Шрифт

15 января.

Канон святой праведной Иулиании Лазаревской, Муромской

святой праведной Иулиании Лазаревской, Муромской

Тропарь, глас 4-й

Просвети́вшися Боже́ственною благода́тию, и по сме́рти све́тлость жития́ твоего́ яви́ла еси́: источа́еши бо ми́ро благово́нное всем боля́щим на исцеле́ние, с ве́рою приходя́щим к моще́м твои́м, пра́ведная ма́ти Иулиани́е, Христа́ Бо́га моли́ спасти́ся душа́м на́шим.

Ин тропарь, глас 3-й

На ра́мо взе́мши крест свой, после́довала еси́ Христу́ ми́лостынею, посто́м и моли́твою, всехва́льная Иулиани́я ми́лостивая, и всем, в ми́ре живу́щим, пра́вило яви́лася еси́ жития́, тем же Вы́шнее Ца́рствие насле́довавши, непреста́нно моли́ спасти́ся душа́м на́шим.

КАНОН, глас 8-й

Песнь 1

Ирмос: Колесницегони́теля фарао́ня погрузи́ чудотворя́й иногда́ Моисе́йский жезл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, песнь Бо́гови воспева́юща.

Припев: Свята́я пра́ведная ма́ти на́ша Иулиани́е, моли́ Бо́га о нас.

Бу́рями страсте́й всегда́ погружа́ема мя и молво́ю по́мыслов грехо́вных коле́блема, к ти́хому приста́нищу Христо́вы во́ли мольба́ми твои́ми, свята́я Иулиани́е, напра́ви, я́ко да досто́йно пою́ тя.

Свята́я пра́ведная ма́ти на́ша Иулиани́е, моли́ Бо́га о нас.

Вдо́вством чи́стым просвеща́ема, Богоблаже́нная, Христо́ви посто́м уневе́стися, и моли́твами, и ми́лостынею и после́дова живоно́сным Его́ стопа́м, ску́дость мно́го во́лею претерпе́вши.

Слава: Святы́х оте́ц уче́нию после́довала еси́, сла́вная, и сих нра́вом и чистоте́ поревнова́ла еси́, воздержа́нием, а́ки безпло́тна, су́щи и чистото́ю преподо́бна, во и́стиннем смире́нии до́бре пожи́вши.

И ныне: Пречи́стая Богоро́дице воплоще́нное, присносу́щное и пребоже́ственное Сло́во па́че естества́ ро́ждшая, пое́м Тя.

Песнь 3

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Свята́я пра́ведная ма́ти на́ша Иулиани́е, моли́ Бо́га о нас.

В Небе́сныя черто́ги все́льшися, светоза́рная, Богоуго́днаго ра́ди жития́ исцеле́ния ре́ки источа́еши и стра́стная тече́ния изсуша́еши.

Свята́я пра́ведная ма́ти на́ша Иулиани́е, моли́ Бо́га о нас.

Распали́вшися жела́нием кра́йним, возлюби́ла еси́ Христа́, Богому́драя, обнища́вшаго пло́тию премно́жеством благосе́рдия, и последо́вала еси́ живоно́сным Его́ словесе́м, жите́йская вся презре́вши.

Слава: Позлаще́не криле́ ми́лостынею стяжа́вши, к Небе́сней высоте́ возлете́ла еси́, Богоблаже́нная Иулиани́е, я́ко голуби́ца нетле́нная.

И ныне: В ложесна́ Твоя́, Всенепоро́чная, все́лися Зижди́тель, воплоща́емь на благодея́ние ве́рно пою́щим Тя.

Го́споди, поми́луй (трижды). Слава, и ныне:

Седален, глас 4-й

Посто́м и моли́твами украше́на и ми́лостынею Бо́га одолжи́вши, я́ко непоро́чная уго́дница Христо́ва, с Ним в нетле́нный вошла́ еси́ черто́г, иде́же красоты́ Его́ наслажда́ешися, но моли́ спасти́ся от вся́ких бед и боле́зней нам, любо́вию пою́щим тя.

Песнь 4

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Свята́я пра́ведная ма́ти на́ша Иулиани́е, моли́ Бо́га о нас.

Све́тлое торжество́ твое́, све́том Бо́жия Ду́ха сия́ющее, озаря́ет ду́ши на́ша, ве́рою пою́щих Тя, преподо́бная.

Свята́я пра́ведная ма́ти на́ша Иулиани́е, моли́ Бо́га о нас.

Чудесы́ Боже́ственными уве́рила еси́ неве́дущих Влады́ку и к ве́ре Христо́ве тех возврати́ла еси́, пре́лести тьму оста́вльших.

Слава: Дар Христо́ви принесла́ еси́ – чи́стое умерщвле́ние у́дов, труды́, и воздержа́нием, и ми́лостынею Бо́гу угоди́ла еси́ и проти́ву прияла́ еси́ Небе́сное Ца́рство и ве́чное наслажде́ние.

