12 января.

Канон преподобному Зотику Сиропитателю.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Зотиче, дух твой.

Кано́н, гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Преподобне отче Зотиче, моли Бога о нас.

Свы́ше просвети́тися омраче́нней мое́й мы́сли, пе́ти тя́ досто́йно, Зо́тике, Христа́ умоли́.

Припев: Преподобне отче Зотиче, моли Бога о нас.

Житие́м твои́м Ангелом на земли́, богому́дре, ревну́я, показа́лся еси́ досто́йно, жите́йских красо́т гнуша́яся.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ро́д челове́ческий Тебе́ ра́ди, Де́во, назида́ется, Бо́г бо, вы́шних не оста́вив, на зе́млю прии́де.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Преподобне отче Зотиче, моли Бога о нас.

Прииди́те, стра́ннии, дне́сь, ра́достно гла́с вознесе́м во све́тлем се́м торжестве́, Зо́тика ублажа́юще.

Припев: Преподобне отче Зотиче, моли Бога о нас.

Поста́вил еси́ до́м тво́й, я́коже Авраа́м ски́нию дне́сь, вся́ ни́щия прие́млющий и бога́тно пита́ющий.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Бу́рю вся́ку уста́вила еси́ в Рождестве́ Твое́м, Всечи́стая, те́мже враги́ ве́рнии ца́рие побежда́ют, в ми́ре лику́юще.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Зотиче, моли Бога о нас.

Светоно́сное торжество́ сие́ преподо́бнаго ны́не просия́ Зо́тика, к Рождеству́ Христо́ву призыва́ющи вся́ на чрежде́ние.

Припев: Преподобне отче Зотиче, моли Бога о нас.

Чудесы́ преле́потствова́в, чудеса́ пресла́вная оста́вил еси́ на́м, честна́я твоя́ исправле́ния на земли́, преблаже́нне, о́браз боже́ствен.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Очисти́лище обрето́хом Тя́, Богороди́тельнице, и прибе́жище во бране́х непобеди́мо, ца́рие же держа́ву, Чи́стая, но́сят.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Преподобне отче Зотиче, моли Бога о нас.

Украше́ние доброде́тели показа́ся, чу́дне, честна́я твоя́ исправле́ния, Боже́ственный до́м, наги́х одея́ние.

Припев: Преподобне отче Зотиче, моли Бога о нас.

Прокаже́ние, свяще́нне, исцеля́я, о́тче, воздви́гл еси́ враче́бницу тво́й до́м честны́й, в не́мже досто́йно вся́к неду́г врачу́ется.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ве́лие и честно́е е́же в Тебе́ я́вльшееся та́инство, Богоро́дице Присноде́во: се́ бо вои́стинну, земни́и, к Бо́гу примири́хомся.

Пе́снь 6.

Ирмос: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Припев: Преподобне отче Зотиче, моли Бога о нас.

Хра́м тя́, вси́ ве́рнии, Ду́ха ве́мы, хра́м бо всеблаголе́пен тво́й сотвори́л еси́ до́м, пресла́вне, в не́мже вся́к неду́г моли́твами твои́ми отгоня́ется.

Припев: Преподобне отче Зотиче, моли Бога о нас.

Странноприя́тие на земли́, Авраа́му подо́бяся, поста́вил еси́, всеблагоче́стно безкро́вныя прие́мля, наги́я, и мимоходя́щия, и хромы́я, и стра́нныя, и ни́щия вводя́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Не́бо на земли́, Де́во, показа́вый верте́п, небе́сный Тя́ хра́м, Ангельскими окруже́н ли́ки, показа́, сла́ва в вы́шних вопию́щих Твоему́ Рождеству́ ве́рно.

Седа́лен, гла́с 5.

Страсте́й пе́щи, преподо́бне, угаси́л еси́ воздержа́ния росо́ю, дарова́нием обогати́вся, врачева́ния от Бо́га, Зо́тике, прия́л еси́ врачева́ти ве́рных боле́зни лю́тыя и де́монов отгони́ти полки́; сего́ ра́ди с весе́лием почита́ем тя́.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподобне отче Зотиче, моли Бога о нас.

