22 сентября.

Канон святителю Феодосию, архиепископу Черниговскому, чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Преудобре́н во архиере́ех, святи́телю Феодо́сие, бы́л еси́ свети́ло своему́ ста́ду, та́же преста́вился еси́ в ве́чныя оби́тели. Умоли́ у престо́ла Царя́ сла́вы изба́витися на́м от находя́щих на ны́ зо́л и спасти́ся душа́м на́шим, свя́те, моли́твами твои́ми.

Стихи́ры свята́го, гла́с 2:

Отче святи́телю Феодо́сие, а́ще и в та́йных по́двизех тече́ние соверши́л еси́, оба́че не можа́ше утаи́тися ди́вное благоуха́ние боголюбе́знаго смире́ния твоего́. Те́мже и яви́лся еси́ свети́льник пресве́тлый, не под спу́дом сокрыва́емый, но на све́щнице Це́ркве Бо́жия поста́вленный и от Бо́га прославля́емый, Его́же моли́ о душа́х на́ших.

Отче святи́телю Феодо́сие, а́ще и возведе́н бы́л еси́ на престо́л святи́тельский, я́ко му́ж, благода́ти испо́лненный, оба́че и простоту́ и́ноческаго жития́ сохрани́л еси́, в до́бром послуша́нии отцу́ твоему́ духо́вному пребыва́я и все́м о́браз смире́ния явля́я, по о́бразу Го́спода Иису́са, Его́же моли́ о душа́х на́ших.

Отче богому́дре Феодо́сие, а́ще и не на до́лзе па́стырь Христо́вы Це́рквe бы́л еси́, оба́че любо́вь ве́лию от па́ствы твоея́ стяжа́л еси́, все́х любо́вию твое́ю объе́мля и скорбя́щих утеша́я, си́рым же и вдови́цам на по́мощь притека́я. Те́мже и по блаже́ннем преставле́нии твое́м к тебе́, я́ко жи́ву су́щу, притека́юще, скорбя́щии и боля́щии оби́лие благода́ти прие́млют, сла́вяще ди́внаго во святы́х Свои́х Христа́ Бо́га, Его́же моли́ о душа́х на́ших.

Сла́ва и ныне, гла́с 6:

Челове́че Бо́жий и ве́рный ра́бе, служи́телю Госпо́день, му́жу жела́ний, сосу́де избра́нный Свята́го Ду́ха, сто́лпе и утвержде́ние Це́ркве, Ца́рствия насле́дниче, не премолчи́ моля́ся о на́с ко Го́споду.

Велича́ние святи́телю:

Велича́ем тя́, святи́телю о́тче Феодо́сие, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Стихи́ра, гла́с 6:

Уго́дниче Бо́жий, соприча́стниче Христо́в, святи́телю Феодо́сие, по и́мени твоему́ та́ко и житие́ твое́: всего́ бо себе́ в да́р Бо́гу принося́, да́р Бо́жий вои́стину земли́ Росси́йстей яви́лся еси́. Жи́знь твоя́ сла́вна бы́сть и успе́ние со святы́ми, моли́ о душа́х на́ших.

Канон свята́го, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святителю отче Феодосие, моли́ Бо́га о нас.

Приими́ хвале́ние, от у́ст недосто́йных тебе́ приноси́мое, и возда́ждь те́плыми твои́ми моли́твами к Бо́гу чту́щим святу́ю па́мять твою́, о́тче на́ш Феодо́сие.

Припев: Святителю отче Феодосие, моли́ Бо́га о нас.

От ю́ности Го́спода возлюби́л еси́, чистоту́ непоро́чну сохраня́я, от де́тства Тому́ прилепи́лся еси́ чи́стою твое́ю душéю, в простоте́ и незло́бии се́рдце твое́ соблюда́я. Те́мже и ча́до Бо́жие вои́стинну бы́л еси́, свя́те Феодо́сие.

