7 сентября.

Канон святому апостолу Титу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Кано́н свята́го, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Апостоле Христов Тите, моли́ Бо́га о нас.

Вся́кими дарова́ньми обогати́вши тя́ благода́ть Ду́ха, пропове́дника боже́ственна апо́стола, в концы́ пропове́дающа, посла́ Сло́ва воплоще́ние, Ти́те пресла́вне.

Припев: Апостоле Христов Тите, моли́ Бо́га о нас.

Зарю́ боже́ственныя благода́ти прие́мь, облиста́л еси́, я́ко со́лнце, прему́дре, су́щим во тме́ душа́м, я́же просвети́л еси́, изыма́я неве́дения, пре́лести рабо́ты избавля́я, блаже́нне.

Сла́ва Отцу́ и Сы́ну и Свято́му Ду́ху:

Сы́й испо́лнен даро́в духо́вных, Па́вел прему́дрый на тя́ рукоположе́ние возлага́ет и служи́теля, и боже́ственна ученика́, и ве́ры пропове́дника устроя́ет, Ти́те пречу́дне.

И ны́не и при́сно и во ве́ки веко́в. Ами́нь.

Богородичен: Избавля́я мирски́я концы́ пре́лести, возсия́ от Твоего́ чре́ва Госпо́дь, Богоневе́сто, Его́же моли́ всегда́ спасти́ ве́рою Тя́, Де́во, чту́щия.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Апостоле Христов Тите, моли́ Бо́га о нас.

Не му́дростию объюро́ди то́й внима́ющия, но ра́зумом и́стины ослепле́ние, блаже́нне, ду́ш отгна́л еси́, притека́ющих к тебе́.

Припев: Апостоле Христов Тите, моли́ Бо́га о нас.

Олядене́вшую безбо́жия те́рнием бразду́, всенасле́дие язы́к, серпо́м боже́ственным очи́стил еси́, ра́зума се́мена насе́яв.

Сла́ва Отцу́ и Сы́ну и Свято́му Ду́ху:

Еди́но пропове́дая в Тре́х Ли́цах Божество́, отгна́л еси́ мглу́ многобо́жия, блаже́нне, к боже́ственному ра́зуму приводя́ концы́.

И ны́не и при́сно и во ве́ки веко́в. Ами́нь.

Богородичен: Святе́йшу Ангелов и всея́ тва́ри вы́шшу, из Тебе́ пло́тию Роди́выйся Тя́ соде́ла, те́мже Тя́, я́ко Влады́чицу все́х, почита́ем.

Седален Ти́та, гла́с 8.

Якоже звезда́ с со́лнцем, ходи́л еси́, пресла́вне Ти́те, с Па́влом, я́ве зе́млю просвети́сте и тму́ разори́сте, в Кри́тстем же о́строве заше́д, блаже́нне, сме́ртию, все́м незаходи́мы оста́вил еси́, я́ко зари́, богому́дре, твоя́ боле́зни и словеса́, и́миже просве́щшеся, благоче́стно тя́ чти́м и согла́сно вопие́м ти́: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, И ны́не, Богородичен:

Яко Всенепоро́чная Неве́сто Творцу́, я́ко неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная, Нетле́нная, отжени́ о́блак страсте́й и Вы́шняго прича́стия сподо́би и Све́та невече́рняго моли́твами Твои́ми.

КрестоБогородичен:

Агнца и Па́стыря и Изба́вителя, Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Апостоле Христов Тите, моли́ Бо́га о нас.

От сокро́вищ неистощи́мых поче́рп, всему́дре, жа́дныя ра́зумы бога́тства и́стиннаго насы́тил еси́ и умерщвле́нная сердца́ оживи́л еси́, неразу́мия отгоня́я мглу́, всесла́вне.

Припев: Апостоле Христов Тите, моли́ Бо́га о нас.

Па́влова тя́ мре́жа промышле́нием благода́ти уловля́ет, Ти́те, хотя́ща усе́рдно по́слежде твое́ю у́дицею сло́ва язы́ки премно́гия извлещи́ от ле́стныя глубины́ ко благоче́стию.

