2 сентября.

Канон святому пророку Самуилу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, гла́с 2:

Проро́ка Твоего́ Самуи́ла па́мять, Го́споди, пра́зднующе, те́м Тя́ мо́лим: спаси́ ду́ши на́ша.

Кано́н свята́го, гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Пророче Божий Самуиле, моли́ Бо́га о нас.

Непло́дней мое́й души́ доброде́телей благопло́дие израсти́ти, твои́ми моли́твами сподо́би, му́дре, непло́дныя прозябе́ние, я́ко да твое́ восхвалю́ светоно́сное торжество́ свяще́нными, Самуи́ле, пе́сньми.

Припев: Пророче Божий Самуиле, моли́ Бо́га о нас.

Разве́рзый дре́вле ложесна́ Са́рры, и Аннину моли́тву исполня́ет проявле́нно, и непло́дную плодови́ту благода́тию сотвори́, Самуи́ле, я́ко звезду́ тя́, из нея́ возсия́ти благоизво́ли.

Сла́ва Отцу́ и Сы́ну и Свято́му Ду́ху:

Боже́ственную свяще́нно омочи́в, преблаже́нне, оде́жду, ду́шу же заря́ми та́йными просвети́л еси́ Ду́ха, вся́кой та́йне, богому́дре, научи́вся, и я́ко Ангел, служи́в Бо́гу Вседержи́телю.

И ны́не и при́сно и во ве́ки веко́в. Ами́нь.

Богородичен: Сы́й со Отце́м, я́ко Сы́н преве́чен, в после́дняя вопло́щся, Сы́н Тво́й и́стинно бы́сть, Чи́стая, все́х же сыноположи́в Бо́гу ве́ры ра́ди, рабо́тавшия лю́тому бори́телю.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Пророче Божий Самуиле, моли́ Бо́га о нас.

Высоча́йший Бо́гу прилепи́вся, сла́вне, возлю́блен бы́л еси́ от Него́, му́дростию боже́ственною украша́емь и це́лостию удобря́емь.

Припев: Пророче Божий Самуиле, моли́ Бо́га о нас.

Житие́ Ангельское на земли́, Самуи́ле, показу́я, собесе́дующия я́ве Ангелы име́л еси́, блаже́нне, и я́же па́че ума́ науча́ющия тя́.

Сла́ва Отцу́ и Сы́ну и Свято́му Ду́ху:

Све́тло о́ко душе́вное стяжа́в, зри́ши вои́стинну да́льная, я́ко настоя́щая, благода́тию, проро́к показу́яся Вседержи́теля.

И ны́не и при́сно и во ве́ки веко́в. Ами́нь.

Богородичен: Из Тебе́ про́йде Иису́с Христо́с воплоща́емь и обожи́ на́с пло́ти прия́тием, Всенепоро́чная, те́мже я́ко Ма́терь Тя́ Сего́ почита́ем.

Седа́лен, гла́с 3.

Зако́на судьба́ми воспита́н, пома́зание че́стно яви́лся еси́, я́коже Ааро́н, свяще́нствовав, и просвети́в се́рдце Ду́хом, я́ко настоя́щая, да́льная прови́дел еси́, проро́че честны́й. Христа́ Бо́га моли́, дарова́ти душа́м на́шим ми́р и ве́лию ми́лость.

Сла́ва, и ны́не, то́йже.

В рождестве́ Твое́м зача́тие безсе́менное, во успе́нии Твое́м ме́ртвость нетле́нная, чу́до в чудеси́ сугу́бо стече́ся Богоро́дице: ка́ко бо Неискусому́жная, Младопита́тельница чиста́ су́щи? Ка́ко же Ма́ти Бо́гу мертвоно́сна мироуха́ющи? Те́мже со Ангелом вопие́м Ти́: ра́дуйся, Благода́тная.

Пе́снь 4.

Ирмос: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Припев: Пророче Божий Самуиле, моли́ Бо́га о нас.

