12 января.

Канон мученице Анисии Солунской (Фессалоникийской).

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь мученице Анисии Солунской (Фессалоникийской), глас 4

А́гница Твоя́, Иису́се, Ани́сия,/ зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую,/ и сраспина́юся и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю,/ но я́ко же́ртву непоро́чную приими́ мя с любо́вию поже́ршуюся Тебе́./ Тоя́ моли́твами,// я́ко ми́лостив, спаси́ ду́ши на́ша.

Кано́н святы́я Ани́сии. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святая мученице Анисие, моли Бога о нас.

Пою́щу светоно́сную па́мять твою́, Све́т мне́ низпосли́, я́ко Отцу́ све́тов предстоя́щи в ра́дости, всехва́льная, страсте́й мои́х бу́рю твои́ми моли́твами отгоня́щи.

Припев: Святая мученице Анисие, моли Бога о нас.

Воздержа́нием душе́вную обнови́ла еси́, богому́драя, ни́ву, муче́ния кла́с плоди́вши Де́лателю, соблю́дшему и кре́пость тебе́ вдохну́вшему, де́во му́ченице досточу́дная.

Сла́ва Отцу́ и Сы́ну и Свято́му Ду́ху:

Руце́ твое́й, богате́йше подаю́щей бога́тство тле́нное, богатотво́рную приобрела́ еси́ жи́знь, ника́може мимотеку́щую, и сокро́вище неистощи́мое, му́ченице, и сла́ву небе́сную.

И ны́не и при́сно и во ве́ки веко́в. Ами́нь.

Богородичен: Из Тебе́, Неискусобра́чная, дне́сь вся́ческих Творе́ц пло́тски ражда́ется по на́м и пелена́ми повива́ется, повива́яй мо́ре мгло́ю, Ма́ти Присноде́во.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святая мученице Анисие, моли Бога о нас.

Добро́ты твоея́ душе́вныя Творе́ц тво́й вожделе́в, неве́сту тя́, вои́стинну добру́ и непоро́чну, му́ченице, Себе́ обручи́л е́сть.

Припев: Святая мученице Анисие, моли Бога о нас.

Стра́сти Безстра́стнаго, умертви́вшагося на́с ра́ди, умерщвле́ние, му́ченице честна́я, лю́бящи, му́ченическою умира́еши сме́ртию.

Сла́ва Отцу́ и Сы́ну и Свято́му Ду́ху:

Яко заколе́ние духо́вно, я́ко же́ртва чиста́ соверше́на Тебе́, Бо́гу, принесе́ся, я́же Тво́й Кре́ст возлюби́вшая.

И ны́не и при́сно и во ве́ки веко́в. Ами́нь.

Богородичен: Село́ вме́стно Невмести́маго Соде́теля была́ еси́, Сего́ пло́тию вмести́вши, Обра́дованная Пречи́стая.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святая мученице Анисие, моли Бога о нас.

Живоно́сным твои́м стопа́м после́дующи, копие́м в ре́бра уязвля́ется и обраща́емое неле́стно прохо́дит ору́жие раба́ Твоя́, Влады́ко Христе́, воспева́ющи Тя́.

Припев: Святая мученице Анисие, моли Бога о нас.

Муче́ния сия́ющи светлостьми́ и нетле́ния венце́м увя́зшися, ра́дующися, предстои́ши Христу́, Жениху́ твоему́, му́ченице Ани́сие всехва́льная.

Сла́ва Отцу́ и Сы́ну и Свято́му Ду́ху:

Запе́ншаго ле́стию пе́рвую Еву, му́ченическими противле́ньми побе́ждши, низложи́ла еси́, показа́вши некре́пка, Христу́ воспева́ющи: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Иже невеще́ственная существа́ Созда́вый, теле́сно, я́ко Челове́к, из Тебе́, Богома́ти, дне́сь ражда́ется, Тому́ воспои́м: сла́ва си́ле Твое́й, Го́споди.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святая мученице Анисие, моли Бога о нас.

Тя́, Го́споди, исто́чник спасе́ния ве́дящи, ча́шу спасе́ния несумне́нным се́рдцем му́ченица Твоя́ испи́.

Припев: Святая мученице Анисие, моли Бога о нас.

Юница Христо́ва, богоприя́тное заколе́ние, богопринесе́нная же́ртва, страстоно́сице Госпо́дня, моли́ спасти́ся на́м.

Сла́ва Отцу́ и Сы́ну и Свято́му Ду́ху:

Све́т была́ еси́, Све́ту вели́кому ясне́е прибли́жившися, и просвеща́еши светоно́сную па́мять твою́ пра́зднующия.

И ны́не и при́сно и во ве́ки веко́в. Ами́нь.

Богородичен: Тя́ ору́жие непобеди́мое на враги́ предлага́ем, Тя́ утвержде́ние и наде́жду на́шего спасе́ния, Богоневе́сто, стяжа́хом.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святая мученице Анисие, моли Бога о нас.

Му́жеский в же́нстем телеси́ у́м восприи́мши, к боре́нию враго́в безпло́тных, му́ченице, изшла́ еси́ и ору́жием терпе́ния ты́я умертви́ла еси́.

Припев: Святая мученице Анисие, моли Бога о нас.

