20 сентября.
Канон священномученику Михаилу, пресвитеру Орловскому
![Священномученику Михаилу, пресвитеру Орловскому Священномученику Михаилу, пресвитеру Орловскому](img_i/057.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 4:
Богоуго́дному житию́ поревнова́в,/ му́ченическою кро́вию ве́рность Христу́ запечатле́л еси́,/ священному́чениче Михаи́ле,/ моли́ Всеблага́го Бо́га на́шего,/ да сохрани́т Це́рковь и зе́млю Ру́сскую/ от ересе́й, раско́лов, мяте́жа и бра́ни,/ укрепи́т нас в Правосла́вии и единомы́слии,/ возниспо́слет нам ми́лости Своя́// и спасе́т ду́ши на́ша.
Стихи́ра, глас 6:
Священному́чениче о́тче Михаи́ле,/ пра́ведно яви́ся житие́ твое́ пред лице́м Бо́га Вы́шняго,/ па́стырския бо труды́ усе́рдно соверша́я/ и вся ско́рби тя́жкия му́жески терпя́,/ смерть от рук богобо́рных смире́нно прия́л еси́./ И ны́не у Престо́ла Влады́чня/ вку́пе с новому́ченики Це́ркве Ру́сския// мо́лишися о спасе́нии душ на́ших.
Кано́н священному́ченика, глас 3.
Песнь 1
Ирмос: Во́ды дре́вле ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ Сей Бог наш препросла́влен есть,// Тому́ еди́ному пои́м, я́ко просла́вися.
Припе́в: Священному́чениче Михаи́ле, моли́ Бо́га о нас.
Боголюби́вою душе́ю твое́ю, свя́те Михаи́ле, ко Го́споду изде́тска прилепи́лся еси́, всем се́рдцем жела́я Тому́ послужи́ти и пе́ти Спа́су Христу́, я́ко просла́вися во ве́ки.
Припе́в: Священному́чениче Михаи́ле, моли́ Бо́га о нас.
Зна́ния разли́чная улучи́ти жела́я, неле́ностне труди́лся еси́ и сла́ву Еди́ному Бо́гу воспева́л еси́: сла́вно бо просла́вися.
Сла́ва Отцу́ и Сы́ну и Свято́му Ду́ху:
Храм души́ твоея́ в чистоте́ сохрани́в и мно́гия доброде́тели стяжа́в, священному́чениче Михаи́ле, апо́стольски ше́ствовал еси́ и ста́до Христо́во умно́жил еси́.
И ны́не и при́сно и во ве́ки веко́в. Ами́нь.
Богородичен: Пресвята́я Де́во Чи́стая, ру́ку Свою́ ко гре́шным простри́, взыва́ющим Ти: спаси́ ны, Госпоже́ Ми́лостивая.
Песнь 3
Ирмос: И́же от не су́щих вся Приведы́й,/ Сло́вом созида́емая,/ соверша́емая Ду́хом,/ Вседержи́телю Вы́шний,// в любви́ Твое́й утверди́ мене́.
Припе́в: Священному́чениче Михаи́ле, моли́ Бо́га о нас.
Учи́тельство с по́двигом сочета́вый, па́стырь до́брый лю́дем земли́ Вя́тския яви́лся еси́, свя́те Михаи́ле, сло́вом и житие́м твои́м пасо́мыя наставля́яй.
Припе́в: Священному́чениче Михаи́ле, моли́ Бо́га о нас.
Служе́ние в Це́ркви Бо́жией усе́рдно соверша́я, о еди́нем на потре́бу попече́ние ве́лие прилага́л еси́, благи́я ча́сти приобща́я ве́рных.
Сла́ва Отцу́ и Сы́ну и Свято́му Ду́ху:
Храм Бо́жий созида́я, труды́ мно́гия ко благоустрое́нию того́ приложи́л еси́, и́же и по ны́не зри́ми суть.
И ны́не и при́сно и во ве́ки веко́в. Ами́нь.
Богородичен: Ско́рбных утеше́ние и отча́янных спасе́ние, Ма́ти Христа́ Бо́га, к Тебе́ прибега́ем и мо́лим: исцели́ ду́ши на́ша, грехо́м омраче́нныя.
