20 сентября.

Канон преподобному Макарию Оптинскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 4:

Прему́дрость Боже́ственную по́двиги и труды́ стяжа́в,/ ста́рческаго служе́ния сугу́бую благода́ть восприя́л еси́,/ да́ром же сло́ва свы́ше обогаще́нный,/ Бо́гу и лю́дем усе́рдно послужи́л еси́,/ о́тче богому́дре Мака́рие,/ моли́ Христа́ Бо́га// спасти́ся душа́м на́шим.

Кано́н преподо́бнаго, глас 4.

Песнь 1

Ирмос: Мо́ря чермну́ю пучи́ну/ невла́жными стопа́ми,/ дре́вний пеше́ствовав Изра́иль,/ крестообра́зныма Моисе́овыма рука́ма,// Амали́кову си́лу в пусты́ни победи́л есть.

Припев: Преподобне отче Макарие, моли Бога о нас!

Смире́ния сла́дкий плод угото́ва днесь ста́рец богоблаже́нный Мака́рий, грозд доброде́телей и умиле́ния вино́: прииди́те, наслади́теся вси, па́мять свяще́нную того́ пра́зднующе.

Припев: Преподобне отче Макарие, моли Бога о нас!

Ми́ра отри́нул еси́ тьму, в ми́ре Христо́ве упокоева́яся, пучи́ну жите́йскую ле́гце премину́л еси́ и, вся оста́вив Христа́ ра́ди, сокро́вище духо́вное стяжа́л еси́, ку́плею смире́ния и послуша́ния.

Припев: Преподобне отче Макарие, моли Бога о нас!

Испи́л еси́ сла́дость Ду́ха и благода́ти хлеб вкуша́л еси́, во отрече́нии твое́м от ми́ра вспять не озира́яся, но, преподо́бнически потруди́вся, дре́во возрасти́л еси́ и́стиннаго богопозна́ния.

Припев: Преподобне отче Макарие, моли Бога о нас!

Ревну́я получи́ти от Бо́га да́ры разуме́ния, росо́ю Небе́сною угаси́л еси́ пла́мень вожделе́ний и, ту́чами слез напои́в ду́шу свою́, дости́гл еси́ боже́ственнаго безстра́стия.

Сла́ва Отцу́ и Сы́ну и Свято́му Ду́ху:

Ели́ка обеща́ Госпо́дь, воздае́т ти, я́ко смиря́яй себе́ возвы́сится; те́мже мы́сленное Не́бо отве́рзеся тебе́, Мака́рие а́вво богоблаже́нне.

ъ

И ны́не и при́сно и во ве́ки веко́в. Ами́нь.

Богоро́дичен: На Тя наде́ющеся, обурева́емии по́мощь обрета́ют, стена́ бо еси́ необори́мая прибега́ющим к Тебе́; те́мже лю́тость враго́в на́ших низложи́, Мари́е, Де́во Богоблаже́нная.

Песнь 3

Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,// несть бо свят, па́че Тебе́, Человеколю́бче.

Припев: Преподобне отче Макарие, моли Бога о нас!

И́стины сладча́йший глас послу́шал еси́, пре́лести ми́ра отве́ргл еси́, по́сох взем богоприя́тнаго послуша́ния, на высоту́ доброде́телей возше́л еси́, о́тче, уста́вом оте́ческим после́дуя.

Припев: Преподобне отче Макарие, моли Бога о нас!

Боже́ственныя благода́ти сподобля́емь, преподо́бне, зако́ном Христо́вым пита́еши ум, и ду́шу за́поведьми снабдева́еши, те́мже се́рдцем просвеще́нным вопие́ши: несть свят па́че Тебе́, Человеколю́бче.

Припев: Преподобне отче Макарие, моли Бога о нас!

Отжени́ злоко́зненнаго де́мона от ста́да твоего́, блаже́нне, не терпи́т бо благоуха́ния смире́ния и отбега́ет, тебе́ прибли́жшуся, те́мже возвесели́ сердца́ вопию́щих: несть свят па́че Тебе́, Человеколю́бче.

Сла́ва Отцу́ и Сы́ну и Свято́му Ду́ху:

Безче́стие бо и укори́зны смиренному́дренно терпя́, нра́ву Влады́чню подража́л еси́, о́тче, те́мже дерзнове́нно вопия́л еси́ ко Христу́ Бо́гу: несть свят па́че Тебе́, Человеколю́бче.

И ны́не и при́сно и во ве́ки веко́в. Ами́нь.

Богоро́дичен: Иде́же хо́щет Бог, естества́ побежда́ется чин, де́вствуеши бо и Отроча́ ражда́еши и во объя́тиих Твои́х Невмести́маго но́сиши, Подаю́щаго моли́твами Твои́ми спасе́ние душа́м на́шим.

