христа́, блаже́нне, пропове́дал еси́, во дву́х во́лях и де́йствиих, Сильве́стре, разумева́ема и ве́рою Тому́ обожи́вша зову́щия: Го́споду воспои́м, сла́вно бо просла́вися.

И ны́не и при́сно и во ве́ки веко́в. Ами́нь.

Богородичен: Да ни́жния с вы́шними совокупи́т, Еди́ный все́х Бо́г, во чре́во Неискусобра́чныя вни́де, и в подо́бии пло́тстем яви́ся, вражды́ средогра́дие разо́рь, ми́р введе́, и жи́знь подаде́, и Боже́ственное избавле́ние.

Пе́снь 3.

Ирмос: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющим.

Припев: Свяителю отче Сильвестре, моли Бога о нас.

Ума́ чистоту́ стяжа́в, святи́тель бы́л еси́, пома́зание свя́то́е восприе́м. Те́м тя́, богоно́се о́тче, восхваля́ем.

Припев: Свяителю отче Сильвестре, моли Бога о нас.

На Кресте́ просте́ршаго дла́ни пло́тию Бо́га Сло́ва уясни́л еси́ слове́сными твои́ми показа́ньми и иуде́йское суровство́ погуби́л еси́, всебла́же́нне.

Сла́ва Отцу́ и Сы́ну и Свято́му Ду́ху:

В чудесе́х вели́к бы́в, отгоня́еши ду́хи и очища́еши неду́ги ве́рою прося́щим, Сильве́стре богому́дре.

И ны́не и при́сно и во ве́ки веко́в. Ами́нь.

Богородичен: Де́ва Чи́стая по Рождестве́, Всесвята́я пребыла́ еси́, Бо́га бо Сло́ва родила́ еси́, на́м уподо́бльшася кроме́ греха́.

Седа́лен, гла́с 8.

Река́ бла́гоче́стия яви́вся, уче́ний твои́х струя́ми всю́ зе́млю напои́л еси́, Сильве́стре, я́ко святи́тель боже́ственный, и чуде́с ту́чами страсте́й скве́рну омы́л еси́, и пи́щный пото́к досто́йно насле́довал еси́. Те́мже, соше́дшеся, благоче́стно тя́ чти́м пе́сньми дне́сь и ве́рно вопие́м ти́: моли́ Христа́ Бо́га прегреше́ний оставле́ние пода́ти чту́щим любо́вию свя́ту́ю па́мять твою́.

Сла́ва, и ны́не, гла́с то́йже.

Неви́димый Бо́же, Непостижи́мый Сло́ве, роди́лся еси́ от Отца́ па́че естества́ и сло́ва, па́ки же в после́дняя от Де́вы, не измени́в, е́же бе́, гряде́ши и во струя́х Иорда́нских ны́не крести́тися пло́тию, благоволи́вый спасти́, я́ко Бо́г, ро́д челове́ческий.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божcтво́.

Припев: Свяителю отче Сильвестре, моли Бога о нас.

Святи́тель богоприя́тен, помазу́я свяще́нники Боже́ственным Ду́хом, показа́лся еси́, о́тче Сильве́стре, и лю́ди просвеща́яй, свяще́ннейше.

Припев: Свяителю отче Сильвестре, моли Бога о нас.

Соде́йством Ду́ха неду́ги отгоня́я, стра́сти неисцельныя исцели́л еси́, пребога́те, обраща́я от ле́сти заблужде́нныя.

Припев: Свяителю отче Сильвестре, моли Бога о нас.

Ересе́й, Сильве́стре, ле́сть отгна́л еси́, па́ству упа́сл еси́ на вода́х бла́гоче́стия, на зла́це Боже́ственнаго позна́ния.

Сла́ва Отцу́ и Сы́ну и Свято́му Ду́ху:

Излия́ся во устна́х твои́х бла́года́ть Боже́ственнаго Ду́ха. Сего́ ра́ди тя́ свяще́нника лю́дем Свои́м Бо́г, всебла́же́нне о́тче, пома́за.

