6 сентября.

Канон священномученику Евтихию, ученику святого Иоанна Богослова.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

И нра́вом прича́стник, и престо́лом наме́стник апо́столом бы́в, дея́ние обре́л еси́, богодохнове́нне, в виде́ния восхо́д; сего́ ра́ди, сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Евти́хие, моли́ Христа́ Бо́га спасти́ся душа́м на́шим.

Канон свята́го, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Священномучениче Евтихие, моли́ Бо́га о нас.

Апо́столом и му́чеником сожи́тель явля́емый и боже́ственныя зари́ всегда́ исполня́емь, честны́й тво́й дне́сь пра́здник творя́щия све́та прича́стники покажи́, му́чениче Евти́хе достосла́вне.

Припев: Священномучениче Евтихие, моли́ Бо́га о нас.

Возлю́бленнаго ученика́, блаже́нне, учени́к бы́в благоче́стно и того́ нра́вы вельми́ подража́я, Го́спода возлюби́л еси́, Того́ Боже́ственныя зако́ны испо́лнив, и страсте́м Сего́, Евти́хе, уподо́бился еси́.

Сла́ва Отцу́ и Сы́ну и Свято́му Ду́ху:

Зако́ну Боже́ственному благоче́стно повину́яся, пло́ть умертви́л еси́ по́стными боле́зньми, ми́ра удаля́яся, и в гора́х, сла́вне, пребыва́я, му́чениче, и ду́шу очища́я, и богови́ден познава́емь.

И ны́не и при́сно и во ве́ки веко́в. Ами́нь.

Богородичен: На Тя́, Де́во, наде́жду положи́х спасе́ния моего́: грехо́вныя скве́рны всего́ мя́ омы́й и чи́ста соде́лай, Сы́ну Твоему́ изря́дно благоугожда́юща и творя́ща Сего́ всесвяту́ю во́лю.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Священномучениче Евтихие, моли́ Бо́га о нас.

Облиста́юща све́том пропове́дания прему́драго, я́коже со́лнца, обре́т Па́вла ходи́ти с ни́м, я́ко звезда́ ве́лия, просвеща́я сердца́, блаже́нне богому́дре, Ду́хом.

Припев: Священномучениче Евтихие, моли́ Бо́га о нас.

Богосло́вов основа́ние, ученико́в ве́рх, Иоа́нн, при́сный дру́г Спа́сов, от земли́ боже́ственно прело́жся, тебе́ Бо́жие ста́до, блаже́нне, пасти́ предаде́.

Сла́ва Отцу́ и Сы́ну и Свято́му Ду́ху:

Прекра́сен, и светоза́рен, и испо́лнен Ду́ха Боже́ственнаго, судя́щему непра́ведно предста́л еси́, облича́я того́ злоче́стие, пребога́те, и Христо́во Боже́ственное испове́да вочелове́чение.

И ны́не и при́сно и во ве́ки веко́в. Ами́нь.

Богородичен: Ра́дуйся, Яже еди́на ра́дость несказа́нно ро́ждши; ра́дуйся, колесни́це и о́блаче Сло́ва; ра́дуйся, Ма́ти Бо́жия, Де́во Неискусобра́чная; ра́дуйся, преподо́бных сла́во; ра́дуйся, му́чеников венча́ние.

Седа́лен, гла́с 3.

Сия́ние облиста́в богоразу́мия, тму́ разори́л еси́ многобо́жия, му́ченически сконча́в тече́ние твое́, и исцеле́ний источа́еши дарова́ния, приходя́щих очища́еши неду́ги, му́чениче сла́вне, Христа́ Бо́га моли́ дарова́ти душа́м на́шим ве́лию ми́лость.

Сла́ва, и ны́не, Богородичен:

Боже́ственная ски́ния была́ еси́ Сло́ва, еди́на Пречи́стая Ма́ти Де́во, чистото́ю Ангелы превозше́дшая, па́че все́х мене́, пе́рсть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Священномучениче Евтихие, моли́ Бо́га о нас.