Сла́ва Отцу́ и Сы́ну и Свято́му Ду́ху:

Бла́го е́сть му́жу, егда́ во́зьмет яре́м в ю́ности свое́й, глаго́лет Писа́ние. Сему́ глаго́лу после́дуя, с ра́достию и́го Госпо́дне от ю́ности восприя́л еси́ и бы́л еси́ и́нок преизря́дный, блаже́нне Феодо́сие.

И ны́не и при́сно и во ве́ки веко́в. Ами́нь.

Богородичен: Пресвята́я Де́во, Ма́ти Бо́жия, Засту́пнице на́ша непосты́дная, спаси́, услы́ши на́с, страстьми́ лю́те одержи́мых, и да́ждь ру́ку по́мощи моли́твами Твои́ми.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святителю отче Феодосие, моли́ Бо́га о нас.

Блаже́ни ни́щии ду́хом, глаго́лет Госпо́дь; сему́ спаси́тельному глаго́лу внима́я, па́че все́х доброде́телей нищету́ духо́вную потща́лся еси́ стяжа́ти, преподо́бне, возлюби́в ту́ю, я́ко огра́ду кре́пку от вся́каго искуше́ния и я́ко боголюбе́зную ма́терь все́х доброде́телей.

Припев: Святителю отче Феодосие, моли́ Бо́га о нас.

Позна́в, я́ко от послуша́ния ражда́ется смире́ние, от смире́ния же безстра́стие, все́м се́рдцем возлюби́л еси́ послуша́ние, во все́м во́лю свою́ и злы́я по́мыслы отсека́я. Те́мже и безстра́стия дости́гл еси́, угото́вав ду́шу твою́ в чи́стую оби́тель Ду́ха Пресвята́го.

Сла́ва Отцу́ и Сы́ну и Свято́му Ду́ху:

Кро́тость ве́лию стяжа́л еси́, богому́дре Феодо́сие, вся́ ско́рбная благоду́шне претерпева́я, вся́кую оби́ду и уничиже́ние в молча́нии любо́вию покрыва́я. Сего́ ра́ди и прия́л еси́ насле́дие на земли́ живы́х, иде́же пра́веднии во ве́ки пребыва́ют, сла́вяще Го́спода Иису́са.

И ны́не и при́сно и во ве́ки веко́в. Ами́нь.

Богородичен: Не и́мамы дерзнове́ния к Сы́ну и Бо́гу Твоему́, Пресвята́я Влады́чице, не и́мамы дерзнове́ния и к Тебе́, Пренепоро́чная, грехми́ при́сно оскверня́еми, а́ще не Сама́ Ты́, Премилосе́рдая Ма́ти, воззове́ши на́с, заблу́ждших, к покая́нию, наде́ждею спасе́ния отрева́ющи от на́с вся́кое уны́ние и разлене́ние.

Седа́лен, гла́с 4:

Яви́лся еси́ свети́льник благода́тный, о́тче на́ш Феодо́сие, ти́хим све́том смире́ния и любве́ сия́яй и на́с любо́вию твое́ю озаря́яй. Те́мже и мы́, любо́вию чту́ще па́мять твою́, вопие́м ти́: моли́ о на́с, святи́телю Бо́жий, новоявле́нный чудотво́рче.

Сла́ва, и ны́не, гла́с то́йже:

Мно́гими прегреше́нии у́м помраче́н иму́ще, вопие́м ко Твоему́ кре́пкому заступле́нию, Богоро́дице Де́во: просвети́ о́чи ду́ш на́ших и возсия́й на́м покая́ния зарю́, моли́твами уго́дника твоего́ святи́теля Феодо́сия, еди́на Чи́стая и Благослове́нная.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святителю отче Феодосие, моли́ Бо́га о нас.

Не́мощию отягче́н и ста́ростию претружде́н бы́в, архипа́стырь Ла́зарь пе́рвее у́бо сослужи́теля, последи́ же и насле́дника себе́ устроя́ет тя́, святи́телю Феодо́сие, и це́ркви Черни́говстей свети́льника, ю́же моли́твами твои́ми просвеща́й во вся́ ве́ки.

