3 сентября.

Канон святому апостолу Фаддею.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь апо́стола, гла́с 3:

Апо́столе святы́й Фадде́е, моли́ ми́лостиваго Бо́га, да прегреше́ний оставле́ние пода́ст душа́м на́шим.

Тропарь апостола Фаддея, глас 2

Днесь Едес град веселится,/ прием тобою Крещения баню,/ и Авгарь, страстей пременен, твою память славит./ С нимиже поем и мы:/ веселия духовнаго исполни живот наш/ и страсти исцели,/ Фаддее апостоле, молитвами твоими.

Кано́н апо́стола, гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Апо́столе Фадде́е, моли́ Бо́га о нас.

Престо́лу Влады́чню, прему́дре Фадде́е, предстоя́, просвеще́ние ми́ пода́ждь светоно́сное твое́ пе́ти торжество́.

Припев: Апо́столе Фадде́е, моли́ Бо́га о нас.

Безле́тный Све́т в ле́то, с на́ми, я́влься пресу́щный, я́ко лучу́, тя́, блаже́нне, оста́ви, ми́р просвеща́юща.

Сла́ва Отцу́ и Сы́ну и Свято́му Ду́ху:

Си́лою опоя́сав тя́, в кре́пости Непобеди́мый, льсти́ваго всю́ кре́пость погуби́ти укрепи́л е́сть.

И ны́не и при́сно и во ве́ки веко́в. Ами́нь.

Богородичен: Влады́чице, все́ми яви́лася еси́ тварьми́ Влады́чествующаго неизрече́нно ро́ждши, Богоро́дице Де́во Препе́тая.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Апо́столе Фадде́е, моли́ Бо́га о нас.

Заре́ю Боже́ственныя благода́ти просвеща́я лю́ди, сла́вне, све́т чи́ст яви́лся еси́ су́щим во тме́ лю́тых.

Припев: Апо́столе Фадде́е, моли́ Бо́га о нас.

Цельбу́ и избавле́ние, богоде́тельными, му́дре, манове́нии, царю́ прине́сл еси́ Авгарю, к нему́ прише́д.

Сла́ва Отцу́ и Сы́ну и Свято́му Ду́ху:

Хра́мы соде́лал еси́ Вседе́тельному, му́дре, Ду́ху, земноро́дных па́губныя разори́л еси́ хра́мы.

И ны́не и при́сно и во ве́ки веко́в. Ами́нь.

Богородичен: Зако́на проначерта́ния и проро́честии гла́си, Влады́чице, Твое́ стра́шное рождество́ богоявле́нно сказа́ша.

Седа́лен, гла́с 8.

Приступи́в к Со́лнцу мы́сленному, от него́ зари́ та́йныя прия́л еси́ и бы́л еси́, я́ко звезда́ пресве́тлая, озаря́я всея́ земли́ исполне́ния и разоря́я пре́лести мглу́, блаже́нне. Те́мже светоно́сную твою́ соверша́ем па́мять, ве́рно восхваля́юще тя́, и согла́сно вопие́м ти́: Фадде́е апо́столе, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Апо́столе Фадде́е, моли́ Бо́га о нас.

Высо́к у́м име́я, прия́т боже́ственныя ра́зумы и духо́вная дарова́ния, учениче́, Фадде́е, все́х Царя́.

Припев: Апо́столе Фадде́е, моли́ Бо́га о нас.

Та́ин, пребога́те, боже́ственных, во уче́нии, блаже́нне, бы́в, ненака́занныя просвети́л еси́, Тро́ицу чести́ Единосу́щную.

Сла́ва Отцу́ и Сы́ну и Свято́му Ду́ху:

Зако́н Боже́ственный начерта́л еси́, блаже́нне, на сердца́х, заглади́в пе́рвее неве́дения начерта́ние и злоче́стия истука́нныя.

И ны́не и при́сно и во ве́ки веко́в. Ами́нь.

