11 января.

Канон преподобным отцам Печерским Марку и Феофилу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Умертви́в плотски́я по́хоти мно́гим воздержа́нием и копа́нием гробо́в святы́м, при́сно, а́ки ме́ртв, в пеще́ре живя́, ме́ртвыя повеле́нием свои́м воздвиза́л еси́, Ма́рко прехва́льне. Умертви́ и на́ша мудрова́ния плотска́я и наста́ви на́с на тече́ние доброде́телей, моля́ о на́с Еди́наго Человеколю́бца.

Стихи́ра, гла́с 2:

Кто́ испове́сть по достоя́нию труды́ и по́двиги твоя́, [преподо́бне о́тче? Отне́ле бо прия́л еси́ Ангельский на ся́ о́браз, не да́л еси́ те́лу своему́ упокое́ния, но о́чи возводи́л ко Го́споду, устне́ же устро́евал еси́ вы́ну на моли́тву, слу́х тво́й простира́л еси́ к слы́шанию сло́ва Бо́жия, ру́це утвержда́л еси́ на копа́ние гробо́в. Блаже́н еси́, все́ми у́ды Христу́ рабо́тав, Ему́же ны́не предстоя́, моли́ умири́ти ми́р и спасти́ ду́ши на́ша].

Кано́н преподо́бных, гла́с 1.

Пе́снь 1.

Ирмос: Пои́м, вси́ лю́дие, от го́рькия рабо́ты фарао́ни Изра́иля Изме́ншему и во глубине́ морсте́й нога́ми немо́крыми Наста́вльшему пе́снь побе́дную, я́ко просла́вися.

Припев: Преподобнии Марко и Феофиле, молите Бога о нас.

Пои́м вси́, соше́дшеся в пречестны́й хра́м се́й восхвали́ти Бо́жия уго́дника па́мять, я́ко сла́вно о и́мени Христа́ Го́спода своего́ просла́вися.

Припев: Преподобнии Марко и Феофиле, молите Бога о нас.

Ангельский о́браз на ся́ прие́мь, Ангельски в пеще́ре пожи́л еси́, свя́те, копа́я же свои́ми рука́ми места́ мно́га бра́тии усо́пшей, преше́л еси́ от си́х в места́ кро́ва ди́вна пе́ти Го́сподеви: сла́вно просла́вися.

Припев: Преподобнии Марко и Феофиле, молите Бога о нас.

Сме́рть да име́еши пред очи́ма свои́ма, о́тче, гро́бы копа́л еси́ бра́тиям, ко Христу́ отше́дшим, на плеща́х пе́рсть износя́, те́мже по кончи́не честна́ пред Го́сподем сме́рть твоя́ бы́сть, блаже́нне, и со Ангелы прославля́ющемуся в святы́х Свои́х Бо́гу пое́ши: я́ко просла́вися.

Сла́ва Отцу́ и Сы́ну и Свято́му Ду́ху:

Любве́ ра́ди ко все́м тружда́яся, ту́не устроя́л еси́ гро́бы, ничесо́же ни от кого́ прие́мля, ча́я то́кмо воздая́ния от Бо́га, те́мже ны́не мзда́ твоя́ мно́га на небеси́, преподо́бне, иде́же пое́ши Бо́гу: я́ко просла́вися.

И ны́не и при́сно и во ве́ки веко́в. Ами́нь.

Богородичен: Пресла́вную Тя́ Ма́терь Бо́жию во все́х роде́х кто́ досто́йно восхвали́ти мо́жет? Те́мже ни а́з вы́ше ума́ дерза́ю, то́кмо Ангельское приношу́ целова́ние: ра́дуйся.

Пе́снь 3.

Ирмос: Утверди́ мене́, Христе́, на недви́жимом ка́мени за́поведей Твои́х и просвети́ мя све́том лица́ Твоего́: не́сть бо свя́т, па́че Тебе́, Человеколю́бче.

