6 сентября.
Канон преподобному Аристоклию (Амвросиеву), старцу Московскому
![Канон преподобному Аристоклию, старцу Московскому Канон преподобному Аристоклию, старцу Московскому](img_i/084.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 4:
На Святе́й горе́ Афо́нской духо́вне утверди́вся,/ я́ко звезда́ пресве́тлая во гра́де Москве́ просия́л еси́,/ Ду́ха же Свята́го благода́ть стяжа́в,/ мир Христо́в в души́ твое́й восприя́л еси́,/ преподо́бне о́тче Аристо́клие,/ моли́ Христа́ Бо́га// спасти́ся душа́м на́шим.
Кано́н преподо́бнаго, глас 8.
Песнь 1
Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.
Припев: Преподобне отче Аристоклие, моли́ Бо́га о нас.
Богоблаже́нне о́тче Аристо́клие, измла́да ско́рбная обстоя́ния претерпева́я, Христа́ всем се́рдцем возлюби́л еси́, Его́же с ли́ки А́нгельских сил на Небесе́х непреста́нно ны́не славосло́виши.
Припев: Преподобне отче Аристоклие, моли́ Бо́га о нас.
Тя́жкую боле́знь во о́трочестве претерпе́в, моли́твами ма́тере твоея́ от святи́теля Никола́я исцеле́ние получи́л еси́, те́мже, Чудотво́рцу вели́кому подража́я, пра́вило ве́ры и о́браз благоче́стия лю́дем яви́л еси́.
Слава: Плоть распя́в со страстьми́ и похотьми́, в вертогра́д Святы́я горы́ Афо́нския всели́лся еси́ и всего́ себе́ во́ли ста́рцев оби́тели покори́л еси́. Те́мже Госпо́дь твое́ се́рдце чи́сто соде́ла и дух прав обнови́ во утробе́ твое́й.
И ныне: Чуде́с Твои́х Боже́ственных мно́жество благохвали́ти предначина́я, Тя, Де́во, со умиле́нием молю́: благода́ть Твою́ пода́ждь ми недосто́йному.
Песнь 3
Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят па́че Тебе́,// Еди́не Человеколю́бче.
Припев: Преподобне отче Аристоклие, моли́ Бо́га о нас.
В по́двизех мона́шескаго жития́ преуспева́я, вся ко́зни де́монския си́лою ве́ры и упова́нием на Христа́ превозмо́гл еси́, И́мже и ве́чною сла́вою увенча́н был еси́.
Припев: Преподобне отче Аристоклие, моли́ Бо́га о нас.
Послуша́ния отце́м богому́дрым до́брый рачи́тель быв, и́го Христо́во благо́е на ра́мо подъя́л еси́ и во бра́ни с ду́хами зло́бы поднебе́сными я́ко столп непоколеби́м яви́лся еси́.
Слава: Гора́ Свята́я Афо́нская торжеству́ет, земля́ же Моско́вская пропове́дует вели́кия по́двиги твоя́, и́миже вся злоко́зненная искуше́ния, я́ко до́блий во́ин Христо́в, препобеди́л еси́.
И ныне: Неизрече́нно зачала́ еси́, Богоневе́сто Пречи́стая, Го́спода и Спа́са, от лю́тых зол избавля́ющаго с ве́рою призыва́ющих Тя.
По 3-й пе́сни седа́лен, глас 4:
И́мже о́бразом жела́ет еле́нь на исто́чники водны́я, си́це возжада́ душа́ твоя́, преподо́бне о́тче Аристо́клие, к Бо́гу Жизнода́вцу, сего́ ра́ди, вся кра́сная ми́ра земна́го презре́в, на благослове́нней горе́ Афо́нской и в земли́ Ру́сской усе́рдне потруди́лся еси́, и та́ко житие́м твои́м пра́ведным Го́спода Бо́га просла́вил еси́.
Сла́ва, и ны́не, Богоро́дичен:
Влады́чицу Тя ми́ра ве́мы, Де́во Всепе́тая, я́ко родила́ еси́ нам всех Творца́ и Спаси́теля ми́ра, И́же и просла́ви Тя, Пречи́стую Ма́терь Свою́, подая́ нам Тобо́ю благода́ть и ве́лию ми́лость.
Песнь 4
Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.
Припев: Преподобне отче Аристоклие, моли́ Бо́га о нас.
Всего́ себе́ всеблаго́й во́ли Бо́жией покори́в и вся повеле́ния отце́в духо́вных испо́лнив, в зе́млю Ру́сскую возврати́лся еси́ и многоско́рбный труд па́стырства подъя́л еси́.
Припев: Преподобне отче Аристоклие, моли́ Бо́га о нас.
