11 января.

Канон преподобному Маркеллу, игумену обители Неусыпаемых.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бному, гла́с 8:

В тебе́, о́тче, изве́стно спасе́ся е́же по о́бразу: прии́м бо кре́ст, после́довал еси́ Христу́ и, де́я, учи́л еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней. Те́мже и со Ангелы сра́дуется, преподо́бне Марке́лле, ду́х тво́й.

Кано́н преподо́бнаго, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобне отче Маркелло, моли Бога о нас.

Обновля́ется тва́рь, и земны́х естество́ новотвори́тся пло́тию Творца́ все́х, па́че ума́ Христа́ ражда́ема из Чи́стыя и Пресвяты́я Ма́тере.

Припев: Преподобне отче Маркелло, моли Бога о нас.

Ра́зум прие́м, о́тче, от Бо́га и́стины, и непреста́нно взыска́в Его́ житие́м, Марке́лле, чи́стым, и боже́ственными доброде́тельми угоди́л еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Земля́ оте́ческия кля́твы, я́же во Еде́ме, избавле́ние прия́т: на не́й Изба́вителю ро́ждшуся, Чи́стая, из Тебе́, и обно́вльшую, и освяти́вшу.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобне отче Маркелло, моли Бога о нас.

Облацы, ка́плите на зе́млю сла́дость весе́лия: из о́блака бо све́тла возсия́ Христо́с, в верте́пе пло́тски па́че вся́кия мы́сли ражда́емь.

Припев: Преподобне отче Маркелло, моли Бога о нас.

Тве́рдостию души́ на враги́ мы́сленныя вооружи́вся, богоно́се, посе́кл еси́ те́х ополче́ния держа́вно и побе́ды увя́злся еси́ венце́м.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: От пречи́стых Твои́х, Чи́стая, и честны́х крове́й вопло́щся неизрече́нно, Сло́во Бо́жие показа́, я́ко Бо́г тва́рей, Тя́ все́х Влады́чицу.

Седа́лен преподо́бному, гла́с 4.

Чистоты́ у́гльми предочи́стив ду́шу, те́ло обузда́л еси́ к нетле́нней кре́пости, всехва́льне Марке́лле, те́м и показа́лся еси́ оби́телище боже́ственное, неду́ги отгоня́я и просвеща́я ве́рою при́сно приходя́щия к тебе́ и восхваля́ющия тя́.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобне отче Маркелло, моли Бога о нас.

Ви́девше, Го́споди, е́же в верте́пе Твое́ сни́тие, чи́нове мы́сленнии стра́хом ужасо́шася и воспе́ша, Христе́, недомы́сленную Твою́ ми́лость.

Припев: Преподобне отче Маркелло, моли Бога о нас.

Боле́зни, преподо́бне, и по́ты твоя́ с кро́вными струя́ми младе́нцев сме́шени, Марке́лле, Ро́ждшемуся пло́тию да́ры че́стны принесо́шася.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Красну́ Тя добро́тою, преоблиста́ющую Сы́на Твоего́ заре́ю, язы́честии дароно́сцы, Чи́стая, ви́девше, виде́ние но́во и пресла́вно воспе́ша.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобне отче Маркелло, моли Бога о нас.

Прелива́ется ча́ша благоутро́бия Твоего́, Христе́, во творе́ния вся́, и оби́льно сия́ ми́лости испо́лни, пло́тию я́вльшуся и ро́ждшуся Тебе́.

Припев: Преподобне отче Маркелло, моли Бога о нас.

Ве́щнаго, преподо́бне, души́ помраче́ния и вся́кия земны́я и тле́нныя красоты́ боле́зньми очи́стив твоего́ по́стничества, равноа́нгелен показа́лся еси́ в ми́ре, Марке́лле.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Струи́ источи́ мы́сленныя безсме́ртия из Тебе́ пло́тию рожде́йся в верте́пе, Чи́стая, и челове́ческое естество́ напои́ нетле́нием, обогати́в сие́, я́ко Благоутро́бен.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Преподобне отче Маркелло, моли Бога о нас.

Мира благово́ннейшая издаде́ земля́ в себе́ па́че смы́сла, неистоще́ннаго мѵ́ра, от Чи́стыя пло́тию источи́вшаго и челове́ки благово́ния боже́ственнаго испо́лнившаго.

Припев: Преподобне отче Маркелло, моли Бога о нас.