Припев: Преподобнии Марко и Феофиле, молите Бога о нас.

Утвержде́н на ка́мени за́поведей Госпо́дних, до́м Ду́ха Свята́го хотя́ бы́ти, окова́л еси́ чре́сла твоя́ желе́зы, блаже́нне, е́же на вся́к де́нь, проходя́щи ду́шу твою́, разжже́ тя́ пе́ти: не́сть свя́т, па́че Тебе́, Го́споди.

Припев: Преподобнии Марко и Феофиле, молите Бога о нас.

Поста́вив врата́ — моли́тву чи́сту, и сте́ну тве́рду — поще́ние зе́льно, [от креста́ бо ме́дяна то́кмо пия́л еси́ во́ду], хра́м непристу́пен и стра́шен враго́м показа́лся еси́, о́тче, и́хже до конца́ победи́в, с весе́лием воспева́л еси́: не́сть свя́т, па́че Тебе́, Го́споди.

Припев: Преподобнии Марко и Феофиле, молите Бога о нас.

Бде́ние, по́ст и препоя́сание чре́сл желе́зы, а́ки ору́жие, на ся́ прие́мь, к боре́нию борю́щия тя́ плотски́ми страстьми́ сме́рти изше́л еси́, те́мже даде́ тебе́ Госпо́дь облада́ти е́ю, я́ко взыва́л еси́: не́сть свя́т, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Аки пле́нник, сме́рть бя́ше тебе́, свя́те, нево́лею бо повину́ющися, возвраща́ше ме́ртвыя, и пребыва́ху жи́ви, до́ндеже повеле́л еси́ усну́ти па́ки, и до о́бщаго Воскресе́ния во гробе́х пребыва́ти.

И ны́не и при́сно и во ве́ки веко́в. Ами́нь.

Богородичен: Плене́нна мя́ су́ща неви́димыми враги́, свободи́, Влады́чице, ско́рым предста́нием Твои́м и си́лою, а́ки огне́м, о́ныя прогоня́ющею, я́ко да спасе́н бы́в Тобо́ю, вы́ну воспою́ Ти́: не́сть ины́я Предста́тельницы, ра́зве Тебе́, Пречи́стая Влады́чице ми́ру.

Седа́лен, гла́с 8:

Воздержа́нием живы́й, есте́ственныя стра́сти ду́ху покори́л еси́, бы́в Ангел во пло́ти и в зако́не повеле́нная де́лом соверши́в, те́мже прия́л еси́ чудотворе́ния да́р от Бо́га: ме́ртвыя сло́вом на живо́т воздвиза́ти. Преста́вився же са́м к животу́ ве́чному, моли́ о на́с, свя́те, изба́витися от ве́чныя сме́рти чту́щим любо́вию святу́ю па́мять твою́, Ма́рко досточу́дне.

Сла́ва, и ны́не, Богородичен:

Па́че естества́ заче́ншая и па́че естества́ ро́ждшая Зижди́теля Твоего́ и Бо́га, моли́ о на́с, при́сно согреша́ющих, да, свобожде́нни су́ще, любо́вию воспое́м Тя́, Чи́стая Де́во Мари́е.

Пе́снь 4.

Ирмос: Ве́лия та́йна Твоего́, Христе́, смотре́ния: сию́ бо свы́ше прови́дя богозри́тельно, Авваку́м изше́л еси́, вопия́ше Тебе́, во спасе́ние люде́й Твои́х, Человеколю́бче.

Припев: Преподобнии Марко и Феофиле, молите Бога о нас.

Ве́лия та́йна словесе́ Твоего́, Христе́, ре́кл бо еси́: ве́руяй в Мя́, дела́, я́же Аз творю́, и то́й сотвори́т. Якоже Са́м воздви́гл еси́ уме́ршаго Ла́заря сло́вом, та́ко и уго́днику Твоему́ да́л еси́ си́лу воздви́гнути уме́ршаго глаго́лом и возлия́ти еле́й на ся́ во удивле́ние все́м предстоя́щим, Человеколю́бче.