Седа́лен, глас 1:
Припаде́м к моли́твеннику на́шему, Михаи́лу сла́вному, и испро́сим по́мощи духо́вныя, да возмо́жем воспита́ти ча́да на́ша в ве́ре и благоче́стии, во е́же па́губныя ле́сти им избега́ти и всем се́рдцем ко Христу́ прилепля́тися.
Песнь 4
Ирмос: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:// сла́ва си́ле Твое́й, Го́споди.
Припе́в: Священному́чениче Михаи́ле, моли́ Бо́га о нас.
Попусти́ Госпо́дь испыта́ти тве́рдость ве́ры твоея́, егда́ супру́ги и чад твои́х ма́лых лиши́лся еси́. Оба́че, печа́ль твою́ на Бо́га возложи́в, в моли́тве Тому́ взыва́л еси́: сла́ва си́ле Твое́й, Го́споди.
Припе́в: Священному́чениче Михаи́ле, моли́ Бо́га о нас.
Не то́кмо отце́м, но и ма́терию ча́дом твои́м по пло́ти был еси́, и́хже и возрасти́л еси́ во благоче́стии и чистоте́; сы́нове бо твои́ во архиере́йстве Бо́гу послужи́ша, дще́ри же лю́дем наста́вницы до́брыя яви́шася.
Сла́ва Отцу́ и Сы́ну и Свято́му Ду́ху:
Пе́ние похва́льное благогове́йно прино́сим ти, свя́те Михаи́ле, Бо́га же, да́вшаго ти кре́пость, прославля́ем, взыва́юще: сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: Нескве́рная Отрокови́це, чистото́ю удиви́вшая А́нгелы и вся Небе́сныя Си́лы; о Тебе́, Богоизбра́нная, ра́дуются вси земноро́днии, я́ко сподо́бльшейся бы́ти Ма́ти Бо́жия.
Пе́снь 5
Ирмос: На земли́ Неви́димый яви́лся еси́/ и челове́ком во́лею сожи́л еси́, Непостижи́мый,/ и к Тебе́ у́тренююще,// воспева́ем Тя, Человеколю́бче.
Припе́в: Священному́чениче Михаи́ле, моли́ Бо́га о нас.
Очи́стив ум твой и боже́ственными по́мыслы озари́вся, священному́чениче Михаи́ле, я́ко па́стырь до́брый ду́шу твою́ за о́вцы полага́л еси́.
Припе́в: Священному́чениче Михаи́ле, моли́ Бо́га о нас.
Милосе́рдный нрав име́я, стра́ждущим оте́ц до́брый был еси́, Михаи́ле сла́вне, ве́дый, я́ко ми́лостивии поми́ловани бу́дут.
Сла́ва Отцу́ и Сы́ну и Свято́му Ду́ху:
Во вся́ком челове́це о́браз Бо́жий ви́дя, в темни́цах заключе́нныя посеща́л еси́, скорбя́щих утеша́я и к позна́нию во́ли Бо́жия наставля́я.
И ны́не и при́сно и во ве́ки веко́в. Ами́нь.
Богородичен: Всяк неду́г врачу́еши и отча́янных от поги́бели спаса́еши, благодаре́ние на́ше приими́ и ско́ро на дела́ блага́я возста́ви, Цели́тельнице душ и теле́с на́ших.
Песнь 6
Ирмос: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,// я́ко Петра́, мя, Упра́вителю, спаси́.
Припе́в: Священному́чениче Михаи́ле, моли́ Бо́га о нас.
Па́ству, я́же во Орло́ве, вода́ми жи́зни ве́чныя напои́л еси́, богоно́се Михаи́ле, и, я́ко де́латель до́брый, в вертогра́де Христо́ве усе́рдно потруди́лся еси́.
Припе́в: Священному́чениче Михаи́ле, моли́ Бо́га о нас.
Весть о Христе́ Воскре́сшем па́стве твое́й непреста́нно возвеща́л еси́, да вси печа́ль жите́йскую превозмо́гут и ра́дости Небе́сныя испо́лнятся.
Сла́ва Отцу́ и Сы́ну и Свято́му Ду́ху:
О сла́ве Бо́жией усе́рдно ревну́я, досточу́дне Михаи́ле, в годи́ну гоне́ний любо́вию ко Го́споду пламене́л еси́, злове́рие нечести́вых му́жески посека́я.
