25 сентября.
Канон священномученику Автоному.
![Священномученику Автоному Священномученику Автоному](img_i/074.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 4:
И нpа́вом пpича́стник,/ и пpесто́лом наме́стник апо́столом быв,/ дея́ние обpе́л еси́, Богодухнове́нне,/ в виде́ния восхо́д,/ сего́ pа́ди сло́во и́стины испpавля́я,/ и ве́pы pа́ди постpада́л еси́ да́же до кpо́ве,/ священному́чениче Автономе,/ моли́ Хpиста́ Бо́га// спасти́ся душа́м на́шим.
Кано́н му́ченика. Гла́с 8.
Пе́снь 1.
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Священномучениче Автономе, моли́ Бо́га о нас.
Зако́ны измла́да Творца́ своспита́вся, возра́сл еси́ в зако́не доброде́телей и благоче́стия версте́, те́м зако́нно, о́тче, пострада́л еси́.
Припев: Священномучениче Автономе, моли́ Бо́га о нас.
Вооружи́л еси́ по́мысл терпе́ния и му́жества ору́жием, му́дре, на пре́лести ра́ть ополчи́вся, невозвра́тно победи́в ту́.
Сла́ва Отцу́ и Сы́ну и Свято́му Ду́ху:
Зако́нов благоче́стия наста́вник и догма́тов, о́тче, и́стины пропове́дник я́влься, во все́й тва́ри огласи́лся еси́, я́ко апо́столи, Автоно́ме.
И ны́не и при́сно и во ве́ки веко́в. Ами́нь.
Богородичен: Позна́вше я́вльшагося на земли́ Бо́га воплоще́нна и обожи́вшеся от Него́ благода́тию, пое́м Тя́, Де́во, дарова́ний наслади́вшеся.
Пе́снь 3.
Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.
Припев: Священномучениче Автономе, моли́ Бо́га о нас.
Ту́чами слове́с твои́х безбо́жия потопи́л еси́ стра́стную ти́ну, иера́рше, и ве́рныя напои́л еси́.
Припев: Священномучениче Автономе, моли́ Бо́га о нас.
Учи́тель бы́л еси́ и служи́тель Христо́в, преподо́бне, и Того́ Боже́ственных Страсте́й соо́бщник и прича́стник.
Сла́ва Отцу́ и Сы́ну и Свято́му Ду́ху:
Ору́жием утверди́л еси́ пропове́дания, преподо́бне, благопослушли́выя, и проти́вящияся безпа́губны сохрани́л еси́.
И ны́не и при́сно и во ве́ки веко́в. Ами́нь.
Богородичен: Яви́ся пречу́дное на небеси́ и на земли́ слы́шание, Творца́ бо все́х су́щих, Богоро́дице, неизрече́нно родила́ еси́.
Седа́лен, му́ченика, гла́с 4.
Сугу́б тебе́ вене́ц нетле́ния Христо́с, всеблаже́нне, дарова́, я́ко страда́льцу и че́стну иера́рху, Автоно́ме: Тому́ бо безкро́вныя прине́сл еси́ же́ртвы, Того́ Боже́ственную Стра́сть неле́стно подража́я, Того́ и нестаре́ющияся сла́дости, блаже́нне, наслади́лся еси́.
Пе́снь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Припев: Священномучениче Автономе, моли́ Бо́га о нас.
Споспеша́юща име́я Побо́рника в боже́ственней ра́ти Го́спода, врага́ ста́раго земны́х победи́л еси́, о́тче, по́двиги твои́ми.
Припев: Священномучениче Автономе, моли́ Бо́га о нас.
Виде́нием прекло́нься, о́тче, во глубины́ сокрове́ний Бо́жиих, отту́ду та́йны навы́кл еси́ Того́ неизрече́нныя.
Припев: Священномучениче Автономе, моли́ Бо́га о нас.
Возглаше́нием слове́с твои́х тре́бища и́дольская па́даху, му́дре, и попали́шася чти́лища пре́лести огне́м веле́ний твои́х.
Сла́ва Отцу́ и Сы́ну и Свято́му Ду́ху:
Пла́мень уче́ний твои́х на высо́кое взя́тся житие́, му́дре, тебе́ конце́м явля́я наста́вника к Бо́гу непреле́стна.
И ны́не и при́сно и во ве́ки веко́в. Ами́нь.
Богородичен: Оскве́рншияся страстьми́, омы́й Богоро́дице, моли́твами Твои́ми и сподо́би ны́ чи́стыми помышле́нии пе́ти Твое́ рождество́.
Пе́снь 5
Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
Припев: Священномучениче Автономе, моли́ Бо́га о нас.
Све́т тя́ у́мный озари́, Автоно́ме, и жи́зни сло́во иму́щаго свети́льника все́м конце́м яви́ тя.
Припев: Священномучениче Автономе, моли́ Бо́га о нас.
Глаго́л Бо́жий, я́ко ме́чь, извле́к, ополче́ние ссе́кл еси́ лжеиме́нныя му́дрости, о́тче Автоно́ме.
Сла́ва Отцу́ и Сы́ну и Свято́му Ду́ху:
Ве́сь вра́жий ту́л стре́л истощи́л еси́ и всу́е си́х показа́л еси́, вооружи́вшихся на тя́, блаже́нне Автоно́ме.
И ны́не и при́сно и во ве́ки веко́в. Ами́нь.
