25 сентября

Канон мученику Алексию Елнатскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 1:

Раче́нием боже́ственным уязви́вся от ю́ности,/ юро́дством во́льным му́дрость ве́ка сего́ посрами́л еси́,/ прему́дрости Бо́жией в та́йных поуча́яся,/ предзре́л еси́, я́ко настоя́щая, гряду́щая,/ не сло́вом, но житие́м о́браз быв доброде́тели,/ страда́льчески тече́ние сконча́л еси́,/ те́мже Христо́с сугу́ба венца́ сподо́би тя, блаже́нне Алекси́е,// Его́же моли́ спасти́ся душа́м на́шим.

Велича́ние:

Велича́ем тя,/ блаже́нный му́чениче Алекси́е,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Стихи́ра, глас 6:

Ми́ра сего́ кра́сная возненави́дел еси́,/ плоть ду́ху порабо́тив,/ и, теле́сныя любве́ удали́вся,/ юро́дства по́двиг тя́жкий подъя́л еси́/ и, я́ко златы́ми крила́ми,/ на Небеса́ возлете́л еси́,/ я́же суть моли́тва те́плая и смире́ние нелицеме́рное,/ те́мже, блаже́нне Алекси́е,/ не забу́ди нас, припа́дающих моще́м твои́м,// и соверша́ющих святу́ю па́мять твою́.

Кано́н, глас 8.

Песнь 1

Ирмос: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.

Припе́в: Святы́й му́чениче Алекси́е, моли́ Бо́га о нас.

Сло́ве Бо́жий и А́гнче Непоро́чный, да́руй ми сло́во, во е́же восхвали́ти уго́дника Твоего́, и́же предлежи́т зде те́лом, ду́хом же А́нгелом сликовству́ет при́сно.

Припе́в: Святы́й му́чениче Алекси́е, моли́ Бо́га о нас.

О Го́споде помо́щник нам бу́ди, блаже́нне, изыма́я нас скорбе́й и боле́зней, собла́знов же, нестрое́ний и бед, жела́ния серде́ц на́ших во благи́х исполня́я.

Сла́ва Отцу́ и Сы́ну и Свято́му Ду́ху:

Еги́петския котлы́ благоде́нствия презре́в и ми́ру кичли́вому посмея́вся, Алекси́е му́дре, ре́ки му́тных вод жите́йских неврежде́нно преше́л еси́, Бо́гу побе́дную песнь воспева́я.

И ны́не и при́сно и во ве́ки веко́в. Ами́нь.

Богородичен: Тли́тель у́бо дре́вле и братоуби́йца яви́ся Ка́ин, пре́жде от Бо́га прокля́ся. Что же сотворю́ аз, вседе́рзый, ду́шу свою́ лю́те погуби́вый! Но даждь ми, Влады́чице, пре́жде конца́ покая́ние.

Песнь 3

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ желáний крáю, ве́рных утвержде́ние,// Еди́не Человеколю́бче.

Припе́в: Святы́й му́чениче Алекси́е, моли́ Бо́га о нас.

Наготу́ и хлад терпя́, и страх мучи́телей любо́вию превозмога́я, судьбы́ Бо́жия лю́дем предвозвести́л еси́, блаже́нне, и путь пра́вый показа́л еси́.

Припе́в: Святы́й му́чениче Алекси́е, моли́ Бо́га о нас.

От младе́нства смиренному́дрие стяжа́в, любо́вию Бо́жиею обогати́лся еси́, умо́м же горе́ вознося́ся, лице́ Госпо́дне чи́сте зрел еси́.

Сла́ва Отцу́ и Сы́ну и Свято́му Ду́ху:

Ча́да твоя́ есмы́, свя́тче Бо́жий, не оста́ви нас си́рых, оба́че на по́мощь к нам притецы́ и научи́ доброде́тельми Го́спода сла́вити.

И ны́не и при́сно и во ве́ки веко́в. Ами́нь.

Богородичен: Кре́пость ве́дый Ма́терния Твоея́ моли́твы к Сы́ну и Того́ мно́гое благоутро́бие, к Тебе́ приступа́ю, Пречи́стая, стра́хом одержи́мь и любо́вию понужда́емь.