Лю́дие, мно́гими боле́зньми душе́вными и теле́сными одержи́мии, о́тче святы́й, притека́ху к тебе́, прося́ще ско́рыя по́мощи, и исцеля́хуся.
Слава: Си́лою благода́ти, да́нною тебе́ свы́ше, боле́знующих из нездра́вия во здра́вие приводи́л еси́, и́же и сла́вляху Многоми́лостиваго Бо́га.
И ныне: Не и́мамы, раби́ Твои́, ина́го предста́тельства и покро́ва ра́зве Тебе́, Влады́чице. Те́мже, Чи́стая, от се́рдца вопие́м: вся́кия беды́ свободи́ всех ве́рных, к Тебе́ прибега́ющих.
Песнь 5
Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х// пути́ моя́ напра́ви, молю́ся.
Припев: Преподобне отче Аристоклие, моли́ Бо́га о нас.
Мно́ги ско́рби претерпе́л еси́, егда́ супоста́т диа́вол наусти́ люде́й оглаго́лати тя, о́тче преподо́бне, оба́че смире́нием вся вра́жия ко́зни препобеди́л еси́ и вене́ц побе́дный от Го́спода прия́л еси́.
Припев: Преподобне отче Аристоклие, моли́ Бо́га о нас.
Егда́ обличи́ся непра́вда, воздви́гнутая на тя, о́тче святы́й, па́ки посла́ху тя ста́рцы афо́нстии во град Москву́, иде́же па́че пре́ждняго в доброде́телех подвиза́лся еси́.
Слава: Неду́гующии притека́ху к тебе́, о́тче пра́ведне, и никто́же тощ отхожда́ше, чудесе́м, тобо́ю сотворе́нным, дивя́щеся и Бо́га, ди́внаго во святы́х Своих, сла́вяще.
И ныне: Несть, и́же к Твоему́ притече́ покро́ву и не улучи́, Отрокови́це, мно́гих Твои́х щедро́т. Те́мже и аз молю́ся, не лиши́ мя Твоего́ заступле́ния.
Песнь 6
Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.
Припев: Преподобне отче Аристоклие, моли́ Бо́га о нас.
Христо́вою любо́вию уязви́вся, о́тче преподо́бне, оста́вил еси́ вся, я́же в ми́ре сем и, горе́ ум впери́в, то́чию о Небе́снем помышля́л еси́.
Припев: Преподобне отче Аристоклие, моли́ Бо́га о нас.
Мно́гия труды́ во гра́де Москве́ подъя́л еси́, подво́рие Святы́я горы́ Афо́нския устроя́я, да моли́твою послу́жит бра́тия лю́дем стра́ждущим и в ну́ждах су́щим.
Слава: Возлю́бленное ча́до Пречи́стыя Богоро́дицы был еси́, о́тче, при́сно моля́ся пред свято́ю ико́ною Скоропослу́шницею и храм в честь Ея́ воздви́гл еси́, да при́сно сла́вится и́мя Богоотрокови́цы Мари́и.
И ныне: Ра́дуйся, Купино́ Неопали́мая, ю́же Моисе́й ви́де на Сина́и, и Ле́ствице высо́кая, ю́же Иа́ков ви́де, Преблагослове́нная Богоро́дице Присноде́во.
Конда́к, глас 8:
Я́ко звезда́ на тве́рди небе́сней возсия́л еси́/ и, путь многотру́днаго мона́шескаго жития́ проше́д,/ по́двигами доброде́телей вене́ц нетле́нный стяжа́л еси́,/ те́мже и Христо́с Бог да́ром чуде́с обогати́ тя./ Помина́й нас, чту́щих святу́ю па́мять твою́, преподо́бне о́тче Аристо́клие,// горы́ Афо́нския похвало́ и земли́ Ру́сския украше́ние.
И́кос:
В стра́се Бо́жием соде́ловая путь спасе́ния, преподо́бне, утверди́лся еси́ сло́вом апо́стольским, я́ко любы́ ми́ра сего́ вражда́ Бо́гу есть и и́же восхо́щет друг бы́ти ми́ру, враг Бо́жий быва́ет. Те́мже, вся бла́га земна́я во уме́ты вмени́в, ру́ку свою́ на ра́ло возложи́л еси́ и отню́д вспять не зрел еси́, но, пря́мо стопы́ твоя́ по словеси́ Госпо́дню направля́я, мир и поко́й в души́ твое́й обре́л еси́. Сего́ ра́ди и Бог тя просла́ви я́ко ве́рнаго раба́ Своего́, и увенча́ я́ко добропобе́днаго во́ина Царя́ Небе́снаго.
Песнь 7
Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:// благослове́н еси́, Бо́же оте́ц на́ших.
Припев: Преподобне отче Аристоклие, моли́ Бо́га о нас.