И ны́не и при́сно и во ве́ки веко́в. Ами́нь.
Богородичен: Уны́нием мя отягче́ннаго и по́мощи не иму́щаго от сро́дник свои́х, Де́во Влады́чице, не оста́ви, но возведи́ от тли живо́т мой.
Конда́к, глас 1:
Гра́ду Орло́ву па́стырь до́брый/ и Вя́тстей земли́ пе́рвый новому́ченик яви́лся еси́,/ священному́чениче Михаи́ле,/ Христу́ подража́я, за убива́ющих тя, моли́лся еси́,/ о проще́нии их хода́тайствуя./ И ны́не, Престо́лу Бо́жию предстоя́,/ моли́ о нас непреста́нно,// те́плый засту́пниче и ско́рый помо́щниче.
И́кос:
Кто возмо́жет исчи́слити мно́гия труды́ и боле́зни твоя́, я́же ра́ди любве́ к Бо́гу подъя́л еси́, священному́чениче Михаи́ле? Сего́ ра́ди восхваля́ем тя: Ра́дуйся, чад свои́х по пло́ти в за́поведех Бо́жиих ходи́ти научи́вый; ра́дуйся, сугу́бое попече́ние о ча́дех церко́вных приложи́вый. Ра́дуйся, кро́ткий и ми́лостивый нрав име́вый; ра́дуйся, в пра́веднем житии́ ста́рческих седи́н дости́гнувый. Ра́дуйся, по́двигом твои́м гони́тели удиви́вый; ра́дуйся, смире́нием высоту́ доброде́телей яви́вый. Ра́дуйся, о́тче Михаи́ле, те́плый наш хода́таю и ско́рый помо́щниче.
Песнь 7
Ирмос: Я́коже дре́вле благочести́выя три о́троки/ ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,// Бо́же оте́ц на́ших.
Припе́в: Священному́чениче Михаи́ле, моли́ Бо́га о нас.
Скорбь и стена́ние о́крест ви́дя, се́рдцем твои́м уязви́лся еси́, о́тче Михаи́ле, те́мже и му́жественне преще́ние святи́теля Ти́хона на богоху́льники па́стве твое́й возвести́л еси́.
Припе́в: Священному́чениче Михаи́ле, моли́ Бо́га о нас.
Богоотсту́пницы, я́рости испо́лненнии, заключе́нию тя преда́ша, ненави́дяху бо свет и́стиннаго богове́дения и не терпя́ху богоуго́днаго твоего́ жития́.
Сла́ва Отцу́ и Сы́ну и Свято́му Ду́ху:
На суди́щи незако́ннем вси тя оправда́ша, о́тче Михаи́ле, оба́че судии́ гла́са людска́го послу́шати не восхоте́ша и преще́ние на тя возложи́ша.
И ны́не и при́сно и во ве́ки веко́в. Ами́нь.
Богородичен: Скве́рных игра́лищем явля́юся и из ро́ва поги́бели вопию́ к Тебе́, Пресвята́я Влады́чице: воздви́гни мя из пучи́ны грехо́вныя.
Песнь 8
Ирмос: Нестерпи́мому огню́ соедини́вшеся,/ богоче́стия предстоя́ще, ю́ноши,/ пла́менем же неврежде́ни, боже́ственную песнь поя́ху:/ благослови́те, вся дела́ Госпо́дня, Го́спода// и превозноси́те во вся ве́ки.
Припе́в: Священному́чениче Михаи́ле, моли́ Бо́га о нас.
Безу́мнии богобо́рцы, лжесвиде́тельства обрести́ жела́юще, труды́ мно́гия прилага́ху, да погубя́т тя и сме́рти предаду́т. Ты же во смире́нии воспева́л еси́: благослови́те, вся дела́ Госпо́дня, Го́спода.
Припе́в: Священному́чениче Михаи́ле, моли́ Бо́га о нас.
Пе́сни пасха́льныя воспева́я, я́ко а́гнец на заколе́ние ше́ствовал еси́ и, скорбя́щих о тебе́ утеша́я, взыва́л еси́: благослови́те, вся дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху:
Жене́, иду́щей по тебе́ и пла́чущей, рекл еси́: возьми́ ри́зу мою́ и ча́дом возвести́, да ева́нгельския за́поведи соблюда́ют и путе́м Христо́вым сле́дуют, Бо́га превознося́ще во вся ве́ки.