Сла́ва Отцу́ и Сы́ну и Свято́му Ду́ху:

Сла́вному, я́коже а́гня, боже́ственному Па́влу после́дуя, тя́жкия от среды́ во́лки, богогла́се, отгна́л еси́, и́дольския же хра́мы на зе́млю низве́ргл еси́ и хра́мы Бо́гу земноро́дныя сотвори́л еси́.

И ны́не и при́сно и во ве́ки веко́в. Ами́нь.

Богородичен: Свята́я Богоро́дица, се́нь нескве́рная, Све́та две́рь, трапе́за и ру́чка всезлата́я, несеко́мая гора́ и присе́нная, я́ко вмести́вшая Соде́теля, ублажа́ется.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Припев: Апостоле Христов Тите, моли́ Бо́га о нас.

Смердя́щую уста́вил еси́ зло́бы я́зву язы́ком, блаже́нне, ду́ш, сла́дкою со́лию боже́ственных слове́с твои́х, я́коже вра́чь изря́ден и я́ко благода́ти служи́тель.

Припев: Апостоле Христов Тите, моли́ Бо́га о нас.

Па́вла веле́нием повину́яся кро́тко, с ни́м поднебе́сную обхо́диши, прему́дре, сло́во ра́зума благовеству́я, богопропове́дниче всече́стне.

Сла́ва Отцу́ и Сы́ну и Свято́му Ду́ху:

Равноде́тельна, Единопресто́льна Сло́ва Отцу́ науча́я, я́коже му́др, богогла́се, повину́л еси́ суему́дрыя и́дольскую всю́ ле́сть отри́нути.

И ны́не и при́сно и во ве́ки веко́в. Ами́нь.

Богородичен: Чи́стую чи́стым почти́м умо́м, добро́ту Иа́ковлю, Боже́ственными дея́ньми удобря́еми, благоче́стно воспое́м, я́ко Ма́терь Бо́га на́шего.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Апостоле Христов Тите, моли́ Бо́га о нас.

Па́вел, ми́ра невече́рнее со́лнце, тя́, я́коже зарю́, испуща́ет светолу́чну, блаже́нне, я́же во тме́ неразу́мия седя́щая сердца́ просвеща́юща.

Сла́ва Отцу́ и Сы́ну и Свято́му Ду́ху:

Во́д живото́чных сы́й испо́лнен, струя́ми Боже́ственных уче́ний пото́ки, блаже́нне, неразу́мия потопля́еши, напоя́я язы́ков совокупле́ния.

И ны́не и при́сно и во ве́ки веко́в. Ами́нь.

Богородичен: Пою́т ро́ди родо́в Тя́, Всепе́тая: препе́тое бо Сло́во Бо́жие родила́ еси́ па́че сло́ва, Его́же сла́вят и челове́честии и Ангельстии чи́ни.

Конда́к Ти́та, гла́с 2.

Па́влов яви́вся собесе́дник, апо́столе, с ни́м на́м сло́во предвозвести́л еси́ Боже́ственныя благода́ти, тайноглаго́льниче Ти́те приснопа́мятне. Сего́ ра́ди вопие́м ти́: не преста́й моля́ся о все́х на́с.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Апостоле Христов Тите, моли́ Бо́га о нас.

Еди́но Божество́ пе́ти, Еди́но Госпо́дство чти́ти Ти́т науча́я челове́ки, многобо́жнаго неи́стовства измени́ благоче́стно взыва́ющия: благослове́н Бо́г оте́ц на́ших.

Припев: Апостоле Христов Тите, моли́ Бо́га о нас.

Умерщвле́нныя душе́ю, безду́шную чту́щия ве́щь, умерщвле́ннаго на́с ра́ди Животода́вца Бо́га позна́ша, тобо́ю наказу́емы, учениче́ и тайновеща́телю неизрече́нных.