Жития́ привре́менное и нестоя́нное му́дре усмотри́в, Марке́лле, к присностоя́щим душе́вное возвы́сил еси́ жела́ние, е́же получи́л еси́ боле́зньми по́стничества.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ражда́ется безле́тный Бо́г Сло́во во пло́ти из Тебе́, Де́во Пречи́стая, да жи́знь безле́тную челове́ком, и насле́дие ве́чное, и сла́ву пода́ст нетле́нную.

Конда́к, гла́с 4.

Звезда́ волхвы́ посла́ к Ро́ждшемуся, и Ирод непра́ведное во́инство посла́ лю́то, уби́ти мня́ во я́слех я́ко Младе́нца лежа́ща.

Икос:

Го́рним и до́льным, ны́не вку́пе веселя́щимся во явле́нии все́х Царя́, Ирод са́м то́кмо с пророкоуби́йцы иуде́и соболе́знует: ле́по бо самы́м и́м то́кмо рыда́ти, не бо́ от ны́не ца́рствовати и́мут; но ца́рство Госпо́дне и еще́ держа́вствовати и́мать, де́рзости враго́в отража́ющее и мно́жества ве́рных созыва́ющее с честны́ми младе́нцы взира́ти, Иже во я́слех я́ко Младе́нца лежа́ща.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Преподобне отче Маркелло, моли Бога о нас.

Поколеба́вшуюся безбо́жием всю́ тва́рь Иже в верте́пе Рожде́йся утверди́ позна́нием Свои́м па́ки, непреста́нно зову́щую Ему́: благослове́н еси́, Бо́же оте́ц на́ших.

Припев: Преподобне отче Маркелло, моли Бога о нас.

Огне́м у́бо по́стничества попали́л еси́, Марке́лле, плотски́я сла́сти, безстра́стия же росо́ю напои́л еси́ ду́шу, вопия́ Христу́ све́тло: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ви́де вся́ тва́рь, Богоневе́сто, боже́ственная вели́чия Твоя́, пло́тию из Тебе́ Влады́це все́х и Бо́гу ро́ждшуся во гра́де Вифлее́ме, и с па́стырьми и волхвы́ Тя́ воспе́.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Преподобне отче Маркелло, моли Бога о нас.

Светоно́сною тва́рь оде́ждею одева́ется, и пе́рвое се́тование все́ отложи́, Обнови́телю и Влады́це ро́ждшуся на земли́: Его́же превозно́сим во ве́ки.

Припев: Преподобне отче Маркелло, моли Бога о нас.

Вооружи́вся доброде́тельми, преподо́бне Марке́лле, ополче́ния де́монов побори́л еси́, и я́ко победи́тель на ты́я взя́л еси́ одоле́ния, и чуде́с благода́ть от Бо́га прия́л еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Иже из Тебе́ в верте́пе роди́выйся, Всенепоро́чная, ве́чныя челове́ком оби́тели угото́ва и́скренно, Богоро́дице, пою́щим Тя́ и превознося́щим несказа́нное Твое́ Рождество́.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Преподобне отче Маркелло, моли Бога о нас.

Позна́на показа́ся, Христе́, ми́лость, я́же па́че ума́, Твоего́ человеколю́бия язы́ком: пло́тию бо, Влады́ко, обнища́л еси́, да прича́стники бога́тства лу́чшаго, Го́споди, сотвори́ши ны́, я́ко Бла́г и Многоми́лостив.

Припев: Преподобне отче Маркелло, моли Бога о нас.

Кре́ст на ра́мена взе́м, блаже́нне, Христо́в, и, Сего́ стра́сти подража́я, распя́лся еси́ ми́ру ве́сь, о́тче Марке́лле: прича́стник бо бы́л еси́ воскресе́ния и сла́вы лу́чшия, в не́йже на́с помина́й.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Сы́ны Бо́жия ны́ соде́ла рожде́йся пло́тию Бо́г из Тебе́, Всечи́стая, и пе́рвое даде́ достоя́ние Того́ прие́мшим, и Богома́терь Тя́ славосло́вящим приле́жно, и велича́ющим.

Стихи́ры, гла́с 5:

Преподо́бне о́тче, не да́л еси́ сна́ твои́м очесе́м, ни ве́ждом твои́м дрема́ния, до́ндеже ду́шу и те́ло от страсте́й свободи́л еси́ и тебе́ сама́го угото́вал еси́ Ду́ха жили́ще: прише́д бо, Христо́с со Отце́м оби́тель в тебе́ сотвори́; и Единосу́щныя Тро́ицы уго́дник бы́в, великопропове́дниче о́тче на́ш Марке́лле, моли́ спасти́ся на́м.

Молитва

О свяще́нная главо́, преподо́бне о́тче, преблаже́нне а́вво Маркелло, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.