4 сентября.

Канон святому мученику Агафонику и иже с ним.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Кано́н свята́го Агафони́ка, гла́с 1.

Пе́снь 1.

Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Святый мучениче Агафониче, моли́ Бо́га о нас.

Ублажи́, свя́те, озло́бленную ду́шу мою́ страстьми́, бла́г бы́в Блага́го Бо́га подража́тель, и сло́во да́ждь честну́ю сла́вити па́мять твою́.

Припев: Святый мучениче Агафониче, моли́ Бо́га о нас.

Зна́емь Ве́дущему вся́, му́чениче, бы́л еси́, богодохнове́нне, и Сего́ воплоще́ние пред язы́ки пропове́дал еси́, плотски́я не убоя́вся сме́рти.

Сла́ва Отцу́ и Сы́ну и Свято́му Ду́ху:

Возста́вил еси́ сло́вом твои́м па́дшия и возста́ния о́бщники показа́л еси́ и све́тлости ве́чныя благоче́стно, му́чениче пребога́те.

И ны́не и при́сно и во ве́ки веко́в. Ами́нь.

Богородичен: Чуде́с превы́ше ве́лие чу́до, Чи́стая, рождества́ Твоего́ зри́тся: ражда́еши бо в подо́бии пло́ти бы́вша Христа́ кроме́ преложе́ния и смеше́ния.

Пе́снь 3.

Ирмос: Да утверди́тся се́рдце мое́ в во́ли Твое́й, Христе́ Бо́же, Иже над вода́ми не́бо утвержде́й второ́е и основа́вый на вода́х зе́млю, Всеси́льне.

Припев: Святый мучениче Агафониче, моли́ Бо́га о нас.

Суему́дренный ласка́нии тя́ ле́стно укра́сти наде́яшеся: осуети́ся же его́ су́етное мудрова́ние, утвержде́ну тебе́ на ка́мени нело́жныя, му́чениче, ве́ры.

Припев: Святый мучениче Агафониче, моли́ Бо́га о нас.

Преплы́в пучи́ну ра́н и боле́зней телесе́ правле́нием Христо́вым, му́чениче Агафони́че, устреми́лся еси́ к приста́нищем мы́сленным, ра́дуяся.

Сла́ва Отцу́ и Сы́ну и Свято́му Ду́ху:

Сече́ния и терза́ния телесе́ на мя́ да прии́дут дне́сь, мечи́, и сковрады́, и о́гнь, и зве́рие, и сме́рть, не убою́ся, — вопия́л еси́, страда́льче Агафони́че.

И ны́не и при́сно и во ве́ки веко́в. Ами́нь.

Богородичен: По естеству́ Неопи́санный, вообра́жся из Тебе́, на́ше описа́ние пло́тски прия́т, Влады́чице, в существа́х и хоте́ниих сугу́бых познава́емь.

Седа́лен, гла́с 8.

Крове́й твои́х струя́ми мы́сленнаго фарао́на удави́в с во́и его́, сла́вне, к земли́ преше́л еси́, иде́же кро́тцыи живу́т и му́ченицы вси́, нетле́ния вене́ц прие́м, досточу́дне. Те́мже источа́еши ве́рным исцеле́ния, и уставля́еши стра́сти, и отгоня́еши ду́хи лука́выя, страда́льче Агафони́че, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том, позна́ешися, внегда́ приити́ вре́мени, пока́жешися. Сла́ва си́ле Твое́й, Го́споди.

Припев: Святый мучениче Агафониче, моли́ Бо́га о нас.

Вше́л еси́ в му́ченическое суди́лище, му́дре, ору́жием Боже́ственныя ве́ры све́тло огради́вся: спле́тся же со враго́м, держа́вно сего́ победи́в, покори́л еси́ под но́зе твои́, му́чениче страда́льче Агафони́че.

Припев: Святый мучениче Агафониче, моли́ Бо́га о нас.

Му́дростию твои́х слове́с и де́л свяще́нных боже́ственными показа́нии, устраши́л еси́ враги́, наде́ющияся терпели́вное ума́ твоего́ победи́ти и к пре́лести привлещи́, му́чениче Христо́в Агафони́че.

Сла́ва Отцу́ и Сы́ну и Свято́му Ду́ху:

Огне́м всесоже́г любве́ боже́ственныя тво́й у́м, сла́вне, огня́ супоста́т не устраши́лся еси́, но возже́г, я́коже у́гль, безбо́жия запали́л еси́ хвра́стие, му́чениче свяще́нне Агафони́че.

И ны́не и при́сно и во ве́ки веко́в. Ами́нь.

