Шрифт

22 сентября.

Канон святому мученику Севериану.

Святому мученику Севериану
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченик Твой, Го́споди, Севериан,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кано́н, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святый мучениче Севериане, моли́ Бо́га о нас.

Одержа́ше веле́ние нечести́вое жре́ти и́долом безду́шным же и глухи́м, побежда́ше же Христо́с, му́ченическими кре́пкими и до́блими противле́нии.

Припев: Святый мучениче Севериане, моли́ Бо́га о нас.

Свобожда́ше от у́з отмета́ющияся Христа́ и вся́, я́же обре́те чту́щия Того́ Бо́га, вся́чески начина́ше му́чити, но, прилу́чся тебе́, богому́дре, посрами́ся.

Сла́ва Отцу́ и Сы́ну и Свято́му Ду́ху:

Удиви́л еси́, му́чениче, злочести́ваго, до́блественне устреми́вся на суди́щи, и бого́в ло́жных обличи́л еси́ со дерзнове́нием не́мощь, и гни́лость, и некре́пость.

И ны́не и при́сно и во ве́ки веко́в. Ами́нь.

Богородичен: Вмести́ла еси́ еди́на небесы́ Невмести́маго, Отрокови́це, во утро́бе Твое́й, боголе́пне Все́льшагося в Тя́ и естество́ челове́ческое от Тебе́ Прие́мшаго.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Святый мучениче Севериане, моли́ Бо́га о нас.

Ра́довался еси́, бие́мь за Христа́, му́дре, ра́нами неми́лостивно, име́л бо еси́ изве́стное боле́зней воздая́ние.

Припев: Святый мучениче Севериане, моли́ Бо́га о нас.

Жи́лами ссека́емь, измене́нием ча́стым, сла́вне, мучи́телей, и сие́, я́коже в чужде́м телеси́, не ощуща́л еси́.

Сла́ва Отцу́ и Сы́ну и Свято́му Ду́ху:

Обре́л еси́ возме́здие от Христа́, му́дре, вене́ц прие́мь пра́вды и ра́дость несконча́емую.

И ны́не и при́сно и во ве́ки веко́в. Ами́нь.

Богородичен: Вся́, Бли́жняя моя́, добра́ и непоро́чна бы́сть, — Тя́ прови́дя дре́вле, вопия́ше Соломо́н в пе́снех.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святый мучениче Севериане, моли́ Бо́га о нас.

Ласка́нии мучи́тель твою́ умягчи́ти, му́чениче, кре́пость и победи́ти тя́ наде́яся, не́бо стреля́ти мня́ше.

Припев: Святый мучениче Севериане, моли́ Бо́га о нас.

Не чу́вствуеши, безу́мне, Христо́ву си́лу, укрепля́ющу мя́ проти́ву боле́знем и трудо́м? — мучи́телю взыва́л еси́, пресла́вне.

Сла́ва Отцу́ и Сы́ну и Свято́му Ду́ху:

Аще не бы́ си́ла свы́ше, пода́нная мне́, — мучи́телю взыва́ше Севериа́н, — ка́ко у́бо бы́х мо́гл, пло́ть сы́й, претерпе́ти отсече́ния уде́с?

И ны́не и при́сно и во ве́ки веко́в. Ами́нь.

Богородичен: Пресвята́я Богоневе́сто, да́ждь ми́ по́мощь мольба́ми Твои́ми изба́витися льсти́ваго, да Тя́ сла́влю, наде́жду мою́.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Святый мучениче Севериане, моли́ Бо́га о нас.

На дре́во воздви́жен бы́л еси́, сла́вне, и по те́лу стро́ган ногтьми́ за все́х Влады́чествующаго.

Припев: Святый мучениче Севериане, моли́ Бо́га о нас.

Бо́же мо́й, — вопия́л еси́, — укрепи́ по́двиг се́й сконча́ти мне́ муче́ния, стру́жему.

Сла́ва Отцу́ и Сы́ну и Свято́му Ду́ху:

Яко ви́де тя́ мучи́тель, сла́вне, неосла́бне му́ки терпя́ща, ужасе́ся окая́нный.

И ны́не и при́сно и во ве́ки веко́в. Ами́нь.

Богородичен: Наде́жда и предста́тельнице, и покро́ве мо́й, Богоро́дице, спаса́й мя́ мольба́ми Твои́ми от собла́зн змии́ных.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Припев: Святый мучениче Севериане, моли́ Бо́га о нас.

В темни́це тя́ заключи́ лю́тый и гла́дом пону́ди тя́ отврещи́ся Христа́, Его́же возлюби́л еси́, блаже́нне, от ю́ности.

Припев: Святый мучениче Севериане, моли́ Бо́га о нас.

Ведо́м, му́дре, в темни́цу, вся́ зря́щия тя́ Христа́ не отступи́ти, со дерзнове́нием уча́, нака́зовал еси́.

Сла́ва Отцу́ и Сы́ну и Свято́му Ду́ху:

Мече́м усещи́ тя, му́чениче, лю́тый и безу́мный мучи́тель повеле́, не поже́рша и́долом, но ты́ небре́гл еси́.

И ны́не и при́сно и во ве́ки веко́в. Ами́нь.