Богородичен: Яко Зижди́теля ро́ждши, все́х тва́рей яви́лася еси́ Цари́ца. Сего́ ра́ди Тя́ сла́вим, Богоро́дице, еди́на Присноде́во.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Апо́столе Фадде́е, моли́ Бо́га о нас.

Влады́ки боже́ственное нося́, блаже́нне, подо́бие, ме́стному кня́зю Авгарю боже́ственный вра́чь прише́л еси́.

Припев: Апо́столе Фадде́е, моли́ Бо́га о нас.

Свяще́нный Фома́ тя́, по боже́ственнем Сло́ва вознесе́нии, пропове́дника посыла́ет, прему́дре Фадде́е, тре́бующим.

Сла́ва Отцу́ и Сы́ну и Свято́му Ду́ху:

Неду́ги отгони́мы и исцеля́ема сердца́ зря́ Авгарь, испо́лнися боже́ственнаго просвеще́ния хода́тайством твои́м.

И ны́не и при́сно и во ве́ки веко́в. Ами́нь.

Богородичен: Воплоще́нно Сло́во, сугу́бо де́йство нося́ща, родила́ еси́, Неискусобра́чная Отрокови́це, пребы́вши Де́ва Нескве́рная.

Пе́снь 6.

Ирмос: Ио́ну в ки́те, Го́споди, еди́наго всели́л еси́, мене́ же свя́зана мре́жами вра́жиими, я́ко от тли́ о́наго, спаси́.

Припев: Апо́столе Фадде́е, моли́ Бо́га о нас.

Просвеще́ние Свята́го Ду́ха, всели́вшееся в се́рдце твое́, свети́льника ми́ру тя́, Фадде́е, соде́ла и́стинна, омраче́ние ле́сти разоря́юща.

Припев: Апо́столе Фадде́е, моли́ Бо́га о нас.

Нося́ пло́тию Христо́вы ра́ны, Фадде́е, спаси́тельныя, я́ко украше́ние вся́кия некрасоты́, лю́ди изба́вил еси́, му́дре, и к ра́дости взя́лся еси́ прекра́сней.

Сла́ва Отцу́ и Сы́ну и Свято́му Ду́ху:

Утреннее на́м яви́л еси́ со́лнце пра́вды, сла́вне, показу́я, и́мже просвети́вшеся, сы́нове све́та мы́сленнаго, земноро́днии, Фадде́е, бы́хом.

И ны́не и при́сно и во ве́ки веко́в. Ами́нь.

Богородичен: Но́ваго на́м Младе́нца породила́ еси́, Отцу́ Единосу́щна, истле́вшее естество́ челове́ческое к пе́рвей добро́те, Чи́стая, сие́ па́ки возводя́ща.

Конда́к апо́стола, гла́с 4:

Яко звезду́ пресве́тлую Це́рковь тя́ стяжа́, апо́столе Фадде́е, чудесы́ твои́ми всегда́ просвеща́ема, спаси́ ве́рою чту́щия па́мять твою́.

Пе́снь 7.

Ирмос: Отроцы богочести́вии в Вавило́не, о́бразу злато́му не поклони́шася, но посреде́ пе́щи о́гненныя, ороша́еми, пе́снь воспева́ху, глаго́люще: превозноси́мый отце́в и на́ш Бо́же, благослове́н еси́.

Припев: Апо́столе Фадде́е, моли́ Бо́га о нас.

Чудеса́ соверша́я призыва́нием Христа́, я́вльшагося ве́щию те́ла, привле́кл еси́ лю́ди же и гра́ды, прехва́льне, во изве́стную ве́ру, зову́щия: благослове́н Бо́г оте́ц на́ших.

Припев: Апо́столе Фадде́е, моли́ Бо́га о нас.

