9 сентября.
Канон преподобномученику Кукше и Пимену Постнику, Печерским.
![Кукше и Пимену Постнику, Печерским Кукше и Пимену Постнику, Печерским](img_i/017.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 3:
Му́ченическою кро́вию, свяще́нне Ку́кшо, в про́поведи Ева́нгелия со ученико́м ти́ блаже́нным, че́стне украси́выйся, и Пи́мине, в по́стничестве светоза́рне просия́вый, в еди́н де́нь и ча́с внидо́сте в све́т незаходи́мый, иде́же моли́теся Го́сподеви, да пода́ст на́м ве́лию ми́лость.
Кано́н преподо́бным, гла́с 4.
Пе́снь 1.
Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Припев: Преподобномученицы Кукшо и Пимене, моли́те Бо́га о нас.
Восхвали́ти па́мять святы́х равноче́стно кто́ возмо́жет? Честна́ бо сме́рть и́х пред Тобо́ю, я́ко друго́в Твои́х, Бо́же; оба́че а́з, ели́ко прия́х, хвалу́ и́м приношу́, и молю́ся Ти́, Влады́ко, препя́тия от мене́ отдали́в, си́лою Твое́ю укрепи́.
Припев: Преподобномученицы Кукшо и Пимене, моли́те Бо́га о нас.
Ку́кшо свяще́нне со ученико́м, сосу́ди свяще́ннии су́ще, пронесо́сте и́мя Христо́во пред неве́рными, и́хже, зна́меньми и чудесы́ уди́вльше, к богоразу́мию приведо́сте. Да бу́ду и а́з сосу́д в че́сть Влады́це моему́, моли́твами ва́шими мене́, отцы́, воспомози́те.
Сла́ва Отцу́ и Сы́ну и Свято́му Ду́ху:
Ва́с трие́х, Ку́кшо со ученико́м, и Пи́мине прозорли́ве, дерза́я дне́сь хвала́ми почита́ти, молю́: предста́ните Тро́ице Свято́й, о мне́ моля́щеся, я́ко да трие́х враго́в: ми́ра, пло́ти и диа́вола, изба́влься, явлю́ся до́бр во́ин, си́х победи́в.
И ны́не и при́сно и во ве́ки веко́в. Ами́нь.
Богородичен: Изба́вльшая челове́ки от наси́лия вра́жия пречи́стым рождество́м Твои́м, от нечи́стых помышле́ний изба́ви мя́, молю́ся, и спаси́, я́ко Человеколюби́ваго Бо́га Ма́ти.
Пе́снь 3.
Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Припев: Преподобномученицы Кукшо и Пимене, моли́те Бо́га о нас.
Весели́тся вели́кая Пече́рская Ла́вра, воспита́вшая ва́с в не́дрех свои́х, преподо́бнии отцы́, и любо́вию зове́т: Ку́кши и Пи́мина ра́ди, Христе́ мо́й, бу́ди ми́ в печа́ли прибе́жище и утвержде́ние.
Припев: Преподобномученицы Кукшо и Пимене, моли́те Бо́га о нас.
Мно́гим твои́м, о́тче, доброде́телем, мно́гия свы́ше да́ры после́доваху: что́ бо бо́лее, я́ко неве́рнаго в ве́ру обрати́ти? Вы́шше вои́стинну е́сть, не́жели воскреси́ти уме́ршаго.
Сла́ва Отцу́ и Сы́ну и Свято́му Ду́ху:
Яко апо́стол, прише́д в неве́рныя лю́ди, зна́меньми и чудесы́ удиви́л еси́ и́х, и си́м мно́гия обрати́в к Бо́гу, приве́л еси́, Ку́кшо, от тмы́ ко све́ту. Непостоя́нна мя́ су́ща, преподо́бне, моли́твами твои́ми утверди́.
И ны́не и при́сно и во ве́ки веко́в. Ами́нь.
Богородичен: Апо́столом сла́во и му́чеником добро́то, сла́вы небе́сныя ча́сти не лиши́ мя, и сподо́би добро́ты тоя́, хода́тайством Пи́мина и Ку́кши, Де́во Ма́ти Отрокови́це.
Седа́лен, гла́с 2:
Да́ры любве́ святи́и Твои́ прие́мше, в же́ртву благово́нну Тебе́, Христе́, принесо́ша: Пи́мин — чистоту́ и воздержа́ние, а́ки благоприя́тну ма́слину, Ку́кша же — кро́вь, излия́нную Ева́нгелия ра́ди, а́ки гро́зд ло́зный; те́мже досто́йно че́сти небе́сныя сподо́бишася, я́ко до́брии подви́жницы.