Припев: Святителю отче Феодосие, моли́ Бо́га о нас.

Вои́стинну че́сти и вла́сти святи́тельския досто́ин яви́лся еси́, о́тче Феодо́сие, сло́вом прему́др бы́в, житие́м же доброде́телен, в Боже́ственных Писа́ниих иску́сен и слове́сныя о́вцы наставля́ти зело́ дово́лен.

Сла́ва Отцу́ и Сы́ну и Свято́му Ду́ху:

Благоче́стием украша́яся и в духо́внем жи́тельстве все́м лю́дем страны́ Черни́говския изве́стен бы́в, единоду́шне те́ми избра́н бы́л еси́ в вели́кое служе́ние Це́ркви Бо́жией, о́тче Феодо́сие, ю́же и ны́не назира́й твои́ми моли́твами.

И ны́не и при́сно и во ве́ки веко́в. Ами́нь.

Богородичен: Мно́го мо́жет моли́тва пра́веднаго поспешеству́ема, глаго́лет Иа́ков, бра́т Госпо́день. Мно́го мо́жет и моли́тва святи́теля Феодо́сия, споспешеству́ема Твое́ю Ма́тернею моли́твою, Пресвята́я Влады́чице Богоро́дице: еси́ бо предста́тельство, и покро́в, и заступле́ние на́ше, Благода́тная.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святителю отче Феодосие, моли́ Бо́га о нас.

Ра́довахуся лю́дие гра́да Черни́гова, зря́ще тебе́ све́тлостию са́на святи́тельскаго облече́на, и ку́пно со архипа́стырем Ла́зарем престо́лу благода́ти Бо́жия предстоя́ща, и преподо́бныя своя́ ру́це о па́стве возде́юща, и, Христа́ благодаря́ще, сердцы́ свои́ми умиля́хуся.

Припев: Святителю отче Феодосие, моли́ Бо́га о нас.

Образ бы́л еси́ все́й богода́нней па́стве твое́й, сло́вом и житие́м, любо́вию и ду́хом, ве́рою и чистото́ю. Сего́ ра́ди не то́чию о́вцы твоя́ любо́вию к тебе́ прилепля́хуся, но и иносла́внии тя́ я́ко челове́ка Бо́жия, о́тче на́ш Феодо́сие, почита́ху.

Сла́ва Отцу́ и Сы́ну и Свято́му Ду́ху:

Па́стырь вои́стинну до́брый слове́сному ста́ду твоему́, святи́телю Феодо́сие, бы́л еси́, ду́шу твою́ за о́вцы твоя́ положи́ти гото́вый. Те́мже и яви́лся еси́ оби́димым у́бо засту́пник непреобори́мый, пра́вды же ревни́тель неустраши́мый, си́льных ми́ра сего́ с любо́вию облича́я и пасо́мых свои́х оте́чески вразумля́я, заблу́ждшия же на пу́ть пра́вый прему́дре наставля́я.

И ны́не и при́сно и во ве́ки веко́в. Ами́нь.

Богородичен: Умерщвле́нную ду́шу мою́ оживи́, па́дшую возста́ви, уязвле́нную исцели́, у́м мо́й просвети́, искуше́ний во́лны укроти́, Ма́ти Бо́жия, Де́во Пресвята́я, и спаси́ мя моли́твами Твои́ми, Пречи́стая.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Святителю отче Феодосие, моли́ Бо́га о нас.

От ю́ности и́нок преизря́дный бы́в, и́ноческия оби́тели с любо́вию созида́л еси́ и вся́ на по́льзу жития́ и́ноческаго в те́х благоустроя́л еси́, все́х при́сно к Бо́гу наставля́я оте́ческими твои́ми поуче́ньми, о́тче на́ш, Феодо́сие богому́дре.