Изря́дным житие́м священноукраша́емь, Бо́жия зако́ны спаси́тельныя вве́рени тебе́ бы́ша, Изра́илю возвеща́ти преступа́ющу и Милосе́рдаго всегда́ прогне́вающу.

Припев: Пророче Божий Самуиле, моли́ Бо́га о нас.

Или́й жре́ц, беззако́ннующим сыно́м, осужда́ется, и пра́ведным судо́м Боже́ственныя слу́жбы отлуча́ется, свяще́нный же Самуи́л, я́ко послу́шник Зову́щаго, неле́стною душе́ю вво́дится.

Припев: Пророче Божий Самуиле, моли́ Бо́га о нас.

Зако́нным оправда́нием предстоя́ изря́дно, я́коже Ааро́н дре́вле, Всецарю́ служи́л еси́ и зако́нныя же́ртвы приноси́л еси́, прообразу́ющия Христо́во заколе́ние спаси́тельное.

Сла́ва Отцу́ и Сы́ну и Свято́му Ду́ху:

Безу́мным лю́дем твои́м, Самуи́ле, не пребыва́ющим все́х Царя́ в Боже́ственных повеле́ниих, помазу́еши манове́нием богоде́льным царя́, я́коже проси́ша, рогопосека́юща те́х кре́пость безу́мную.

И ны́не и при́сно и во ве́ки веко́в. Ами́нь.

Богородичен: Не́др не истощи́в Отчих, в не́дрех Твои́х я́коже но́в Младе́нец восклони́тися благоволи́, на воззва́ние, Де́во, ду́ш на́ших, Ему́же зове́м: сла́ва, Христе́, си́ле Твое́й.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Припев: Пророче Божий Самуиле, моли́ Бо́га о нас.

Умудри́вся Ду́хом Боже́ственным, из младе́нства служи́тель бы́л еси́ Бо́гу, еле́ем, сла́вне, пома́зания цари́ благода́тию помазу́я, Боже́ственными манове́ньми.

Припев: Пророче Божий Самуиле, моли́ Бо́га о нас.

Непоко́рно пребыва́ющу предре́кл еси́ Сау́лу, безчи́нная преложе́ния, Самуи́ле блаже́нне, Боже́ственное хоте́ние и оставле́ние я́ве Боже́ственнаго Ду́ха.

Сла́ва Отцу́ и Сы́ну и Свято́му Ду́ху:

Беззло́бием всегда́ со изра́ильтяны живы́й, зло́е преложе́ние я́ве облича́ше, исправля́я, я́ко свяще́нник Боже́ствен, я́ко проро́к и́стиннейший.

И ны́не и при́сно и во ве́ки веко́в. Ами́нь.

Богородичен: С на́ми бы́в за милосе́рдие, Спа́с от крове́й Твои́х свяще́нных па́че ума́, Всенепоро́чная, воплоща́ется и Бо́г и Челове́к, Человеколю́бец познава́ется.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Пророче Божий Самуиле, моли́ Бо́га о нас.

Сло́во твое́, сло́во обожа́емо благода́тию, проявля́ше да́льная, я́ко бли́з су́ща, Самуи́ле проро́че, сосу́де Боже́ственнаго Ду́ха.

Припев: Пророче Божий Самуиле, моли́ Бо́га о нас.

Возвыша́емь высо́кими виде́нии и дея́нми, я́ко проро́к и Бо́жий свяще́нник Вседержи́теля, зако́нными служе́нии очища́еши лю́ди, досточу́дне.

Сла́ва Отцу́ и Сы́ну и Свято́му Ду́ху:

Непотре́бствовася Сау́л, престу́пник бы́в, и Бо́г тебе́ вме́сто о́наго Дави́да кро́ткаго, Самуи́ле богому́дре, повелева́ет пома́зати ма́стию.

И ны́не и при́сно и во ве́ки веко́в. Ами́нь.