Все́м преподо́бным сочи́слился еси́ и лико́м боже́ственным безтеле́сным, Зо́тике преблаже́нне, с ни́миже и взыва́еши: благослове́н еси́, Го́споди Бо́же, во ве́ки.

Припев: Преподобне отче Зотиче, моли Бога о нас.

Си́лою и благода́тию, богому́дре, бы́л еси́ вдо́в и немощны́х, сиро́т же оте́ц показа́лся еси́, зовы́й: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Кре́пость ва́рваров, Богоро́дице, истреби́ и спаси́ лю́ди Твоя́. Цари́ же ве́рныя утверди́, вопию́щия: благослове́н, Всечи́стая, Пло́д Твоего́ чре́ва.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припев: Преподобне отче Зотиче, моли Бога о нас.

Сия́, му́дре, победи́тельная, сия́ исправле́ния, и я́же убо́гих и же́н сле́зы, тво́й хра́м показа́ша небесе́ вы́шший, и ца́рствия тебе́ вхо́ды отверзо́ша. Ве́рою бо вопия́л еси́: о́троцы, благослови́те, свяще́нницы, воспо́йте Го́спода, лю́дие, превозноси́те во вся́ ве́ки.

Припев: Преподобне отче Зотиче, моли Бога о нас.

Сна́ твои́м не да́л еси́ очесе́м, досточу́дне, ниже́ ве́ждам дрема́ния, богоприя́тне, до́ндеже де́ло боже́ственное, слове́сный ра́й Христо́в, до конца́ соверши́л еси́, поя́: о́троцы, благослови́те, свяще́нницы, воспо́йте Го́спода и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Человеколю́бием ми́лости Твоея́ к на́м прише́л еси́, Иже спасе́ния ра́ди бы́в я́ко Челове́к, и в верте́п всели́лся еси́, пелена́ми повива́емь, и земноро́дныя от страсте́й воздви́гл еси́, согла́сно пою́щия: свяще́нницы, воспо́йте Го́спода, лю́дие, превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Зотиче, моли Бога о нас.

Благода́ть тебе́, о́тче, от Бо́га даде́ся лечи́ти неду́ги, ни́щия, и сухи́я, и хромы́я; я́же я́ко люби́мичи Христо́вы ве́рно прие́мля, с си́ми ра́дуешися при́сно, в не́дрех Авраа́мовых водворя́яся.

Припев: Преподобне отче Зотиче, моли Бога о нас.

Напита́л еси́, о́тче, оби́льно вся́каго стра́нна, и на́га, и мимоходя́ща; с патриа́рхи при́сно и с пра́ведными ны́не ра́дуешися све́тло иде́же бога́тство и сла́дость, иде́же присносу́щное спаса́емых упова́ние, иде́же все́м бога́тство е́сть Христо́с.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Яко су́щи Ма́ти Бо́жия, я́ко Предста́тельница и приста́нище чту́щих Тя́, я́ко прибе́жище все́х, Де́во, притека́ющих к Тебе́, я́ко царе́й же ра́дость, и сла́ва, и утвержде́ние, и вене́ц досто́ин, лю́ди Твоя́, Богоро́дице, спаса́й.

Стихи́ры, гла́с 6.

Яко Авраа́м нра́вы, му́дре, показа́лся еси́ по обоему́: тво́й до́м дово́льное оби́льство отве́рзл еси́ все́м, подая́ тре́бующим и да́руя ни́щим ми́лость.

Вдо́в и ни́щих Тя́ Христо́с показа́ прие́мника, вре́дных засту́пника те́пла, предста́теля в беда́х, побо́рника и изба́вителя восхваля́ющих, о́тче на́ш.

Сла́ва, гла́с то́йже:

Си́лою укрепля́емь и благода́тию украша́емь Ро́ждшагося в верте́пе, Зо́тике, поще́нием и воздержа́нием стра́сти победи́л еси́ и прия́л еси́ победи́тельная.

И ны́не, гла́с то́йже:

Яко Младе́нца в я́слех восклони́, Христе́ Бо́же, безсе́менно ро́ждшая Тя́ Де́ва, ли́цы же безпло́тных с высоты́ вопия́ху: сла́ва Зижди́телю и Бо́гу все́х.

Молитва

О свяще́нная главо́, преподо́бне о́тче, преблаже́нне а́вво Зотиче, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.