Седа́лен, глас 6:

О Го́споде ревностию пламене́я, стра́сти и по́мыслы бо́дренною моли́твою отгна́л еси́, алка́л и жа́ждал еси́ моли́твы серде́чныя и, от прему́драго наста́вника вразумля́емь, сла́дость благ Небе́сных вкуси́л еси́, сне́сти бра́шно забыва́яй, преподо́бне, и́мя Сладча́йшаго Иису́са призыва́я непреста́нно.

Сла́ва, и ны́не, глас то́йже:

Кре́пкую на де́моны побе́ду, мона́шескаго жития́ о́браз и ста́рчества О́птинскаго похвалу́ в пе́снех воспои́м Мака́рия богоблаже́ннаго, той бо дерзнове́ние ве́лие стяжа́ ко Христу́, смире́нием Тому́ подо́бяся, и мо́лится непреста́нно о душа́х на́ших.

Песнь 4

Ирмос: Любве́ ра́ди, Ще́дре, Твоего́ о́браза,/ на Кресте́ Твое́м стал еси́,/ и раста́яшася язы́цы;/ Ты бо еси́, Человеколю́бче,// кре́пость моя́ и хвале́ние.

Припев: Преподобне отче Макарие, моли Бога о нас!

Красе́н доброде́тельми и́ноческими, друг Женихо́в вои́стину яви́лся еси́, невестово́диши бо и обруча́еши Христу́ возлю́бленных чад Бо́жиих. Приведи́ к Тому́ и нас, Мака́рие о́тче, на тя наде́ющихся.

Припев: Преподобне отче Макарие, моли Бога о нас!

Ра́дости испо́лни сердца́ на́ша, о́тче, печа́ль и тяготу́ греха́ отыми́ и слеза́ми покая́ния в све́тлыя ри́зы смире́ния облещи́ся помози́ нам, да ве́рная ча́да твоя́ нарица́емся.

Сла́ва Отцу́ и Сы́ну и Свято́му Ду́ху:

На твоя́ моли́твы наде́ющеся, неду́гов многоразли́чных, душе́вных и теле́сных, исцеле́ние прие́млем, воспева́юще просла́вльшаго тя Го́спода, Мака́рие, о́тче наш.

И ны́не и при́сно и во ве́ки веко́в. Ами́нь.

Богоро́дичен: Егда́ на́йде на Тя Дух Святы́й, Сень Боже́ственная одушевле́нная, Христо́с вочелове́чився, Ада́ма обнови́; тем Тя, Де́во, мо́лим: не оста́ви нас во гресе́х погиба́ющих.

Песнь 5

Ирмос: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Припев: Преподобне отче Макарие, моли Бога о нас!

Моли́твою непреста́нною к Бо́гу пламене́я, приходя́щих ти сердца́ возгрева́л еси́; помози́ и нам ны́не, о́тче Мака́рие, па́мять твою́ соверша́ющим све́тло, ве́ру несумне́нну соблюсти́.

Припев: Преподобне отче Макарие, моли Бога о нас!

А́нгельски, преподо́бне, ревну́я о слу́жбе боже́ственней, благозву́чны устроя́еши ли́ки церко́вныя, пе́рвее у́бо в се́рдце твое́м явля́я одушевле́нный Бо́жий орга́н.

Припев: Преподобне отче Макарие, моли Бога о нас!

Ки́ими гла́сы воспое́м тя? Или́ ки́я трубы́ возвестя́т христоподража́тельное смире́ние твое́? Недоуме́нием объя́ти, немо́лчно вопие́м ти: согреше́ний на́ших очище́ние испроси́, всече́стне.

Сла́ва Отцу́ и Сы́ну и Свято́му Ду́ху:

А́ще и в телеси́ немощне́м пожи́л еси́, но тверде́йши бысть адама́нта душе́вная кре́пость твоя́, осно́вана бо бе на ка́мени ве́ры. Те́мже утвержда́еши немощны́я и па́дшия возставля́еши, о́тче всеще́дре.

И ны́не и при́сно и во ве́ки веко́в. Ами́нь.

Богоро́дичен: Испове́дуем Тя вои́стину Богоро́дицу, Де́во Чи́стая, Ты бо еси́ Сви́ток, в не́мже написа́ся Сло́во О́тчее, Его́же моли́ изгла́дити рукописа́ние грех на́ших.

Песнь 6

Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:// от тли изба́ви мя, Иису́се, Царю́ сил.

Припев: Преподобне отче Макарие, моли Бога о нас!