Уста́вил еси́ гное́ние безбо́жия сла́дких твои́х слове́с боже́ственною со́лию и исцели́л еси́ сердца́, стрело́ю змии́ною уя́звеная, блаже́нне апо́столе, — благослове́н еси́, — вопия́, — Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Взя́тся к высоте́ виде́ния, испо́лнився, о Фадде́е, Боже́ственнаго Ду́ха, и спаси́тельным сло́вом боже́ственне обогати́лся еси́, и лю́ди вопи́ти научи́л еси́: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Нра́вом мои́м поползну́вся и дея́нии неподо́бными обложе́н, к Тебе́ прибега́ю: помози́ ми, Влады́чице, покая́ния о́бразы подаю́щи смире́нней мое́й души́, да прославля́ю Тя́.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Апо́столе Фадде́е, моли́ Бо́га о нас.

Не́бо яви́лся еси́, сла́ву пове́дая Бо́жию, Фадде́е, и язы́ков бы́л еси́ просвеще́ние, к ве́ре Боже́ственней возводя́ те́пле вопию́щих: по́йте Го́спода и превозноси́те Его́ во ве́ки.

Припев: Апо́столе Фадде́е, моли́ Бо́га о нас.

Кре́пость немощны́м, и слепы́м прозре́ние, и хромы́м благотече́ние, блаже́нне, подая́ духо́вною си́лою, гра́да Еде́сскаго свети́льник бы́л еси́, при́сно ве́рно тя́, Фадде́е, хва́лящаго.

Сла́ва Отцу́ и Сы́ну и Свято́му Ду́ху:

Иже бога́тством чуде́с неве́рен язы́к в ве́ру ма́нием Боже́ственным претвори́вый и от и́дольския ле́сти спасы́й к Нему́ притека́ющия, ве́рою по до́лгу сла́вится Фадде́й.

И ны́не и при́сно и во ве́ки веко́в. Ами́нь.

Богородичен: Зако́на сено́вное преста́, Влады́чице, Тебе́ ро́ждшей зако́ну Да́теля, благода́тию просвеща́юща вселе́нную: Его́же при́сно моли́, зако́ном мя́ побежда́ема грехо́вным уще́дрити вско́ре.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Апо́столе Фадде́е, моли́ Бо́га о нас.

Ви́дети я́же ве́чная Боже́ственная воздая́ния и жела́ний кра́йних ясне́йше, блаже́нне, приближа́яся, Фадде́е, красу́йся и лику́й.

Припев: Апо́столе Фадде́е, моли́ Бо́га о нас.

Яко ке́др, я́ко вели́к кипари́с, сла́вне Фадде́е, доброде́тельми возне́слся еси́, благоуха́я сердца́ восхваля́ющих тя́.

Припев: Апо́столе Фадде́е, моли́ Бо́га о нас.

Совоку́плься, блаже́нне, апо́столом, и му́чеником, и безпло́тным лико́м веселя́ся, с ни́миже моли́ спасти́ тя́ чту́щия.

Сла́ва Отцу́ и Сы́ну и Свято́му Ду́ху:

Па́мять твоя́, бога́тным сия́нием дарова́ний ве́рных мы́сли просвеща́ющи, восхвали́ти тя́, Фадде́е, все́х понужда́ет.

И ны́не и при́сно и во ве́ки веко́в. Ами́нь.

Богородичен: Благолюби́вая Де́во, озло́бленную грехми́ ду́шу мою́ ублажи́, Яже Преблага́го Сло́ва поро́ждши.

Свети́лен апо́стола.

Еде́су пома́зан бы́в свети́льник, Фадде́е всему́дре, в не́мже пропове́дал еси́ боже́ственное смотре́ние Сло́ва, и, местонача́льника Авгаря и и́же с ни́м вся́ просвети́в, служи́тели показа́л еси́ Пресве́тлыя Тро́ицы, апо́столе богопропове́дниче.

Молитва

Святы́й сла́вный и всехва́льный апо́столе Христо́в Фадде́е, мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.