Припев: Преподобнии Марко и Феофиле, молите Бога о нас.

Бо́г на́ш ми́р е́сть, и средосте́ние вражды́ разруша́яй, да не бу́дет на раба́ Его́ вражда́ неугото́ванного ра́ди уме́ршему гро́ба, чудотворе́нием отъя́т зло́бу сию́, подви́гну бо ду́х уго́дника Своего́ рещи́ уме́ршему: бра́те, те́сно е́сть ме́сто, са́м подви́гнися и возли́й еле́й на ся́. И су́щу сло́ву де́лом, вси́ взыва́ху: сла́ва Ти́, Человеколю́бче.

Припев: Преподобнии Марко и Феофиле, молите Бога о нас.

В простоте́ се́рдца и в смире́нии глубо́це воззва́ преподо́бный, и Госпо́дь услы́ша и́, повеле́ ду́х сво́й ме́ртвому прия́ти и повеле́нное сотвори́ти, возлия́ бо еле́й на ся́, и отда́в сосу́д, па́ки у́спе, е́же вси́, со стра́хом и у́жасом ви́дяще, возопи́ша: сла́ва смотре́нию Твоему́, Человеколю́бче.

Сла́ва Отцу́ и Сы́ну и Свято́му Ду́ху:

Смире́ннаго Твоего́ пеще́рника, Го́споди, моли́тва прохожда́ше о́блаки, его́же и мы́ во умилостивле́ние Тебе́ приво́дим и про́сим: ми́лостив на́м бу́ди, рабо́м Твои́м, отыми́ вражду́ люде́й Твои́х, да́ждь ми́р Тво́й во спасе́ние на́ше, Человеколю́бче.

И ны́не и при́сно и во ве́ки веко́в. Ами́нь.

Богородичен: Яже Живо́т ве́чный Ро́ждшая и рождество́м Твои́м все́х оживотвори́вшая, на́с, грехо́вным я́дом умерщвле́нных, оживи́ и еле́ем ми́лости Твоея́ уще́дри, да вопие́м Ти́, Влады́чице: Ты́ еси́ вина́ и избавле́ние жи́зни на́шея.

Пе́снь 5

Ирмос: От но́щи у́тренююще, пое́м Тя́, Христе́, Отцу́ Собезнача́льна и Спа́са ду́ш на́ших, ми́р ми́рови пода́ждь, Человеколю́бче.

Припев: Преподобнии Марко и Феофиле, молите Бога о нас.

От но́щи у́тренюя в моли́тве к Бо́гу, блаже́нне, претружде́н, не угото́вал еси́ уме́ршему гро́ба, сего́ ра́ди ре́кл еси́: иди́, рцы́ уме́ршему, да пожде́т до у́тра, до́ндеже ископа́ю ме́сто, и погребе́м и́, прославля́юще Человеколю́бца.

Припев: Преподобнии Марко и Феофиле, молите Бога о нас.

По словеси́ твоему́, преподо́бне, по́сланный егда́ рече́: бра́те, глаго́лет ти́ Ма́рко: еще́ да поживе́ши ма́ло. Абие отве́рзе о́чи уме́рый все́м зря́щим и пребы́сть до у́тра. Оле чудесе́! я́коже Ты́ Са́м, Бо́же, облада́еши живото́м и сме́ртию, си́це и рабо́м Свои́м подае́ши облада́ти, Человеколю́бче.

Припев: Преподобнии Марко и Феофиле, молите Бога о нас.

В нощи́ и во дни́ тружда́яся, угото́вал еси́ погребе́нию ме́сто и ре́кл еси́, свя́те: глаго́лите уме́ршему — отда́ждь ду́х тво́й Бо́гу. Он же, послу́шав тя́, смежи́в очеса́, преста́вися, и вси́, уди́вльшеся сло́ва твоего́ си́ле, просла́виша Бо́га Человеколю́бца.

