21 сентября.

Канон иной Рождеству Пресвятой Владычицы нашей Богородицы и Приснодевы Марии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4.

Рождество́ Твое́, Богоро́дице Де́во, ра́дость возвести́ все́й вселе́нней: из Тебе́ бо возсия́ Со́лнце Пра́вды — Христо́с Бо́г на́ш, и разруши́в кля́тву, даде́ благослове́ние, и упраздни́в сме́рть, дарова́ на́м живо́т ве́чный.

Ин кано́н, гла́с 8.

Пе́снь 1.

Ирмос: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися.

Припев: Пресвятая Богородице, спаси нас.

Да ликовству́ет вся́ тва́рь, да весели́тся же и Дави́д, я́ко от коле́на и от се́мене его́ произы́де же́зл, Цве́т нося́щи Го́спода, Творца́ вся́ческих.

Припев: Пресвятая Богородице, спаси нас.

Свята́я святы́х, во святе́м святи́лищи младе́нец возлага́ется воспита́тися от руки́ Ангеловы. Вси́ у́бо ве́рно спра́зднуим в рождестве́ Ея́.

Припев: Пресвятая Богородице, спаси нас.

Непло́ды неражда́ющая Анна, но не безча́дна Бо́гу: се́ бо пронарече́ся от родо́в Чи́стая Де́ва Ма́ти. Те́мже естества́ израсти́ Зижди́теля в ра́бии о́бразе.

Припев: Пресвятая Богородице, спаси нас.

Тя́, незло́бивую Агницу, Агнца Христа́, Младе́нца от чре́ва Твоего́ приве́дшую в на́ше существо́, вси́ от Анны рожде́нную Тя́ пе́сньми почита́ем.

Сла́ва Отцу́ и Сы́ну и Свято́му Ду́ху:

Тро́ичен: Три́ Безнача́льна сла́влю, Три́ Свя́та пою́, Три́ Соприсносу́щна в Существе́ Еди́ном пропове́дую: Еди́н бо во Отце́, и Сы́не, и Ду́се славосло́вится Бо́г.

И ны́не и при́сно и во ве́ки веко́в. Ами́нь.

Богородичен: Кто́ ви́де отроча́, его́же не все́я оте́ц, млеко́м пита́емое? Или́ где́ ви́дена бы́сть де́ва ма́ти? Истинно па́че ума́ обоя́, Богороди́тельнице Чи́стая.

Пе́снь 3.

Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Припев: Пресвятая Богородице, спаси нас.

Воспита́вшися во Свята́я святы́х, Де́во Пречи́стая Богоро́дице, вы́шши яви́лася еси́ тва́ри, Зижди́теля пло́тию поро́ждши.

Припев: Пресвятая Богородице, спаси нас.

Благослове́нно чре́во твое́, целому́дренная Анно, пло́д бо израсти́ла еси́ де́вства, Юже безсе́менно Пита́теля тва́ри ро́ждшую и Изба́вителя Иису́са.

Припев: Пресвятая Богородице, спаси нас.

Тя́ блажи́т, Присноде́во, вся́ тва́рь, от Анны дне́сь ро́ждшуюся, от ко́рене Иессе́ева же́зл, пречи́ст цве́т, Христа́, израсти́вшую.

Припев: Пресвятая Богородице, спаси нас.

Тя́ вы́шшую всея́ тва́ри, Богоро́дице, показу́я, Чи́стая, Сы́н Тво́й, е́же от Анны вели́чит Твое́ рождество́ и все́х весели́т дне́сь.

Сла́ва Отцу́ и Сы́ну и Свято́му Ду́ху:

Тро́ичен: Тебе́ покланя́емся, Отче Безнача́льне Существо́м, пое́м Безле́тнаго Сы́на Твоего́ и чте́м Соприсносу́щнаго Ду́ха Твоего́, я́ко Еди́наго Тро́е естество́м Бо́га.