Богородичен: На хребте́х е́здяй, Чи́стая, херуви́мских, вопло́щся я́ко Челове́к из Тебе́ боголе́пно, во Твои́х объя́тиях седи́т, я́коже Младе́нец, и младе́нствует, младоу́мнаго дре́вле бы́вша спаса́яй первозда́ннаго.

Пе́снь 5

Ирмос: Све́тлый на́м возсия́й Све́т Присносу́щный, у́тренюющим о судьба́х за́поведей Твои́х, Влады́ко Человеколю́бче, Христе́, Бо́же на́ш.

Припев: Святый мучениче Агафониче, моли́ Бо́га о нас.

Зако́ном проти́вился еси́ губи́теля зако́ном спаси́тельным, я́ко му́ченик зако́нен, сла́вне, Законода́вца и все́ми влады́чествующаго Христа́ Бо́га на́шего.

Припев: Святый мучениче Агафониче, моли́ Бо́га о нас.

Све́тел и пресла́вен му́ченик бы́в, Агафони́к ны́не ублажа́ется, с небе́сными всегда́ си́лами све́тло ра́дуяся.

Сла́ва Отцу́ и Сы́ну и Свято́му Ду́ху:

Па́че е́же жи́ти, умре́ти изво́лил еси́, сла́вне, я́ко да бу́дущую при́сно и ве́чнующую жи́знь приобря́щеши. Те́мже мечу́ секу́щему вы́ю подклони́л еси́.

И ны́не и при́сно и во ве́ки веко́в. Ами́нь.

Богородичен: Твоя́ чудеса́ прови́дя Боже́ственным Ду́хом, Иса́ия взыва́ше: се́ во чре́ве прии́меши Невмести́маго, воплоща́ема, Чи́стая.

Пе́снь 6.

Ирмос: Проро́ка Ио́ну подража́я, вопию́: живо́т мо́й, Бла́же, свободи́ из тли́, и спаси́ мя, Спа́се ми́ра, зову́ща: сла́ва Тебе́.

Припев: Святый мучениче Агафониче, моли́ Бо́га о нас.

Тмочи́сленное мно́жество ефио́п мы́сленных победи́л еси́, му́дре, не́мощию плотско́ю и соедини́лся еси́ со тма́ми свяще́нных слу́г.

Припев: Святый мучениче Агафониче, моли́ Бо́га о нас.

Ше́ствовал еси́ му́жески муче́ния пу́ть и утесни́л еси́ пути́ зло́бы, страда́льче, и дости́гл еси́ простра́нная селе́ния небе́сная.

Сла́ва Отцу́ и Сы́ну и Свято́му Ду́ху:

Просве́щся, я́коже зла́то, в горни́ле лю́тых страда́ний, Христо́в Агафони́че му́дре, изображе́ние яви́лся еси́, в боже́ственных положе́н сокро́вищах.

И ны́не и при́сно и во ве́ки веко́в. Ами́нь.

Богородичен: Де́вствуеши, я́коже пре́жде, и ро́ждши Христа́, млеко́м пита́еши все́м пи́щу даю́щаго, Чи́стая, пресла́вно: ди́вно чу́до и непостижи́мо.

Конда́к му́ченика, гла́с 1.

Зва́ние благо́е стяжа́в, богому́дре, муже́й лука́вых отврати́лся еси́ ве́ры, не убоя́вся му́к, Агафони́че сла́вне, те́мже благи́м бы́л еси́ насле́дник и прия́л еси́ со стра́ждущими с тобо́ю досто́йныя венцы́.

Икос:

Блага́го и Человеколю́бца моли́, Агафони́че всему́дре, ублажи́ти озлобле́ние моего́ се́рдца и дарова́ти ми́ сло́во, е́же досто́йно пе́ти твоя́ по́двиги, е́же пострада́л еси́ по ве́ре Христа́ Бо́га на́шего, ка́ко всю́ду сматря́еши, я́коже па́стырь, му́чениче, и, во́лки отгна́в, наста́вил еси́ ста́до твое́ к земли́ и́стинней, вопия́ со дерзнове́нием: я́ко о́вцы вмени́хомся заколе́ния. Те́мже у́мрем, да прии́мем нетле́нныя венцы́.

Пе́снь 7.

Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших.

Припев: Святый мучениче Агафониче, моли́ Бо́га о нас.

Небе́сныя сла́вы о́бщник бы́л еси́, вся́, я́же на земли́, ми́мо те́к и от души́ небесе́ и земли́ Влады́ку возлюби́в, сла́вне, те́мже почита́ем твою́ святу́ю па́мять ве́рно.

Припев: Святый мучениче Агафониче, моли́ Бо́га о нас.

После́дуя стра́сти Христо́ве, источи́вшаго все́м безстра́стие ве́рным, претерпе́л еси́ поноше́ние, и ско́рби, му́чениче, и сме́рть непра́ведную, мече́м твоя́ глава́ отсе́чена бы́вши, с ра́достию.

