3 сентября.

Канон преподобному Аврамию, Смоленскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Дне́сь возсия́ на́м па́мять твоя́, сла́вне, я́ко со́лнце, светоза́рно луча́ми озаря́ющая ми́р и тму́ но́щи злы́х духо́в от на́с отгоня́ющая. Дне́сь небе́сныя си́лы святы́х Ангел и ду́ши пра́ведных мы́сленно торжеству́ют, ра́дующеся. Дне́сь и мы́, гре́шнии, припа́дающе, мо́лимся: о́тче преподо́бне Авра́мие, Христа́ Бо́га моли́ непреста́нно, спасти́ гра́д и лю́ди, любе́зно тебе́ почита́ющия.

Стихи́ра, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х, те́м на небесе́х обре́л еси́ мзду́ трудо́в твои́х, де́монския погуби́л еси́ полки́ и Ангельския дости́гл еси́ чи́ны, и́хже житию́ без поро́ка поревнова́л еси́. Дерзнове́ние име́я ко Христу́ Бо́гу, ми́р испроси́ душа́м на́шим.

Кано́н преподо́бнаго, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобне отче Аврамие, моли́ Бо́га о нас.

Яко возсияв всем концем, Христе, Праведное Солнце, Пречи́стыя Твоея́ Ма́тере мольба́ми покая́ние, и умиле́ние, и сле́зы да́ждь ми́, Бо́же, и моле́нием преподо́бнаго спаси́ мя.

Припев: Преподобне отче Аврамие, моли́ Бо́га о нас.

Ангельския безпло́тныя чи́ны приво́дим Ти́, Христе́, на моле́ние, си́х мольба́ми изба́ви и сохрани́ ста́до Твое́, Бла́же, от все́х бе́д и моли́твами преподо́бнаго спаси́ мя.

Сла́ва Отцу́ и Сы́ну и Свято́му Ду́ху:

С ли́ки проро́к, и апо́стол, и му́ченик, и святи́телей и преподо́бных и со все́ми святы́ми моли́, свя́те, о́тче, моля́щимся тебе́ приле́жно изба́вится от вся́кия беды́, и спасти́ ны.

И ны́не и при́сно и во ве́ки веко́в. Ами́нь.

Богородичен: Вси́ мо́лим Тя́ приле́жно, Госпоже́ Де́во Ма́ти Свята́я: избавле́ние от все́х бе́д пода́ждь на́м, моля́щися приле́жно Сы́ну и Бо́гу поми́ловати же и спасти́ ны.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобне отче Аврамие, моли́ Бо́га о нас.

Моле́ния послу́шав, Го́споди, иногда́ Анны, пода́л еси́ проро́ка, и Тебе́ отдаде́ служи́теля, та́ко и на́ше услы́ши моле́ние, моли́твами преподо́бнаго, и спаси́ ны.

Припев: Преподобне отче Аврамие, моли́ Бо́га о нас.

Приими́ от души́ моля́щияся Тебе́, Христе́, и да́ждь на́м по́мощь Твою́ свы́ше, я́ко иногда́ ученико́м Твои́м, Христе́, на мо́ри, и от бе́д изба́ви на́с моле́нием преподо́бнаго.

Сла́ва Отцу́ и Сы́ну и Свято́му Ду́ху:

Моли́ся приле́жно за ны́, избавле́ние пода́ти, о́тче Авра́мие, от все́х бе́д, я́же на ны́ прихо́дят, ускори́, свя́те, на по́мощь на́шу.

И ны́не и при́сно и во ве́ки веко́в. Ами́нь.

Богородичен: Бо́жия рождества́ Твоего́, Чи́стая, вся́ка существа́ чи́н прехо́дит чудесы́: Бо́га бо па́че естества́ зачала́ еси́ во чре́ве, и ро́ждши, пребыва́еши Присноде́ва.

Седа́лен свята́го, гла́с 4.

Удиви́ся, преподо́бне и богоно́се Авра́мие, во все́м ми́ре жити́е твое́, я́ко от утро́бы ма́терни воззва́н бы́л еси́, свя́те, я́ко Самуи́л, сла́вне. Веселя́тся Це́ркви Христо́вы, и ра́дуются мона́хов стада́, и ве́сь ми́р пра́зднует, Христу́ Бо́гу моля́щеся приле́жно: Го́споди, спаси́ гра́д и лю́ди, моли́твами Влады́чицы, и преподо́бнаго ра́ди поми́луй на́с.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобне отче Аврамие, моли́ Бо́га о нас.