Сла́ва Отцу́ и Сы́ну и Свято́му Ду́ху:

Стра́нно чу́до: ме́ртвым воздвиза́ти уме́ршия; но лю́бящему Бо́га вся́ поспе́шествуют во благо́е. Яже вся́ к созида́нию на́шему быва́ют, да тепле́йшею любо́вию притеце́м ко Влады́це и со преподо́бными просла́вим Его́, я́ко благоутро́бнаго Человеколю́бца.

И ны́не и при́сно и во ве́ки веко́в. Ами́нь.

Богородичен: Стра́нно чу́до: ка́ко во чре́ве пло́тстем Огнь Боже́ственный прия́ла еси́, Де́во, и пребыла́ неопали́ма, я́коже иногда́ купина́ несгара́ема, е́же все́ бы́сть, да на Тебе́, Чи́стая, сбу́дется смотре́ния Бо́жия та́инство.

Пе́снь 6.

Ирмос: Проро́ка спа́сл еси́ от ки́та, Человеколю́бче, и мене́ из глубины́ прегреше́ний возведи́, молю́ся.

Припев: Преподобнии Марко и Феофиле, молите Бога о нас.

Славолю́бия оскверне́ние очища́я, повеле́л еси́, блаже́нне, уме́ршему Иоа́нну, да вы́шшее Фео́филу пода́ст ме́сто. О, чудесе́! послу́шав, ме́ртвый пре́йде на ни́жнее ме́сто, и вси́ испо́лнишася стра́ха, ты́ же, свя́те, со смире́нием поклони́лся еси́, глаго́ля: от истле́ния вражды́ возведи́ мя, Бо́же, молю́тися.

Припев: Преподобнии Марко и Феофиле, молите Бога о нас.

Припа́дающу к нога́м твои́м Фео́филу и прося́щу оставле́ния, ре́кл еси́, преподо́бне: Госпо́дь, Са́м отъе́мляй вражду́, повеле́ уме́ршему за любо́вь пода́ти тебе́ старе́йшинство, ты́ же да изведе́шися от мы́сленнаго ки́та, славолю́бием тя́ пояда́ющаго, Человеколю́бцу моли́ся.

Припев: Преподобнии Марко и Феофиле, молите Бога о нас.

Бы́сть, а́ки гро́м, сло́во твое́, о́тче, его́же стра́ха убоя́ся Фео́фил, мне́в, я́ко ту́ па́д, у́мрет, но, ма́ло прише́д в себе́ и вше́д в ке́ллию, пребы́сть про́чая ле́та пла́чася, глаго́ля: от истле́ния мя́, Бо́же, возведи́.

Сла́ва Отцу́ и Сы́ну и Свято́му Ду́ху:

Наказа́ние твое́, о́тче блаже́ннейший, в толи́кое приведе́ смире́ние Фео́фила, я́ко никто́же можа́ше его́ от пла́ча востягну́ти, но бы́ша ему́ сле́зы бра́шно и питие́, де́нь бо и но́щь взыва́ше: от грехопаде́ния мя́, Бо́же, возведи́, молю́тися.

И ны́не и при́сно и во ве́ки веко́в. Ами́нь.

Богородичен: В тле́ние славолю́бия ми́ попо́лзшуся и умиле́ния неиму́щу, пода́ждь, Влады́чице, сле́з то́ки, да, омы́в оскверне́ние души́, чи́ст явлю́ся лицу́ Бо́жию, внегда́ яви́тимися сла́ве Его́.