Седа́лен, глас 6:

Моли́теся Бо́гу, непреста́нно призыва́л еси́, свя́те, моли́теся,/ и убо́йтеся гне́ва Его́./ Те́мже не облени́мся, правосла́внии,/ да не иску́сим па́ки долготерпе́ния Бо́жия,/ но воззове́м те́плою ве́рою и неле́ностною моли́твою:/ согреши́хом, беззако́нновахом, непра́вдовахом, Го́споди,/ не оста́ви нас, во уны́нии су́щих,/ но спаси́ нас, Алекси́я пра́веднаго мольба́ми.

Песнь 4

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Припе́в: Святы́й му́чениче Алекси́е, моли́ Бо́га о нас.

То́чию изы́де сла́ва по́двиг твои́х, блаже́нне, врази́ Госпо́дни воста́ша погуби́ти тя, ду́ха бо Христо́ва в тебе́ не терпя́ху и зло́бою зело́ распаля́хуся.

Припе́в: Святы́й му́чениче Алекси́е, моли́ Бо́га о нас.

Иоа́нна, возлю́бленнаго ученика́ Спа́сова, слы́шав, глаго́люща, а́ще кто лю́бит мир, несть любве́ О́тчи в нем: мир и лесть его́ возненави́дел еси́, яре́м Христо́в возло́жь на ся, ра́дуяся.

Сла́ва Отцу́ и Сы́ну и Свято́му Ду́ху:

Сро́дство и име́ние Христа́ ра́ди остави́л еси́, свя́те Алекси́е, и теле́сная одея́ния презре́л еси́. Даждь и нам сицево́е небреже́ние о преходя́щих и су́етных.

И ны́не и при́сно и во ве́ки веко́в. Ами́нь.

Богородичен: Ада́м у́бо преступи́ еди́ну за́поведь и изгна́нию подпаде́: ка́ко же воспла́чу аз прегреше́ний мои́х бе́здну? Оба́че к Тебе́, о Ма́ти Бо́жия, моли́твы простира́ю: моли́, Всечи́стая, Сы́на Твоего́ и Бо́га, поми́ловатися души́ мое́й.

Пе́снь 5

Ирмос: У́тренююще, вопие́м Ти,/ Го́споди, спаси́ ны:/ Ты бо еси́ Бог наш,// ра́зве Тебе́, ино́го не ве́мы.

Припе́в: Святы́й му́чениче Алекси́е, моли́ Бо́га о нас.

Зе́мленый и пе́рстный имею́ ум, блаже́нне, просвети́ мя к Небе́сным и ве́чным, тебе́ бо стяжа́х те́пла моли́твенника.

Припе́в: Святы́й му́чениче Алекси́е, моли́ Бо́га о нас.

Осмея́ние и руга́ние пи́ща тебе́ бысть, блаже́нне, питие́ же сла́дкое богомы́слие и смиренному́дрие, глаго́л же проро́ческий я́ко оде́жда вмени́ся.

Сла́ва Отцу́ и Сы́ну и Свято́му Ду́ху:

Власть беззако́нную и богобо́рную облича́я, лю́ди поуча́л еси́ име́ния тле́нная и непостоя́нная презира́ти, Небе́сная же сокро́вища доброде́телей стяжа́ти.

И ны́не и при́сно и во ве́ки веко́в. Ами́нь.

Богородичен: Иса́ву поревнова́в лю́тому во чревобе́сии, ду́шу и те́ло оскверни́в невоздержа́нием и нечистото́ю, к Тебе́, о Де́во, прибега́ю, заступи́ мя и изба́ви ве́чных мук.

Песнь 6

Ирмос: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш.

Припе́в: Святы́й му́чениче Алекси́е, моли́ Бо́га о нас.

Чу́ден в терпе́нии и во упова́нии непосра́млен, Еди́наго Царя́ Христа́ во́ин был еси́, блаже́нне, малоду́шныя утвержда́я во испове́дании дерзнове́ннем.

Припе́в: Святы́й му́чениче Алекси́е, моли́ Бо́га о нас.

Риз совле́клся еси́, свя́те Алекси́е, взыва́я: довле́ет ми ри́за Креще́ния, и наготу́ и хлад превозмо́гл еси́, побежда́я естества́ чин.