Богородичен: В ри́зу ми́ облещи́ся све́та Твои́ми моли́твами сотвори́, Богоневе́сто Влады́чице, в де́нь су́дный, пою́ща Тя́.

Седа́лен, гла́с 1.

До́блестию души́ вооруже́н, богому́дре, изда́л еси́ себе́ к разли́чным му́кам, любо́вию распала́емь Влады́ки, пребога́те, те́м обличи́л еси́ мучи́телей неи́стовство и вене́ц от Бо́га прия́л еси́ побе́ды нетле́нный.

Пе́снь 7.

Ирмос: В нача́ле зе́млю основа́вый и небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́ших.

Припев: Святый мучениче Севериане, моли́ Бо́га о нас.

Ка́мением о́стрым уста́ твоя́ сокруши́ нечести́вый, пропове́дающа со дерзнове́нием Христа́ посреде́ пребеззако́нников. Его́же сла́вы получи́в, ны́не лику́еши та́мо.

Припев: Святый мучениче Севериане, моли́ Бо́га о нас.

Пове́шен на стене́, страстоте́рпче, мучи́теля мно́гим гне́вом, к ка́мени тя́жку привя́зан, не отве́рглся еси́ Христа́, отце́в Бо́га препросла́вленна.

Сла́ва Отцу́ и Сы́ну и Свято́му Ду́ху:

О, тве́рдаго противле́ния твоего́, блаже́нне! О, те́плыя любве́ к Зижди́телю! Ея́же ра́ди венце́м украси́ тя нетле́нным, до́бре пострада́вша.

И ны́не и при́сно и во ве́ки веко́в. Ами́нь.

Богородичен: Ты́ мо́й еси́ све́т, Де́во Богоро́дице, Ты́ еси́ ра́дость и покро́в, и приста́нище мое́, Благослове́нная, и Тя́ сла́влю, я́ко ро́ждшую Бо́га отце́в на́ших.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Святый мучениче Севериане, моли́ Бо́га о нас.

Претерпе́л еси́ ра́ны до конца́, во́ине Христо́в, и преста́вился еси́, ра́дуяся, к вы́шнему, преблаже́нне, Ца́рствию.

Припев: Святый мучениче Севериане, моли́ Бо́га о нас.

Не посрами́лся еси́, Христа́ ра́ди, доблему́дренне, претерпе́в му́ки разли́чныя, те́мже и просла́вился еси́ во вся́ ве́ки.

Сла́ва Отцу́ и Сы́ну и Свято́му Ду́ху:

Венцено́сец со страда́льцы ны́не лику́я и́стинно окру́г Царя́, помина́й ве́рою твою́ па́мять творя́щих.

И ны́не и при́сно и во ве́ки веко́в. Ами́нь.

Богородичен: Богороди́тельнице, христиа́н предста́тельнице, изми́ ны вся́кия ну́жды, да Тя́ пое́м во вся́ ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Святый мучениче Севериане, моли́ Бо́га о нас.

Рука́ми тебе́ лю́бящих, блаже́нне, твое́ те́ло опря́тано погребе́ся, я́ко свя́то, и исцеле́ний источа́ет струи́, в сла́ву Бо́жию.

Припев: Святый мучениче Севериане, моли́ Бо́га о нас.

О чу́до, ка́ко воста́ уме́рый о́трок и срета́ше твое́ те́ло на пути́, к погребе́нию несо́мо, му́чениче всечу́дне!

Сла́ва Отцу́ и Сы́ну и Свято́му Ду́ху:

Получи́в ве́чное, блаже́нне, Ца́рство и Влады́це че́стне предстоя́, о пою́щих тя́ те́пле моли́ся.

И ны́не и при́сно и во ве́ки веко́в. Ами́нь.

Богородичен: Диви́шася Ангелов чинонача́лия, воплоще́нна зря́ще Тя́ нося́щую Творца́ веко́в, Присноде́ву.

Стихи́ры, гла́с 4.

Жи́лами ссека́емь / Христа́ ра́ди, сла́вне, / и на дре́ве пове́шен, / и пло́тию стру́жемь неми́лостивно бичми́ / , жре́ти же и́долом повелева́емь, му́дре, / не отве́рглся еси́ все́х Го́спода, / но обличи́л еси́ боле́зньми твои́ми / не́мощь и ху́дость и́дольскую / и бы́л еси́ Ангелов собесе́дник.

Ра́дуяся, отлучи́лся еси́ к по́двигу, / я́ко зако́нный страда́лец, досточу́дне, / до́блим смы́слом, / о му́ках, му́чениче, неради́в, / сме́ртию же Христу́ / уподо́битися тща́ся, чу́дне, / те́м тя́ венце́м Ца́рствия украси́ / Иису́с Человеколю́бец / и Спа́с ду́ш на́ших.

Сла́ва И ны́не, гла́с то́йже:

Узник ведо́м / и я́звами крася́ся, / зря́щим повелева́л еси́ / подо́битися нра́ву твоему́, / к небе́сным, блаже́нне, воздая́нием смотря́щим, / я́же мно́го весе́лие и красоту́ подаю́т, / я́ко нетле́нная и во ве́ки пребыва́ющая, / в ни́х пребыва́ющия / творя́ще насле́дники Ду́хом.

Молитва

О святы́й уго́дниче Бо́жий, му́чениче Севериане! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святому мученику Севериану