Все́м умо́м отше́д ко Го́споду, не чу́вствоваше, всю́ду бие́мь и растерза́емь лю́те, и, я́коже благово́нное кади́ло, достосла́вне, благово́ния предстоя́щия испо́лнил еси́ боже́ственнаго, де́йством, богому́дре, Ду́ха.

Припев: Священномучениче Евтихие, моли́ Бо́га о нас.

Бо́гом, му́чениче богому́дре, соблюда́емь, в темни́це же свя́зан седя́, хле́б небе́сный ви́димо, ра́дуяся, прия́л еси́, Бо́гу тя́ укрепля́ющу, еди́ному Подвигополо́жнику, Евти́хе богоно́се, Его́же стра́сти Боже́ственней поревнова́л еси́.

Припев: Священномучениче Евтихие, моли́ Бо́га о нас.

Твоя́ честна́я уста́ отве́рзл [еси́] Ду́хом, пред суди́щем, прему́дре, стоя́ мучи́телей, и́стинную ве́ру Тро́ическую уясни́л еси́ я́ве, и́дольскую же пре́лесть обличи́л еси́, блаже́нне, и мучи́телей безбо́жных мудрова́ния.

Сла́ва Отцу́ и Сы́ну и Свято́му Ду́ху:

По мно́гих ины́х ра́нах теле́сных, Боже́ственною любо́вию, блаже́нне, распаля́емь, запале́нный пла́мень огня́, ра́дуяся, проше́л еси́, преще́нием мучи́теля ника́коже опали́вся, и́бо Боже́ственная тя́ роса́, Евти́хе, с небесе́ ороша́ше.

И ны́не и при́сно и во ве́ки веко́в. Ами́нь.

Богородичен: В жена́х еди́на Де́ва пребыла́ еси́ и пре́жде рождества́ и по рождестве́: Бо́г бо бе́ обновля́я естества́ па́че сло́ва, из Тебе́ неизрече́нно воплоща́емь, Иже горе́ пре́жде ве́к и на земли́ в после́дняя ле́та ро́ждся, Пренепоро́чная.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Священномучениче Евтихие, моли́ Бо́га о нас.

Сло́вом Боже́ственным обога́щся, все́м тре́бующим, му́чениче, пода́л еси́ и Христо́во ста́до, свяще́нник бы́в, упа́сл еси́, утеша́я, наказу́я и наставля́я ко спасе́нию, Евти́хе, страстоно́сче многострада́льне.

Припев: Священномучениче Евтихие, моли́ Бо́га о нас.

Душепа́губную пре́лесть си́лою Боже́ственнаго Ду́ха оттря́с, ко Христу́ приступи́л еси́ и мно́жества Сему́, му́чениче, приве́л еси́ спаса́емых ве́рою, твои́ми честны́ми боговеща́нии, Евти́хе, страда́льцев удобре́ние.

Сла́ва Отцу́ и Сы́ну и Свято́му Ду́ху:

Яко красны́ но́ги твоя́, преблаже́нне, стезе́ю ходи́вшия свиде́ний боже́ственных, и в си́х до́бре ступа́вшия, и к широте́ вели́цей небе́снаго Ца́рства дости́гшия, му́чениче сла́вне.

И ны́не и при́сно и во ве́ки веко́в. Ами́нь.

Богородичен: Де́во Ма́ти Отрокови́це, Непостижи́маго пло́тию ро́ждши, Ангелов сла́во и де́монов я́зва, Богоневе́сто, мое́ се́рдце, уя́звенное грехми́, исцеле́ния боже́ственнаго сподо́би.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Священномучениче Евтихие, моли́ Бо́га о нас.