И ны́не и при́сно и во ве́ки веко́в. Ами́нь.

Богородичен: Исцели́, Отрокови́це, я́звы се́рдца моего́ и наведи́ души́ моея́ движе́ния к Бо́жиим, Де́во, хоте́нием.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Свяителю отче Сильвестре, моли Бога о нас.

Плете́ньми твои́х слове́с ве́сь разреши́л еси́ су́етен соу́з, и к Боже́ственней ве́ре ле́стию свя́занныя связа́л еси́, отверза́я, о́тче, си́х у́м прочита́нием писа́ний, святи́телю бла́же́нне.

Припев: Свяителю отче Сильвестре, моли Бога о нас.

Се́рдце твое́, о́тче, непоро́чно бы́сть во оправда́ниих о́бщаго Влады́ки, Его́же вожделе́в, пло́ть удержа́л еси́ и чуде́с бла́года́тию обога́щься, неду́ги исцеля́еши и душе́вныя лю́тыя я́звы.

Сла́ва Отцу́ и Сы́ну и Свято́му Ду́ху:

Беся́щаяся сердца́ неду́гом душегу́бным, лютыя е́реси го́рькаго Ма́нента ско́рыми лечба́ми слове́с твои́х, богоно́се, уста́вил еси́, я́ко вра́чь, бла́года́тию Боже́ственною Честны́м отгна́л еси́ Ду́хом.

И ны́не и при́сно и во ве́ки веко́в. Ами́нь.

Богородичен: Ра́дуйся, Еди́на, ро́ждшая Преси́льнаго, пло́тию обнища́вшаго. Ра́дуйся, па́дшаго ми́ра исправле́ние, Всенепоро́чная. Ра́дуйся, печа́ли разреше́ние. Ра́дуйся, ве́рных спасе́ние. Ра́дуйся, Престо́ле Бо́жий превысо́кий.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Свяителю отче Сильвестре, моли Бога о нас.

Неисхо́дна и в темни́це ве́чне затворе́нна соде́лал еси́ моли́твами твои́ми лука́ваго, погубля́ющаго за́вистию приходя́щия, бла́же́нне, зми́я, и я́ко две́ри же и я́ко вереи́, Креста́ зна́мение положи́в.

Припев: Свяителю отче Сильвестре, моли Бога о нас.

Глаго́л твои́х медото́чных веща́ние во вся́ческая изы́де, всебла́же́нне, и уче́ний в концы́ всея́ вселе́нныя сия́ние облиста́, чуде́с же све́тлость и де́л Боже́ственное показа́ние.

Сла́ва Отцу́ и Сы́ну и Свято́му Ду́ху:

Исцеле́ния и дарова́ния Боже́ственная ту́чами источа́я бога́тно Вседе́теля, святи́телю всеблаже́нне, и Всесвята́го всегда́ Ду́ха ве́рою тебе́ чи́стою приступа́ющия цели́ти бла́года́тию.

И ны́не и при́сно и во ве́ки веко́в. Ами́нь.

Богородичен: Разуме́вше богоглаго́ливии проро́цы та́инства Твоего́, Де́во, глубину́, проро́чески провозвести́ша сие́, наставля́еми Боже́ственным Ду́хом, и ны́не мы́, прера́достно сбытия зря́ще, ве́руем.

Конда́к свята́го, гла́с 4.

Во свяще́нницех свяще́нник яви́лся еси́ Царя́ и Бо́га, богоно́се, по́стником собесе́дник бы́в, отону́дуже сра́дуешися ны́не лико́м Ангельским, о́тче, веселя́ся в небе́сных, Сильве́стре, сла́вне па́стырю, спаса́й любо́вию соверша́ющия па́мять твою́.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Свяителю отче Сильвестре, моли Бога о нас.

Пра́ведник, я́коже фи́никс, в дому́ Госпо́дни, о́тче, процве́л еси́ плоды́ пра́вды, и́миже чту́щии тя́ пита́ются, пою́ще: отце́в на́ших Бо́же, бла́гослове́н еси́.