Е́же от святых оте́ц преда́нием назида́емь, чад твои́х богому́дро науча́еши, о́тче наш Мака́рие; те́мже из исто́чника чи́стаго всю зе́млю Ру́сскую напоя́еши.

Припев: Преподобне отче Макарие, моли Бога о нас!

А́вво богопросвеще́нный, вели́кому дре́внему Мака́рию тезоимени́тый, вся по о́бразу дре́вних уста́вов в скиту́ свята́го Предте́чи устро́ил еси́ и я́ко но́вую Фиваи́ду сей показа́л еси́: не оста́ви и нас твои́м попече́нием.

Припев: Преподобне отче Макарие, моли Бога о нас!

Взыска́ша наставле́ния твоего́ мно́зи лю́дие, о́тче преподо́бне, мона́си и прости́и, му́жие и жены́, ста́рцы и ю́ноши; ты же всем вся быв, в простоте́ серде́чней на по́льзу душе́вную всех учи́л еси́.

Сла́ва Отцу́ и Сы́ну и Свято́му Ду́ху:

Я́ко дре́во благово́нное процве́л еси́, о́тче Мака́рие, моли́тву серде́чную непреста́нно вознося́, и плод любве́ многокра́тный прине́сл еси́, доброде́тельми смире́ния и милосе́рдия благоуха́яй.

И ны́не и при́сно и во ве́ки веко́в. Ами́нь.

Богоро́дичен: Ороси́ Тя боже́ственный Дождь, и естество́ земно́е нетле́нием процвете́, Де́во Богора́дованная, Ты бо и́стинный Свет родила́ еси́.

Конда́к, глас 3:

Блаже́нству тезоимени́тый,/ девятери́цу блаже́нств испо́лнил еси́/ и тяготы́ притека́ющих к тебе́,/ я́ко благо́е и́го Христо́во, поне́сл еси́,/ о всех душе́ю боле́знуя/ и всех вмеща́я в се́рдце свое́м./ Те́мже не забу́ди нас, чад твоих,// О́птинская похвало́, Мака́рие блаже́нне.

И́кос:

Оте́ческих нра́вов подража́телю и богоно́снаго Паи́сия ди́вный насле́дниче, благода́ть ста́рчества прии́м, сей тала́нт духо́вный преумно́жил еси́, преподо́бне о́тче наш Мака́рие, и незави́стно пре́дал еси́ ученико́м свои́м, с ни́миже досто́йно тя восхваля́ем: Ра́дуйся, усе́рдный де́лателю ни́вы боже́ственныя; ра́дуйся, па́стырю до́брый слове́сных ове́ц. Ра́дуйся, кни́жныя прему́дрости взыска́вый; ра́дуйся, моли́тве серде́чней прилежа́вый. Ра́дуйся, оте́ческих преда́ний храни́телю; ра́дуйся, оби́тели прему́дрый устрои́телю. Ра́дуйся, писа́ньми твои́ми нас умудри́вый; ра́дуйся, о́браз смире́ния нам яви́вый. Ра́дуйся, ча́да с любо́вию назида́вый; ра́дуйся, мно́гия к покая́нию приводи́вый. Ра́дуйся, ста́рцев ди́вных воспита́вый; ра́дуйся, правосла́вную ве́ру в немощны́х душа́х утверди́вый. Ра́дуйся, О́птинская похвало́, Мака́рие блаже́нне.

Песнь 7

Ирмос: В нача́ле Безнача́льное Сло́во,/ со Отце́м и Ду́хом,/ Сын Единоро́дный, благослове́н еси́// и превозноси́мый, Бо́же оте́ц на́ших.

Припев: Преподобне отче Макарие, моли Бога о нас!

Богому́дре ста́рче Мака́рие, собесе́дник духоно́сный был еси́ святи́телем прему́дрым и учи́телем мирски́м, ти́и бо, в простоте́ твое́й Небе́сную му́дрость прозрева́юще, науча́хуся зако́ну боже́ственному.

Припев: Преподобне отче Макарие, моли Бога о нас!

Апо́стольских преда́ний ве́рный храни́телю, богому́дрых слове́с святы́х усе́рдный списа́телю и оте́ческих творе́ний прему́дрый изда́телю, вся в па́мяти твое́й возвесели́, ди́вный о́тче Мака́рие.

Припев: Преподобне отче Макарие, моли Бога о нас!

Глави́зна доброде́телей есть смире́ние, и а́ще о́ное стя́жеши, вся тем приобря́щеши, а́ще же ни, всу́е труди́шися, та́ко глаго́лал еси́, блаже́нне о́тче. Помози́ и нам сию́ цари́цу доброде́телей стяжа́ти.

