13 января.

Канон преподобной матери Мелании Римляныне.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Стихи́ры преподо́бныя Мела́нии, гла́с 4.

Ангельским лико́м сочта́вшаяся, / егда́ тя Боже́ственное раче́ние распали́ / и прелете́ти повине́ ви́димых / безстра́стия ра́ди и чистоты́, / тогда́ твоего́ супру́га / словесы́ улови́ла еси́ богопоко́рными, / нестоя́нную отлага́ющи / жития́ молву́ теку́щую. / Те́мже с ни́м, ве́чную обре́тши / жи́знь и наслажде́ние, / мо́лиши Влады́ку / спасти́ ду́ши на́ша.

Ангельское вожделе́вши житие́, / егда́ сла́дкую пи́щу поплева́ла еси́, / воздержа́нием упражня́ющися и бде́нием, / ни́зу лежа́нием и чистото́ю, / тогда́ чисте́йший сосу́д / была́ еси́ Ду́ха Боже́ственнаго, / дарова́нии пресве́тлыми укра́шена / Тому́, всечестна́я; / те́мже к ре́вности Его́ Боже́ственней привлекла́ еси́ лю́ди / и привела́ еси́ Влады́це, Мела́ние, / и Спа́су ду́ш на́ших.

Добро́тами доброде́телей украше́на, / егда́ спаси́тельное сло́во испо́лнила еси́, / расточи́вши, подала́ еси́ / тмы́ твоего́ зла́та ни́щим и убо́гим, / тогда́ небе́сное бога́тство восприя́ла еси́, / пра́вдою обогати́вшися во ве́к, / и нетле́нием, и избавле́нием. / Те́мже чти́м твое́ успе́ние / и приле́жно мо́лим тя́: / моли́ Зижди́теля просвети́ти ду́ши на́ша.

Кано́н преподо́бныя Мела́нии. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Преподобная мати Мелание, моли Бога о нас.

Страсте́й омраче́нием очерне́вша мя́ всю́ду, просвети́в, очи́сти светоно́сными моли́твами преподо́бныя Твоея́, Человеколю́бче, Мела́нии и, сию́ чту́щу, сло́во ми́ вдохни́.

Припев: Преподобная мати Мелание, моли Бога о нас.

Те́пле после́довала еси́ тебе́ ра́ди во́льное распя́тие Претерпе́вшему, на ра́мех нося́щи, всеблаже́нная, усе́рдно кре́ст тво́й, и Сего́ сохрани́ла еси́ оправда́ния.

Сла́ва Отцу́ и Сы́ну и Свято́му Ду́ху:

Роди́телей пристра́стия и пло́ти любосла́стия до конца́ уклони́лася еси́, еди́наго вожделе́вши рачи́теля — Христа́, богому́драя, добро́ты; Его́же вся́ жела́ют, Сло́ва причаща́ющиися.

И ны́не и при́сно и во ве́ки веко́в. Ами́нь.

Богородичен: Обнищава́ет Бога́тый, мене́ обогаща́я Божество́м, зле́ обнища́вшаго невоздержа́нием пе́рвее, и Безнача́льный се́ нача́ло прие́млет, от Де́вы ражда́емь Богоотрокови́цы.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Припев: Преподобная мати Мелание, моли Бога о нас.

Яже ни́жних отсту́пльше жела́ний, все́ жела́ние дала́ еси́ благоче́стно произволе́нием, сла́вная, к бу́дущим то́кмо и ве́чнующим.

Припев: Преподобная мати Мелание, моли Бога о нас.

Приле́жными моли́твами чу́вствия украси́ла еси́ и Ду́ха заря́ми светови́дна была́ еси́ вся́, в телеси́ невеще́ственное житие́ подража́вши.

Сла́ва Отцу́ и Сы́ну и Свято́му Ду́ху:

И веща́ющи, и молча́щи, яви́лася еси́ наказа́ние, неутвержде́ных утвержде́ние, мона́шествующих о́браз, Мела́ние богому́драя; те́мже пое́м тя́.

И ны́не и при́сно и во ве́ки веко́в. Ами́нь.

Богородичен: Облага́яй небеса́ о́блаки хоте́нием повива́ется во́лею, рука́ми Де́вы держи́мь, руки́ мя исхища́я борца́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Преподобная мати Мелание, моли Бога о нас.