Конда́к, гла́с 8:

Врача́ изря́дна и чудотво́рца, любо́вию, ве́рнии, ублажи́м, прося́ще его́, да моли́твами свои́ми уврачу́ет на́ша стра́сти, душе́вныя и теле́сныя, и́мать бо на сие́ благода́ть от Бо́га, и прого́нит ду́хи лука́выя от все́х, ве́рно ко гро́бу его́ притека́ющих и зову́щих: ра́дуйся, Ма́рко, цели́телю не́мощей на́ших.

Икос:

Ангелов и всея́ тва́ри Творца́ воспе́вша и ангелови́дным житие́м Тому́ на земли́ всегда́ послужи́вша, со Ангелы же ны́не трисвяту́ю пе́снь непреста́нно пою́ща, восхваля́ем тя́, всеблаже́нне, си́це: ра́дуйся, отве́ргшийся все́х земны́х веще́й; ра́дуйся, у́м сво́й ве́сь горе́ впери́вый. Ра́дуйся, я́ко ме́ртв, жи́во погребы́йся в пеще́ре; ра́дуйся, я́ко в то́й мно́ги труды́ и по́ты излия́вый. Ра́дуйся, мно́гим святы́м в не́й гро́бы ископа́вый; ра́дуйся, ме́ртвыя повеле́нием свои́м воздви́гнувый. Ра́дуйся, Иоа́нна ме́ртваго подви́гнутися от ме́ста сотвори́вый; ра́дуйся, Фео́фила ко спасе́нию наста́вивый. Ра́дуйся, кре́ст ве́лий и по́яс желе́зен нетя́жестне на себе́ носи́вый; ра́дуйся, смире́нное те́ло свое́ просфиро́ю еди́ною и водо́ю уме́ренною с креста́ дово́льствовавый. Ра́дуйся, кресто́м свои́м мно́ги стра́сти врачу́яй; ра́дуйся, ко гро́бу твоему́ притека́ющим все́м по́мощь в ну́ждах подава́яй. Ра́дуйся, Ма́рко, цели́телю не́мощей на́ших.

Пе́снь 7.

Ирмос: Образу служи́ти, мусики́йскому согла́сию созыва́ющу лю́ди, от пе́сней Сио́нских пою́ще оте́чески, о́троцы Дави́довы мучи́телево разори́ша злочести́вое веле́ние и пла́мень в ро́су преложи́ша, пе́снь воспева́юще: превозноси́мый отце́в и на́ш Бо́же, благослове́н еси́.

Припев: Преподобнии Марко и Феофиле, молите Бога о нас.

Лицу́ Бо́жию яви́тися егда́ прихожда́ше ти́ вре́мя, призва́л еси́, о́тче, блаже́ннаго Фео́фила, ре́к: прости́ ми́, я́ко оскорби́х тя́, се́ бо отхожду́ уже́, ты́ же моли́ за мя́, да сподо́бимся о́ба со святы́ми пе́ти: Бо́же, благослове́н еси́.

Припев: Преподобнии Марко и Феофиле, молите Бога о нас.

Словеса́ твоя́, свя́те, пла́чущему рыда́ния приложи́ша, и́бо не терпя́ себе́ оста́вление от тебе́ бы́ти, глаго́лаше: ве́м, я́ко услы́шит тя́ Госпо́дь, а́ще восхо́щеши поя́ти мя́ с собо́ю пе́ти: Бо́же, благослове́н еси́.

Припев: Преподобнии Марко и Феофиле, молите Бога о нас.

Пла́чущегося утеша́я, ре́кл еси́, преподо́бне, да не скорби́т, ни да и́щет ви́дети чу́вственнаго све́та, зане́ мы́сленныма очи́ма, о гресе́х рыда́я, све́т разу́мный уви́дит и сподо́бится блаже́нства пла́чущих, пла́чущии бо уте́шатся, пою́ще: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Во утеше́ние скорбя́щему извести́л еси́, о́тче, зна́мение отше́ствия его́ к Бо́гу сие́: я́ко пре́жде тре́х дне́й кончи́ны своея́ прозре́ти и́мать, и та́ко пре́йдет к неплаче́вным место́м в непристу́пном све́те со святы́ми пе́ти: Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: В ско́рби отча́яния моего́ су́щи, утеше́ния не и́мам, те́м к Тебе́, Влады́чице ми́ра, прибега́ю, глаго́ля: Ра́досте моя́, изба́ви мя́ от обыше́дших мя́, обыдо́ша бо мя́ пси́ мно́зи и не́сть могу́щаго изъя́ти мя́, ра́зве Тебе́, Благослове́нная Де́во.

