3 сентября.

Канон святой мученице Вассе.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

А́гница Твоя́, Иису́се, Ва́ссо,/ зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую,/ и сраспина́юся и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю,/ но я́ко же́ртву непоро́чную приими́ мя с любо́вию поже́ршуюся Тебе́./ Тоя́ моли́твами,// я́ко ми́лостив, спаси́ ду́ши на́ша.

Кано́н святы́я, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святая мученице Ва́ссо, моли́ Бо́га о нас.

Твою́ восхваля́ющему ра́достно всесла́вную па́мять, с небесе́ ми́ просвеще́ние да́ти моли́ся, блаже́нная, и душетле́нных согреше́ний проще́ние.

Припев: Святая мученице Ва́ссо, моли́ Бо́га о нас.

Не устраши́ся повеле́ний богоме́рзких стра́хом Госпо́дним огражде́ная твоя́ душа́, ра́н разли́чных и бе́д, те́мже му́жески дерзну́ла еси́.

Сла́ва Отцу́ и Сы́ну и Свято́му Ду́ху:

Прия́ла еси́ му́ки многови́дныя с треми́ сы́ны, страстоте́рпице, терпели́вно, с ни́миже исплела́ еси́ венцы́ нетле́нныя, Тро́ицу сла́вящи.

И ны́не и при́сно и во ве́ки веко́в. Ами́нь.

Богородичен: Зачала́ еси́ Сло́во Отчее без боле́зней, Пресвята́я, ма́терних и Сего неизрече́нно па́че сло́ва на спасе́ние на́ше породила́ еси́.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святая мученице Ва́ссо, моли́ Бо́га о нас.

Разже́гшися ве́рою и те́плым жела́нием премно́гия любве́ Христо́вы, всехва́льная, о́гнь угаси́ла еси́ предстоя́нием Ангела и лю́ди неразу́мныя а́бие попали́ла еси́.

Припев: Святая мученице Ва́ссо, моли́ Бо́га о нас.

Ро́д ны́не пра́вых благослове́н бы́сть, из твоего́ чре́ва возсия́вший страда́ний све́тлостию, Ва́ссо пресла́вная, и тму́ разо́рший беззако́нных противле́нии ра́зума тве́рдостию.

Сла́ва Отцу́ и Сы́ну и Свято́му Ду́ху:

О, ма́тере превозше́ствие зако́на теку́щаго естества́! И и́же па́че естества́ едине́нием, я́ко претерпе́ непра́ведну сме́рть, разли́чно зря́щи, и́хже воспита́ ве́рою и млеко́м.

И ны́не и при́сно и во ве́ки веко́в. Ами́нь.

Богородичен: Умерщвле́на мя́ сне́дию преслуша́ния спасла́ еси́, еди́на Живо́т ро́ждши Ипоста́сный, Де́во Всенепоро́чная. Те́мже Тя́ достодо́лжно, Присноблаже́нную, ны́не ублажа́ем.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святая мученице Ва́ссо, моли́ Бо́га о нас.

Нераздво́ен иму́щи тво́й по́мысл, к боре́нию отлучи́лася еси́ льсти́ваго борца́ и глубино́ю крове́й сего́ потопи́ла еси́.

Припев: Святая мученице Ва́ссо, моли́ Бо́га о нас.

Тя́ глубина́ прие́мши, осужде́ну сме́ртию непра́ведною, ути́шися и спасе́, страстоте́рпице Ва́ссо, Боже́ственным манове́нием.

Сла́ва Отцу́ и Сы́ну и Свято́му Ду́ху:

Ца́рство непоколеби́мое со благохва́льными сы́ны твои́ми, сла́вная, насле́дила еси́, и небе́сный вои́стинну черто́г, и све́т незаходи́мый.

И ны́не и при́сно и во ве́ки веко́в. Ами́нь.

Богородичен: Несеко́мую го́ру Тя́ дре́вле Авваку́м прови́де Ду́хом: Бо́г из Тебе́ яви́ся и на́с, Де́во, спасе́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святая мученице Ва́ссо, моли́ Бо́га о нас.

Содержи́мь жа́ждею, сла́вне Ага́пие богоблаже́нне, Христо́вы любве́, зло́бу до конца́ возненави́дел еси́ и кре́пко подъя́л еси́ боле́зни му́к и копие́м теле́сное убие́ние.

Припев: Святая мученице Ва́ссо, моли́ Бо́га о нас.

Разве́рзенным твои́м вну́тренним, ноготьми́ стру́жемь, му́чениче Фео́гние, позна́л еси́ мно́жае, чи́стее и соверше́ннее Бо́га все́х, к Нему́же возше́л еси́ со сла́вою, страда́льчески блиста́я светлостьми́.

Сла́ва Отцу́ и Сы́ну и Свято́му Ду́ху:

Несумне́нною ве́рою, прему́дре ве́рне, вше́д в суди́лище неве́рных, блаже́нне, неразу́мных сердца́ удиви́л еси́, внегда́ сокруша́тися твои́м косте́м и на у́ды раздроби́тися всему́ телеси́.