Кро́вными наводне́нии мо́ре изсуши́ла еси́ злове́рия, Христо́ву же честну́ю напои́ла еси́ Це́рковь, Ани́сие страстоте́рпице, де́в похвало́.

Сла́ва Отцу́ и Сы́ну и Свято́му Ду́ху:

Немо́кренно подвиго́в прешла́ еси́ бу́рю непотопле́нно, те́мже в приста́нище невла́емо устреми́лася еси́ и и́стинныя наслажда́ешися тишины́, пресла́вная.

И ны́не и при́сно и во ве́ки веко́в. Ами́нь.

Богородичен: Созда́вый по о́бразу Своему́ челове́ка за мно́гое благоутро́бие назида́ет того́, из Тебе́, Де́во Богома́ти, ве́сь в него́ обле́кся.

Седа́лен Ани́сии, гла́с 4.

Над страстьми́ плотски́ми ца́рствующи, страстьми́ животво́рными воцари́лася еси́, от твоея́ кро́ве обагри́вши, честна́я, червлени́цу нетле́нну благоче́стно, Ани́сие; те́мже Всецаря́ неве́ста непоро́чна яви́лася еси́. Но от бе́д изба́ви на́с, соверша́ющих сла́вную па́мять твою́.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Святая мученице Анисие, моли Бога о нас.

Твою́ хра́мину душе́вную, му́ченице, мы́сленно водруже́нную испове́данием Христо́вым, мучи́тельныя поте́кше пото́ки ника́коже поколеба́ша, — Бо́же, — вопию́щую, — благослове́н еси́.

Припев: Святая мученице Анисие, моли Бога о нас.

Пра́вды Со́лнца, Христа́, ве́дящи, му́ченице, не восхоте́ла еси́ злочести́вне пожре́ти со́лнцу, повелева́ющу мучи́телю, но пе́ла еси́: Бо́же, оте́ц на́ших, благослове́н еси́.

Сла́ва Отцу́ и Сы́ну и Свято́му Ду́ху:

От твои́х крове́й свяще́нных омочи́вши себе́ багряни́цу, победи́тельным главу́, му́ченице, венце́м венча́ла еси́, и Бо́гу ны́не предстои́ши, Царю́ Безсме́ртному, веселя́щися.

И ны́не и при́сно и во ве́ки веко́в. Ами́нь.

Богородичен: Пови́вый не́бо о́блаки, зе́млю же мгло́ю, от Твоего́ чре́ва ро́ждся, пелена́ми повива́ется и во я́слех полага́ется, Богома́ти Всенепоро́чная, спаса́я ве́дущия Тя́, Богоро́дицу.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святая мученице Анисие, моли Бога о нас.

Вдова́м, сирота́м же, и ни́щим, и все́м тре́бующим бога́тство расточи́ла еси́, Вседержи́теля лю́бящи несомне́нно повеле́ния, и муче́ния же честны́я и́щеши ча́ши, ю́же испи́вши, уста́вила еси́, де́во честна́я, жела́ния.

Припев: Святая мученице Анисие, моли Бога о нас.

Яко ве́но, принесла́ еси́ Христу́ по́ст и сле́зы, страсте́й умерщвле́ние и кро́ве проли́тие, ре́бр прободе́ние: не обветша́ющий Са́м те́м тебе́ вене́ц и черто́г нетле́нен подае́т и сла́ву небе́сную.

Сла́ва Отцу́ и Сы́ну и Свято́му Ду́ху:

Живе́ши со Ангелы во све́те, де́в с чи́нми, и собо́ры му́ченик спра́зднующи, лице́ Жениха́ твоего́ к лицу́ зря́щи, и све́тлыя сла́вы причаща́ющися, и вопию́щи: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Се́ ны́не оскуде́ я́ве от Иу́дова пле́мене кня́зь и во́ждь: Ты́ бо, Всенепоро́чная, родила́ еси́, я́же тому́ пре́жде отлежа́щая, жда́ние язы́ков, Христа́. Ему́же пое́м: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святая мученице Анисие, моли Бога о нас.

Ка́мению принося́щии че́сти па́че Зижди́теля, зре́ти тя́, сла́вная, не терпя́ще, Бо́гу возложену́, мече́м ссека́ют, сме́ртию боже́ственное безсме́ртие тебе́ обруча́юще.

Припев: Святая мученице Анисие, моли Бога о нас.

Фессалони́тский гра́д твои́ми пелена́ми и страда́ньми, му́ченице, хва́лится, де́во; Це́рковь же перворо́дных с пра́ведными и́мать тво́й ду́х боже́ственный, веселя́щийся.

Сла́ва Отцу́ и Сы́ну и Свято́му Ду́ху:

Лива́н, зла́то же и сми́рну в Вифлее́ме Рожде́нному волсви́ принесо́ша ве́рою, страстоте́рпица же кро́вь муче́ния излия́ние, о на́с Того́ моля́щи.

И ны́не и при́сно и во ве́ки веко́в. Ами́нь.

Богородичен: Же́зл прозябла́ еси́ из ко́рене Иессе́ева, Богороди́тельнице, цве́т Божества́, Христа́, на́м ро́ждши, Всечи́стая, дне́сь, Его́же, я́ко Бо́га Невмести́маго и ны́не я́ко Младе́нца, пелена́ми повива́ема, велича́ем.

Молитва О свята́я, мученице Анисие. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.