И ны́не и при́сно и во ве́ки веко́в. Ами́нь.

Богородичен: Светода́вца и Нача́льника жи́зни челове́ческия ро́ждшая, Чи́стая Богоро́дице, яви́лася еси́ сокро́вище жи́зни на́шея и две́рь непристу́пнаго Све́та.

Седа́лен, гла́с 4.

Де́ва Мари́я и Богоро́дица и́стинно, я́ко о́блак све́та, дне́сь возсия́ на́м, и от пра́ведных предгряде́т в сла́ву на́шу. Не ктому́ Ада́м осужда́ется, и Ева от у́з свободи́ся. И сего́ ра́ди зове́м, вопию́ще со дерзнове́нием еди́ней Чи́стей: ра́дость возвеща́ет рождество́ Твое́ все́й вселе́нней.

Пе́снь 4.

Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́.

Припев: Пресвятая Богородице, спаси нас.

Патриа́рх Иа́ков, прови́дев, Спа́се, вели́чия я́сно строе́ния Твоего́, вопия́ше Ду́хом, ко Иу́де глаго́ля та́йно: от ле́торасли возше́л еси́, Сы́не мо́й, возвеща́я Тя́ от Де́вы Бо́га.

Припев: Пресвятая Богородице, спаси нас.

Ны́не же́зл Ааро́нов, от ко́рене Дави́дова прозя́бший, ны́не Де́ва Чи́стая происхо́дит, и сликовству́ет не́бо и земля́, и вся́ оте́чествия язы́ков, и Анна и Иоаки́м та́инственно.

Припев: Пресвятая Богородице, спаси нас.

Ны́не да весели́тся не́бо, да ра́дуется же земля́, и да лику́ет Иоаки́м и Дави́д: о́в у́бо я́ко роди́тель Тво́й, и́стинно ро́ждшия Бо́га, о́в же я́ко пра́отец Тво́й, пропове́дая Твоя́ вели́чествия, Чи́стая.

Припев: Пресвятая Богородице, спаси нас.

Сра́дуется Тебе́ дне́сь, богому́дренная Анно, вселе́нная: Изба́вителя бо тоя́ Ма́терь процвела́ еси́, Юже от ко́рене прозя́бшую Дави́дова, же́зл си́лы на́м нося́щую, Цве́т Христа́.

Сла́ва Отцу́ и Сы́ну и Свято́му Ду́ху:

Тро́ичен: Сла́влю Безнача́льна Бо́га, Отца́ и Сы́на и Свята́го Ду́ха, Единосу́щную Тро́ицу Несозда́нную, Ейже предстоя́т серафи́ми благогове́йно, зову́ще: Свя́т, Свя́т, Свя́т еси́, Бо́же.

И ны́не и при́сно и во ве́ки веко́в. Ами́нь.

Богородичен: Пребезнача́льное Нача́ло, нача́ло прие́млет из Тебе́, Богороди́тельнице, плотски́м вре́менем и пребыва́ет собезнача́льно, и вопло́щься Сло́во Отчее, и Ду́ху соприсносу́щное, сохраня́я Боже́ственное досто́инство.

Пе́снь 5

Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди ра́зве Тебе́ ино́го не ве́мы, и́мя Твое́ имену́ем.

Припев: Пресвятая Богородице, спаси нас.

Пречи́стое Твое́ рождество́, Де́ва Непоро́чная, несказа́нное, и зача́тие неизглаго́ланно, и рожде́ние Твое́, Неве́сто неневе́стная: Бо́г бо бе́, ве́сь в мя́ облеки́йся.

Припев: Пресвятая Богородице, спаси нас.

Дне́сь да веселя́тся Ангельстии чи́ни, пе́сньми да лику́ют су́щии из Ада́ма: роди́ся бо же́зл, Цве́т возрасти́вший Христа́, Еди́наго Изба́вителя на́шего.