Сла́ва, и ны́не, Богородичен:
Еле́я любве́ Тебе́ не принесо́х, Бо́же мо́й, те́мже ни са́м ча́ю обрести́ от Тебе́ ми́лость, но бла́гости ра́ди Твоея́, Христе́ мо́й, и хода́тайством Пречи́стыя Твоея́ Ма́тере поми́луй и спаси́ мя.
Пе́снь 4.
Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Припев: Преподобномученицы Кукшо и Пимене, моли́те Бо́га о нас.
Воздви́гшеся бра́нию на мироде́ржца, ополчи́стеся, отцы́ всеблаже́ннии, и прогна́сте враги́ дале́че от челове́к, чудоде́йствием же ва́шим мно́гия приведо́сте ко Христу́, Ему́же пое́м: сла́ва си́ле Твое́й, Го́споди.
Припев: Преподобномученицы Кукшо и Пимене, моли́те Бо́га о нас.
Ка́плями благода́ти Бо́жия свы́ше ороше́н сы́й, священному́чениче Ку́кшо, о́блаки дождено́сныя своди́л еси́, и пролива́ху многоту́чныя на земли́ ка́пли; ка́плями моли́тв твои́х ороси́ и на́с, пою́щих: сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху:
Пи́мине, дея́ний челове́ческих, из дале́че быва́емых, Ду́хом Бо́жиим прови́дче, та́йная дела́ серде́ц на́ших, в забве́нии оста́вльшаяся, на па́мять на́м приведи́. Аще бо и дале́че ны́не еси́, но мо́жеши благода́тию Бо́жиею предста́тельствовати, тя́ на по́мощь призыва́ющим и пою́щим: сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: Бу́ди ми́ в печа́ли ско́рое посеще́ние, Пречи́стая Де́во, Ты́ бо ра́дость па́че естества́ родила́ еси́, посети́вшу на́с Восто́ку свы́ше, Имже просве́щшеся, — ра́дуйся, — Тебе́ прино́сим.
Пе́снь 5
Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Припев: Преподобномученицы Кукшо и Пимене, моли́те Бо́га о нас.
Ты́, преподо́бне Ку́кшо, е́зеро злове́рия изсуши́л еси́, и изсхо́ша му́тныя во́ды, со́лнцу благове́рия в Вя́тчанех возсия́вшу; уста́ви зло́бныя пото́ки моли́твами твои́ми и на́м, ве́рою воспева́ющим тя́.
Припев: Преподобномученицы Кукшо и Пимене, моли́те Бо́га о нас.
Якоже неду́жныя сло́вом твои́м исцели́л еси́, си́це и на́с тое́южде благода́тию, от Бо́га ти́ да́нною, посети́ и посо́бствуй в неду́зех душе́вных, любо́вию па́мять твою́, Пи́мине, воспева́ющих.
Сла́ва Отцу́ и Сы́ну и Свято́му Ду́ху:
Сла́ву воздади́м, лю́дие, в вы́шних су́щему Бо́гу, просла́вльшему святы́х Свои́х, и мо́лим, да моли́твами и́х сла́вы небе́сныя и мы́ не лиши́мся, ра́достно па́мять и́х воспева́юще.
И ны́не и при́сно и во ве́ки веко́в. Ами́нь.
Богородичен: Сла́ву Твою́ кто́ испове́сть, Чи́стая Де́во? Тя́ бо сла́вят небе́сныя си́лы, и мы́, припа́дающе, земни́и, сла́вим Тя́ и велича́ем, пою́ще: ра́дуйся, сла́во правосла́вных, Чи́стая.
Пе́снь 6.
Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Припев: Преподобномученицы Кукшо и Пимене, моли́те Бо́га о нас.
Пожре́ти хотя́щия мы́сленному ки́ту неве́рныя лю́ди изъя́л еси́, о́тче, святы́м креще́нием, и Це́рковь от ни́х устро́ив, очи́стил еси́ ту́ от ре́бр Спа́совых ми́лостивно исте́кшею Кро́вию.
Припев: Преподобномученицы Кукшо и Пимене, моли́те Бо́га о нас.
На неду́жныя ру́ки возложа́т, — я́коже рече́ Писа́ние, — и здра́ви бу́дут. Си́це по вла́сти, от Христа́ тебе́ да́нной, сло́вом свои́м боля́щую бра́тию исцели́л еси́, и́же, отхожда́ху, сла́вяще Да́вшаго тебе́ вла́сть сицеву́ю. Те́мже и на́с, неду́гующих душе́ю, посети́ и сло́вом твои́м исцели́, Пи́мине блаже́ннейший.
Сла́ва Отцу́ и Сы́ну и Свято́му Ду́ху:
Досто́йно восхвали́ти ва́с, преблаже́ннии отцы́, я́ко мно́го потруди́стеся зде́, кто́ возмо́жет? Хвали́ми же есте́ во сла́ве небе́сной, и ра́дуетеся на ло́жах ва́ших во све́те присносу́щном. Моли́теся, да и мы́ с ва́ми бу́дем, очи́стившеся от пречи́стых ре́бр Спа́совых исте́кшею Кро́вию.