Христо́в слуга́ вои́стинну яви́лся еси́, свя́те, я́ко от утро́бы ма́терни освяти́вся Бо́гу, я́ко же́ртва прине́слся еси́ честна́ Го́сподеви, от со́вести чи́сты моля́ся Ему́.

Припев: Преподобне отче Аврамие, моли́ Бо́га о нас.

Вои́стинну Христо́в слуга́ бы́л еси́, о́тче Авра́мие, я́ко проро́к и апо́стол, святи́телей и преподо́бных все́х подража́тель бы́в, напоя́я благода́ти умиле́ния сердца́ на́ша.

Сла́ва Отцу́ и Сы́ну и Свято́му Ду́ху:

Вои́стинну Христо́с Бо́г на́ш показа́ тя в напа́стех ти́хое приста́нище, свя́те, и забра́ло, сирота́м же все́м утеше́ние.

И ны́не и при́сно и во ве́ки веко́в. Ами́нь.

Богородичен: Неизглаго́ланно и непостижи́мо е́сть Твоего́, Богоро́дице, боголе́пнаго вои́стинну рождества́ та́инство, небе́сным и земны́м, и́мже, вси́ ве́рнии, спа́сшеся, Тя́ хва́лим.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобне отче Аврамие, моли́ Бо́га о нас.

Утреневал еси́ к Бо́гу от ю́ности, блаже́нне о́тче Авра́мие, я́ко слави́й, му́дре, сладкоглаго́лив, я́ко ла́стовица многогла́сна, свя́те, принося́ моли́тву Бо́гу.

Припев: Преподобне отче Аврамие, моли́ Бо́га о нас.

Украси́лся еси́ священноле́пно, богоно́се о́тче Авра́мие, иере́йскою ле́потою, я́ко и Ааро́н и Самуи́л, боголе́пно по вся́ дни́ служа́ Бо́гу и моля́ся Ему́.

Сла́ва Отцу́ и Сы́ну и Свято́му Ду́ху:

Вои́стинну от утро́бы позна́н бы́л еси́, о́тче, от Бо́га ве́рен служи́тель, при́зван же бы́в, я́ко други́й проро́к, свя́те, Ду́хом Бо́жиим, учи́л еси́ лю́ди богоразу́мию.

И ны́не и при́сно и во ве́ки веко́в. Ами́нь.

Богородичен: Богоро́дицу Тя́ от души́, Влады́чице ми́ру Блага́я, испове́дающия спаса́й: Тя́ бо заступле́ние и́мамы вои́стинну, Всечи́стая.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Преподобне отче Аврамие, моли́ Бо́га о нас.

Жите́йскаго, блаже́нне, убежа́в зла́го волне́ния, в тишину́ доше́д Бо́жия поко́я и наслажде́ния, моли́ся пода́ти и на́м о Христе́ того́ наслажде́ния.

Припев: Преподобне отче Аврамие, моли́ Бо́га о нас.

Бу́рно приста́нище потопля́ет мя́, пода́ждь ми́ ру́ку Твою́, Влады́ко Го́споди, я́ко иногда́ Петру́ утопа́ющу, и спаси́ мя во оти́шие Твое́ преподо́бнаго Авра́мия моле́нием.

Сла́ва Отцу́ и Сы́ну и Свято́му Ду́ху:

Помоли́ся приле́жно за ны́, о́тче преподо́бне Авра́мие, к Бо́гу, изба́витися вско́ре от все́х бе́д же и скорбе́й, и пода́ти ми́р и спасе́ние.

И ны́не и при́сно и во ве́ки веко́в. Ами́нь.

Богородичен: Пречи́стая Влады́чице, ро́ждши земны́м Прави́теля и Го́спода, похоте́й ми́ злолю́тое укроти́ смуще́ние, и тишину́ пода́ждь се́рдцу моему́.

Конда́к, гла́с 3.

Возсия́, Го́споди, гра́ду Твоему́ па́мять Твоего́ уго́дника, я́ко све́тлое со́лнце, ра́достно все́х, я́ко луча́ми, озаря́ющи, па́че же моли́твы Пречи́стыя Твоея́ Ма́тере, от все́х бе́д избавля́ют на́с и упраждня́ют ва́рварская шата́ния. Те́м мы́, лю́дие Твои́ и гра́д на́ш, вельми́ хва́лимся и спаса́емся моли́твами Твоего́ уго́дника Авра́мия, преподо́бнаго отца́.