Во Ефе́се прие́мь е́же за Христа́ кончи́ну, от Ефе́са, му́дре, у́зник устреми́лся еси́ и во оте́чествии твое́м честне́м, страда́ньми украша́емь, почи́л еси́.

Припев: Священномучениче Евтихие, моли́ Бо́га о нас.

Хра́м сы́й Бо́жий красе́н и пречи́ст, хра́мы и́дольския скве́рныя низложи́л еси́ благода́тию и к небе́сному хра́му возне́слся еси́, Евти́хе, Бо́гу предста́ти.

Сла́ва Отцу́ и Сы́ну и Свято́му Ду́ху:

Укрепи́ тя, путе́м ше́ствующа, боже́ственный Ангел, предглаго́ля тебе́ я́ве хотя́щая бы́ти, Евти́хе, пребога́те, равноа́нгельну су́щу и пло́ти вне́ ду́хом.

И ны́не и при́сно и во ве́ки веко́в. Ами́нь.

Богородичен: Ума́ моего́ извраще́ния и души́ двиза́ния стра́стная и лю́тая, Де́во, испра́ви и це́ла мя́ соблюди́ от всегда́ неми́лостивно находя́щих ми́.

Конда́к, гла́с 3.

Апо́столов сопресто́льник и святи́телей красота́ бы́в, Евти́хе, му́ченически просла́вился еси́, просия́л еси́, я́ко со́лнце, все́х просвеща́я, и разори́л еси́ безбо́жия но́щь глубо́кую; сего́ ра́ди тя́ почита́ем, я́ко боже́ственнаго вои́стинну священнотаи́нника Христо́ва.

Икос:

Яко Бо́жий свяще́нник, я́ко служи́тель небе́сный, я́ко па́стырей па́стырь, я́ко страда́лец непобеди́мь, с вы́шними ны́не ли́ки водворя́яся, священнотаи́нниче, све́т ми́ низпосли́ и сло́во ми́ вдохни́ восхвали́ти боже́ственныя стра́сти твоя́, и гоне́ния, и боре́ния изря́дная и му́жественная, сломле́ния косте́й, удо́в ссече́ния, и́хже ра́ди бы́л еси́, блаже́нне, причте́н Ангелом, я́ко боже́ственный вои́стинну священнотаи́нник Христо́в.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Священномучениче Евтихие, моли́ Бо́га о нас.

Бо́жиим манове́нием о́гнь угасе́, на па́губу тебе́ разжже́нный, богому́дре: с небесе́ бо гро́м слы́шашеся и сне́жныя ка́пли пуща́хуся, неве́дущия Христа́ покрыва́юще.

Припев: Священномучениче Евтихие, моли́ Бо́га о нас.

Кре́пко стру́жемь, благово́ния миро, му́чениче, испусти́л еси́, во благово́ние страсте́й излия́вшагося. Ибо прите́к к Сло́ву и Соде́телю, к Нему́же взыва́л еси́: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Житие́ твое́ непоро́чно, муче́ние, му́дре, пречу́дно и спаси́тельно все́м, приступа́ющим моще́й твои́х ко святе́й ра́це, исцеле́ния точа́щи и скверне́ния страсте́й мно́гих изыма́ющи.

И ны́не и при́сно и во ве́ки веко́в. Ами́нь.

Богородичен: Разуме́вше издале́ча честни́и проро́цы та́инства Твоего́ неизрече́нную глубину́, многообра́зно все́м уясни́ша Твое́ рождество́, Де́во, взыва́юще: благослове́н еси́, Бо́же оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Священномучениче Евтихие, моли́ Бо́га о нас.

Ру́це просте́р, сла́вне, ко Христу́ Бо́гу на́шему, посреде́ суди́ща боря́ся со львы́, невреди́мь бы́л еси́, я́коже проро́к пре́жде Дании́л, Ангела, при́сно соблюда́юща тя́, име́я и поя́ непреста́нно: свяще́нницы, благослови́те, лю́дие, превозноси́те во вся́ ве́ки.