Сла́ва Отцу́ и Сы́ну и Свято́му Ду́ху:

Яко и́стины служи́тель, лжи́ отгони́тель яви́лся еси́ и, я́ко Па́влов учени́к, гоне́ния и беды́ претерпе́л еси́, с ни́м поя́, сла́вне: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Испещре́на доброде́тельми, Всецарю́ предста́ла еси́ одесну́ю, от Твои́х воплоще́на крове́й, Безневе́стная, приле́жно моля́щи изба́витися на́м от вся́кия ну́жды.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Апостоле Христов Тите, моли́ Бо́га о нас.

Кропле́нием крове́й твои́х угасе́ о́гнь пре́лести чужди́й, неду́зи отгна́шася, де́мони исчезо́ша к Бо́гу мольбо́ю твое́ю, Ти́те апо́столе. Те́м тя́, я́ко уго́дника боже́ственна Всецаря́ Христа́, восхваля́ем.

Припев: Апостоле Христов Тите, моли́ Бо́га о нас.

Ве́сь Бо́гу освяще́н и Боже́ственными укра́шен, Ти́те, благода́тьми, сло́во спаси́тельное все́м уясни́л еси́, безслове́сия, всему́дре, на́с изба́вльшее, ве́рою и́стинною благосло́вящих и превознося́щих Христа́ во ве́ки.

Сла́ва Отцу́ и Сы́ну и Свято́му Ду́ху:

Све́та чисте́йшее прия́телище бы́в, просвети́л еси́ подсо́лнечную Боже́ственными сия́ньми, Ти́те досточу́дне, и омрачи́л еси́ сопротивле́ния беззако́ннующих вра́г, Го́спода поя́ и превознося́ во вся́ ве́ки.

И ны́не и при́сно и во ве́ки веко́в. Ами́нь.

Богородичен: Ору́жие, дре́вле обраща́емое, плещи́, Де́во, ны́не мне́ дае́т, я́ко Сло́во родила́ еси́, пло́тию обложе́но и во двою́ естеству́ разумева́емо, Его́же трепе́щут Ангельстии чи́ни и славосло́вят земни́и во ве́ки.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Апостоле Христов Тите, моли́ Бо́га о нас.

Всю́ твою́ ко Изба́вителю нося́ и любо́вь и наде́жду, влече́т спу́тника Па́вел, с тобо́ю свяще́нное Ева́нгелие язы́ком пропове́дуя, апо́столе. Те́мже с ни́м тя́ почита́ем.

Припев: Апостоле Христов Тите, моли́ Бо́га о нас.

Неду́ги отго́ниши ве́рных, де́моны прогоня́еши Боже́ственною благода́тию. Кри́т, вели́кий гра́д, первопресто́льника тя́ стяжа́ боже́ственна, свети́льника же и зарю́ небе́сную, Ти́те богому́дре и достохва́льне.

Сла́ва Отцу́ и Сы́ну и Свято́му Ду́ху:

Яко со́лнце, возсия́ на́м па́мять твоя́, заря́ми духо́вными всесве́тло укра́шена, о́блаки ду́ш отгоня́щи, ю́же ве́рою творя́щия на́с сохраня́й, Ти́те всеблаже́нне и достохва́льне.

И ны́не и при́сно и во ве́ки веко́в. Ами́нь.

Богородичен: Плени́цы прегреше́ний мои́х, Чи́стая, разреши́ хода́тайством Твои́м, Всенепоро́чная, разори́ тму́ души́ моея́, бу́рю страсте́й мои́х ути́ши, всу́е борю́щия мя́ сокруши́ и спаси́ мя, Влады́чице Присноде́во.

Свети́лен.

Све́та прия́телища, непреме́нныя зари́ невече́рняго дне́, светолу́чныя мо́лнии, Варфоломе́я и Ти́та, ве́рнии, сла́вим вси́.

Богородичен: Кре́пким Твои́м покро́вом от наве́та вра́жия на́с, Чи́стая, Твоя́ рабы́, сохрани́ вся́ невре́дны: Тя́ бо и́мамы еди́ну прибе́жище в напа́стех.

Молитва

Святы́й сла́вный и всехва́льный апо́столе Христо́в Тите, мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.