Воздержа́нием по́хоти плотски́я умертви́вши, жи́знь живу́щих име́ла еси́, все́льшуюся в тя́, всечестна́я; к не́йже, от земли́ преста́вльшися, всели́лася еси́, Ца́рствия небе́снаго наслажда́ющися.

Припев: Преподобная мати Мелание, моли Бога о нас.

Мно́гия твоя́ тмы́ зла́та разда́вши а́лчущим, вои́стинну сия́ скрыва́еши в сокро́вищах, никогда́же ветша́ющих, во ве́ки же соблюда́ющим тебе́ дово́льное пребыва́ние.

Сла́ва Отцу́ и Сы́ну и Свято́му Ду́ху:

Ми́лования твоего́ бога́тство я́коже река́ бы́сть, напая́ющи вся́кое ни́щих се́рдце, сла́вная, скве́рну отмыва́ющи нищеты́, бога́тство некра́домо исхода́тайствующи тебе́ на небесе́х неистощи́мое.

И ны́не и при́сно и во ве́ки веко́в. Ами́нь.

Богородичен: Похоте́м повину́вся страсте́й, я́коже безслове́сен, слове́сен сы́й, приложи́хся ското́м; но, Сло́во поро́ждшая Присносу́щное, не пре́зри мене́, всегда́ погиба́ющаго.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Припев: Преподобная мати Мелание, моли Бога о нас.

Безобра́зныя ви́ды страсте́й до конца́ от души́ острога́вши, честна́я, ша́ром воздержа́ния живонаписа́ла еси́ в не́й безстра́стие и любо́вь нелицеме́рну.

Припев: Преподобная мати Мелание, моли Бога о нас.

Све́тло, я́ко зерца́ло, бы́вши я́ве, све́тле дарова́ния Ду́ха Боже́ственнаго, сла́вная, восприя́ла еси́ и ве́рныя просвети́ла еси́ све́тлостию жития́ твоего́.

Сла́ва Отцу́ и Сы́ну и Свято́му Ду́ху:

Воздержа́нием погаси́вши страсте́й распале́ние, о́гнь возжгла́ еси́ душе́вный, во все́м житии́ твое́м блиста́ющися и омраче́ния де́монская отража́ющи.

И ны́не и при́сно и во ве́ки веко́в. Ами́нь.

Богородичен: Де́ва роди́ Бо́га Емману́ила во гра́де Вифлее́ме, Еде́м отверза́ющаго, дре́вле ми́ заключе́нный невоздержа́нием сне́ди и ле́стию зми́я.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Преподобная мати Мелание, моли Бога о нас.

Немо́кренно жите́йское прешла́ еси́ обурева́ние, направля́ема манове́нием вся́ сло́вом Сотво́ршаго, и в приста́нище спасе́ния, Мела́ние, дости́гла еси́.

Припев: Преподобная мати Мелание, моли Бога о нас.

Искрами те́плаго твоего́ е́же к Го́споду раче́ния разжже́нныя стре́лы грехо́вныя вся́ попали́шася, и де́монское злоде́йство до конца́ погубле́но бы́сть.

Сла́ва Отцу́ и Сы́ну и Свято́му Ду́ху:

Ум тво́й, к лу́чшему едине́нием обожа́емь, су́щия к пло́ти любве́ отлучи́ся манове́нием всеси́льным; сего́ ра́ди поще́ния труды́ понесла́ еси́.

И ны́не и при́сно и во ве́ки веко́в. Ами́нь.

Богородичен: Обожа́ет мя́ от Де́вы рожде́йся Госпо́дь, и пелена́ми повива́ется, разреше́ние творя́ мои́х прегреше́ний, и вмеща́ется в верте́п, Иже все́ми невмести́мый.

Седа́лен Мела́нии, гла́с 4.

Боже́ственная повеле́ния соверша́ющи со тща́нием, расточи́вши, раздала́ еси́ тмы́ зла́та твоего́ ни́щим: взе́мши же кре́ст тво́й на ра́мена, Мела́ние, вку́пе с твои́м женихо́м после́довала еси́ ве́рою Христу́, распе́ншемуся пло́тию, еди́ному Бо́гу на́шему.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Преподобная мати Мелание, моли Бога о нас.

С супру́жником Христо́во и́го нося́щи, богоно́сная, обнови́сте моли́тв ра́лом ду́ши и, ни́ву до́брых возде́лавше, наслажда́етеся во ве́ки вы́шния сла́вы.