Богородичен: Изба́вися от боле́зней Ева, Пренепоро́чная, без боле́зни бо Ты́ родила́ еси́ Христа́ Бо́га на́шего, стра́сти все́х и боле́зни я́ве исцели́вшаго.

Конда́к проро́ка, гла́с 8:

Яко многоче́стный да́р, пре́жде зача́тия вда́н Бо́гу, и из мла́да Тому́, я́ко Ангел, послужи́л еси́, всеблаже́нне, и сподо́бился еси́ предбу́дущая веща́ти. Те́мже вопие́м ти́: ра́дуйся, проро́че Бо́жий Самуи́ле, архиере́ю вели́кий.

Пе́снь 7.

Ирмос: Юноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.

Припев: Пророче Божий Самуиле, моли́ Бо́га о нас.

Вели́к тя́ ро́ждшая да́р все́х Царю́ приво́дит, блаже́нне, моли́тву свяще́нну соверши́вши и пою́щи: Го́споди Бо́же оте́ц на́ших, благослове́н еси́.

Припев: Пророче Божий Самуиле, моли́ Бо́га о нас.

Вну́трь су́ща хра́ма тя́, и по чи́ну Ааро́ню служа́ща Небе́сному Влады́це, Боже́ственная благода́ть, сла́вне Самуи́ле, просвети́.

Припев: Пророче Божий Самуиле, моли́ Бо́га о нас.

Сло́вом Боже́ственным су́диши, блаже́нне, лю́дем Изра́илевым, си́м оправда́ние всегда́ Бо́жие возвеща́я и отвраща́я вся́к вре́д враго́в моли́твою приле́жною.

Сла́ва Отцу́ и Сы́ну и Свято́му Ду́ху:

Вся́ку ве́щь упраздни́в, сла́вне, твоего́ ума́, зерца́ло Ду́ха показа́лся еси́, вопия́ немо́лчно: благослове́н еси́, Го́споди Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Яви́лася еси́ неопа́льно ро́ждши, Пречи́стая, я́ко вои́стинну Огнь Божества́. Те́мже, ве́щныя моя́ стра́сти, Богороди́тельнице, попали́, я́ко ми́лостива и благолюби́ва.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Пророче Божий Самуиле, моли́ Бо́га о нас.

Украси́вся Ааро́нею оде́ждою, во святы́х Свята́я вше́л еси́, же́ртвами, преблаже́нне, Изра́иля очища́я, провозвеща́ющими закла́ние Агнца спаси́тельное.

Припев: Пророче Божий Самуиле, моли́ Бо́га о нас.

По́мыслом чи́стым прие́м зарю́, Самуи́ле, Ду́ха, я́коже проро́к Боже́ствен, провозвеща́еши да́льная, я́ко настоя́щая, сего́ ра́ди ве́рно восхваля́ем тя́.

Припев: Пророче Божий Самуиле, моли́ Бо́га о нас.

Избра́н Дави́д бы́сть в сыне́х Иессе́евых, я́коже яви́л еси́, помазу́я того́ ма́стию, Самуи́ле, свято́ю и взыва́я: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Иже твое́ соверша́юще торжество́, Самуи́ле, пра́ведным собесе́дниче, твои́ми моли́твами да улучи́м Ца́рство вы́шнее, вопию́ще: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Милосе́рдия Твоего́ мя́ сподо́би, ми́лостивая и благолюби́вая Влады́чице, и гее́нны изба́ви мя́ и тмы́ о́ноя кроме́шния, да ве́рою и любо́вию почита́ю Тя́.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Пророче Божий Самуиле, моли́ Бо́га о нас.

Стоя́ я́ко служи́тель пред лице́м Влады́ки и Бо́га на́шего, блаже́нне, непоро́чным житие́м укра́шен, Тому́ служи́л еси́, Боже́ственныя лучи́ прие́мля, и проро́чествуя явле́ннее.