Припев: Святителю отче Феодосие, моли́ Бо́га о нас.

Благоле́пне ду́шу твою́ во хра́м Ду́ха Бо́жия доброде́тельми устроя́я, благоле́пие до́му Бо́жия возлюби́л еси́ и, всеусе́рдное попече́ние о то́м име́я, еще́ и хра́мы но́вы созида́л еси́ во сла́ву Творца́ и Бо́га, ми́р ве́сь несказа́нною красото́ю благоукраси́вшаго.

Сла́ва Отцу́ и Сы́ну и Свято́му Ду́ху:

Ра́достию Ангельскою, святи́телю Бо́жий, ра́довался еси́, егда́ ча́да твоя́ во и́стине ходя́ща ви́дел еси́, и, я́коже оте́ц чадолюби́вый, се́рдцем твои́м о заблужда́ющихся скорбе́л еси́ и о спасе́нии все́х моли́тву твори́л еси́, вся́ любо́вию объе́мля и о все́х предста́тельствуя, о́тче на́ш, святи́телю Феодо́сие.

И ны́не и при́сно и во ве́ки веко́в. Ами́нь.

Богородичен: Прииди́те, вси́ ве́рнии, припаде́м к те́плей Засту́пнице ро́да на́шего, Ма́тери Бо́жией, и во умиле́нии се́рдца воззове́м: Пресвята́я Влады́чице Богоро́дице, покры́й на́с благода́тным покро́вом Твои́м и моли́твами Твои́ми изба́ви на́с от вся́каго зла́.

Конда́к, гла́с 4:

Па́стырей Нача́льнику Христу́ труди́лся еси́, святи́телю Феодо́сие, на па́жити духо́вней слове́сныя твоя́ о́вцы пита́я, и целе́бен да́р от Христа́ Спа́са прия́л еси́, во е́же не́мощи душе́вныя и теле́сныя цели́ти все́х, с ве́рою к целе́бным твои́м моще́м приходя́щих. Те́мже и ны́не, свя́тe, моли́ся все́м и́мя твое́ призыва́ющим от наве́тов вра́жиих спасти́ся и поми́ловатися душа́м на́шим.

Икос:

Да́р Бо́жий вои́стину яви́лся еси́ земли́ Росси́йстей, свя́тe Феодо́сие, от ю́ности бо себе́ Бо́гу возложи́в, по́двигом до́брым до конца́ подвиза́лся еси́ и дарова́ния ве́лия прия́л еси́, благода́ти сосу́д бы́в избра́нный. Те́мже, я́ко в житии́ твое́м, та́ко наипа́че по блаже́ннем успе́нии, предстоя́ престо́лу Пресвяты́я Тро́ицы, со дерзнове́нием возде́еши преподо́бныя твоя́ ру́це, о па́стве твое́й и о все́й земли́ Росси́йстей те́пле моля́ся. Сего́ ра́ди, с ве́рою и любо́вию к тебе́ притека́юще, вси́ скорбя́щии неоску́дно утеше́ние прие́млют и боля́щии исцеле́ний сподобля́ются. С ни́миже и мы́ тебе́, я́ко чадолюби́вому отцу́, взыва́ем: моли́, свя́те, о призыва́ющих и́мя твое́, от наве́тов вра́жиих спасти́ся душа́м на́шим.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святителю отче Феодосие, моли́ Бо́га о нас.

При́сно поуча́яся па́мяти сме́ртней, непреста́нно жела́л еси́ кре́ст Госпо́день пред очесы́ твои́ми держа́ти, eго́же воображе́ние и в пути́ неразлу́чно пред тобо́ю пребыва́ше, во е́же всегда́ от се́рдца взыва́ти ко Го́споду: благослове́н еси́, Го́споди Бо́же, во ве́ки.

Припев: Святителю отче Феодосие, моли́ Бо́га о нас.