И ны́не и при́сно и во ве́ки веко́в. Ами́нь.
Богородичен: Хва́лим Тя́, блажа́ще, христиа́нстии ро́ди, и любо́вию зове́м: Влады́чице, предста́ни погруже́нным в ти́не скве́рных де́л, а́ще бо и окаля́хом ду́ши на́ша, но Ты́ мо́жеши омы́ти на́с, искупле́нных Сы́на Твоего́ честно́ю Кро́вию.
Конда́к, гла́с 4:
Свети́ла разу́мная, соше́дшеся, хвала́ми воспое́м, лю́дие, просия́ли бо су́ть в ми́ре се́м: Пи́мин — мно́гими по́двиги, Ку́кша же со ученико́м — про́поведию сло́ва; и си́и трие́, единоу́мно предстоя́ще Святе́й Тро́ице, я́ко со́лнце сия́ют и просвеща́ют любо́вию па́мять и́х восхваля́ющих.
Пе́снь 7.
Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припев: Преподобномученицы Кукшо и Пимене, моли́те Бо́га о нас.
Яко единоу́мное сосло́вие, отцы́ святи́и, а́ще и дале́че отстоя́ те́лом, но ду́хом совоку́плени, ко Го́споду востеко́сте вку́пе воспе́ти: благослове́н еси́ в хра́ме сла́вы Твоея́, Го́споди.
Припев: Преподобномученицы Кукшо и Пимене, моли́те Бо́га о нас.
Твое́, блаже́нне Ку́кшо, со ученико́м от неве́рных Вя́тчан усече́ние, Пи́мин дале́че отстоя́, прозре́л, и велегла́сно посреде́ це́ркве Пече́рския воззва́: бра́т на́ш Ку́кша в се́й де́нь убие́н е́сть, в ча́с приноси́мыя же́ртвы; сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху:
Ду́хом Святы́м проре́к Ку́кши и ученика́ от неве́рных убие́ние, и са́м ду́х сво́й преда́л в ру́це Бо́гу. Трие́х си́х преподо́бных ра́ди, и на́ша ду́хи приими́ в сла́ву Твою́, Го́споди.
И ны́не и при́сно и во ве́ки веко́в. Ами́нь.
Богородичен: Ду́ха Свята́го наше́ствием Прие́мшая во чре́ве, в ча́с, егда́ и́мамы преда́ти ду́хи на́ша Го́споду и предста́ти суди́щу Его́, хода́тайством Твои́м, предста́ни и умоли́ о на́с бла́гость Его́, ничто́же бо невозмо́жно хода́тайству Твоему́.
Пе́снь 8.
Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.
Припев: Преподобномученицы Кукшо и Пимене, моли́те Бо́га о нас.
Ру́це распросте́рше к Бо́гу, о на́с, пою́щих па́мять ва́шу, моли́теся приле́жно, отцы́ богоно́снии, я́ко да ва́шим хода́тайством во све́те присносу́щном обря́щемся зре́ти Го́спода.
Припев: Преподобномученицы Кукшо и Пимене, моли́те Бо́га о нас.
Ты́, священному́чениче Ку́кшо, со ученико́м ти́ честны́м, я́ко вино́ растворе́нно прине́сши кро́вь свою́, моли́ся, да изба́вимся наше́ствия враго́в, и́щущих на́шея кро́ве, и в ми́ре про́чее благослови́м Го́спода.
Сла́ва Отцу́ и Сы́ну и Свято́му Ду́ху:
Пи́мине богому́дре, прови́дяй дале́че и гряду́щая провозвеща́яй, я́ко проро́к Бо́жий, от гряду́щих на ны́ за прегреше́ния зо́л изми́ ско́рым твои́м моле́нием ко Влады́це и сподо́би в небе́сных селе́ниих благослови́ти Го́спода во ве́ки.
И ны́не и при́сно и во ве́ки веко́в. Ами́нь.
Богородичен: Истинно прови́де Тя́ преподо́бный Бо́жий, я́ко в ми́ре живу́щим помога́еши лю́дем вы́ну; мо́лим Тя́, Влады́чице: помози́ и на́м, немощны́м, да си́лою о Тебе́ препоя́санни, возмо́жем благослови́ти Го́спода во ве́ки.
Песнь 9
Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.
Припев: Преподобномученицы Кукшо и Пимене, моли́те Бо́га о нас.