Богородичен: Бы́ша но́вая и пресла́вная, Всечестна́я, Тобо́ю бо на земли́ Бо́г пло́тию яви́ся, и земни́и обожи́хомся.
Пе́снь 6.
Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
Припев: Священномучениче Автономе, моли́ Бо́га о нас.
Си́ла тя, му́дре, Уте́шителева укрепи́, я́коже пре́жде ученики́, и язы́ком вооружи́ о́гненным, Автоно́ме, земны́я просвеща́ти, огнепопаля́ти же нече́стие.
Припев: Священномучениче Автономе, моли́ Бо́га о нас.
Младе́нствующу душе́вным ти́ мудрова́нием, о́тче преподо́бне, по́двиги па́че естества́ за пропове́дание и тру́д неосла́бный благомо́щно прия́л еси́ не́мощию естества́ телесе́.
Сла́ва Отцу́ и Сы́ну и Свято́му Ду́ху:
Положи́л еси́ под но́ги благочести́вых главу́ вра́жию, на Созда́теля вознесе́нную, ве́рою слове́с вооружи́в на ню́ сия́ благода́тию.
И ны́не и при́сно и во ве́ки веко́в. Ами́нь.
Богородичен: Исцели́ти Тобо́ю естества́ сокруше́ния Созда́тель и Творе́ц восхоте́в, Богоро́дице, подаде́ Тя врачевство́ Боже́ственное в не́мощех прибега́ющим Тебе́.
Конда́к, гла́с 2.
Боже́ственная, прему́дре, непоро́чне тайноводи́л еси́, же́ртва прия́тная бы́л еси́, богоблаже́нне: Христо́ву бо пи́л еси́ ча́шу, пресла́вне, свети́льниче всеми́рный, моля́ непреста́нно о все́х на́с.
Пе́снь 7.
Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Припев: Священномучениче Автономе, моли́ Бо́га о нас.
Сочлени́в во еди́но благоче́стия ликова́ния, о́тче Автоно́ме, ве́рою просвеще́нныя словесы́ твои́ми непреста́нно взыва́ти учи́л еси́: отце́в на́ших Бо́же, благослове́н еси́.
Припев: Священномучениче Автономе, моли́ Бо́га о нас.
Неосла́бным му́жеством стря́сл еси́, му́чениче, безбо́жных веле́ния, в душа́х утвержде́нная неве́рных, и от основа́ний сия́ му́дре исто́ргл еси́, в сердца́х ве́рных благода́ть утвержда́я.
Сла́ва Отцу́ и Сы́ну и Свято́му Ду́ху:
Твоего́ свяще́нства сме́шено пома́зание, о́тче Автоно́ме, страда́ние боже́ственно, кро́вь бо тя́ све́тла иера́рха показа́ вопию́щим ве́рно: Христе́, благослове́н еси́.
И ны́не и при́сно и во ве́ки веко́в. Ами́нь.
Богородичен: Иже от земли́ созда́в челове́ческое естество́, я́ко Творе́ц и Бо́г, истле́вшее поновля́ет, от Тебе́, Богома́ти, сие́ прие́м, и та́инственнаго сподобля́ет, Чи́стая, Сынотворе́ния.
Пе́снь 8.
Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.
Припев: Священномучениче Автономе, моли́ Бо́га о нас.
Укрепля́ющуся тебе́ во Христе́, мучи́телей кре́пость па́даше, богому́дре: стра́шен бо е́й ду́хом бы́л еси́.
Припев: Священномучениче Автономе, моли́ Бо́га о нас.
До́блестию ра́зума пре́лести гнило́е обличи́л еси́, всеблаже́нне, кре́пость в де́лех яви́в благоче́стия.
Сла́ва Отцу́ и Сы́ну и Свято́му Ду́ху:
Чуде́с твои́х ре́ки излия́вшеся, исцеле́ний бе́здну тя́, о́тче, яви́ша в ми́ре, источа́ющую благода́ть.
И ны́не и при́сно и во ве́ки веко́в. Ами́нь.
Богородичен: Препросла́вися и́стинно в зна́мениих на земли́ благода́ть Твоя́, Де́во: стра́нно бо чу́до Твоего́ рожде́ния.
Песнь 9
Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
Припев: Священномучениче Автономе, моли́ Бо́га о нас.
Лета́я на высоту́ благоче́стия, доброде́тельми возноша́емь, Автоно́ме, и Христу́ страда́нием, о́тче, восте́кл еси́.
Припев: Священномучениче Автономе, моли́ Бо́га о нас.
Боле́зни твоя́ со слеза́ми се́явшеся, богому́дре, неотъе́млемыя плоды́ расплоди́ша ра́дости и сла́вы, сла́дости, я́же во Христе́ Иису́се.
Сла́ва Отцу́ и Сы́ну и Свято́му Ду́ху:
Зако́нно венце́в и Боже́ственных дарова́ний сподо́бився, иера́рше Автоно́ме, зако́ны Боже́ственными утвержда́еши ны́ моли́твами твои́ми.
И ны́не и при́сно и во ве́ки веко́в. Ами́нь.
Богородичен: Жи́знь и Нетле́ние родила́ еси́, Де́во, победи́тели сме́рти сотво́ршаго Богоро́дицу вои́стинну Тя́ велича́ющия.
Молитва
О святы́й уго́дниче Бо́жий, му́чениче Автономе! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Священномученику Автоному Священномученику Автоному](img_b/074.jpg)