Икос:

Уясни́ ми язы́к и укрепи́ ми у́м, Христе́ Бо́же, моли́твами Пречи́стыя Твоея́ Ма́тере. Язы́к ми́ бла́г глаго́лати пода́ждь на похвалу́ и на умоле́ние Твоего́ уго́дника. Свещу́ души́ моея́ уны́лую, ю́же, воздрема́вся, угаси́х, моли́твами преподо́бнаго Авра́мия возжзи́ и не отлучи́ мене́, Христе, многосогре́шша, ли́ка преподо́бных Твои́х. Все́ у́бо упова́ние к Тебе́ возлага́ю: Ты́ бо и гра́д сохраня́еши моли́твами преподо́бнаго.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Преподобне отче Аврамие, моли́ Бо́га о нас.

Халде́йскую ороси́в отроко́в пе́щь и прело́ж на хла́д, на ны́ иноплеме́нник нападе́ние, Христе́, погуби́ моле́нием преподо́бнаго Авра́мия, пою́ща: благослове́н Бо́г оте́ц на́ших.

Припев: Преподобне отче Аврамие, моли́ Бо́га о нас.

Проро́ку Дании́лу, Влады́ко Христе́, иногда́ ди́вия зве́ри укроти́л еси́, обузда́в; та́кожде и ны́не все́х проти́вных на ны́ стремле́ния укроти́, и обузда́й моле́нием, Бо́же, преподо́бнаго Авра́мия.

Сла́ва Отцу́ и Сы́ну и Свято́му Ду́ху:

Егда́ прии́деши, Бо́же, суди́ти на зе́млю, Христе́ Царю́, со Ангельскими си́лами, тогда́, Ми́лостиве, пощади́ ны, пою́щия, моли́твами преподо́бнаго Авра́мия: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Тобо́ю на́м, Де́во, све́т возсия́, те́мным, и отпуще́ние, Ты́ бо родила́ еси́ Зижди́теля все́х Бо́га, Его́же моли́, Пречи́стая Присноде́во, посла́ти ве́рным ве́лию ми́лость.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Преподобне отче Аврамие, моли́ Бо́га о нас.

Яви́ся, я́ко река́ у́мная, от у́ст Боже́ственного рая́ исходя́щи, преподо́бне о́тче Авра́мие, и все́х ве́рных напая́я ду́ши умиле́ния, и омыва́я все́х скве́рну, превознося́щих Христа́ во ве́ки.

Припев: Преподобне отче Аврамие, моли́ Бо́га о нас.

Яко небеса́ у́мная, яви́шася уста́ твоя́, свя́те, язы́к же тво́й, о́тче, я́ко со́т ме́двеный сладя́, и все́х науча́я вопи́ти: Го́спода по́йте и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Воздежи́ ру́це твои́ ко Влады́це Бо́гу, свя́те, моли́ за ны́ приле́жно, поми́ловати гра́д и лю́ди, изба́витися гла́да же, и тру́са, и наше́ствия иноплеме́нных, Его́же превозно́сим во ве́ки.

И ны́не и при́сно и во ве́ки веко́в. Ами́нь.

Богородичен: Арха́нгела гла́сом зове́м Ти́, Пречи́стая Де́во Ма́ти: ра́дуйся, Обра́дованная, Госпо́дь с Тобо́ю, Ангелом и челове́ком заче́нши и ро́ждши Го́спода, Его́же превозно́сим во вся́ ве́ки.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Преподобне отче Аврамие, моли́ Бо́га о нас.

Ны́не, блаже́нне, водворя́ешися и весели́шися со Ангельскими си́лами, прие́мля поко́й проти́ву трудо́в, о́тче свя́те Авра́мие, и на́с, моля́щихся, помяни́, богоно́се, че́стно пра́зднующих па́мять твою́ и Христа́ велича́ющих.

Припев: Преподобне отче Аврамие, моли́ Бо́га о нас.

Ны́не собо́р святы́х Ангел и ли́ки святы́х апо́стол, проро́к и му́ченик, святи́телей и преподо́бных све́тло торжеству́ют, ра́дующеся, в па́мяти твое́й, свя́те о́тче Авра́мие. С ни́миже моли́ся, богоно́се, Христу́ Бо́гу, все́х изба́вити бе́д, ве́рою тя́ блажа́щих.