Сла́ва Отцу́ и Сы́ну и Свято́му Ду́ху:

Уста́ непреста́нно движа́ в моли́тве, без нея́же ника́коже возмо́жет челове́к понести́ ни еди́ныя тяготы́ Христа́ ра́ди, венце́м на Небесе́х увя́злся еси́, блаже́нне.

И ны́не и при́сно и во ве́ки веко́в. Ами́нь.

Богородичен: Сокруша́ема мно́жеством прегреше́ний и во отча́янии су́ща, не оста́ви мя, Влады́чице, но возведи́ кре́пкою руко́ю Твое́ю.

Конда́к, глас 6:

Христо́вою любо́вию распала́емь,/ не убоя́лся еси́ веще́ственнаго огня́,/ терпе́нием твои́м врага́ посрами́в,/ се́рдце мучи́телево уязви́л еси́ кро́ткими твои́ми глаго́лы,/ провеща́я гнев Бо́жий, пра́ведно гряду́щий нань,/ и о проще́нии всех, блаже́нне, моля́ся./ Те́мже тебе́ припа́даем и те́пле вопие́м:// не премолчи́ за ны ко Го́споду.

И́кос:

Пропове́дует весь Елна́тская труды́ и по́двиги твоя́, богому́дре Алекси́е,/ е́же ко Го́споду раче́ние те́плое,/ о лю́дех боле́знование серде́чное,/ моле́ние непреста́нное, слез исто́чницы,/ риз совлече́ние, и пи́щи лише́ние,/ и вся́каго мирска́го пристра́стия отложе́ние,/ еще́ же руга́ния и безче́стия от злых челове́к,/ в темни́це заключе́ние и ну́ждную смерть./ Но вся сия́ претерпе́л еси́ ра́дуяся,/ Си́мона блаже́ннаго стопа́м после́дуя,/ с ни́мже ны́не в дому́ О́тчем водворя́ешися, Алекси́е, уго́дниче Христо́в./ Те́мже тебе́ припа́даем и те́пле вопие́м:/ не премолчи́ за ны ко Го́споду.

Песнь 7

Ирмос: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Припе́в: Святы́й му́чениче Алекси́е, моли́ Бо́га о нас.

Суету́, я́ко прах, от ногу́ твое́ю оттря́сл еси́, ника́коже той порабо́тився, власть су́етную и неве́сту земну́ю отри́нув, чи́сте ду́шу твою́ Христо́ви предста́вил еси́.

Припе́в: Святы́й му́чениче Алекси́е, моли́ Бо́га о нас.

Разуме́ние писа́ний и кни́жныя му́дрости де́лом показу́я, да́ра проро́чествия сподо́бился еси́ и, сие́ гада́тельно лю́дем известву́я, до конца́ в по́двизе неколеби́мь пребы́л еси́.

Сла́ва Отцу́ и Сы́ну и Свято́му Ду́ху:

Пре́жде юро́дства по́двигом затво́ра кре́пко подвиза́яся и пра́вило ве́ры непосты́дное явля́я, Бо́гу твоему́ ра́бство не премени́л еси́ на свобо́ду су́етную сыно́в ве́ка сего́.

И ны́не и при́сно и во ве́ки веко́в. Ами́нь.

Богородичен: Омрачи́хся окая́нный мно́жеством безме́рных зол, измени́хся душе́вным о́ком и умо́м, погуби́х пе́рвую добро́ту и чужд бых сыновства́ Влады́чня. Ты же, Пречи́стая Де́во, све́та Твоего́ заря́ми просвети́ мя.

Песнь 8

Ирмос: Богоглаго́ливии о́троцы в пещи́,/ со огне́м пла́мень попира́юще, поя́ху:// благослови́те, дела́ Госпо́дня, Го́спода.

Припе́в: Святы́й му́чениче Алекси́е, моли́ Бо́га о нас.

Воззови́ о нас ко Го́споду гла́сом кре́пким, блаже́нне Алекси́е, я́коже Моисе́й о лю́дех свои́х в пусты́ни, да изба́вимся от вла́сти лю́таго мироде́ржца.

Припе́в: Святы́й му́чениче Алекси́е, моли́ Бо́га о нас.

И́мже о́бразом жела́ет еле́нь на исто́чники водны́я, си́це и ты, всегда́ подвиза́яся, жела́л еси́ еди́наго на потре́бу, вся за́поведи в ми́ре соблюда́я и се́рдце моли́твою при́сно согрева́я.