И ны́не и при́сно и во ве́ки веко́в. Ами́нь.

Богородичен: Прама́тере Евы ны́не испра́вила еси́ паде́ние, ро́ждши Изба́вителя все́х, и Спа́са, и Зижди́теля, и Го́спода, Богома́ти, еди́на в жена́х Благослове́нная. Сего́ ра́ди Тя́, ве́рнии, сла́вим.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святая мученице Ва́ссо, моли́ Бо́га о нас.

Водруже́ния ме́рзких бого́в до конца́ истни́ла еси́, водрузи́вши ду́шу к Бо́жии несказа́нней любви́, и была́ еси́, страстоте́рпице Ва́ссо, Ангелов единожи́тельна.

Припев: Святая мученице Ва́ссо, моли́ Бо́га о нас.

Вели́ки за Христа́ по́двиги, му́ченице, прошла́ еси́, вели́ка и от Него́ прия́ла еси́ воздая́ния: безсме́ртное благосла́вие и черто́г боже́ственный, и пи́щу немимотеку́щую.

Сла́ва Отцу́ и Сы́ну и Свято́му Ду́ху:

Якоже дре́вле Ио́ну от глубины́ мо́ря, спасе́ Бо́г тя́ вседе́тельною си́лою, прехва́льная, в тебе́ чу́дный и в сове́тех святы́х всегда́ прославля́емый.

И ны́не и при́сно и во ве́ки веко́в. Ами́нь.

Богородичен: Пучи́ны грехо́вныя, и во́лны отча́яния обурева́ют мо́й у́м; умилосе́рдися, Влады́чице, и ру́ку ми́ простри́, и спаси́ мя, Спа́са ро́ждшая.

Седа́лен святы́я, гла́с 1.

Муче́ний о́гнь Ду́ха росо́ю погаси́ла еси́, честна́я, и к све́ту преста́вилася еси́ боже́ственному и невеще́ственному, и по кончи́не блаже́нней источа́еши же исцеле́ний ка́пли, уставля́ющи разжже́ния страсте́й си́лою духо́вною.

Пе́снь 7.

Ирмос: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша пою́ще: отцев Бо́же, благослове́н еси́.

Припев: Святая мученице Ва́ссо, моли́ Бо́га о нас.

Си́лою Боже́ственною пла́мень огня́ проше́дши, му́ченице, неопали́ма, огне́м твои́х крове́й, я́ко ве́щь, пре́лесть, вопию́щи, попали́ла еси́: оте́ц на́ших Бо́же, благослове́н еси́.

Припев: Святая мученице Ва́ссо, моли́ Бо́га о нас.

Иже льво́в связа́вый стремле́ния в ро́ве, спаса́я Твоего́ Дании́ла, невреди́му показа́л еси́ зверьми́ страстоте́рпицу, пою́щую Ти́, Влады́ко: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Све́тлыми луча́ми Креста́ осия́ема, Ва́ссо сла́вная, тму́ пре́лести невре́дно премину́ла еси́ и к све́ту изшла́ еси́, вопию́щи: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Расто́ргни многоплете́нныя мои́х согреше́ний плени́цы, Богоневе́сто, взе́млющаго ми́ра гре́х, Бо́га па́че сло́ва ро́ждши, Благослове́нная Чи́стая, при́сно препросла́вленная.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святая мученице Ва́ссо, моли́ Бо́га о нас.

Иже на́шею не́мощию Себе́ обложи́вый, твое́ немощно́е я́ве укрепи́ и тя́ соде́ла си́льнейшу, му́ченице, огня́, воды́, и звере́й, и мучи́тельных сосу́д, ве́рно вопию́щую: свяще́нницы, благослови́те, лю́дие, превозноси́те во вся́ ве́ки.

Припев: Святая мученице Ва́ссо, моли́ Бо́га о нас.

Юношески хра́брствовавше и му́жески победи́ша о́троцы честни́и сопроти́вных противле́ние, боже́ственный Феогни́й, свяще́нный Ага́пий, ку́пно и Пи́ст, де́лом и сло́вом показа́вшеся и побе́дныя венцы́ от Бо́га прии́мше, Того́ превозно́сят во вся́ ве́ки.

Припев: Святая мученице Ва́ссо, моли́ Бо́га о нас.

Яко ма́слина благопло́дна, я́ко многоно́сен виногра́д, лоза́ми треми́ управля́емь, с ни́миже возде́ла испове́дания гро́зды, вино́ свиде́ния источа́ющи, Ва́ссо, веселя́щее сердца́ благоче́стно вопию́щих: лю́дие, превозноси́те Христа́ во ве́ки.

Сла́ва Отцу́ и Сы́ну и Свято́му Ду́ху:

Со безпло́тными чи́ны, с му́ченическими во́инствы престо́лу предстоя́ще Бо́жию, прехва́льнии, и сла́вы, и благода́ти, и просвеще́ния испо́лнени, разори́те на́ших согреше́ний мра́к, ве́рою творя́щих светоно́сную и боже́ственную, испо́лнену дарова́ний, ва́шу изря́дную па́мять.