И по сме́рти, я́ко жи́в сы́й, благода́тию Бо́жиею с ча́ды твои́ми пребыва́еши и по преставле́нии твое́м па́стырь до́брый те́м явля́ешися, о́тче Феодо́сие, в со́нных виде́ниих неве́дущия в ве́ре наставля́я и все́х вопи́ти науча́я: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

В це́рковь Бо́жию ходи́ти и моли́тися боля́щему и́ноку повеле́л еси́, о́тче Феодо́сие, во сне́ тому́ предста́в, и, оте́чески того́ вразумля́я, грехи́ его́ воспомяну́л еси́, к покая́нию призыва́я, и исцеле́ние тому́ по́дал еси́, да вы́ну сла́вит Го́спода: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Разсе́яся у́м мо́й, одебеле́ се́рдце, немоществу́ет мое́ произволе́ние. Влады́чице Богоро́дице, умилосе́рдися o мне́, гре́шнем, исцели́ ду́шу мою́ и, я́ко Блага́го Спа́са моего́ Блага́я Ма́ти, спаси́ мя, да вы́ну вопию́ Ему́: благослове́н еси́, Го́споди Бо́же, во ве́ки.

Пе́снь 8.

Ирмос: Ангели и небеса́, на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки.

Припев: Святителю отче Феодосие, моли́ Бо́га о нас.

Кто́ по достоя́нию мо́жет пове́дати вся́ чудеса́ твоя́, святи́телю Феодо́сие? И неи́щущим тебе́ боля́щим явля́ешися вра́чь преизря́дный, все́х призыва́я испове́дати cла́ву Бо́га, прославля́ющаго святы́я Своя́ и превозноси́маго во ве́ки.

Припев: Святителю отче Феодосие, моли́ Бо́га о нас.

Стужа́емым от духо́в нечи́стых засту́пник и прибе́жище яви́лся еси́, святи́телю Феодо́сие, прогоня́я си́лою Бо́жиею вся́кое де́йство бесо́вское от и́же с ве́рою к моще́м твои́м притека́ющих, да сла́вится и́мя Бо́жие во ве́ки.

Сла́ва Отцу́ и Сы́ну и Свято́му Ду́ху:

Имя твое́, святи́телю Феодо́сие, я́ко мѵ́ро излия́нное, я́коже благоуха́ние рая́ Бо́жия, по лицу́ всея́ земли́ Росси́йския обно́сится, услажда́я сердца́ ве́рующих и призыва́я в ра́дости духо́вней воспева́ти Го́спода, превозноси́маго во вся́ ве́ки.

И ны́не и при́сно и во ве́ки веко́в. Ами́нь.

Богородичен: Не пре́зри моле́ний ра́б Твои́х, Ма́ти Бо́жия, приими́ моли́твы на́ша ра́ди уго́дника Твоего́, святи́теля Феодо́сия, и принеси́ ко престо́лу Сы́на и Бо́га Твоего́, да сла́вится и́мя Его́ от всея́ тва́ри во ве́ки.

Песнь 9

Ирмос: Тя́, неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых Си́л, немо́лчными славословле́нии велича́ем.

Припев: Святителю отче Феодосие, моли́ Бо́га о нас.

Яко цели́тель преми́лостивый, свя́тe Феодо́сие, не то́чию призыва́ющим тя́ боля́щим ми́лостивне вне́млеши, но и при́сных и́х послу́шаеши и по ве́ре те́х ско́рый вра́чь боля́щим явля́ешися, все́х ми́луя и утеша́я, на все́х щедро́ты твоя́ преизоби́льне излива́я.

Припев: Святителю отче Феодосие, моли́ Бо́га о нас.

Вои́стинну ди́вна и па́че сло́ва чудеса́ твоя́, Феодо́сие, о́тче на́ш, яви́л бо ся еси́ сла́ва Це́ркве Росси́йския, Правосла́вныя ве́ры небе́сный пропове́дник, и́стины же свиде́тель непрело́жный.