Припев: Преподобная мати Мелание, моли Бога о нас.

Яко ма́слина, псало́мски в дому́ Бо́жии насажде́на, умаща́еши та́инственно сердца́, преподо́бная, и ли́ца еле́ем боле́зней твои́х ве́рно восхваля́ющих твоя́ по́двиги.

Сла́ва Отцу́ и Сы́ну и Свято́му Ду́ху:

Воздержа́ния ороше́нием угаси́вши страсте́й пе́щи, одожде́нием моли́тв врачева́ний пучи́ны источи́ла еси́, и страсте́й приверже́ния потопля́ющи, Мела́ние, чту́щих тя́.

И ны́не и при́сно и во ве́ки веко́в. Ами́нь.

Богородичен: Руно́ Тя, рече́ Дави́д, я́ко до́ждь прие́мшу небе́сный, Чи́стая, беззако́ния пото́ки изсуша́ющь и ве́рных напоя́ющь смы́слы, грехо́м пресо́хшия.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Преподобная мати Мелание, моли Бога о нас.

Хра́м се́рдце и те́ло Тро́ице Пребоже́ственней соверши́вши, Боже́ственныя возсоздала́ еси́ хра́мы, достосла́вная, в ни́хже де́в чи́ны и мона́шествующих ли́ки совокупи́ла еси́, пою́щия согла́сно и превознося́щия Христа́ во вся́ ве́ки.

Припев: Преподобная мати Мелание, моли Бога о нас.

Ми́лостынею ми́лость стяжа́ла еси́, расточи́вши, дала́ еси́ убо́гим, пра́вда твоя́ пребыва́ет, ве́чнующи, и е́же от сея́ приобре́тение тебе́ неветша́емое, Мела́ние, богоно́сице преподо́бная. Те́мже тя́ чти́м, я́ко вои́стинну победоно́сицу.

Сла́ва Отцу́ и Сы́ну и Свято́му Ду́ху:

Смы́слом, му́жеством, целому́дрием и боже́ственною пра́вдою блиста́ющи, име́ла еси́ вознося́щее тя́ на высоту́ небе́сную высокотво́рное смире́ние, и́мже низложи́ла еси́, преподо́бная, велича́ваго зми́я: те́м тя́ почита́ем, я́ко и́стинную победоно́сицу.

И ны́не и при́сно и во ве́ки веко́в. Ами́нь.

Богородичен: Страсте́й мя́ смуща́ют треволне́ния, глубина́ отча́яния потопля́ет мя́, спаси́ мя, Всенепоро́чная Ма́ти, и спасу́ся: Спа́са бо Го́спода родила́ еси́, во я́слех я́ко Младе́нца положе́на, Его́же превозно́сим во вся́ ве́ки.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Преподобная мати Мелание, моли Бога о нас.

На высоту́ я́ве кра́йняго соверше́нства востекла́ еси́, блаже́нная, и пости́гла еси́ чи́ны безтеле́сных, ко и́стинному жела́нию прибли́жившися, исто́чник благи́х ны́не прия́ла еси́; те́м тя́ вси́ ублажа́ем.

Припев: Преподобная мати Мелание, моли Бога о нас.

С ли́ки весели́шися по́стников, воздержа́вшися и стра́сти умертви́вши, зри́ши открове́нным лице́м Бо́жию красоту́, ю́же пре́жде явле́ния стяжа́ла еси́ целому́дрием, Мела́ние всеблаже́нная.

Сла́ва Отцу́ и Сы́ну и Свято́му Ду́ху:

Ходи́вши стезе́ю те́сною, простра́ннаго рая́ широты́ дости́гла еси́, иде́же ра́дость пра́зднующих, иде́же дре́во жи́зни е́сть, на́с непреста́нно помина́ющи, чту́щих твое́ успе́ние.

И ны́не и при́сно и во ве́ки веко́в. Ами́нь.

Богородичен: Иже на плеща́х херуви́мов стра́шно носи́мый, на руку́ ны́не седи́т Отрокови́цы Чи́стыя, и пелена́ми повива́ется, разреша́я плени́цы зо́л на́ших, и млеко́м я́ко Младе́нец пита́ется, пита́яй вся́кое дыха́ние.

Молитва

О свята́я, мати Мелание. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.