И ныне: Смири́вши, спаси́ мя, высокому́дренно живу́щаго, ро́ждшая Спа́са, возне́сшаго смири́вшееся естество́ на́ше, Пречи́стая.

Пе́снь 5

Ирмос: Утренююще, вопие́м Ти: Го́споди, спаси́ ны, Ты бо еси́ Бог наш, ра́зве Тебе́, ино́го не ве́мы.

Свята́я пра́ведная ма́ти на́ша Иулиани́е, моли́ Бо́га о нас.

Ру́це твоя́ преподо́бныя, воздвиза́еме ко Христу́, ма́ти, низложи́ша вра́жия стремле́ния.

Свята́я пра́ведная ма́ти на́ша Иулиани́е, моли́ Бо́га о нас.

Удержа́в ру́ку твою́ десну́ю, Вы́шний наста́ви тя, ма́ти, к Небе́сному Ца́рствию.

Слава: Стезю́ те́сную преше́дши в поще́нии, к широте́ ра́йстей приспе́ла еси́, всечестна́я ма́ти:

И ныне: Богоро́дицу Тя не ве́дущии, Богома́ти, Све́та не и́мут ви́дети, ро́ждшагося от Тебе́, Пречи́стая.

Песнь 6

Ирмос: Ри́зу мне пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же наш.

Свята́я пра́ведная ма́ти на́ша Иулиани́е, моли́ Бо́га о нас.

Умертви́вши двиза́ния плотски́я и над страстьми́ воцари́вши ум, ны́не, всечестна́я Иулиани́е, в безстра́стных живе́ши све́тлостех.

Свята́я пра́ведная ма́ти на́ша Иулиани́е, моли́ Бо́га о нас.

Образу Спа́сову покланя́тися навы́кла еси́, сла́вная, всено́щными стоя́ньми, сло́вом и де́лы соблю́дши спаси́тельная Его́ уче́ния.

Слава: Облак показа́ тя Христо́с, источа́ющу ми́ро, я́ко до́ждь, на исцеле́ние приходя́щим с ве́рою к моще́м твои́м.

И ныне: Кра́сен па́че всех челове́к бысть Сын Твой, Пречи́стая, добро́тою Божества́, а́ще и плоть бысть нас ра́ди.

Го́споди, поми́луй (трижды). Слава, и ныне:

Кондак, глас 8-й

Скоропослу́шливую помо́щницу вси, су́щии в беда́х и боле́знех, воспое́м Иулиани́ю святу́ю, та бо в ми́ре богоуго́дно поживе́ и ми́лостыню к ни́щим безме́рну показа́, сего́ ра́ди обре́те благода́ть чуде́с Бо́жиим веле́нием.

Икос

Прииди́те, по́стническое сосло́вие, прииди́те, чистоты́ рачи́телие, прииди́те, празднолю́бцев вся́ких во́зраст, прииди́те, вдови́цы с мужа́тыми, пе́сньми духо́вными похва́лим блаже́нную Иулиани́ю, по́стницам похвало́, вдо́вам украше́ние, ми́лостивым удобре́ние, печа́льным уте́шительницу, боля́щим посети́тельницу и су́щим в беда́х ско́рую помо́щницу, Богому́друю ми́лостивницу и странноприе́мницу, точа́щую всем исцеле́ния, приходя́щим к ней с ве́рою, обре́те бо благодат́ь чуде́с Бо́жиим веле́нием.

Песнь 7

Ирмос: Отроцы евре́йстии в пещи́ попра́ша пла́мень дерзнове́нно и на ро́су огнь преложи́ша, вопию́ще: благослове́н еси́, Го́споди Бо́же, во ве́ки.

Свята́я пра́ведная ма́ти на́ша Иулиани́е, моли́ Бо́га о нас.

Красоту́ тле́нную небрегла́ еси́, Иулиани́е блаже́нная, смотря́щи та́мо су́щая воздая́ния, свет же и сла́ву нестаре́ющуюся, и Бо́жию красоту́ и весе́лие, и Боже́ственное наслажде́ние.

Свята́я пра́ведная ма́ти на́ша Иулиани́е, моли́ Бо́га о нас.

Мир тле́нный премени́ла еси́ преми́рною жи́знию нестаре́ющеюся и вре́менную пи́щу пребыва́ющим существо́м, чи́стым же вдо́вством обрела́ еси́ Небе́снаго Жениха́.

Слава: Ра́зум боголюби́в стяжа́ла еси́ в души́, пло́тию Ангелом уподо́бившися, бдя́щи те́пле и любо́вию пою́щи: благослове́н Бог от́ец на́ших.

И ныне: Виждь скорбь мою́, Де́во Богоро́дице, ю́же ми наведе́ множество́ зол мои́х, и от гее́нны о́гненныя исхи́ти мя, пою́ща: благослове́н Бог оте́ц на́ших.

Песнь 8

Ирмос: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.