Припев: Пресвятая Богородице, спаси нас.

Дне́сь Ева разреша́ется осужде́ния, разреша́ется же и непло́дство, и Ада́м дре́вния кля́твы, о рождестве́ Твое́м, Тобо́ю бо от тли́ изба́вихомся.

Припев: Пресвятая Богородице, спаси нас.

Сла́ва Тебе́, Просла́вльшему непло́дную дне́сь: роди́ бо же́зл присноцвету́щий от обеща́ния, от него́же прозябе́ Христо́с, Цве́т жи́зни на́шея.

Сла́ва Отцу́ и Сы́ну и Свято́му Ду́ху:

Тро́ичен: Сла́ва Тебе́, Отче Святы́й, Бо́же Нерожде́нне; сла́ва Тебе́, Сы́не Безле́тне, Единоро́дне; сла́ва Тебе́, Ду́ше Боже́ственный и Сопресто́льный, от Отца́ происходя́й и в Сы́не пребыва́яй.

И ны́не и при́сно и во ве́ки веко́в. Ами́нь.

Богородичен: Бы́сть чре́во Твое́ Со́лнца носи́ло, пребы́сть чистота́ Твоя́, я́коже пре́жде, невреди́ма, Де́во, Христо́с бо Со́лнце, я́ко от черто́га жени́х, яви́ся из Тебе́.

Пе́снь 6.

Ирмос: Яко во́ды морски́я, Человеколю́бче, волна́ми жите́йскими обурева́юся, те́мже, я́ко Ио́на, та́ко вопию́ Ти́: возведи́ от тли́ живо́т мо́й, Благоутро́бне Го́споди.

Припев: Пресвятая Богородице, спаси нас.

Святу́ю святы́х су́щу, целому́дреннии роди́тели Твои́, Чи́стая, возложи́ша Тя́ в хра́ме Госпо́дни воспита́тися че́стно и угото́ватися в Ма́терь Ему́.

Припев: Пресвятая Богородице, спаси нас.

Непло́ды и ма́тери, лику́йте, дерза́йте и игра́йте, безча́дныя: безча́дна бо непло́ды Богоро́дицу прозяба́ет, Яже изба́вит от боле́зней Еву и кля́твы Ада́ма.

Припев: Пресвятая Богородице, спаси нас.

Слы́шу Дави́да, пою́ща Тебе́: приведе́тся де́вы во сле́д Тебе́, приведу́тся в хра́м Царе́в. И с ни́м Тя́ и а́з, Дще́рь Царе́ву, воспева́ю.

Припев: Пресвятая Богородице, спаси нас.

Пое́м свято́е Твое́ рождество́, чти́м и непоро́чное зача́тие Твое́, Неве́сто Богозва́нная и Де́во; сла́вят же с на́ми Ангелов чи́ни и святы́х ду́ши.

Сла́ва Отцу́ и Сы́ну и Свято́му Ду́ху:

Тро́ичен: В Тебе́ Тро́ическое та́инство пое́тся и сла́вится, Чи́стая: Оте́ц бо благоволи́, и Сло́во всели́ся в Тя́, и Боже́ственный Ду́х Тебе́ осени́.

И ны́не и при́сно и во ве́ки веко́в. Ами́нь.

Богородичен: Злата́я кади́льница была́ еси́, Огнь бо во утро́бе Твое́й всели́ся, Сло́во от Ду́ха Свя́та, и челове́ческим зра́ком в Тебе́ ви́деся, Богороди́тельнице Чи́стая.

Конда́к, гла́с 4:

Иоаки́м и Анна поноше́ния безча́дства и Ада́м и Ева от тли́ сме́ртныя свободи́стася, Пречи́стая, во святе́м рождестве́ Твое́м. То́ пра́зднуют и лю́дие Твои́, вины́ прегреше́ний изба́вльшеся, внегда́ зва́ти Ти́: непло́ды ражда́ет Богоро́дицу и Пита́тельницу Жи́зни на́шея.