Припев: Пророче Божий Самуиле, моли́ Бо́га о нас.

Яви́лся еси́ от утро́бы ма́терни, сла́вне, Свята́го Ду́ха сосу́д: свяще́нною же просия́в оде́ждою, Бо́гу угоди́л еси́ кро́тостию се́рдца, пребога́те, и по́мысла красото́ю.

Припев: Пророче Божий Самуиле, моли́ Бо́га о нас.

Дне́сь па́мять твоя́ на́м, я́ко со́лнце, богоно́се, возсия́ лучи́ бога́тых дарова́ний, просвеща́ющи ду́ши чту́щих тя́, мглу́ же лю́тых отгоня́щи. Те́мже тя́ вси́ ублажа́ем.

Сла́ва Отцу́ и Сы́ну и Свято́му Ду́ху:

Взя́тся ко оби́телем светови́дным и просия́л еси́ со́лнца светле́йше, ви́диши, я́же ви́дят проро́цы и апо́столи, и вси́ пра́веднии, обожа́емь прича́стием, богодохнове́нне. Те́мже тя́ вси́ ублажа́ем.

И ны́не и при́сно и во ве́ки веко́в. Ами́нь.

Богородичен: Тле́ния не позна́вши му́жеска, Нетле́ннаго во утро́бе прия́ла еси́ Сло́ва, на́с, истле́вшия, избавля́ющаго мно́гими грехи́, стра́стию нетле́нныя пло́ти Его́, нетле́нная еди́на, Всенепоро́чная.

Свети́лен.

Самуи́л пе́т бу́ди, пре́жде зача́тия да́нный да́р Бо́гу Вы́шнему, от ма́тере всеблагосла́вныя, и цари́ помазу́яй се́й, я́ко иере́й и проро́к.

Стихи́ры свята́го, гла́с 4.

Да́р благоприя́тен, / от ма́терних тя́ ру́к / возложи́ ро́ждшая, / моли́твы досто́ин, Самуи́ле, / пло́д тя́ насле́довавши / и отда́вши Бо́гу Благоде́телю, / я́коже обеща́ся. / Те́мже в тебе́ упоко́ися благода́ть Ду́ха, сла́вне, / беззло́бием возрасти́вши / и му́дростию украси́вши.

Ма́стию свяще́нною / я́ко свяще́нник обложи́мь / и проро́к явля́емь, / прозира́еши пре́дняя, / и повеле́нием Боже́ственным помазу́еши царя́, / и бу́дущая сказу́еши, / судя́ пра́ведно изра́ильтеским лю́дем, / непреста́нно согреша́ющим / и от Бо́га удаля́ющимся, / Самуи́ле досточу́дне, богоно́се пребога́те.

Ны́не не в гада́ниих, / ниже́ в се́нех, я́ко пе́рвее, / к лицу́ же лице́м зри́ши, / Его́же возжела́л еси́, / плотски́й мра́к и тяготу́ отложи́в, / и небеса́ обходя́, ра́дуешися, / проро́че всече́стне, / проро́ком равностоя́телю, / пра́ведным собесе́дниче / и Ангелом соприча́стниче.

Сла́ва, и ны́не, гла́с 6.

На безсме́ртное Твое́ успе́ние, Богоро́дице, Ма́ти Живота́, о́блацы апо́столы по возду́ху восхища́ху, и, по ми́ру разсе́янныя, во еди́ном ли́це предста́ша пресвято́му Твоему́ те́лу, е́же и погре́бше че́стно, гла́с Тебе́ Гаврии́лов, пою́ще, вопия́ху: ра́дуйся, Благода́тная Де́во, Ма́ти Безневе́стная, Госпо́дь с Тобо́ю. С ни́миже, я́ко Сы́на Твоего́ и Бо́га на́шего моли́, спасти́ся душа́м на́шим.

Молитва

О прехва́льный и пречу́дный проро́че Бо́жий Самуиле! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.