Пе́снь 8.

Ирмос: В пла́мени о́гненне горя́щия пе́щи сохра́ншаго де́ти и во зра́це Ангела Снизше́дшаго к ни́м, по́йте Го́спода и превозноси́те Его́ во ве́ки.

Припев: Преподобнии Марко и Феофиле, молите Бога о нас.

Святы́й Ду́х, проро́чествия да́р подава́яй, приведе́ в сбы́тие словеса́ твоя́, преподо́бне, по кончи́не твое́й, ду́х сво́й преда́л еси́ в ру́це Бо́гу, Ему́же ны́не предстоя́, пое́ши с проро́ки: Го́спода по́йте и превозноси́те Его́ во ве́ки.

Припев: Преподобнии Марко и Феофиле, молите Бога о нас.

Словеса́ твоя́ бы́ша, преподо́бне, блаже́нному Фео́филу па́че сребра́ разжже́на, я́же помина́я, а́ще и сугу́бо рыда́ше, но не возмо́же угаси́ти, я́ко распаля́хуся в се́рдце, и́бо по вся́ дни́ ожида́ше кончи́ны своея́, хотя́й отыти́ ко Го́споду, хвала́ми превозноси́ти Его́ во ве́ки.

Припев: Преподобнии Марко и Феофиле, молите Бога о нас.

Ве́лий умиле́ния да́р и неоскудева́емый исто́чник словесы́ твои́ми, блаже́нне, ископа́л еси́ в се́рдце Фео́фила: ели́ко бо в сосу́д излива́ше, толи́ко мно́жахуся сле́зныя струи́, и́миже погаси́ стра́стный пла́мень, возбраня́ющий пе́ти Го́спода во ве́ки.

Сла́ва Отцу́ и Сы́ну и Свято́му Ду́ху:

Тро́ичен: Трисия́тельный Све́те, Тро́ице Свята́я, обеща́ние исполня́я уго́дника Твоего́ Ма́рка, просвети́л еси́ зе́ницы пла́чущаго, и пра́во узре́ све́т чу́вственныма очи́ма, мы́сленныма же отше́ствие свое́ к Тебе́, Бо́гу своему́, Ему́же все́м се́рдцем жела́ше пе́ти со святы́ми во ве́ки.

И ны́не и при́сно и во ве́ки веко́в. Ами́нь.

Богородичен: Све́т и́стинный ро́ждшая, Пречи́стая, во тме́ мя́ грехолю́бия заблужда́юща и ви́дения покая́ния неиму́ща, освети́ благода́тию Твое́ю: свеща́ бо еси́, явля́ющая ско́ро су́щим во тме́ све́т, Богоро́дице Де́во.

Песнь 9

Ирмос: Тебе́, све́тлую свещу́ и Ма́терь Бо́жию, пречу́дную сла́ву и вы́шшую все́х тва́рей, пе́сньми велича́ем.

Припев: Преподобнии Марко и Феофиле, молите Бога о нас.

По словеси́ твоему́, свя́те, пре́жде тре́х дне́й уве́дав отше́ствие свое́, Фео́фил покая́ния словеса́ изрече́, а́бие же во утоле́ние рыда́ния того́, предста́в, Ангел показа́ сосу́д, напо́лнен слеза́ми, прия́тно Бо́гу покая́ние его́ ублажа́я.