И ны́не и при́сно и во ве́ки веко́в. Ами́нь.

Богородичен: Иже небеса́ ма́нием и зе́млю хоте́нием Сло́во Отчее соде́лав, Пречи́стая, и созда́в челове́ка, из Тебе́ я́ве прия́т пло́ть Себе́, назда́ти естество́ на́ше истле́вшее и сокруше́нное пре́лестию зми́я, Де́во, Еди́ный Ми́лостивый.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святая мученице Ва́ссо, моли́ Бо́га о нас.

Ви́дети жела́ющи, я́же земно́е о́ко вои́стинну не ви́де, теле́сная терпя́ше боле́зненная му́жески сокруше́ния удо́в, прехва́льная, стремле́ние звере́й, жже́ние огня́, мо́ря треволне́ние, невеще́ственным светозаре́нием уясня́ема, всеблаже́нная.

Припев: Святая мученице Ва́ссо, моли́ Бо́га о нас.

Яко вои́стинну светоно́сна и благоле́пна, богоно́сна луна́ возсия́ла еси́ боже́ственнаго ли́ка, я́коже во звезда́х светоявле́нных приводи́ма благода́ти со проше́дшими из твоего́ чре́ва. И ны́не вселе́нную невеще́ственным светозаре́нием уясня́ете, блаже́ннии.

Припев: Святая мученице Ва́ссо, моли́ Бо́га о нас.

Утверди́вше на ка́мени терпе́ния мы́сли восхожде́ния, блаже́ннии, искуше́нии многови́дных наведе́ний, я́ко вои́стинну неукло́нни яви́стеся и, побе́ду по Христе́ взе́мше, с Си́м при́сно ца́рствовати сподо́бистеся, ра́дующеся.

Сла́ва Отцу́ и Сы́ну и Свято́му Ду́ху:

Яко вои́стинну цела́ голуби́ца и го́рлица, я́же Бо́га возлю́бльши, ла́стовица, с боже́ственными возлете́вши птенцы́, на небесе́х всели́ся, к держа́ве боже́ственней и мы́сленней, зимы́ убежа́вши и ловле́ния де́монскаго, Ва́сса, ю́же любо́вию ублажа́ем.

И ны́не и при́сно и во ве́ки веко́в. Ами́нь.

Богородичен: Человеколю́бца ро́ждши и Изба́вителя, чу́дная и благолюби́вая Влады́чице, грехо́в избавле́ние ми́ да́ждь Твои́ми моли́твами и ду́шу мою́, Всечестна́я, озло́бленную помышле́нии, ублажи́ и покажи́ страсте́й смертоно́сных свобо́дну, Всенепоро́чная.

Стихи́ры святы́я, гла́с 4.

Стра́сть претерпе́ла еси́ / мно́гих му́к, всехва́льная, / кре́пко присту́пльши, / отсю́ду к неболе́зненному / преста́вилася еси́ поко́ю, / и незаходи́мому сия́нию, / и све́тлей ра́дости, / и ве́чному боже́ственному наслажде́нию. / Те́м тя́ ублажа́ем / и свято́е твое́ дне́сь соверша́ем торжество́, / страстоте́рпице богоприя́тная.

По многоболе́зненных / и многоразли́чных му́ках / в мо́ре вве́рженей бы́вшей, / Бо́г тя́ спасе́, Спа́с вся́ческих, / Боже́ственною си́лою попра́вшую кре́пость чужда́го, / Ва́ссо многострада́льная, / и отсю́ду просвети́ла еси́ благочести́вых ра́зумы, / сконча́вши зна́мения, / па́че ума́ и помышле́ния.

Якоже пти́ца сладкопе́снива, / в лу́зе возгласи́вши кра́снаго страда́ния, / твоя́ созвала́ еси́ птенцы́ кра́сныя, / ловле́ния пре́лести избе́гши с ни́ми, / Ва́ссо богому́драя досточу́дная, / с ни́миже и всели́лася еси́ / в добро́тах, преблаже́нная, небе́сных, / моля́щи о все́х всегда́.

Сла́ва, и ны́не, гла́с 6:

Прииди́те, всеми́рное успе́ние Всенепоро́чныя Богоро́дицы пра́зднуем, дне́сь бо Ангели торжеству́ют честно́е преставле́ние Бо́жия Ма́тере, и к весе́лию на́с, земны́х, призыва́ют, вопи́ти немо́лчным гла́сом: ра́дуйся, преста́вльшаяся от земли́, и к небе́сным оби́телем пресе́льшаяся; ра́дуйся, я́же учени́ческий ли́к о́блаком ле́гким во eди́но собра́вшая; ра́дуйся, упова́ние и спасе́ние на́ше: Тя́ бо христиа́нский ро́д непреста́нно ублажа́ет.

Молитва

О свята́я, Ва́ссо. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.