Икос:

Моли́тва ку́пно и воздыха́ние непло́дства и безча́дства Иоаки́ма же и Анны благоприя́тное, и во у́ши Госпо́дни вни́де, и прозябе́ пло́д живоно́сен ми́ру. Ов бо моли́тву на горе́ творя́ше, о́ва же в саде́ поноше́ние ноша́ше, но с ра́достию непло́ды ражда́ет Богоро́дицу и Пита́тельницу Жи́зни на́шея.

Пе́снь 7.

Ирмос: Халде́йская пе́щь, огне́м распаля́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Припев: Пресвятая Богородице, спаси нас.

Пра́зднуем, Чи́стая, и ве́рно покланя́емся свято́му Твоему́ Рождеству́, пою́ще Сы́на Твоего́, Имже изба́вихомся дре́вняго Ада́мова ны́не осужде́ния.

Припев: Пресвятая Богородице, спаси нас.

Ны́не Анна весели́тся и вопие́т, хва́лящися: непло́ды су́щи, роди́х Бо́жию Ма́терь, Ея́же ра́ди осужде́ние Евино разреши́ся, и я́же в печа́лех боле́знь.

Припев: Пресвятая Богородице, спаси нас.

Ада́м свободи́ся, и Ева лику́ет, и вопию́т ду́хом к Тебе́, Богоро́дице: Тобо́ю изба́вихомся перворо́дныя кля́твы, я́вльшуся Христу́.

Припев: Пресвятая Богородице, спаси нас.

О, чре́во, вмести́вшее Бо́жие селе́ние! О, утро́бо, носи́вшая небе́с ши́ршую, престо́л святы́й, мы́сленный киво́т свяще́ния!

Сла́ва Отцу́ и Сы́ну и Свято́му Ду́ху:

Тро́ичен: Отца́ просла́вим, Сы́на и Ду́ха, во еди́нстве Божества́, Тро́ицу Пресвяту́ю, Неразде́льную, Несозда́нную, и Соприсносу́щную, и Единосу́щную.

И ны́не и при́сно и во ве́ки веко́в. Ами́нь.

Богородичен: Ты́ Бо́га еди́на родила́ еси́, Де́во, пресла́вно, Ты́ естество́ обнови́ла еси́ Рождество́м Твои́м, Мари́е, Ты́ Еву разреши́ла еси́ перворо́дныя кля́твы, Богороди́тельнице Чи́стая.

Пе́снь 8.

Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Пресвятая Богородице, спаси нас.

Сотвори́вый пресла́вная непло́дней утро́бе, отве́рзый Анны неражда́ющая ложесна́, и пло́д е́й да́в, Ты́ Бо́же Святы́й, Ты́ Сы́не Де́вы, Ты́ от Сея́ пло́ть прия́л еси́, присноцвету́щия Де́вы и Богоро́дицы.

Припев: Пресвятая Богородице, спаси нас.

Затворя́яй бе́здну и отверза́яй ю́, вознося́й во́ду во о́блацех и дая́й до́ждь, Ты́, да́вый, Го́споди, от непло́днаго ко́рене прозя́бнути Анны святы́я пречи́ст пло́д, и роди́ти Богоро́дицу.

Припев: Пресвятая Богородице, спаси нас.

Де́лателю мы́слей на́ших и Насади́телю ду́ш на́ших, Ты́, непло́дную зе́млю благопло́дну показа́вый, Ты́ дре́вле суху́ю родови́ту, благокла́сну, бразду́ плодоно́сну соде́лал еси́ Анну святу́ю, пречи́ст пло́д израсти́ти, Богоро́дицу.

Припев: Пресвятая Богородице, спаси нас.

Прииди́те, вси́ у́зрим, я́ко от черто́га ма́ла, Бо́жий гра́д, ны́не ражда́емый, и́же от две́ри утро́бныя исхо́д иму́щую, вхо́д же не ве́дущу обще́ния: Еди́н Бо́г Зижди́тель Се́ю про́йде стезе́ю стра́нною.