Припев: Преподобнии Марко и Феофиле, молите Бога о нас.

Твои́м наказа́нием, о́тче, Фео́фил богому́дрый в жи́зни свое́й се́я слеза́ми, преста́вився же к оби́телем небе́сным, ра́достныя пожина́ет кла́сы и трудо́в свои́х ны́не прие́млет возме́здие, от все́х во ве́ки ублажа́емь.

Припев: Преподобнии Марко и Феофиле, молите Бога о нас.

В юдо́ле плаче́вне изво́листе, отцы́ достоблаже́ннии, вся́ ле́та живота́ своего́ слеза́ми ку́плю де́яти, да взы́щете многоце́ннаго би́сера — Иису́са, Имже от ве́чныя сме́рти искупи́вшеся, ны́не на ме́сте све́тле ра́дуетеся, ублажа́еми.

Сла́ва Отцу́ и Сы́ну и Свято́му Ду́ху:

Дво́ицу оте́ц, Ма́рка и Фео́фила, приво́дим Тебе́ в моли́тву, в двои́х хоте́ниих и де́йствиих Су́щему, Христе́ Бо́же, и́хже моле́ние прие́мь и от вра́жия на́с кова́рства сохраня́я, Ду́хом Твои́м Святы́м наста́ви на́с во ве́ки Тя́ велича́ти.

И ны́не и при́сно и во ве́ки веко́в. Ами́нь.

Богородичен: Ка́ко Тя́ ублажи́м, Чи́стая Де́во, Юже небе́сныя си́лы по достоя́нию блажи́ти не мо́гут? Ка́ко просла́вим сла́вимую от все́х родо́в и Благослове́нную христиа́н все́х Ма́терь?

Свети́лен:

Бы́ша сле́зы твоя́, а́ки благово́нное мѵ́ро, и́миже славолю́бия оскверне́ние очи́стил еси́, и ны́не в вы́шних оби́телех, я́ко звезда́ пресве́тлая, сия́я, озари́ на́с, во тме́ грехолю́бия живу́щих, и моли́, Фео́филе, о́тче на́ш, с Ма́рком блаже́нным Человеколю́бца Христа́, да, во све́те повеле́ний Его́ зде́ ходя́ще, сподо́бимся зре́ти све́т небе́сныя сла́вы.

Стихи́ры преподо́бных, гла́с 8.

Вся́кую сла́дость жития́ сего́ / вы́шния ра́ди сла́дости оплева́л еси́, / жесто́кому пути́ достоблаже́нных оте́ц поревнова́в, / и страсте́й пе́щь мно́гими твои́ми труды́ / угаси́ти потща́лся еси́, / бы́в мона́шествующих честно́е украше́ние, / те́мже со Ангелы ны́не / в вы́шних ра́дуяся, / моли́ся о на́с, / Ма́рко преподо́бне.

Узким и те́сным путе́м / от земли́ в сла́ву небе́сную ше́ствовал еси́, / мно́гим по́двигом и ско́рбем / любве́ ра́ди Бо́жия предава́лся еси́, / те́м ны́не Влады́чню престо́лу предстоя́, / наслажда́ешися Того́ све́тлостей, / и на́м, у́бо све́тло твою́ па́мять чту́щим, / моли́твами твои́ми / пода́ждь Боже́ственных прича́стие / и ве́чныя ра́дости прия́тие, / Ма́рко преподо́бне.

Возше́дши мы́сленно / к Све́ту Незаходи́мому, сла́вне, / и тмы́ жития́ изба́вльшися, / Вседержи́телю, Трисо́лнечному Све́ту, / с вы́шними чи́нми предста́л еси́, / отню́дуже низпуща́емыя све́тлости / луче́ю озари́тися и на́м, / ра́це моще́й твои́х кла́няющимся / и честно́е успе́ние твое́ сла́вящим, / испроси́ моли́твами твои́ми, / Ма́рко преподо́бне.