10 января.

Канон святым двадцати тысячам мучеников, в Никомидии сожженным.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святы́м, гла́с 2:

Страстоте́рпцы Госпо́дни, блаже́нна земля́, напи́вшаяся кровьми́ ва́шими, и свя́та селе́ния, прии́мшая телеса́ ва́ша: в по́двизе бо врага́ победи́сте и Христа́ со дерзнове́нием пропове́дасте. Того́, я́ко бла́га, моли́те спасти́ся, мо́лимся, душа́м на́шим.

Кано́н. Гла́с 1.

Пе́снь 1.

Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Святии мученицы Никомидийстии, молите Бога о нас.

Мно́жество многочи́сленное честны́х му́чеников, мно́жество очи́стите мно́гих прегреше́ний мои́х хода́тайством ва́шим и дади́те сло́во воспе́ти ва́ше торжество́.

Припев: Святии мученицы Никомидийстии, молите Бога о нас.

Свети́ла пресве́тлая Це́ркве, добропобе́днии му́ченицы, свои́ми у́ды Христа́ просла́вивше, светоно́сною ны́не ва́шею па́мятию просла́вистеся.

Припев: Святии мученицы Никомидийстии, молите Бога о нас.

Ве́ра Боже́ственная страда́льцев неве́рных безбо́жное мучи́тельство разори́ и потреби́ де́монское лука́вое противле́ние благода́тию.

Сла́ва Отцу́ и Сы́ну и Свято́му Ду́ху:

Бо́га Всемо́щнаго, пло́ть прие́мша и сме́рть разруши́вша сме́ртию, му́ченицы, испове́давше, умерщвле́ни бы́вше, жи́знь прия́сте непреста́нную.

И ны́не и при́сно и во ве́ки веко́в. Ами́нь.

Богородичен: Пою́ Тя́, Всепе́тая Благослове́нная, Бо́га Препе́таго пло́тию ро́ждшую, велича́ющаго страда́льцы, врага́ победи́вшия.

Пе́снь 3.

Ирмос: Да утверди́тся се́рдце мое́ в во́ли Твое́й, Христе́ Бо́же, Иже над вода́ми не́бо утвержде́й второ́е и основа́вый на вода́х зе́млю, Всеси́льне.

Припев: Святии мученицы Никомидийстии, молите Бога о нас.

Красне́йше распаля́еми Христо́вою любо́вию, всехва́льнии, разже́гшуся огню́ ника́коже убоя́стеся, но в не́м сконча́вшеся, ку́пно просла́вистеся.

Припев: Святии мученицы Никомидийстии, молите Бога о нас.

Живы́м гла́сом Бо́га пропове́дающе, преще́ния безбо́жных не устраши́шася, но дете́й гла́с единому́дренно взыва́юще, всехва́льнии ору́жницы Христо́вы сконча́шася.

Сла́ва Отцу́ и Сы́ну и Свято́му Ду́ху:

Не убои́мся огня́ единора́бнаго, — до́блии вку́пе взыва́ху, ра́дующеся душе́ю, — Тебе́ ра́ди умерщвля́емся, уме́ршаго, и сме́рть, Спа́се, упраздни́вшего.

И ны́не и при́сно и во ве́ки веко́в. Ами́нь.

Богородичен: Да обожи́т челове́чество, Бо́г бы́сть Челове́к из Тебе́, Де́во Чи́стая, па́че сло́ва и смы́сла: сего́ ра́ди Тя́ согла́сно, ве́рнии, ублажа́ем.

Седа́лен, гла́с 1.

Во́инство, в числе́ двою́ тму́ му́чеников честву́емо, на́м возсия́, просвеща́ющее сердца́ и мы́сли благочести́вых ве́ры ра́ди. Разже́гшеся бо Боже́ственною любо́вию Влады́ки, кончи́ну святу́ю огне́м до́блии усе́рдно прия́ша.

Пе́снь 4.

Ирмос: Услы́шах, Го́споди, слу́х Тво́й и убоя́хся, разуме́х дела́ Твоя́, — проро́к глаго́лаше, — и просла́вих си́лу Твою́.

Припев: Святии мученицы Никомидийстии, молите Бога о нас.