Сла́ва Отцу́ и Сы́ну и Свято́му Ду́ху:

Тро́ичен: О, Тро́ице Пресу́щная, Еди́нице Собезнача́льная! Тя́ пое́т и трепе́щет мно́жество Ангел, не́бо и земля́ и бе́здны ужаса́ются, челове́цы благословя́т, о́гнь рабо́тает, вся́ послу́шают Тебе́, Тро́ице Свята́я, со стра́хом, я́же в тва́ри.

И ны́не и при́сно и во ве́ки веко́в. Ами́нь.

Богородичен: О, нове́йшаго слы́шания: Бо́г — Сы́н Жены́! О, безсе́меннаго Рождества́! Безму́жняя Ма́ти и рожде́нное Бо́г! О, ужа́снаго виде́ния! О, зача́тия стра́ннаго Де́вы! О, несказа́ннаго Рождества́! Истинно па́че ума́ вся́ и виде́ния.

Песнь 9

Ирмос: Чу́жде ма́терем де́вство, и стра́нно де́вам деторожде́ние; на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем.

Припев: Пресвятая Богородице, спаси нас.

Досто́йное, Богома́ти, Твоея́ чистоты́ рождество́ насле́довала еси́ чрез обеща́ние: иногда́ бо непло́дней богопрозябе́н пло́д вдала́ся еси́. Те́м Тя́, вся́ племена́ земна́я, непреста́нно велича́ем.

Припев: Пресвятая Богородице, спаси нас.

Испо́лнися вопию́щаго проро́чество, глаго́лет бо: возста́влю ски́нию па́дшую свяще́ннаго Дави́да, в Тебе́, Чи́стая, прообрази́вшуюся, Ея́же ра́ди все́х челове́ков пе́рсть в Те́ло созда́ся Бо́жие.

Припев: Пресвятая Богородице, спаси нас.

Пелена́м покланя́емся Твои́м, Богоро́дице, сла́вим Да́вшаго пло́д пре́жде непло́дней и Отве́рзшаго ложесна́ неражда́ющей пресла́вно. Твори́т бо вся́, ели́ка хо́щет, Бо́г сы́й самовла́стен.

Припев: Пресвятая Богородице, спаси нас.

Яко да́р Тебе́, Богоро́дице, песнопе́ние, от Анны ро́ждшейся, ве́рно дароно́сим: ма́тери Ма́терь, де́вы же Де́ву еди́ну, славосло́вяще, покланя́емся Тебе́, пое́м и сла́вим.

Сла́ва Отцу́ и Сы́ну и Свято́му Ду́ху:

Тро́ичен: Чу́жде е́сть беззако́нным сла́вити Безнача́льную Тро́ицу, Отца́ и Сы́на же и Свята́го Ду́ха, несозда́нное Вседержа́вство, Еюже ми́р ве́сь содержи́тся ма́нием держа́вы Ея́.

И ны́не и при́сно и во ве́ки веко́в. Ами́нь.

Богородичен: Вмести́ла еси́ во утро́бе Твое́й, Де́во Ма́ти, Еди́наго от Тро́ицы, Христа́ Царя́, Его́же пое́т вся́ тва́рь и трепе́щут вы́шнии чи́ни: Того́ моли́, Всечи́стая, спасти́ся душа́м на́шим.

Свети́лен:

От непло́дныя дне́сь Анны цве́т произы́де — Богоро́дица, вся́ благово́ния Боже́ственнаго исполня́ющи концы́ ми́ра и ра́дости всю́ наполня́ющи тва́рь, Юже пою́ще, досто́йно восхваля́ем, я́ко су́щу земноро́дных превы́шшую.