В годи́ну тя́жких гоне́ний в земли́ на́шей я́ко свеща́ горя́щая просия́л еси́, мрак неве́рия прогоня́я, немощны́я укрепля́я, малоду́шныя утвержда́я и уныва́ющия к Бо́гу подвига́я.
Припев: Преподобне отче Аристоклие, моли́ Бо́га о нас.
Тве́рдо ве́ру Христо́ву испове́дуя, бу́рю, от богопроти́вник воздвиза́емую, утиша́л еси́ и всех, притека́ющих к тебе́, во упова́нии на Бо́га Промысли́теля утвержда́л еси́.
Слава: До́брый па́стырь яви́лся еси́, о́тче преблаже́нне, ду́шу свою́ за о́вцы полага́я, и до после́дняго воздыха́ния ста́до, е́же собра́л еси́, окормля́л еси́ и от сете́й вра́жиих огражда́л еси́.
И ныне: Сы́на О́тча Единоро́днаго, безма́терня пе́рвее и из Тебе́ рожде́нна, уве́девше безо́тча, Бо́жию Ма́терь испове́дуем Тя, безстра́стно ро́ждшую и Де́ву пребы́вшу па́че сло́ва, Мари́е Богоневе́сто.
Песнь 8
Ирмос: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.
Припев: Преподобне отче Аристоклие, моли́ Бо́га о нас.
Со А́нгелы всели́ся душа́ твоя́, о́тче святы́й, иде́же несть печа́ль, боле́знь и воздыха́ние. Те́мже мо́лим тя: предста́тельствуй пред Престо́лом Бо́га жива́го о нас, любо́вию чту́щих па́мять твою́.
Припев: Преподобне отче Аристоклие, моли́ Бо́га о нас.
Испо́лнив зако́н Христо́в, ве́ру соблю́л еси́, тече́ние земно́е сконча́л еси́, Ца́рствие Небе́сное насле́довал еси́. Не забу́ди и нас, убо́гих чад твои́х, о́тче преподо́бне, но моли́ся Всеми́лостивому Бо́гу, да спасе́т ду́ши на́ша.
Слава: Во́ли своея́ до конца́ совле́кся, преподо́бне о́тче, Бо́гови покори́лся еси́ и крест земна́го жития́ в терпе́нии проне́сл еси́. Те́мже просла́ви тя Христо́с, прему́дре спаса́яй род челове́ческий.
И ныне: Чуде́с па́че всех, Всенепоро́чная, в Тебе́ новосоде́явшееся чу́до показа́ся я́вственно: Бо́га бо родила́ еси́ теле́сне, земны́м за милосе́рдие соедини́вшася в несли́тнем соедине́нии, Богоневе́сто.
Песнь 9
Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.
Припев: Преподобне отче Аристоклие, моли́ Бо́га о нас.
В преставле́нии твое́м, о́тче святы́й, возра́довашася Небе́сныя Си́лы, срета́юще ду́шу твою́, и Госпо́дь введе́ тя в ра́йския оби́тели, я́ко ве́рнаго раба́ Своего́.
Припев: Преподобне отче Аристоклие, моли́ Бо́га о нас.
Но́вое чу́до яви́ нам Госпо́дь моли́твами твои́ми, преподо́бне, дарова́в обрести́ цельбоно́сныя мо́щи твоя́, во утеше́ние всех, чту́щих святу́ю па́мять твою́ и благодаря́щих Бо́га, ди́внаго во святы́х Свои́х.
Слава: Ра́ка святы́х моще́й твои́х, о́тче досточу́дне, источа́ет ми́лости всем, с ве́рою к тебе́ притека́ющим, и́же и воспева́ют ве́лие твое́ дерзнове́ние пред Влады́кою Христо́м о спасе́нии душ погиба́ющих.
И ныне: Не́бо небе́с вы́шшее яви́лася еси́ боже́ственною Твое́ю сла́вою, Богоневе́сто Влады́чице, в Тя бо Бог наш всели́ся и яви́ся нам.
Свети́лен:
На Святе́й горе́ Афо́нской усе́рдно подвиза́яся, бра́тию оби́тели, я́ко наста́вник изря́дный, ко спасе́нию приводи́л еси́; в земли́ же Ру́сской свое́ богоуго́дное житие́ сконча́л еси́. Ны́не с высоты́ Небе́сныя посыла́еши по́мощь чту́щим твою́ святу́ю па́мять, о́тче святы́й Аристо́клие.
Молитва
О свяще́нная главо́, преподо́бне о́тче, преблаже́нне а́вво Аристо́клие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Канон преподобному Аристоклию, старцу Московскому Канон преподобному Аристоклию, старцу Московскому](img_b/084.jpg)