Припев: Священномучениче Евтихие, моли́ Бо́га о нас.

Ско́тски ви́де тя́, беззако́нными осужде́на, зве́рь, твое́й угото́вленный поги́бели, я́сно провеща́ всеси́льным манове́нием и вели́чия Спа́са Христа́ пропове́да, удивля́я вопию́щия: свяще́нницы, благослови́те, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Си́лою Бо́жиею и благода́тию по́двиг вели́кий муче́ния проше́д, венцы́ улучи́л еси́ побе́ды, ра́дуяся, и лико́м приче́лся еси́ все́х апо́стол и му́ченик, с ни́миже вопие́ши непреста́нно: свяще́нницы, благослови́те, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Умерщвле́нную угрызе́нием ду́шу мою́ змии́ным, еди́на явле́нно живо́т ро́ждшая, Всенепоро́чная, оживи́ и твори́ти сподо́би на́с ра́ди из Тебе́, Де́во, Ро́ждшагося хоте́ние, вопию́щу: свяще́нницы, благослови́те, лю́дие, превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Священномучениче Евтихие, моли́ Бо́га о нас.

Исцеле́ния источа́еши разли́чна и неду́ги утиша́еши тя́жкия, от Христа́ благода́ть прии́м вои́стинну, до́бре подви́гся и победи́в враги́, богому́дре страстоте́рпче, Ангелов сограждани́не и му́чеников ве́рх.

Припев: Священномучениче Евтихие, моли́ Бо́га о нас.

Красе́н в по́двизех я́влься, в кра́сныя черто́ги всели́лся еси́, усе́чен бы́в мече́м во святу́ю твою́ главу́, ю́же Иису́с венча́ побе́ды венце́м благоле́пным, свети́льниче Це́ркве, утвержде́ние и похвала́ благоче́стно блажа́щих тя́.

Припев: Священномучениче Евтихие, моли́ Бо́га о нас.

Сокруши́л еси́ держа́ву лука́ваго, Евти́хе страстоте́рпче прехва́льне, и на него́ побе́ду поста́вль ю́ношески, и победи́тель преизря́ден ны́не еси́ на небесе́х, престо́лу Тро́ическому со дерзнове́нием мно́гим све́тло предстоя́.

Сла́ва Отцу́ и Сы́ну и Свято́му Ду́ху:

Па́мять твоя́ боже́ственная и светоза́рная па́че со́лнца все́м просия́, све́тлыми сия́нии просвеща́ющи ве́рно и благоче́стно всегда́ сие́ пра́зднующих, Евти́хе, в не́йже тя́ мо́лим, я́ко име́я дерзнове́ние, спасе́ние на́м испроси́.

И ны́не и при́сно и во ве́ки веко́в. Ами́нь.

Богородичен: Гла́с Ти́ провозглаша́ем Гаврии́лов: ра́дуйся, земле́ избра́нная; ра́дуйся, трапе́зо златови́дная; ра́дуйся, челове́ков прибе́жище; ра́дуйся, му́чеников похвало́; ра́дуйся, Ангелов ра́дование, Свята́я Богоро́дице, держа́во ве́рою чи́стою блажа́щих Тя́.

Свети́лен.

И престо́лов я́ко прее́мник, и нра́вов я́ко прича́стник свяще́нных апо́столов ты́ бы́в, богому́дре, ве́рою свято́е твое́ страда́ние пра́зднующия с небесе́ назира́й, я́ко учени́к Сло́ва, Евти́хе святи́телю.

Богородичен: При́зри, Чи́стая, на достоя́ние Твое́ и непобеди́мым Твои́м сие́ соблюди́ предста́тельством: ца́рствия упра́ви ски́птры и утверди́, язы́ки укроти́ и изле́й ми́р в концы́ ми́ра.

Молитва

О святы́й уго́дниче Бо́жий, священному́чениче Евти́хе! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.