Сла́ва Отцу́ и Сы́ну и Свято́му Ду́ху:

Свя́тче Бо́жий, уго́дниче Христо́в, ми́лости неистощи́мое сокро́вище, при́зри на не́мощи моя́, исцели́ ду́шу мою́, страстьми́ зле́ обурева́емую, исцели́ и те́ло мое́, не́мощьми обложе́нное, да просла́влю в тебе́ благода́ть и милосе́рдие Христа́ Бо́га, ди́внаго во святы́х Свои́х.

И ны́не и при́сно и во ве́ки веко́в. Ами́нь.

Богородичен: К Тебе́, Премилосе́рдая Ма́ти, возношу́ мое́ гре́шное се́рдце, пред Тобо́ю, Благода́тная, поверга́ю не́мощи души́ и те́ла моего́: моли́твами Твои́ми заступи́ и поми́луй мя́.

Свети́лен.

Не́бо звезда́ми Украси́вый но́вую звезду́ пресве́тлую яви́ тя, святи́телю Феодо́сие, не́бо церко́вное украша́ющую и мра́к нечести́вых мудрова́ний разгоня́ющую. Те́мже и на́ша сердца́, грехо́м омраче́нная, просвети́ и к покая́нию моли́твами твои́ми, преподо́бне, наста́ви.

Сла́ва, и ны́не, Богородичен:

Зарю́ пресве́тлую, явля́ющую на́м Со́лнце незаходи́мое, ве́мы Тя́, Пресвята́я Де́во Богоро́дице. Сего́ ра́ди мо́лим Тя́: я́ко Ма́ти Све́та су́щи, просвети́ на́с све́том Сы́на Твоего́, Христа́ Бо́га на́шего.

Молитва святителю Феодосию, архиепископу Черниговскому

О свяще́нная главо́, кре́пкий наш моли́твенниче и засту́пниче, святи́телю Феодо́сие, услы́ши нас, с ве́рою призыва́ющих тя и усе́рдно припа́дающих к ико́не твое́й. Помина́й нас у Престо́ла Вседержи́телева и не преста́й моли́тися за ны. Ве́мы, я́ко грехи́ на́ши разлуча́ют нас ме́жду на́ми и тобо́ю, и недосто́йни есмы́ толи́каго отца́ и хода́тая. Но ты, быв подража́тель человеколю́бия Бо́жия, не преста́ни вопия́ о нас ко Го́споду, испроси́ предста́тельством твои́м у Всеми́лостивейшаго Бо́га на́шего мир Це́ркви Его́, на земли́ вои́нствующей, па́стырем ея́ си́лу ре́вностно подвиза́тися о спасе́нии люде́й. Умоли́ Небе́снаго Отца́ всем нам пода́ти дар, коему́ждо благопотре́бен, ве́ру и́стинную, наде́жду тве́рдую и любо́вь неоскудева́ющую, градо́в на́ших утвержде́ние, ми́ра умире́ние, от гла́да и па́губы избавле́ние, от наше́ствия иноплеме́нников сохране́ние, ю́ным и младе́нцем благо́е в ве́ре возраста́ние, ста́рым и немощны́м утеше́ние и подкрепле́ние, боля́щим исцеле́ние, си́ротам и вдови́цам ми́лость и заступле́ние, заблу́ждшим исправле́ние, бе́дствующим благовре́менную по́мощь. Не посрами́ нас в упова́нии на́шем, споспеше́ствуй, я́ко оте́ц чадолюби́вый, и нам понести́ и́го Христо́во во благоду́шии и терпе́нии, и всех упра́ви в ми́ре и покая́нии непосты́дно сконча́ти живо́т свой и Ца́рствия Бо́жия насле́дником бы́ти, иде́же ты ны́не водворя́ешися со А́нгелы и все́ми святы́ми, прославля́я Бо́га, в Тро́ице сла́вимаго, Отца́ и Сы́на и Свята́го Ду́ха. Ами́нь.