Сла́ва Отцу́ и Сы́ну и Свято́му Ду́ху:

О́птинская свире́ль, возвеселя́ющая ду́шу, и о́вцы Христо́вы зову́щая к па́жити благода́тней, Мака́рий блаже́нный ны́не церко́вное собра́ние созыва́ет, Бо́га в Тро́ице Святе́й прославля́ти.

И ны́не и при́сно и во ве́ки веко́в. Ами́нь.

Богоро́дичен: Ублажа́ем Тя, Богоро́дице Де́во, и хва́лим Тя недосто́йными усты́, Ты бо еси́ Боже́ственная Дверь Царя́ ца́рствующих. Почита́ющих Тя любо́вию, спаси́.

Песнь 8

Ирмос: Ру́це распросте́р, Дании́л,/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Припев: Преподобне отче Макарие, моли Бога о нас!

Слу́жбе Боже́ственней прилежа́в, преподо́бне Мака́рие, вся до́бре в до́ме Бо́жии устроя́л еси́; те́мже и ду́ши стра́ждущих зде исцеле́ние прие́млют, во е́же пе́ти: благослови́те, вся дела́ Госпо́дня, Го́спода.

Припев: Преподобне отче Макарие, моли Бога о нас!

Иде́же со́брани есмы́ твою́ па́мять творя́ще, та́мо пребу́ди с на́ми, ста́рче благода́тный, и вразуми́ нас богому́дрыми словесы́ твои́ми, и разсужде́ние духо́вное стяжа́ти помози́, да вы́ну пое́м согла́сно: благослови́те, вся дела́ Госпо́дня, Го́спода.

Припев: Преподобне отче Макарие, моли Бога о нас!

Ве́дуще по́двиги твоя́ сокрове́нныя, о́тче Мака́рие, мо́лим тя приле́жно: вразуми́ нас и наста́ви словесы́ боже́ственными, во е́же пе́ти: благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Оте́ческое преда́ние да храни́м тве́рдо твои́ми моли́твами, ста́рче ди́вный, и, е́же от тебе́ насле́дие прия́хом, сие́ потщи́мся не расточа́ти, оба́че ту́не от него́ дая́ти тре́бующим, да преумно́жится сла́ва Го́спода во ве́ки.

И ны́не и при́сно и во ве́ки веко́в. Ами́нь.

Богоро́дичен: Богороди́тельнице Чи́стая, Наде́ждо ненаде́емых, души́ моея́ я́звы грехо́вныя очи́сти ми́лостию от Тебе́ рожде́ннаго Све́та непристу́пнаго, Просвеща́ющаго вся́ческая.

Песнь 9

Ирмос: Сотвори́ держа́ву мы́шцею Свое́ю,/ низложи́ бо си́льныя со престо́л,/ и вознесе́ смире́нныя Бог Изра́илев./ В ни́хже посети́ нас Восто́к с высоты́,// и напра́вил ны есть на путь ми́ра.

Припев: Преподобне отче Макарие, моли Бога о нас!

Ще́дрому Бо́гу служа́, не утаи́л еси́ от дарова́ний духо́вных, преподо́бне, раздава́я всем без ме́ры, никого́же от жа́ждущих лиши́в воды́ живы́я, но, я́ко ма́ти, о ча́дех свои́х и до ны́не пече́шися.

Припев: Преподобне отче Макарие, моли Бога о нас!

Я́ко ве́рен во́ин Царя́ Небе́снаго, страстьми́ не побежде́н пребы́л еси́, де́моны устраши́л еси́, Мака́рие о́тче, смире́нием тех низлага́я; сего́ ра́ди сла́вим Христа́, тя укре́пльшаго.

Сла́ва Отцу́ и Сы́ну и Свято́му Ду́ху:

Твоя́ свяще́нная па́мять днесь наста́ и я́ко ца́рская трапе́за всем яви́ся, преподо́бне, пита́еши бо всех, к тебе́ притека́ющих, ви́ном любому́дрия и бра́шном смире́ния, да никто́же тощ и неуте́шен оты́дет.

И ны́не и при́сно и во ве́ки веко́в. Ами́нь.

Богоро́дичен: Я́же спасе́нию на́шему послужи́ти угото́вана, от непло́дных ложе́сн А́нниных происхо́дит; Ве́тхий Заве́т прехо́дит, Но́вый же явля́ется, и Со́лнце Пра́вды востае́т нам обетова́нное.

Свети́лен:

Сликовству́ют А́нгельстии чи́ни и мона́хов мно́жества в светоно́сней па́мяти О́птинскаго ста́рца Мака́рия, я́ко собесе́дник бысть о́нем, и други́м яви́ся наста́вник, и святы́х собо́ру соприча́стник.

Молитва

О свяще́нная главо́, преподо́бне о́тче, преблаже́нне а́вво Мака́рие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.