Твое́й любви́ привяза́вше сердца́, Сло́ве, страстоте́рпцы, Тебе́ ра́ди умерщвля́еми, я́ко а́гнцы непоро́чнии, подража́теле стра́сти Твоея́ яви́шася.

Припев: Святии мученицы Никомидийстии, молите Бога о нас.

Упра́вивше, святи́и, ко приста́нищу спасе́ния ду́ши ва́ша Ду́хом, бу́ри убежа́сте идолонеи́стовства, блаже́ннии.

Сла́ва Отцу́ и Сы́ну и Свято́му Ду́ху:

Непрело́жни яви́стеся в по́двизе муче́ния, непоколеби́ми и неужа́сни, гони́телей противле́ние боже́ственною ве́рою победи́вше.

И ны́не и при́сно и во ве́ки веко́в. Ами́нь.

Богородичен: Изба́вльшеся Рождество́м Твои́м, Благослове́нная, пе́рвыя кля́твы, благослове́ние восприя́хом, и жи́знь, и избавле́ние, Тя́, Богоро́дицу, сла́вящии.

Пе́снь 5

Ирмос: Све́тлый на́м возсия́й Све́т Присносу́щный, у́тренюющим о судьба́х за́поведей Твои́х, Влады́ко Человеколю́бче, Христе́, Бо́же на́ш.

Припев: Святии мученицы Никомидийстии, молите Бога о нас.

Светоявле́нна па́мять просия́ страстоте́рпец Твои́х и просвети́ земны́я концы́ чуде́с Боже́ственными раздая́нии, Христе́ Бо́же на́ш.

Припев: Святии мученицы Никомидийстии, молите Бога о нас.

Священноде́телие, же́ртву принося́ще, заколе́ния соверше́нная принесо́шася, всесожига́еми, со все́ми ины́ми мно́жайшими му́ченики Христа́ велича́юще.

Сла́ва Отцу́ и Сы́ну и Свято́му Ду́ху:

Хра́ми Бо́жии су́ще, святи́и, креще́нием кончи́ну свя́ту вку́пе прия́сте в дому́ Боже́ственнем и к небе́сному хра́му взя́стеся.

И ны́не и при́сно и во ве́ки веко́в. Ами́нь.

Богородичен: Да Бо́г с вы́шними совокупи́т попо́лзшияся преступле́нием в вели́к ро́в, во Твою́ утро́бу всели́ся, Всенепоро́чная, и пло́ть бы́сть.

Пе́снь 6.

Ирмос: Проро́ка Ио́ну подража́я, вопию́: живо́т мо́й, Бла́же, свободи́ из тли́ и спаси́ мя, Спа́се ми́ра, зову́ща: сла́ва Тебе́.

Припев: Святии мученицы Никомидийстии, молите Бога о нас.

Верхо́вник свяще́нных бы́л еси́ люде́й и предпосла́л еси́ я́ в ра́дости на небеса́, пострада́вшия, священному́чениче Анфи́ме сла́вне.

Припев: Святии мученицы Никомидийстии, молите Бога о нас.

Яко зла́то чи́сто посреди́ огня́, благоче́стие ва́ше страда́льческое Иису́су позна́ся, со́лнца мно́жае облиста́ющее.

Сла́ва Отцу́ и Сы́ну и Свято́му Ду́ху:

Умертви́вшеся пло́тию, жи́знь и́стинную насле́довасте, му́дрии, со Христо́м су́ще, показа́вшим вы́ си́льнейшия му́к.

И ны́не и при́сно и во ве́ки веко́в. Ами́нь.

Богородичен: По рождестве́ вои́стинну, я́ко пре́жде рождества́, Мари́е, си́лою из Тебе́ вопло́щшагося Иису́са пребыла́ еси́ Де́ва: чу́до вои́стинну пресла́вно.

Конда́к, гла́с 2.

Тве́рди душе́ю по ве́ре, святи́и, огне́м страда́ние прие́мше, две́ тме́ страда́лец вопию́ще Ро́ждшемуся от Де́вы: приими́ всесожже́ния на́ша за Тя́, я́коже да́ры пе́рсских царе́й, зла́то, и сми́рну, и лива́н, Преве́чный Бо́же.

Пе́снь 7.

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Припев: Святии мученицы Никомидийстии, молите Бога о нас.