Сла́ва Отцу́ и Сы́ну и Свято́му Ду́ху:

Приими́, Влады́ко Христе́ Царю́, моле́ние ра́б Твои́х и обрати́ на ра́дость воздыха́ние на́ше, мо́лит Тя́ собо́р арха́нгел, проро́к и му́ченик, апо́стол и святи́тель и преподо́бный Авра́мий: егда́ прии́деши суди́ти всему́ ми́ру, тогда́ спаси́ и поми́луй велича́ющия Тя́.

И ны́не и при́сно и во ве́ки веко́в. Ами́нь.

Богородичен: Досто́йно Тя́ ублажа́ем вои́стинну и велича́ем, Пречи́стая Де́во Ма́ти Христа́ Бо́га. Ты́ бо еси́ небе́сных си́л ра́дость и все́х святы́х добро́та и украше́ние, христиа́н прибе́жище и стена́, гре́шных пу́ть и пору́чница Тебе́ велича́ющих.

Свети́лен.

Мирско́е пристра́стие оста́вль и бога́тство мимотеку́щее и Кре́ст тво́й взе́мь, о́тче, Христо́ви, Авра́мие, усе́рдно после́довал еси́, по́стнически же умертви́л еси́ стра́сти, и к безстра́стию прите́кл еси́, и мо́лишися о на́с, богоно́се.

Молитва

О великий отче Аврамие, доблий подвижниче Христов, в скорбех и напастех преславный наш помощниче и защитниче: ничтоже возможе отлучити тя от любве ко Господу Иисусу: ни гонения, ни клеветы, ни прещения врагов твоих. Ты, яко лев, исшел еси на брань противу волков мысленных, духов злобы, подвигших на тя, ради добраго твоего исповедания и проповедания, единоплеменный тебе народ смоленский: и яко огненная стрела поразил еси твоих гонителей силою благодати Святаго Духа и крепкия любве твоея к Богу: и яко орел, воспарил еси в горния обители Отца Небеснаго, наследовав тамо вечную жизнь, славу и блаженство неизреченное. Веруем, святче Божий, яко предстоя со ангелы и всеми святыми престолу славы Триипостаснаго Бога, усердныя и богоприятныя возносиши молитвы не токмо о святей обители сей, тобою устроенной, и о граде нашем Смоленсте, но и о всей святей Христовой Церкви, и молим тя молися Господеви: страждущую страну Российскую от лютых безбожник и власти их да свободит, и да возставит престол православных царей, верных рабов Твоих, в скорби и печали день и нощь вопиющих к Тебе, многоболезненный вопль да услышит, и да изведет от погибели живот наш. Веруем, преславный чудотворче, яко ты силою всемогущаго Господа Иисуса Христа, еще жив сый, умолил еси напоити жаждущую за грехи людей землю смоленскую обилным дождем, и по успении своем источаеши обилныя дары благодатныя помощи во спасение всем с верою к тебе прибегающым и молящымся тебе, наипаче же испрашиваеши кончину с покаянием почитающым тебе, да вси от мала до велика, единодушно прославляем неисповедимое величие благости Божией. Темже с верою и любовию припадающе и благоговейно лобызающе святую икону твою, умоляем тя, добрый на небеси наш молитвенниче и заступниче, помогай нам грешным и смиренным, твоими молитвами во всех скорбех, нуждах и обстояниих наших, сохраняй нас и святую обитель твою и град сей Смоленск (и весь сию и храмы сия) и вся православныя христианы российския страны от свякаго зла и всякия напасти, наипаче же споспешествуй вечному нашему спасению и всех просящих твоея помощи и заступления. Угодниче Божий, преподобне отче Аврамие, моли Христа Спасителя нашего, да даст той мир и тишину всем православным христианом и да отвратит от нас всякий гнев, на ны движимый, да избавит нас от сетей вражиих, томления во узах греха и мучений адских, и да сподобит нас недостойных и грешных стати одесную Его на суде Его праведном и внити в вечный покой святых Его, идеже празднующих глас непрестанный и неизреченная сладость зрящих доброту лица Его, и тако да возможем с тобою и всеми святыми безконечно славити Троицу Единосущную и Нераздельную во веки веков. Аминь.