Припев: Свяителю отче Сильвестре, моли Бога о нас.

Кре́пкими твои́х слове́с явле́ньми обличи́л еси́ суему́дренники, неду́гующия неве́рием, и, ра́дуяся, пое́ши, пресла́вне Сильве́стре: отце́в на́ших Бо́же, бла́гослове́н еси́.

Припев: Свяителю отче Сильвестре, моли Бога о нас.

Пребыва́ет сла́ва во ве́ки твоя́, о́тче, и па́мять со все́ми пра́ведными, с ни́миже на́с, ве́рою пою́щих, помина́й: отце́в на́ших Бо́же, бла́гослове́н еси́.

Сла́ва Отцу́ и Сы́ну и Свято́му Ду́ху:

Сла́вный святи́тель, ду́хо́вною заре́ю просвеща́емь, тму́ зло́бы разори́ и вся́ пою́щия просвети́: отце́в на́ших Бо́же, бла́гослове́н еси́.

И ны́не и при́сно и во ве́ки веко́в. Ами́нь.

Богородичен: Пречу́дная Отрокови́це, Су́щаго пре́жде все́х веко́в родила́ еси́, на́м уподо́бльшагося за кра́йнее бла́гоутро́бие, да спасе́т пою́щия: отце́в на́ших Бо́же, бла́гослове́н еси́.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Свяителю отче Сильвестре, моли Бога о нас.

Еди́но естество́, о́тче, Еди́наго Божества́ богосло́вив, в Тре́х Ли́цех разумева́емаго, пе́л еси́ непреста́нно: благослови́те, вся́ дела́ Госпо́дня, Го́спода.

Припев: Свяителю отче Сильвестре, моли Бога о нас.

Истины, о́тче, и́стинен учи́тель наре́клся еси́, те́мже лжеиме́нныя льсти́ обличи́л еси́ ле́сть, поя́: благослови́те, вся́ дела́ Госпо́дня, Го́спода.

Припев: Свяителю отче Сильвестре, моли Бога о нас.

Верхо́вник яви́лся еси́ свяще́ннаго Собо́ра, священнотаи́нниче, и верхо́внаго ученико́в украси́л еси́ престо́л, вопия́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Доброде́тельми боже́ственными, о́тче, се́рдце твое́ удобри́л еси́, ве́сь украси́вся, и с вы́шними чи́нми, вопия́, совокупи́лся еси́: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Глаго́лом Твои́м боже́ственным после́дующе ро́ди челове́честии, ублажа́ем Тя́ Приснобла́же́нную, и воспева́ем: бла́гослови́те, вся́ дела́ Госпо́дня, Го́спода.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Свяителю отче Сильвестре, моли Бога о нас.

Свяще́нствовав усе́рдно самаго́ себе́, всеблаже́нне, сласте́й умерщвле́нием, и бы́л еси́ на́с ра́ди Умертви́вшемуся же́ртва благоприя́тна.

Припев: Свяителю отче Сильвестре, моли Бога о нас.

Яко боже́ственный верхо́вник свяще́нных отце́в, свяще́нное уче́ние утверди́в, еретико́в загради́л еси́ безбо́жная уста́.

Припев: Свяителю отче Сильвестре, моли Бога о нас.

Совокупи́лся еси́ с ли́ки безпло́тных, безпло́тныя враги́ с те́лом све́тло, святи́телю, побори́в.

Сла́ва Отцу́ и Сы́ну и Свято́му Ду́ху:

Па́мять твоя́ ми́ру, о́тче святи́телю, я́ко светоза́рное возсия́ со́лнце, световодя́щи ве́рою восхваля́ющия тя́.

И ны́не и при́сно и во ве́ки веко́в. Ами́нь.

Богородичен: Благолюби́вая Де́во, озло́бленную грехми́ ду́шу мою́ ублажи́, Блага́го ро́ждшая Бо́га и Го́спода.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Сильвестре, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.