Смотря́юще еди́на, я́же та́мо, блаже́ннии, пребыва́ющая си́лою Боже́ственною, я́коже трие́ в Вавило́не боже́ственнии о́троцы, огня́ вы́шшии яви́стеся, Боже́ственным све́том просвеща́еми.

Припев: Святии мученицы Никомидийстии, молите Бога о нас.

Глаго́л мучи́телев безслове́сный, му́дрии, поху́ливше, со свяще́нными жена́ми, и приноше́ние я́ко и́стинно боже́ственными младе́нцы, приноше́ния всеце́ла Царю́ все́х принесо́стеся.

Сла́ва Отцу́ и Сы́ну и Свято́му Ду́ху:

Просвеще́ние зна́ния Христо́ва предстоя́щи вну́трь души́ всеблагогове́йно, те́мный безбо́жия о́блак вои́стинну страда́льцы проидо́сте и в ве́чный све́т приидо́сте.

И ны́не и при́сно и во ве́ки веко́в. Ами́нь.

Богородичен: Вы́шши яви́лася еси́ небе́с, ро́ждшая все́х Влады́ку и Бо́га, Его́же приле́жно моля́щи не преста́й, Всесвята́я Чи́стая, спасти́ ве́рою те́плою песносло́вящия Тя́.

Пе́снь 8.

Ирмос: Песносло́вцы в пещи́ спа́сшаго де́ти и громопла́менную прело́жшаго на ро́су, Христа́ Бо́га по́йте и превозноси́те во вся́ ве́ки.

Припев: Святии мученицы Никомидийстии, молите Бога о нас.

То́чат Боже́ственнаго благово́ния врачева́ние мѵ́ра му́чеников мо́щи и страсте́й смра́д отъе́млют ве́рою песносло́вящих Тя́, Христа́, во ве́ки.

Припев: Святии мученицы Никомидийстии, молите Бога о нас.

Яви́стеся, я́ко шипцы́, страда́льцы красне́йшии, посреде́ ходя́ще огня́ и усе́рдно зову́ще: по́йте и превозноси́те Христа́ во ве́ки.

Сла́ва Отцу́ и Сы́ну и Свято́му Ду́ху:

Юноши, вку́пе и де́вы, и ста́рцы, и ю́нии, младе́нцы святи́и, же́н же мно́жество безчи́сленное вы́шнее улучи́ша ликова́ние, вку́пе пострада́вше.

И ны́не и при́сно и во ве́ки веко́в. Ами́нь.

Богородичен: Иезеки́иль Тя́ две́рь зри́т заключе́нну, Де́во, Еюже про́йде Иису́с, всели́выйся во утро́бе Твое́й и пло́ть от Твои́х крове́й поне́с неслия́нно.

Песнь 9

Ирмос: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Припев: Святии мученицы Никомидийстии, молите Бога о нас.

Яко вольнозакла́ннии а́гнцы, всесожго́стеся вку́пе, и, я́ко же́ртвы чи́стыя, закла́нному Влады́це о на́с, земноро́дных, добропобе́днии му́ченицы, приведо́стеся, и венцы́ побе́ды досто́йно прия́сте вку́пе.

Припев: Святии мученицы Никомидийстии, молите Бога о нас.

Со святы́ми проро́ки, с честны́ми апо́столы и с ли́ки избра́нных предстоя́ще Ангел, мно́жество му́чеников свяще́нных, Го́споду моли́теся, е́же спасти́ от напа́стей и бе́д ве́рою блажа́щия ва́с.

Сла́ва Отцу́ и Сы́ну и Свято́му Ду́ху:

Со́лнечных лу́чь свяще́нная ва́ша па́мять мно́жае сия́ет, страда́льцы, де́монскую тму́ отгоня́щи при́сно и все́х просвеща́ющи, всехва́льнии, ве́рою и любо́вию по до́лгу блажа́щия ва́с.

И ны́не и при́сно и во ве́ки веко́в. Ами́нь.

Богородичен: Све́т ро́ждшая Боже́ственный, от Отца́ возсия́вший, омраче́нную мою́ ду́шу лестьми́ жития́ и бы́вшую враго́м, Всенепоро́чная, игра́лище, уще́дри и све́том покая́ния спаси́тельнаго сподо́би, Чи́стая.

Молитва

Святи́и му́ченицы Никомидийстии! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.