Припе́в: Святы́й му́чениче Алекси́е, моли́ Бо́га о нас.

А́ще и отше́л еси́ во оби́тели Небе́сныя, оба́че земна́я обита́лища, чту́щая тя, не оста́вил еси́, те́мже благода́рне ублажа́ешися ве́рных гла́сы.

Сла́ва Отцу́ и Сы́ну и Свято́му Ду́ху:

Любве́ стяжа́ния, смиренному́дрия взыска́ния и ве́ры ве́лия сподо́би нас, по́двиги жития́ твоего́ чту́щих, Алекси́е блаже́нне.

И ны́не и при́сно и во ве́ки веко́в. Ами́нь.

Богородичен: Егда́ дух мой и́мать с пло́тию разлучи́тися, Влады́чице, тогда́ не пре́зри мене́, обе́ты попра́вшаго, но изба́ви ди́вно ко́зней лю́таго мироде́ржца и губи́теля.

Песнь 9

Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к.// Те́мже Пречи́стую Богоро́дицу, ве́рнии, велича́ем.

Припе́в: Святы́й му́чениче Алекси́е, моли́ Бо́га о нас.

Кто не удиви́тся терпе́нию твоему́, блаже́нне? Ты бо, грехо́внаго ра́бства отрица́яся и разреши́тися пло́ти жела́я, раскале́нныя пли́нфы небре́гл еси́.

Припе́в: Святы́й му́чениче Алекси́е, моли́ Бо́га о нас.

Сла́вою Боже́ственною облиста́емь, предста́тельствуеши к Бо́гу за чту́щия тя, Алекси́е блаже́нне, те́мже мо́лим тя: моли́твою твое́ю напа́сти отжени́ и кова́рство духо́в зло́бы разори́.

Сла́ва Отцу́ и Сы́ну и Свято́му Ду́ху:

И ра́ны врачу́еши, и моли́твы слы́шиши, и на по́мощь к нам, призыва́ющим тя, ско́ро прибега́еши, бла́же, засту́пниче ве́рный.

И ны́не и при́сно и во ве́ки веко́в. Ами́нь.

Богородичен: Е́зеро о́гненное угото́вах себе́ житие́м блу́дным и скве́рным, Влады́чице, со́вестное жже́ние пре́жде гее́нны нестерпи́мо ми есть, те́мже молю́ся: не оста́ви раба́ Твоего́, пра́веднаго Алекси́я мольба́ми.

Свети́лен:

Свет Христо́в осия́ тя, Алекси́е чу́дне, совле́клся бо еси́ ве́тхаго челове́ка и яви́лся еси́ нов, ду́хом горя́. И ны́не в ли́це новому́ченик предстои́ши Святе́й Тро́ице и зе́млю на́шу просвеща́еши чудесы́.

Моли́тва

О уго́дниче и засту́пниче наш, преблаже́нне Алекси́е, досто́йный насле́дниче Небе́снаго Ца́рствия! Припа́дающе ра́це моще́й твои́х, усе́рдно про́сим тя: помоли́ся, о́тче, да испра́вятся стопы́ на́ша по словеси́ Госпо́дню к де́ланию за́поведей Его́ и да не возоблада́ет ро́дом на́шим от безбо́жник все́янное беззако́ние душетле́нное, но да у́зрим на Святе́й Руси́ утвержде́ние ве́ры правосла́вныя!

О свя́тче Бо́жий, утаи́вый и́стинную прему́дрость и обличи́вый му́дрость сыно́в ве́ка сего́! Испроси́ нам у Го́спода дух смире́ния, кро́тости и любве́ зало́г, в моли́твах несумне́нную ве́ру, в покая́нии тве́рдую наде́жду, в служе́нии бли́жним кре́пость, в боле́знех ско́рое исцеле́ние, всего́ же жития́ на́шего обновле́ние, я́ко да, ублажа́юще тя, дости́гнем христиа́нския кончи́ны непосты́дны и ми́рны, и насле́дим Ца́рствие Небе́сное, иде́же ты, в ве́чней сла́ве пребыва́я со все́ми святы́ми, прославля́еши Отца́, и Сы́на, и Свята́го Ду́ха. Ами́нь.