Сла́ва, и ны́не:

Ада́ме, обнови́ся, и Ева, возвели́чися, проро́цы, со апо́столы лику́йте и пра́ведными, о́бщая бо ра́дость возсия́ Ангелов же и челове́ков, от пра́ведных дне́сь Иоаки́ма и Анны, Богоро́дица Мари́я.

Cтихи́ры, гла́с 1

О, ди́внаго чудесе́! Исто́чник Жи́зни от непло́дныя ражда́ется, и благода́ть плодороди́ти све́тло начина́ется. Весели́ся, Иоаки́ме, Богоро́дицы бы́в роди́тель: не́сть и́н, я́коже ты́, земноро́дных роди́тель, богоприя́тне; боговмести́мая бо Отрокови́ца, Бо́жие селе́ние, пресвята́я гора́ тобо́ю на́м дарова́ся.

О, ди́внаго чудесе́! От непло́дове пло́д возсия́ манове́нием все́х Соде́теля и Вседержи́теля, до́блественно мирско́е благи́х разреши́ непло́дство. Ма́тери с ма́терию Богоро́дичною лику́йте, зову́ще: Обра́дованная, ра́дуйся, с Тобо́ю Госпо́дь, подая́й ми́ру Тобо́ю ве́лию ми́лость.

Сто́лп целому́дрия одушевле́н и све́тлое прия́телище, блиста́ющееся благода́тию, Анна благосла́вная я́вльшися, породи́ забра́ло вои́стинну де́вства, Боже́ственное процвете́ние: Яже все́м де́вственным и де́вства жела́ющим дарова́ние, де́вства добро́ту я́ве подаю́щую, и да́рующую все́м ве́рным ве́лию ми́лость.

Сла́ва, и ны́не, гла́с 6.

Се́й де́нь Госпо́день, ра́дуйтеся, лю́дие: се́ бо Све́та черто́г и кни́га Сло́ва Живо́тнаго из утро́бы произы́де, и Яже к восто́ком две́рь, ро́ждшися, ожида́ет вхо́да Святи́теля вели́каго, еди́на и Еди́наго вводя́щи Христа́ во вселе́нную, во спасе́ние ду́ш на́ших.

Молитва в день Рождества Пресвятыя Богородицы

О, Пресвятая и Богоизбранная Дево, Владычице наша Богородице, Небеси и земли Царице, на радость и утешение всему миру от безплодных и безчадных родителей Богом дарованная! Родившися Божиим промышлением, Ты разрешила еси неплодствие рождшия Тя, и ныне неплодное сердце мое плодоносно сотвори предстательством Твоим у Престола Вседержителева, неплодствовати же соделай мя злыми делы, гнилыми словесы и нечистыми помышленьми. О, Всеблаженная, да явлюся чадо Божие, добродетелей благоплодие присно приносящее. Ты утолила еси пречистым рождеством Твоим плач праматери нашея Евы, и праведныя родители Твоя избавила еси поношения безчадства, и ныне утоли плач и воздыхания многоболезненныя и любогреховныя души моея и избави всех нас поношения злосмрадных дел наших, страстей безчестия и от всякаго порабощения вражескаго. Наипаче же даруй нам, Пресвятая Богородице Дево, во всесветлый день рождества Твоего чистым сердцем разумети и памятовати, с коликою радостию и благодарением неплодная утроба святыя праведныя Анны ношаше Тя, да и мы не точию словесы, но наипаче делы своими выну будем со умилением сердечнем прославляти Тя, вопиюще: Слава пришествию Твоему, Чистая. Слава рождеству Твоему. Слава девству Твоему, Мати Безневестная. Купно же с Тобою сподоби нас непрестанно славити и величати Всесвятый Плод Твой, Слово воплощенно, во чреве Твоем неопально носимо, Емуже слава подобает, честь и покланение, со Безначальным Его Отцем, и с Пресвятым и Благим и Животворящим Его Духом ныне и присно и во веки веков. Аминь.