Свята́я пра́ведная ма́ти на́ша Иулиани́е, моли́ Бо́га о нас.

Укра́шена сия́нием чистоты́ и чи́стым житие́м просвеще́на, предстои́ши Христу́ Бо́гу на́шему, пою́щи: благослови́те, дела́ Госпо́дня, Го́спода.

Свята́я пра́ведная ма́ти на́ша Иулиани́е, моли́ Бо́га о нас.

Боле́зни разли́чныя челове́ком врачу́ет и бесо́вские нападе́ния прогоня́ет те́ло твое́, пра́ведная, во гро́бе пресла́вно сокрыва́емо.

Слава: Моле́бную песнь Го́сподеви принеси́ о пою́щих тя, блаже́нная, и боле́зни лю́тыя обле́гчи, да пое́м тя во ве́ки.

И ныне: Неможе́ние души́ моея́ исцели́ и теле́сныя боле́зни, Де́во, я́ко да пое́м Тя во ве́ки.

Песнь 9

Ирмос: Устраши́ся всяк слух неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва быв Челове́к. Те́мже Пречи́стую Богоро́дицу, ве́рнии, велича́ем.

Свята́я пра́ведная ма́ти на́ша Иулиани́е, моли́ Бо́га о нас.

Возжеле́вши добро́ту Христо́ву и от души́ возлюби́вши Его́, зове́ши Ему́, те́пле вопию́щи: где пасе́ши, да почи́ю у Тебе́? В Твои́х све́тлостех наслажда́юся, велича́ющи Твою́ благода́ть.

Свята́я пра́ведная ма́ти на́ша Иулиани́е, моли́ Бо́га о нас.

Ра́зум име́ла еси́ в души́ и смире́ние, и Боже́ственную кро́тость, и ве́ру несумне́нну, и любо́вь к Бо́гу, всено́щными мольба́ми приближа́ющися Ему́ и та́мо су́щими све́тлостьми ублажа́ема, Иулиани́е, озаря́ема и просвеща́ема.

Слава: Нас, ве́рою хва́лящих тя, помяни́, Иулиани́е блаже́нная, душе́вных и теле́сных боле́зней изба́ви и к Небе́сней стези́ наста́ви ве́рою хва́лящих тя.

И ныне: Пощади́ мя, Христе́ Бо́же, рожде́йся от Де́вы и ро́ждшую Тя нетле́нную сохрани́вый, егда́ ся́деши суди́ти дела́ моя́, беззако́ния и грехи́ моя́ пре́зри, я́ко безгре́шен, и ми́лостив Бог, и Человеколю́бец.

Молитва праведной Иулиании Лазаревской, Муромской

Утеше́ние на́ше и похвала́, Иулиани́е, голуби́це Богому́драя, я́ко фи́никс, пресла́вно процве́тшая, криле́ доброде́телей свяще́нне и посребре́нне иму́щая, и́миже на высоту́ Ца́рствия Небе́снаго возлете́ла еси́! Похва́льная пе́ния па́мяти твое́й ра́достно днесь прино́сим, поне́же Христо́с нетле́нием чуде́сным тя увенча́ и благода́тию исцеле́ний тебе́ просла́ви. Зане́ любо́вию Христо́вою уязви́вшися, от мла́дости чистоту́ душе́вную и теле́сную храни́ла еси́, пост же и воздержа́ние возлюби́ла еси́, и́миже, помога́ющей ти благода́ти, вся стра́сти ми́ра сего́ попра́ла еси́, и, я́ко пчела́, му́дро цвет доброде́телей изыска́вши, пресла́дкий мед Свята́го Ду́ха в се́рдце свое́ всели́ла еси́ и, еще́ во пло́ти бы́вши, посеще́ния Богома́тере сподо́билася еси́. Приле́жно у́бо тя мо́лим: моли́ся, госпоже́, да пода́ст нам в Тро́ице сла́вимый Бог твои́ми моли́твами многоле́тно здра́вие же и спасе́ние, тишину́ и изоби́лие плодо́в земны́х и на враги́ побе́ды и одоле́ния. Сохрани́ предста́тельством твои́м, преподо́бная ма́ти, страну́ Росси́йскую и град сей и вся гра́ды и страны́ христиа́нския неврежде́нны от всех наве́т и ко́зней вра́жиих. Помяни́, госпоже́, убо́гия рабы́ твоя́, днесь в моли́тве тебе́ предстоя́щия, но чрез все житие́ свое́ па́че всех челове́к прегреши́вшия, оба́че те́плое покая́ние о сих принося́щия и твои́ми к Бо́гу моли́твами оставле́ние грехо́в получи́ти прося́щия, я́ко да, грехо́вных страсте́й свободи́вшеся, благода́рственное пе́ние тебе́ приноси́ти при́сно потщи́мся и просла́вим всех благи́х Пода́теля Бо́га, Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

святой праведной Иулиании Лазаревской, Муромской