Пропове́дуемый тобо́ю, свяще́нне Ку́кшо, Христо́с неве́рующим бы́сть ка́мень претыка́ния, обличе́ние бо твое́ о злове́рии и́х в собла́зн и доса́ду вмени́ша; сего́ ра́ди бу́ии, несмы́сленно на тя́ со ученико́м твои́м напа́дше, мече́м главы́ ва́ша отсеко́ша. Те́м ва́с, я́ко за Христа́ кро́вь свою́ пролия́вших, ку́пно велича́ем.
Припев: Преподобномученицы Кукшо и Пимене, моли́те Бо́га о нас.
Ты́, преблаже́нне Пи́мине, терпе́нием на Христе́ — Ка́мени себе́ утверди́в, непреткнове́нно проше́л еси́ претыка́ющаго врага́ собла́зненныя се́ти, па́че же ты́я, а́ки паучи́ну, расто́ргл еси́, и к вы́шним преше́д, наслажда́ешися ве́чныя сла́вы, те́м тя́ велича́ем.
Сла́ва Отцу́ и Сы́ну и Свято́му Ду́ху:
Ду́хом совоку́пленни в вы́шних селе́ниих живу́ще, на на́с, ни́жних, призри́те, отцы́ преподо́бнии, зане́ вси́ от лю́таго борца́ в беда́х есмы́, от него́же моли́теся изба́витися на́м, я́ко па́мять ва́шу пе́сньми велича́ем.
И ны́не и при́сно и во ве́ки веко́в. Ами́нь.
Богородичен: От ве́ка несве́домую та́йну прие́мшая, и воплоще́нием Сло́ва Бо́жия откры́вшая ми́ру, молю́тися, Мари́е Богоневе́сто: от та́йных мои́х очи́сти мя́, да не откры́ются пред Ангелы и челове́ки в де́нь о́ный, егда́ прии́дет Сы́н Тво́й суди́ти ми́ру.
Свети́лен:
Дне́сь благонаро́читое на́м показа́ся вре́мя, в не́же пеще́ра свята́я пое́т богоно́сных, в не́йже и мы́, совоку́пльшеся, Ку́кшу со ученико́м сла́вим, Пи́мина пое́м, и Бо́га Еди́наго в Тро́ице, покланя́ющеся, восхваля́ем.
Сла́ва, и ны́не, Богородичен:
Времена́ и ле́та во Свое́й вла́сти Положи́вшаго, в ле́то ро́ждши, безму́жная Де́во, ле́та на́ша плету́щаяся, а́ки паучи́на, моли́твами преподо́бных до́бре устро́й, да Ро́ждшагося из Тебе́ сла́вим, и Тя́ любе́зно велича́ем.
Молитва священномученику Кукше Печерскому
Святый страстотерпче священномучениче Кукше, совершивый подвиги апостольския посреде обитания соплеменник твоих, наших предков, ихже ты просвещал еси светом истиннаго богопознания и по данней ти благодати Святаго Духа беса прогнавый, дождь с небесе сводивый, езеро изсушивый и сотворивый ина многа чудеса, запечатлев многострадальный свой подвиг мученическою кончиною! Приими от нас усердныя и умиленныя молитвы и вознеси я ко Престолу Святыя Троицы, идеже ты в лице святых предстоиши, яко да твоим ходатайством Милостивый Господь утвердит в мире, силе и славе страну Российскую, в чадех же Святыя Православныя Церкве да укрепит дух веры и благочестия, в пастырех ея да усугубит ревность к назиданию пасомых и да призрит милостивным оком на люди предстоящия и прибегающия ко твоей помощи. Ей, святый угодниче Божий! Вемы, яко велиих ради страданий твоих много может молитва твоя ко благосердию Владыки. Сего ради, яко чада твоя по вере, припадающе к раце честных и многоцелебных мощей твоих, дарованных по всеблагому промышлению Божию и по благословению первоиерарха Киевския Церкве в наше освящение и знамение твоего о нас заступления, молим тя в дусе сокрушеннем и смиреннем: не презри молений наших, изливаемых пред тобою, и вознеси я ко Всещедрому Богу, яко кадило благовонное, да твоим ходатайством выну почиет благодать Его на граде сем, в немже чтится преславное имя твое, и люди, живущие в нем, да сохранятся от глада, огня, смертоносныя язвы и напрасныя смерти, от всяких бед и напастей. Споспешествуй, священномучениче Кукше, святыми твоими молитвами честному братству святаго храма сего, да приумножится сие и процветает во славу Триединаго Бога, в похвалу твоего имене, и во благо Святыя Православныя Церкве, да тако вси, охраняеми твоим предстательством, мирно и благочестно поживут, славяще и благодаряще Единаго Истиннаго Бога во Святей Троице славимаго, Отца и Сына, и Святаго Духа. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Кукше и Пимену Постнику, Печерским Кукше и Пимену Постнику, Печерским](img_b/017.jpg)