Сла́ва Отцу́ и Сы́ну и Свято́му Ду́ху:

Ме́ртвым ка́пищем че́сти ника́коже по́дал еси́, честву́я безсме́ртнаго Бо́га, на́с ра́ди ме́ртва я́вльшася и льсти́ваго кре́пость умори́вша. Те́мже жи́знь и́стинную улучи́л еси́, му́чениче му́дре.

И ны́не и при́сно и во ве́ки веко́в. Ами́нь.

Богородичен: Бо́г из Тебе́ бы́сть Челове́к, смеше́нием, Чи́стая, обожи́в челове́чество и о́бщники естества́ Боже́ственнаго сотво́рь, Тебе́ блажа́щия, в жена́х вои́стинну благослове́нная, Чи́стая.

Пе́снь 8.

Ирмос: Его́же ужаса́ются Ангели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Припев: Святый мучениче Агафониче, моли́ Бо́га о нас.

От ме́ста влачи́мь на ме́сто, страда́льче, зе́млю освяти́л еси́ стопа́ми твои́ми, и, прекло́нь вы́ю мечу́ секу́щему, пло́ти отлучи́лся еси́ и Бо́гу соедини́лся еси́.

Припев: Святый мучениче Агафониче, моли́ Бо́га о нас.

Бие́ния вся́кая и му́ки плотски́я преоби́дел еси́, жела́нием опаля́емь Бо́жиим, и, ра́дуяся, совокупи́лся еси́, по́двиг до́брый тво́й сконча́в, вы́шним тма́м.

Сла́ва Отцу́ и Сы́ну и Свято́му Ду́ху:

Кре́пость низложи́ся безпло́тнаго врага́, плотско́ю не́мощию му́ченицы Христо́вы победи́ша сего́, укрепля́еми всеси́льною кре́постию Влады́ки.

И ны́не и при́сно и во ве́ки веко́в. Ами́нь.

Богородичен: Ски́нию Тя́, и Трапе́зу, и Боже́ственный Киво́т, и Ста́мну, вмести́вшую Ма́нну жи́зни, и святу́ю Го́ру имену́ем, Де́во Мари́е, при́сно благослове́нная.

Песнь 9

Ирмос: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Припев: Святый мучениче Агафониче, моли́ Бо́га о нас.

Во святы́х ли́цех свяще́нных апо́стол, и во дво́рех страда́льцев, и преподо́бных ста́дех, и со проро́ки причте́н, му́дре Агафони́че, ра́дуяся с ни́ми, Тро́ице венцено́сец ны́не предстои́ши све́тло.

Припев: Святый мучениче Агафониче, моли́ Бо́га о нас.

Яко чудна́ ре́вность твоя́, я́ко тверда́ твоя́ ве́ра, я́ко блага́ я́же к Бо́гу твоя́ наде́жда, му́чениче, я́ко светоза́рна твоя́ жи́знь, я́ко благода́ти испо́лнена сме́рть, безсме́ртныя тя́ сла́вы, страстоно́сче, сотвори́ прича́стника.

Припев: Святый мучениче Агафониче, моли́ Бо́га о нас.

Тя́, Христо́ва а́гнца, свяще́нное заколе́ние, страда́лец добро́ту, чуде́с исто́чника, Це́ркви кра́сное, богому́дре, украше́ние, утвержде́ние ве́рных, восхваля́ем по до́лгу, Агафони́че му́дре.

Сла́ва Отцу́ и Сы́ну и Свято́му Ду́ху:

Всесвята́я твоя́ па́мять, освяща́ющая ми́р, ны́не прии́де на́м, всесла́вный му́чениче, в не́йже мо́лимся улучи́ти твое́ заступле́ние, почита́юще тя́ любо́вию, Агафони́че, я́ко Сло́ва блага́го уго́дника.

И ны́не и при́сно и во ве́ки веко́в. Ами́нь.

Богородичен: Грехолюби́вый нра́в, и неиспра́влено житие́, и гре́шну ду́шу, и се́рдце оскверне́но име́я, блу́дный а́з, припа́даю Тебе́, Влады́чице: помози́ ми, и исправле́ние да́ждь, пре́жде да́же не пости́гнет мене́ сме́ртное посече́ние.

Свети́лен.

Яко благи́х тезоимени́т и побе́ды вку́пе, блага́го моли́, Агафони́че му́чениче, и щедролюби́ваго Бо́га, благи́х бы́ти ми́ прича́стнику ве́чных и пою́щим ве́рно све́тлую твою́ и достохва́льную па́мять.

Молитва

О святы́й уго́дниче Бо́жий, му́чениче Агафони́че! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.