И ны́не и при́сно и во ве́ки веко́в. Ами́нь.
Богородичен: По́мощь всех еси́, Всенепоро́чная, и́же ве́рою и любо́вию песносло́вят Боже́ственное Твое́ Рождество́, И́мже возсия́ с Небесе́ свет Боже́ственнаго ра́зума.
Песнь 9
Ирмос: Но́вое чу́до и боголе́пное:/ Деви́ческую бо дверь затворе́нную/ я́ве прохо́дит Госпо́дь,/ наг во вхо́де,/ и плотоно́сец яви́ся во исхо́де Бог,/ и пребыва́ет Дверь затворе́на;/ Сию́ неизрече́нно// я́ко Богома́терь велича́ем.
Припе́в: Священному́чениче Михаи́ле, моли́ Бо́га о нас.
На убие́ние влеко́мый, после́днее наставле́ние ча́дом твои́м посла́л еси́, да неле́ностно за́поведи ева́нгельския исполня́ют.
Припе́в: Священному́чениче Михаи́ле, моли́ Бо́га о нас.
Доше́дшу ти до ме́ста сме́рти твоея́, Михаи́ле священному́чениче, благослови́л еси́ хра́мину, иде́же немощны́я и боля́щия твои́ми труды́ благоустро́ил еси́, о проще́нии мучи́телей Го́споду моля́ся.
Сла́ва Отцу́ и Сы́ну и Свято́му Ду́ху:
Егда́ Собо́р церко́вный, и́же во гра́де Москве́, о убие́нии твое́м извеще́н бысть, тогда́ Ти́хон, Первосвяти́тель Це́ркве Ру́сския, сы́на твоего́, епи́скопа Влади́мира, рыда́юща сле́зне, ми́лостивно утеша́ше.
И ны́не и при́сно и во ве́ки веко́в. Ами́нь.
Богородичен: Ра́дуйся, Хода́таице спасе́ния челове́ком и заступле́ние; ра́дуйся, красото́ Це́ркве и благоле́пие; ра́дуйся, держа́во и сла́во ве́рных. Те́мже Тя неизрече́нно, я́ко Богома́терь, велича́ем.
Свети́лен:
Оте́ц сиро́т и вдов защи́тник, бога́тство ни́щих и боля́щих утеше́ние, ю́ных просвеще́ние и жезл ста́рости еси́, о́тче Михаи́ле, те́плый наш моли́твенниче и неуста́нный пред Бо́гом хода́таю. Моли́ Ми́лостиваго Бо́га, да просвети́т ду́ши на́ша све́том Своея́ благода́ти.
Моли́тва
О избра́нниче и уго́дниче Христо́в, священному́чениче Михаи́ле, Це́ркве Ру́сския сто́лпе непоколеби́мый, земли́ Вя́тския благо́е прозябе́ние, сро́дников твои́х предста́телю и наста́вниче!
Ты, от ю́ности во благоче́стии подвиза́яся, добр плод в терпе́нии прине́сл еси́. Егда́ же призва́ тя Госпо́дь на служе́ние па́стырское, тогда́ до́брый де́латель вертогра́да Бо́жия яви́лся еси́ и, ча́да своя́ в ве́ре и доброде́лании наставля́я, мно́гия же ду́ши во огра́ду церко́вную возвраща́я, о всех лю́дех те́плыя моли́твы возноси́л еси́. Во вре́мя же гоне́ния безбо́жнаго во смире́нии смерть кро́тко прия́л еси́, за уби́йц твои́х моля́ся, и в пе́рвых новому́ченицех земли́ Вя́тския просия́л еси́.
Ны́не у́бо при́зри на на́с, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Бу́ди па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник.
О свя́тче Бо́жий! Умоли́ Го́спода Бо́га, да соблюда́ется в ве́ре правосла́вней Оте́чество на́ше и в нем досто́йно и пра́ведно прославля́ется и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Священномученику Михаилу, пресвитеру Орловскому Священномученику Михаилу, пресвитеру Орловскому](img_b/057.jpg)